ئەڤرۆ نیوز، لەزگین جوقی:

ئەندامەکێ جڤاتا نوونەرێن عیراقێ دیار کر کو بزاڤ دھێنەکرن ھەموو ئەو کەسێن ژ بەر سۆتنا دەخلۆدانی گیانی خوە ژ دەست داین ب شەھید بھێنە ھژمارتن و گۆت: “مە دگەل ھندەک پەرلەمانتارێن دی ئەڤ داخوازە ژ پەرلەمانێ عیراقێ کریە”.

حسێن حەسەن نەرمۆ، ئەندامێ جڤاتا نوونەرێن عیراقێ بۆ ئەڤرۆ نیوز دیار کر کو ئەو کەسێن پشت بەستن ل سەر خوە کرین بۆ ڤەمراندنا ئاگرێ بەربوویە دەخلۆدانێ وان د ئەنجام دا ژ بەر سۆتنا دەخلۆدانی بووینە قوربانی و گیانی خوە ژ دەست داین، وان بزاڤ کرینە د ناڤ ھۆلا پەرلەمانێ عیراقێ دا ئەو کەس ب شەھید بھێنە ھژمارتن، چونکو وان کەسان بەرەڤانی ژ دەخلۆدانی کرینە، لەورا یێن ھاتینە سۆتن و گیانێ خوە ژ دەستداینە و گۆت : “ھندەک پەرلەمانتارێن عیراقی دگەل مە ئەڤ کارە ئەنجامداینە ھەموو ئەو کەس ببنە شەھید”.

ناڤھاتی خویا کر کو ئەڤ سالە دەمێ ئاگر بەربوویە دەخلۆدانێ جۆتیاران بتنێ ل دەشتا نەینەوا ٦ ھەتا ٧ کەسان د ناڤ روودانا سۆتنا دەخلۆدانی دا گیانێ خوە ژدەستداینە ژ وان ژی سێ کەسان ل شنگالێ و کەسەکێ شەبەک ل تەلەعفەر ژی حالەت ھەبووینە رەنگە ل پارێزگەھێن دی ژی حالەت ھەبن ھێشتا نەگەھشتبنە وان، لێ دەمێ ئەڤ پێشنیارە دبیتە بریار دێ ناڤێن وان ھەموو کەسان ھێنە کۆمکرن یێن ب روودانێن سۆتنا دەخلۆدانی ئەڤ سالە گیانێ خوە ژدەستداین و گۆت: “دێ بڕیار ل سەر ھێتە دان ببنە شەھید و ھەموو ماف و ئمتیازاتێن شەھیدان ژ کەسوکارێن وان بگرن”.

ئەڤرۆ نیوز، عەلی حاجی:

ب ھەلکەفتا 43 سالیا شەھیدکرنا رێبەر مەلا حسێن کو ل 23/4/1976 ژ لایێ رژێما بەعسڤە ھاتبوو شەھیدکرن، لقێ ھەشت یێ پارتی ل زاخۆ رێورەسمەکێ رێزگرتنێ ل بنەمالا شەھیدێ ناڤبری بەرھەڤ کر.

شڤان شێخو، بەرپرسێ پشکا جەماوەری ل لقێ ھەشتێ پارتی دیموکراتی کوردستان بۆ ئەڤرۆ نیوز دیار کر، شەھید (رێبەر مەلا حسێن) شانەکا نھێنی د ناڤ سەنتەرێ باژێرێ زاخۆ دا ھەبوو و د ھەمان دەم دا پێشمەرگێ شۆڕەشا گولانێ ژی بوو و گۆت: “ژ بەر وێ خەباتا شەھیدێ ناڤبری کری، مە وەکو لقێ ھەشت ب فەر زانی ب ھەلکەفتا شەھیدکرنا وی رێورەسمەکێ رزگرتنێ ل بنەمالا وی ساز بکەین و خێزانا شەھیدی خەلات بکەین، دیسا ھەر د رێورەسمێ دا پرتووکەکا تایبەت ب خەباتا شەھیدێ ناڤبری و ب پشتەڤانیا لقێ ھەشت ھاتیە چاپکرن؛ ھاتە بەلاڤکرن و تێدا بەحس ل چەندین قووناغێن ژیانا وی و خەباتا وی یا نەتەوی ھاتیە کرن، ئەم پشتەڤانیێ ل وێ چەندێ ژی دکەین پەیکەرەک بۆ شەھید رێبەر مەلا حسێن و شەھید کوردستان سالحی ل باژێرێ زاخۆ بھێتە دانان”.

ئەحمەد سەعید، بەرپرسێ لقێ زاخۆ یێ ئێکەتیا قوتابیێن کوردستانێ بۆ ئەڤرۆ نیوز گۆت: “ئەم شەھید رێبەر مەلا حسێن ب شەھیدێ ئێکەتیا قوتابیێن کوردستانێ و سمبۆلا وێ دزانین، ژ بەرکو د بیاڤێ قوتابیان دا خزمەتەکا بەرچاڤ ھەبوویە، مە پێشنیار کری یە د ناڤ زانکۆیا زاخۆ دا پەیکەرەک بۆ شەھیدان (رێبەر مەلا حسێن) و (کوردستان سالحی) ب شێوەکێ جوان و رێکوپێک بھێتە دانان، د نوکە دا مە پێدڤی ب رازیبوونا زانکۆیا زاخۆ ھەیە ھەتا بشێین کارەکێ ب ڤی رەنگی ئەنجام بدەین”.

ئەڤرۆنیوز، عەلی حاجی:

دو وەلاتیێن گوندێ بێرمانێ ل باکوورێ کوردستانێ د خابیری دا خەندقین و ھەتا نوکە لاشێ وان نەھاتیە دیتن، لەو وەلاتیێن گوندێ ناڤبری داخواز ژ خەلکێ باتیفا کریە ھەردەما لاشێ وان ھەردو کەسان دیت؛ ئاگەھدار بکەن.

محەمەد موراد ئاکنجیێ ناحیا باتیفا بۆ ئەڤرۆ نیوز دیار کر، گوندێ بێرمانێ نێزیکی سنوورێ گوندێ مە یە و بەری سێ رۆژان گەنجەکێ ژیێ وی د ناڤبەرا 30 ھەتا 35 سالیێ و زارۆیەکا 12 سالی د ئاڤا خابیری دا ل سنوورێ وەلاتێ تورکیا خەندقینە و لاشێ وان نەھاتیە دیتن، ژ بەرکو ئاڤ یا بۆشە، لەو رەنگە لاشێ وان ھات بیتە د سنوورێ کوردستانێ دا و گۆت: “ژ بەر ڤێ چەندێ گوندیێن گوندێ بێرمانێ داخواز ژ مە کری یە ھەردەما لاشێ وان ھەردو کەسا ھاتە دیتن؛ وان ئاگەھدار بکەین، داکو لاشێ وان بۆ گوندی َوان بھێتە ڤەگوھاستن”.

گۆتژی: “مە پۆلیس و جھێن پەیوەندیدار و خەلکێ دەڤەرێ ل سەر ڤێ روودانێ ئاگەھدار کرینە و دێ دھاریکار بین بۆ لێگەڕیانا تەرمێ وان ھەردو کەسان ھەتا کو دبینین”.