ئەڤرۆنیوز، عەلی حاجی:

رێڤەبەرێ ناحیا دەرکارێ بۆ ئەڤرۆ نیوز دیار کر، بەردەوامیا تۆپبارانکرنا سۆپایێ تورکیا، مەترسی ل سەر ژیانا وەلاتیێن دەڤەرێ دروستکریە و روودانێن ئاگربەربوونێ و سۆتنا ژینگەھێ و پاوانێ وەلاتیان زێدەتر لێھاتیە.

زێرەڤان موسا، رێڤەبەرێ ناحیا دەرکارێ د داخویانیەکێ دا خویا کر، ل گورەی وێ راپۆرتا ل بەردەستێ وان ھەر ژ رێکەڤتی ٢٩/٥ ھەتا رۆژا ٧/٦/٢٠١٩ رۆژانە دەڤەرێن سەر ب ناحیا دەرکارێ ڤە ژ لایێ سۆپایێ تورکیاڤە دھێنە تۆپبارانکرن و گۆت: “ھەر ژ وی دەمی ھەتا ئەڤرۆ ٣٣ جاران ئەو دەڤەر ھاتینە تۆپباران کرن، ئەڤ چەندە ژی بوویە ئەگەر زیانێن مەزن بەر ب ژینگەھێ و وەلاتیان بکەڤن، ھەر د ڤێ ھەیڤێ دا ژ بەر تۆپبارانا سۆپایێ تورکیا ئاگر ب ژینگەھێ کەڤتیە، دیسا بوویە ئەگەر ژی ئێدی بەرھەمێن جۆتیاران بەر ب لاوازیێ ڤە بچن”.

گۆتژی: “ئێدی ل دەڤەرا مە رەوش گەھشتیە وی رادەیی، وەکو رێڤەبەریا ناحیا دەرکارێ ئەم نەشێین گەرەنتیێ بدەینە ھەرکەسەکێ قەستا وان دەڤەران بکەت، ژ بەرکو رەوشا وان دەڤەران گەلەک خرابتر بوویە و سۆپایێ تورکیا ژی رۆژانە تۆپبارانا وان دەڤەران دکەت و چو جوداھیەکێ د ناڤبەرا پەکەکێ و وەلاتیان دا ناکەت”.

رێڤەبەرێ ناحیا دەرکارێ ئاشکرا ژی کر، ل رۆژا ٤/٦/٢٠١٩ رۆژا ئێکێ یا جەژنا رەمەزنا پیرۆز و گەنجەکێ ئێزدی یێ ئاکنجیێ کەمپا چەمشکۆ بناڤێ (ئەمین سالح) د ژیێ ٢٢ سالیێ دا ب کارەکێ چاندنێ قەستا گوندێ کیزابێ دکەت، بەلێ ژ لایێ سۆپایێ تورکیاڤە دھێتەکوشتن و گۆت: “بەردەوامیا تۆپبارانکرنا تورکیا ئێدی ئەم ژی نەئارامکرینە، ژ بەرکو ئەم دترسین روودانێن مەزن یێن ئاگربەربوونێ ل وان دەڤەران روو بدەن کو ھەتا ترۆمبێلێن ئاگرڤەمراندنێ ژی نەشێن بگەھنە وان دەڤەرێن ئاسێ، زێدەباری وێ چەندێ د نوکە دا وەرزێ گەنمی یە و مەترسیەکا مەزن کەڤتیە سەر سۆتنا بەرھەمێ جۆتیارێن دەڤەرێ”.

زێرەڤان موسا ئاماژە ب وێ چەندێ ژی کر کو بابەتێ بەردەوامیا سۆپایێ تورکیا وەکریە ئێدی ئەو گەرەنتیا ساخلەمیێ نەدەنە چو کەسەکی ھەتا ترۆمبێلێن ئاگرڤەمراندنێ ژی، ژ بەرکو رۆژ بۆ رۆژێ رەوش خرابتر لێدھێت”.

ئەڤرۆ نیوز، حەمۆ محەمەد:

رێڤەبەریا گشتی یا رەوشەنبیری و ھۆنەری ل دھۆکێ ب ھەڤکاری ل گەل سەرۆکاتیا باژێڕڤانیا دھۆکێ و ب پشتەڤانیا (فەرھاد ئەمین ئەترووشی) پارێزگەرێ دھۆکێ دێ رێورەسمێن کەرنەڤالێ حەفتێ یا رۆژا پارێزگەھبوونا دھۆکێ ب چەند چالاکیان ئەنجام دەەت.

رێڤەبەریا گشتی یا رەوشەنبیری و ھۆنەری ل پارێزگەھا دھۆکێ ئاشکرا کر، ل رۆژێن ١٢ و ١٣/٦/٢٠١٩ رێورەسمێن کەرنەڤالێ حەفتێ یێ رۆژا پارێزگەھبوونا دھۆکێ ب چەند چالاکیان ل دەمژمێر شەشێ ئێڤاری ل پارکا نەورۆز یا سەنتەرێ بازارێ دھۆکێ ئەنجام دەەت.

وەکو دیار ل رۆژا ٢٧/٥/١٩٦٩ دھۆک ببوو پارێزگەە کو ئێک بوو ژ دەستکەفتێن شۆرەشا ئیلۆنێ ب سەرۆکاتیا بارزانیێ نەمر، ھەر سال ئەڤ ھەلکەفتە ل دھۆکێ ب چەند چالاکیێن جودا دھێتە ساخکرن و کەرنەڤال دھێنە ئەنجامدان، لێ ئەڤ سالە ژ بەر کو دکەفتە د ھەیڤا رەمەزانا پیرۆز دا، کەرنەڤال بۆ رۆژێن ١٢ و ١٣/٦/٢٠١٩ ھاتە پاشختن.

ئەڤرۆ نیوز، قائید میرۆ:

ل سالا بۆری رێژا ھەرێما کوردستانێ بۆ فەریزا حەجێ ھاتبوو زێدەکرن و رێڤەبەرێ گشتیێ حەج و عومرێ ژی ل ھەرێما کوردستانێ دبێژیت، پێشبینی دھێتەکرن پشکا ھەرێما کوردستانێ ژ لایێ وەلاتێ سعودیێ ڤە بھێتە زێدەکرن.

شێخ قاسم بەرزنجی، رێڤەبەرێ گشتیێ حەج و عومرێ بۆ ئەڤرۆ نیوز دیار کر کو ھەرێما کوردستانێ چاڤەڕێ وەلاتێ سعودیێ دکەت بۆ زێدەکرنا پشکا ھەرێما کوردستانێ د پڕۆسا حەجا ئەڤ سالە دا، بەلێ ھەتا نوکە چو بەرسڤ بۆ وان ژ لایێ سعودیێ ڤە نەھاتینە، ئەڤە د دەمەکی دایە ل سالا بۆری ٥٠٠ کەس ھاتنە زێدەکرن بۆ بجە ئینانا فەریزا حەجێ، بەلێ ئەڤێن زێدە ب پارە ھاتنە ھنارتن و دبێژنێ حەجا بازرگانی کو ل ھژمارەکا مەزن یا وەلاتێن ئیسلامی ھەیە و ل ھەرێما کوردستانێ بۆ دەمێ چەند سالانە حەجا بازرگانی ژ حەجا ئاسایی ھاتیە جوداکرن.

ناڤھاتی ئاماژە دا وێ چەندێ کو ھەکە وەلاتێ سعودیێ وەکو سالا بۆری پشکا ھەرێما کوردستانێ زێدەکر، ئەڤە دێ وەزیرێ ئەوقاف و کاروبارێن ئاینیی ب وەکالەت بڕیارێ بدەت ئەڤ سالە پشکا زێدە ببیتە بازرگانی یان ژی ببیتە حەجا ئاسایی و گۆت: “ھێشتا مە بڕیارا دووماھیێ ل دۆر ئەڤێ پرسێ نەدایە، بەلێ ھەر چاوابیت زێدەکرنا پشکا ھەرێما کوردستانێ دێ کاریگەریێن باش ھەبن بۆ ڤێ چەندێ خەلکەکێ دی ئەڤی ئەرکێ ئاینی بجە بینیت”.

ئەڤرۆ نیوز، ئەمیر ئەترووشی:

بەرپرسێ راگەھاندنا ھێزێن پێشمەرگێ پاراستنا ژینگەھێ راگەھاند، ژ ئەگەرێ قەدەغەکرنا گرتنا ماسیا و سەرپێچیا ماسیگران ل سەر ڤێ بڕیاری، ھەتا نوکە ٣٥ ماسیگر ھاتینە دەستەسەرکرن و سۆزنامە ژێ ھاتینە وەرگرتن کو ئێدی ڤی کاری نەکەن.

موقەدم سیھاددین عەلی، بەرپرسێ راگەھاندنا ھێزێن پێشمەرگێ پاراستنا ژینگەھێ بۆ ئەڤرۆ نیوز دیار کر، سالانە ل مەھا ئادارێ و ھەتا مەھا شەش ژ بەر خەرزێ ماسیان؛ گرتنا وان دھێتە قەدەغەکرن و ئەڤ سالە ژی ھەمان بڕیار کەفتە د وارێ ب جھئینانێ دا، بەلێ گەلەک سەرپێچی ژ لایێ ماسیگران ڤە ھاتینە کرن و ب تنێ د ڤان سێ ھەیڤان دا ٣٠ ماسیگر ل سەر سکرێ مووسل و پێنج ماسیگر ژی ل سەر خابوورێ زاخۆ ب تۆمەتا گرتنا ماسیان ل دەمێ خەرزی ھاتینە دەستەسەرکرن.

ئاشکرا ژی کر کو پتریا ڤان ماسیگران ب تۆرێ ماسی دگرتن و پشتی دەستەسەرکرنێ سۆزنامە ژێ ھاتینە وەرگرتن کو ئێدی ڤی کاری نەکەن و ماسیا ل دەمێ خەرزی نەگرن و گۆت: ل گۆرەی قانوونا ھژمارە ٨ یا سالا ٢٠٠٨ کو ژ پەرلەمانێ کوردستانێ دەرکەفتیە، ھەر ماسیگرەکێ ماسیان ل دەمێ قەدەغەکرنێ بگریت، دێ ب کۆژمێ ١٠٠ ھەتا ٢٠٠ ملیۆن دینارێن عیراقی ھێتە سزدان.

ئەڤرۆ نیوز، بارزان مزووری:

پێشمەرگێ ھەردو شۆڕەشێن ئیلۆن و گولانێ (ئەحمەد سەرکافی) وەغەر کر و ئەڤرۆ ٩/٦/٢٠١٩ د رێورەسمەکی دا ب پشکداریا بەرپرسێ لقێ ٢٠ شێخان و رێڤەبەرێن میری و کەسایەتیێن دەڤەرا شێخان تەرمێ خودێ ژێ رازی ل گورستانا ناحیا قەسرۆک ھاتە ڤەشارتن.

عەبدولقادر ئەحمەد، کوڕێ خودێ ژێ رازی بۆ ئەڤرۆ نیوز دیار کر، ئەڤە دەمەک بوو بابێ وان تووشی نەخوشیەکێ بووی، لێ چارەسەریا وی ب باشی ھاتبوو کرن و رەوشا وی گەلەک باشتر بوو و گۆت: “ئەڤرۆ سپێدێ ژ نیشکەکێ ڤە بابێ من تووشی جەلتێ دبیت ھەتا مە گەھاندیە نەخۆشخانا تەنگاڤیان ل دھۆکێ گیانێ خوە ژ دەست دا”.

(ئەحمەد سەرکافی) پێشمەرگێ ھەردو شۆڕەشێن ئیلۆن و گولانێ بوو، ل سالا ١٩٦٩ پەیوەندی ب شۆڕەشا ئیلۆنێ کربوو، لیوایێ خانەنشینکری بوو، بەلێ ب مەرەما بەرەڤانیکرنا ئاخا کوردستانێ پشکداری د ھەموو شەرێن دژی رێکخراوا تیرۆرستی یا داعش دا کربوو.

ئەڤرۆ نیوز، عەلی حاجی:

زەلامەکی ل باژێڕێ زاخۆ ھەڤژینا خوە خەندقاند و ژ لایێ پۆلیسان ڤە ھاتیە دەستەسەرکرن و دانپێدان ب تاوانا خوە کریە.

ژێدەرەکی بۆ ئەڤرۆ نیوز دیار کر، ئەڤرۆ ٩/٦/٢٠١٩ پۆلیسێن زاخۆ ل سەر روودانەکا کوشتنێ ھاتنە ئاگەھدارکرن کو زەلامەکی ل تاخێ عەباسیکێ ل باژێرێ زاخۆ، پشتی پۆلیس گەھشتینە جھێ روودانێ دیار بوو وی زەلامی ھەڤژینا خوە د مالا خوە دا خەندقاندیە و لاشێ وێ بۆ نۆشداریا داد ل زاخۆ ھاتیە رەوانەکرن و ئەگەرێن روودانێ ژی ھەتا نوکە نەھاتینە زانین.

ل گور وی ژێدەری ڤەکۆلینێ د وێ روودانێ دا دەستپێکریە و تۆمەتبار ژی ژ لایێ پۆلیسان ڤە ھاتیە دەستەسەرکرن و دانپێدان ب تاوانا خوە کریە.

ئەڤرۆ نیوز، ئەمیر ئەترووشی:

پەرلەمانێ کوردستانێ بۆ خزمەتکرنا زارۆ و ژنێن ئێزدی یێن ل ژێر دەستێ داعش رزگاربووین و ئەوێن ماینە بێ خودان، پرۆژەک بەرھەڤکریە.
گۆلستان سەعید، جێگرا سەرۆکێ لیژنا کاروبارێن جڤاکی و مافێ مرۆڤی ل پەرلەمانێ کوردستانێ بۆ ئەڤرۆ نیوز دیار کر، ھژمارەکا زۆر یا ژن و زارۆیێن ئێزدی ل سالا ٢٠١٤ ل دەمێ کارەساتا شنگالێ کەفتبوونە دەستێن داعش و ژیانەکا نەخۆش و تەحل بۆراندیە و گەلەک ژ وان ژی پشتی رزگارکرنێ بێخودان ماینە و تووشی نەخۆشیێن دەروونی بووینە، لەوما مە پرۆژەک بەرھەڤکریە بۆ ھندێ خزمەتێن تایبەت بۆ وان بھێنە پێشکێشکرن.

ئاشکرا ژی کر کو ئەڤ پرۆژە دێ زێدەتر بۆ وان ژن و زارۆیان بیت ئەوێن دایکێن وان ھاتینە رەڤاندن یان ژی ژن ھاتیە رەڤاندن و دێ ھەول ھێنەدان تێکھەلی جڤاکی ببن و دێ ناسنامە و رەگەزنامە بۆ وان زارۆیان ھێنە دەرکرن و کار ل سەر لایەنێ وان یێ دەروونی ھێتە کرن.

ھژمارا کوردێن ئێزدی ل عیراقێ نێزیکی ٥٥٠ ھزار کەسانە، ل سالا ٢٠١٤ ل دەمێ کارەسا شنگالێ ٣٦٠ ھزار کوردێن ئێزدی ئاوارە بوون و نێزیکی ١٣٠٠ ئێزدیان شەھید بووینە و ١٧٥٩ زارۆکێن ئێزدی بێ باب ماینە و ٤٠٧ زارۆک بێ دایک ماینە و ٣٦٠ زارۆک ژی بێ دایک و باب ماینە د ژیانێ دا و دایک و بابێن ٢٢٠ زارۆکان ژی ھێشتا د دەستێ داعشێ دانە و سەرجەمێ زارۆکێن کوردێن ئێزدی یێن بێ دایک و باب دگەھیتە ٢٧٤٥ زارۆکان.