ئه‌ڤرۆ نیوز، بارزان مزوورى:
ئه‌ڤرۆ 51 سال ل سه‌ر كومكۆژیا شكه‌فتتا ده‌كان سه‌ر ب ناحیا ئه‌ترۆش ده‌رباز بون ل رێكه‌فتى 18/8/1969 هات بۆ ئه‌نجام دان ،د ووێ كومكۆژیێ دا 77 كه‌س ژ ژن و زارۆك و كه‌سێن دانعه‌مر هاتن سوتن دناڤ شكه‌فتنێ دا ژلایێ دوو فرۆكێن له‌شكه‌رى یێن رژێما به‌عس یا گور ب گور.
خه‌لیل ده‌كانى، ئێك ژ رزگاربویێن شكه‌فتا ده‌كان بۆ ئه‌ڤرۆ نیوز گۆت:د رۆژه‌كا وه‌كۆ ئه‌ڤرۆ دا هه‌شت كه‌س ژ خێزانا من دناڤ ڤێ شكه‌فتنێ دا هاتن سوتن بتنێ ئه‌ز ژ مالباتێ رزگاربوم خه‌لكێ گوندێ ده‌كان ژبه‌ر هێرشێن فرۆكێن حیزبا به‌عس دناڤ شكه‌فتێ دا خۆ ڤه‌شارت بون ژ ترسێن هێرشا وان له‌شكه‌رێ رژێما به‌عس ب دوو فرۆكێن له‌شكرى شكه‌فت بوردومان كر زارۆك و ژن و دانعه‌مرێن گوندى دناڤ شكه‌فتێ دا دناڤ جهێن خودا هاتن سوتن د ئه‌نجام دا 77 كه‌س شه‌هید بوون.
ناڤهاتى خویاكر: بۆ ماوێ 15 رۆژان پشتى بوردومانێ خه‌لكێ گوندى ب هه‌ڤكارى ل گه‌ل هێزێن پێشمه‌رگه‌ى ته‌رمێن وان دناڤ چار جهان دا هاتنە ڤه‌شارتن وه‌ك گۆره‌كێ ب كوم هه‌تا نها ئه‌و ته‌رم دناڤ وان هه‌رچار گوران لێك نه‌هاتینه جوداكرن،
ناڤهاتى گۆت:ژیێ من هه‌شت سال بوون ده‌مێ ئه‌ڤ كومكۆژیه‌ك هاتیه ئه‌نجام دان به‌لێ جهێ داخێ یه هه‌تا نها چ مونومێنت بۆ وان شه‌هیدا نه‌هاتینه دروست كرن.
ئەڤرۆ نیوز:
وەزارەتا ساخلەمیا هەرێما کوردستانێ ئامارێن نوو یێن تووشبوون و وەغەرکرنێ ب کۆرۆنایێ د 24 دەمژمێرێن بوری دا بەلاڤکرن و دیار کریە، کو 26 تووشبوویان وەغەرکریە و 618 کەسێن دی تووشی کۆرۆنایێ بووینە.
618 تووشبوویێن نوو یێن هەرێما کوردستانێ ب ڤی شێوەی بووینە:
هەولێر: 241 تووشبووی، سلێمانی: 91 تووشبووی،
گەرمیان: 25 تووشبووی، راپەرین: 92 تووشبووی، دهۆک: 153 تووشبووی، هەلەبجە: 43 تووشبووی.
دیسان 283 تووشبووی باشبووینە، ل هەولێرێ: 124 کەس، ل گەرمیان: 34 کەس، راپەرین: 36 کەس،
هەلەبجە: 23 کەس، دهۆک: 66 کەس.
هەتا نوکە ل هەرێما کوردستانێ هژمارا تووشبوویێن کۆرۆنایێ گەهشتە 22 هەزار و 278 کەسان، ژ وان ژی 12 هەزار و 807 تووشبووی چێبووینە و 803 کەسان وەغەرکریە.
ئەڤرۆ نیوز:
وەزارەتا ساخلەمی و ژینگەها عیراقێ راگەهاند: د ٢٤ دەمژمێرێن بوری دا، چار هزار و ٥٧٦ حالەتێن نوو یێن کۆرۆنایێ، دو هزار و ٨٩٥ حالەتێن چێبوونێ و ٨٢ حالەتێن وەغەرکرنێ هاتینە تۆمار کرن.
هەتا نوکە ١٨٤ هزار و ٧٠٩ کەس ل عیراقێ تووشی ڤایرۆسێ کۆرۆنایێ بووینە، هەتا ڤی دەمی شەش هزار و ٣٦ کەسان وەغەرکریە، ١٣١ هزار و ٨٤٠ کەس ژی باشبووینە.
ئەڤرۆ نیوز، زنار تۆڤی:
پشتی کو جڤاتا وەزیرێن هەرێما کوردستانێ، دابەشکرنا مووچێ هەیڤا سێ ب هەمان میکانیزمێ هەیڤا شواتێ راگەهاندی، کو 21-50٪ مووچە ب لێبرین دێ هێتە دابەشکرن، بریکاری وەزارەتا شەھیدان و ئەنفالکریان گۆتیە: مووچێ کەسوکارێن شەھیدان و ئەنفالکریان، بێی لێبرین دێ هێتە دابەشکرن.
بەرەڤان حەمدی، بریکارێ وەزارەتا شەھیدان و ئەنفالکریان راگەهاندیە: ل سەر راسپاردا سەرۆکێ حوکمەتێ و جڤاتا وەزیران مووچێ هەیڤا ئادارێ یێ کەسوکارێن شەھیدان و شەھیدێن سەنگەری و جینۆسایدێ و ئەنفالان و شەھیدین نیشتمانی، وەکو هەیڤا بەری نوکە مووچێ وان 100% و بێی لێبزین دێ هێتە دابەشکرن .
ئەڤرۆ نیوز:
ئه‌ڤرۆ ئێڤارى 18-8-2020 د. عەلی ته‌ته‌ر پارێزگه‌رێ دهۆكێ پێشوازیا ل (د.سامان به‌رزنجى) وه‌زیرێ ساخلەمیێ یێ هه‌رێما كوردستانێ كر.
دهه‌ڤدیتنه‌كێدا ب ئاماده‌بوونا رێڤه‌به‌رێ گشتى یێ ساخله‌میێ ل پارێزگه‌هێ به‌حسێ ره‌وشا دام وده‌زگه‌هێن ساخله‌میێ ل پارێزگه‌ها دهۆكێ و ئه‌و خزمه‌تكاریێن پێشكێشى وەلاتیان دكه‌ن و چاوانیا بجهئینانا رێنمایێن ساخله‌میێ ژبۆ خوە پاراستنێ ژ ڤایرۆسێ كۆرۆنایێ ب گشتى هاته كرن.
وه‌زیرێ ساخلەمیێ یێ هه‌رێما كوردستانێ دپه‌یڤه‌كێدا پیرۆزباهیا پارێزگه‌رێ دهۆكێ كر ل دور وه‌رگرتنا پوستێ پارێزگا‌ریا دهوكێ وسه‌ركه‌فتن بو خواست و سوپاسیا پارێزگه‌رێ دهۆكێ و ژوورا ئۆپه‌راسیونا كر، ل هه‌مبه‌ر بجهئینانا رێنمایێن وه‌زاره‌تا ساخلەمیێ بۆ به‌رهنگاربوونا ڤایرۆسێ كۆرۆنایێ.
ژلایێ خوە ڤه پارێزگارێ دهۆكێ دیاركر كو ڤایروسێ كۆرۆنایێ نه‌خوشیه‌كا به‌ربه‌لاڤه و ل پتریا وه‌لاتێن جیهانێ په‌یدابوویه و كارتێكرنه‌كا خراب كریه سه‌ر هه‌موو سه‌كته‌رێن ژیانێ، لەوما دڤێت هه‌موو لایه‌ن بۆچوونێن وه‌زاره‌تا ساخله‌میێ ل به‌رچاڤ وه‌رگرن وپێگریێ ب رێنمایێن خوە پاراستنێ ژ ڤایرۆسێ كۆرۆنایێ بكه‌ن.
ئه‌ڤرو سپێدێ وه‌زیرێ ساخلەمیێ یێ هه‌رێما كوردستانێ سه‌را چه‌ندین فه‌رمانگه‌هێن وه‌زاره‌تێ ل سنورێ قه‌زایێن دهۆك و زاخۆ وجهێن دى دایە و ژنێزیك هایدارى ره‌وشا وان فه‌رمانگه‌ها بوویه نه‌خاسمه نه‌خوشخانێن هاتینه ته‌رخانكرن بۆ دووڤچونا نه‌ساخێن ڤایرۆسێ كۆرۆنایێ.
ئه‌ڤرۆ نیوز ، زنار تۆڤى:
خانما سترانبێژ رێزان شێروان، كو نوكه ل باژێرێ ئیسته‌نبۆلێ دژیت، د دیداره‌كێ دا بۆ ئه‌ڤرۆ نیوز دیار كر: پشتى به‌لاڤبوونا ڤایرۆسێ كۆرۆنایێ وێ هه‌موو كارێ خوه یێ هونه‌رێ راوه‌ستاندبوو، لێ نوكه جاره‌كا دى وێ ده‌ست پێكریه‌ڤه، نوكه ئه‌و مژوولى تۆماركرنا سترانه‌كا دوقولى یه، كو وێ ل گه‌ل بابێ خوه هونه‌رمه‌ند كازۆى گۆتیه، دیسان ل ڤان نَێزیكان ئه‌و دێ چیته باژێرێ وانێ و دێ وێ سترانێ ل وێرێ كلیپ كه‌ت.
رێزانێ گوت ژى: ئه‌و دناڤا مالباته‌كا هونه‌رى دا مه‌زن بوویه و كو بابێ وێ هونه‌رمه‌ند كازۆى گه‌له‌ك هاریكاریێ وێ كریه و هه‌ر ژ زارۆكاتیا خوه وێ ستران گۆتینه، دیسان وێ ل گه‌ل بابێ خوه و فاتێ و برایێ خوه ده‌روێشى كۆما شێروان دامه‌زراند و وان چه‌ندین ئه‌لبۆم ژى به‌لاڤ كرینه، ل سالا 2014 وێ ئه‌لبۆما خوه یا نه‌خرى یا ب ناڤێ ” ژ ته دوور بم” به‌لاڤ كریه، كو ژ 14 تراكان پێك دهات، چه‌ندین ستران ژ وێ ئه‌لبۆمێ ژى كلیپ كرینه، دیسان هه‌تا نوكه وێ 9 كلیپ ژى چێكرینه.
ناڤهاتیێ گۆت ژى: هونه‌رێ كوردى گه‌له‌ك یێ ده‌وله‌مه‌نده، هه‌ر چه‌نده گه‌له‌ك هونه‌رمه‌ندێن كورد یێن باكور سترانێن كوردى كرینه توركینه و وان زیان گه‌هاندیه هونه‌رێ كوردى، دیسان هنده‌ك سترانبێژێن گه‌نج ژى هه‌نه موزیكێن پۆپ و راپ و جۆرێن دیتر یێن موزیكێ خستینه ناڤ موزیكا كوردى، وان سترانبێژان تام و خۆشیا سترانا كوردى یا ره‌سه‌ن به‌رزه كریه، دیسان هنده‌ك كه‌س هه‌نه كارێ وان سترانبێژى نینه، لێ سترانان دبێژن، ئه‌ڤ جۆرێ سترانبێژان ژى نه‌شێن ل خزمه‌تا هونه‌رێ كوردى بكه‌ن، چونكى ب تنێ ل ده‌ف وان ئه‌و یا گرنگه كو خه‌لك بزانن، ئه‌و سترانان دبێژن، وه‌كو دى بۆ وان خه‌منینه ب چو ره‌نگ سترانان بێژن و دیسان په‌یڤێن سترانان دروست نابێژن و موزیكا ره‌سه‌ن یا سترانێن كوردى ژى د گوهۆرن.
رێزان هێشتا دبێژیت: نوكه ژنا كورد شیایه خزمه‌ته‌كا باش بۆ هونه‌رێ كوردى بكه‌ت، دیسان شیایه د هه‌موو وارێن هونه‌رى دا بهێته پێش و د ڤى وارى دا بابێ وێ گه‌له‌ك هاریكاریا وێ كریه و وه‌كو قوتابخانه‌كێ بوویه بۆ وێ، دیسان وه‌كو هه‌ڤاله‌كێ یه بۆ وێ د وارێ هونه‌رى دا، هه‌روه‌سا دڤێت هونه‌رمه‌ند هه‌رده‌م كارێن نوو پێشكێشى حه‌ز ژێكه‌رێن خوه بكه‌ت، له‌وما من ژى لبه‌ره هه‌رده‌م كارێن نوو پێشكێشى حه‌ز ژێكه‌رێن سترانان كوردى بكه‌م، نوكه مودێلا چێكرنا ئه‌لبۆمان نه‌مایه، هه‌ر چه‌نده چێكرنا ئه‌لبۆمان وه‌كو ناسنامه‌كێ یه ژبۆ هونه‌رمه‌ندان، لێ من لبه‌ره ئێدى سترانێن سینگل و كلیپان چێكه‌م.
ئه‌و چه‌ند ژى دیار كر: نوكه من هنده‌ك كلیپ و سترانێن نوو چێكرینه، ئه‌ز دێ وان كارێن خوه ل دووماهیا ئه‌ڤ ساله به‌لاڤ كه‌م، هه‌روه‌سا ئه‌و حه‌ز ژ سترانێن فولكلۆرى و هه‌ڤچه‌رخ ژى دكه‌ت و هه‌ردو یان ژى دبێژیت، چونكى هه‌ردو یان ژى تاما خوه یا تایبه‌ت هه‌یه، دیسان گرتنا رادیۆ و ته‌له‌فزیۆنێن كوردى ل باكور باندۆره‌كا مه‌زن ل سه‌ر هونه‌رێ وان كریه و ئه‌و نه‌شێن كلیپێن خوه ل چو ته‌له‌فزیۆنان ل باكورێ كوردستانێ به‌لاڤ بكه‌ن، له‌وما ب تنێ ئه‌و كارێن خوه یێن هونه‌رى ل سۆشیال میدیایێ به‌لاڤ دكه‌ن، ئه‌و ب گرنگى دبینیت كو كه‌ناله‌كێ كوردى یێ هونه‌رى ل باكور بهێته ڤه‌كرن، ژ پێخه‌مه‌ت بشێت خزمه‌تا هونه‌رمه‌ندێن كورد بكه‌ت.
رێزانێ ئه‌و ژى ئاشكرا كر: هه‌ڤكارى دناڤبه‌را وان و هونه‌رمه‌ندێن تورك دا نینه، دیسان هونه‌رمه‌ندێن تورك هاریكاریا وان ناكه‌ن و چو سه‌ندیكایێن هونه‌رى ژى پشته‌ڤانیێ ل هونه‌رێ وان ناكه‌ن، چونكى ئه‌و ب كوردى سترانان دبێژن، دیسان هێشتا سانسۆره‌كا مه‌زن ل سه‌ر سترانا كوردى هه‌یه و د ڤى وارى دا ئه‌و گه‌له‌ك ئاسته‌نگیان دبینن، نوكه هه‌موو ده‌رگه‌ه ل به‌ر هونه‌رمه‌ندێن كورد ل باكور هاتینه گرتن، دیسان ئێدى ئه‌م نه‌شێین ناڤێ كوردستانێ ژى دناڤا سترانێن خوه دا بێژین، چونكى دێ ژ ئالیێ ده‌وله‌تا تورك ڤه هێینه گرتن.
ئەڤرۆ نیوز، زنار تۆڤی:
رێڤەبەریا ھاتنوچوونا پارێزگەها دھۆکێ راگەھاندیە: کو سۆبەھی چارشەمبی ل پشکا دەستووردانێ مامەلێن وەلاتیان ناھێنە برێڤەبرن.
ئازاد تاھا پەیڤدارێ رێڤەبەریا ھاتنوچوونێ ل پارێزگەها دھۆکێ بۆ ئەڤرۆ نیوز راگەھاند: کو رێڤەبەریا ھاتنوچوونا پارێزگەھا دھۆکێ ئاگەھداریا ھەموو شۆفێر و وەلاتیان دکەت، کو سوبەھی چارشەمبی ١٩ تەباخا ٢٠٢٠ ل ل پشکا دەستووردانێ مامەلێن وەلاتیان ناھێنە برێڤەبرن.
هەروەسا گۆتیە ژی: برێڤە نەچوونا مامەلێن وەلاتی و شۆفێران ژبەر کارەکێ فەرە.
ئەڤرۆ نیوز، زنار تۆڤی:
د روودانەکا هاتنوچوونێ دا ل قەزا ئاکرێ پێنج کەس برینداربوون و دو یێن دیتر ژی وەغەر کر.
د ڤی واری دا موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا ل قەزا ئاکرێ حەفت کەس بۆنە قوربانی و زیان گەهشتیە ترۆمبێلێن وان ژی.
ناڤهاتی زێدەتر ئاشکرا کر: ئەڤرۆ سێشەمبی ۲۰۲۰/۸/۱۸ ل دەمژمێر۱۱:۰۰ سپێدێ ل سەر جادا سەرەکی یا ناحیا گردەسێن روودانەکا ترافیکێ ژ جۆرێ لێکدان دناڤبەرا دو ترۆمبێێلان دا روودایە و د ئەنجامێ وێ روودانێ دا، دو کەسان گیانێ خوە ژ دەستدایە و دیسان پێنج کەسێن دیتر ژی ب گرانی بریندار بووینە و هاتینە رەوانەکرن بۆ نەخۆشخانێ، داکو چارەسەریا وان بهێته کرن.
نيشاندان