ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ ب هەلکەفتنا جەژنا قوربانێ پەیامەک بەلاڤ و د پەیاما خوە دا دیار کر کو مخابن ئەڤسالە ئەم جەژنێ د رەوشەکا خراب یا ئابووری و ڤایرۆسێ کۆرۆنایێ دا دەرباز دکەین و ئەو رەوشا خراب ژی بێگومان ژ دەرڤەی ئیرادا حوکمەتا هەرێما کوردستانێ یە و گۆت: (هێڤیدارین کو پشتی جەژنێ ل گەل بەغدا بگەهینە رێککەفتنێ دا ئاریشێن دارایی و مووچێن فەرمانبەران بهێنە چارەسەر کرن).
سەرۆکێ حوکمەتێ هەروەسا دیار کر کو زێدەباری رەوشا ئالۆز یا ل هەرێما کوردستانێ حوکمەت بەردەوام بزاڤان دکەت دا مووچە و شایستێن دارایی یێن فەرمانبەران بهێنە دابین کرن.
ئه‌ڤرۆ نیوز، نه‌وزاد هلۆرى:
سوبه‌هى دێ 37 سال ل سه‌ر جینوسایدا بارزانیان ده‌رباز بن، هه‌ر سال لسه‌ر گورستانا جینوسایدا بارزانیان ئه‌ڤ رۆژه دهاته ساخكرن، به‌لێ ئه‌ڤ ساله ژ ئه‌گه‌رێ به‌لاڤبوونا ڤایرۆسا كۆرۆنایێ ناهێته ساخكرن.
رێبوار ره‌مه‌زان، رێڤه‌به‌رێ رێڤه‌به‌ریا كاروبارێن شه‌هید و ئه‌نفالكریێن بارزان بۆ ئه‌ڤرۆ نیوز گۆت: (هه‌ر سال وه‌كو نه‌ریته‌كێ سالانه ب ئاماده‌بوونا كه‌سایه‌تى و لایه‌نێن شوله‌ژێ ب ریورسیمه‌كێ فه‌رمى، سالیا جینوسایدا بارزانیان ل رێكه‌فتى 31/7 دهاته ساخكرن، به‌لێ ئه‌ڤ ساله ژ ئه‌گه‌رێ به‌لاڤبوونا ڤایرۆسا كۆرۆنایێ چوو رێورسمێن فه‌رمى ناهێنه ئه‌نجامدان).
زێده‌تر گۆت: (تنێ وه‌كو رێزگرتن بو قوربانیدانا جینوسایدكریان، ره‌نگه چه‌ند كه‌سه‌ك بچنه سه‌ر گورستانێ و چالاكیه‌كا ره‌مزى ئه‌نجام بده‌ین).
جینوسایدا بارزانیان ل رێكه‌فتى 31/7/1983 روودایه و تێدا هه‌شت هزار بارزانى ژلایێ رژێما به‌عس ب ساخى ل بیابانێن نوگره سه‌لمان هاتنه بن ئاخكرن.
ئه‌ڤرۆ نیوز:
سه‌رۆك مه‌سعود بارزانی د په‌یامه‌كێ دا راگه‌هاند داخازێ ژ لایه‌نێن سیاسی یێن كوردستانێ دكه‌م، د پێخه‌مه‌تا به‌رژه‌وه‌ندیێن بلندێن وه‌لاتی بۆ چاره‌كرنا گرفتان و ده‌ربازكرنا ئاریشان ل گه‌ل ئێك دانوستاندنێ بكه‌ن.
سه‌رۆك بارزانی د په‌یامه‌كێ دا ب هه‌لكه‌فتا چه‌ژنا قوربانێ به‌لاڤكریه و تێدا هاتیه ئه‌ركێ هه‌مو لایه‌كی یه ب ئاراسته‌یا ته‌بای و برایه‌تیێ پێنگاڤان ب هاڤێژن.
ئه‌ڤه ژی ده‌قێ په‌یاما سه‌رۆك بارزانی یه:
ب هه‌لكه‌فتا چه‌ژنا پیرۆزا قوربانێ گه‌رمترین پیرۆزباهیێن خو ئاراسته‌ی موسلمانێن كوردستانێ و عیراقێ و هه‌موو جیهانێ دكه‌م.
پیرۆزباهیێ ل كه‌س و كارێن بلندێن شه‌هیدان و پێشمه‌رگه‌یێن قاره‌مان و هه‌موو وه‌لاتیێن خوشتڤی دكه‌م و هیڤی دارم ئه‌ڤ چه‌ژنه ب بیته جهێ خوشیێ و به‌ره‌كه‌تێ و ئاشتیێ ل كوردستانێ و عیراقێ و ده‌ڤه‌رێ.
د ده‌مه‌كی دا پێشوازیێ ئه‌ڤێ چه‌ژنا پیرۆز دكه‌ین، كۆ گه‌لێ مه گه‌له‌ك ته‌حه‌دایێن مه‌زنێن سیاسی و ئابووری و ساخله‌میێ دیتی نه، ئه‌و ته‌حه‌دانه ژٍێده‌رێ وان ئاریشه و گرفتانه كۆ ئارامیا سیاسی و باروگۆزه‌رانا خه‌لكی دكه‌نه ئارمانج.
د پێخه‌مه‌تا ده‌ربازكرنا ته‌حه‌دایان و ئه‌و ره‌وشا گران، ئه‌ركێ هه‌موو لایه‌نایه كۆ ب ئاراسته‌یا ته‌بای و برایه‌تێ و كارێ هه‌ڤبه‌ش و فه‌رهه‌نگا پێكڤه‌ژیانێ پێنگاڤان ب هاڤێژین، زێده‌باری ئه‌وێ چه‌ندێ سوپاس گۆزارێ خۆراگریا خه‌لكێ كوردستانێ مه كۆ ل هه‌موو قوناغێن گران ته‌حه‌مولا ته‌حه‌دایان كریه، چه‌ژنا پیرۆزا قوربانێ ب ده‌لیڤه دزانم كۆ داخازێ ژ لایه‌نێن سیاسی یێن كوردستانێ بكه‌م، د پێخه‌مه‌تا به‌رژه‌وه‌ندێن بلندێن وه‌لاتی بۆ چاره‌كرنا گرفتان و ده‌ربازكرنا ئاریشان ل گه‌ل ئێك رینه خوارێ.
ئه‌و چه‌نده هه‌رده‌م د هزرا مه‌دا بیت كۆ ته‌بایی و ئێكرێزی ئاریشان باشتر چاره دكه‌ت و د بن سیبه‌را ئێكرێزیێ ده‌ستكه‌فتێن مه‌زن بۆ گه‌لێ مه بده‌ستڤه هاتینه، پشت راستم خه‌لكێ كوردستانێ هه‌ر وێ ژ لایه‌نێن سیاسی چاڤه‌رێ دكه‌ن، له‌ورا داخازێ ژ هه‌موو لایه‌نێن سیاسی ل ئاست چاڤه‌رێكرنا خه‌لكێ كوردسانێ بن و د هه‌مان ده‌م دا لبه‌رچاڤوه‌رگرتنا فه‌رهه‌نگا بلندا ده‌وله‌مه‌ندیا كورده‌واریێ بكه‌ن، خو ژ گوتارێن زڤر و ئالوز نه هه‌ژی هه‌مبه‌ر ئێك ب پارێزن.
د ڤێ هه‌لكه‌فتا پیرۆز دا جهێ خویه سوپاسیا ماندوبوونا كارمه‌ندێن ساخله‌میێ و پێشمه‌رگه‌ی و ئاسایش و پولیس و راگه‌هاندنێ بكه‌م، كۆ ژ وی ده‌می ڤایرۆسێ كورونایی ریب ری هه‌رێما كوردستانێ بووی، هاریكاریا خه‌لمی و بجهكرنا رینمایین ساخله‌میێ و هشیاریا ساخله‌مێ ئه‌رك ه ماندوبونه‌كا زۆر كێشایه.
چه‌ژنا هه‌موو لایه‌كی پیرۆز بیت و هیڤیا خوشیێ و به‌خته‌وه‌ریێ بۆ هه‌وه دخوازم
مه‌سعود بارزانی
30ـی 7ـی 2020
ئەڤرۆ نیوز:
ئەندامەکی لژنا دارایی ل پەرلەمانێ عیراقێ دیار کر: لێک نێزیکبوونەکا باش دناڤبەرا هەولێرێ و بەغدا دا هەیە و ل ڤان نێزیکان بەغدا دێ مووچێ هەرێما کوردستانێ هنێریت.
ئیخلاس دلێمی، ئەندامێ لژنا دارایی ل پەرلەمانێ عیراقێ گۆتیە: لێک تێگەهشتنەکا باش دناڤبەرا هەولێر و بەغدا دا هەیە، چەند ئاماژەکێن باش بۆ چارەسەرکرنا کێشان و گەهشتن ب رێککەفتنێ هەیە،
بریارە ل ڤان نێزیکان بەغدا مووچێ فەرمانبەران رەوانە بکەت.
ئەڤرۆ نیوز، زنار تۆڤی:
موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا دو کەسان وەغەر کر.
ناڤهاتی زێدەتر ئاشکرا کر: ل دەمژمێر (9:30) ئەڤ شەڤە ل سەر جادا سەرەکی یا ئیراهیم خەلیل بۆ دێرەبینێ و ل نێزیکی شینافا دو ترومبێلا لێکدا ( ترۆمبێلەکا بارهەلگر تۆیۆتا پیک ئاب ل گەل ترومبێلەکا بارهەلگر تریلە مارسیدس)، دئەنجامدا دو کەسان وەغەر کر و زیانێن مادی یێن مەزن ژی ب وان ترۆمبێلان کەفتن.
ئەڤرۆ نیوز، عەلی حاجی :
ئەڤرۆ چارشەمبی ل جڤاتا پارێزگەها دهوکێ ب ئامادەبوونا سەرۆکێ جڤاتا پارێزگەها دهوکێ و رێڤەبەرێ گشتی یێ باژێرڤانیان ل پارێزگەها دهوکێ و سەرۆکێ باژێرڤانیا زاخۆ و ئەندامێن جڤاتا پارێزگەها دهۆکێ ل زاخۆ رازی بوون ل سەر دانانا گورستانەکا نوو هاتە دان .
هشیار گولی سەرۆکێ فراکسیۆنا زەر ل جڤاتا پارێزگەها دهوکێ بۆ ئەڤرۆ نیوز گۆت :د کومبوونا ئەڤرۆ دا بریار ل سەر دانانا گورستانەکا نوو بۆ باژێرێ زاخۆ ل گوندێ خرابابکێ هاتە دان، ل سەر ٨٣ دونەمێن ئەردی و بریارە ل چارشەمبیا بهێت کومبوونەکا دیتر ل گەل خودانێ وی ئەردی ب هێتە کرن ب ئامادەبوونا سەروکێ جڤاتێ و ئەندامێن جڤاتێ ل زاخۆ و رێڤەبەرێ گشتی یێ باژێرڤانیان ل دهوکێ و سەرۆکێ باژێرڤانیا زاخۆ و رێڤەبەرێ پلاندانێ و رێڤەبەرێ گشتیێ چاندنێ ل پارێزگەها دهۆکێ دا کو د وێ کۆمبوونێ دا خودانێ وی ئەردی بهێتە قەرەبوکرن و ئەو ژی بگەهیتە مافێ خوە و بریارە د کومبوونێ دا هەموو تشت بهێتە ئێکلاکرن و ئەو گورستانە ب تەمامی بکەڤیتە دخزمەتا وەلاتیان دا و ئەم ب هێڤی نە ژی زووترین دەم دا بهێتە چارەسەر کرن دا کو ئێدی وەلاتی بشێن مریێن خوە ڤەشێرن ژبەر کو ل گورستانێن زاخۆ جهـ نەمایە.
ئەڤرۆ نیوز:
رێڤەبەریا گشتی یا ساخلەمیا پارێزگەها دهۆکێ راگەهاند: شەش تووشبوویێن دی یێن ڤایرۆسێ کۆرۆنایێ ل دهۆکێ کو د نەخۆشخانێدا بوون، پشتی هەموو پشکنین بۆ هاتینە کرن، دیاربوو کو ب تەمامی چارەسەر بووینە و ب سلامەتی ژ نەخۆشخانێ دەرکەفتینە و چووینە د ناڤ کەسوکارێن خوە دا.
هەروەسا گۆتیە: ب ڤێ چەندێ هژمارا چارەسەربوویان گەهشتنە 342 کەسان و نوکە 121 نەخۆش ماینە د نەخۆشخانێدا.
ئەڤرۆ نیوز:
رۆژنامەکا بریتانی ئاشکرا کریە: کو بھایێ پێشبینیکری یێ ڤاکسینێ کۆرۆنایێ، یێ کو ژ ئالیێ کۆمپانیا مودێرنا ھاتیە دروست کرن، د ناڤبەرا ٥۰ بۆ ٦۰ دۆلاران دایە.
وێ رۆژنامێ گۆتیە: بھایێ ڤێ ڤاکسینێ دێ دناڤبەرا ٥۰ بۆ ٦۰ دۆلاران دابیت، کو ئەڤە ژی زۆر زێدەترە، هەکە بهێتە ھەڤبەر کرن ل گەل کۆمپانیا pfizer و ھەڤبەشا وێ یا ئەلمانی Bion tech د چارچۆڤێ رێککەفتنا وان ل گەل حوکمەتا ئەمریکا دیارکریە، ھەر خۆلگەھەکا چارەسەر وەرگرتنێ دو دۆزا ڤەدگریت و بھایێ وێ ۳۹ دۆلارن.
هەروەسا گۆتیە: ئەو بھایێ مۆدێرنا پێشنیار کری، تنێ ل گەل ئەمریکا و وەلاتێن سەرمایەدار ھەڤدگریت.
ژ ئالیێ خوە ڤە پەیڤدارێ کۆمپانیا مۆدێرنا راگەھاندیە: ل گەل حوکمەتێن نێڤدەولەتی د گۆتوبێژان داینە بۆ دابینکرنا رێژەکێ ژ ڤاکسینێ mRNA-١٢٧٣ ، لێ رەتکر چ زانیاریان دەربارەی بھایێ وێ بدەت.
ئەڤرۆ نیوز، زنار تۆڤی:
رێڤەبەریا فیستەڤالا فلمێن كوردی ل لەندەن دیار کریە: گەرا یازدێ یا فیستەڤالا فلمێن كوردی ل لەندەنا پایتەختێ بریتانی دێ برێڤە چیت، وەسا بریارە چالاكیێن ڤێ فیستەڤالێ ل رۆژانێن 15 هەتا 24/8/2020 دەست پێ بکەن، بۆ دەمێ (10) رۆژان ب شێوێ ئۆنلاین دێ یا بەردەوام بیت.
هەروەسا گۆتیە: ئەم ب وی پەرێ خۆشحالیێ ڤە گەرا یازدێ یا فیستەڤالا فلمێن كوردی ل لەندەن رادگەهینین و ب رێیا ئۆنلاین دێ بینە مێهڤانێن مالێن هەوە، ل هەر كونجەکا ڤێ جیهانێ بن دشێن وان كورتە فلمێن ئەم بەلاڤە دکەین بێ بەرامبەر تەماشا بكەن، دیسان ژبەر رەوشا خراب یا ئەڤ سالە کو هەموو جیهان گرتیە و ئەو کێشێن هاتینە رێیا مرۆڤ و مرۆڤایەتیێ، کو ئەم ژی گرتینە، وەك دەستەکا رێڤەبەر یا فیستەڤالا فلمێن كوردی ل لەندەن نەچار بووین كو ئەڤ سالە ب بەرنامەکێ تایبەت بهێینە خزمەتا هەوە، بەلێ ب تنێ ب فلمێن (فیكشن، دیكومێنتاری، ئەنیمەیشن)، د خزمەتا بینەرێن خوە دا بین، کو ناڤەرۆکا كورتە فیلمێن مە یێن ئەڤ سالە پێکهاتینە ژ (لەودیوی سنوورەوە، خەبات بەردەوامە، ژن لە فلمدا، جەنگ لە شاشەوە، چیرۆكە ناوازەكانی كوردەواری، زارۆک و فلم).
هێشتا دبێژیت: ب بزاڤ و دیتنێن نوو گەرا یازدێ یا فیستەڤالا فلمێن كوردی ل (لەندەن) ب رێیا ئۆنلاین دێ (50) كورتە فلمان پەخش كەین، هەر فلمەک دێ راستەوخۆ هێتە نیشان دان، پشتی نیشاندانا وی فلمی، دێ گوتۆبێژێ ل سەر وی فلمی كەین ب رێیا (پانێلان)، ب رەنگەکێ زانستی بۆچوون و رەخنێن هەوە دێ فیستەڤالا مە دەولەمەند کەت، ب شانازیڤە فیستەڤالا مە یا ئەڤ سالە ب هەڤکاریا (پەیمانگەها فلمێن بریتانی) و ( تۆرا تەماشاكەرێن فلمان)، هەروەسا ( ئێف ئێف سی) کو ب باوەریەکا زۆر پشتەڤانیا مە کریە.
فیستەڤالا فلمێن كوردی ل (لەندەن) ب خۆشحالی ڤە دێ پەخشێ كورتە فلمان بۆ دەمێ 10 رۆژان دەستپێکەت، هەروەسا ب چەند بەرنامێن هەمەرەنگ دێ خزمەتا هەوە کەین.
نيشاندان