ئه‌ڤرۆ نيوز:
نێچيرڤان بارزانى جێگرێ سه‌رۆكێ پارتى ديموكراتى كوردستان د ئاهه‌نگه‌كا تايبه‌ت ب هه‌وا ليستا 183 ل دهۆك گۆتاره‌ك پێشكێش كر.
د ڤى رێوره‌سمى دا كادر و به‌رپرسێن سنورێ لقێن پارتى ل چه‌ند ناوچێن ده‌ڤه‌رێن دهۆكێ ئاماده‌بوون، ژماره‌ك ژ كانديدێن ده‌ڤه‌رێ ژى ئاماده ببوون، گۆت: “جه‌ماوه‌رێ پارتى ل سه‌ر سندوقێن ده‌نگدانێ خه‌ونا دوژمان خسته گۆڕى و پارتى نوكه پارتيا ئێكێ يا عيراقێ يه”.
ئه‌ڤرۆ نيوز:
جێگرێ ئێكێ يێ سه‌رۆكێ جڤاتا نوونه‌رێن عيراقێ ته‌كستێ ل سه‌ر وێ چه‌ندێ دكه‌ت كو ل خولا نوكه يا جڤاتا نوونه‌رێن عيراقێ دێ يا جودا بيت ژ خولێن به‌رى نوكه و ئێكسه‌ر په‌يوه‌ندى ل گه‌ل حوكمه‌تا خوجهى هه‌بيت.
حه‌سه‌ن كه‌ريم كه‌عبى، جێگرێ ئێكێ يێ سه‌رۆكێ جڤاتا نوونه‌ران د كۆنگره‌كێ رۆژنامه‌ڤانى دا راگه‌هاند كو كاركرنا وان ب ره‌نگه‌كێ ئێكسه‌ر ل گه‌ل حوكمه‌تا خوه‌جهى يا پارێزگه‌هان رۆله‌كێ گرنگ بيت د چاره‌سه‌ركرنا هه‌موو كێشان دا، ب تايبه‌تى د وارێ كێميا خزمه‌تكارى و خرابيا پرۆژه و ژێرخان و قه‌يرانێن بنه‌جهبوون و بێكاريێ دا.
حه‌سه‌ن كه‌عبى ئاماژه ب وێ چه‌ندێ ژى كر كو ئه‌ڤ خۆلا په‌رله‌مانى دێ گرنگيێ ب ته‌رخانكرنا بوودجا پێدڤى بۆ پارێزگه‌هان و زێده‌كرنا داهاتێ خوه‌جهى بۆ وێ چه‌ندێ پارێزگه‌هـ بشێن ئاستێ خزمه‌تگۆزاريان بۆ وه‌لاتيان باشتر بكه‌ن و قه‌يرانان ده‌رباز بكه‌ن.
ئه‌ڤرۆ نيوز:
ئه‌ڤرۆ رۆژا سێشه‌مبى 25ى ئيلۆنێ، روونشتنا ئاسايى يا جڤاتا نوونه‌رێن عيراقێ ب رێڤه چوو و سه‌رۆكاتيا جڤاتا وه‌زيران كارنامێ روونشتنێ به‌لاڤكر.
ب گۆره‌يى كارناما روونشتنا جڤاتا نوونه‌رێن عيراقێ دێ يا تايبه‌ت بيت ب دانوستاندنا ل سه‌ر بابه‌تێ پێكئينانا لژنێن هه‌رده‌مى ل جڤاتا نوونه‌ران.
بابه‌تێ دويێ ژى دێ داخوازيا گشتى بۆ بيت بۆ دانوستاندن ل سه‌ر كاودانێن به‌سرا و دابينكرنا خزمه‌تگۆزاريێ ل وى باژێرى و ب ئاماده‌بوونا وه‌زيرێ ساخله‌ميێ و وه‌زيرێ بنه‌جهكرن و ئاڤه‌دانكرنێ و وه‌زيرێ ژێده‌رێن ئاڤێ.
ئەڤرۆ نیوز ، زنار تۆڤی:
هەڤپەیمانیا میحوەری وەتەنی یێ سوننی، بۆ دەنگدانێ ل سەر کاندیدێ سەرۆک کۆمارێ عێراقێ خوە ئێکلا کریە.
ئەڤرۆ سێشەمبی 25.9.2018، لەیس دلێمی، پەیڤدارێ هەڤپەیمانیا میحوەری وەتەنی د بەیاننامەکێدا راگەهاندیە، هەڤپەیمانیا وان رێککەفتنا لێکتێگەهشتنێ ل گەل پارتی دیموکراتی کوردستان هەیە.
لەیس دلێمی هەروەسا راگەهاندیە،کو پۆستی سەرۆک کۆمارێ عێراقێ مافێ کوردانە و ل پەرلەمانێ عێراقێ ژی کۆدەنگی ل سەر دەنگدانێ ب کەسایەتیەکێ میانرەو و جهێ رەزامەندیا کوردانە.
هەروەسا گۆتیە کو هەڤپەیمانیا وان دێ دەنگی دەنە کاندیدێ پارتی دیموکراتی کوردستان بۆ پۆستێ سەرۆک کۆمارێ عێراقێ.
پارتی ب فەرمی فوئاد حسێن وەک کاندیدێ خوە بۆ پۆستێ سەرۆک کۆمارێ عێراقێ راگەهاندیە و ئێکەتی نیشتمانی کوردستان ژی بێی وەرگرتنا رەزامەندیا پارتی، بەرهەم سالح بۆ وەرگرتنا وی پۆستی کاندید کریە.
لدووڤ هەڤهاتنا سیاسی ل عێراقێ، کو پشتی رووخاندنا رژێما بەعس ل سالا ٢٠٠٣ هاتیە پەیرەو کرن، سەرۆکاتیا کۆمارێ عێراقێ بۆ کوردانە.
ئه‌ڤرۆ نيوز:
ب بریارا حەیدەر عەبادی، سەرۆک وەزیرێن عیراقێ، ھژمارەکا زۆر یا خێزانێن عەرەب ڤەدگەرنە شنگال و زۆمار و دەڤەرا رەبیعە. ژێدەرەکی ئاشکرا کر کو ژ سەرجەمێ وان 50 خێزانێن ڤەگەریاینە شنگال، 40 کەس د ناڤا وان خێزانان دا ژ تیرۆرستێن داعشێ بوون و دەست ل گەل کارەساتا شنگالێ دا ھەبوون و ژ لایێ سۆپایێ عیراقێ ب خوەڤە ھاتینە دەستەسەرکرن و ل گۆەری زانیاریان، 40% عەربێن ڤەدگەرنە شنگالێ بەری نھا دەست ل گەل رێکخراوا تیرۆری داعشێ ھەبووینە.
قاسم شەشۆ، فەرماندێ فەرماندەیا پێشمەرگێ کوردستانێ ل شنگالێ بۆ ئەڤرۆ دیار کر، ب بریارا حەیدەر عەبادی، پتر ژ 50 خێزانێن عەرەب ژ ھۆزا (جحێش) ڤەگەریاینە گوندێ گولات ل نێزیک مەزارگەھێ شەرفەدین و ئەڤ یەک ژی بێی رازیبوونا مەبوویە، چونکو بەری ھاتنا ڤان خێزانێن عەرەب، سۆپایێ عیراقێ ئەم ب ڤێ یەکێ ئاگەھدارکربووین کو عەبادی بریارا ھاتنا وان دەرکریە و مە گۆتبوو وان یا دروست نینە بھێن، چونکو رەنگە ببیتە ئەگەرێ پەیدابوونا کێشەیێن جڤاکی ل دەڤەرێ.
شەشۆ ئەو یەک ژی بۆ ئەڤرۆ ئاشکرا کر کو ئەڤ خێزانێن عەرەب یێن گوندێ گولات ھەموو ئەوبوون ھاریکاریا چەکدارێن داعش کری، کەچ و کور و زارۆیێن ئێزدی برەڤینن و بکۆژن و ئەم وەکو کوردێن ئێزدی ب چو رەنگان ھاتنا وان قەبوول ناکەین و گۆت: ژبلی وان خێزانان ھژمارەکا دی یا خێزانێن عەرەب جارەکا دی ھاتینە شنگال و زومار و رەبیعە و لێ ئاکنجی بووینە و ھەموو ژی ب بریارا عەبادی ھاتینە، وەکو سۆپایێ عیراقێ ئەم ئاگەھدارکرین.
ژێدەرەکی ژ قەزا شنگالێ دیار کر، ئەڤ پێلا ئاوارەیێن عەرەب ژ پارێزگەھێن دن یێن عیراقێ جارەکا دن ڤەدگەرن مالێن خوە و ب ئەڤێ چەندێ ئێزدی دلگران کرینە ژ بەر ھەر ئەو عەرەب بوون یێن رێکخراوا تیرۆرستیا داعشێ ب ھەڤکاریا وان دەست ب کۆمکوژیا شنگالێ ھاتیە کرن کو ب ھەزاران ژ ئێزدیان ھاتنە کوشتن و گرتن و رەڤاندن و دەستەسەرکرن.
قاسم شەشۆ ئەو یەک ژی ئاشکرا کر، پشتی ھاتنا حەشدا شەعبی بۆ شنگالێ، رێ ھاتیە خۆشکرن، جارەکا دی عەرەب ڤەگەرنە ناڤا شنگالێ و ب تایبەت ئەو عەرەبێن دەست د کۆمەلکوژیا ئێزدیان دا ھەی و ئەڤ بریارا عیراقێ دای ل دۆر ڤەگەراندنا 50 خێزانێن عەرەبی بۆ شنگالێ یا تاکلایەنانەبوویە و ب چو رەنگان ب دلێ مە نەبوویە، چونکو پتریا وان خێزانان دەست ل گەل کۆمەلکۆژیا ئێزدیان دا ھەبوویە و ھاتنا وان ژی مەترسیە بۆ سەر دەڤەرێ.
مەحما خەلیل، قائیممقامێ قەزا شنگال راگەھاند، ئەڤ عەرەبێن ڤەگەریایینە شنگال ھاتینە سەر گۆندێن (حەساویس، پیر قاسم، جرێوا) و ئەڤە ژی پێنگاڤەکا ئاشکرایە بۆ تەعریبکرنا شنگالێ و ھندەک ژ وان ژی بێگومان دەست د کۆمەلکوژیا ئێزدیان دا ھەبوویە و پێدڤیە ئەو ھەموو بھێنە دەستەسەرکرن و رادەستی دادگەھێ بھێنە کرن، چونکو ھەر ئاکنجیەکێ قەزا شنگالێ ب تایبەت یێن عەرەب و دەست ل گەل داعشێ ھەبیت، ناڤێن وان ھاتینە تۆمارکرن و ھەموو بەلگەیێن تاوانانێن وان ژی ل بەر دەستن و ھەموو دێ گەھنە سزایێ خوە.
مەحما گۆتیشی: حکوومەتا عیراقێ ئەنقەست رێیا دھۆک بۆ شنگالێ ناڤەکەت و وان مەرەمێن خوە یێن تایبەت پێ ھەنە، بۆ ھندێ ل دووڤ دلێ خوە شنگالێ تەعریب بکەن و حکوومەتا عیراقێ ب تنێ رێکێ ب خێزانێن عەرەب ددەت ب ڤەگەرنە شنگالێ و دەست ب سەر مال و مولکێن کوردێن ئێزدی دا بگرن و شنگال ب تەمامی بھێتە تەعریبکرن.
ئه‌ڤرۆ نيوز:
ژ بەر درێژبوونا دەمێ قەیرانا دارایی ل کوردستانێ رەوشا کرێداران گەلەک خراب بوویە و تووشی ھەموو جۆرە قوربانیدانەکێ بووینە پێخەمەت دانا کریا ھەیڤانە یا خانویێن تێدا دژین. سەروکێ کومەلا کرێدارێن کوردستانی راگەھاند، ل گوری ئامارێن ل بەر دەست، 150 ھزار خێزان وەک کرێدار ھەنە ل کوردستانێ ب تنێ ئەڤ ھژمارە ھاتیە تومارکرن و رەوشا وان رۆژ بۆ رۆژێ خرابترە، نوکە چەندین کرێدارێن ناڤێن خوە تومارکرینە بۆ فروشتنا گولچیسکێن خوە پێخەمەت دابینکرنا کریا خانیێن خوە و ھەیڤانە ھەتا نوکە ھژمارەکا کرێدارێن گولچیسکێن خوە فروتینە دا کو کریا خوە بدەن، ژ بەر کو چۆ داھات نینە و د خانیێن کرێدا دژین.
بەرھەم سەردار قەرەداغی سەروکێ کومەلا کرێدارێن کوردستانی بۆ رۆژناما ئەڤرۆ گۆت: رێژەکا مەزنا وەلاتیان ھێشتا نەشێن کریا خوە یا ھەیڤانە بدەن کو 120 ھزار دینارە، لەورا رێژا ژێکڤەبوونێ دناڤبەرا ژن و مێران دا زێدەبوویە و ئاریشێن جڤاکی بەرفرەھتر بووینە چەندین جارا مە داخوازا بەلاڤکرنا یەکەیێن ئاکنجیبوونێ کریە بۆ کرێداران، بەلێ ھەتا نوکە داخوازیا مە نەھاتیە بجھکرن، ھژمارەکا کرێدارێن خانی ب زێدەگاڤی ئاڤاکرینە ل ھەموو کوردستانێ و ھەموو پارێزگەھا چاڤەرێ دکەین حوکمەت تاپۆ بکەت. چارە یا رەوشا خرابا کرێدارێن ل بەرچاڤ بگریت و مەترسی ھەیە ھەتا دھێنە تاپۆکرن بھێنە خرابکرن ژلایێ لژنێن نەھێلانا زێدەگاڤیان ڤە، رۆژ بۆ رۆژێ رێژا کرێدارێن یا زێدە دبیت و چۆ چارە ژی بۆ رەوشا وان ناھێنە دیتن.
قەرەداغی ئاشکراکر: ل گوری ئامارێن ل بەر دەست، 150 ھزار خێزان وەک کرێدار ھەنە ل کوردستانێ ب تنێ ئەڤ ھژمارە ھاتیە تومارکرن و رەوشا وان رۆژ بۆ رۆژێ خرابترە، نوکە چەندین کرێدارێن ناڤێن خوە تومارکرینە بۆ فروشتنا گولچیسکێن خوە پێخەمەت دابینکرنا کریا خانیێن خوە و ھەیڤانە ھەتا نوکە ھژمارەکا کرێدارێن گولچیسکێن خوە فروتینە دا کو کریا خوە بدەن، ژ بەر کو چۆ داھات نینە و د خانیێن کرێدا دژین.
ناڤبری گۆت ژی: ل کوردستانێ مۆلەت ب 181 یەکێن ئاکنجیبوونێ ھاتیەدان، بەلێ مخابن نەھاتینە تەمامکرن رەوشا کرێدارێن رۆژ بۆ روژێ خرابترە و پێدڤیە حوکمەت رێگە چارەکێ بینیت بۆ کێمکرن و نەھێلانا کرێدارێن ب ڤی رەنگی، نوکە رێژا 24% یا خەلکێ کوردستانێ کرێدارن، پێدڤیە ھاریکاریەکا گشتی بۆ کرێیا بھێتە کرن و ل ڤێ رەوشا ئالوز دووماھی بھێن، رۆژانە ھەرەشەیا خوەکوشتنێ و فروتنا گولچیسکێن خوە دکەن پێخەمەت دابینکرنا کریا خانیا کو ھەیڤانە داھاتێ وان بەھرا کریا وان ناکەت یان دڤێت ئەوێن خانی ب زێدەگاڤی ئاڤاکری بۆ تاپۆ بکەن یان ئێکەیێن ئاکنجیبوونێ بھێنە بەلاڤکرن ل سەر کرێدارێن ل ھەموو کوردستانێ.
ئه‌ڤرۆ نيوز:
رێڤەبەرێ نڤیسینگەھا رزگارکرنا رەڤاندیێن ئێزدی ل دھۆکێ دیار کر، بھێزبوونا پارتی گرەنتیەکا مەزن بۆ پاشەرۆژا ئێزدیان دروست دکەت و دبێژیت: ھەر ژ رۆژا دامەزراندنا پارتی ھەتا نوکە ب تنی پارتی پشتەڤانی ل ئێزدیان کریە.
حسێن قائیدی، رێڤەبەرێ نڤیسینگەھا رزگارکرنا رەڤاندیێن ئێزدی ل دھۆکێ بۆ رۆژناما ئەڤرۆ دیار کر کو د کارەساتا شنگالێ دا چو پارت و لایەنێن سیاسی پشتەڤانیا ئێزدیان نەکرن ل کوردستان و عیراقێ و گۆت: “پارتی ب تنێ د کارەساتا شنگالێ دا خوە ل ئێزدیان کرە خودان و نڤیسینگەھا رزگارکرنا رەڤاندنیان ڤەکر”.
گۆتژی: “ئێزدیان سەرفرازیا خوە د ھێزبوونا پارتی دا یا دیتی، ھەکە بەرێ خوە بدەینە دیرۆکا ئێزدیان ھەر ژ دامەزراندنا پارتی ھەتا نوکە د ھەموو قووناغان دا ئێزدیان پشکداریەکا کاریگەر ھەبوویە و قارەمانێن مەزن یێن ئێزدی د ناڤ پارتی دا پەیدابووینە، ئێزدیان چەندین شەھید بۆ پاراستنا ئاخ و کەرامەتا مللەتێ کورد داینە”.
ئاشکرا ژی کر، سەرکردێ پارتی (مەلا مستەفایێ بارزانی) گرنگیەکا تایبەت ب ئێزدیان ددا و ئێزدیان تایبەتمەندیەکا تایبەت ل نک جەنابێ بارزانیێ نەمر ھەبوویە.
حسێن قائیدی خویا ژی کر، سەرفرازیا ئێزدیان د بھێزبوونا پارتی دایە، لەو ل 30ی ئیلۆنێ دی ئێزدی ب کەرنەڤال بەرەڤ سەندۆقێن دەنگدانێ چن و دەنگێ خوە دەنە لیستا 183 یا پارتی ، ھەبوونا ئێزدیان د ناڤ پەرلەمانێ کوردستانێ دا گەلەک یا گرنگە و پارتی گرنگی دایە ئێزدیان، نوکە بەربژارەکا ئێزدی ھەیە ل سەر لیستا پارتی.
ئەڤرۆ نيوز:
عەگید بۆزان یەک ژ فەرماندارێن یەپەگێ ل کۆبانێ د داخۆیانیەکێ دا بۆ رۆژناما ئەڤرۆ راگەھاند کو پێنج ترۆمبێلێن سەربازی یێن تورکیا ل سنۆرێ باژێرێ پیرسوس یێ باکورێ کوردستانێ ھێرشی گوندێن ئەشما و کۆرەلی یێ سەر ب باژێرێ کۆبانێ یێ رۆژئاڤایێ کوردستانێ کرن و ھێزێن کوردی ژی یەکسەر کەڤتنە د ئامادەباشیێ دا و بەرسڤا سەربازێن تورک دان و ترۆمبێلەکا تورکیا ھاتە ژناڤبرن و گۆت: (ھەفتیەکە ھێزێن تورکیا ل سەر سنۆرێ کۆبانێ ئاریشان بۆ خەلکێ سڤیل یێ کۆبانێ دروست دکەن و دخوازن ل کۆبانێ بنگەھەکێ سەربازی دروست بکەن و ھێزێن کوردی ژی کەڤتنە ئامادەباشیێ و بەرسڤا تورکیا دان).
ناڤبری د بەردەوامیا ئاخاڤتنا خوە دا بەحسێ رەوشا عەفرینێ ژی کر و راگەھاند کو دەمێ رزگارکرنا عەفرینێ ژ دەستێ دەولەتا داگیرکەر و تیرۆرستان ھاتیە و گۆت: (نھا پێنگاڤ ب پێنگاڤ ھێزێن مە پێشڤە دچن و رۆژانە ل بنگەھێن سەربازێن تورک و تیرۆرستێن سەر ب سۆپایێ ئازاد و کۆما ئەحرار شام و جەبھەت ئەل شەمیە ددەن.
فەرماندارێ یەپەگێ راگەھاند ژی کو د قۆناغا نھا دا ھەڤدیتنێن ل گەل رژێما سووریێ ھاتینە راگرتن و پەیوەندیێن ل گەل رژیمێ نە د ئاستەکی باش دانە و گۆت: (رژێما ئەسەد مە ب کوشتنا سەربازێن خوە تۆمەتبار دکەت لێ د راستی دا یێن کو ل قامشلۆ دەستپێکێ ھێرش کرن ھێزێن رژێمێ بوون و شەرڤانێن مە و ھێزێن ئاسایشا رۆژئاڤا ژی بەرسڤا سەربازێن رژێمێ دان و ل دووڤ ڤەکۆلینێن دەستپێکی و زانیاریێن گەھشتینە بەر دەستێن مە دەستێ ئیران و تورکیا د شەرێ ل قامشلۆ دا ھەیە).
ئه‌ڤرۆ نيوز:
سیاسەتمەدارەکێ باکورێ کوردستانێ دیار دکەت کو سەرۆک بارزانی شیا ھەموو پارت و ئالیێن سیاسی یێن ھەرێما کوردستانێ ل دۆر ریفراندۆمێ بکەتە خوەدان ئێک ھەلویست و بریارا ریفراندۆمێ وەسا ھاتە دان و ریفراندۆم بریارەکا سەردەمیانە یا گەلێ کوردستانێ بۆ بدەستڤەئینانا مافێن خوە یێن رەوا بوو، لێ مخابن خیانەتا ناڤخوەیی نەھێلا کورد بگەھنە ئارمانجا خوە.
ئیبراھیم گوچلو سیاسەتمەدارێ ناڤدار یێ باکورێ کوردستانێ د دیدارەکا تایبەت دا ل گەل رۆژناما ئەڤرۆ دیار کر کو سالەک ل سەر ریفراندۆما ھەرێما کوردستانێ دەرباز بوو، دوژمنێن گەلێ کوردستانێ چو دەمەکێ رازی نەبووینە کورد ژی وەکو گەلێن دی ل دەڤەرێ ل سەر ئاخا خوە ب ئازادی بژین، ژ بەر ھندێ ژی ل ھەرێما کوردستانێ ب پێشەنگیا سەرۆک بارزانی کوردان بریارا خوە دان کو ریفراندۆمەکێ بکەن و سالا بۆری ل ٢٥ ئیلۆنێ ئەڤ پێنگاڤە ھاتە ھاڤێتن و گۆت: (من دڤێت ڤێ بێژم کو رۆلێ سەرۆک بارزانی و پارتی دیموکراتی کوردستان د ریفراندۆمێ دا سەرەکی بوو، لێ بریارا ریفراندۆمێ بریارا ھەموو نەتەوا کورد ل ھەرێما کوردستانێ بوو، ژ بەر ھندێ ژی بریارەکا دیموکراتیک و سەردەمیانە بۆ بدەستڤەئینانا مافێ رەوا یێ گەلێ کوردستانێ بوو و دڤێت کورد ھەموو دەمەکێ شانازیێ ب ریفراندۆمێ و ئەنجامێ وێ بکەن کو ٩٣% ژ خەلکێ کوردستانێ پشتەڤانی ل ئاڤاکرنا دەولەتا کوردی کرن).
ناڤھاتی ئەو یەک ژی دیار کر کو مخابن ھەلویستێ ئەمریکا و وەلاتێن رۆژئاڤا ل ھەمبەر ئیرادا گەلێ کوردستانێ باش نەبوو و خیانەتا ناڤخوەیی یا کو ل کەرکووکێ ھاتە کرن ژی رێ بۆ دوژمنێن کوردستانێ ڤەکر کو ھێرشی کەرکووکێ و دەڤەرێن دی بکەن و گۆت: (لێ دڤێت ھەموو کەسەک ڤێ یەکێ باش بزانیت کو بریارا ریفراندۆما و ئەنجامێ کو بدەستڤە ھات ھەر دەم زندی یە و کورد شانازیێ پێ دکەن).
ئیبراھیم گوچلو د بەردەوامیا ئاخڤتنا خوە دا ئەو یەک ژی دیار کر کو کوردان دخواستن دەولەتەکا دیموکراتیک و سەردەمیا ب رێیا ریفراندۆمێ ئاڤا بکەن لێ مخابن دەولەتێن داگیرکەرێن رۆژھەلاتا ناڤین و خیانەتا ناڤخوە ئاستەنگی دروست کرن، لێ سەرۆک بارزانی ھەردەم دبێژیت ئەم چو دەمەکێ دەستان ژ ئاڤاکرنا دەولەتا کوردستانێ بەرنادەین و ئەز ب باوەرم دێ رۆژەک ھەر ھێت کو کار ب ئەنجامێ ریفراندۆمێ بھێتە کرن و گۆت: (کوردێن ھەر چار پارچێن کوردستانێ پشتەڤانی ل ریفراندۆمێ کرن و ژ بەر ھندێ ژی ئەڤرۆکە سەرەرای ئالۆزیێن کو دروست بوون کوردێن ھەموو جیھانێ شانازیێ ب رۆژا ٢٥ ئیلۆنێ و ریفراندۆمێ دکەن و کوردان بۆ ھەموو جیھانێ سەلماند کو وان ژی دڤێت وەکو ھەموو گەلێن دی یێن جیھانێ ب رەنگەکێ ئازاد بژین، کوردان بۆ ھەموو جیھانێ سەلماند ئەو دخوازن ل سەر ئاخا خوە ل گەل ھەموو نەتەوە و کێم نەتەوە و بیروباوەرێن جودا وەکو برا پێکڤە بژین).
سیاسەتمەدارێ ناڤدارێ باکورێ کوردستانێ ئەو یەک ژی دیار کر کو د ھەلبژارتنێ بۆری یێن عیراقێ دا پارتی دیموکراتی کوردستان وەکو پارتی ل سەر ئاستێ عیراقێ یەکەم بوو، ئەو یەک ژی نیشا دا کو گەلێ کوردستانێ ل سەر رێیا ریفراندۆمێ و مافێ سەرخوەبوونێ بەردەوامە و ژ بەر ھندێ ژی پشتەڤانی ل پارتی و سەرۆک بارزانی کرن.
ئیبراھیم گوچکو ئەو یەک ژی دیار کر کو چەند رۆژێن دی ل ھەرێما کوردستانێ دێ ھەلبژارتن ھێنە کرن، ئەز ھێڤیدارم کو دیسان گەلێ مە دەنگێ خوە بدەنە پارتی دیموکراتی کوردستان، چونکو تنێ ھێزە شەری بۆ مافێن نەتەوی یێن گەلێ کوردستانێ دکەت و ھەتا نھا گەلەک قوربانی بۆ ڤێ ئارمانجا پیرۆز داینە، دەمێ داعشێ و حەشدا شەعبی ھێرشی کوردستانێ کری پارتی دیموکراتی کوردستان و سەرۆک بارزانی ل سەنگەرێ پێشیێ بوون و شەر بۆ پاراستنا کوردستانێ کرن و گۆت: (ژ بەر ھندێ ژی ئەز ھێڤیدارم د ڤان ھەلبژارتنان دا جارەکا خووشک و برایێن مە ل ھەرێما کوردستانێ دەنگێ خوە بدەنە پارتی، چونکو پارتی ب خەباتا خوە گەرەنتیا پاشەرۆژا ھەموو کوردان دکەت، پارتی کار بۆ ئارمانجا مە یا پیرۆز دکەت کو ئەو ژی ئاڤاکرنا دەولەتا کوردستانێ یە).
سیاسەتمەدارێ باکورێ کوردستانێ د دووماھیا ئاخڤتنا خوە دا ئاماژی ب ڤێ یەکێ کر کو دوژمنێن مە ژی باش دزانن کورد دێ ھەر رۆژەکێ دەولەتا خوە ئاڤا کەن، ژ بەر ھندێ ژی نھا پتر ژ ھەر دەمەکێ ھێرشی کوردان ل ھەر چار پارچێن کوردستانێ دکەن، لێ بریارا ریفراندۆمێ و ھەلویستێ سەرۆک بارزانی بۆ ھەموو ئالیەکێ دوپات کر کو کورد چو دەمەکێ دەستان ژ ئارمانجا خوە یا پیرۆز بەرنادەن و دێ ھەر رۆژەکێ گەھنە ئارمانجا خوە و دێ دەولەتا کوردی ھێتە راگەھاندن.
ئەڤرۆ نيوز:
عەزیز ئیبراھیم عەزیز عەبدو گوران،بەربژارێ ژمارە 49 ل سەر لیستا 183ێ یا پارتی دیموکراتی کوردستان، بەرنامەیێ کارێ خوە بۆ روژناما ئەڤرۆ راگەھاند، ئێکەم کارێ من پشتی دبمە پەرلەمانتار ل سەر لیستا ژمارە 183 ێ یار پارتی دیموکراتی کوردستان دێ کارناما پارتی بیت، بۆ چار سالێن داھاتی یێن پەرلەمانێ دێ ھەمو برگەو ماددەیەیێن وێ کارنامێ بجە بینین، کو ژبۆی بەرژەوەندیا ھاولاتیێن کوردستانێ ھاتیە دراشتن ، ژبلی کارناما پارتی من بەرنامێ خوە ھەیە پشتی ب دەست ڤەئینانا باوەریا خەلکی بۆ سنورێ قەزا بەردەش تایبەتی و کوردستانێ ب گشتی سنورێ قەزا بەردەرەش یا دەولەمەندە ب کەرتێ چاندنێ باشتر کرنا ژێرخانا ئابۆریا کوردستانآ ب گشتی و قەزا بەردەرەش ب تایبەتی یە ،دێ بزاڤا کەم ژبۆی ڤەکرنا ھژمارەکا کارگەە و کومپانیا ل دەڤەرێ ل بوارێ چاندنێ بۆ وێ چەندێ ھاولاتی و جوتیار ھەردو مفادار بن ژ کەرتآ چاندنێ و داھاتێ وێ ژی ھەر بۆ خەلکێ دەڤەرێ بیت ،خەلکێ دەڤەرا گورانەتی و بەردەرەش ھژمارەکا مەزن دەرچویێن پەیمانگە ە و زانکویان ھەنە پێدڤیە مفا ژ زانست و شیانێن وان بھێتە دیتن دەرفەتێن کاری ژبۆی وان بھێنە دیتن کاربکەت ل دەڤەرێ قەزا بەردەرەش دکەڤیتە سێگوشەیا ناڤبەرا سێ پارێزگەھێن دھوک و ھەولێرو موسل دەڤەرەکا ستراتیژیە پێدڤی ب پروژێن زێدەتر یێن خزمەتگوزاری ھەیە لێ بھێنە بجھکرن کو ژبلی دێ دەرفەتێن کاری زێدەبن و دێ ئابۆریا دەڤەرێ باشتر بیت.
عەزیز ئیبراھیم گۆت: قەزا بەردەرەش و دەڤەرا گورانەتی و دەشتا نافکوڕێ دەڤەرەکا ئابۆریە ژلایێ چاندنێ و بازرگانیێ ڤە دێ ھەمو بزاڤا کەین ل پەرلەمانی بۆ رێکخوشکرنا رێکێن ناڤبەرا قەزا بەردەرەش و موسل دا ژبۆی وێ چەندێ بازرگانیەکا باشترە ھەناردەکرنا بەرھەمێ کوردستانآ بۆ ناڤەراستا عیراقێ گرنگی دانەکا باشتر ب کەرتێ چاندنێ و مفا گەھاندن ب جوتیارا دێ کارکەین کو کوردستان چۆ بەرھەمەکێ ژ دەرڤە ھاوردە نەکەت.
عەزیز د یارکر، پێدڤیە ئەم ھەمو خزمەتا ھێزێن پێشمەرگەی بکەین و پشتەڤانێن پێَشمەرگەی بین بەرھەمێ ئازادی و ژیان و ژیارا ھەمو کوردستانیا بەرھەمێ کەدو ماندیبۆنا پێشمەرگەیە ، ھەڤدەم ماموستا پشکەکا گرنگن ل ناڤ جڤاکی پێگەھاندنا نڤشێ نو ب درێژاھیا شەرێ داعش پێشمەرگە ل سەنگەران بۆن و ماموستایا زاروکێن ماموستا فێَری زانست دکرن لەورا پێشمەرگەو ماموستا ھەژی ژیانەکا باشترن.
نيشاندان