ئه‌ڤرۆنيوز:
سه‌رۆك وه‌زيرێن هه‌رێما كوردستانێ نێچيرڤان بارزانى ئه‌ڤ شه‌ڤه ل به‌غدا ل گه‌ل ئه‌ياد عه‌لاوى سه‌رۆكێ ليستا وه‌ته‌نيه كۆمبوو.
د وێ كۆمبوونێ دا، هه‌ردو لايه‌نان دووپاتى ل پره‌نسيبێن هه‌ڤسه‌نگيێ وته‌وافوقێ وهه‌ڤپشكيا راسته‌قينه ل عيراقێ كر وهاريكارى وهه‌ماهه‌نگى دناڤبه‌را هه‌موو پێكهاتێن عيراقێ ب پێدڤى زانين ب شێوه‌كى كو هه‌موو خوه دپرۆسا سياسى وحوكمرانيێ ل عيراقێ ببينن.
ئه‌ڤرۆنيوز:
سه‌رۆك وه‌زيرێن هه‌رێما كوردستانێ نێچيرڤان بارزانى ئه‌ڤرۆ شه‌مبيێ 22/9/2018 ل به‌غدا ل گه‌ل نورى مالكى سه‌رۆكێ ليستا ده‌وله‌تا قانوونێ كۆمبوو.
ل دووڤ ئۆفيسا راگه‌هاندنا مالكى، ئه‌ڤ شه‌ڤه نورى مالكى ل نڤيسينگه‌ها خوه پێشوازى ل نێچيرڤان بارزانى كر ودكۆمبوونه‌كێ دا به‌حسێ پرۆسا سياسى ل عيراقێ ودانوستاندنێن دناڤبه‌را هێزێن نيشتمانى كر ب مه‌ره‌ما پێكئينانا حوكمه‌تا عيراقى يا نوو.
دهێته زانين ئه‌ڤرۆ نێچيرڤان بارزانى گه‌هشتبوو به‌غدا ول گه‌ل هه‌ر ئێك ژ حه‌يده‌ر عه‌بادى سه‌رۆك وه‌زيرێن عيراقێ وسه‌رۆكێ ليستا نه‌سر وعه‌مار حه‌كيم سه‌رۆكێ ره‌وتێ حيكمه وفالح فه‌ياز سه‌ركردێ ديار دناڤ هه‌ڤپه‌يمانيا بيناء (فه‌تح وده‌وله‌تا قانوونێ) كۆمبوو.
ئه‌ڤرۆنيوز:
يانا مانشسته‌ر يونايتد يا ئينگليزى به‌رده‌وامى ب ئه‌نجامێن نه‌باش دخۆلا ئينگليزى يا ئه‌ڤ ساله دا وئه‌ڤرۆ شه‌مبيێ 22/9/2018 ل سه‌ر ياريگه‌ها خوه ل گه‌ل يانا وولفه‌رهامبتۆن ب ئه‌نجامێ 1-1 وه‌كهه‌ڤ بوو.
يانا مانشسته‌ر يونايتد ل خۆله‌كا 18 ب رێيا ياريكه‌رێ خوه سانتۆس ب گۆله‌كێ پێشكه‌فت، به‌لێ يانا وولفه‌رهامبتۆن ل خۆله‌كا 53 گۆلا وه‌كهه‌ڤيێ ب ريێا ياريكه‌رێ خوه موتينهۆى تۆماركر.
ب ڤى ئه‌نجامى ماشسته‌ر يونايتد بوو خودانا 10 خالان ول رێزا شه‌شێ دهێت كو ژ شه‌ش ياريان 2 دوراندن ووه‌كهه‌ڤيه‌ك وسێ سه‌ركه‌فتن تۆمار كرينه. يانا وولفه‌رهامبتۆن ژى ب 9 خالان ل رێزا 10 دهێت.
ئه‌ڤرۆنيوز:
يانا لێڤه‌رپۆل يا ئينگليزى به‌رده‌وامى دا زنجيرا سه‌ركه‌فتنێن خوه د خۆلا ئينگليزى دا وئه‌ڤرۆ شه‌مبيێ 22/9/2018 ل سه‌ر ياريگه‌ها خوه ل سه‌ر يانا ساوسهامبتۆن ب ئه‌نجامێ 3-0 ب سه‌ركه‌فت.
هه‌رسێ گۆلێن يانا لێڤه‌رپۆل ل گێمێ ئێكێ هاتن تۆماركرن ب رێيا ياريزانان ويسلى هوديت (ياريكه‌رێ ساسهامبتۆن ب شاشى ل سه‌ر گۆلا خوه كر) ل خۆله‌كا 10 وجويل ماتيب
ل خۆله‌كا 21 ومحه‌مه‌د سه‌لاح ل ده‌مێ زێده‌كرى ژ گێمێ ئێكێ.
ب ڤى ئه‌نجامى يانا لێڤه‌رپۆل ب 18خالان ژ شه‌ش ياريان ل سه‌ر رێزبه‌ندا خۆلا ئينگليزى دهێت ويانا ساوسهامبتۆن ب 5 خالان ل رێزا 14 دهێت.
ئه‌ڤرۆ نیوز:
نێچیرڤان بارزانی سه‌رۆك وه‌زیرێن هه‌رێما كوردستانێ و جێگرێ سه‌رۆكێ پارتی دیمۆكراتی كوردستان بۆ دانوستاندنێن پێكئینانا حوكمه‌تا داهاتی یا عیراقێ ئه‌ڤرۆ ب هه‌ڤالینیا شانده‌كی سه‌ره‌دانا به‌غدا كر.
نێچیرڤان بارزانی جودا ل گه‌ل حه‌یده‌ر عه‌بادی سه‌رۆك وه‌زیرێن عیراقێ و عه‌ممار حه‌كیم سه‌رۆكێ ره‌وتێ حكمه كۆمبوو و دانوستاندن ل دۆر پێكئینانا حوكمه‌تا داهاتی یا عیراقێ و پرسا سه‌رۆك كۆماری كرن.
بڕیاره هه‌ر د ڤێ سه‌ره‌دانێ دا نێچیرڤان بارزانی ل گه‌ل به‌رپرسێن بلندێن دی یێن عیراقێ ژی كۆم ببت.
ئه‌ڤرو سپێدێ 22-9-2018 ب ئاماده‌بونا به‌رێزان فه‌رهاد ئه‌مین ئه‌تروشی پارێزگه‌رێ دهوكێ وقایمقامێ قه‌زا به‌رده‌ره‌ه‌ش وصه‌باح بیت الله به‌رپرسێ لقێ 9 یێ پارتی دیموكراتی كوردستان وچه‌ند ئه‌ندامێن په‌رله‌مانێ كوردستانێ وری سپی وماقولێن ده‌ڤه‌را به‌رده‌ره‌ش به‌رێ بنیاتی بو چێكرنا رێكا (ناحیا داره‌تو – زه‌نگه‌نان) هاته دانان.
پارێزگه‌رێ دهوكێ دپه‌یڤه‌كێدا پیروزباهیا خه‌لكێ ده‌ڤه‌رێ كر وگوت ئه‌ڤ پروژه ژبه‌ر قه‌یرانا دارایی هاتبو راگرتن وئه‌ڤه دووسالبو مه كار ل سه‌ر ڤی پروژه‌ی دكر وب خوشحالیڤه ئه‌ڤرو مه به‌رێ بنیاتی بو دانا وكه‌ته دوارێ بجه ئینانێ دا وخواست كو هه‌موو لایه‌ن دهاریكاربن بو وێ یه‌كێ ب زوترین ده‌م رێك بهێته چێكرن.
هه‌روه‌سا سوپاسیا رێزدار نێچیرڤان بارزانی سه‌روكێ حكومه‌تا كوردستانێ كر كو هاریكاربویه بو چێكرنا پروژه‌ی.
درێژیا رێكێ 7كم وكوژمێ بو هاتیه ته‌رخانكرن (587)ملیون دینارن.
پاش ب ئاماده‌بونا پارێزگه‌رێ دهوكێ وقایمقامێ قه‌زا ئاكرێ وبه‌رێزێن دگه‌لدا به‌رێ بنیاتی بو چێكرنا رێكا (كوركا – سوركان – خه‌لات-زێراڤ) ل ناحیا گرده‌سین ل قه‌زا ئاكرێ هاته دانان .
پارێزگه‌رێ دهوكێ دپه‌یڤه‌كێدا پیروزباهیا خه‌لكێ ده‌ڤه‌رێ كر وسوپاسیا سه‌روكێ حكومه‌تا هه‌رێما كوردستانێ كر كو رازیبونا خو دیاركریه بو چێكرنا ڤێ رێكا گرنگ هه‌روه‌سا گوت ل قوناغێن بهێت ئه‌و پر ژی دێ هێنه چێكرن یێن ژبه‌ر له‌هیا هاتینه خرابكرن هه‌روه‌سا قوناغا سیێ ژی ژڤێ رێكێ ب زوترین ده‌م دێ هێته چێكرن وته‌كه‌زكر كو ئه‌ركێ حكومه‌تا كوردستانێ وپارێزگه‌ها دهوكێ یه هه‌موو خزمه‌تكاریا بو خه‌لكێ ده‌ڤه‌رێ دابینكه‌ن نه‌خاسمه خه‌لكێ ڤێ ده‌ڤه‌رێ گه‌له‌ك شه‌هید قوربانی داینه وئه‌ركێ حكومه‌تێ یه خزمه‌تكاریێن گشتی دهه‌موو سه‌كته‌راندا بو دابینكه‌ت.
هه‌ژی گوتنێ یه درێژیا رێكێ (14)كم وبكوژمێ ملیاره‌ك و742ملیون دینارا دێ هێته چێكرن وژماره‌كا گوندا دێ مفای ژێ وه‌رگرن.
ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى، ئه‌ڤرۆ شه‌مبيێ 22/9/2018 پێشوازى ل محه‌مه‌د ئه‌لحه‌لبوسى سه‌رۆكێ په‌رله‌مانێ عيراقێ كر.
دديداره‌كێ دا زێده‌بارى دانوستاندنێ ل دۆر پێشهات وگوهۆرينێن عيراقێ، رۆناهى هاته خستن ل سه‌ر پێدڤيا پشكداريا كارا يا هه‌موو لايه‌ن وپێكهاتێن عيراقێ ل دروستكرنا برياران ودووپاتى ل پره‌نسيبێ هه‌ڤپشكيێ وهه‌ڤسه‌نگيێ وته‌وافوقێ ل رێڤه‌برنا هه‌موو ده‌زگايێن وه‌لاتى هاته كرن.
مه‌سرور بارزانى پيرۆزباهيا خوه ب حه‌لبوسى راگه‌هاند ب هه‌لكه‌فتا ده‌ستنيشانكرنا وى بۆ سه‌رۆكاتيا په‌رله‌مانێ عيراقێ وهيڤيا سه‌ركه‌فتنێ دوى ئه‌ركێ نوو دا بۆ خواست وپشته‌ڤانى وهاريكاريا تمام يا خوه‌ژى بۆ ده‌ربرى.
سه‌رۆكێ په‌رله‌مانێ عيراقێ، دياركر كو ژ نێزيك دێ ل گه‌ل هه‌موو فراكسيۆنێن په‌رله‌مانى كارێ هه‌ڤپشك كه‌ن ل ده‌ركرنا قانوونان ب ئارمانجا ڤه‌گه‌راندنا باوه‌ريێ دناڤبه‌را پێكهاتان وباشتر خزمه‌تكرنا وه‌لاتيان بێ جوداهى.
ئه‌ڤرۆنيوز:
پارتى ديموكراتى كوردستان دێ ئاهه‌نگه‌كا مه‌زن ل سلێمانيێ گێريت بۆ ناساندنا هه‌موو به‌ربژارێن ليستا 183.
ئاهه‌نگ دێ ل ده‌مژمێر 2 پشتى نيڤرۆيا سوباهى ئێكشه‌مبى 23/9/2018 ب به‌رهه‌ڤبوونا شانده‌كێ بلند يێ مه‌كته‌با سياسى وهه‌موو ئه‌ندام و هه‌ڤال ولايه‌نگرێن پارتى ل سنورێ لقێن 4 و11و12و21 ل گۆره‌پانا جڤاتا سه‌ركردايه‌تيا پارتى ل پارێزگه‌هێن سلێمانيێ وهه‌له‌بجه هێته گێران.
ئه‌ڤرۆنيوز:
سكرتێرێ مه‌كته‌با سياسى يا پارتى ديموكراتى كوردستان، فازل ميرانى، ئه‌ڤرۆ شه‌مبيێ 22/9/2018 راگه‌هاند، به‌ربژارێ پارتى بۆ پۆستێ سه‌رۆك كۆمارى ژلايێ سه‌رۆك بارزانى ڤه دێ هێته ده‌ستنيشانكرن.
فازل ميرانى، سكرتێرێ مه‌كته‌با سياسى يا پارتى دكۆنگره‌كێ رۆژنامه‌ڤانى دا ل پيرمام گۆت” ده‌مێ مه به‌ربژارێ خوه هه‌بيت بۆ پۆستێ سه‌رۆك كۆمارى، ئانكو دێ هه‌ڤركێ به‌رهه‌م سالحى بيت، هه‌كه مه كاك به‌رهه‌م په‌سه‌ند كربا بۆ وى پۆستى، مه به‌ربژار نه‌دبوو”.
فازل ميرانى ئاماژه دا كو گه‌له‌ك كه‌س يێن هه‌ين كو دانوستاندن ل دۆر دهێته كرن بۆ وێ چه‌ندێ ببنه به‌ربژارێن پارتى بۆ وه‌رگرتنا پۆستێ سه‌رۆك كۆمارى، به‌لێ كه‌نگى ئه‌و بابه‌ته ئێكلا ببيت، دێ ب فه‌رمى راگه‌هينين.
سه‌باره‌ت وێ چه‌ندێ كو پشكه‌ك ژ شيعان وسونه‌يان دهه‌ڤرانه ل سه‌ر به‌ربژاركرنا به‌رهه‌م سالح، فازل ميرانى گۆت”په‌رله‌مانه وهه‌لبژارتنه، مرۆڤ يێ ئازاده ده‌نگ ب كێ بده‌ت”.
ئه‌ڤرۆ نیۆز،عه‌زیز هه‌ورامی
هژماره‌كا مه‌زن يا لاوێن سه‌ر ب حزبان ڤه ل هه‌له‌بجه چوونه باره‌گايێ لقێ 12 يێ پارتى ول گه‌ل به‌رپرسێ لقێ كۆمبوون وسۆز دان كاربكه‌ن بۆ سه‌ركه‌فتنا ليستا 183 يا پارتى ديموكراتى كوردستان ل 30 ئه‌يلوولێ.
به‌سام عه‌لی، به‌رپرسێ لقێ 12 بۆ ئه‌ڤرۆنيوز گۆت” به‌رى چه‌ند رۆژان ل باره‌گايێ لقێ مه پێشوازى ل هژماره‌كا مه‌زن يا لاوێن ب سه‌ر حزبێن دى ل ڤى سنورى كر كو په‌يوه‌ندى ب رێزێن پارتى كر وسۆز دان درێژيێ ب خه‌باتا خوه دناڤ رێزێن پارتى بده‌ن، مه ژى سۆز دا وان ئه‌وا دشيانێن مه دا بيت بۆ خزمه‌تكرنا لاوێن سنورى، خه‌مساريێ نه‌كه‌ين”.
به‌سام عه‌لی گۆت ژى” شه‌ڤ و رۆژ دێ كاركه‌ين بۆ شكاندنا وێ تيرۆرا هزرى ئه‌وا ل دژى پارتى دهێته كرن ژلايێ حزبان ڤه ل ڤى سنورى ونوكه ژى دبينين خه‌لك ب كۆم ل ڤان ده‌ڤه‌ران دهێنه دناڤ رێزێن پارتى دا ولاوێن ڤى سنورى يێن گه‌هشتينه وێ باوه‌ريێ كو په‌ياما راسته‌قينه يا كوردان يا ل ده‌ف پارتى وپارتى خودان سۆزا خوه‌يه.
ب ديتنا وى به‌رپرسێ پارتى ده‌نگێن پارتى دێ زێده‌بوونه‌كا به‌رچاڤ ل ڤێ ده‌ڤه‌رێ ب خوه‌ڤه بينيت هه‌بمه‌ركرن ل گه‌ل ده‌نگێن هه‌لبژارتنێن 12/5/2018.
نيشاندان