ئه‌ڤرۆ نيوز:

د ژیانا رۆژانەدا، گەلەک سەرھاتی ل سەر مەدا دبوورن، گەلەک ژ وانا پێدڤیە بھێنە بەرچاڤ کرن، و خال ل سەر پەیڤا بھێنە دانان، داکو دوبارە نەبنەڤە و جڤاکەکێ ساخلەم ئاڤا ببیت، سەرھاتیا کچەکا باشوورێ کوردستانێ، عەقل و ووژدانا مرۆڤی دھەژینیت، ھەتا رادەکێ کو مروڤ باوەر نەکەت ل ڤی سەردەمی کەسانێن وەسا ھەبن، و وەسا ب ھوڤانە ھزر بکەن، لێ مروڤێن ھەموو بھایێن مروڤایەتیێ ژ دەست دابن، دێ ھەموو کارا کەت.
نارین کچەکا 20 سالی بوو، دەمێ چوویە د ھێلینا زێرین دا و بوویە بووک، ھەموو خەونا وێ ئەو بوو، کو زارۆیەک ھەبیت، پشتی 7 سالا ژ چاڤەرێبوونێ ئێدی بێ ھیڤی دبیت، پسمامێ زەلامێ نارینێ دبێژیتە وان، ئەم دێ زارۆیەکێ خوە دەینە ھەوە و بێی بەرامبەر بۆ خوە خودان بکەن، نارین و زەلامێ وێ ب ڤێ چەندێ رازی دبن، پشتی ژنا پسمامێ وی زارۆ دبیت، ھەر ل نەخوشخانێ زارۆیێ یەک رۆژی ددەنە وان، نارین و زەلامێ وێَ، زارۆیی دبەنە مال و وەکو زارۆیێ خوە بخودان دکەن، پشتی زارۆ بوویە شەش سال، دەستپێکا ھەرفاندنا خەونا نارینێ دەست پێ دکەت، پسمامێ زەلامێ نارینێ ل گەل وێ دئاخڤیت و داخوازا کارێ سەر جھی، سێکس ژێ دکەت، ھەکە نە، ئەو زارۆریێ دایە وان دێ ژێ وەرگریت، لێ ژبەر رەوشت بەرزیا خوە، نارینێ ئەڤ چەندە رەت کر، و نەھێلا ب چ رەنگا نێزیک ببیت، ئێدی نارین تووشی نەخوشیێن دەروونی دبیت، رۆژ دەرباز دبن، زارۆیێ نارینێ ژێ دھێتە ستاندن، نارین ژی داکو کولا دلێ خوە دەربکەت، بابەتی بۆ زەلامێ خوە ڤەدگێریت، بەلێ زەلامێ وێ باوەر ژێ ناکەت، ل جھێ کو ھاریکاریا ھەست و سوزێن نارینێ بکەت، ئەو ب تورەیی ڤە نارینێ تەلاق ددەت، پشتی کەربێن زەلامێ نارینێ ھاتینە خوار، ئێدی دووڤچوون و پرسیارا پسمامێ خوە دکەت، و بۆ وی دیار دبیت کو نارین یا بێ گونەھە، و بزاڤێ دکەت ئێدی دووبارە نارینێ بکەتە خێزانا خوە، بەلێ چونکی ئەوی نارین تەلاق دابوو، مەلایەک بێی بزانیت کو نارین ب تورەیی ڤە یا ھاتیە تەلاق دان و بێی کو پسیار بکەت کا ژبەر چ ھاتیە بەردان؟ مەلا ھەر ئێکسەر دبێژتە وان پێدڤیە نارین شوو بکەت و دووبارە بھێتە مەھر کرن، زەلامێ نارینێ مفا ژ سەربورێن خوە ل گەل پسمامێ خوە وەرنەگرتن، دووبارە چارەنڤیسێ نارینێ دکەتە ددەستێ پسمامێ خوەدا، ئانکو پسمامێ وی بۆ ماوێ حەفتیەکێ نارینێ مەھر بکەت، ب وێ ھیڤیێ پاشی ئەو نارینێ ل خوە مەھر بکەتەڤە و ببیتە ھەڤژینا وی، بەلێ پلانا وی سەرناگریت و پسمامێ وی ل خوە مەھر دکەت و رەت دکەت کو ئەو نارینێ تەلاق بدەت و نارین بۆ قوربانیا بازارێ ھەردو پسماما، پشتی ھینگی زەلامێ نارینێ، جارەکادی کەرب و کین و مێرانیا خوە دادرێژیتە سەر نارینێ، و ب 10 گولەیا ژیانا نارینێ ب دووماھی دئینیت و ب رێیێن جڤاکی ھەردو پسمام پێک دھێن و بێی کو قانوون ب پیڤازەکێ ژی بھێتە کرین.

ئه‌ڤرۆ نيوز:

پارێزەرەکێ دادگەھا دھۆکێ راگەھاند کو دو کەسان رێککەفتنەک ل گەل ھندەک کەسان کر دڤیان بازرگانیا ماددێن ھوشبەر بکەن و ئەڤ رێیە ژنوو بۆ خوە دیت بوو، دڤیان زەنگین ببن و ماددێ ھوشبەر ژ ئیرانێ بیننە دھۆکێ و گۆت: پشتی چەند رۆژەکا ئەڤ کەسە ل گەل ھندەک کەسێن دیتر ھاتنە دەستەسەر کرن و پشتی دان ب تاوانا خوە کری، ھەر یەک ژ وان حوکمێ 15 سالان وەرگرت، ھەروەسان ھاتنە غورامە کرن ژی ب کوژمەکێ پارەی.

پارێزەر جەودەت جەلال دوسکی ل دادگەھا دھۆکێ بۆ ئەڤرۆ دیار کر کو دو کەسێن خەلکێ دھۆکێ خێزاندار و خودان زارۆ بوون و ژیێن وان دناڤبەرا (35 بۆ 36) سالیێ دا بوون رێککەفتنەک ل گەل ھندەک کەسان کر دڤیان بازرگانیا ماددێن ھوشبەر بکەن و گۆت: ژنوو بۆ خوە ئەڤ رێیە دیتبوو، و دڤیان زەنگین ببن و ماددێ ھوشبەر ژ ئیرانێ بینە دھۆکێ، سەرەرای کو بارێ وان یێ ئابووری یێ باش بۆ، کارێ خوە ژی ھەبوو و خودان ترۆمبێل و خانی بوون.

پارێزەری گۆتژی: رێککەفتنا وان ل سەر 10 کیلویێن ماددێ ھۆشبەر بۆ، لێ بەری بگەھیتێ، رۆژەکێ وان کەسان نیڤ کیلویا ھروینی کو ب ھێزترین جورێ ھوشبەریە و یێ بھایە ژی، ئینا بۆ دھۆکێ، بەلێ بەری ئەڤی ماددەی ب فرۆشنە وەلاتیان ، وان زانی کو لڤینەک یا ھەی و چاڤدێریا وان یا دھێتە کرن، ژبەرکو تێلەفۆنێن وان ل بن چاڤدێریێ بوون، لێ بەری بھێنە گرتن کەسەک ژ وان تەلەفونا برایێ خوە کر و گۆتێ کیسکەک یێ د سەرشوویێ ڤە ھەرە بەردە دەست ئاڤێ و ئاڤێ پێداکە.

پارێزەری د بەردەوامیا ئاخفتنێن خوە دا گۆت: پاشی ئەو کەسە ل گەل ھندەک کەسێن دیتر ھاتنە دەستەسەر کرن، پشتی ڤەکۆلین ل گەل ھاتیە کرن دانپێدان ب تاوانا خوە کر کو مەرەما وان قازانج کرنا پارەی بۆ.

پارێزەری ئەو چەندە ژی ئاشکرا کر کو پشتی دادگەھکرنا وان ھاتیە کرن ل سەر مادا 14 ژ برگا ئێکێ ژ قانوونا ھوشبەران کو ڤان کەسان کارێ بازرگانیێ پێ دکر، ئانکو کارێ ھاوردە و ھنارتنا ھوشبەری دکر ھەر ئێک ژ وان حوکمێ 15 سالان وەرگرت و ھاتنە غورامەکرن ژی ب کوژمێ ملیونەکێ.

پارێزەری زێدەتر گۆت: کێشێن بازرگانی کرنێ ب ماددێن ھوشبەر د کیمن، بەلێ کێشێن کەسێن ماددێن ھوشبەر وەردگرن، ئانکو بووینە مودمن و بەردەوام ماددێ ھوشبەر دکێشن د زۆرن، چونکی زوربەیا گەنجێن مە دەمێ دچنە ئوروپا یان تورکیا و ئیرانێ ل وێرێ دچنە دیسکویا و حەبێن ھوشبەر دخۆن زەوقا پێ خوش دبیت و سەمایێ دکەن، ئەڤجا دەمێ دھێنە کوردستانێ دڤێن بۆ خوە پەیدا کەن و نینە، ئەڤجا تووشی ئاریشان دبن.