ئه‌ڤرۆ نيوز:
حوكمه‌تا هه‌رێما كوردستانێ رۆژه‌كا دژى كره بهێنڤه‌دانا فه‌رمى ل داموده‌زگه‌هێن حوكمه‌تێ.
سه‌فين دزه‌يى ئاخفتنكه‌رێ ب ناڤێ حوكمه‌تا هه‌رێما كوردستانێ د راگه‌هاندنه‌كێ دا وه‌لاتيێن هه‌رێما كوردستانێ ئاگه‌هدار دكه‌ت كو رۆژا پێنجشه‌مبى 20ى ئيلۆنا 2018ێ كو يا هه‌ڤده‌مه ل گه‌ل بيره‌وه‌ريا عاشوورايێ ل هه‌موو فه‌رمانگه‌هـ و داموده‌زگه‌هێن حوكمه‌تا هه‌رێما كوردستانێ بهێنڤه‌دانا فه‌رمى يه.
ئەڤرۆ نیوز، نەوزاد ھلۆری:
جڤاتا دادوەریێ ل ھەرێما کوردستانێ د بریارەکێ دا کو ئاراستەیێ دادگەھا پێداچوون و دەستەیا سزایێن سنێلان ھاتیەکرن، پێداچۆنێن ب لەز د دوسیێن وان سنێلان دا بکەن ئەڤێن کو دکەڤنە بن ئازادکرنا ب مەرج.
ب گورەی نڤیسارەکێ کو ب دەست ئەڤرۆ نیوز کەفتیە و چەند روژێن بوری دەرچوویە، جڤاتا دادوەریێ د نووترین بریار دا کو ئاراستەیێ دادگەھا پێداچون و دەستەیا سزایێن سنێلان ھاتیەکرن، بریار دایە پێداچۆنێن ب لەز د دوسێن وان سنێلان دا بھێنەکرن ئەڤێن کو ھاتینە دادگەھکرن ئەڤێن کو ئازادکرنا ب مەرج دگریت و کێشە د پێداچۆنا دوسیێن وان دا دھاتەکرن.
د نڤیسارێ دا ھاتیە ژی کو پێدڤی یە دەستەیا سزا سنێلان (صفة الاستعجال) بۆ وان سنێلێن گرتی بھێتەکرن ئەڤێن کو ئازادکرنا ب مەرج دگریت.
ئێک ژ مەزنترین کێشەیێن سنێلێن گرتی ئەڤێن کو ئازادکرنا ب مەرج دگرت ئەو بو کو پێداچۆن ل سەر دوسیێن وان یا ب لەز نەبوو و دھاتە گیرۆ کرن، د بوویە ئەگەرێ ئازادنەکرنا وان ل دەما خوە دا.
ئەڤرۆ، سالار دۆسکی:
شیرەتکارەکێ مەکتەبا سیاسی یا پارتی دیموکراتی کوردستان ئاشکراکر کو پارتی تێبینی ل سەر پوستێ سەرۆک کوماری ھەنە ل ھەرسێ خولێن بوری کو د دەستێ ئێکەتیێ دا بووینە.
عارف روشدی، شیرەتکارەکێ مەکتەبا سیاسی یا پارتی دیموکراتی کوردستان بۆ ئەڤرۆ گۆت” پارتی بەری نو کەتێبینی ل سەر پوستێ سەرۆک کوماری و ھەتا پوستێن دی ژی تێبینی ھەبووینە، چنکو پوستێ سەرۆک کومار ل دووڤ دەستوری ھندەک دەست ھەلات ھەنە، سەرۆکێ کومار شیا رێگریێ ل ھێرشا عەسکەری گرتبا ل سەر ھەرێما کوردستانێ ئەڤە نەکر، پێشمەرگە، بۆدجا ھەرێمێ، سەرۆک شیا رۆلێ دەستوری بینت و رێگربیت و ئەڤە نەکر، بگشتی پوستێ سەرۆک کوماری پوستەکێ تەشریفاتی یە و دەمێ مام جەلال ھەتا رادەکی باش بوو شیا ب ھەفکاری ل گەل جەنابێ سەرۆک بارزانی ھندەک تشتا ب سەروبەر بکەت، وی ژی ھەتا رادەکی نەشیا و ھەکە شیابا دڤیابا مادێ 140 جێبەجێکربا، ھەکە شیابا دڤیابا 17% نەگەھشتبا بەر گەنگەشێ، ھەکە شیابا دڤیابا مالکی ھێرشا عەسکەری نەئینابا سەر کوردستانێ ل خانەقین و کەرکووک، ئەڤە دیارن کو سەرۆک کومارێن مە مام جەلال و فوئاد مەعسوم وەک پێدڤی نەشیاینە خزمەتێ بکەن مام جەلال و فوئاد مەعسوم وەک پێدڤی نەشیاینە خزمەتێ بکەن، ھندەک تشت ل سەر دەمێ مام جەلال باشتر دھاتنەکرن ب رێکخەری ل گەل سەرۆک بارزانی، ل سەر دەمێ فوئاد معسومی ئەو ژی نەھاتیەکرن.
عارف روشدی: بەحسێ پوستێ سەرۆک کوماری کر ھەتا نوکە نە گەھشتینە چ رێکەفتنا و دڤێت ئالیێن سیاسی ب کەتواری سەحکەینە کریارا سیاسی ل کوردستانێ، پارتی پتر کورسیک ھەنە نەبتنێ ل کوردستانێ وەک بتنێ حزب ل سەر ئاستێ عیراقێ و مافێ ڤێ حزبێ یە پوستێ بلند وەربگریت، ھەڤدەم پارتی پێ باشە پوستێن ھەنە ل سەر بنیاتێ تێگەھشتێ بھێنە بەلاڤەکرن.
ئەو ژی گۆت:ناڤێن دھێنە گۆتن بۆ پوستێ سەرۆک کوماری ھەتا نوکە بتنێ راگەھاندنە و چ بریارێن دووماھیێ ل سەر چ ناڤان نەھاتینەدان، ھەتا ئەو ناڤێن حوکمەتێ ژی نە دروستن و بتنێ راگەھاندە.
شیرتکارێ مەکتەبا سیاسی ئەو ژی گۆت: کوردان بەغدا گۆتیە شیعان کیشا ئالیی مافێن دەستوری قەبوول کەت ئەم ل گەل وی نە و نوکە د گەنگەشێ داینە و ل قوناغا دووماھیێ نە و ھەر دو ئالی ب گۆتن چ ناھێلن لێ مە سەربور ل گەل ھەنە، ئەڤە نەجھێ باوەرنە و مە گرنتی دڤێت مە پێ باشە ئالیێ سیێ ھەبیت بۆ ھەر دو ئالیان باشترە، کێشا سەرەکی نوکە ئەوە بەرنامێ حوکمەتێ یە و چەند خواستێن کوردان تێدا ھەنە، ئێکەم پێگریکرنا دەستوری و پێکئینانا دەست ھەلاتێ ل سەر بنیاتێ راستەقینە ھەڤسەنگی و رێکەفتن، دڤێت خەلک بزانیت عیراق نە ئێک نەتەوە یە وبەلکو چەند نەتەوە نە و ئەم دووم نەتەوا ڤی مللەتی نە، دڤێت حوکمەتا داھاتی پێگربیت ب جھئینانا دەستوری و مادێ 140 پیشمەرگە و زڤراندنا کاودانێن کەرکووک و شنگال و دەڤەرێن کوردستانی بۆ بەری روودانێن دروست بووین.
ئه‌ڤرۆ نيوز:
رێڤەبەرێ گشتیێ ئاڤ و ئاڤەرۆ ل ھەرێما کوردستانێ راگەھاند، بۆ جارا ئێکێ یە ل ھەرێما کوردستانێ دێ پارەیێ ئاڤێ ب رێیا پیڤەران ژلایێ کۆمپانیەکێ ڤە ھێتە وەرگرتن و ئەڤە ژی دێ مفایەکێ مەزن ب ئاڤێ گەھینیت و ئەو 30% ژ ئاڤا ل ھەرێمێ ب ھەروە دچوو دێ مینیت و گۆت: ل کوردستانێ 800 ھزار پشکدارێن ئاڤێ ھەنە و ھەتا نوکە 550 ھزار کەسان پیڤەرێ ئاڤێ نەگرێدایە.
مەسعود کارەش، رێڤەبەرێ گشتیێ ئاڤ و ئاڤەرۆ ل ھەرێما کوردستانێ بۆ ئەڤرۆ دیار کر، د ڤێ مەھا نەھـ دا بۆ جارا ئێکێ دێ پارەیێ ئاڤێ ب رێیا پیڤەران ژلایێ کۆمپانیەکێ ڤە ھێتە وەرگرتن و سیستەمێ کەڤن یێ وەرگرتنا پارەیێ ئاڤێ نامینیت. نھا ل کوردستانێ800 ھزار پشکدارێن ئاڤێ ھەنە و ھەتا نوکە 550 ھزار کەسان پیڤەرێ ئاڤێ نەگرێدایە و خەلکێ ھەرێما کوردستانێ رۆژانە دوو ملیۆن مەترێن ئاڤێ یێن سێجا دمەزێخن و ئەڤ ئاڤە ژی ھەموو ژ بیرێن تەوازی و پرۆژەیێن ئاڤێ بۆ خەلکی دھێتە دابینکرن.
ئاشکرا ژی کر کو مەرەم ژ دانانا پیڤەرێن ئاڤێ کونترۆلکرنا ئاڤێ یە و ئێدی ئاڤ ب ھەروە نەچیت و ل گۆرەی سیستەمێ نوو، ھەر مەترەکا ئاڤێ یا سێجا ب 400 دیناران ل سەر حکوومەتێ دکەڤیت و خەرجیێن رۆژانە یێن ئاڤێ دگەھنە 800 ملیۆن دیناران و گۆت: ئەڤە کۆنترۆل ل سەر ئاڤێ بھێتە کرن و ب ھەروە نەچیت، رۆژانە دێ 240 ملیۆن دینار بۆ حۆکمەتێ ھێنە ڤەگەراندن.
خویاژی کر کو ئەگەر خێزانەک ئاڤێ زێدەیی پێدڤیا خوە نەرێژیت، ھەیڤانە دێ نێزیکی 12 ھزار دیناران حەقێ ئاڤێ دەت و ئەگەر ھەر مەھەکێ 60 مەترێن ئاڤێ یێن سێجا ب مەزێخیت، ئەڤە دێ ھەیڤانە 36 ھزار دیناران حەقێ ئاڤێ دەت.
دەربارەی ئەگەرێن پیسبوونا ئاڤێ خویاکر، حکومەت ھەردەم ئاڤا پاقژ بۆ وەلاتیان دابین دکەت، بەلێ گەلەک ئەگەر ھەنە کو ئاڤ پیس بگەھیتە وەلاتیان و ژ وان ژی دەمێ زێدەگاڤی ل سەر ژێدەرێن ئاڤێ دھێتە کرن، ھەروەسا دانانا گۆڤێن پەزی و چێکرنا بیستانان ل نێزیک ژێدەرێن ئاڤێ و ل نێزیک بیرێن ئیرتیوازی یێن ئاڤێ، ھەروەسا ھاڤێتن و سۆتنا گلێشی وەکو کۆمەلگەھا کواشێ، دیسا شکەستنا بۆریێن ئاڤێ ژی ئەگەرە بۆ پیسبوونێ، ھەروەسا تێکھەلبوونا ئاڤێ ل گەل ئاڤا جوکان ژی ئەگەرێ سەرەکیە بۆ پیسبوونا ئاڤا ڤەخوارنێ.
ل دویڤ ئامارێن رێکخراوا نەتەوێن ئێکگرتی ئاشکرا دبیت مەترسیەکا مەزن ل سەر بکارئینانا ئاڤا پیس ھەیە و نوکە ل جیھانێ 17% ژ حالەتێن مرنێ گرێدای ئاڤێ نە کو ساڵانە نێزیکی دو ملیۆن زارۆکان ژ ئەگەرێ ئاڤا پیس گیانێ خۆ ژ دەست ددەن و ژیێ وان دناڤبەرا 1 ھەتا 14 سالیێ دا و 80% ژ ڤان حالەتان ژی ل وەڵاتێن پاشڤەمای دا پەیدا دبن، ئەڤە بۆ مە دیاردکەت کو قوربانیێن ئاڤا پیس پترن ژ قوربانیێن شەڕا. لەوما فەرە سۆپاسیا رێکخراوا (UN) ب تایبەت یونیسف و (GIZ) بھێتە کرن، بۆ ھاریکاریا وان یا بەردەوام ل دۆر گرنگیدان ب تافێلکرنا ئاڤێ و پەیداکرنا کەرەستێن تافێلکرنێ.
خویاژی کر، ژێدەرێن ئاڤێ ل سەرانسەری جیھانێ ب شێوەکی نەدادپەروەرانە ھاتینە دابەش بوون، 2/3، ژ ڤێ ئاڤێ دھێتە بکارئینان دناڤبەرا (25) وەڵاتان دا و بەشێ دی یێ مایی بۆ ھەموو وەڵاتێن دی نە، وەکو یا دیار، پڕانیا ژێدەرێن ئاڤێ دھەڤپشکن دناڤبەرا پتر ژ وەڵاتەکی دا، بۆ نموونە (دیجلە و فورات دناڤبەرا تورکیا و عیراقێ و سوریا، نیل دناڤبەرا مسرێ و سودان و ئەسیوبیا) دا، ئەڤە دێ بیتە ئەگەرێ ھندێ مەترسیا شەرێ ئاڤێ پەیدابیت و ناکۆکی دناڤبەرا وان وەڵاتان دا دروست ببن.
ئه‌ڤرۆ نيوز:
مێشەڤانەک ل دەڤەرا مزووریا سەر ب قەزا سوران ڤە پتری 200 سەرێن مێشا یێن ھەین بەلێ ژ بەرکو ل چیایێن وێ دەڤەرێ گەلەک مێشێن ھنگڤینی یێن چیایی ھەنە پتریا بورینا دەمێ وی ل چیایە ژبەر دەست ڤە ئینانا ھنگڤینێ چیایی ھەر مێشەکا دبریت پتری 12 کیلو یێن ھنگڤینێ تێدا دەردئینیت کیلویا وی ب 80 ھزارا دھێت فروتن .
ئاراس باقی،مێشەڤان ل قەزا سوران بو رۆژناما ئەڤرۆ دیار کر کو دەسپێکا من ھەست ب ژیانێ کری ژ زاروکینیا خو من حەش ھەڤالینیا مێشا ھنگڤینی کریە ئەڤە ژیێ من گەھشتە 32 سال بتنێ ژێدەرێ ژیانێ دگەل مێشا ھنگڤینی من دیتیە ژبەرکو خودانکرنا مێشا ھنگڤینی باشترین کار دبینم خودانکرنا مالەکا مەزن یا من ل سەر وانە دناڤ مالێ دا جھەک تایبەت دروست کریە بو خودانکرنا مێشا ھنگڤینی سالێن بەرێ ژمارەکا مەزن یا سەرێن مێشا خودان دکر بەلێ نھا ژمارا گەھشتیە 200 مێشا ژبەر گھورینا کەش و ھەوایی مێش نەشیان دەربکەڤن ژبەر نەجێگیربوونا کەش و ھەوایی حەتا بەرھەم ئینانا ھنگڤینی یا کێم بو وەکو سالێن بەرێ نەبو بھایێ ھنگڤینی ژی یێ دناڤ مالێ ئەرزانتر بو ھەر کیلویەک ب 30 ھزارا دھات فروتن ئەو ھنگڤینێ ھاوردە ژی زیان ب ھنگڤینێ خومالی یێ کوردستانێ گەھاندیە.
ناڤھاتی خویاکر کو ھەر ژ دەست پێکا بھارێ حەتا بیتە پایز ل چیایی دژیم جاڤدێریا مێشێن چیایی دکەم ل سەر کانیا یان جھێن گەلەک گول لێ ھەین ئەو مێش قەستا ڤان جھا دکەن دیسان دەمێ مێش دڤەدگەرێن جاڤدێریا چوونا وان دکەم بو سەر جھێ وان ئەگەر جھێن وی من دیتن نیشانەکێ لێ دکەم د پایزێ دا دچم وێ مێشێ ھنگڤینی دەردئینم مێشێ ژی دکەمە دناڤ ێندوقەکێ دئینم مال نەجێگیربوونا کەش و ھەوایی زیان ب وان ژی گەھاندیە ل کوێستانا گول گەلەک کێم بوون دیسان کەش و ھەوا رێگر بوو بو دەرکەفتنا وان نەشیان د وەختێ خودا کاری بو دروست کرنا شانەیێن خو بکەن ژبەر نەبوونا خارنا گولا ل چیایی بھارا ئەڤ سال ژبەر بارانێ رێگربوو کو گول زی دروست نەبن.
ناڤھاتی گوت کو مێشێن چیایی ھەر مێشەکێ پتری 12 کیلو یێن ھنگڤینی لێ ھاتن برین ھەر کیلویەک ب 80 ھزارا دھات فروتن ھێشتا ل چیایی بووم خەلکی پەیوەندی بمن دکر ئەو ھنگڤین لمن دکری بو بکارئینانا دەرمانی بو نەخوشیا ژبلی خەلکەک دی سالانە من کریارێن خوی ێن تایبەت ھەنە ئەوژی بو چارەسەریا نەخوشا بکاردئینن ئەڤ ھنگڤینە گەھشتیە گەلەک وەلاتان بو بکارئینانا دەرمانی گەلەک خەلکێ بیانی ب رێکا تورێن کومەلایەتی پەیوەندی بمن کریە ل تورکیا و ئەمریکا بس زمانێ وان نەگەھشتیمە داخازا ڤی ھنگینی یا کری.
ناڤھاتی زێدەتر گوت کو داخاز دکەم ژ جھێن شولەژێ کو رێکێ بدەن کو سالانە بەشداری پیشانگەھێن چاندنێ بم ئەڤی ھنگڤینی نمایش بکەم نمونەیێن ھنگڤینی نیشا ھەما جیھانێ بدەم.
سالانە ل کوردستانێ رێژەکا باش یا ھنگڤینێ خۆمالی دھێتە بەرھەمئینانان جودا ل سالێن بۆری ئەڤسالە بەرھەمی َھنگڤینی زێدەکریە ژبلی نافخۆیا کوردستانێ ل دەرڤەژی خواست ل سەر ھەبوویە و سنور دەربازکرینە.
حاجی مستەفا مێشڤانەکێ کوردستانێ یە گۆت: دەمێ پازدە سالایە کارێ ب خودانکرن و بەرھەمئینانا ھنگڤینی دکەم پتر ژ سەد مێشا من ھەنە سالانە کویستان و گەرمیانا پێ دکەم دەمێ چەندین سالایە وەک ئەڤسالە بەرھەمێ ھنگڤینی زێدەنەبۆیە ، ئەڤسالە پتر ژ دوجارا من مێش برینە بەرھەمەکێ باشێ ھنگڤینی ھەیە پێَشبینی دکەم، ئەڤسالە بەرھەمێ ھنگڤینی بگەھیت ئێک تەن ،ھنگڤینی کریارێ خوەیێ بەردەوام ھەیە ل ھەمو تەخ و چینێن جڤاکی ، نوکە ھنگڤین کیلو ناڤبەرا 30 بۆ 120 ھزار دینارایە یێ جورێ باش .
حاجی گوتژی : ھنگڤینی کوردستانێ ژبلی نافخویا کوردستانی َو ناڤەراستا عیراقێ دگەھیت ئوروپا ژی سنور بەزاندینە خواستەکا باش لسەر ھەیە ئەڤسالە جارەکێ من بەرھەمێ خوە نیڤا پتر بۆ دەرڤە ھنارتیە ، ھندەک مێش ھەبۆنە ئەڤسالە دەھـ کیلو ھنگڤین بەرھەمئیناینە ل چاڤ ساچەندین سالێن بۆری بۆ جارا ئێکێ یە ئەڤسالە مێش ھندە ھنگڤینی دروستدکەن ،گەشتیارێن عەرەب ئەڤسالە پتری ھەمو سالا ھنگڤین کریە من ب تنێ ھنگڤین فروتیە نزیک 20 گەشتیارێن عەرەب گەلەک جارا تایبەت ل بەغداو بەێرا ھاتینە کوردستانێ بۆ کرینا ھنگڤینی .
ناڤبری گوتژی : ل بازارێ کرین و فروتنێ بەرھەمێ ھنگڤینێ کوردستانێ ل بەرھەمێ ھنگڤینێ ھەمو وەلاتان زێدەترو گرنتر ب رێژەکا باش دھێتە فروتن.
وەلید خەلیل ئیبراھیم ماموستا یە ل زاخۆ و ئاوارەیێ شنگالێ یە دیارکر کو کارێ من ژی خودانکرن و بەرھەم ئینانا ھنگڤینی یە، مێشا چیایێ شنگالێ خودان دکەم و دو رەنگێن ھنگڤینی ل دەڤ مە دھێنە بەرھەم ئینان، ئێک یێ رەشە و یێ دی زەرە، ئەڤە ژی کاریگەریا گژوگیایی کولیلکایە ھەتا تاما وان ژی ژێک جودایە، جورەکێ کولیلکێ ھەیە ئەو غەزالە بەس ل چیاێ شنگالێ شین دبیت پشتی درینا گەنمی و دەغ و دانی ئەو کولیلک دەردکەڤیت، چ جوداھی دناڤبەرا وان دا نینە بەس رەنگ و تامێ ژێک جودانە، بەس نھا من مێشێن خو ئیناینە چیایێ گارە و ناڤ بەرواریا.
ناڤبری ئەو چەندە ژی گۆت: 2009 پازدەھزار مێش مە ھەبوون، نوکە مێشێن کوردستانێ گەھشتیە 55 ھەزار مێشان، نێزیکی 40 ھەزار مێشان زێدەکریە،د ئەڤان ھەشت سالان دا، ئەڤە ژی جھێ دلخوشکرنێ یە و ھەکە پشتەڤانی و رێکێن بازارکرنێ بھێنە خوشکرن دشیاندایە زێدەتری ئەڤێ رێژەیی زێدە و بەرھەم بینین، بو ئەڤێ چەندێ شارەزای و سەلیقەیا تایبەت دڤێت چونکو خودانکرنا مێشان جیھانەکا تایبەتە، بڤان رێکێن نو یێن خودانکرنێ و ھاتنا دەرمانان ژبو پاراستن ژ ھەر نەخوشیەکێ.
زێدەبوونا بەرھەمی تا چ ئاست کاریگەریێ ل بھای دکەت، ناڤبری دیارکر ژی ھنگڤینێ کوردستانێ یێ باشە و ژ ئالێ کوالیتێ یە، ژ 50 ھەزار دینارێ ھەتا 75 ھەزار دینارن دچیت، یێ ھەی ئەرزانتر ژی ڤەدگەریت بۆ چەوانیا خودانکرنێ، بازارێ بەرھەمێ مە ژی ناڤەراست و ژێریا عیراقێ یە.
ئیسماعیل حێن ئیبراھیم کارێ مێشەڤانیێ دکەت بۆ رۆژنامەیا ئەڤرۆ دیارکر بو 17 سالان دچیت کارێ مێشەڤانیێ دکەم، ل سەر ئاستێ 30 وەلاتێن جیھانێ ھنگڤینێ کوردستانێ یێ ئێکێ دەرکەت و ئەو ژی یێ من بوو و مەدالی زێری یا باشترین ھنگڤین بدەستڤە بینم، ل وەلاتێ مسرێ، ژ 350 جورێن ھنگڤینی یێ من دەرکەت یێ ئێکێ، ئەو ھنگڤینێ من بری مێشا وێ ل چیایی َ شنگالێ دھێتە خودانکرن، جورەک کولیلکەکا تایبەت ل بھاران شین دبیت ئەڤێ چەندێ وەکریە بھا بیت و ب تام خوش ھەکە پشتەڤان و ھاریکاری ھەبیت ب رێکێن نو ھەڤچەرخ دشیێن باشترین بەرھەمێ ھنگڤینی ل سەر ئاستێ جیھانێ بەرھەم بینین.
ئه‌ڤرۆ نيوز:
جڤاتا کاروبارێن خانمان یا سەر ب سەرۆکایەتیا جڤاتا وەزیرێن ھەرێما کوردستانێ ھۆشداریێ ددەتە ھەموو لایەکی سڤکاتیێ ھەمبەر بەربژارێن ژن نەکەن و ئەندامەکا جڤاتێ ژی دبێژیت: ھەر پێشێلکاریەکا ھەمبەری بەربژارێن ژن بھێتەکرن دێ دەینە دادگەھێ.
کۆسار کەریم، ئەنداما جڤاتا بلندا کاروبارێن خانمان بۆ رۆژناما ئەڤرۆ گۆت: “ب مەرەما دووڤچوون و لێپرسینێ دگەل وان کەسێن سڤکاتیێ ل ھەمبەر بەربژارێن ژن دکەن، جڤاتا کاروبارێن خانمان رێنمایی دەرکرینە و ھەموو لایەنێن پەیوەندیدار ھاتینە ئاگەھدارکرن کو نابیت ب چو شێوەکی رێ بھێتەدان ناڤێ بەربژارێن ژن ب خرابی بھێتە برن و ھەر کەسەکێ پێشێلکاریەکێ ھەمبەر بەربژارەکا ژن بکەت دێ تووشی لێپرسینێن قانوونی بیت و بۆ ڤێ مەرەمێ ژی مە ھەماھەنگی دگەل داخوازکارێ گشتی ھەیە و پێکڤە چاڤدرێریا ھەوا ھەلبژارتنان دکەین”.
کۆسار کەریم گۆتژی: “ھەتا نوکە چو بەربژارەکێ سکالا بلند نەکرینە کو پێشێلکاریەک ھەمبەر ھاتبیتەکرن، پتریا وان پێشێلکاریان ژی ب رێیا تۆڕێن جڤاکی و سوشیال میدیایێ دھێنەکرن، لەوڕا ژی کۆنتڕۆلکرن ھندەکێ یا ب زەحمەتە، ھەکە ئەڤ سوحبەتێن ب ھندەک بەربژاران دھێنەکرن ژ لایێ بەربژارانڤە بھێنە قەبوولکرن چو ئاریشە نینە، وەکی ئەڤا ھەمبەر سێ بەربژاران ھاتیەکرن و ستران ل سەر ھاتینە گۆتن، بەلێ بەلاڤکرنا گرتەیێن ڤیدیۆیی و تشتێ ئەخلاقی بیت ناھێتە قەبوولکرن”.
ئەڤرۆ نيوز:
BBC د راپۆرتەکێ دا دیار کریە کو پشتی سزایێن ئەمریکا ل سەر ئیرانێ سەپاندی دۆلارێ ئەمریکی ل ئیرانێ گەلەکێ کێم بوویە و ژ بەر ھندێ ژی نھا رۆژانە وەلاتیێن ئەفغانستانێ ب رێیێن قەچاغ دۆلاری ژ وەلاتێ خوە دەربازی ئیرانێ دکەن و ب بھایەکێ گران دفرۆشن، ژ بەر ھندێ ژی داھاتەکێ باش رۆژانە دچیتە وەلاتێ ئەفغانستانێ و بەرپرسێن سنۆری یێن ئیرانێ ژی چو ئاستەنگیان بۆ ڤی کاری دروست ناکەن.
د پشکەکا دی یا راپۆرتێ دا ھاتیە دیار کرن کو ژ بەر نەمانا دۆلارێ ئەمریکی ل بازارێن ئیرانێ رۆژ ب رۆژێ بھایێ دۆلاری گران دبیت و بازرگانێن ئەفغانی ژی نھا داھاتەکێ باش ژ ڤێ رێکێ بدەستڤە دئینن و بەرپرسێن ئیرانێ ژی چو ئاستەنگیان دروست ناکەن، چونکو ئەو ژی دخوازن ب ھەر رێکێن ھەی دۆلار بھێتە ئیرانێ.
ئەو یەک د دەمەکێ دایە کو دوھی بەرپرسەکێ وەزارەتا دەرڤە یا ئەفغانستانێ راگەھاند کو دێ پێرابوونێن توند ل دژی وان کەسان وەربگرین کو دۆلاری دبەنە ئیرانێ و یێن ب قەچاغی ڤی کاری بکەن دێ ب توندی ھێنە سزادان، ھەکە ئەم ئاستەنگیان بۆ ڤی کاری دروست نەکەین دێ ئەمریکی وەلاتێ مە ژی سزا بدەن.
چاڤدێرێن سیاسی ژی دیار دکەن کو نھا ھندەک بەرپرسێن ئیرانێ ب رێکێن قەچاغ ژ عیراقێ، ئەفغانستانێ و ھندەک وەلاتێن دی دۆلاری دبەنە ئیرانێ دا نەھێلن بھایێ دۆلاری پتر گران ببیت، لێ ھەتا نھا نەشیاینە رێگریێ ل بلندبوونا بھایێ دۆلارێ ئەمریکی بگرن و دۆلار رۆژ ب رۆژێ گران دبیت.
ئەڤرۆ نيوز:
پشتی کو سەرۆک کۆمارێ تورکیا و سەرۆکێ روسیا راگەھاندن کو ھەر دو وەلاتان ل دۆر باژێرێ ئدلبێ رێککەفتنەکا کری و ئۆپەراسیۆنا سەربازی ل ئدلبێ ناھێتە کرن، ھەر زوو حوکمەتا سووریێ دژبەریا خوە ل ھەمبەر وێ رێککەفتنا دیار کر و راگەھاند کو ھێزێن وان تنێ فەرمانان ژ بەشار ئەسەدی وەردگرن و دێ ھێرشی ئدلبێ کەن، چونکو ھەتا تیرۆرست ل ئدلبێ ھەبن دێ مەترسیا خوە بۆ ھەموو سووریێ ھەبیت و دڤێت ئدلب بکەڤیتە ژێر کۆنترۆلا حوکمەتا سووریێ.
ل ئالیێ دی بەرپرسەکێ وەزارەتا دەرڤە یا روسیا ژی راگەھاند کو ل گۆر رێککەفتنا روسیا و تورکیا دڤێت ھەرێمەکا ئارام ل ئدلبێ بھێتە دروست کرن دا چەکدارێن ئۆپۆزسیۆنێ و ھێزێن بەشاری ژی نەشێن ھێرشی وێرێ بکەن و وەسا دێ ئدلب ژ چەکدارێن ئۆپۆزسیۆنێ ھێتە چۆل کرن، چونکو شەرێ ل ئدلبێ دێ بیتە ئەگەرێ کوشتنا ب ھزاران وەلاتیێن سڤیل.
بەرپرسەکێ سەربازی یێ حوکمەتا سووریێ ژی بۆ ئاژانسا رویتەرز دیار کریە کو شەرێ مە ل ئدلبێ بۆ ژناڤبرنا تیرۆرستانە و ھەکە تیرۆرست ل ئدلبێ ژناڤ بچن دێ رەوشا سووریێ ژی ئارام بیت و رێککەفتنا روسیا و تورکیا بۆ بەرژەوەندیێن وانە و ئەم نەچار نینین ھەموو داخوازیێن روسیا قەبوول کەین و بجە بینین.
ئه‌ڤرۆ نيوز:
رەوشەنبیر و نڤیسەرێن کورد یێن رۆژئاڤایێ کوردستانێ پشتەڤانیا خوە بۆ لیستا پارتی و سەرۆک بارزانی دیار دکەن و رادگەھینن کو تنێ ھێزا نھا کار بۆ مافێن نەتەوی یێن کوردان دکەت، لیستا ١٨٣ یا پارتیێ یە و ھەکە پارتی سەرکەڤیت و حوکمەتەکا بھێز ل ھەرێما کوردستانێ بھێتە ئاڤاکرن دێ د خزمەتا ھەموو کوردان دا بیت.
حەمید کۆبانی چالاکڤانێ کورد یێ رۆژئاڤایێ کوردستانێ بۆ رۆژناما ئەڤرۆ دیار کر کو ھەلبژارتنێن ھەرێما کوردستانێ بۆ ھەموو کوردان گرنگن، چونکو ھەرێما کوردستانێ نھا بوویە پەناگەھەکا مەزن بۆ ھەموو کوردان و ب تایبەتی ژی کوردێن رۆژئاڤایێ کوردستانێ و گۆت: (ب ھزاران وەلاتیێن کورد یێن رۆژئاڤایێ کوردستانێ نھا ل ھەرێما کوردستانێ دژین و ب تایبەتی ژی پارتی دیموکراتی کوردستان ھاریکاریا وان دکەت، ژ بەر ھندێ ژی ئەم دخوازین کو پێگەھێ پارتی بھێزتر بیت و ئەم ھێڤیدارین کو د ڤان ھەلبژارتنان دا پارتی پتر ژ ھەلبژارتنێن بۆری دەنگان بدەستڤە بینیت چونکو ئەو یەک د بەرژەوەندیا ھەموو کوردان دایە).
یوسف دێرکی چاڤدێرێ سیاسی یێ رۆژئاڤایێ کوردستانێ ژی دیار دکەت کو مەترسیێن مەزن ل سەر ھەموو کوردان ھەنە، رەنگە پشتی ئاڤاکرنا حوکمەتا نوو یا عیراقێ دیسان بەغدا بزاڤێ بکەت ئاریشان بۆ ھەرێما کوردستانێ دروست بکەت و پێگەھێ کوردان ل عیراقێ لاواز کەت، ژ بەر ھندێ ژی ئەم دبێژین ھەکە پارتی ھژمارا کورسیێن خوە زێدەتر بکەت دێ شێت بەرسنگێ دوژمنان بگریت و گۆت: (یێن ل سحێلا و پردێ و گەلەک دەڤەرێن دی شیان دوژمنان بشکینن و کوردستانێ بپارێزن ئەڤرۆکە ژی بۆ ھەر پێشھاتەکێ ئامادەنە، ژ بەر ھندێ ژی ئەم وەکو کوردێن رۆژئاڤایێ کوردستانێ دخوازین پارتی سەرکەڤیت چونکو سەرکەفتنا پارتیێ سەرکەفتنا ھەموو کوردانە و ئەڤرۆکە پارتی کار بۆ ئارمانجێن مە دکەت و ژ بەر ھندێ ژی ھێڤیا مە سەرکەفتنا لیستا ١٨٣ یا پارتی یە).
ل ئالیێ دی ب سەدان نڤیسەر، رۆژنامەڤان و رەوشەنبیرێن کورد ل رۆژئاڤایێ کوردستانێ ب رێیا تۆرێن جڤاکی پشتەڤانیا خوە بۆ لیستا ١٨٣ یا پارتیێ دیار دکەن و دخوازن خەلکێ ھەرێما کوردستانێ پشتەڤانیێ ل پارتی بکەن، چونکو ب سەرکەفتنا پارتی دێ ھەموو دەستکەفتێن گەلێ کوردستانێ ھێنە پاراستن و بھێزبوونا پارتی بۆ ھەموو پارچێن دی یێن کوردستانێ باشە چونکو پارتی خوە ب خزمەتکارێ ھەموو خەلکێ کوردستانێ دیتیە و بەردەوام ژی ل سەر ڤێ ئارمانجا پیرۆز کار دکەت، ژ بەر ھندێ ژی سەرکەفتنا لیستا پارتی و سەرۆک بارزانی سەرکەفتنا ھەموو کوردستانێ یە، چونکو ئەوا گەلێ کورد ل ھەر چار پارچێن کوردستانێ دڤێت پارتی کار بۆ ھندێ دکەت.
چالاکڤانێن رۆژئاڤا ژ بەر ھندێ ژی دخواز دکەن کو برایێن وان ل ھەرێما کوردستانێ پشتەڤانیێ ل لیستا سەرۆک بارزانی بکەن دا پێگەھێ پارتی ژ جاران بھێزتر بیت، چونکو تنێ پارتی دشێت پیلانێن دوژمن و نەیاران ژناڤ ببەت و دەمێ شەرێ داعشێ و شەرێ حەشدا شەعبی ژی پارتی و پێشمەرگێن سەرۆک بارزانی شیان دربێن کوژەک ل دوژمنی بدەن و ھەرێما کوردستانێ بپارێزن، ژ بەر ھندێ ژی سەرکەفتنا پارتی سەرکەفتنا ھەموو کوردانە و د ھەمان دەمی دا ب سەرکەفتنا پارتی دێ پاشەرۆژا کوردستانێ ژی ھێتە گەرەنتی کرن.
ئەڤرۆ نيوز، زنار تۆڤی:
حکمەت محو گەودا، بەربژارێ ژماری 90 ل سەر لیستا 183 ێ یا پارتی دیموکراتی کوردستان ل سنوورێ لقا 8 ل باژێرێ زاخۆ، بەرنامێ کارێ خوە بۆ رۆژناما ئەڤرۆ دیارکر: ھەکە ھات و خەلکێ باوەریا خوە دامن و ئەز بۆمە ئەندامێ پەرلەمانێ کوردستانێ، دێ خزمەتا پێشمەرگەی و خێزانێن سەربلندێن شەھیدان کەم، ھەرەسا ئەز د ژیێ 15 سالیێ دا بوویمە پێشمەرگە و ھەتا نوکە ژی ئەز خوە ب پێشمەرگە دبینم و دێ ھەر مینم پێشمەرگە، دیسا ل شەرێ تیرۆرستێن داعش ژی ئەز ل چەپەرێن پێشیێ یێن پێشمەرگێ کوردستانێ بوویمە و من بەرەڤانی ژ ئاخا پیرۆزا کوردستانێ کریە، ھەروەسا دەمێ من باوەریا خەلکێ ب دەستڤە ئینا دێ ھەموو کارێن خوە یێن کەسوکی دانمە ئالیەکێ و ھەردەم دێ د بەرژەوەندا گەل و خەلکێ کوردستانێ دا کارکەم، ژبەرکو من دەردێ شەھیدان دیتیە و ئەز کورێ شەھیدی مە، ھەروەسا من دەربەدەری و ئێش و ئازار ژی دیتینە، لەوما دێ ئەولەویاتا کارێ من خزمەتکرنا پێشمەرگەی و خێزانێن شەھیدان بیت، چونکی ھەکە پێشمەرگە نەبن، ئەم نەشێین ب ئازادی دناڤا ڤی وەلاتی دا بژین.
ناڤھاتی زێدەتر گۆت: د وارێ وەرزشێ دا دێ خزمەتا گەنج و لاوێن باژێرێ زاخۆ کەم، ھەر چەندە زاخۆ د وارێ وەرزشێ دا پێشکەفتنەکا باش ب خوەڤە دیتیە، ھەروەسا دێ پشتەڤانیێ ل کەرتێ چاندنێ و جۆتیاران کەم، ژ پێخەمەت ئەڤ کەرتە گەشەکرنێ ب خوەڤە ببینیت و مفایەکێ باش ژی بگەھیتە جۆتیارێن مە، دیسا دێ بزاڤێ کەم کو بێکاری ل کوردستانێ نەمینیت، ھەروەسا زاخۆ ب لاندکا کوردایەتیێ دھێتە نیاسین و گەلەک شەھید و قۆربانی داینە، لەوما من ل بەرە د ھەمو واران دا خزمەتا خەلکێ زاخۆ بکەم، دیسا زاخۆ کانیا ھونەری یە و من ل بەرە د واری ھونەری دا باشتر خزمەتا زاخۆ بکەم و دێ بزاڤێ کەم کو پشکەکا ھونەری ل زانکۆیا زاخۆ بھێتە ڤەکرن، ژ پێخەمەت بشێین باشتر خزمەتا ھونەرێ زاخۆ بکەین،
ھەروەسا دڤێ خولا پەرلەمانی دا ھیڤیا من ئەوە کو ئەم بشێین دەولەتا کوردستانێ ل سەر دەستێ سەرۆک بارزانی رابگەھینین.
حکمەت محو گەودا ل سالا 1969 ل دەڤەرا زاخۆ ژ دایک بوویە، پشتی تێکچوونا شۆرەشا ئیلۆنا مەزن ل گەل خێزانا خوە ئاوارەی تورکیا بوویە و ل بەیتوشەبابێ خوەجە بوویە، ل دەستپێکا سالا 1976 دەست ب خواندنا خوە کریە ل بەیتوشەبابێ، ژبەر کاودانێن وی سەردەمی نەشیایە خواندنا خوە تەمام بکەت، ل سالا 1985 بوویە پێشمەرگە ل گەل بابێ خوە و د ھەمان سالێ دا بریندار دبیت، پشکداری د چەندین شەر و داستانان دا کریە ل گەل بابێ خوە، دیسا ل ئەنفالێن رەش ل سالا 1988 جارەکادی خێزانا وی ئاوارەی تورکیا دبیت و ڤێ جارێ ژی ل بەیتوشەبابێ ئاکنجی دبیت، پشتی سەرھەلدانا 1991 جارەکادی ڤەدگەریتە کوردستانێ و ل باژێرێ زاخۆ ئاکنجی دبیت، ھەروەسا وی دناڤا رێزێن پێشمەرگەی دا چەندین پلە وەرگرتینە، نوکە ژی کارگێرێ لقا 8 یا پارتی یە ل زاخۆ و بەرپرسێ رێکخراوێن جەماوەری و پیشەیی یە.
نيشاندان