ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى ئه‌ڤرۆ سێشه‌مبى 18/9/2018  ل گه‌ل برێت ماكگۆرك، هنارتيێ تايبه‌تێ سه‌رۆكێ ئه‌مريكى بۆ هه‌ڤپه‌يمانيا شه‌رێ دژى داعشێ وشاندێ دگه‌لدا كۆمبوو.

د وێ كۆمبوونێ دا كو دۆگلاس سيليمان باليۆزێ ئه‌مريكا ل عيراقێ وستيڤن فاگن كونسۆلێ ئه‌مريكى ل هه‌ولێرێ به‌رهه‌ڤبووين، دانوستاندنێن به‌رده‌وام يێن پێكئينانا حوكمه‌تا نوو يا نيشتمانى وبنكه‌ فرهه‌ ل عيراقا فيدرال ورۆلێ هه‌رێما كوردستانێ هاته‌ به‌حسكرن.

مه‌سرور بارزانى، دووپاتى ل سه‌ر هه‌ڤپشكيا ب هيز دناڤبه‌را هه‌رێما كوردستانێ وئه‌مريكا وگرنگيا هاريكاريا له‌شكرى وئه‌منى يا درێژخايه‌ن كر.

ئه‌ڤرۆنيوز:

سكرتێرێ مه‌كته‌با سياسى يا پارتى ديموكراتى كوردستان، فازل ميرانى، دچارچۆڤێ هه‌وا بانگه‌شا پارتى بۆ هه‌لبژارتنێن په‌رله‌مانێ كوردستانێ ل شه‌قلاوه‌ راگه‌هاند، چه‌ند رۆژه‌كه‌ ئاگه‌هدارم كو ژلايێ هنده‌ك ژ به‌رپرسێن بلند يێن حزبان ب مه‌ره‌ما بانگه‌شا هه‌لبژارتنان ئاخڤتنان ل سه‌ر حوكمه‌ت وده‌ستهه‌لاتا پارتى ل هه‌ولێرێ دهێنه‌ كرن ومه‌ پێ نه‌خوه‌شه‌ كو ئه‌ڤ جۆره‌ ئاخڤتنه‌ ژهنده‌ك به‌رپرسان گوهلێ دبين،

فازل ميرانى گۆت ژى” ژنوكه‌ وپێڤه‌ هه‌كه‌ وان ئێك ئاخڤتنێ ل سه‌ر مه‌ بكه‌ن، مه‌ 100 ئاخڤتن يێن هه‌ين بۆ گۆتنێ”.

دياركر” هه‌روه‌كو چاوان مه‌ ليستا 184 يا پارتى دهه‌لبژارتنين په‌رله‌مانێ عيراقێ دا سه‌رخست، ب هه‌مان شێوه‌ دێ ليستا 183 يا پارتى بۆ هه‌لبژارتنێن په‌رله‌مانێ كوردستانێ سه‌رئێخين ودێ ئه‌م هه‌موو ده‌نگ ده‌ينه‌ ليستا 183 يا پارتى ديموكراتى كوردستان”.

خوياكر ژى” ئه‌ز چو جاران تبلا حه‌يده‌ر عه‌بادى ژبير ناكه‌م ل ده‌مێ بانگه‌شا هه‌لبژارتنێن په‌رله‌مانێ عيراقێ كو ل سه‌ر شاشێن ته‌له‌ڤزيۆنان بلندكربوو ودگۆت دێ خه‌ريتا سياسى ل كوردستانێ وعيراقێ هيته‌ گوهۆرين، ده‌مێ ئه‌ز چوويمه‌ به‌غدا عه‌بادى گۆته‌ من ره‌وشا پارتى گه‌له‌ك يا باشه‌، من ژى وه‌كو بيرئينانه‌ك بۆ ئاخڤتنين وى يێن پێشتر گۆتێ به‌لێ ره‌وشا پارتى ژوان باشتره‌ يێن خوه‌ به‌رهه‌ڤ دكر فاتيحێ ل سه‌ر پارتى بخوينن”.

دووماهيا ئاخڤتنا فازل ميرانى ل دۆر كورسيا سه‌رۆكاتيا وسه‌رۆك بارزانى ل گه‌ل مه‌زنه‌ رۆژنامه‌ڤانێ رۆژهه‌لاتا ناڤه‌راست (ئه‌حمه‌د بن ته‌لال) كو ده‌مێ پشتى ريفراندۆمێ دهه‌ڤپه‌يڤينه‌كێ دا به‌حسێ وێ چه‌ندێ كربوو كو پشتى نه‌مانا بارزانى وه‌كو سه‌رۆكێ هه‌رێما كوردستانێ، يا خوه‌ ڤه‌شارتى ول مه‌يدانا سياسى نه‌مايه‌، من ژى به‌رسڤا وى دا وگۆتێ ل سه‌ر زارێ من ڤێ چه‌ندێ بنڤيسه‌ مه‌سعود بارزانى ب كورسيا سه‌رۆكاتيێ نه‌هاتيه‌ نياسين، به‌لكو كورسيا سه‌رۆكاتيا هه‌رێمێ ب مه‌سعود بارزانى هاتيه‌ نياسين.

ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى، ئه‌ڤرۆ سێشه‌مبى 18/9/2018 پێشوازى ل برادلى سۆدن باليۆزێ نيوزيلاندا ل عيراقێ كر.

دديداره‌كێ دا، پێشهاتێن سياسى وله‌شكرى يێن ده‌ڤه‌رێ ب گشتى وگه‌فێن تيرۆرستان وب رێڤه‌چوونا پرۆسا هه‌لبژارتنان ل هه‌رێما كوردستانێ هاته‌ به‌حسكرن، مه‌سرور بارزانى ئاماژه‌ دا كو هێشتا تيرۆرستين داعشێ گه‌فا سه‌ره‌كى ومه‌ترسيدارن بۆ ئاسايش وسه‌قامگيريا ده‌ڤه‌رێ، ب تايبه‌تى ل مووسل وئه‌نبار وده‌وروبه‌رێن كه‌ركووكێ.

دپشكه‌كا دى يا ديدارێ دا به‌حسێ بزاڤ وپێنگاڤێن پێكئينانا حوكمه‌تا عيراقى يا نوو هاته‌ كرن وهه‌ردو لا دهه‌ڤرا بوون كو پێدڤيه‌ حوكمه‌ته‌ك بيت ره‌نگڤه‌دانا پێكهاتێن عيراقێ بيت وبزاڤێن خوه‌ بۆ ئاشتبوونا نيشتمانى ودابينكرنا خزمه‌تگوزاريێن سه‌ره‌كى وچاره‌سه‌ركرنا كێشان بكه‌ت، ل دۆر وێ چه‌ندێ باليۆزێ نيوزيلاندا پشته‌ڤانيا حوكمه‌تا وه‌لاتێ خوه‌ بۆ پێكئينانا حوكمه‌ته‌كێ راگه‌هاند كو نوونه‌راتيا هه‌موو پێكهاتان وخواست وداخوازيێن ولاتيان بكه‌ت.

سه‌باره‌ت بزاڤێن پێكئينانا حوكمه‌تا نوو، مه‌سرور بارزانى دياركر كو هه‌رێما كوردستانێ بزاڤا پێكئينانا هه‌ڤپه‌يمانيه‌كێ دكه‌ت كو داخوازيێن كوردستانێ وماده‌ وبرگێن دستوورى بجهبينيت، هه‌روه‌سا ئاماژه‌ ب له‌زكرنا بزاڤان بۆ دامه‌زراندنا جڤاتا بلند يا سياسه‌تين ستراتيژى ل عيراقێ كر، وه‌كو بزاڤه‌كا گرنگ بۆ رێگرتنێ ل تاكره‌ويێ ل ب رێڤه‌برنێ وده‌ركرنا بريارێن چاره‌نڤيسساز.

بحسكرنا په‌يوه‌نديێن دو قۆلى دناڤبه‌را هه‌رێما كوردستانێ ونيوزيلاندا وپێڤه‌برنا وان دهه‌موو بواراندنا ته‌وه‌ره‌كێ دى يێ ديدارێ بوو.