ئه‌ڤرۆنيوز:
په‌يڤدارێ حوكمه‌تا هه‌رێما كوردستانێ راگه‌هاند، رۆژا سێشه‌مبى 1/5/2018 ل هه‌موو دام وده‌زگه‌هێن حوكمه‌تێ بێهنڤه‌دانا فه‌رمى يه ب هه‌لكه‌فتا رۆژا جيهانى يا كرێكاران.
سه‌فين دزه‌يى، په‌يڤدارێ حوكمه‌تا هه‌رێما كوردستانێ، گۆت ژى” هه‌ردو وه‌زاره‌تێن خواندنا بلند وپه‌روه‌ردێ دشێن وێ رۆژێ بكه‌ن بێهنڤه‌دان ودشێن ده‌واما ئاسايى يا خوه بكه‌ن وه‌كو رۆژێن دى”.
ئه‌ڤرۆنيوز:
ئاسايشا هه‌ولێرێ دكۆنگره‌كێ رۆژنامه‌ڤانى دا هوورده‌كاريێن كوشتنا به‌رپرسه‌كێ كۆمسيۆنا بلند يا هه‌لبژارتن وراپرسيان ل هه‌رێما كوردستان به‌لاڤ دكه‌ت ورادگه‌هينيت كو ئه‌و روودانه ژئه‌گه‌رێ كێشه‌كا جڤاكى بوو وچو په‌يوه‌ندى ب هه‌ڤركيا سياسى ڤه نينه.
ئێڤاريا ئه‌ڤرۆ ئێكشه‌مبى 29/4/2018 ، تارق نورى ريڤه‌به‌رێ ئاسايشا هه‌ولێرێ دكۆنگره‌كێ رۆژنامه‌ڤانى دا گۆت” ب رێيا كاميرێن چاڤدێريێ بكژێن فارس محه‌مه‌د رێڤه‌به‌رێ گشتى ل كۆمسيۆنا بلند يا هه‌لبژارتن وراپرسيان ل هه‌رێما كوردستانێ هاتن ئاشكراكرن ول دووڤ ڤه‌كۆلينان دياربوويه كو ڤێ روودانێ چو په‌يوه‌ندى ب هه‌ڤركيا سياسى ڤه نينه وهه‌ردو بنه‌مال ب سه‌ر ئێكه‌تى نيشتمانى كوردستان ڤه‌نه وكێشه‌كا جڤاكى هه‌بوو”.
رێڤه‌به‌رێ ئاسايشا هه‌ولێرێ زێده‌تر گۆت” ل رۆژا ئه‌نجامدانا وێ تاوانێ، پشتى چه‌ڤدێريا فارس محه‌مه‌د دكه‌ن ل ده‌مێ ده‌ركه‌فتنا وى ژ مال تا وى ده‌مێ دچيته ده‌واما خوه ل كۆمسيۆنێ، سێ تاوانبار دناڤ ترومبێله‌كا ژ جۆرێ ئۆپل ڤيكترا ل به‌رده‌م فاميلى مۆل ته‌قێ لێ دكه‌ن ودكوژن”.
رۆهنكر ژى” هێشتا تاوانبار نه‌هاتينه ده‌سته‌سه‌ركرن ويێن چووينه ده‌رڤه‌ى هه‌ولێرێ، به‌لێ تاوانبار فاروق غازى باشتەپەیی ته‌قه يا ل فارس محه‌مه‌دى كرى وئێكێ دى ب ناڤێ هونه‌ر عه‌بدولكه‌ريم ل گه‌ل كه‌سه‌كێ دى دناڤ ترومبێلێ دا بوون وئه‌م دپشت راستين يێن چووينه ده‌رڤه‌ى هه‌ولێرێ”.
گۆت ژى” بنه‌مالا غازى باشتەپەیی پێشمه‌رگه‌نه ول يه‌كه‌يا 70ده‌وامێ دكه‌ن”.
فارس محه‌مه‌د، كو ب فارس جوتياران يێ ناڤداربوو، رێڤه‌به‌رێ گشتيێ كارگيرى بوو ل كۆمسيۆنا بلند يا هه‌لبژارتن وراپرسيان ل هه‌رێما كوردستانێ وكادره‌كێ ئێكه‌تيێ بوو، ل رۆژا سێشه‌مبيا بۆرى ل سه‌ر جاده‌يا 100 مه‌ترى ل باژێرێ هه‌ولێرێ ژلايێ چه‌ند چه‌كدارێن نه‌نياس ڤه ته‌قه لێ هاته كرن وگيانێ خوه ژده‌ست دا.
ئه‌ڤرۆنيوز:
جێگرێ سه‌رۆكێ پارتى ديموكراتى كوردستان دچارچۆڤێ كه‌رنه‌فالا بانگه‌شا ليستا پارتى يا هژمار 184 ل هه‌ولێرێ راگه‌هاند، دڤێت ل رۆژا ده‌نگدانێ ب سه‌لمينين كو پارتى پێشه‌نگه وهێزا ئێكێ يا كوردستانێ يه.
نێچیرڤان بارزانی، جێگری سەرۆكێ پارتی دیموكراتی كوردستان، دگۆتاره‌كێ دا گۆت” پارتى دخوازت هه‌موو هيزێن سياسى يێن كوردستانى بريارێ بده‌ن ل سه‌ر پشكداريكرن يان نه‌كرن دليسته‌كێ دا دهه‌لبژارتنان دا، به‌لێ ئه‌و ئێكرێزى يه دروست نه‌بوو”.
نێچيرڤان بارزانى رۆهنكر ژى” هنده‌ك لايه‌نان خواست هه‌لبژارتنان بۆ لاوازكرنا پارتى بكاربينن، به‌لێ دڤێت ل رۆژا ده‌نگدانێ بسه‌لمينين كو پارتى پێشه‌نگه وهێزا ئێكێ يه ل كوردستانێ”.
گۆت ژى” ڤان هه‌لبژارتنان بۆ پارتى گرنگيا تايبه‌ت يا خوه يا هه‌ى وپێدڤيه هه‌موو ئه‌ندام ولايه‌نگرێن پارتى گرنگيا ڤان هه‌لبژارتنان بزانن ودچارچۆڤێ بانێ خوه بزاڤا بده‌ستڤه‌ئينانا ده‌نگێن پتر بۆ پارتى بكه‌ن”.
ئه‌ڤرۆنيوز:
ئه‌ندامه‌كێ مه‌كته‌با سياسى يا پارتى ديموكراتى كوردستان ئاشكراكر، كه‌ركووك يا داگيركريه وبه‌رپرسێ نوكه يێ پاسه‌وانێن پارێزگه‌هێ به‌رى نوكه داعش بوو وپۆليسێن وه‌لاته‌كى دى ب جلكێن پۆليسێن عيراقێ ل كه‌ركووكێ يێن هاتينه به‌لاڤكرن وئه‌سته‌مه كه‌ركووك ب وى شێوه‌ى بمينيت.
ئه‌ڤرۆ ئێكشه‌مبى ل ئاكرێ دچارچۆڤێ هه‌وا بانگه‌شا هه‌لبژارتنان دا بۆ ليستا پارتى، كه‌مال كه‌ركووكى ئه‌ندامێ مه‌كته‌با سياسى يا پارتى دكۆره‌كى دا دپشكه‌كا مه‌زن يا ئه‌خڤتنين خوه دا به‌حسێ ره‌وشا كه‌ركووكێ كر.
كه‌مال كه‌ركووكى دياركر” ئالايێ كوردستانێ ل دووڤ دستوورێ عيراقێ رێ پێ هاتيه دان، به‌لێ ل كه‌ركووكێ يێ هاتيه قه‌ده‌غه‌كرن پشتى ژئه‌گه‌رێ خيانه‌تا خيانه‌تكاران هاتيه داگيركرن”.
كه‌ركووكى ئاماژه دا” ل دووڤ مادێ 117 ژ دستوورێ عيراقێ، په‌رله‌مانێ كوردستانێ وه‌كو ژێده‌ره‌ك بۆ قانوون دانانێ بۆ هه‌رێما كوردستانێ هاتيه نياسين وهه‌ر برياره‌كا ژ وى په‌رله‌مانى هاتبيته ده‌ركرن دێ كار پێ هيته كرن، بريارا ئالايێ كوردستانێ ژى ل دووڤ په‌رله‌مانێ كوردستانێ بوو، كو ننوكه ل كه‌ركووكێ هاتيه قه‌ده‌غه‌كرن”.
دياركر” جودا ژ چار هێزێن عيراقى، 12 جۆرێن هێزا حه‌شدا شه‌عبى ل كه‌ركووكێ يێن هه‌ين وهه‌بوونا وان هێزان هوكارن بۆ نه‌ساقامگيريا ره‌وشا ته‌ناهيێ ل كه‌ركووكێ وده‌وروبه‌ر”.
گۆت ژى” به‌رپرسێ پاسه‌وانێن پارێزگه‌ها كه‌ركووكێ ب وه‌كاله‌ت، پێشتر داعش بوو، ژبلى وێ چه‌ندێ ژى ل كه‌ركووكێ پۆليس يا هه‌ى جلكێن پۆليسێن عيراقى يێن ل به‌ر، به‌لێ ئه‌و پۆليسێ وه‌لاته‌كێ دى يه، پارتى بزاڤان بۆ چاره‌سه‌ركرنا كێشا كه‌ركووكێ دكه‌ت وئه‌سته‌مه كه‌ركووك ب ڤى شێوه‌ى بمينيت، مه ب دانوستاندنێ بزاڤ يێن كرين كو ئه‌ز هێزه بچنه ده‌رڤه‌ى كه‌ركووكێ”.
ئه‌ڤرۆنيوز:
به‌ربژاره‌كێ هه‌لبژارتنێن جڤاتا نوونه‌رين عيراقێ دشه‌ره‌كێ عه‌شايرى دا ل رۆژئاڤايێ به‌غدا دهيته كوشتن.
ژيده‌ره‌كێ ئه‌منى ل باژێرێ به‌غدا، ئه‌ڤرۆ ئێكشه‌مبى 29/4/2018 بۆ ده‌زگه‌هێن راگه‌هاندنێ يێن عيراقى گۆت”ئه‌ڤرۆ سپێدێ ل ده‌ڤه‌را مه‌شته‌ل ب رۆژئاڤايێ به‌غدا شه‌ره‌كێ عه‌شايرى روودا وبوو ئه‌گه‌رێ كوشتنا (نه‌جم حه‌سناوى) به‌ربژارێ ليستا ده‌وله‌تا قانوونێ بۆ هه‌لبژارتنێن جڤاتا نوونه‌رێن عيراقێ”.
وى ژێده‌رێ ئه‌منى گۆت ژى” پشتى روودانێ هێزه‌كا ئه‌منى جهێ روودانێ دۆرپێچكر وته‌رمێ وى به‌ربژارى ژى هاته ڤه‌گوهاستن بۆ نوشداريا داد ودوسيا ڤه‌كۆلينێ ژى بۆ زانينائه‌گه‌رێ روودانێ هاته ڤه‌كرن”.
ئه‌ڤرۆنيوز:
ئه‌ندامێ مه‌كته‌با سياسى يا پارتى ديموكراتى كوردستان، هشيار زێبارى راگه‌هاند، ئه‌ڤ هه‌لبژارتنه بۆ كوردان دچاره‌نڤيسسازن ودووپاتكر كو دشيانێن پارتى دايه دڤان هه‌لبژارتنان دا هژمارا كورسيێن خوه زێده‌تر بكه‌ت.
هشيار زێبارى، دسميناره‌كێ دا بۆ كادرێن پارتى ل سنورێ پارێزگه‌ها نه‌ينه‌وا گۆت” پێدڤيه جه‌ماوه‌ر ودلسۆزێن مه بزانن كا چ ئاليه‌ك يێ هه‌ژى يه كو ده‌نگێ خوه بده‌تێ، چ ئاليه‌ك دشێت به‌رگريێ ژ ملله‌تى وئاخێ بكه‌ت، چ سه‌ركرده‌يه‌ك جهێ باوه‌ريێ يه بۆ دانوستاندنێ ل سه‌ر پاشه‌رۆژێ”.
زێبارى گۆت ژى” پتريا ئه‌و ده‌ستكه‌فتێن كو هه‌تا نوكه ملله‌تێ كورد بده‌ستڤه‌ئيناى، ژبه‌ر پارتى ديموكراتى كوردستان بوو ورێككه‌فتنا 11 ئادارێ وشوره‌شێن ئه‌يلۆلێ و گولانێ ودامه‌زراندنا قه‌وارێ هه‌رێما كوردستانێ ل سالا 1992 ودامه‌زراندنا حوكمه‌ت وپه‌رله‌مانێ كوردستانێ وسيسته‌مێ فيدراليه‌تێ وپاراستنا ملله‌تى ژ جينوسايدێ تاكو ژناڤبرنا رژێما سه‌دامى وپشكداريه‌كا ب هێز دحوكمه‌تا عيراقێ دا”.
دياركر ژى” دشيانێن پارتى ديموكراتى كوردستان دايه، سه‌ره‌راى گه‌له‌ك رێگريان، ب پشت به‌ستن ب كادرێن خوه يێن دلسۆز ورێكخستنێن خوه، هژمارا كورسيێن خوه دڤان هه‌لبژارتنان دا زێده‌تر بكه‌ت”.
ئه‌ڤرۆنيوز:نان
سەرۆكێ پارتا دیموكراتی يا ئێزیدی ئاشكرا كر، ڤه‌كێشانا پارتيا كاركه‌رێن كوردستانێ (په‌كه‌كه) ژ شنگالێ دروه‌كا مه‌زنه وپه‌كه‌كه ب ناڤه‌كێ دى دێ پشكداريێ دهه‌لبژارتنێن جڤاتا نوونه‌رێن عيراقێ دا كه‌ت.
حه‌يده‌ر شه‌شۆ، سه‌رۆكێ پارتا ديموكراتى يا ئێزدى گۆت” په‌كه‌كه دێ پشكداريێ دهه‌لبژارتنێن جڤاتا نوونه‌رين عيراقێ دا كه‌ت دبن ناڤێ پارتا ئازادى وديموكراتى يا ئێزدى (پادى) وچالاكيێن له‌شكرى وسياسى ژى يێن په‌كه‌كێ ل شنگالێ ب دووماهى نه‌هاتينه وئه‌ڤه دره‌وه‌كا مه‌زنه وهه‌تا نوكه ژى په‌كه‌كێ خوه ژ شنگالێ ڤه‌نه‌كێشايه”.
شه‌شۆى زێده‌تر گۆت” پارتا (پادى) ژئاليێ په‌كه‌كێ ڤه هاتيه دروستكرن ودرووشم وبير وئايدلۆژيا په‌كه‌كێ يا هه‌لگرتى ودخوازيت بكه‌ته دناڤ هه‌لبژارتنێن عيراقێ دا وبكه‌ته نوونه‌را ئێزديان”.
هه‌ڤده‌م شێخ شامۆ په‌رله‌مانتارێ ئێزدى ل په‌رله‌مانێ كوردستانێ راگه‌هاند” په‌كه‌كه مه‌زنترين دوژمنا ئێزديانه وب چو شێوه‌كى قه‌بوول ناكه‌ين ئه‌و ب ناڤێ ئێزديان باخڤيت ونوونه‌راتيا مه ئێزديان بكه‌ت”.
ئه‌ڤرۆنيوز:
گه‌نجه‌كى بزاڤا كوشتنا دايك وبابێ خوه كر ودئه‌نجامدا بابێ وى گيانێ خوه ژده‌ست دا ودايكا وى بريندار دبيت.
رێڤه‌به‌ريا پۆليسێن پارێزگه‌ها هه‌ولێرێ درۆهنكرنه‌كێ دا راگه‌هاند” ئه‌ڤرۆ ئێكشه‌مبى ل تاخێ هه‌ڤالان ل باژێرێ هه‌ولێرێ گه‌نجه‌كى ب چه‌قۆكێ هێرشى دايك وبابێن خوه كر ودئه‌نجامدا بابێ وى گيانێ خوه ژده‌ستدا ودايكا وى ژى بريندار دبيت وهاته ڤه‌گوهاستن بۆ نه‌خوه‌شخانه هاوارهاتنێ”.
رێڤه‌به‌رێا پۆليٍين هه‌ولێرێ دياركرژى” وى گه‌نجى پشتى روددانێ خوه ژ سه‌ر بانى هاڤێته خوار ب مه‌ره‌ما خوه‌كوشتنێ، به‌لێ بريندار دبيت وئه‌وژى هاته ڤه‌گوهاستن بۆ نه‌خوه‌شخانێ”.
ئه‌ڤرۆنيوز:
ژئه‌گه‌رێ لێدانا بريسيێ زه‌لامه‌كێ 40 سالى ل گونده‌كێ ب سه‌ر باژێرێ مه‌ريوان ل رۆژهه‌لاتا كوردستانێ گيانێ خوه ژده‌ست دا.
ئاژانسا ميهرى يا ده‌نگوباسان يا ئيرانى به‌لاڤكر كو ل ئێڤاريا دوهى دوشه‌مبى زه‌لامه‌كێ 40 سالى كو خه‌لكێ گوندێ گۆگجه يێ سه‌ر ب باژێرێ مه‌ريوان ڤه ژئه‌گه‌رێ لێدانا بريسيێ گيانێ خوه ژ ده‌ست دا.
دياركر ژى كو ئه‌و كه‌سه جوتيار بوو ول ئه‌ردێ خوه يێ چاندنێ كاردكر ده‌مێ بريسيێ لێداى.
ئه‌ڤرۆنيوز:
سترانبێژێ توركيێ ناڤدار ئیبراهیم تاتلیسس، دێ خوه بۆ هه‌لبژارتنێن سه‌رۆكاتيا كۆمارا توركيا ل بازنێ پارێزگه‌ها ئه‌زمير به‌ربژاركه‌ت.
ل دووڤ راپۆرته‌كا ئاژانسا (سى ئێن ئێن تورك) تاتليسسى خوه بۆ هه‌لبژارتنێن سه‌رۆكاتيا كۆمارا توركيا به‌ربژاركريه ژ پارتا داد وگه‌شپێدان (AKP) كو حزبا ده‌ستهه‌لاتدار يا توركيايه وخوه ل بازنێ پارێزگه‌ها ئه‌زمير به‌ربژاركريه
په‌رله‌مانێ توركيا رۆژا 24/6/2018 دياركريه بۆ ئه‌نجامدانا هه‌لبژارتنێن پێشوه‌خت يێن سه‌رۆكاتيا كۆمارا توركيا. ل هه‌لبژارتنێن 2015 يێن توركيا، پارتا داد وگه‌شه‌پێدان كو ده‌مێ 13 سالانه پتريا كورسيێن په‌رله‌مانى هه‌نه، پشكه‌كا مه‌زن يا كورسيێن خوه ژده‌ستدابوون ول به‌رامبه‌ر پارتى ديموكراتى گه‌لان (HDP) كو پارته‌كا لايه‌نگرا كوردێن باكوورێ كوردستانێ يه، ب ده‌ستڤه‌ئينانا 13 كورسيان بۆ جارا ئێكێ چو دپه‌رله‌مانێ توركيا دا.
ئيبراهيم تاتليسس، سترانبێژ وئه‌كته‌ر وده‌رهێنه‌رێ ناڤدارێ توركى، ژدايكبوويێ ئورفايێ يه ل سالا 1952 ژبابه‌كێ كورد ودايكه‌كا عه‌ره‌ب.
نيشاندان