ئه‌ڤرۆنيوز:

ژێده‌ره‌كى ژ جڤاتا وه‌زيران ل هه‌رێما كوردستانێ راگه‌هاند، حوكمه‌تێ لژنه‌كێ پێكئينايه‌ بۆ ده‌ستنيشانكرنا مال ومولكێ زێده‌ ژ حوكمه‌تێ بۆ فرۆشتنا وان وڤه‌گه‌راندنا پارێ وان بۆ گه‌نجينا حوكمه‌تێ.

وى ژێده‌رى بۆ باس گۆت” لژنه‌كا هووربينيێ ژ حوكمه‌تێ يا هاتيه‌ دروستكرن بۆ دياركرنا هه‌موو وان پێدڤيێن زێده‌ كو ل فه‌رمانگه‌هان دا هه‌ين بۆ وێ چه‌ندێ ببن راپۆرته‌ك وپاشى ل جڤاتا وه‌زيران بريار ل سه‌ر بهێته‌ دان بۆ فرۆشتنا وان، ژوان ژى ترومبێل وكه‌لوپه‌لێن زێده‌ يێن فه‌رمانگه‌هان”.

يه‌روانت نيسان، ئه‌ندامێ لژنا دارايى ل په‌رله‌مانێ كوردستانێ گۆت” حوكمه‌ت دێ ترومبێلێن زێده‌ وهنده‌ك كه‌لوپه‌لێن دى يێن خوه‌ فرۆشيت تاكو هنده‌ك پاره‌ بۆ گه‌نجينا هه‌رێمێ بزڤريت،نوكه‌ ژى لژنه‌ك هاتيه‌ پێكئينان بۆ وێ مه‌ره‌مێ”.

 ئه‌ڤرۆنيوز:

سه‌رۆك وه‌زيرێن هه‌رێما كوردستانێ ئه‌ڤرۆ پێنج شه‌مبى 28/12/2017 راگه‌هاند، حوكمه‌تا عيراقێ يا به‌رده‌وامه‌ ل سه‌ر فشارێن خوه‌ ل سه‌ر هه‌رێما كوردستانێ، دياركر ژى ئه‌و ئاخڤتنێن عه‌بادى گۆتين ل دۆر په‌ترۆلێ وغازى ددروست نه‌بوون وئه‌ڤرۆ دێ ب هژمار به‌رسڤا وى ده‌ين.

نێچيرڤان بارازنى سه‌رۆك وه‌زيرێن هه‌رێما كوردستانێ دكۆنگره‌كێ رۆژنامه‌ڤانى دا ل هه‌وليرێ گۆت” داخستن ودرێژكرنا داخستنا فرۆكخانێن هه‌رێما كوردستانێ ژلايێ حوكمه‌تا عيراقێ ڤه‌، سزادانا گه‌لێ كوردستانێ يه‌”.

نێچيرڤان بارزانى دياركر” ئه‌وا ئه‌م دبينين دو ئاراسته‌ يێن هه‌ين، يا ئێكێ هنده‌ك ئه‌رێنيان ژ به‌غدا دبينين وه‌كو ده‌ستپێشخه‌ريا وێ ناما سه‌رۆك كۆمارى هنارتى بۆ ده‌ستپێكرنا دانوستاندنان دناڤبه‌را به‌غدا وهه‌ولێرێ، مه‌ پێشوازى يا لێكرى وب فه‌رمێ مه‌ به‌رسڤ يا ل سه‌ر داى، هه‌روه‌سا ئه‌و ئاخڤتنێن مالكى وعه‌لاوى، جێگرێن سه‌رۆك كۆمارا عيراقێ گۆتين، ب ئه‌رێنى دبينين ووه‌كو حوكمه‌تا هه‌رێما كوردستانێ دياردكه‌ين كو مه‌ دڤێت دچارچۆڤێ دستوورێ عيراقێ دا كێشان چاره‌سه‌ركه‌ين”.

نێچيرڤان بارزانى ئاماژه‌ ب داخۆيانيێن حه‌يده‌ر عه‌بادى كو دوهى دكۆنگره‌ێ خوه‌ يێ رۆژنامه‌ڤانى دا ل به‌غدا گۆتين ل دۆر بابه‌تێ په‌ترۆل وغازێ وگۆت” ئه‌ڤرۆ من لژنا په‌ترۆلێ وغازێ يا راسپاردى كو هه‌موو ئه‌و ئاخڤتنێن عه‌بادى گۆتين، ددوورن ژ پێزانينێن دروست وئه‌ڤرۆ دێ ب هژمار به‌رسڤا وى ده‌ين”.

سه‌رۆك وه‌زيرێن هه‌رێما كوردستانێ گۆت ژى” ل به‌غدا لژنه‌ك بۆ پێداچوونێ دميلاكاتێن وه‌زاره‌تا په‌روه‌ردێ وساخله‌ميێ هاتيه‌ پێكئينان، مه‌ چو لارێ بوون ل سه‌ر وێ چه‌ندێ نينه‌ وب پێنگاڤه‌كا باش دبينين، سيسته‌مێ مه‌ ل دووڤ بايۆمه‌ترى يه‌ ودبه‌رهه‌ڤين داتايان بده‌ينه‌ به‌غدا هه‌كه‌ ئه‌و دبه‌رهه‌ڤ بن”.

گۆت ژى” لژنه‌كا دى يا پێكئيناى بۆ ده‌رگه‌هێن سنورى وفرۆكخانان، مخبان به‌رى ده‌ست بكاربوونا وێ لژنێ، دو هه‌يڤێن دى داخستنا فرۆكخانان درێژكر، مخابن سه‌رۆك وه‌زيرێن عيراقێ ئه‌ڤێ چه‌ندێ وه‌كو فشارێ به‌رامبه‌ر هه‌رێما كوردستانێ بكاردئينيت وئه‌ڤێ كاريگه‌ريا ل سه‌ر خه‌لكێ هه‌رێمێ كرى وئه‌ڤێ چه‌ندێ وه‌كو سزايه‌كێ دبينين، مافێ وه‌لاتيانه‌ بشێن گه‌شت بكه‌ن وهاتنووچونێ بكه‌ن، هه‌روه‌سا كارتێكرن يا ل هاريكاريێن مرۆڤايه‌تى بۆ ئاواران ژى كرى”.

ل دۆر پێنگاڤێن چاكسازيێ، گۆت” حوكمه‌تا هه‌رێما كوردستانێ كارێن خوه‌ يێن كرين، ووه‌كو حوكمه‌ت دپێگيرين پشتى بريار ژپه‌رله‌مانى ده‌ربچيت، بجهبينين”.

ئه‌ڤرۆ نیۆز ، زنار تۆڤى:

ئه‌ندامه‌كێ په‌رله‌مانێ كوردستانێ ل سه‌ر لیستا پارتى دیمۆكراتى كوردستان ل دۆر وان پێشهاتێن نوو یێن ل كوردستانێ روو دده‌ن بۆ ئه‌ڤرۆ نیۆز دبێژیت:خوه‌ ڤه‌كێشانا كۆمه‌لا ئیسلامى و بزاڤا گۆران ژ حوكمه‌تا هه‌رێما كوردستانێ،د ده‌مه‌كێ دایه‌ كو سه‌رۆكێ حوكمه‌تا هه‌رێما كوردستانێ نێچیرڤان بارزانى داخواز ژ كۆمسیۆنا هه‌لبژاتنان كریه‌ كو به‌رهه‌ڤیێ بكه‌ن بۆ ئه‌نجامدانا هه‌لبژارتنان ل هه‌رێما كوردستانێ و وه‌سا دیاركریه‌ كو ماوێ هه‌لبژارتنان ژ سێ هه‌یڤێن دیتر نه‌بوریت،له‌ورا خوه‌ ڤه‌كێشانا وان هه‌ردو حزبان ژ حوكمه‌تێ چو واتایا خوه‌ نینه‌.

هەروەسا  گوت ژى:ب تنێ مه‌ره‌ما وان هه‌ردو حزبان ئه‌وه‌ كو سه‌رنجا خه‌لكێ بۆ خوه‌ رابكێشن د هه‌لبژارتنان دا،لێ خه‌لكێ كوردستانێ گه‌له‌ك یێ هشیاره‌ و باش تێ دگه‌هیت ژى،كو خوه‌ ڤه‌كێشانا وان نه‌ ژبۆ خه‌لكێ یه‌،هه‌روه‌سا نه‌ ژبۆ هندێ ژى یه‌ كو ئه‌ڤ حوكمه‌تا هه‌یى یا خرابه‌،به‌لكو ب تنێ بۆ ده‌ست خستنا هنده‌ك مه‌ره‌مێن حزبى و سیاسینه‌ و مه‌ره‌ما وان ئه‌وه‌ كو خه‌لكێ كوردستانێ د سه‌ر داببه‌ن و عاتیفا خه‌لكێ بۆ خوه‌ رابكێشن،چونكى ده‌مێ ل وه‌لاته‌كێ قه‌یرانه‌ك دروست دبیت،باشترین رێیا چاره‌سه‌ریێ ڤه‌گه‌ریانه‌ بۆ ده‌نگێ ملله‌تى و ده‌ستهه‌لاتا گه‌لێ كوردستانێ،هه‌روه‌سا سه‌رۆكێ حوكمه‌تێ ژى داخواز كریه‌ كو ڤه‌گه‌رینه‌ ڤه‌ بۆ ده‌ستهه‌لاتا گه‌لێ كوردستانێ،له‌ورا ڤێ چه‌ندێ پێدڤى ب خوه‌ ڤه‌كێشانێ و حوكمه‌تا ده‌مكى نینه‌.

فه‌رسه‌ت سۆفى ئه‌و ئه‌ندامێ په‌رله‌مانێ كوردستانێ یه‌ زێده‌تر دبێژیت:نوكه‌ ب تنێ ئێك بژارده‌ ل پبَشیا مه‌ هه‌یه‌ دڤى دۆخێ دژوار دا،ئه‌و ژى پێدڤیه‌ بێهنا خه‌لكێ مه‌ یا فره‌ه بیت و هه‌موو خه‌لكێ مه‌ خوه‌ به‌رهه‌ڤ بكه‌ت بۆ ئه‌نجامدانا هه‌لبژاردنان،هه‌روه‌سا نوكه‌ كۆمسیۆنا هه‌لبژارتنان ل هه‌رێما كوردستانێ مژۆلى پاقژكرنا لیستێن ده‌نگده‌رانه‌،دیسا هه‌كه‌ ل قۆناغێن بورى كۆمه‌لا ئیسلامى یان ژى بزاڤا گۆران شیابن خه‌لكێ مه‌ د سه‌ردا ببه‌ن،لێ نوكه‌ خه‌لكێ مه‌ گه‌له‌ك ژ وان هشیارتره‌،چونكى نوكه‌ سێ هه‌یڤ ل پێشیا خه‌لكێ ماینه‌ بۆ ئه‌نجامدانا هه‌لبژارتنان ل هه‌رێما كوردستانێ،له‌ورا ئێدى ئه‌و هه‌ردو حزب نه‌شێن سه‌رنجا خه‌لكێ بۆ هه‌لمه‌تا هه‌لبژاتنان رابكێشن،چونكى هه‌كه‌ خه‌لكێ كوردستانێ ئه‌ڤ ده‌ستهه‌لاته‌ نه‌ڤێت و یان ژى ئه‌ڤ قه‌یرانا هه‌یى نه‌شێن پێ ئیداره‌ بكه‌ن،بلا ملله‌تێ مه‌ ب خوه‌ بریارێ بده‌ت،وان كى دڤێت بلا بۆ خوه‌ ب هه‌لبژێرن،ئه‌ڤه‌ رێیا دیمۆكراتیه‌تێ یه‌ و رێیا ئاشتى خوازیێ یه‌ و ژ هه‌موو رێكێن دیتر باشتر و دیمۆكراسى تره‌.

ناڤهاتى هێشتا دبێژیت:لێ وه‌كو دیار خوه‌ ڤه‌كێشانا وان ب تنێ بۆ كومكرنا ده‌نگانه‌،چونكى ئه‌ڤه‌ ماوێ سێ سالانه‌ حوكمه‌تا هه‌رێما كوردستانێ كه‌فتیه‌ ڤێ قه‌یرانا دژوار،بۆچى به‌رى دو سالان وان هه‌ردو حزبان ئه‌ڤ بریاره‌ نه‌ ددا،یان ژى هه‌كه‌ ب دروستى ئه‌ڤ حوكمه‌ته‌ یا گه‌نده‌ل با و ئه‌و رازى نه‌بانه‌ ب كاركرنا ڤێ حوكمه‌تێ،بۆچى به‌رى نوكه‌ ده‌ستبه‌ردارى پۆستێن خوه‌ نه‌ دبوون دناڤا حوكمه‌تا هه‌رێمێ دا،له‌ورا خوه‌ ڤه‌كێشانا وان هیچ كارتێكرنێ ناكه‌ته‌ سه‌ر كارێن حوكمه‌تا هه‌رێما كوردستانێ،لێ ب تنێ دێ كارتێكرن ل سه‌ر وان ب خوه‌ هه‌بیت،دێ راستگویا وان كه‌ڤیته‌ ژێر پرسیاره‌كا مه‌زن.

فه‌رسه‌ت سۆفى ده‌رباره‌ى ئێكگرتوویا ئیسلامى یا كوردستانێ ژى گوت:هیڤى خوازم ئێكگرتوویا ئیسلامى هه‌مان خه‌له‌تیا كۆمه‌لا ئیسلامى و بزاڤا گۆران دوباره‌ نه‌كه‌ت و ئه‌م هیڤى دكه‌ین یا به‌رده‌وام بیت دناڤا حوكمه‌تێ دا،چونكى ئه‌ڤ كارتا خوه‌ ڤه‌كێشانا حزبان ژ حوكمه‌تێ كارته‌كا سۆتیه‌ ژ لایێ خه‌لكێ ڤه‌ و چو مفا بۆ وان حزبان تێدا نینه‌ و نه‌شێن چو كارتێكرنێ ژى بكه‌ن،هه‌روه‌سا پێدڤیه‌ پارتى و ئێكه‌تى ڤى دۆخى ده‌رباز بكه‌ن،چونكى ل قۆناغێن بورى ژى هه‌ردویان پێكڤه‌ به‌رپرسیاره‌تیا كوردستانێ گرتبوو ستوویێ خوه‌ و نوكه‌ ژى هه‌مان به‌رپرسیاره‌تى د ستوویێ هه‌ردو حزبان دایه‌،چونكى نوكه‌ كوردستان د دۆخه‌كێ گه‌له‌ك مه‌ترسیدار دا ده‌رباز دبیت و نابیت ب هیچ شێوه‌یه‌كێ ئه‌م رێكێ بده‌ین كو ئه‌ڤ ده‌ستكه‌فتێن ب خوینا شه‌هیدان ب ده‌ست مه‌ڤه‌ هاتین ئه‌م ژ ده‌ست بده‌ین،دیسا دڤێت د نوكه‌ دا حوكمه‌تا هه‌رێمێ كۆمه‌كا بریارێن چاره‌نڤیس و گرنگ ده‌رباره‌ى چاكسازیێ و روو ب روو بوونا گه‌نده‌لیێ بده‌ت و پێداچوونێ د كارێن گشتى ژى دا بكه‌ت،ب ڤى ره‌نگى دێ كارێن باش هێنه‌ ئه‌نجامدان و ئه‌م دێ گه‌هینه‌ قۆناغه‌كا باش.