ئەڤرۆ نیوز:
بھایێ دراڤێن بیانی ئەڤرۆ پێنجشەمبی 21 گولانا 2020 ل بازارێن ھەرێما کوردستانێ ب ڤی رەنگی یە:
١٠٠ دۆلارێن ئەمریکی ب ۱۲۲ ھزار و ۷٥۰ دینارانە.
١٠٠ پاوەن ب ۱٤۹ ھزار دینارانە.
١٠٠ یۆرۆ ب ١٣۲ ھزار دینارانە.
١٠٠ لیرێن تورکی ب ١٨ ھزار و ۲٥۰ دینارانە.
١٠٠ ھزار تمەنێ ئیرانی ب ٨ ھزار و ٥۰۰ دینارانە.
ئه‌ڤرۆ نیوز:
ریڤه‌به‌رێ تایێ هه‌ولێرێ یا به‌نكا ناڤه‌ندا عیراقێ راگه‌هاند سیسته‌مێ به‌نكی یێ نوكه ڤه‌كریه و چاڤه‌ریێ دكه‌ین، به‌غدا 400 ملیار دیناران وه‌كو موچه‌یێ فه‌رمانبه‌رێن هه‌رێمێ بخێنه سه‌ر سیسته‌می.
كازم نامق ریڤه‌به‌رێ تایێ هه‌ولێرێ یێ به‌نكا ناڤه‌ندا عیراقێ ئه‌و چه‌نده ژی راگه‌هاند: سیسته‌مێ به‌نكی د نوكه دا یێ ڤه‌كریه بۆ وه‌رگرتنا 400 ملیار دیناران كۆ ژلایێ سه‌رۆك وه‌زیرێن عیراقێ ڤه ره‌زامه‌ندی ل سه‌ر هاتیه دان وه‌كو موچه‌یێ هه‌یڤا نیسانێ یێ فه‌رمانبه‌رێن هه‌رێما كوردستانێ ره‌وانه بكه‌ت.
ناڤبری ئه‌و چه‌نده ژی دا زانین كۆ ل گه‌ل به‌غدا ئاخڤتینه و هاتینه ئاگه‌هداركرن كۆ سیسته‌مێ به‌نكی یێ ڤه‌كریه هه‌ر ده‌مێ پاره هات سه‌ر سیسته‌مێ حكومه‌تا هه‌رێما كوردستانێ دێ مه ئاگه‌هدار كه‌ن و دشیێن بكار بینین.
كازم نامق ریڤه‌به‌رێ تایێ هه‌ولێرێ یێ به‌نكا ناڤه‌ندا عیراقێ گۆت ژی ل راگه‌هاندنێ مه گوهـ لێ بوویه بزاڤ دهینه‌كرن بۆ هنارتنا موچه‌یێ فه‌رمانبه‌ران بۆ هه‌رێمێ.
دهۆك، له‌زگین جوقی:
جێگرێ پارێزگارێ نه‌ینه‌وا دیاركر به‌رنامه‌ك هاتیه دانان ب هه‌ڤكاری دگه‌ل رێكخراوان ل مووسل بۆ زڤرینا ئاواران ژ ناڤ كه‌مپێن مووسلێ دا بتنێ رێك خێزان داعش ناهێته دان ژ ناڤ كه‌مپان ده‌ربكه‌ڤن دێ هه‌موو د ناڤ كه‌مپه‌كێ دا هێنه ئاكنجیكرن.
عه‌لی عومه‌ر كه‌بعو، جێگرێ پارێزگارێ نه‌ینه‌وا بۆ كارۆبارێن ئاواره و رێكخراوان دیاركركو به‌رنامێ زڤرینا ئاواران ده‌ستپێكریه به‌ری چه‌نده‌كێ 106 خێزان ژ كه‌مپا سلامیه بۆ سه‌ر مال ومولگێن وان هاتنه ڤه‌گوهاستن نوكه ژی ئه‌م یێ ل سه‌ر كه‌مپه‌كا دێ كاردكه‌ین بۆ هندێ هژماره‌كا خێزانا ژ ناڤ كه‌مپێ بۆ سه‌ر جهـ وارێن وان بهێنه ڤه‌گه‌راندن هه‌موو بۆ ده‌ڤه‌را به‌عاج و عه‌یازیه وده‌ڤه‌رێن سه‌رڤه دهێنه ڤه‌گه‌راندن نوكه ل پارێزگه‌ها مووسل چار كه‌مپ هه‌نه ئه‌م یێ كاردكه‌ن هه‌موو بهێنه گرتن هه‌تا دووماهیا ئه‌ڤ سالا ل قوناغا دوویێ بتنی دێ خێزانیێن داعش مینن.
ئاشكه‌را كركو هه‌موو خێزانێن داعش دێ بۆ ناڤ كه‌مپه‌كێ هێنه ڤه‌گوهاستن چونكو رێك ب وان ناهێته دان ڤه‌گه‌رن ژبه‌ر كو خێزانێن تیرۆرستێن داعشێ نه ره‌نگه پتر ژ دوو هزار خێزانێن تیرۆرستێن داعش بمینن ئه‌ڤه هه‌موو دێ دناڤ كه‌مپه‌كێ دا هێنه كۆمكرن پشتی هه‌موو خێزانیێن دێ ژ ناڤ هه‌ر چار كه‌مپان بۆ سه‌ر جه وارێن وان دهێنه ڤه‌گوهاستن”.
ئەڤرۆ نیوز:
وەزارەتا ساخلەمیا هەرێمێ راگەهاند: هەشت تووشبوویێن دی یێن کۆرۆنا یێ ل هەولێرێ هاتنە تۆمار کرن، هەموو ژ خێزانەکا تووشبوویەکێ هەولێرێ نە و ل کۆمەلگەها شاوەیسن.
هەروەسا گۆتیە: د بەردەوامیا پشکنین و لێگەریانێ لدووڤ گومانلێکریان، ھەشت تووشبوویێن دی یێن ڤایرۆسێ کۆرۆنا یێ ل ھەولێرێ هاتنە دەست نیشانکرن، کو ئەو ژی ژنەک د ژیێ 45 سالیێ دا و دو کچ د ژیێن 22 و 11 سالیێ و چار کور د ژیێن 25 و 22 و 14 و 6 سالیێ دا، کو هەموو ژ خێزانەکا تووشبوویەکێ ئەڤرۆ یە ل هەولێرێ و ل کۆمەلگەها شاوەیسن، دیسان زەلامەکێ د ژیێ ٤٢ سالیێ دایە و برایێ تووشبوویێ ئەڤرۆ یێ باژێرێ هەولێرێ یە، کو خۆجهێ ھەولێر ستی یە، ھەموو ژی بەرکەفتیێن تووشبوویێن دوهی و ئەڤرۆ نە.
ئەڤرۆ نیوز، عەلی حاجی:
ئەندامەکێ پەرلەمانێ کوردستانێ بۆ ئەڤرۆ نیوز دیار کر: پێشتر ب رێیا پێنچ پەرلەمانتاران یاداشتنامەک بۆ سەرۆکاتیا پەرلەمانێ کوردستانێ رەوانەکر و لدووڤ دا ژی بۆ حکومەتا هەرێما کوردستانێ بۆ ئاشکراکرنا کەیسێ وەلاتیێ رۆژهەلاتێ کوردستانێ مستەفا سەلیمی.
زێدەتر حکمەت محو گەودا گۆت : پشتی کو مستەفا سەلیمی ژ زیندانەکا وەلاتێ ئیرانی خوە رزگار کری و قەستا باشورێ کوردستانێ کری کو د وێ یاداشتنامێ ژی دا ب روونی هاتیە بەحس کرن و قەستا دەڤەرەکا باشورێ کوردستانێ کری، بەلێ جهێ داخێ بوو، ژلایێ ئاسایشا وێ دەڤەرێ ڤە ب بهانەیا ڤایروسێ کورونایێ و کەرەنتینە کرنێ هاتە سەر دابرن و ژلایێ ئاسایشا وی باژێری ڤە ب وەلاتێ ئیرانێ هاتە دان و هاتە سێدارەدان، هەموو ئەندامێن لژنا نافخۆ و ئاسایش و ئەنجومەنێ خوەجیەکان ل پەرلەمانێ کوردستانێ داخازا دیار کرنا وی کەیسێ کری یە بۆ رایا گشتی و پەرلەمانێ کوردستانێ و نابیت ئەنجام دەرێن وێ کەیسێ ب ساناهی دەرباز ببن ژبەر کو موستەفا سەلیمی خزمەتەکا باش د بیاڤێ کوردینیێ دا دەرباز کر یە.
ناڤهاتی ئاشکرا کر ژی: ب رێیا وێ یاداشتێ ژی مە داخواز کری یە حکومەتا هەرێما کوردستانێ دەرەنجامێ وێ لژنا ژلایێ وان ڤە هاتیە پێک ئینان بۆ پەرلەمانێ کوردستانێ و رایا گشتی دیار بکەت کو کارێ وێ لژنێ گەهشتە کیڤە و هەر دیسان وەکو پەرلەمانتار ژی وەکو کارەکێ مروڤایەتی و نیشتیمان پەروەری دێ ل سەر دووڤچوونا وێ کەیسێ بەردەوام بین تا کو راستیا وی بابەتی بۆ خەلکێ کوردستانێ دهێتە دیار کرن.
ئەڤرۆ نیوز:
بەشیر حەداد جێگرێ سەرۆکێ پەرلەمانێ عیراقێ دیار کر: ئەو سۆزێن مستەفا کازمی داینە هەرێمێ ئاشکرا کرن و گۆت: کازمی سۆزدایە هەموو ئاریشێن ناڤبەرا هەرێمێ و بەغدا چارەسەر بکەت، د ناڤ وان ژی دا پارێ مووچەخۆرێن هەرێما کوردستانێ.
بەشیر حەداد جێگرێ سەرۆکێ پەرلەمانێ عێراقێ د روونکرنەکا رۆژنامەڤانی دا گۆت: ل ڤان نێزیکان دێ شاندەکێ هەرێمێ ڤەگەریتەڤە بەغدا ب مەرەما تمامکرنا گۆتۆبێژان و بەحسکرنا وان دەرئەنجامێن، ئەو لیژنە گەهشتینێ.
هەروەسا گۆتیە: کازمی سۆزدایە هەموو ئاریشێن دناڤبەرا هەرێمێ و بەغدا چارەسەر بکەت، د ناڤ وان دا مووچێ فەرمانبەرێن هەرێمێ، ئەم ب هیڤینە کو بەری جەژنا ڕەمەزانێ کازمی دێ پارێ مووچەخۆرێن هەرێمێ ڤرێکەت.
ئەڤرۆ نیوز، عەلی حاجی :
سترانبێژ بزاڤ زاخۆیی بۆ ئەڤرۆ نیوز ئاشکرا کر: نوکە ئەو مژوولی بەلاڤ کرنا بەرهەمەکێ نوویە کو ژ حەفت تراکان پێک دهێت و دو ژ وان سترانان فلکلوری نە و سترانەک ژی تایبەت ب زاخۆ ڤە گرێدایە و چار سترانێن دیتر ژی ئەڤینی نە.
زێدەتر گوت : پرانیا کەسێن وەکو پەیڤ و ئاواز پشکداری د بەرهەمێ من دا کرین ژ هونەرمەند و ئاوازدانەرێن مەزنن ژ وان ژی ( عەبدولعەزیز سلێمان و سەمیر زاخۆیی و عیسا بەنستانی و حسێن یونس و ردوان عومەر و مەحفوز ئاکرەیی و محەمەد سالح ) ئەڤە دێ بیتە ئێکەم بەرهەمێ من، کو ئەز بەلاڤ بکەم و ئەڤ بەرهەمە ل ستودیویا تون ل باژێرێ دهوکێ هاتیە تۆمار کرن وەکو دەنگ و موزیکە و ماموستا محەمەد زەکی و مەهدی گەلەک هاریکار بووینە ل گەل من دا و هەر ژ بەرهەمێ خوە یێ نوو دێ سترانەکێ کلیپ کەم کو ئەو ستران تایبەتە ب باژێرێ زاخۆ ڤە.
دەربارەی کلیپا خوە یا نوو ژی ناڤبری دیار کر: تۆمار کرنا کلیپێ وەکو تومار کرنا دیمەنان ب دوماهی هاتیە و وەکو دەرهێنان کامیران بێتاسی پێ رابوویە و زەحمەتەکا مەزن ژی ل گەل من دا دیت تا کو مە شیایی دیمەنێن وێ کلیپێ تومار بکەین و نوکە دا ئەو کلیپە د قوناغا مونتاژ کرنێ دایە و بریارە بۆ روژانێن جەژنێ ئەو کلیپە بەلاڤ ببیت .
ئەڤرۆ نیوز، عەلی حاجی :
رێڤەبەرێ ئاڤا زاخۆ بۆ ئەڤرۆ نیوز ئاشکرا کر: باژێرێ زاخۆ چو کێشێن ئاڤێ نەبوون یان کێم بوونا ئاڤێ، بەلێ د رۆژێن نێزیکی جەژنێ دا خەلکەک ب رێژەکا زۆر ئاڤێ ب کاردئینن.
زێدەتر هاشم ئیبراهیم گۆت : نوکە دا ل باژێرێ زاخۆ مە چو کێشێن کێم بوونا ئاڤێ نینن، بەلێ د روژانێن نێزیک جەژنێ دا وەلاتی ب شێوەیەکێ زێدەتر ئاڤێ ژ رۆژانێن دیتر ب کار دئینن ب تایبەتی ژی بۆ کارێن ناڤ باخچان ب کار دئینن، لەورا پێدڤییە ل سەر وەلاتیان د ماوێ ڤان چەند رۆژان دا مەزاختیێ د ئاڤێ دا کێم بکەن، داکو پێدڤی ب ئاڤێ نەبن د دەمێ بەرتەنگاڤیان دا و ئەم هەموو شیانان دمەزێخین ژ پێخەمەتی وێ چەندێ دا ئاڤ ب دروستی بگەهیتە وەلاتیان، هەکە وەلاتی ژی هاریکار نەبن دێ رێژەیا ئاڤێ کێم بیت، پێدڤییە رەوشەنبیریا مەزاختنا ئاڤێ ل دەف وەلاتیێ مە پەیدا بیت.
ناڤهاتی خویاکر ژی: د ماوێ بوری دا ب رێیا خێرخوازەکێ ل باژێرێ زاخۆ ل سێ تاخێن جودا کو وان تاخان ئاریشا نەبوونا ئاڤێ هەبوون سێ بیرتەوازی بۆ وەلاتیێن وی تاخی هاتنە دانان، ئەڤە ژی دەست پێشخەریەکا باشە ژلایێ خێرخوازەکێ زاخۆ ڤە.
ل دوماهیێ گۆت ژی : هەکە خێرخواز هەبن بۆ دانانا بیرتەوازیان دێ ل هندەک جهێن دیتر ژی بیرتەوازیان دانین ژبەر کو ل هندەک تاخان هێشتا کێمیا ئاڤێ هەیە و پێدڤی ب چارەسەر کرنێ هەیە .
ئەڤرۆ نیوز:
وەزارەتا ساخلەمیا عیراقێ راگەهاند: ٩٦ حالەتێن نوویێن توشبوون ب ڤایرۆسێ کۆرۆنا یێ و سێ حالەتێن گیان ژ دەستدانێ و ٧٢ حالەتێن چێبوونێ هاتینە تۆمار کرن.
وەزارەتا ساخلەمی و ژینگەها عیراقێ دیار کر ژی:، د ٢٤ دەمژمێرێن بوری دا ٩٦ حالەتێن نوو یێن توشبوون ب کۆرۆنا یێ هاتینە تۆمار کرن، کو ٦٩ حالەت ل بەغدا، ٢٤ ل بەسرە، دو ل نەجەف، سێ ل زیقار، دو ل واست، ئێک ل کەربەلا، ئێک ل کەرکوکێ، ئێک ل بابل و ئێک ژی ل سەلاحەدین، هەروەسا سێ کەسان ل بەغدا ب ڤایرۆسێ کۆرۆنا یێ گیانێ خوە ژ دەست داینە.
دیسان ئاشکرا کریە: کو ٧٢ کەسێن دی چێبووینە، کو ٣٦ ل بەغدا، شەش ل بەسرا، ١٧ ل كەربەلا، هەشت ل میسان و پێنج ل کەرکوکێ.
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ د کۆمبوونا جڤاتا بلند یا وەبەرهێنانێ ل هەرێما کوردستانێ راگەهاند: حوکمەتێ دڤێت ژێدەرێن داهاتی هەمەجۆر بکەت و گرنگیا زێدەتر ب کەرتێ چاندنێ بهێتە دان.
ئەو کۆمبوونە ئەڤرۆ چارشەمبی 2020/5/20 هاتیە ئەنجامدان و تێدا قوباد تالەبانی، جێگرێ سەرۆکێ حکومەتێ و وەزیرێن پەیوەندار پشکداربوون و گوتۆبێژ دەربارەی دۆخێ دارایی یێ نوکە یێ هەرێما کوردستانێ و پەرەپێدانا پرۆسا وەبەرهێنانێ ل هەرێما کوردستانێ هاتە کرن.
مەسرور بارزانی گۆت ژی: حوکمەتا هەرێما کوردستانێ کار دکەت بۆ هندێ کو بنەمایەکێ بهێز بۆ هەرێما کوردستانێ ئاڤا بکەت و ژێدەرێن داهاتی هەمەجۆر بکەت و گرنگیا زێدەتر ب کەرتێن چاندنێ و پیشەسازی و گەشتوگوزاری بهێتە دان.
هەروەسا گوتۆبێژ دەربارەی رەشنڤیسێ قانوونا نوو یا وەبەرهینانێ هاتە کرن، کو بریارە لڤان نێزین بکەڤیتە بەردەستێ جڤاتا وەزیران بۆ پەسەندکرنێ.
نيشاندان