ئەڤرۆ نیوز:
پرۆفیسور کارول سیکورا سەرۆکێ بەرێ یێ رێکخراوا ساخلەمیا جیهانی راگەهاند کو ڤەکۆلینێن ڤێ دووماهیێ ل دۆر کۆرۆنایێ نیشا ددەن کو ڤایرۆسەکا وەسا مەترسیدار ژی نینە و نها رۆژ ب رۆژێ کۆرۆنا یا لاواز بیت.
ناڤهاتی راگەهاند کو نیشانێن نها بۆ مە دیار دکەن کو رەنگە بەری پەیدابوونا ڤاکسینێ ژی کۆرۆنا بخوە ب رەنگەکێ سروشتی ژناڤ بچیت.
ئەڤرۆ نیوز:
سەرۆکێ گشتی یێ پارتا بزاڤا نەتەوەپەرست یا تورکیا دەولەت باخچەلی راگەهاند کو دڤێت قانوونا پارتێن سیاسی و هەلبژارتنان ل تورکیا بهێتە گوهۆرین و رێ نەهێتە دان چو ئەندامێن پەرلەمانی ژ پارتەکا سیاسی دەربازی پارتەکا دی ببیت.
چاڤدێرێن سیاسی یێن تورکیا ژی دیار دکەت کو پیلانەکا هەڤپشک یا ئەردۆگانی و دەولەت باخچەلی ل دژی دو پارتێن نوو یێن تورکیا کو بەری نها ژ ئاکپارتیێ جودا بووینە د رێ دایە.
ل گۆر چاڤدێرێن سیاسی یێن تورکیا ب گوهۆرینا هندەک قانوونان هەر دو پارتێن نوو ئانکۆ پارتا داوود ئوگلۆی و یا باباجانی نەشێن پشکداریێ د هەلبژارتنێن پەرلەمانی یێن تورکیا دا بکەن.
ئەڤرۆ نیوز:
محەمەد حەنوون پەیڤدارێ وەزارەتا بازرگانی یا عیراقێ راگەهاند کو ئەڤسالە بەرهەمێ گەنمی ل هەموو عیراقێ و هەرێما کوردستانێ گەلەک باش بوویە و بەری نها ئەنجوومەنێ وەزیران بریار دایە کو هەموو گەنمێ پارێزگەهێن عیراقێ ل گەل یێن هەرێما کوردستانێ وەرگریت.
ناڤهاتی راگەهاند ژی کو سەرۆک وەزیرێن نوو یێن عیراقێ ژی گرنگیەکا مەزن ددەتە بابەتێ گەنمی و دێ هەموو گەنمێ جۆتیارێن عیراقێ ل گەل یێن هەرێما کوردستانێ وەرگرین.
ئەڤرۆ نیوز:
ناڤەندا چاڤدێریا مافێن مرۆڤی یا سووریێ راگەهاند کو چەکدارێن رێکخراوا تیرۆرستی یا داعشێ شەڤا بۆری رێیا سەرەکی یا د ناڤبەرا دێرازۆرێ و شامێ گرتن و فەرماندارەکێ هێزێن سووریێ ل گەل دو سەربازان و وەلاتیەکێ مەدەنی گرتن و پاشی ژی کوشتن.
ناڤەندا چاڤدێریا مافێن مرۆڤی دیار دکەت کو داعش دەمەکە ل هندەک دەڤەرێن سووریێ چالاک بوویە و دەست ب کریارێن تیرۆرستی دکەت و ڤالاهیەکا ئەمنی یا مەزن ل هندەک دەڤەرێن سووریێ دروست بوویە.
ئەڤرۆ نیوز:
رۆژنامەکا ئنگلیزی ئاشکرا کریە: کو بۆ جارا ئێکێ فیدراسیۆنا تەپا پێ یا ئورۆپا دانپێدان ب هندێ کریە، کو دادڤانێ ئەلمانی یێ یاریا ریمۆنتادا بەرشەلۆنا ب سەر پاریسێ دا خەلەتیێن کوژەک کرینە و کاریگەری ل سەر دەرکەفتنا یانا فرەنسی هەبوویە.
رۆژناما (دەیلی مێل) یا بریتانی دیار کریە، کو فیدراسیۆنا تەپا پێ یا ئورۆپا یا ناسیار ب یوفا دانپێدان کریە، کو (ئیتکین) دادڤانێ ئەلمانی یێ وێ یاریێ چەند خەلەتیێن کوژەک د وێ یاریێ دا کرینە، کو بووینە ئەگەرێ هندێ ل خولەکێن دووماهیێ پاریس ب ئەنجامێ 6-1 شکەستنێ بخوت و مالئاڤاهیێ ل چامپیۆنزلیگێ بکەت، ل دووماهیا دەمێن یاریێ دا دادڤانی پەنالتیەکا گەلەکا ب گومان بۆ سوارێزی هژمارت و نیمار شیا گۆلا پێنجێ تۆمار بکەت، پشتی هنگێ بەرشەلۆنا شیا بەری فیتکا دووماهیا یاریێ گۆلا شەشێ و گۆلا گەهشتنێ بۆ قۆناغا داهاتی تۆمار بکەت و پاریس ژ هەڤرکیێ دەرێخست.
هەروەسا گۆتیە: یوفا یێ دیار کریە، کو ئەو دادڤان د ب رێڤەبرنا وێ یاریێ دا یێ سەرکەفتی نەبوو، لەوما نوکە سەرەرای تێپەربوونا 3 سالان ب سەر وێ یاریێ دا، بەحس ل هندێ دهێتە کرن، کو ئەو دادڤانە بهێتە سزا دان.
ئەڤرۆ نیوز، زنار تۆڤی:
کامی کەمال پەیڤدارێ پشکا په‌یوه‌ندى و راگه‌هاندنێ ل كومه‌لگه‌ها ده‌روازێ نێڤده‌وله‌تى یێ ئیبراهیم خه‌لیل بۆ ئەڤرۆ نیوز ئاشکرا کر: کو هەر ژ رێكه‌فتى 1\1\2020 هەتا ١٨\٥\٢٠٢٠ پازده هزار و نه‌هـ سه‌د و نوت و حه‌فت تەن و سێ سه‌د و چل و هه‌شت كیلوگرامێن كه‌ره‌ستێن جورا و جور ل تاقیگه‌ها كۆمه‌لگه‌ها ده‌روازێ نێڤده‌وله‌تى یێ ئیبراهیم خه‌لیل هاتینه زڤراندن و ژناڤبرن، ژبه‌ركو ل گه‌ل رێنمایی یێن حوکمه‌تا هه‌رێما كوردستانێ نه‌دگۆنجایی بوون، كو پێك دهێن ژ كه‌ره‌ستێن (ساخله‌میێ، خوارن و ڤه‌خوارنێ، كوزماتیك، فیتێرنه‌رى، چاندن و بیناسازیێ).
ئه‌ڤرۆ نیوز:
وه‌زاره‌تا ساخله‌میا حكومه‌تا هه‌رێما كوردستانێ راگه‌هاند رێنمایێ ل ته‌ڤایا قوتابیان دكه‌ین بۆ تاقیكرنان ده‌ستگوركانِ و ماسكان بكار بینن و دوراتیا ناڤبه‌را قوتابیان ژ دومه‌تران كێمتر نه‌بیت، نابیت قوتابی پێنوس و پێدڤیێن تاقیكرنان بده‌نه‌ڤ ئێك.
سامان به‌رزنجی وه‌زیرێ ساخله‌میا حكومه‌تا هه‌رێما كوردستانێ د بریاره‌كێ دا بناڤێ رێنمای بۆ ده‌مێ تاقیكرنا قوتابیان راگه‌هاند ب ئارمانجا خو پارێزیێ هه‌مبه‌ر ڤایرۆسێ كورونایی داخازێ دكه‌ین به‌ری تاقیكرنان قوتابی یێن وه‌زاره‌تا په‌روه‌ردێ و خاندنا بلند رۆژانه پشكنینێن نوژداری بۆ بهێنه‌كرن، هه‌كه پله‌یا گه‌رماتیێ بۆ 37.2 پله دڤێت ئه‌و قوتابی ل جهه‌كێ جوداكری تاقیكرنان بكه‌ت، پاشی ره‌وانه‌یی پشكنینێ بهێته‌كرن.
لگۆری بریارا وه‌زاره‌تا ساخله‌میا هه‌رێمێ پێدڤیه كارگێریا قوتابخانان ده‌ستگورك و ماسك هه‌بن ده‌می قوتابی ژبیر دكه‌ت بده‌نه‌ڤێ، پێدڤیێن خوپارێزیێ قوتابی ل گه‌ل خو ب ئینن .
ئه‌ڤرۆ ینوز:
ئوپراسیونا سه‌ربازی ل دژی چه‌كدارێن داعشێ ل توخیبێ كه‌ركووكێ ده‌ستپێكر.
ئوپراسیونا سه‌ربازی ل دژی چه‌كدارێن داعشێ ل توخیبێ كه‌ركووكێ ب پشته‌ڤانیا فرۆكه‌یێن شه‌ری یێن عیراقێ ل ده‌ڤه‌را البوحمدان و كبیه ل توخیبێ قه‌زا حه‌ویجه ب پشكداریا هێزا دژه تیرۆرا عیراقێ ده‌ست پێكر.
ئارمانج چ ئه‌ڤێ ئوپراسیونێ نه‌هێلانا چه‌كدارێن داعشێ یه ل وێ ده‌ڤه‌رێ كۆ ئه‌ڤه ده‌مه‌كه ڤه‌لڤین و كریارێن تیروریستی ل ئه‌وێ ده‌ڤه‌رێ به‌ره‌ڤ زێده‌بوونێ ڤه دچوون.
ئه‌ڤرۆ نیوز:
فراكسیونا پارتی ل په‌رله‌مانێ كوردستانێ د به‌یاننامه‌یه‌كێ دا ده‌ربارێ برنا ده‌رڤه‌یا شه‌ش ملیار دۆلاران ژلایێ كۆمپانیه‌كێ بۆ به‌نكه‌كا ئه‌ورۆپی به‌لاڤكر.
د به‌یاننامه‌یا فراسیونا پارتی ل په‌رله‌مانێ كوردستانێ ئه‌و چه‌نده ژی به‌لاڤكر، كۆ ئه‌ڤه چه‌نده‌كه به‌حسێ برنا شه‌ش ملیار دۆلاران ژلایێ كۆمپانیه‌كێ بۆ به‌نكه‌كا ئه‌وروپی، ئه‌م وه‌ك فراكسیونا پارتی داخازێ ژ حكومه‌تا هه‌رێما كوردستانێ و داواكارێ گشتی دكه‌ین بۆ ساخكرنا ئه‌ڤی بابه‌تی رێ و ئاوایێن پێدڤی بكار بینن.
ئه‌ڤه ژی ده‌قێ به‌یاننامه‌یا فراكسیونا پارتی ل په‌رله‌مانێ كوردستانێ یه:
ده‌مه‌كه به‌حسا برنا شه‌ش ملیار دۆلاران دهێته‌كرن ژلایێ كۆمپانیه‌كێ بۆ به‌نكه‌كا ئه‌وروپا، ئه‌م وه‌ك فراكسیونا پاتی داخازێ ژ حكومه‌تا هه‌رێما كوردستانێ و داواكارێ گشتی دكه‌ین بۆ ساخكرن و زه‌لالكرنا ئه‌ڤی بابه‌تی رێ و ئاوایێن پێدڤی بكار بینن.
هه‌ر لایه‌نه‌ك ل سه‌ر ئه‌ڤی بابه‌تی گرۆڤ هه‌نه بلا پێشكێشی لایه‌نێن په‌یوه‌ندیدار بكات و به‌رچاڤ روونیێ بده‌نه خه‌لكێ كوردستانێ، بۆ ئه‌وێ چه‌ندێ روون بیت ئه‌رێ ئه‌ڤ بابه‌ته دروسته یان نه چونكو ئه‌ڤا هه‌یی نوكه به‌س ئاخڤتن و پشته‌ڤانیا كرداریی دكه‌ین ل ئه‌ڤی بابه‌تی.
هه‌ر دڤێرێ دا وه‌ك فراكسیونا پارتی پشت راستیێ ده‌ینه خه‌لكێ كوردستانێ، به‌رنامه‌یێ كارنامه‌یا پارتی و پێنگاڤێن حكومه‌تا هه‌رێما كوردستانێ د پێخه‌مه‌تا چاكسازیێ و شه‌فافیه‌ت و راستی تێدایه، ب چ ئاوایه‌كی داگێرانێ ل سه‌ر مه‌بادئێن خو ناكه‌ین و ل گه‌ل خه‌لكێ كوردستانێ راستگۆ دبین و نوونه‌راتیا خواستێن وه‌لاتیان دكه‌ین.
فراكسیونا پارتی ل په‌رله‌مانێ كوردستانێ
نيشاندان