NO IORG
نووترين نووچه
Facebook

ئەڤرۆ نیوز، عەلی حاجی :

هونەرمەندێ کورێ پارێزگەها دهوکێ مێهڤان بێدوهی بۆ ئەڤرۆ نیوز دیار کر ماوەیەکە مژوولی تومارکرنا سترانەکا خوە یا نوویە ب ناڤێ کچا گوندا و ئەو ستران ژی گەهشتی یە قوناغێن دووماهیێ و دێ بۆ جەژنا رەمەزانا پیروز وەکو دیاری بۆ حەژێکەرێن دەنگێ خوە بەلاڤ کەت.

زێدەتر مێهڤان بێدوهی گۆت: (ئەڤ سترانە ژ پەیڤ و ئاوازێن جیهاد بابیری یە و ل ستودیویا زەمان ل زاخۆ کارێ میوزیکێ و تومارکرنا دەنگی هاتیە کرن، وەکو کلیپ ژی کار بۆ وێ سترانێ هاتیە کرن و کارێ وێنەکرنێ ژی ب دووماهی هاتیە و د ڤێ کلیپا من یا نوو دا حەسەن حاجی وەکو وێنەگر و دەرهێنان کار تێدا کری یە و دیمەنێن کلیپێ ژی ل باژێرێ زاخۆ هاتیە وێنەکرن ل پرا دەلال، ژبەر کو ل هەمی وەلاتان هونەرمەند گرنگێی ب جهێن شوینەواری ددەن من ژی دخواست د ڤێ کلیپێ کارەکێ ب وی رەنگی ئەنجام بدەم لەورا من ژی پرا دەلال دەستنیشان کر  و کلیپا من ل وی جهی هاتیە وێنەکرن و د وی کلیپێ دا کارەکێ فلکوری هاتیە کرن، سپونسەرەکێ ژی خوە ل کلیپا من کریە خودان و ئەو کلیپە بەرەڤ قوناغێن دووماهیێ ڤە چوویە و د پلان دایە د روژانێن جەژنێ دا بهێتە بەلاڤ کرن وەکو دیاری بۆ حەژێکەرێن دەنگێ من.

ناڤبرئ خویاکر ژی ” د پلان دا بوو بەری هاتنا ڤایروسێ کورونایێ کار د تومارکرنا وێ کلیپێ دا هاتبایە کرن بەلێ ڤایروسێ کورونایێ ئەو کارە پاش ئێخست و مە بۆ خوە ب دەلیڤە دیت دگەل ڤەگەریانا ژیانێ بۆ دەمێن ئاسایی دەست ب تومار کرنا کلیپێ بهێتە کرن”.

ئەڤرۆ نیوز، قائید میرۆ:

 رێڤەبەرێ ساخلەمیا ھەولێرێ ئاشکراکر، تنێ پێنج نەخۆشێن ڤایرۆسا کۆرۆنا ل نەخۆشخانێ ماینە و بڕیارێن خۆ پارێزیێ وەکە خۆ دھێنە بجە ئینان.

دکتۆر دلۆڤان محەمەد، ڕێڤەبەرێ گشتیێ ساخلەمیا ھەولێرێ بۆ ئەڤرۆ نیۆزدیارکر” رەوشا ساخلەمیێ ھاتیە کۆنتڕۆلکرن و ددەمێ نوکەدا ل سنورێ پارێزگەھا ھەولێرێ تنێ پێنج توشبویێن ڤایرۆسا کۆرۆنا ل نەخۆشخانێ ماینە و رەوشا وانژی یا جێگیرە و بەردەوام خەلک دھێتە کەرەنتینەکرن و ھەتا زێدەتری ١٠ ھزار کەس لسەرانسەری ھەرێما کوردستانێ ھاتینە کەرەنتینە کرن.

رێڤەبەرێ گشتیێ ساخلەمیا ھەولێرێ دبێژیت” تنێ ئەڤرۆ رۆژا ئێک شەمبی چوار نەخۆشێن ڤایرۆسا کۆرۆنایێ باشبووینە و ھاتینە ڤەگەڕاندن بۆ مالێن وان.

دکتۆر دلۆڤان محەمەد گوت ژی” رۆژانە چەندین پشکنین دھێنە ئەنجامدان و رێکارێن خۆپارێزیێ ژی بەردەوامن، چونکە ڤایرۆسا کۆرۆنایێ لھەرێما کوردستانێ دوماھی نەھاتیە، بەلکۆ بەرەف پاشڤەچوویە و کێمتربوویە لبەرێ، بەلێ پێدڤیە رێکارێن خۆ پارێزیێ د بەردەوامبن، ھەتا مەترسی مایە دناڤا جڤاکی دا.

ئەڤرۆ نیوز، عەلی حاجی:

بەرپرسێ ناڤەندا بالا ل زاخۆ یا ئێکەتیا لاوێن دیموکراتا کوردستانێ ل بن رێکارێن خوە پاراستن ژ ڤایروسێ کورونایێ وان بریارا ڤەکرنا قارەمانیا بارزانێی نەمر بۆ تیمێن مللی ل باژێرێ زاخۆ دایە و پشتی جەژنێ دێ دەست ب یاریێن وێ قارەمانیێ هێتە کرن.

زێدەتر حکمەت محەمەد گۆت: (بریارە پشتی جەژنا رەمەزانا پیروز دەست ب قارەمانیا ١٦ و بۆ سالا سیێ یا بارزانیێ نەمر ل زاخۆ بهێتە ڤەکرن ب پشکداریا ١٦٠ تیمێن مللی ژ پارێزگەها دهوکێ و ژ وان تیمان ١٥٠ تیمێن باژێرێ زاخۆنە و ١٠ تیمێن دیتر ژی وەکو مێهڤان دێ پشکدار بن و پشکەک ژ وان تیمان مەسیحی و ئێزدی و تیمێن باژێرێ دهوکێ نە،بەرهەڤیێن باش بۆ ڤەکرنا ڤێ قارەمانیێ هاتینە کرن و کومپانیەکێ ژی وەکو سپونسەر خوە ل ڤێ قارەمانیێ کری یە خودان و ئەو بەرهەڤیێن ماین ژی دێ پشتی جەژنێ هێنە تەمام کرن دا کو دەمەکێ نێزیک دا دەست ب یاریێن وێ قارەمانێی بهێتە کرن).

ناڤبری ل دور خەلاتێن قارەمانیێ ئاشکەرا کر ” زێدەباری کوژمەیەکێ پارەیی ب سەر سەرکەڤتیێ ئێکێ دێ یاریەکێ ژ دەرڤەی باژێرێ زاخۆ ژی بۆ رێک ئێخین و سالێن پاشتر ژی مە ئەڤ چەندە ئەنجام دا بوو و بۆ هەر تیمەکێ دێ پێدڤیێن وەرزشی بۆ وان دابین کەین کو ب رێیا سپونسەرێ قارەمانیێ دێ ٢٠٠ دەستێن جل و بەرگان بۆ تیمێن پشکدار دروست کەین و هەمی یاریێن وێ ژی دێ ل یاریگەها دەلال یا وەرزشی ل زاخۆ ب شەڤ هێنە ب رێڤە برن و یانا زاخۆ ژی ئەو یاریگەهـ ئێخستی یە د خزمەتا مەدا”.

ل دوماهیێ گۆت ژی: (ئەڤ قارەمانی یە دێ ل بن رێکارێن ساخلەمیێ خوە پاراستن ژ ڤایروسێ کورونایێ رێڤە چیت و ئەڤە ئێکەم قارەمانی یە پشتی هاتنایێ کورونایێ ل سەرانسەری پارێزگەها دهوکێ و هەرێما کوردستانێ بهێتە ئەنجام دان).

ئەڤرۆ نیوز:

وەزارەتا کارەبێ یا حوکمەتا هەرێما کوردستانێ دیار دکەت کو ژ بەر نەبوونا سوتەمەنیێ و قەیرانا دارایی و هەروەسا چاکسازیێن ل چەندین وێستگەهێن کارەبێ ل هەولێر و چەمچەمال و هەروەسا راگرتنا وێستگەها خەبات ژ بەر کو ستافێ وێ ژ بەر کۆرۆنایێ هەتا نها نەشیاینە ژ وەلاتێ کۆریا ڤەگەرن، رێژا بەرهەمئینانا کارەبێ ژ ٣٢٠٠ مێگاواتان بۆ ٢٥٠٠ مێگاواتان کێم بوویە.

وەزارەتا کارەبێ دیار ژی دکەت نها ژ بەر وەرزێ گەرمایێ وەلاتی پتر کارەبێ بکار دئینن و ژ بەر ڤان هەموو ئەگەران نها دەمژمێرێن کارەبا گشتی کێم بووینە.

وەزارەتا کارەبێ دیار ژی دکەت کو ئەو نها ل گەل جڤاتا وەزیران ل سەر هێلن دا بشێن ڤێ ئاریشێ چارەسەر بکەن.

ئەڤرۆ نیۆز، قائید میرۆ:

بەرپرسەکێ وەزارەتا پێشمەرگەی ئاشکراکر رۆژانە پێشمەرگە چاڤدێریا لڤینێن داعش داعش دکەت و زانیاری ل دۆر خوە رێکخستنا چەکدارێن سەر ب داعش دگەھنە وەزارەتا پێشمەرگەی.

لیوا قارەمان شێخ کەمال جێگرێ سوپا سالارێ وەزارەتا پێشمەرگەی بۆ ئەڤرۆ نیۆز دیارکر”  وەزارەتا پێشمەرگەی ھایداری لڤینێن چەکدارێن داعشە، ب تایبەتی ل دەڤەرێن کوردستانی و رۆژانە زانیاریێن ھەوالگیری لدۆر لڤینێن داعش و پیلانێن وان دگەھنە وەزارەتێ.

ئەڤی بەرپرسێ وەزارەتا پێشمەرگەی ئاماژەکر” ئێک ژ سەدەمێن زێدەبوونا لڤین و ھێرشێن داعش ژ بۆی ڤالاھیا ئەمنی ڤەدگەڕیت، ژ بەر کو چەندین دەڤەر ھەنە چو ھێزەک تێدا نەماینە و داعش تێدایە.

لیوا قارەمان شێخ کەمال خویا ژی کر” دەڤەرێن دکەڤنە ھێلا تەماس یا دناڤبەرا ھێزێن پێشمەرگە و ھێزێن عێراقی د ڤالانە و داعش مفا ل ئەڤێ ڤالاھیێ دیتیە ژ بۆی رێکخستنا کریارێن خوە یێن تیرۆرستی، یا کو بەری نوکە بڕیار بوو ھێزێن پێشمەرگە ڤەگەڕن وان دەڤەران.

ئەڤرۆ نیوز، عەلی حاجی :

هاریکارێ سەروکێ زانکویا بۆ کاروبارێن قوتابیان بۆ ئەڤرۆ نیوز دیار کر بۆ ڤەکرنا دەرگەهێن زانکویا زاخۆ مە پلانا خوە دارێشتی یە و رادەستی وەزارەتا خواندنا بلند کری یە و هەکە رەوش باش بیت دبیت زانکو بهێنە ڤەکرن.

زێدەتر دکتور کاروان فەهمی گۆت: (نوکە پلانا مە بەرهەڤە دا کو بشێین دەرگەهێن زانکویا خوە ل بەرامبەر قوتابیان ڤەکەین و ل دووف بریارا وەزارەتا خواندنا بلند و ڤەکولینێن زانستی ل رێکەڤتی ٣٠/٥/٢٠٢٠ دەست ب خواندنێ بهێتە کرن بەلێ ئەڤ رەوشا نوکە هاتیە پێش و دیار بونا هندەک حالەتان ل سلێمانیێ رەوش پیچەکێ ب زەحمەت ئێخست بەلێ وەکو زانکویا زاخۆ مە هزر د وێ چەندێ ژی دا کری یە ژبەر کو قوتابیێن مە ل هەمی پارێزگەهێن کوردستانێ هەیە هەکە رەوش ل پارێزگەهێن دیتر وەکو رەوشا نوکە یا باژێرێ سلێمانێی بیت ئەم دشێن ل دووف پلانەکێ وەکو گروپەکێ دروست بکەین کو قوتابیێن مە ل پارێزگەها سلێمانيێ ئەزمونێن خوە ل وی باژێری بکەن دا کو ئەڤە ژی ببیتە رێیەک ئەو قوتابی بێ بەهر نەبن ژ ئەزمونێن خوەیێن ئەڤ سالە و مافێ وان ژی نەهێتە خوارن).

ناڤبری خویاکر ژی ” وەکو زانکویا زاخۆ ئەم ب تەمامی  بەرهەڤین بۆ ڤەکرنا دەرگەهێن زانکویا خوە ل بەرامبەر قوتابیان بەلێ ئەم ژی چاڤەرێ نە دا کو بریارەکا ئێکلاکەر ل دۆر ڤەکرن و نەڤەکرنا دەرگەهێن زانکویان ل کوردستانێ بهێتە دان”.

ئەڤرۆ نیوز:

حەفت چەکدارێن رێکخراوا تیرۆرستی یا داعشێ ژ گرتیگەھەکا ناوچەیا ھۆلێ ل رۆژھەلاتێ باژێرێ حەسەکێ ل رۆژئاڤایێ کوردستانێ رەڤیان.

بەرپرسەکێ هێزێن سووریا دیموکرات ژی ئەو دەنگوباسە بۆ دەزگەهێن راگەهاندنێ پشتراستکر و دیار کر کو چار ژ وان هاتنە گرتن و لێگەرین ژ بۆ چەکدارێن دی ژی بەردەوامە.

ئەڤرۆ نیوز:

د. هەڤال ئەبوبەکر پارێزگارێ سلێمانیێ راگەهاند کو ل رۆژێن جەژنێ دێ رێکارێن خوە پاراستنا ژ کۆرۆنایێ ل سلێمانیێ هێنە توند کرن.

ناڤهاتی راگەهاند کو ئەڤرۆ ژوورا ئۆپەراسیۆنان ل پارێزگەها سلێمانیێ کۆمبوویە و هندەک بریارێن نوو داینە و گۆت: (د رۆژێن جەژنێ دا ب چو رەنگەکێ رێ ناهێتە دان کو وەلاتی سەرەدانا گورستانان بکەن، هەروەسا نابیت جەژن وەکو سالێن بۆری ب قەرەبالغی برێڤە بچیت، ئانکۆ دێ رێکارێن خوە پاراستنێ هێنە توند کرن).

پارێزگارێ سلێمانیێ راگەهاند کو قەدەغەیا هاتنوچوونێ د ناڤبەرا پارێزگەهان دا دێ یا بەردەوام بیت و ژ بلی هندەک حالەتێن گەلەک پێدڤی نەبیت.

1381

ئەڤرۆ نیوز:

بهایێ پەترۆلێ ئەڤرۆ ل بازارێن جیهانێ ب رێژەکا بەرچاڤ گران بوو و هەر بەرمیلەکا پەترۆلا ئەمریکا ١.٨٧ دۆلار گران بوو و گەهشتە ٢٩ دۆلار و ٤٣ سەنتان.

ل ئالیێ دی هەر بەرمیلەکا پەترۆلا برێنیت ژی ل بازارێن جیهانێ ئەڤرۆ ب ٣٢ دۆلار و ٥٠ سەنتان بوو.

ئەڤرۆ نیوز:

فارس عیسا نوونەرێ حوکمەتا هەرێما کوردستانێ ل بەغدا راگەهاند کو ئەو کارمەندێن کورد یێن د ناڤ هێزێن ئەمنی و سەربازی یێن عیراقێ دانە  و ل ناڤەراستا عیراقێ یان ژی ل دەڤەرێن دی یێن عیراقێ دانە هەتا پشتی جەژنا رەمەزانێ نەشێن ڤەگەرنە ڤە هەرێما کوردستانێ.

ناڤهاتی راگەهاند کو ژ بەر قەدەغەیا هاتنوچوونێ یا کو د ناڤبەرا پارێزگەهان دا هەیە ئەو کەسە نەشێن هەتا پشتی جەژنا رەمەزان ڤەگەرنە ڤە هەرێما کوردستانێ.

website security
WP Facebook Auto Publish Powered By : XYZScripts.com