ئەڤرۆ نیوز:
سەرۆکێ کانتۆنا کۆبانێ دیار دکەت کو وان نھا دەست ب بەرھەڤیێن پێدڤی کرینە و دێ ھەر سێ کانتۆنێن رۆژئاڤا ببنە ئێک و دێ دەست ب سیستەمێ فیدرالی ل رۆژئاڤایێ کوردستانێ بکەت و دیار دکەت کو ئەو یەک ل سەر بنەمایێ داخوازیێن خەلکێ رۆژئاڤا بوویە.
ئەنوەر موسلم سەرۆکێ کانتۆنا کۆبانێ د داخۆیانیەکێ دا بۆ ئاژانسا رویتەرز دیار کریە کو رەوشا سووریێ بلەز دھێتە گوھۆرین و بەرھەڤی بۆ سیستەمەکێ نوو ل سووریێ دھێتە کرن و ژ بەر ھندێ ژی ئەو ل گۆر وان گوھۆرینان خوە بەرھەڤ دکەن کو دەست ب سیستەمێ فیدرالی ل رۆژئاڤایێ کوردستانێ بکەن و گۆت: (ئەم دەست ب بەرھەڤیا گێرانا کۆنگرەکێ بۆ پاشەرۆژا سووریێ و رۆژئاڤایێ کوردستانێ دکەین و مە دڤێت د کۆنگرێ دا ھەموو کەس و ئالی پشکدار بن و نێرنێن خوە سەبارەت ب پاشەرۆژا سووریێ و رۆژئاڤایێ کوردستانێ دیار بکەن).
ناڤھاتی د بەردەوامیا ئاخڤتنا خوە دا ئەو یەک ژی دیار کریە کو دێ ھەر سێ کانتۆنێن رۆژئاڤایێ کوردستانێ ببنە ئێک و دێ سیستەمێ فیدرالی وەسا ھێتە راگەھاندن و ئەم وەسا دبینین کو ب رێیا سیستەمێ فیدرالی ل رۆژئاڤایێ کوردستانێ دێ ھەموو پرسێن نھا ھەنە ھێنە چارەکرن و کورد دێ بشێن باشتر بریارێ ل دۆر چارەنڤیسێ خوە بدەن و ژ بەر ھندێ ژی نھا دەمێ ھندێ ھاتیە ئەم بریارێ ل سەر سیستەمێ فیدرالی بۆ رۆژئاڤایێ کوردستانێ بدەین.
ھەژی ئاماژەپێدانێ یە کو دەمەک درێژە ئەنجوومەنێ نیشتمانیێ کوردێن سووریێ ژی داخوازا سیستەمێ فیدرالی بۆ رۆژئاڤایێ کوردستانێ دکر و دەمێ کو کانتۆن ھاتنە راگەھاندن ژی وێ جڤاتێ دژبەریا خوە ل ھەمبەر راگەھاندنا کانتۆنان دیار کربوو و چەندین دەزگەھێن راگەھاندنێ ژی دیار دکەن کو ئەنجوومەنێ نیشتمانیێ کوردێن سووریێ پشتەڤانیێ ل وێ پێنگاڤێ دکەن و وان دڤێت کو ناڤێ ھەرێما رۆژئاڤیێ کوردستانێ ببیتە ھەرێما کوردستانا سووریێ و پارتیا ئێکەتیا دیموکراتیک ژی دخوازیت کو ناڤێ ھەرێما رۆژئاڤایێ کوردستانێ ببیتە ھەرێما باکورێ سووریێ.
چاڤدێرێن سیاسی ژی دیار دکەن کو پشتی ڤەکێشانا ھێزێن روسیا ل سووریێ دێ بلەز پێنگاڤ بۆ نەخشێ نوو یێ سووریێ ھێنە ئاڤێتن و ژ بەر ھندێ ژی گەلەک گرنگە کو کورد زوو ھەرێما خوە راگەھینن و ئاریشێن ناڤخوەیی ژی د ناڤبەرا خوە دا چارە بکەن.
بەرھەڤی بۆ سیستەمەکێ فیدرالی ل رۆژئاڤایێ کوردستانی دھێتە کرن
نيشاندان