ئەڤرۆ نیوز:

مە باوەری ب ماف و ئازادیێن نەتەوی و مەزهەبی هەیە، زێدەباری هندێ مە هەردەم بزاڤ کریە کو ئەو باوەریە د ناڤ جڤاکێ مە دا ژی زێدەتر لێ بهێت و بۆ هندێ کار کریە، ب کریاری ژی د ناڤ پارتا مە دا ئەو یەک هاتیە بجهکرن و پارتی بەردەوام ژی بزاڤ کریە د سیستەمێ حوکمرانیێ ل کوردستانێ و عیراقێ دا ئەو یەک بهێتە بجهکرن. د نڤیسینا دستوورێ عیراقێ دا و د پرۆژێ دستوورێ کوردستانێ دا ژی مە ئەو یەک سەلماندیە، ئەم وەکو پارتی خوە ب داکوکیکارێ هەموو ماف و ئازادیێن هەموو پێکهاتێن ل کوردستانێ دزانین، ژ بەر هندێ ژی مە هەردەم بزاڤ کریە کو برایێن مە کوردێن ئێزدی وەکو پشکەک رەسەن ژ نەتەوا مە، هەمی دەمان ماف و ئازادیێن وان د پاراستی بن، هەروەسا وان ئازادیەکا تەمام هەبیت د دیارکرنا هەر پلە و پۆستەکێ ئایینی و نەتەوی و ب چو رەنگەکێ مە دەستێوەردان د کاروبارێن وان نەکریە.

مخابن د دەمێن بۆری دا میر تەحسین بەگ وەغەر کر و پاشی ژی بابە شێخ چو بەر دلۆڤانیا خودێ، دیارە ل گۆر نەریتێ برایێن مە یێن ئێزدی میرێ نوو ژ بنەمالا میری دهێتە هەلبژارتن و هەروەسا میرێ ئێزدیان ل گەل جڤاتا رۆحانی ژی کەسەکێ وەکو بابە شێخ هەلدبژێرن و کار ژی وەسا هاتیە کرن.

ئەم پیرۆزباهیەکا گەرم ل هەموو خوشک و برایێن خوە یێن ئێزدی دکەین و رادگەهینین کو نها پتر ژ هەر دەمەکێ پێدڤی ب هندێ هەیە کو د ناڤ خوە دا ئێکگرتی بین، ب تایبەتی ژی پشتی کارەساتا شنگالێ، کو مخابن تیرۆرستێن داعشێ وەکو درندان کریارێن گەلەک خراب ل دژی ژن، زەلام و زارۆ و سەروەت و سامانێ ئێزدیان ئەنجام دان، ل هەمبەر وێ یەکێ ژی خەلکێ شنگالێ و هەموو خەلکێ کوردستانێ و چیایێ شنگالێ پێکڤە کریارێن تیرۆرستێن داعشێ شەرمزار کرن، هەرچەند هندەک هێز و ئالیان بزاڤ کرن کو ڤێ سەرکەفتنێ بۆ بەرژەوەندیێن خوە بکار بینن لێ سەرکەفتی نەبوون.

نوکە ژی برایێن مە یێن ئێزدی ل گور داب و نەریتێن خوە بابە شێخێ نوو دیار کرینە، نها ژی ئەو کەسێن کو بەری نها بزاڤ کرن کو شنگالێ ژ کوردستانێ جودا بکەن دا شەرعیەتێ بدەنە مانا خوە کو وەکو دیار ژ بلی زیانێ چو مفایا وان بۆ شنگالێ و شنگالیان ژی نەبوویە، نها ژی بزاڤا هندێ دکەن کو ئێکەتیا د ناڤبەرا خەلکێ شنگالێ دا هەی تێک بدەن و دخوازن بابەتێ دیارکرنا بابەشێخی بۆ مەرامێن خوە یێن سیاسی بکار بینن و ئالۆزیان دروست بکەن، هەروەسا دخوازن پەیوەندیێن د ناڤبەرا پارتا مە و خەلکێ شنگالێ دا تێک بدەن و بگەهنە هندەک بەرژەوەندیێن خوە یێن سیاسی.

بۆ هەموو خەلکێ کوردستانێ ب تایبەتی ژی بۆ شنگالیێن جوامێر و خوراگر رادگەهینین  کو مە وەکو پارتی دیموکراتی کوردستان نە ژ دوور و نە ژی ژ نێزیکڤە چو پەیوەندی ب دیارکرنا پلە و پۆستێن جڤاکی و ئایینی د ناڤ خوشک و برایێن مە یێن ئێزدی دا نەبوویە و مە چو دەستێوەردان نەکریە، بەلکو مە رێز ژ شێوەیێ هەلبژارتن و دیارکرنا بابەشێخی دا گرتیە و داخوازا سەرکەفتنێ بۆ دکەین. هەروەسا ئەم پشتراستین کو خەلکێ مە یێ شنگالێ گەلەک ژ هندێ مەزنتر و زاناترن کو هندەک خەلکێن بیانی بزاڤێ بکەن کو ناکۆکی و دوبەرەیەکێ د ناڤبەرا وان دا دروست بکەن و دەستێوەردانێ د تایبەتمەندیێن وان دا بکەن، وان سەربۆرا شەرمزارکرنا وان دەستان ژی هەیە و هەتا نوکە ژی شیاینە ب رەنگەکێ باش ئێکەتیا خوە ب پارێزن.

مەحمود محەمەد

پەیڤدارێ پارتی دیموکراتی کوردستان

٢٠٢٠/١١/٢٠