ئەڤرۆ نیوز:
د هێرشەكا تیرۆرستێن داعشێ دا ل نێزیكی بەغدا پترى 11 كەسان هاتنە كوشتن.
ل شه‌ڤا بورى تیرۆرستێن داعشێ هێرش كریە سەر بنگەهەكێ سەربازی ل دەڤەرا رەزوانییە ل رۆژئاڤایێ باژێرێ بەغدا و د وێ هێرشێ دا یازده كەس هاتینە كوشتن، كو پێنج ژ وان كوشتیان چەكدارێن حەشدا شەعبینە و شه‌شێن دیتر وەلاتیێن مەدەنینە.
د وێ هێرشێ دا تیرۆرستێن داعشێ ب نارنجۆكان هێرش كریە سه‌ر وان سه‌ربازان، پاشی تەقە كرن ب چەكێ سڤك دناڤبەرا هەردولا هاتییە روودان.
ئەڤرۆ نیوز:
وەزارەتا ساخلەمیا ھەرێما کوردستانێ راگه‌هاند: ژ ئه‌نجامێ سەرپێچیکرنا رێنمایی و مامەلەکرنێ ب دەرمانێن نەقانوونی کۆمپانیەکا دەرمانان ھاتە داخستن.
رێڤەبەریا کوالێتى و کونترۆلا دەرمان و پێدڤیێن نۆشدارى راگەھاندنەک به‌لاڤکریه و تێدا راگەھاندیه: د درێژاھیا کار و چالاکیێن لژنێن چاڤدێریا بازاری ل وەزارەتا ساخلەمیێ، پتشی پشکنین و دووڤچوونێ ژ ئه‌نجامێ سەرپێچیکرنا رێنمایی و مامەلەکرنێ ب دەرمانێن نەقانوونی کومپانیەکا دەرمانان ھاتە داخستن و رێکارێن قانوویی ل ھەمبەری وێ کومپانیێ ھاتینە وەرگرتن.
هه‌روه‌سا گۆتیه: ئه‌م هه‌موو کومپانیێن دەرمانان ئاگەھدار دکەین، پێدڤیه پابەندبن ب رێنمایێن ساخلەمیێ و قانوونا دەرمانان ب بەرۆڤاژی ڤێ چەندێ دێ رووبروو قانوونێ و دادگەھێ بن.
ئەڤرۆ نیوز:
هەر دو شاندێن پارتی و ئێکەتی ل سەرۆکاتیا هەرێما کوردستانێ د کۆمبوونێ دانە و ل گۆر زانیاریان بابەتێ هێرشا پەکەکێ ل سەر پێشمەرگێن کوردستانێ، پەیوەندیێن پارتی و ئێکەتیێ و دووماهی پێشهاتێن ل عیراقێ و کوردستانێ تەوەرێن سەرەکی یێ کۆمبوونا هەر دو شاندێن بالا یێن پارتی و ئێکەتیێ نە.
نێچیرڤان بارزانی سەرۆکێ هەرێما کوردستانێ سەرپەرشتیا کۆمبوونا هەر دو شاندێن پارتی و ئێکەتیێ دکەت و هوشیار زێباری سەرۆکاتیا شاندێ پارتی دکەت و بافل تالەبانی هەڤسەرۆکێ ئێکەتیێ ژی سەرۆکاتیا شاندێ ئێکەتیێ دکەت.
ئەڤرۆ نیوز:
حوکمەتا هەرێما کوردستانێ راگەهاند کو مەسرور بارزانی سەرۆکێ حوکمەتا هەرێما کوردستانێ ل گەل شاندەکێ ئەڤرۆ سەرەدانا ئورۆپا دکەن و دێ ل گەل بەرپرسێن چەندین وەلاتێن ئورۆپا هەڤدیتنان کەن.
ل گۆر زانیاریان د سەرەدانا سەرۆکێ حوکمەتێ یا بۆ ئورۆپا دا دێ بابەتێ پەیوەندیێن هەرێما کوردستانێ ل گەل وەلاتێن ئورۆپا هێنە گەنگەشە کرن و حوکمەتێ هەرێما کوردستانێ دڤێت مفای ژ ئەزموونا سەرکەفتی یا وەلاتێن ئورۆپا د کەرتێ ئابووری و چەندین بابەتێن دیتر دا وەربگریت.
ل گۆر زانیاریان سەرۆکێ حوکمەتێ دێ سەرەدانا هولەندا، بەلجیکا، ئەلمانیا و فرەنسا کەت.
ئەڤرۆ نیوز:
د پرێس کۆنفرانسەکێ دا كارگێریا یانا ئافرەتێن دهۆکێ، ژ بۆ بهێزخستنا رێزێن تیما فۆتسالا یانێ بۆ هەڤرکیێن خولا هەرێما کوردستانێ یا فۆتسالا کچان هەڤبەستا پێنج یاریزانێن ستێر ئیمزا کر.
هەروەسا گۆتیە، ئەو یاریزانێن هەڤبەستا وان هاتینە ئیمزا کرن دێ پشکداریێ د خولا نایابا هەرێما کوردستانێ یا فۆتسالا کچان دا کەن، ئەو ژی یاریکەران کاپتنا هەلبژارتیێ عیراقێ و یانا جەویە (نادیە فازل) كو ئێکە ژ باشترین بەرگریکاران ل سەر ئاستێ عیراقێ، دیسان گولپارێزا چەلەنگ (فائیزا جەلال) کو دێ هێزەکا مەزن ل تیمێ زێدەکەت زێدەباری هەردو یاریزانێن سلێمانیێ یێن بەرنیاس (دەریا دارا و شینێ قادر) دیسان ستێرا چەلەنگا عیراقێ و باژێرێ کەرکۆکێ (دێرین مەحمود)، کو ئەڤ یاریزانە دێ زێدەهیەکا مەزن ل تیما فۆتسالێ زێدەکەن و دێ بەر ب هەڤرکیا ناسناڤێ خولا هەرێما کوردستانێ بۆ یانێن پلا نایاب ڤە بەن.
ئەڤرۆ نیوز:
بەرەیێ عیراقی بزاڤان دکەت باوەریێ ژ محه‌مه‌د حه‌لبۆسى سەرۆکێ پەرلەمانی وەربگریت.
بەرەیێ عیراقى یێ سەر ب ئوسامە نوجێفی ڤه راگەهاندیه: ئه‌و یێ هه‌موو بزاڤان دكه‌ن باوه‌ریی ژ سه‌رۆكێ په‌رله‌مانى وه‌ربگرن و بۆ ڤێ مه‌ره‌مێ ژى وان بریاردایه دەنگێن 110 ئەندامێن جڤاتا نوونەرێن ئیراقێ كۆم بكه‌ن و باوریێ ژ محەمەد حەلبۆسی، سەرۆکێ پەرلەمانی وەربگرن.
هەروەسا به‌ره‌یێ عیراقى گۆتیه ژى: پشتی كۆمكرنا ئیمزایێن 110 ئەندامێن جڤاتا نوونه‌ران، دێ ب رێیا قانوونێ وی پرۆژێ وان چێكرى پێشکێشی پەرلەمانی کەن.
ئەڤرۆ نیوز:
پشتى راگەهاندنا ئەنجامێن هەلبژارتنان ل ئەمریکا و سەرکەفتنا جۆ بایدنى بۆ سەرۆكاتیا وى وه‌لاتى، بۆ جارا ئێكێ د مێژوویا ئەمریکا دا ژنه‌ك دبیته جێگرا سەرۆکێ ویلایەتێن ئێکگرتى یێن ئه‌مریكا و ناڤێ وێ چوو د مێژوویێ دا.
کامالا هاریس، باپیرێن وێ خەلكێ گونده‌كێ هندستانێ نه، بابێ وێ ب ره‌گه‌ز هندییه و دایکا وێ جامایکییە، هەردو کۆچبەربووینه ئەمریکا، كامالا دبیته ئێكه‌م ژن پۆستێ جێگرا سەرۆکێ ئەمریکا وەربگریت، دناڤا ئەمریکا ژى دا چاڤێ ره‌شپیستان ل هندێیه، كو کامالایێ کاریگەری ل سەر ئیدارا ئەمریکا هەبیت و جۆداهیێ و نەژادپەرستیێ نەهێلیت، وێ ژى ئه‌ڤ چه‌نده دوپاتكریه.
چیرۆکا کامالا هاریس یا سەرنجراکێشە، باپیرێن وێ ل گوندێ تولاسندرا پورام ژیاینه، کچا دو کۆچبەرێن جامایکی و هیندییە، ئاكنجیێن گوندێ باپیرێن کامالایێ دلخۆشن ب ڤێ سەرکەفتنێ و پەیام ژى بۆ هنارتینه، وێ ژى به‌رده‌وام جه‌خت ل یه‌كسانیێ كریه دناڤبه‌را ژن و مێران و هه‌موو ئه‌مریكیان دا.
ئەڤرۆ نیوز:
وەزارەتا ژێدەرێن ئاڤێ یا عیراقێ راگەهاندیه، ل دەمەكێ نێزیك دێ پڕۆتۆكۆلەك دناڤبەرا هەردو حكومەتێن بەغدا و ئەنقەرەدا هێتە ئیمزا كرن بۆ برێڤەبرنا ئاڤا رووبارێ دیجلەى و گەرەنتیكرنا پشكا ئیراقێ ژ ئاڤا وی رووباری.
پەیڤدارێ وەزارتا ژێدەرێن ئاڤێ یا حكومەتا عیراقى راگەهاندیه، گوتۆبێژ ل گەل وەلاتێن دەوروبەر د وارێ پرسێن ئاڤێدا ئەنجامێن باش بخه‌ڤە ئیناینە، ب تایبه‌تى ژى ل گەل وه‌لاتێ توركیا.
عه‌لى رازى گۆت ژى: ل دەمەكێ نێزیك ئەو پرۆتۆكۆلە دێ دناڤبەرا هەردو وەلاتاندا هێتە ئیمزا كرن و ئەو كێشەیا چەندین سالە عیراق تێدا دنالیت، دێ هێتە چارەسەركرن.
ئەڤرۆ نیوز:
پشتى هاتیه هه‌لبژارتن وه‌كو سه‌رۆكێ 46 یێ ویلایه‌تێن ئێكگرتى یێن ئه‌مریكا، جۆ بایدنى دیار كریه، ب دەستڤەئینانا ٧٤ ملیۆن دەنگان، من زۆرترین رێژا دەنگان د مێژوویا ئەمریکا دا بدەستڤە ئیناینە.
جۆ بایدنى راگەھاندیه ژى: بۆ بدەستڤە ئینانا هژماره‌كا مه‌زن یا کورسیێن نوونەران د پێشڤەچوونێ داینە، دیسان ئه‌ز ئێکەم کاندیدێ پارتا دیموکراتانم پشتی ٢٤ سالان ل ویلایەتا ئاریزۆنا و پشتی ٢٨ سالان ل ویلایەتا جورجیا سەرکەفتنێ ب دەستڤە دئینم.
ئەڤرۆ نیوز:
پشتی راگەهاندنا ئەنجامێ هەلبژارتنێن ئەمریکا و سەرکەفتنا جۆ بایدن بهایێ تمەنێ ئیرانێ ل هەمبەر دۆلاری گران بوو و نها هەر سەد دۆلارێن ئەمریکا ب دو ملیون و سەد هزار تمەنێ ئیرانێ یە، ئەو یەک د دەمەکێ دایە کو بەری نها بهایێ هەر سەد دۆلارێن ئەمریکی پتر بوو ژ سێ ملیون تمەنێن ئیرانی.
ل ئالیێ دی بهایێ لیرێ تورکی ژی پتر هاتە خوارێ و بسپۆرێن ئابووری پێشبینیا هندێ دکەن هەتا سەرێ سالێ بهایێ هەر سەد دۆلارێن ئەمریکی ببیتە هزار لیرێن تورکیا.
نيشاندان