ئه‌ڤرۆ نیوز:
راوێژكارا ئه‌لمانیا داخوازنامه‌ك ئاراسته‌ى سه‌رۆك وه‌زیرێن عیراقێ دكه‌ت ب مه‌ره‌ما پشكداریكرن د كومبوونا 7 ولاتێن پیشه‌سازى یێن جیهانێ.
نڤیسینگه‌ها حه‌یده‌ر عه‌بادى سه‌رۆك وه‌زیرێن عیراقێ به‌لاڤكریه كو د چوارچوڤێ په‌یوه‌ندیه‌كا ته‌له‌فونى، ئه‌نگێلا مێركل راوێژكارا ئه‌لمانیا داخواز ژ حه‌یده‌ر عه‌بادى سه‌رۆك وه‌زیرێن عیراقێ كریه كو سه‌ره‌دانا ئه‌لمانیا بكه‌ت ب مه‌ره‌ما پشكداریكرنێ د كومبوونا حه‌فت ولاتێن پیشه‌سازى یێن جیهانى ل به‌رلین.
ئه‌ڤرۆ نیوز:
سه‌رۆك وه‌زیرێن كه‌نه‌دا دێ سه‌ره‌دانا هه‌رێما كوردستانێ كه‌ت و ل گه‌ل سه‌رۆك بارزانى كومبیت.، ستیڤن هاربر سه‌رۆك وه‌زیرێن كه‌نه‌دا سوبه دێ سه‌ره‌دانا هه‌رێما كوردستانێ ده‌ت و ل گه‌ل مه‌سعود بارزانى سه‌رۆكێ هه‌رێما كوردستانێ كوم بیت.
بریاره د كومبوونێ دا به‌حسێ پرسێن ده‌ڤه‌رێ و مه‌ترسیێن داعش و سه‌ركه‌فتنێن پێشمه‌رگه‌ى ل به‌رۆكێن شه‌رى بهێته كرن، هه‌روه‌سا به‌حسێ هاریكاریێن كومه‌لگه‌هێ نێڤده‌وله‌تى بۆ هه‌رێما كوردستانێ بهێته كرن.
ئه‌ڤرۆ نیوز:
ل گور ژێده‌رێن ده‌نگوباسا، پولیسێن توركیا هێرش كرینه سه‌ر خونیشاده‌رێن رۆژا جیهانیا كرێكاران ل گوره‌پانا ته‌قسیم ل باژێرێ توركیا و زێده‌تر ژ 300 خونیشاده‌ر گرتینه.
ل گور ژێده‌رێن ده‌نگوباسا،خونیشادانا رۆژا جیهانیا كرێكاران ئه‌ڤرۆ ل ئسته‌نبولێ بۆ ماوێ ده‌مژمێره‌كێ ب هێمنى برێڤه‌چوو، به‌لێ پشتى ده‌ستێوه‌ردانا هێزێن پولیسان بۆ ڤه‌ره‌ڤاندنا خونیشاده‌ران، ئالوزى كه‌تیه د ناڤبه‌را خونیشاده‌ران و هێزێن پولیسان و د ئه‌نجامدا پۆلیسان 300 كرێكار گرتن.
ئه‌ڤرۆ نیوز:
ب هه‌لكه‌فتا رۆژا جیهانیا كرێكاران و جه‌ژنا كرێكاران، سه‌رۆك بارزانى د په‌یجێ خوه یێ فێسبوكێ دا په‌یامه‌ك به‌لاڤكریه و پیروزیێن خوه ئاراسته‌ى كرێكارێن جیهان و كوردستانێ كرینه و سوپاسیا ماندیبوونا ڤێ توێژا خوشتڤى یا كوردستانێ كریه و ده‌ستخوشیا رۆلێ وان یێ كاریگه‌ر كریه د ئاڤه‌دانكرنا كوردستانێ دا و هیڤیا ساخله‌مى و به‌خته‌وه‌ریێ بۆ خواستى یه.
ئه‌ڤرۆ نیۆز، قائید میرۆ
رێڤه‌به‌رێ كۆنتڕۆلا زێڕی ل هه‌رێما كوردستانێ دیاركر، ئینانا زێڕی د ئه‌ڤ ساله‌دا بۆ هه‌رێما كوردستانێ كێمبوویه و راگه‌هاند، هه‌ر بازرگانه‌كێ بخوازیت زێڕی ل ده‌رڤه بینیت دێ هه‌موو ئاسانكاریه‌ك بۆ هێته‌كرن.
به‌كر عه‌زیز، رێڤه‌به‌رێ كۆنتڕۆلا زێڕی ل حوكمه‌تا هه‌رێما كوردستانێ ب ئه‌ڤرۆ نیۆز راگه‌هاند، د ئه‌ڤساله‌دا نێزیكی پازده هزار كیلۆیێن زێڕی ب رێیا فڕۆكه‌یێن هه‌ولێر و سلێمانیێ و كۆمه‌لگه‌ها ئیبراهیم خه‌لیل هاتینه ناڤا هه‌رێما كوردستانێ ، ئه‌ڤه‌ژی تنێ د سێ هه‌یڤێن ده‌سپێكی یێن ئه‌ڤساله، ئێنانا زێڕی بۆ هه‌رێما كوردستانێ كێمبوویه ل چاڤ سالا بۆری “.
به‌كری گۆتژی” هه‌ر بازرگانه‌كێ بخوازیت زێڕی ژ ده‌رڤه بینیت دێ ئاسانكاری بۆ هێنه‌كرن و تنێ دشێت ب رێیا ده‌ركرنا مۆهله‌ته‌كێ، چه‌ند بڤێت زێڕی ل وه‌لاتێن بیانی بینیت بۆ هه‌رێما كوردستانێ، به‌لێ به‌رۆڤاژی برنا زێڕی بۆ ده‌رڤه‌ی هه‌رێما كوردستانێ رێك ناهێته‌دان ب ساناهی زێڕ بچیته ده‌رڤه و پێدڤی ب كه‌فیله‌كێ مالی و هنده‌ك مه‌رجێن دیژی هه‌نه”.
ئه‌ڤرۆ نیوز،زنار تۆڤى:
ئه‌ڤرۆ روژا ئه‌ینى 1 ئه‌یارا 2015 دكتور عه‌بدولسه‌مه‌د ئیسلام تاها ماموستایێ زانكویا دهوكێ ل به‌شێ زمان و ئه‌ده‌بێ كوردى_كولیژا ئادابێ، پشتى هه‌ڤركیه‌كا دژوار دگه‌ل نه‌خوشیێ كرى دژیێ 55 سالیێ دا وه‌غه‌را داویێ كر و چوو به‌ردلوڤانیا خودێ.
ناڤهاتى خزمه‌ته‌كا مه‌زن پێشكێشى زمان و ئه‌ده‌بێ كوردى كریه ل زانكویا دهوكێ و سه‌رپه‌رشتیا چه‌ندین نامه‌یێن ماسته‌ر و دكتورایێ ل هه‌مان زانكو كریه،هه‌روه‌سا ناڤبرى كارێ راگه‌هاندنێ ژى كریه و ماوه‌یه‌كێ رێڤه‌به‌رێ ته‌له‌فزیونا دهوك بوو.
ئه‌ڤرۆ نیوز،زنار تۆڤى:
لیژنا هێزێن چه‌كدارى یا سه‌ر ب كونگرێسێ ئه‌مریكا،پروژه یاسایه‌ك په‌سه‌ندكر كو وه‌ك دوو ده‌وله‌تان مامه‌لێ دگه‌ل كورد و عه‌ره‌بێن سوننه بكه‌ن،ڤێ چه‌ندێ كارڤه‌دانێن جورا و جور لدویڤدا هاتن.
ل هه‌ولێرێ لیژنا ئاسایشا په‌رله‌مانێ كوردستانێ 30/4/2015 پێشوازى ل بریارا كونگرێسى كر و ب پێنگاڤه‌كا زور گرنگ ل قه‌له‌م دا.
نازم هه‌ركى جێگرێ سه‌روكێ لیژنێ گوت:چه‌كداركرنا هه‌رێما كوردستانێ،دێ بیته ئه‌گه‌رێ په‌یدابونا ئارامیێ بو عێراقێ و هه‌مى ده‌ڤه‌رێ،پێنگاڤه‌كه كو رولێ پێشمه‌رگه‌ى بۆ ژناڤبرنا تیرورستان بهێزتر لێ دكه‌ت،ژبه‌ر هندێ هه‌رێما كوردستانێ خودانا سیسته‌مه‌كێ دیموكراتیه و چه‌كداركرنا پێشمه‌رگه‌ى چ مه‌ترسى لسه‌ر لایه‌نێن دیتر دروست ناكه‌ت. عه‌بادى هاته ده‌نگ و گوت:مامه‌له‌كرن دگه‌ل حكومه‌تا عێراقێ ل چارچووڤه‌یێ رێزگرتن و سه‌روه‌ریا عێراقێ دایه،حكومه‌تا عێراقێ د هه‌مى گفتوگویێن خودا دگه‌ل وه‌لاتێن جیهانێ جه‌خت لسه‌ر وان پره‌نسیپان كریه و دبێژیت:دووپات دكه‌ین كو چ لایه‌ن ناهێنه پرچه‌ككرن ئه‌گه‌ر ژلایێ حكومه‌تا عێراقێ ڤه نه‌بیت و لدویڤ وێ پلانێ یا به‌غدا داناى.
په‌رله‌مانێ عێراقێ 4 لیژنه راسپاردینه ل دژى بریارا ئه‌مریكا په‌رله‌مانێ عێراقێ 4 لیژنه راسپاردینه بو گه‌لاله‌كرنا بریاره‌كێ بۆ به‌رسڤا بریارا ئه‌مریكا كو پێكدهێن ژ لیژنێن:ده‌رڤه،یاسایى،ئاسایش و به‌رگرى.
پروژێ یاسایا ئه‌مریكا چه‌ند مه‌رجان لسه‌ر حكومه‌تا عێراقێ دسه‌پینیت، به‌رامبه‌ر ته‌رخانكرنا 715 ملیون دولاران ژ بودجه‌یێ 2016 یێ پنتاگونێ،بۆ هاریكاریكرنا سوپایێ عێراقێ و هێزێن دى یێن گرێدایى وى سوپایى ل شه‌رێ دژى داعش دا. ئێك ژوان مه‌رجان ئه‌وه كو حكومه‌تا عێراقێ پشكا كه‌مینه‌یێن دى ژبلى شیعه‌یان دابین بكه‌ت و رولى بده‌تێ د سه‌ركردایه‌تى كرنا وه‌لاتى دا،پشتى سێ هه‌یڤان ژ په‌سه‌ندكرنا یاسایێ دڤێت ئه‌و مه‌رج بهێنه جێبه‌جێكرن و به‌غدا هاریكاریا میلیشیان رابگریت،ئه‌گه‌ر به‌غدا پابه‌ند نه‌بیت،75% ژ وان هاریكاریان بو به‌غدا ناهێنه هنارتن و نێزیكى 60% ژ وان هاریكاریان راسته‌خو دێ هنێریت بۆ كورد و سوننه‌یان.
سه‌در هێرشێ دكه‌ت
رێبه‌رێ ره‌وتا سه‌در موقته‌دا سه‌در دبێژیت:ئه‌ڤ بریاره ده‌ستپێكه‌كا ئاشكرایه بۆ دابه‌شكرنا عێراقێ و به‌لێن دا كو كارڤه‌دانێن توند ل دژى ڤێ بریارێ بده‌ت،هه‌روه‌سا ئه‌و دێ دناڤ عێراقێ و ژده‌رڤه‌ى عێراقێ ژى دێ هێرشێ كه‌ته سه‌ر به‌رژه‌وه‌ندیێن ئه‌مریكا ئه‌گه‌ر ئه‌و بریار ده‌ربچیت.
ژلایێ خوڤه عالیه نوسه‌یف دبێژیت:بریارا ئه‌مریكا پیێشێلكرنا نه‌ریتێن ناڤده‌وله‌تیه،د ده‌مه‌كى دا حكومه‌تا ئه‌مریكا دهه‌مى ده‌مان دا دووپاتكریه كو هه‌ڤكاریا بارودوخێ دیموكراتى ل عێراقێ بكه‌ت.
جێگرێ سه‌روكێ ئه‌مریكا جو بایدن چه‌ندین جاران جه‌خت لسه‌ر هندێ كریه كو عێراق ببیته سێ هه‌رێمێن ئوتونومى بۆ كورد و شیعه و سوننه‌یان،ل هه‌یڤا 8/2014 وى گوتاره‌ك ل روژناما واشنتون پوست نڤێسى بوو،كو ڤه‌گه‌رین بۆ سیسته‌مێ فیدرالیێ كارا مه‌رجه بۆ ده‌ربازكرنا قه‌یرانێن عێراقێ.
بالیوزخانا ئه‌مریكا لایه‌نێن عێراقى دلرحه‌ت دكه‌ت پشتى ده‌ركه‌فتنا ڤى پروژه بریارا ئه‌مریكا نیگه‌رانى لده‌ف گه‌له‌ك لایه‌نێن عێراقى دروستبوو،بالیوزخانا ئه‌مریكا ل به‌غدا په‌ينامه‌یه‌ك ده‌كر بۆ دلرحه‌تیا وان لایه‌نان و تێدا جه‌خت ل وێ چه‌ندێ كر كو سیاسه‌تا ئه‌مریكا به‌رامبه‌ر عێراقێ نه‌هاتیه گوهورین،بالیوزخانه دبێژیت:ئیدارا سه‌روك ئوباماى پشته‌ڤانیا عێراقه‌كا ئێكگرتى دكه‌ت،هه‌ر هاریكاریه‌كا سه‌ربازى دێ برێیا حكومه‌تا عێراقێ بیت.
موه‌فه‌ق روبه‌یعى ئه‌ندامێ هه‌ڤپه‌یمانیا نیشتیمانى داخواز ژ حكومه‌تا عێراقێ كر كو دژى ڤێ بریارێ راوه‌ستن و ڤێ بریارا ئه‌مریكا ره‌ت بكه‌ن و گوت ژى:دابه‌شكرن دێ ل عێراقێ ده‌ست پێكه‌ت و پاشى سوریا و سعودیێ و دێ توركیا ژى ڤه‌گریت،ئه‌ڤ رێكه‌فتنا ستراتیجى ل سالا 2008 هاته واژوكرن،تێدا هاتیه كو ئه‌مریكا سوزدایه كو یه‌كپارچه‌یا ئاخا عێراقێ بپارێزیت.
ئه‌ڤرۆ نیوز:
ئومێد محه‌مه‌د سه‌عید رێڤه‌به‌رێ گشتى یێ كونترول و گه‌هاندنا كاره‌بێ ل حكومه‌تا هه‌رێما كوردستانێ راگه‌هاند كو ئه‌ڤرۆ وان كومبوونه‌ك ل وه‌زاره‌تێ ئه‌نجامدا و پشتى ره‌وشا ویستگه‌هێن كاره‌بێ هه‌لسه‌نگاندى و ل به‌رچاڤ گرتنا پلێن گه‌رمانێ، ئه‌و دێ شێن كاره‌با نیشتمانى بۆ هه‌یڤا ئایارێ، د ناڤبه‌را 21 بۆ 22 ده‌مژمێران كاره‌بێ دابین كه‌ن و یا مایى دێ موه‌لیده كاره‌بێ بۆ وه‌لاتیان دابین كه‌ن.
ئه‌ڤرۆ نیۆز، سالار دۆسكى:
ب به‌رهه‌ڤبوونا به‌رپرسێ لقێ ئێك عه‌بدولخالق باپیرى، فه‌هیم عه‌بدوللا سه‌رۆكێ ئه‌نجوومه‌نێ پارێزگه‌ها دهۆك، هه‌ژماره‌كا هونه‌رمه‌ند و روژنامه‌ڤانێن ده‌ڤه‌رێ، ئێڤاریا ئه‌ڤرۆ 30/4/2015 سه‌ندیكا هونه‌رمه‌ندێن كوردستانێ لقێ دهۆك ل باره‌گایێ خوه ، 21 مامۆستایێن هونه‌رمه‌ند كو دامه‌زرێنه‌رێن په‌یمانگه‌ها هونه‌رێن جوان دهۆك بووینه ب زێرى خه‌لاتكرن.
خانم ئه‌ڤین حسێن، سه‌رۆكا لقێ دهۆك یا هونه‌رمه‌ندێن كوردستانێ، په‌یڤه‌ك پێشكێشكر و به‌رهه‌مێ نوكه یێ هونه‌رى پارێزگه‌هێ ب هێڤێنێ ئه‌ڤان مامۆستایێن هونه‌رمه‌ند دازانین كو ماوێ ساله‌كێ بێ مووچه خوه‌به‌خش وانه گۆتینه په‌یمانگه‌هێ، دیسان ده‌ست خوه‌شى ل ماندیبوون و خزمه‌تا وان مامۆستا كر و سه‌رێ رێزێ بۆ ماندیبوونا ئه‌ڤان مامۆستان چه‌ماند.
ل دووڤ دا هه‌ر ئێك ژ به‌رپرسێ لقێ و سه‌رۆكێ جڤاتێ په‌یڤێن خوه پێشكێشكرن و رۆلێ هونه‌رمه‌ندان بلند نرخان، پاشان دو پارچه مۆزیكه هاتنه پێشكێشكرن كو ژلایێ قوتابیێن په‌یمانگه‌هێ ڤه هاتبوونه به‌رهه‌فكرن، دووڤ دا (21) مامۆستایێن دامه‌زرێنه‌ر ب خه‌لاتێ زێرى ژلایێ سه‌ندیكایێ ڤه هاتنه خه‌لاتكرن.
نيشاندان