ئەڤرۆ نیوز:
وەزارەتا دارایی راگەهاند، رۆژا شەممە و ئێکشەمبی 21 و 22 ئادارا 2020 دێ مووچێ یەکەیێن 70 و 80 یێن وەزارەتا پێشمەرگە هێنە دابەش کرن.
ئەڤرۆ چارشەمبی 18-03-2020، وەزارەتا دارایی و ئابووری یا هەرێما کوردستانێ راگەهاند، ئه‌ڤرۆ و سوبەهی 18 و 19-03-2020) مووچێ دیوان و لیوایێن وه‌زاره‌تا پێشمه‌رگه یو وەزارەتا دارایی و ئابووری دێ هێنە خه‌رجکرن.
ئەڤرۆ نیوز ، مەحمود نهێلی:
رێڤەبەرێ ئاڤا قەزا ئامێدیێ بو ئەڤرۆ نیوز دیار کر، ژ ئەنجامێ بارینا بارانێن زۆر و رابوونا ئاڤا رووبارێ زێی و سپنەی، پرۆژێ ستراتیژی یێ ئاڤا ئامێدیێ و پرانیا پرۆژێن ئاڤێ ل دەڤەرێ تێکچووینە.
بشار حاجی رێڤەبەرێ ئاڤا ئامێدیێ دیار کر، کو تێکچوونا پرۆژێن ئاڤێ ل دەڤەرێ دبیتە ئەگەرێ بێ ئاڤ بوونا هژمارەکا زۆرا خەلکێ دەڤەرێ ل سەرانسەرێ قەزایێ بۆ هەیاما چەند رۆژەکان.
گۆت ژی: ئەم وەک فەرمانگەهێن ئاڤا ئامێدیێ و سەرنکی داخازێ ژ خەلکێ دەڤەرێ دکەین کو دڤان چەند رۆژەکان کێم مەزاختنێ د ئاڤێ دا بکەن و کێم ئاڤێ ب مەزێخن چونکە دروستکرنەڤەیا ڤان پرۆژان دەم پێ دڤێت ژ ئەگەرێ قەدغەیا هاتن و چونێ و رێنمانیێن خوە پاراستنێ ژ ڤایروسێ کورونایێ.
ناڤهاتی تەکەز ژی کر، کو ئەڤ ئاریشا بێ ئاڤیێ دێ بو هەیامەکا کورت بیت و دێ ب هەموو شیانێن خوە کار کەن بو وێ یەکێ بشێن ڤێ ئاریشەیێ چارەسەر بکەن. و گۆت هاریکاریا خەلکێ دەڤەرێ دگەل مە جهێ رێزگرتنێ یە .
ئەڤرۆ نیوز:
فەرمانداریا هێزێن سەربازی یێن تورکیا ل باژێرێ دێرسیمێ یێ باکورێ کوردستانێ دیار کر کو ئەڤرۆ ل سەر رووبارێ مونزور ل دێرسیمێ دەمێ راهێنانا سەربازی دا ئەفسەرەکێ وان د ئاڤێ دا چوویە و هەتا نها ژی تەرمێ وی نەهاتیە دیتن.
دهێتە زانین کو تورکیا ب سەدان بنگەهێن سەربازی ل باکورێ کوردستانێ هەنە و نها ژی ل گەلەک دەڤەران سەربازێن تورکیا ل دژی گەریلایێن پەکەکێ دەست ب ئۆپەراسیۆنان کرینە.
ئەڤرۆ نیوز:
رێکخراوا مافێن مرۆڤی یا رۆژهەلاتێ کوردستانێ راگەهاند کو ب فەرمانا عەلی خامنەیی رێبەرێ شورەشا ئیسلامی یا ئیرانێ هندەک گرتیێن سیاسی هاتینە ئازادکرن کو دو گرتیێن کورد ژی تێدا هەنە.
ل گۆر رێکخراوا مافێن مرۆڤی یا رۆژهەلاتێ کوردستانێ ئیران ب مەرج گرتیێن سیاسی ئازاد دکەت، چونکو ئەو گرتی دێ هێنە ئازاد کرن کو سزایێ وان یێ زیندانێ ژ ٥ سالان زێدەتر نەبیت و گرتیێن کو بەری نها ب تومەتا کارێن سیاسی سزایێن گران ل سەر وان هاتینە سەپاندن ب چو رەنگەکێ ناهێنە ئازادکرن.
ئەڤ بزاڤا ئیرانێ ژی ژ بەر پاراستنا وەلاتیانە ژ ڤایرۆسێ کۆرۆنا، چونکو هەتا نها پتر ژ هزار کەس ل ئیرانێ ژ بەر کۆرۆنایێ جانێ خوە ژ دەست داینە.
ئەڤرۆ نیۆز، قائید میرۆ:
سەرۆکێ دادگەھا تاوانێن ھەولێر ژبەر مەترسیێن ڤایرۆسا کۆرۆنا داخوازا دەرکرنا لێبۆرینا گشتی دکەن و دبێژیت، ڤایرۆسا کۆرۆنا مەترسی بۆسەر چاکسازیێن ھەرێما کوردستانێ ھەیە.
دادوەر عەبدولباست فەرھادی، سەرۆکێ دادگەھا تاوانێن ھەولێرێ داخوازکریە لێبۆرینا گشتی بھێتە دەرکرن ژبەر ئەڤێ رەوشا نوکەیا ھەرێما کوردستانێ تێدا دەربازدبیت، لەوڕا داخواز ل دەزگەھێن دەستھەلاتدارێن ھەرێما کوردستانێ و دادوەران دھێتەکرن کار بۆ دەرکرنا لێبۆرینا گشتی بھێتەکرن.
ئەڤی دادوەری کو وێنەیەک گەھشتیە ئەڤرۆ نیۆز گۆتیە” پێدڤیە لێبۆرینا گشتی ب میکانزمەکی بھێتە دەرکرن زیان نەبن و زیندانی ب کەفالەت بھێنە ئازادکرن.
دادوەر عەبدولباست فەرھادی دبێژیت” ئەم بەردەوام دژی دەرکرنا لێبۆرینا گشتی بووینە لھەرێما کوردستانێ، بەلێ ئەم یێ دبینین رەوش گەھشتیە ئاستەکی مەترسیێن جدی پەیداکرینە لسەر ژیانا مرۆڤان و ھژمارەکا زۆرا زیندانیان دناڤا چاکسازیێن ھەرێما کوردستانێ دانە، ئەڤەژی دبیتە ئەگەر بۆ بەلافبوونا ڤایرۆسا کۆرۆنا دناڤا زیندانیان.
ئەڤرۆ نیوز، له‌زگین جوقی:
رێڤه‌به‌ری سه‌خبێری وپاراستنا رێك وپرا ل دهۆكێ دیاركركو پرا عمریكی یا پارێزگه‌ها دهۆك و مووسل پپێكڤه گرێده‌ت ژبه‌ر بارانی هه‌رفت.
دیوالی حه‌می بریندار، بۆ ئه‌ڤرۆ نیوز گۆت: (بۆ ڤه‌دیتن و چیكرنا پرا ناڤبه‌را دهۆك و مووسل دا ئه‌م چووینه وێده‌ر دگه‌ل رێڤه‌به‌ری سه‌خبیریا رێكا ل مووسل ئاخڤتینه ئه‌م پرا پێدڤیه ناڤبه‌را ئێدارا مووسل و دهۆك دا بهێته چاره‌سه‌ركرن هه‌ر چه‌نده پرا عمریكی گرێدایه مووسلی یه نوكه بتنی ئێك سایدی پری مایه بۆ هاتن وچوونی هاتیه بكارئێنان ئه‌م هه‌ولین به‌رده‌وامداینه بۆ وی چه‌ندی له‌ز ل سه‌ر ڤه‌دیتنا پرا عمریكی بهێته كرن چونكو رێكه‌كا ستراتیجی یە و دهۆك و مووسلێ پێكڤه گرێدده‌ت).
ئەڤرۆ نیوز، عەلی حاجی :
رێڤەبەرێ رێڤەبەریا بەنداڤان ل زاخۆ د داخویانیەکێ دا بۆ ئەڤرۆ نیوز دیار کر بلند بونا رێژەیا ئاڤا خابیری ل زاخۆ نمرەیا پیڤایی شکاند ژبەر کو زێدەتری ٢٠ سالە ب ڤی رەنگی ئاڤا خابیری بلند نەبوویە.
زێدەتر سەلمان محەمەد گوت: (ماوەیێ زێدەتری ٢٠ سالایە ب ڤی رەنگی ئاڤا خابیری بلند نەبوویە ل دویف پیڤانا مە ئاڤا خابیری ل زاخۆ ئەڤرۆ ل روژا چار شەمبێ رێککەڤتی ١٨/٣/٢٠٢٠ ٨,٥ ئاڤا خابیری ل زاخۆ ژ ئاستێ ئاڤێ بلندتر بوویە و بۆ ئێکەم جارە ماوەیێ ٢٠ سالان دا بلند ببیت و ل سالال ٢٠١٣ زێدەتری ٧.٥ ئاڤا خابیری بلند ببوو ئێدی ئاڤ رابوونا ئەڤرۆ نمرا پیڤایی د ماوەیێ ٢٠ سالان دا شکاندی یە، زێدەباری وێ چەندێ ژی بلندبوونا ئاڤێ کارتێکرن ل هاتنوچوونا ناڤ بازاری ژی کریە.
ئەڤرۆ نیوز، مەحمود نهێلی:
ژ ئەنجامێ بارینا بارانێن زۆر د 24 دەمژمێرێن بوری دا دوو پر بن ئاڤ بوونە و رێکێن چەندین گوندان هاتینە برین.
ئەندزیار عەبدولمەناف رەشید بو ئەڤرۆ نیوز دیار کر، ئەڤ بارانە بووینە ئەگەرێ هندێ پرا گوندێ گەلەکە و مەهیدێ بن ئاڤ ببیت و هاتن و چون دناڤبەرا ڤان گوندان و هەروەسا سەنتەرێ ناحیا دێرەلۆک بهێتە برین و گۆت: (هەر ل سەر رووبارێ سپنە پرەکا دی یا پیادە بن ئاڤ بوویە کو رێیا سەرەکی یا چەمێن چاندنێ یە).
ناڤهاتی دیار ژی کر، چەند رێک و جهێن دی ژی خراب ببون رێکا ئاڤێ هاتبوونە گرتن و پرانیا وان ژلایێ تیمێن وان ڤە هاتینە چارەسەرکرن.
و ئاشکرا کر، کو رەخێ جادا سەرەکی دێرەڵۆک ئامێدیێ ل نێزیک گوندێ سەرگەلێ خراب بوویه و گەهشتیە قێری و ئەو مژیلی چێکرنا وێ نە بو وێ یەکی رێکا دناڤبەرا دێرەلۆک ئامێدیێ دا نەهێتە برین.
ئەندازیار سائیر ئامێدی ئەندازیارێ سەر پەرشتێ پرۆژێ هایدروپاوەرێ دێرەلۆک بو ئەڤرۆ نیوز دیار کر، کو بارانێن زۆر و بلندبوونا ئاستێ رووبارێ زێ چ کارتێکرن ل پرۆژێ هایدروپاوەرێ دێرەلۆک نەکریە.
هاشم یەحیا بەرپرسێ پشکا کەشناسیا ئامێدیێ دیار کو د ۲٤ دەمژمێرێن بوری دا ۱۲۰ ملیمێن بارانێ ل دێرەلۆکێ و ئامێدیێ بارینە و رێژا باران بارینێ ل دەڤەرا ئامێدیێ ژ هزارێ دەرباز کر.
ئەڤرۆ نیۆز، قائید میرۆ:
بەری دو شەڤا ھژمارەک کەسێن نەنیاس چوونە ناڤا گۆڕستانەکا کوردێن کاکەیی ل گوندێ سفەیە یێ سەر ب پارێزگەھا ھەولێرێ و ھژمارەک کلێن ناڤا گۆڕێ شکاندینە پەیڤدارێ وەزارەتا ئەوقافێ ژی دبێژیت، دوڤچوون یا بەردەوامە و دەزگەھێن ئەمنی دێ وان کەسان دەستەسەر بکەن.
نەبەز ئیسماعیل، پەیڤدارێ وەزارەتا ئەوقاف و کارۆبارێن ئاینی بۆ ئەڤرۆ نیۆز دیارکر” راستە ھژمارەک کەسێن نەنیاس چووینە ناڤا گۆڕستانا گوندێ سفەیە یێ گرێدایی قەزا خەبات و ھژمارەک کێلێن کوردێن کاکەیی شکاندینە، حالەتێن وەسا زۆر کێمن لھەرێما کوردستانێ، بەلێ ئەڤە کاریگەریێ ناکەتە پڕۆسا پێکڤەژیانێ لھەرێما کوردستانێ، چونکە کارێ مرۆڤێن ترسنوکن.
نەبەز ئیسماعیل ئاماژەکر” مە داخواز ل دەزگەھێن ئەمنی کریە ڤەکۆلینێ بکەن لدۆر ھێرشا لسەر گۆڕستانا کوردێن کاکەیی و ئەنجامدەر بھێنە دەستەسەرکرن، بێگومان پشتی ئاشکرابوونێ ھەرکەس و لایەنەک ل پشت ئەڤێ روویدانێ بیت دێ ھێتە سزادان.
ئەڤرۆ نیوز، نەوزاد هلوری:
ژ ئەگەرێ بارینا پێلەکا بارانا ب هێز، لەهی ل چەند گەرەک و کولانێن دهۆکێ و دەوروبەران دروست بوو، ل دەردورێن رووبارێ هشکەروو ئاڤ چویە پتری 200 خانیێن وەڵاتیان و زیان گەهشتیێ.
رەعەد ئەحمەد، وەلاتیەکێ دهۆکێ یە و مالا وی ل سەر رووبارێ هشکەرویە و ل بەر ئاڤێ کەفتیە بۆ ئەڤرو نیوز گۆت: (ژ ئەگەرێ پێلێن بارانێ لەهی ل رووبارێ هشکەرو دروست بویە، ئاڤ چویە پتری 200 خانی و مالێن سەر رووبارێ هشکەرو و زیانێن زور گەهشتنێ و ئەو خەلک هەموو ئاوارەیێ مالێن دی و مالێن کەسوکارێن خوە بوینە).
بێوار عەبدولعەزیز، بەرپرسێ راگەهاندنا بەرەڤانیا باژێری بو ئەڤرۆ نیوز گۆت: (ژ ئەگەرێ باران و لەهیان زیانەکا زۆر ب هژمارەکا مالێن دهۆکێ دروست بوینە ب تایبەتی لسەر رووبارێ هشکەروو، تیمێن مە ژ شەڤا بوری هەتا نوکە لسەر خەتن و هاریکاریا زیانڤێکەفتیا دکەن، سوپاس بو خودێ هەتا نوکە چوو زیانێن گیانی نینن، تیمێن مە خەملاندنا زیانان دکەن).
نيشاندان