ئه‌ڤرۆ نيوز:

ماوه‌كێ درێژه‌ سه‌رۆكێ هه‌رێما كوردستانێ، مه‌سعود بارزانى، ل گه‌ل پێشمه‌رگه‌ى ل مه‌يدانێن شه‌ريه‌ ل ميحوه‌رێ زومار و ره‌بيعه‌ و به‌رپرسێن وى ميحوه‌رى ژى دده‌نه‌ زانين كو پشتى چوونا سه‌رۆك بارزانى بۆ ده‌ڤه‌رێ شيانێن پێشمه‌رگه‌ى 10 هندى جاران يێن زێده‌بووين.

رێڤه‌به‌رێ ناحيا زومار موزاحم سه‌عدون ب مالپه‌رێ PDK راگه‌هاند كو پشتى سه‌رۆكێ هه‌رێما كوردستانێ چوويه‌ ميحوه‌رێ زومار و سه‌رپه‌رشتيا شه‌رى كرى، وره‌يا پێشمه‌رگه‌ى گه‌له‌ك بلند بوويه‌، پشتى رزگاركرنا دو گۆندان و پرۆژێ ئاڤا ستراتيژى يێ جه‌زيره‌ ب درێژاهيا 30 كيلۆمه‌تران ده‌ڤه‌ر هه‌تا راده‌كى ئارام كريه‌ و لڤينێن داعش ل ده‌ڤه‌رێ نه‌ماينه‌.

رێڤه‌به‌رێ ناحيا زومار گۆت: “ب هاتنا سه‌رۆك بارزانى بۆ ده‌ڤه‌رێ خه‌لكێ ده‌ڤه‌رێ و ئاواره‌ گه‌له‌ك يێن دلخۆش كرين، چونكو دزانن ڤه‌گه‌راندن و ئازادكرنا ده‌ڤه‌رێ يا ب ساناهى كه‌فتى”.

نوكه‌ چه‌كدارێن داعش خه‌لكى ژى مالێن وان ده‌ردئێخن و دبنه‌ ده‌ڤه‌رێن دى، چونكو دزانن دووماهيا وان يا نێزيك بووى. ئه‌ڤه‌ ب گۆره‌ى گۆتنێن موزاحم سه‌عدون.

د هه‌مان ده‌م دا، ئه‌ندامێ جڤاتا نوونه‌رێن عيراقێ كو هه‌ر ژ ده‌سپێكێ ل گه‌ل پێشمه‌رگه‌ى د مه‌يدانا شه‌رى دايه‌، محسن سه‌عدون، دا زنين كو ئاماده‌بوونا و چاڤدێريكرنا سه‌رۆك بارزانى بۆ شه‌رى ل ميحوه‌رێ زومار و ره‌بيعه‌ ئه‌نجامێن باش د به‌رژوه‌ندا خه‌لكێ ده‌ڤه‌رێ و پێشمه‌رگه‌ى دا هه‌بووينه‌ و گۆت: “ب هه‌بوونا وى دێ شێين ده‌ڤه‌رێ ب ته‌مامى هه‌تا دگه‌هيته‌ شنگال پاقژ بكه‌ين”.

سه‌عدون گۆتژى: “د چه‌ند رۆژێن داهاتى دا، دێ زومار هه‌تا دگه‌هيته‌ تله‌عفه‌ر ژ داعش پاقژ كه‌ين، نوكه‌ داعش خه‌لكێ خوه‌ ژى هه‌موو بريه‌ تله‌عفه‌ر و مووسل”.

موسا گه‌ردى فه‌رماندێ فه‌رمانده‌يا هه‌لگورد ژى دياركر كو هه‌بوونا سه‌رۆك بارزانى گه‌له‌ك يا گرنگه‌ ل ده‌ڤه‌رێ و گۆت: “بيرا مه‌ پێشمه‌رگا ل داستانا خواكوڕكێ دئينيته‌ ڤه‌ كو چاوان ل وێرێ ب چ روحيه‌ت بوويه‌، نوكه‌ ژى ب هه‌مان ره‌نگه‌”.

ئه‌ڤرۆ نيوز، نيوار محه‌مه‌د سه‌ليم:

وه‌نسه‌ و مه‌هديا دو كچێن مه‌تو سه‌عدۆ فندى ژ خه‌لكێ سنونێ نه‌، پشتى شياين خوه‌ ژ ده‌ستێن تيرۆرستێن داعش رزگار بكه‌ن، ئه‌ڤرۆ ئێڤارى ل ده‌مژمێر 6:15 ده‌قيقه‌ ل ده‌ركارێ ل قه‌زا زاخۆ ڤه‌گه‌ريانه‌ ناڤ كه‌سوكارێن خوه‌ و خه‌لكێ وان پێشوازيه‌كا گه‌رم لێ كر.

ئه‌ڤ هه‌ردو كچه‌ ل رۆژا 3\8\2014 ل سنونێ هاتبوونه‌ ره‌ڤاندن ژ لايێ چه‌كدارێن داعش ڤه‌ ل گه‌ل هه‌موو خێزانا وان، به‌لێ ل رۆژا 3\8 بابێ وان و برايێ وان ل گه‌ل ژنبرا وان شيابوون خوه‌ قورتال بكه‌ن و بچنه‌ چيايى، دو برايێن وان ژى ب رێيه‌كا دى خوه‌ قورتالكربوو، نوكه‌ ژى ئه‌ڤ هه‌ردو خووشكه‌ شيان خوه‌ قورتالكه‌ن.

ئه‌ڤ ڤيديۆيه‌ ژ لايێ خه‌ليفه‌ هه‌سكانى ڤه‌ هاتيه‌ به‌لاڤكرن ل تۆڕا جڤاكى يا فه‌يسبۆكى، پێزانين ژى ژ وى هاتينه‌ وه‌رگرتن.

ئه‌ڤرۆ نيوز، نيوار محه‌مه‌د سه‌ليم:

ژێده‌ره‌كێ رۆژنامه‌ڤانى ب ئه‌ڤرۆ نيوز دياركر كو ژ به‌ر ئه‌ڤ ئالۆزيێن نوكه‌ ل باژێرێن باكوورێ كوردستانێ دروست بووين، گه‌شتيار و ئه‌و كه‌سانێن ل هه‌رێمێ سه‌ره‌دانا توركيا كرين نه‌شێن ڤه‌گه‌رنه‌ هه‌رێمێ و گۆمركا ئيبراهيم خه‌ليل ژى به‌حس ل چاوانيا هاتنوچوونێ دكه‌ت.

رۆژنامه‌ڤان كاوين جيهاد ته‌حلاڤى بۆ ئه‌ڤرۆ نيوز دياركر كو نوكه‌ كێشه‌ ل هه‌مبه‌ر گه‌شتيا و ئه‌و كه‌سانێن ب كار چووينه‌ وه‌لاتێ توركيا دروست بوويه‌ و نه‌شێن ڤه‌گه‌رنه‌ هه‌رێمێ و گۆت: “نوكه‌ زێده‌ترى 1000 كه‌سان ل وێرێ ئاسێ بووينه‌”.

ته‌حلاڤى زێده‌تر گۆت: “ب گۆره‌ى ئه‌و زانياريێن مه‌ هه‌ين يێن كو هه‌ڤالێن رۆژنامه‌ڤان ل وێرێ ب مه‌ داين كێشه‌ زێده‌تر ل نصێبين هه‌تا ماردين وقزلته‌په‌ هه‌يه‌ كو ل وان جهان هاتنوچوون د ناڤه‌به‌را باژێران دا نه‌مايه‌”.

ئه‌ڤرۆ ئاژانسێن رۆژنامه‌ڤانى يێن رۆيترس و سى ئێن ئێن و بى بى سى ژى ئاماژه‌ ب وێ چه‌ندێ كريه‌ كو رێيا چه‌ند ده‌ڤه‌ران هاتيه‌ بڕين و هاتنوچوون نه‌مايه‌.

هه‌ر سال ل وه‌رزێ هاڤينێ و بهێنڤه‌دانێن درێژ دا هژماره‌كا گه‌له‌ك مه‌زن يا وه‌لاتيان ب مه‌ره‌ما گه‌شتكرنێ و ده‌م ب سه‌ر برنێ سه‌ره‌دانا وه‌لاتێ توركيا دكه‌ن.

به‌رپرسێ راگه‌هاندێ ل ده‌روازێ گۆمركا ئيبراهيم خه‌ليل بۆ ئه‌ڤرۆ نيوز ديار كر كو هاتنوچوون د ناڤبه‌را هه‌رێما كوردستانێ و توركيا دا يا ئاسايى يه‌ هه‌موو كه‌س دشێن هاتنوچوونێ بكه‌ن.

نه‌جمه‌دين نێره‌وه‌ى گۆتژى: “هه‌ر چه‌نده‌ ئه‌و نه‌ گرێداى مه‌يه‌ و په‌يوه‌ندى ب توركيا ڤه‌ هه‌يه‌، به‌لێ ب گۆره‌ى ئه‌و زانياريێن مه‌ هه‌ين ل وانێ ژى چو كێشه‌ نينن و وه‌لاتى دشێن هاتنوچوونێ بكه‌ن”.

هنارتيێ كه‌نالێ سپێده‌ يێ سه‌ر ب ئێكگرتوويا ئيسلامى كوردستان ل سه‌ر سنورێ كۆبانێ، ل سه‌ر سنورى بۆ ئه‌ڤرۆ نيوز گۆت: “شڤێدى هنده‌ك كه‌سان ڤيابوو ڤه‌گه‌رنه‌ كوردستانێ، به‌لێ نه‌شيابوون، سپێدێ يێن ده‌رباز بووين”.

ئارام حسێن د په‌يوه‌نديه‌كا تله‌فۆنى دا گۆتژى: “ب گۆره‌ى ئه‌و زانياريێن ل به‌ر ده‌ستێ مه‌، نوكه‌ ژى جاره‌كا دى رێ يا د ناڤبه‌را هه‌رێمێ و توركيا دا هاتيه‌ گرتن”.

خۆنيشادانێن باكوورێ كوردستانێ  بۆ داخازا پشته‌ڤانيكرنا كۆبانێ، ئه‌ڤه‌ چه‌ند رۆژه‌ به‌رده‌وامى يا هه‌يى و ب گۆره‌ى ژێده‌رێن ده‌نگوباسان هه‌تا نوكه‌ 22 كه‌سان گيانێ خوه‌ ژ ده‌ست دايه‌.

ب گۆره‌ى به‌لاڤكريێن ده‌زگه‌هێن راگه‌هاندنێ ل توركيا ژى پرۆسا خاندنێ ل وان ده‌ڤه‌ران بۆ ماوێ سێ رۆژان هاتيه‌ راوه‌ستاندن.

ئه‌ڤرۆ نيوز:

په‌رله‌مانتاره‌كێ په‌رله‌مانێ كوردستانێ ل سه‌ر ليستا پارتى ديموكراتى كوردستان دياركر كو ئه‌و ل جهێ خه‌لكێ كۆبانێ بيت پێشوازيێ ل شاندێ په‌رله‌مانێ كوردستانێ ناكه‌ت.

دلشاد شه‌عبان غه‌فار ئه‌ندامێ په‌رله‌مانێ كوردستانێ ل سه‌ر ليستا پارتى ديموكراتى كوردستان ل تۆڕا جڤاكى يا فه‌يسبۆكێ به‌لاڤكريه‌ كو ئه‌و بيت ل جهێ خه‌لكێ كۆبانێ بيت پێشوازيێ ل شاندێ په‌رله‌مانێ كوردستانێ ناكه‌ت ب به‌هانه‌يا وێ چه‌ندێ كو داخوازيێن وان د ئاشكه‌را نه‌.

دلشاد شه‌عبان غه‌فار دبێژيت: “ل گه‌ل رێزێن من بۆ هه‌ڤالێن شاندى، هه‌كه‌ ئه‌ز بم ل جهێ خه‌لكێ كۆبانێ پێشوازيێ ل شاندێ په‌رله‌مانێ كوردستانێ ناكه‌م، چونكو زۆر يا دياره‌ كا كۆبانێ چ دڤێت”.

زێده‌تر گۆت: “كۆبانێ پشته‌ڤانيا نێڤده‌وله‌تى و له‌شكره‌كێ خودان ئيراده‌، چه‌ك و هاريكاريێن مرۆڤى دڤێن”.

مه‌نده‌هۆشيا خوه‌ ژى ل سه‌ر وێ چه‌ندێ دياركريه‌ كا كۆبانێ ژ ڤان زێده‌تر چو دڤێت و شاندێ په‌رله‌مانى دێ راپۆرتا خوه‌ ل سه‌ر چو نڤيسيت؟”.

ل دووماهيێ ژى ئه‌ندامێ په‌رله‌مانێ كوردستانێ ل سه‌ر ليستا پارتى ديموكراتى كوردستان دبێژيت: “به‌سه‌ خوه‌ مژوولكرن و مزايدات، كۆبانێ چوو، شه‌ره‌ف و نامسيا كوردان چوو، نه‌عله‌ت ل مه‌ بن”.