ئەڤرۆ، سالار دۆسکی:

ھاریکارێ پارێزگارێ دھۆکێ بۆ کاروبارێن پەنابەران دیار کر کو ھەتا دوھی 18\10\2014 نەە ھزار دوسەد و پێنج ئاوارێن خەلکێ کۆبانێ ھاتینە ناڤ ھەرێما کوردستانێ و 63% ل پارێزگەھا دھۆکێ نە.

ئیسماعیل محەمەد ھاریکارێ پارێزگارێ دھۆکێ بۆ کاروبارێن پەنابەران بۆ رۆژناما ئەڤرۆ خویا کر ھەتا نوکە 9256 کەس ژ خەلکێ کۆبانێ ھاتینە ناڤ ھەرێما کوردستانێ و گۆت “5837 ماینە ل پارێزگەھا دھۆکێ و 1938ل پارێزگەھا سلێمانیێ ھاتینە ئاکنجیکرن و 1481 ژی ل پارێزگەھا ھەولێرێ ھاتینە ئاکنجیکرن، ب ڤێ ئێکێ پرانیا ڤان پەنابەران ل پارێزگەھا دھۆکێ ھاتینە ئاکنجیکرن کو دبیتە رێژا ٦٣% ژ پەنابەران”.

ھاریکارێ پارێزگارێ دھۆکێ ئاشکرا کر کو کەمپا (گەویلان) ل قەزا بەردەرش سەر ب پارێزگەھا دھۆکێ ڤە، جھێ دەربەدەرانە و نەجھێ پەنابەرانە و جە ھەبوو و ھەموو بۆ ڤێ کەمپێ ھاتینە رەوانەکرن و گۆت “جھێ کەمپێ و ھەموو تشت ژ لایێ کارگێریا پارێزگەھێ ڤە بۆ ھاتینە تەرخانکرن و ھەتا تیمێن ساخلەمیێ و پۆلیسان و ھەر پێدڤیەک بۆ دھێتە دابینکرن”.

 بەوراری بالا، زنار تۆڤی:

رێڤەبەرێ ناحیا کانی ماسێ دیار کر کو ل روژا ئەینی رێکەفتی 17\10\2014 کۆمەکا خەلکێ کۆبانێ کو ژ 39 کەسان پێک دھاتن، ب رێکێن قەچاخ ژ سنوورێ دەڤەرا بەواری بالا ھاتنە د ناڤ ئاخا ھەرێما کوردستانێ دا، لێ پاشی بۆ کەمپا پەنابەران ل دومیز ھاتنە ڤەگوھاستن.

سامی ئوشانە گورگیس رێڤەبەرێ ناحیا کانی ماسێ بۆ ئەڤرۆ خویا کر کو ل رۆژا ئینی ٣٩ کەس کو خەلکێ کۆبانێ بوون، ماوەیەکێ درێژ ل وەلاتێ تورکیا خوجە بوون، ژبەر ئالۆزیا رەوشا ژیانێ ل تورکیا ڤیایە قەستا ھەرێما کوردستانێ بکەن و گۆت “قەچاخچیان  ھەر کەسەک ب 200 دولاران ئینایە د ناڤا ئاخا ھەرێما کوردستانێ دا”.

 رێڤەبەرێ ناحیا کانی ماسێ گۆت ژی “وان پەنابەران گەلەک نەخۆوشی دیتینە ھەتا شیاینە بھێنە د ناڤا سنوورێن کوردستانێ دا و بۆ ماوێ پتر ژ ھەشت دەمژمێران ب پێیان ھاتینە ھەتا گەھشتین، لێ ل دەمێ گەھشتنا وان بۆ کوردستانێ ھاریکاریا وان ھاتە کرن و ئەو پەنابەر بۆ ناڤ کەمپا دومیز ھاتنە ڤەگوھاستن”.

سامی ئوشانە گورگیس رێڤەبەرێ ناحیێ زێدەتر گۆت “ژبەر نەشارەزایا خەلکێ کۆبانێ، ئەڤە بۆ ماوێ چەند رۆژانە ل دۆرێن 190 کەسان ل سنوورێ بەواری بالا ھاتینە د ناڤ ھەرێما کوردستانێ دا، بەرامبەر ھاتنا وان قەچاخچیان پارە بۆ خوە ژێ وەرگرتینە و بازرگانی پێ کریە”.