ئەڤرۆ نیوز، نەوزاد هلۆری:
د.نزار عسمەت، رێڤەبەرێ گشتیێ ساخلەمیا پارێزگەها دهۆکێ، د کۆنگرەیەکێ رۆژنامەڤانی دا دیارکر کۆ هەتا نوکە چ حالەتێن ڤایرۆسێ کۆرۆنایێ ل پارێزگەها دهۆکێ نەهاتینە تومارکرن و گۆت: ساخلەمیا دهۆکێ هەموو پێرابوونێن پێدڤی بۆ رووب روو بوونا ڤایروسێ کۆرۆنایێ و هشیارکرنا وەلاتیان گرتینە بەر، نەخۆشخانەکا تایبەت ژی بەرهەڤکریە، داخوازێ ل هەرکەسی دکەین کو ل گەل مە د هاریکاربن داکو ب شێوەیەکێ ساخلەم سەرەدەری ل گەل رەوشا نوکە دروست بوی بکەین.
ئه‌ڤرۆ نیوز:
پشتی راگه‌هاندنا خۆ ڤه‌كیشانێ ژ پیك ئینانا كابینا نوو یا حكومه‌تێ، دڤێت ل ده‌مێ 15 رۆژان دا كه‌سه‌كێ دی بهێته راسپاردن بۆ پێك ئینانا حكومه‌تێ به‌لێ تانوكه چ رێكه‌تن ل سه‌ر ئه‌ڤێ چه‌ندێ نه‌هاتینه‌كرن.
ئاژانسا رویته‌رز به‌لاڤكریه كۆ عادل عه‌بدلمه‌هدی چ دی سه‌رۆكاتیا جڤاتا وه‌زیران ناكه‌ت و داخازا جهگره‌كی كریه و ئه‌و سه‌رپه‌رشتیا كاڕێن جڤاتا وه‌زیران بكه‌ت چونكو زۆرینه‌یا ده‌سه‌لاتێن وی ژێ هاتینه وه‌رگرتن.
لگوری دستورێ عیراقێ هه‌كه ره‌وشه‌كا بڤی شێوه‌ی دروست بیت ئه‌ڤی ده‌می سه‌رۆك كۆمار ب شێوه‌یه‌كێ ده‌مكی سه‌رۆكاتیا حكومه‌تێ كه‌ت.
ئه‌ڤرۆ نیوز:
سه‌رۆك وه‌زیرێ كاربرێكه‌رێ ئیسرائیلێ سه‌ركه‌فتنا خۆ د هه‌لبژارتنێن (كنيست) په‌رله‌مانێ وه‌لاتێ خۆ راگه‌هاند.
رۆژا دوشه‌مبێ 2/3/2020 هه‌لبژارتنێن كنیستا ئیسرائیلی هاتنه ئه‌نجامدان و تێدا هه‌ردو پارتێن لیكود و شین و سپی هه‌ڤركیا بده‌ستڤه ئینانا زۆرینه‌یا كورسیان دكرن.
پشتی پرۆسه‌یا ده‌نگان و ده‌ركه‌فتنا ئه‌نجامێن به‌رایی، بنیامێن نه‌تانیاهو سه‌رۆك وه‌زیرێ كاربرێكه‌ر و سه‌رۆكێ لیكود سه‌ركه‌فتنا خۆ د هه‌لژارتنان دا راگه‌هاند.
رۆژا 17/9/2019 هه‌لبژارتنێن په‌رله‌مانی هاتنه ئه‌نجامدان و پارتا لیكود ب سه‌رۆكاتیا بنیامێن ناتانیاهو 32 كورسی و پارتا شین و سپی ب سه‌رۆكاتیا بینی گانتس 33 كورسی بده‌ستڤه ئینان، پاشی گانتس نه‌شیا حكومه‌تا نوو پێك بینیت له‌ورا 12/12/2019 په‌رله‌مانی ب ده‌نگێ 94 ئه‌ندامان، بریارا ئه‌نجامدانا هه‌لبژارتنان دا كۆ ل رۆژا 2/3/2020 .
كنیست ئانكو په‌رله‌مانێ ئیسرائیلی ژ 120 ئه‌ندامان پێك دهێت چ لایه‌نێ زۆرینه‌یا كورسیان بده‌ستڤه بینیت ئه‌و دێ سه‌رۆك وه‌زیرێ ئیسرائیلی ده‌ست نیشان كه‌ت، به‌لی پیدڤیه ره‌زامه‌ندیا 61 ئه‌ندامێن په‌رله‌مانی بده‌ستڤه بینیت.
ئه‌ڤرۆنیوز:
مایك پێنس جێگرێ سه‌رۆكی ئه‌مریكا راگه‌هاند: ل هاڤینێ یان پائیزا بهێت دێ ده‌رمانه‌ك بۆ كێمكرنا ئازارێن توشبوویێن ڤایرۆسێ كورونا كه‌ڤته به‌رده‌ست و ل شه‌ش هه‌فته‌یین بهێت ده‌رمانه‌كێ نوو یێ ڤایرۆسی هێته تاقیكرن.
مایك پێنس جێگرێ سه‌رۆكێ ئه‌مریكا راگه‌هاند سه‌رۆكێ ئه‌مریكا ل گه‌ل كۆمپانیا دروستكرنا ده‌رمانی ئاخڤتی یه ئاگه‌هدار كریه كۆ ل دوماهیا ئیسال یان سالا نوو ڤاكسنیێ ڤایرۆسی به‌رهه‌ڤ دبیت.
جێگرێ سه‌رۆكی ئه‌مریكا دیار كر ل هاڤینێ یان پائیزێ ئه‌و ڤاكسیندانه دێ هێته دان ب توشبوویێن ڤایرۆسی ئه‌ڤه ژی جارا ئێكێ یه به‌جسێ دیتنا ده‌رمانی دهێته‌كرن، دێ هیڤی ڤه‌گه‌ریت بۆ توشبوویێن ڤایرۆسێ كورونا چونكو هه‌تا نوكه چ ده‌رمانه‌ك بۆ ڤایرۆسێ كورونا نه‌هاتیه دیتن كۆ زێده‌تری 60 وه‌لاتێن جیهانێ به‌لاڤ بوویه.
ئه‌ڤرۆ نیوز:
ڤه‌كۆله‌رێن نه‌ته‌وه‌یێن ئێكگرتی رادگه‌هینن كۆ ل شه‌رێ ئاسمانیێ یێ روسیا ل سوریا وه‌لاتیێن مه‌ده‌نی كوشتینه و ئه‌و گرۆپێن چه‌كدارێن ئوپوزسیونا سوریا كۆ توركیا پشته‌ڤانیا وان دكه‌ت تاوانێن كوشتن و ژناڤبرنێ ئه‌نجامداینه.
لژنه‌یه‌كا نه‌ته‌وه‌یێن ئێكگرتی د راپۆرته‌كێ دا به‌لاڤكر روسیا هێرشێن ئاسمانی كرینه سه‌ر بازارێن قه‌ره‌بالغ و كه‌مپێن ئاواران، ژ هه‌یڤا ته‌موزێ بۆ هه‌یڤا ئابا سالا بوری بڤی ئه‌گه‌ری ب ده‌هان وه‌لاتیێن مه‌ده‌نی بووینه قوربانی.
د وێ راپۆرتێ دا هاتیه هێزێن ئاسمانی یێن روسیا ب هێرشه‌كا دیاریكری بۆ ئارمانجه‌كا سه‌ربازی نه‌بوویه ئه‌ڤه ژی ب تاوانا شه‌ری دهێته دانان و ب هه‌ره‌مه‌كی باژێران توپ باران دكه‌ت.
هه‌ر وه‌سا د راپۆرتا نه‌ته‌وه‌یێن ئێكگرتی دا هاتیه كۆ ئه‌و گرۆپێن چه‌كدارێن ئوپوزسیونا سوریا ل ده‌ڤه‌رێن كوردی ب سه‌رپه‌رشتیا توركیا چه‌ندین كارێن نه مرۆڤانه ئه‌نجامداینه و بڤێ چه‌ندێ سوپایێ توركیا ژی تاوانباره ب تاوانێن شه‌ری.
ئەڤرۆ نیوز، زنار:
بریارە ئەڤ شەڤە هەردو یانێن چێلسی و لێڤەرپوول یاریەکا چارەنڤیسی ل یاریگەها ستامفورد برێج بکەن بۆ مسوگەرکرنا پلێتا قوناغا هەشتێ ژ قارەمانیا کاسا ئێکەتیا ئنگلیزی یا تەپا پێ.
ئەڤ یاریە دێ ل دەمژمێر ۱۱ و ٤٥ دقیقە شەڤ لدووڤ دەمێ هەرێما کوردستانێ هێتە کرن، سەرکەفتیێ ڤێ یاریێ دێ دەربازی قوناغا هەشتێ یا قارەمانیا ئێکەتیا ئنگلیزی بیت ئەڤ یاریە د دەمەکی دایە یانا لێڤەرپوول ل روژا شەمبیا بوری تووشی خوسارەتیەکا نەچاڤەرێ کری بوو لسەر دەستێ یانا واتفورد ب سێ گۆلان بێ بەرامبەر لێ ل دووڤ گۆتنا راهێنەرێ ڤێ یانێ یورگن کلوپ کو ئەو خوسارەتی چو کارتێکرنا خوە لسەر ئاست و دەرونێ یاریزانان یانا وی ناکەت بەلکو دێ ب هەموو هێز و شیانێن خوە ڤێ یاریێ کەن بۆ سەرکەفتنێ لسەر یانا چێلسی و دەربازبوون بۆ قوناغا هەشتێ ژ ڤێ قارەمانیێ.
ژ یاریێن دی یێن ئەڤرۆ:
وێست برومێچ دگەل نیوکاسل
رێدێنگ دگەل شیفیلد یونایتد
ئه‌ڤرۆ نیوز،عه‌لی حاجی :
ب ئاماده‌بونا رێڤه‌به‌را گشتی یا كاروبارێن شه‌هیدان و ئه‌نفالكریان ل پارێزگه‌ها دهۆكێ و قائیمقامێ زاخۆ، لێك گوهورین د پوستێ رێڤه‌به‌ریا كاروبارێن شه‌هید و ئه‌نفال كریان ل زاخۆ هاته ئه‌نجام دان .
ژیان موسته‌فا رێڤه‌به‌را گشتی یا شه‌هید و ئه‌نفال كریان ل پارێزگه‌ها دهۆكێ د داخویانیه‌كێ دا بۆ ئه‌ڤرۆ نیوز گۆت : ئه‌ڤ گوهورینه پشتی وێ یه‌كێ هات كو رێڤه‌به‌رێ به‌ریا نوكه هات بوو خانه‌نشیكرن و پوستێ ڤێ رێڤه‌به‌ریێ ل زاخۆ ب وه‌كاله‌ت دهاته ب رێڤه‌برن له‌ورا ئه‌ڤرۆ ئه‌حمه‌د خه‌مو وه‌كو رێڤه‌به‌رێ نوویێ ڤێ رێڤه‌به‌ریێ ل زاخۆ هاته ده‌ست نیشان كرن و هیڤی خازین ب شێت زێده‌تر خزمه‌تا كه‌س و كارێن شه‌هید و ئه‌نفالكریان و زیندانیێن سیاسی ل باژێرێ زاخۆ بكه‌ت و سوپاسیا رێڤه‌به‌رێن پێشتر دكه‌م كو ل دویڤ شیانان شیا بوون خزمه‌ته‌كا باش بكه‌ن.
ژلایێ خوه‌ڤه ئه‌حمه‌د خه‌مو رێڤه‌به‌رێ نوویێ رێڤه‌به‌ریا كاروبارێن شه‌هید و ئه‌نفالكریان ل زاخۆ گۆت : هێڤی خازم جهێ باوه‌ریا خه‌لكێ زاخۆ و لایه‌نێن په‌یوه‌ندیدار دابم و كو بشێم خزمه‌ته‌كا باش پێشكێشی كه‌س و كارێن شه‌هید و ئه‌نفالكری و زیندانیێن سیاسی بكه‌م و كارێ مه ژی دێ به‌رده‌وامی دان بیت ب رێڤه‌به‌رێن پێشتر و ئه‌وا د شیان دا بیت دێ ئه‌نجام ده‌ین .
ئەڤرۆ نیوز، نەوزاد هلۆری:
سەرۆکا باژێرڤانیا کۆرا دیارکر کۆ ئەوان بۆ خزمەتکرنا خەلک و دەڤەرا کۆرا پلانەک هەیە کو جادا 20م و پارکەک و هژمارەکا جاده‌یێن نافخوە دانایە و دخوازن کو بجهـ بکەن. رەمزیا بەرواری، سەرۆکا باژێرڤانیا کۆرا دیارکر کو کومەلگەها کۆرا ئێکە ژ کومەلگەهێن مەزن و پتری پێنج هزار و 600 کەس تێدا دژین و بۆ ئەڤرۆ نیوز گۆت: چەند سالێن بوری حوکمەتا هەرێما کوردستانێ هژمارەکا خزمەتگۆزاریێن باش بۆ کۆمەلگەها کۆرا دروست کرینە مینا چێکرنا جاده‌یا سەرەکی ب کوژمێ نێزیکێ ملیارەک و 699 ملیۆن دیناران ب درێژاهیا هزار و 660 مه‌تران، چێکرنا جاددێن گوندێ کۆرا یا کریستیانان کو هژمارەکا جادەیان بخوڤە دگرتن و هاتینە کونکرێتکرن، دیسان سەخبێرکرنا پارکێن بچوک ل گەل ب رێڤەچونا چوار هەوێن چاندنا داران ب مەرەما جوانکرنا سەر و سیمایێ باژێری و زێدەکرنا رێژا کەسکاتیێ، ئەڤە زێدەباری دروستکرنا چەندین پروژە و خزمەتگۆزاریێن دی.
زیدەتر گۆت: کۆرا مولکەکێ بەرفرەهـ هەیە، بەلێ هەتا نوکە نەهاتیە کوژاندن، هه‌كه ئەڤ یەک بهێتە ئێکلاکرن ل وی دەمی دێ کۆرا بەرفرەهـ تر بیت و رەنگە خزمەتگۆزاریێن باشتر ژی بو دەڤەرێ بهێنە چێکرن.
سەرۆکا باژێرڤانیا کۆرا د درێژاهیا ئاخفتنێن خودا دیارکر ژی کۆ ژبلی چێکرنا پرۆژێن خزمەتگۆزاری، هەڤدەم باژێرڤانیا کۆرا ئەرکێ ب رێڤەبرنا مامەلێن وەلاتیان و چاڤدێریکرنا پاڤژکرنا دەڤەرێ ب ستویێ خوڤە دگریت و د پلاندایە جاددە 20م یا کورا، چێکرنا پارکەکی و ئاڤاهیەکی بۆ باژێرڤانیا کۆرا، ل گەل چێکرنا کولانێن نافخوە یێن کۆرا بهێنە چێکرن، چاڤەرێ دکەین حوکمەتا هەرێما کوردستانێ بەرسڤا مە بدەت.
ئەڤرۆ نیوز:
ئاژانسا پاراستنا ژینگەها جیهانی، كو بارەگایێ وێ یێ سەرەكی ل ئەمریكایە، رێزبەندیا وان وەلاتان ئاشكرا كریە، یێن کو پیسترین ئاڤ و سەقا هەیە د جیهانێ دا، تێدا عێراق د رێزبەندیا دەهێ دا هاتیە.
وێ راپۆرتێ ئاماژە ب هندێ دایە، کو بەنگلادش پیسترین سەقا هەیە د جیهانێ دا، پشتی وێ پاكستان و مەنگۆلیا و ئەفغانستان دهێن.
د رێزبەندیا ڤێ ئاژانسێ دا ناڤێن پێنج وەلاتێن عەرەبی ل رۆژهەلاتا ناڤین دا هاتینە، كو سەقایەکێ پیس هەیە، ئەو ژی بەحرەین، سووریا، عێراق، ئیمارات و كوێتن.
ل سەر ئاستێ باژێرێن جیهانێ ژی، 21 باژێرێن هندستانێ ب پیسترین باژێرێن جیهانێ هاتینە دەست نیشان كرن.
ئەڤرۆ نیوز:
بەرپرسێن ساخلەمیێ ل واشنتۆن راگەهاند، ئەڤرۆ دوشەمبی 2-3-2020 سێ کەسێن دیتر ب ئەگەرێ کۆرۆنا یێ گیانێ خوە ژ دەستدان، ب ڤێ چەندێ هژمارا ئەو کەسێن هەتانوکە ل وێ ویلایەتێ گیانێ خوە ژ دەستداین گەهشتە شەش کەسان.
د کۆنگرەکێ رۆژنامەڤانیدا، بەرپرسێن ساخلەمیا هەرێما کینگ ل واشنتۆنێ ل ئەمریکا راگەهاند، ئەو سێ کەسێن گیانێن خوە ژ دەستداین، دو ژ وان تازە تووشی وی ڤایرۆسی ببوون و ئەوێن دیتر ژی پێشتر تووش ببوون.
نيشاندان