ئەڤرۆ نیوز:
بەری دەمەکێ بارەگایێ بارزانی داخۆیانیەک سەبارەت ب هەلویستێ سەرۆک مەسعود بارزانی ل دۆر کابینا نوو یا محەمەد توفیق عەللاوی بەلاڤ کر و د داخۆیانیێ دا هاتیە دیار کرن کو سەرۆک بارزانی تێبینی ل سەر شێوەیێ دانانا وەزیران ژ ئالیێ عەللاوی و ئالیەتا دیار کرنا کەسان بۆ پوستێ وەزیران هەیە، چونکو د وان ئالیەتان دا ماف و داخوازیێن پێکهاتان هاتیە پشتگوه خستن و هەروەسا تایبەتمەندیا هەرێما کوردستانێ ژی بەرچاڤ نەهاتیە وەرگرتن.
ئەڤرۆ نیوز، عەلی حاجی:
بەرپرسێ راگەهدنا ساخلەمیا زاخۆ د داخویانیەکێ دا بۆ ئەڤرۆ نیوز دیار کر پشتی هند ژ کەنال و سایتان ژ زاردەڤێ رێڤەبەریا ساخلەمیا زاخۆ نووچەیێ ب گومان کەڤتنا سێ کەسان ل زاخۆ ب ڤایروسێ کورونا بەلاڤ کرین، رەت دکەین.
زێدەتر ئەمیر عەلی گوت: (پشتی هندەک ژ کەنال و سایتان بناڤێ رێڤەبەریا ساخلەمیا زاخۆ نوچەیێ ب گومان کەڤتنا سێ کەسان ب ڤایروسێ کورونا ژ زار دەڤێ مە بەلاڤ کری ب هەمی رەنگان ئەم وی نوچەیی رەت دکەین و ب چو رەنگان ئەو لێدوان مە نەداینە چو دەزگەهێن راگەهاندنێ،هەر دیسان د سوشیال مێدیایێ دا دەنگ وباسەک بەلاڤ بوو کو کچەک ژ ئەگەرێ ڤایروسێ کورونا بێ هوش بوو ئەم ڤی نوچەی رەت دکەین بتنێ قوتابیا زانکویا زاخۆ بێ هوش بوو بێ هیچ نەخوەشیەکا گرێدای ڤایروسێ کورونا بیت و نوکە دا رەوشا وێ قوتابیێ گەلەک یا باشە لەورا مە دڤێت دیار بکەین هەتا نوکە ل باژێرێ زاخۆ چو گومانەک یان ژی توش بون ب نەخوەشیا ڤایروسێ کورونایێ نەهاتینە تومار کرن هەر دەما تشتەک ب ڤی رەنگی هەبیت دێ ب شێوەیەکێ فەرمی هێتە راگەهاندن و پێدڤی ناکەت وەلاتیێن مە هەست ب ترسێ بکەن و ئەوا دهێتە کرن بتنی رێکارێن خوە پاراستنێ نە).
ئەڤرۆ نیوز:
حوکمەتا ئیرانێ راگەهاند کو هەتا نها ١٣٩ کەس ل ئیرانێ تووسی ڤایرۆسا کۆرۆنایێ بووینە و ١٩ کەسان جانێ خوە ژ دەست داینە.
ئەو یەک د دەمەکێ دایە کو ل ئیرانێ چەندین بەرپرس ژی تووشی ڤایرۆسا کۆرۆنا بووینە، دوهی ژی ئەندامەکێ پەرلەمانێ ئیرانێ راگەهاند کو تووشی کۆرۆنایێ بوویە و گۆت: (گەلەک ئەندامێن پەرلەمانێ ئیرانێ تووشی ڤایرۆسا کۆرۆنا بووینە لێ ئەو یەک نەهاتیە ئاشکرا کرن).
ئەڤرۆ نیۆز، قائید میرۆ:
پشتی نیڤرۆیا ئەڤرۆ چوار شەمبیێ ل ناحیا سیدەکان یا سەر ب قەزا سۆرانڤە شەڕ و پێکدانێن دژوار دناڤبەرا چەکدارێن پەکەکێ و سەربازێن تورکیا بڕێڤەچوو سنێلەک ژی بریندار بوو.
ژێدەرەکی ل قەزا سۆران بۆ ئەڤرۆ نیۆز دیارکر” دەمژمێژ ئێکی نیڤرۆیا ئەڤرۆ چەکدارێن پەکەکێ ل نێزیک گوندێ دایلان یێ سەر ب ناحیا سیدەکان ھێرشی کریە سەر بنگەھەکێ سوپایێ تورکیا و دوڤدا شەڕ و پێکدانێن دوژار دناڤبەرا چەکدارێن پەکەکێ و سەربازێن سوپایێ تورکیا بڕێڤەچوو، کو ئەنجامدا سنێلەک بناڤێ شێروان سەلاح تەمەن ١١ سال بریدار بوویە.
ژێدەری ئاماژەکر” سنێلێ بریندار ھاتیە رەوانەکرن بۆ نەخۆشخانا ئاشتی ل قەزا سۆران و نوکە بن چاڤدێریا نۆشدارانە بۆ چارەسەرکرنێ، بەلێ زیانێن پەکەکێ و تورکیا ھێشتا دیار نینە.
ئەڤی ژێدەری گۆتژی” زێدەتری ١٠٠ گوندێن سەر ب ناحیا سیدەکان ب ئەگەرێ ھەبوونا بنکە و بارەگایێن پەکەکە و بوردۆمانێن سەر سینوری نەھاتینە ئاڤاکرن و بەردەوام ژلایێ تورکیا و ئیرانێ ڤە دھێتە بوردۆمانکرن و تۆپبارانکرن.
ئەڤرۆ نیوز:
ئەنجوومەنێ نشتیمانی یێ کوردی ل سووریێ ل باژێرێ قامشلۆ یێ رۆژئاڤایێ کوردستانێ ل گەل شاندەکێ ئەمریکی کۆمبوو.
شاندێ ئەمریکا ژ نوونەرێ ئەمریکا و جێگرێ وی یێ د هەڤپەیمانیا نێڤدوەلەتی یا شەرێ ل دژی داعشێ پێک دهات، د کۆمبوونێ دا بەحسێ رەوشا سووریێ و رۆژئاڤایێ کوردستانێ هاتە کرن و شاندێ ئەمریکا راگەهاند کو پێدڤیە ب رێیا دستوورەکێ نوو مافێن کوردان و هەموو نەتەوێن دی ل سووریێ بهێتە پاراستن.
ئەڤرۆ نیوز:
فەرسەت سۆفی پارێزگارێ هەولێرێ راگەهاند کو د چارچۆڤێ کۆمبوونا دوهی یا ئەنجوومەنێ وەزیران دا وان بریار داینە کو بۆ پاراستنا گشتی یا وەلاتیان ئەڤسالە ئاهەنگێن نەوروزێ بهێنە راگرتن.
ناڤهاتی راگەهاند ژی کو هەتا نها چو حالەتێن کۆرۆنا ل هەولێرێ نەهاتینە تۆمارکرن و هەموو بەرهەڤی ژی بۆ هەر حالەتەکێ هاتینە کرن. پارێزگارێ هەولێرێ هۆشداری ژی دا بازرگانان و دیار کر هەر کەسەک کەلوپەلان گران بکەت دێ ب توندی هێتە سزادان.
نيشاندان