ئەڤرۆ نیوز:
وەزیرێ بەرگریا توركیا راگەهاند، مە پێنج ھێلیكۆپتەر و ب دەهان تانك و زرێپۆشێن سوپایێ سووریێ تێكشكاندینە.
خولۆسی ئاكار، وه‌زیرێ به‌رگریا توركیا راگەهاند، پشتی ھێرشا دوهی بۆ سەر ھێزێن مە ل ئدلب، مە پتری 2 ھزار ئارمانجێن سووریێ پێكاینە و پێنج ھێلیكۆپتەر و ب دەهان تانك و زرێپۆشێن سوپایێ سووریێ تێكشكاندینە.
لگورەی میدیایێن رووسیا، وەلاتێ وان دو کەشتی یێن شەری یێن هەلگرێ مووشەکێن کالیبر ل دەریا رەشڤە رەوانەی کەنارێن سووریێ کرینە.
ئەڤرۆ نیوز:
پشتی سەرۆکێ وەلاتێ مەنگولیا ژ ولاتێ چینێ ڤەگەریای وەک ئێکەم سەرۆک وەلات ئێخستیە دبن چاڤدێریا ساخلەمیێ ب گومانا توشبوونێ ب ڤایرۆسێ کۆرۆنا.
ئاژانسا نووچەیێن مەنگولیا بەلاڤکریە، خالتما باتولغا، سەرۆکێ مەنگولیا پشتى رۆژەکێ ژ سەرەدانا خوە یا ل وەلاتێ چینێ و هەڤدیتن ل گەل سەرۆکێ وى ولاتی، ل گەل شاندێ ل گەل دا ئێخستنە دبن چاڤدێریا نۆشداران دا بۆ پشتراستبوون و بزانن توشبوویە یان نە.
ئەڤرۆ نیوز:
پشتى ڤەکرنا سنورێن خوە یێن هشکاتى و ئاڤی ل هەمبەری کۆچبەران بۆ ئورۆپا، ئەڤرۆ ب هزاران کوچبەر ژ وێ رێکێ بەرەڤ یونان برێکەفتینە کو پشکەک ژ وان ژى عێراقی نە.
لگوری میدیایێن تورکیا ب هزاران کوچبەرێن کو ژن و زارۆک ژى د ناڤ دانە ل نیڤ شەڤێ بەرەڤ پارێزگەها ئەدێرنە و چەند جهێن دی ب پیان ئەو ب کەلوپەلێن خۆ ڤە بەرەڤ یونانێ برێکەفتینە.
دایە دیار کرن ژى، چەند کوچبەرێن دی ژى ل سنورێن هشکاتی یێن ئیدرنە بۆ یۆنان و بەرئاڤێن چانەکالی و ئیزمیر بۆ کوچبەران بەرهەڤکرینە.
ئەڤرۆ نیوز:
رێڤەبەریا گشتی یا سەقاناسی و ئەردهەژان ل هەرێما کوردستانێ پێشبینیێن سەقای بەلاڤکرن و راگەهاند، لگورەی پێشبینیان ئەڤرۆ ئەسمان دێ د ناڤبەرا نیڤ عەور و عەورێن تەمام دا بیت، سوبەهی دێ ئەسمان عەور بیت ل گەل باران بارینێ ل دەڤەرێ جۆدا و ئێڤاری ژى دێ بارانەکا ب هێز باریت ل گەل هەبوونا بریسیان.
لگۆرەی پێشبینیێن سەقاناسیێ، ئەڤرۆ بلندترین پلا گەرمێ ل هەولێر ١٧ پلە و نزمترین پلە ژى ٨ پلە دبیت، هەروەسا ل سلێمانیێ ١٦ ب ٧ پلە ، دهۆک ١٧ ب ٧ پلە دبیت، کەرکوک ١٩ ب ١٠ پلە دبیت.
هەڤدەم سەقاناسیا هەرێمێ دازانین، سوبەهی بلندترین پلەیا گەرمێ ل هەولێر ١٧ پلە ب ٧ پلە دبیت، هەروەسا ل سلێمانیێ ١٧ پلە ب ٨ پلە دبیت، دهۆک ١٥ ب ٧ پلە و کەرکوک ژی ١٨ ب ٩ پلە دبیت.
ئەڤرۆ نیوز ، زنار تۆڤی:
دەرهێنەرێ کورد عەدنان ئۆسمان شاناز، بۆ ئەڤرۆ نیوز دیار کر: کو ئەڤ سالە گەرا پێنجێ یا فیستەڤالا سینەمایی یا دژە تیرۆرێ ل هەولێرێ ل 25 شواتا 2020 هاتە گێران و بۆ دەمێ چار رۆژان یا بەردەوام بوو، پشتی فیستەڤال ب دووماهی هاتی خەلات ل سەر فلمێن سەرکەفتی هاتنە دابەش کرن.
ناڤهاتی گۆت ژی: د ڤێ فیستەڤالێ دا وی خەلاتێ باشترین دەرهێنان ل گەرا پێنجێ یا ڤیستەڤالا سینەمایی یا دژی تیرۆرێ ل هەولێرێ، د کورتە فلمێ بەفرا گەرم دا وەرگرت، کو سێ ئەکتەرێن سەرەکی پشکداری دڤی فلمی دا کریە و 30 خۆلەکان یێ درێژە و ئەڤ فلمە ل هەولێرێ و چۆمان و حاجی ئۆمەران هاتیە وێنەکرن.
هەروەسا گۆت ژی: ناڤەرۆکا ڤی فلمی بەحسێ هونەرمەندەکێ شێوەکار دکەت کو چاوا بۆ رزگار کرنا خوە و خێزانا خوە و کەڤالێن خوە، رێیەکا سەخت و پر ئێش و ئازار هەلدبژێریت، پشتی کو بۆ روون دبیت ل ناڤ باژێری و ل ژێر حوکومرانیا داعشێ هونەری چ بهایێ خوە نینە.
ئەڤرۆ نیوز، مەحمود نهێلی
لژنا دووڤچوونا بازاری ل دێرەلۆکێ دەست ب سەر رێژیەکا دەرمانێ ئامانێن شوشتنێ دا گرتن کو یێن بێ ناڤ و نیشان بوون و فرۆشیارێ وێ هاتە رەوانەکرن بۆ دادگەهێ.
سامی ئوشانە رێڤەبەرێ ناحیا دێرەلۆک بۆ ئەڤرۆ نیوز دیار کر، لژنا دووڤچوونا بازاری ل دێرەلۆکێ دەست ب سەر پتر ۷۰ لیترێن دەرمانێ ئامان شوشتنێ دا گرتن کو ژلایێ کەسەکی ڤە ل سەر قەلابەکێ دفروتن و گۆت: پشتی لژنا بازاری سەرا وێ قەلابێ دای دیار بوویە ئەڤ دەرمانێ ئەو دفرۆشیت یێ بێ ناڤو نیشان و بێ ماوێ ب سەرڤەچونێ یە کو پتر ژ ۲۰ دانێن ٤ لیتری بوون، دەست ب سەر دا هاتنە گرتن و خودانێ وێ ژی بۆ دادگەهێ هاتە شاندن.
ناڤهاتی دیار ژی کر، کو هەردڤێ هەوێ دادەست ب سەر هەژمارەکا کەرەستەیێن ماوە ب سەرچوڤە دناڤ بازارێ دێرەلۆک دا هاتنە گرتن و هندەک ژلایێ خودانێن مارکێتان ڤە رادەستی لژنا ناڤهاتی ڤە هاتنە کرن.
ئەڤرۆ نیوز:
پارێزگارێ هاتای راگه‌هاند، ل ئدلب نەهـ سه‌ربازێن سوپایێ توركیا هاتینە كوشتن و هژماره‌کا سه‌ربازان بریندار بووینە.
ره‌حمی دۆغان پارێزگارێ هاتای راگەهاندیە، ژ ئه‌نجامێ هێرشەکا ئەسمانی یا سوپایێ سووریێ بۆ سه‌ر هێزێن سوپایێ توركیا ل ئدلبێ، نەهـ سه‌رباز هاتینە كوشتن و هژماره‌‌كا سه‌ربازان ژی برینداربووینە، هژمارەکا سه‌ربازهێن بریندار دۆخێ وان یێ ساخلەمیێ نەیێ جێگیره.
ئەڤرۆ نیوز:
ل مزگه‌فتێن تەهرانێ و چه‌ند باژێرێن دیتر نڤێژا ئەینیێ ناهێتە كرن.
وەسا بریارە ئەڤرۆ ل مزگه‌فتێن تەهرانێ و هژماره‌کا باژێرێن دیتر مه‌راسیمێن نڤێژا ئه‌ینیێ نەهێنە ئه‌نجام دان.
وه‌زاره‌تا ساخلەمیا ئیرانێ د به‌یاننامه‌کێدا راگه‌هاند، کو بۆ ئێک ئەینی نڤێژ و گوتارا ئەینیێ ل وان باژێرێن کو ئالودە بووین ب ڤایرۆسێ کۆرۆنا ناهێتە پێشکێش کرن.
ئه‌ڤرۆ نیوز، بارزان مزوورى:
عوده‌ى عه‌بادى، رێڤه‌به‌رێ فیتێرنه‌ریا پارێزگه‌ها نه‌ینه‌وا بۆ ئه‌ڤرۆ نیوز گۆت: ل مه‌غره‌بیا رۆژا چارشه‌مبى 26/2/2020 كه‌سه‌كێ نه‌نیاس ترۆمبێله‌كا بارهه‌لگر یا ماسێن مرى به‌رلێڤێن رۆبارێ دیجله ل نێزیك پرا چارێ یێن به‌لاڤكرین مه‌ترسیا ژناڤ چوونا هزاره‌ها ماسیان یا كرى ئه‌وێن دناڤ روبارێ دیجله‌ی دا.
ناڤهاتى خۆیاكر پشکا سامانێن ماسیان ل رێڤه‌به‌ریا مه ل گه‌ل هێزێن ئه‌منى سه‌ره‌دانا وى جهى یاكرى پشكنین بۆ وان ماسیان یا ئه‌نجام داى ژبه‌ر گوماها ژه‌هراوى بونا وان ماسیان.
ناڤهاتى گۆت: بریارا ده‌سته‌سه‌ركرنێ بۆ وان کەسان دەرکەفتیە و هێزێن ئه‌منى یێ لدووڤ وان كه‌سا دگه‌رێن بۆ ده‌سته‌سه‌ركرنا وان ژبه‌ركو وان كه‌سا ژیانا هزاره‌ها ماسیان ئێخستیه مه‌ترسیێ دا.
نيشاندان