ئەڤرۆ نیوز، نەوزاد هلۆری:
هه‌رده‌ما به‌فر بارى و دوڤدا ئاسمان بویه ساهى، هه‌موو جادده‌یێن ده‌ڤه‌را ئامێدیێ و دینارته و کانی ماسێ و زاویتە و سەرسنکێ و دەڤەرێن دی دبنه به‌ستى، ب ب خوێ نه‌بیت رێ ناهێنه ڤه‌كرن.
سه‌رجون خوشابا، سه‌رۆكێ باژێرڤانیا سه‌رسنكێ دیاركر كو پرانیا رێیێن سه‌رسنكێ ژ ئه‌گه‌رێ به‌ستیبوونێ هاتینه گرتن و بۆ ئەڤرۆ نیوز گۆت: (ب مه‌ره‌ما ڤه‌كرنا رێیا و نه‌هێلانا ئاسته‌نگان هه‌مبه‌رى شوفێران ب تایبه‌تى ل سه‌نته‌رێ باژێرى، باژێرڤانیا سه‌رسنكێ ژ شه‌ڤا بورى هه‌تا ئێڤارى ل سه‌ر ڤه‌كرنا رێیا به‌رده‌وامه و پرانیا رێیا ب خوێ هاتینه ڤه‌كرن، به‌لێ هێشتا ژى هنده‌ك ماینه، ئه‌گه‌ر ب خوێ نه‌بیت رێ ژ به‌ر به‌ستیبوونێ ناهێنه ڤه‌كرن).
فوئاد میكائیل، سه‌رۆكێ باژێرڤانیا دینارته دیاركر كو چیایێ پیرس ژى ب تمامى بویه به‌ستى بۆ ئەڤرۆ نیوز گۆت: (هه‌ر چه‌نده تیمێن مه پشكه‌ك ژ رێیێن سنورێ دینارتێ ڤه‌كرینه ب تایبه‌تى یێن سه‌نته‌رێ دینارتێ، به‌لێ رێیا سه‌ره‌كى یا چیایێ پیرس ب تمامى بویه به‌ستى و هاتن و چوون نینه، له‌وا داخوازێ ل وه‌لاتیان و شوفێران دكه‌ین هه‌تا كو به‌ستى نه حه‌لیێت قه‌ستا پیرس نه‌كه‌ن، مه وه‌كو باژێرڤانى ده‌ست ب ره‌شاندنا خوێ كریه ب تایبه‌تى ل لوفێن زه‌حمه‌ت و سیبه‌ر ژبه‌ر هه‌تا ئێڤارى به‌ستى دمینیت).
كامیران محه‌مه‌د سه‌رۆكێ باژێرڤانیا كانى ماسێ بۆ ئەڤرۆ نیوز گۆت: (شه‌ڤا بورى پێله‌كا بهێز یا به‌فرێ ده‌ڤه‌را به‌روارى بالا و كانى ماسێ بخوڤه گرت و هه‌موو رێیێن هاتن و چوونێ هاتنه گرتن، تیمێن مه هه‌موو ئه‌و رێیێن دكه‌ڤنه سه‌نته‌رێ باژێرى ل گه‌ل هنده‌ك رێیین ده‌وروبه‌ر پێخه‌مه‌ت خوشكرنا رێیا و نه‌هێلانا ئاسته‌نگا هاتن و چوونێ ژ به‌فرێ پاقژكرن، به‌لێ ل هنده‌ك جادده‌یان به‌ستى دروست بوویه و پێدڤى یه شوفێر زور هوشیارێ خوه بن).
رەمەزان سالح، سەرۆکێ باژێرڤانیا زاویتە بۆ ئەڤرۆ نیوز گۆت: (ئەڤرۆ مە رێیێن زاویتە ب خوێ ڤەکرن، چونکی هەموو ببویە بەستی، ب تایبەتی رێیا گەلیێ زاویتە کو جهەکێ گەشتوگۆزاری یە).
هه‌ر ئێك ژ باژێرڤانیێن ئامێدیێ، چه‌مانكێ، بامه‌ڕنێ و دێره‌لووكێ ژى ل سنوورێ باژێرڤانیێن خوه جادده ژ به‌فرێ پاقژكرینه.
ئەڤرۆ نیوز:
سەرۆک مەسعود بارزانی پێشوازی ل محەمەد عەلی ئەلحەکیم وەزیرێ دەرڤە یێ عیراقێ کر و د روونشتنەکێ دا بەحسێ رەوشا عیراقێ و ئالۆزیێن ڤێ دووماهیێ و داخوازیێن خوەنیشادەران هاتە کرن.
هەر د کۆمبوونێ دا بەحسێ چاوانیا چارەسەرکرنا ئالۆزیێن نها ل عیراقێ ژی هاتە کرن و هاتە دیار کرن کو دڤێت مافێن هەموو پێکهاتێن ل عیراقێ بهێنە پاراستن و مەترسی ل سەر وان دروست نەبن.
بابەتێ شەرێ ل دژی داعشێ و مەترسیا هزرێن توندرەوی ژی تەوەرەکا دی یا دیدارا سەرۆک بارزانی ل گەل وەزیرێ دەرڤە یێ عیراقێ بوو.
ئه‌ڤرۆ نیوز:
پشتی هه‌شت سالان ژ ده‌ستدانێ، سوپایێ سوریا رێكا نێڤ ده‌وله‌تی یا دناڤبه‌را حه‌له‌ب و دیمه‌شقێ كۆنترۆلكره‌ڤه.
ئاژانسا رویته‌رز به‌لاڤكر، هێزێن سوپایێ سوریا ریكا نێڤ ده‌وله‌تی یا دناڤبه‌را حه‌له‌ب و دیمه‌شقێ ب ته‌مامی كونترۆلكره‌ڤه كۆ ب رێكا ئیم5 یا ناڤداره، ئه‌ڤه‌ژی بۆ جارا ئێكێ یه پشتی هه‌شت سالان سوپایێ سوریا ڤه‌گه‌ریته ئه‌وان ده‌ڤه‌رێن كۆ ل سالا 2012 ژ ده‌ست داین.
لگۆری ژێده‌رێن نوچه‌یێن سوریا، سوپایێ سوریا كونترۆلا دوماهی پرا دناڤبه‌را رێكا سه‌ره‌كی ڤه‌كر ل باشووری رۆژئاڤایی حه‌له‌بێ و ئالایێ سوریا تێدا هاتیه بلندكرن.
به‌ری چه‌ند رۆژێن بوری، سوپایێ سوریا ژماره‌یه‌كا گۆند و باژێركێن دناڤبه‌را پاریزگه‌ها ئیدلبێ و حه‌له‌بێ كونترۆلكرنه‌ڤه و چه‌كدارێن گرۆپێن توندره‌وێن به‌ره‌یێ رزگاریێ شامێ ل وێ ده‌ڤه‌ری هاتنه ده‌رخستن.
ئه‌ڤرۆ نیوز:
مه‌سرور بارزانی سه‌رۆكێ حوكمه‌تا هه‌رێما كوردستانێ و وه‌زیرێ ده‌رڤه‌یێ عیراقی كۆمبوون و سه‌رۆكێ حوكمه‌تێ راگه‌هاند: پشته‌ڤانیێ ل حوكمه‌ته‌كێ دكه‌ین كۆ پێگیر بیت ب مافێن دستوری یێن هه‌رێما كوردستانێ.
لگۆری راگه‌هاندنا نڤیسینگه‌ها سه‌رۆكێ حوكمه‌تا هه‌رێما كوردستانێ، ئه‌ڤرۆ مه‌سرور بارزانی سه‌رۆكێ حوكمه‌تا هه‌رێما كوردستانێ پێشوازی ل محه‌مه‌د عه‌لی وه‌زیرێ ده‌رڤه‌یێ عیراقی كر و د دیداره‌كێ دا دانوستاندن ده‌رباره‌یێ دوماهی پێشهاتێن عیراقی و ده‌ڤه‌رێ كرن.
د وێ راگه‌هاندنێ دا ئاماژه ب وێ چه‌ندێ ژی هاته‌كرن، كۆ ل كۆمبوونێ دا ته‌ئكید ل گرنگیا سه‌قامگیریا ره‌وشا عیراقی و پێك ئینانا حوكمه‌ته‌كا گشتگیر هاته‌كرن، كۆ جهێ ره‌زامه‌ندیا زۆرینه‌یا خه‌لكێ عیراقێ بیت و په‌یوه‌ندیه‌كا باش ل گه‌ل هه‌رێمێ و وه‌لاتێن هه‌ڤسی و جڤاكێ نێڤ ده‌وله‌تی هه‌بیت.
ئەڤرۆ ،رەمەزان هەرنی:
هەمو دەڤەرێن كوردستانێ تژی بەرهەمێ سروشتی نە بەلێ هەتا نوكە چ مفا ژێ نەهاتیە وەرگرتن، ژبلی مادەیێ نەفتێ و دشیاندایە ژبلی نەفتێ مفا ژ بەرهەمێ بەری و ئاسنی بهێتە وەرگرتن.
شێرزاد مەحمود بسپۆرێ مادێن سروشتی ل كوردستانێ بۆ ئەڤرۆ دیاركر: كوردستان یا دەولەمەندە ب مادەیێن سروشتی بەلێ چ گرنگی پێ نەهاتیە دان، سالانە زێدەتر ژ ئێك ملیار دۆلار بۆ مادەیێن وەك ئاسنی و حەلانی دچیتە دەرڤەی كوردستانێ، ئەگەر گرنگی ب بەرهەمێ نافخویی سروشتی بهێتە دان دێ مفایەكێ مەزن ژێ بینین بۆ كوردستانێ ، پێدڤیە حوكمەت ب رێكا شەهرەزایێن بوارێ مادێن خاڤ هژمارەكا كۆمپانیا دابمەزرینیت مفای ژ بەرهەمێ نافخوە بینیت .
گۆتژی: هەرێما كوردستانێ دشیاندایە چەندین كارگەهـ و كۆمپانیا بهێنە دامەرزاندن دێ مفایێ وێ راستەو خو بۆ حوكمەتێ و وه‌لاتی ل سەر كاركەن و حوكمەت ل دەرڤە هاوردە ناكەت ، پێدڤیە حوكمەت و كەرتی َتایبەت ژبلی كەرتێ سامانێن سروشتی گرنگیێ ب كەرتێ پیشەسازیێ بدەت تایبەت مادێ ئاسنێ و بەری ژبەركو رێژەكا باش ل كوردستانێ هەیە.
نيشاندان