ئەڤرۆ نیوز ، زنار تۆڤی:

موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن: ئەڤ شەڤە د روودانەکا ترافیکێ دا ژنەکێ گیانێ خوە ژ دەست دا.

ناڤهاتی زێدەتر دیار کر: ئەڤرۆ سێشەمبی 2020/1/14 ل دەمـژمـێر (7:10) خولەکی شەڤ ل سەر جادا زاخۆ بۆ ناحیا باتیفا و ل نێزیکی گوندێ دار هوزانێ دو ترۆمبێلا لێکدا، کو ترۆمبێلەک ژ وان تۆیۆتا کرۆلا تایبەت بوویە ل گەل ترۆمبێلەکا بارهەلگر تۆیۆتا پیک ئاب، د ئەنجامدا ژنەکێ گیانێ خوە ژ دەست دا و سێ کەسێن دیتر بریندار بووینە و هەروەسا زیانێن مـادى یێن مەزن گەهشتینە وان ترۆمبێلان.

ئەڤرۆ نیوز، مەحمود نهێلی:

ئەڤ شەڤە فرۆکێن سۆپایێ تورکیا گوندێ سگێرێ یێن سەر ب قەزا ئامێدیێ ڤە بوردومان کر.

ماموستا نزار محەمەد هەلبژێرێ گوندێ سەرگەلی بۆ ئەڤرۆ نیوز دیار کر، کو، ئەو بوردومان دەوروبەرێن دەمژمێر حەفتێ ئەڤ شەڤە بوو، فروکان چەندین جاران گوندێ سگێرێ یێن نێزیک ژ گوندێ وان توپ بارانکر و ژ بەر دەنگێ تەقینێن دوژوار ترس ودو دلی ئێخستیە دلێ خەلکێ گوندی تایبەت زارۆ و ژنان.

ناڤهاتی دیار ژی کر، ژ بەر کو گوندێ سگێرێ یێ کەڤن یێ چولە سوپاس بۆ خودێ چ زیانێن گیانی ل پەی ڤێ بوردومانێ نەبووینە.

دهێتە زانین دورێن ۱۰۰ مالان ل گوندێ سەرگەلی یێن گرێدایی ناحیا دێرەلۆک ، قەزا ئامێدیێ ئاکنجینە و هەیاما پێنج سالایە بەردەوام دەردورێن ڤی گوندی و چەندین گوندێن دی یێن دەڤەرێ ب بهانەیا هەبوونا چەکدارێن پەکەکێ بوردومان دکەت بڤێ یەکێ ژی زیانێن زۆڕێن مالی گەهاندینە ئاکنجیێن ڤان گوندان و زۆر جاران ژی بوردومانا فرۆکەیێن تورکیا بوویە ئەگەرێ گیان ژدەستدانا وەلاتیان ل دەڤەرا ئامێدیێ.