ئەڤرۆ نیوز:
دەزگەهێن راگەهاندنا ئورۆپا دیار دکەن کو ئەمریکا دڤێت هندەک داخوازیێن تورکیا ل دۆر دەڤەرا ئارام ل باکورێ سووریێ قەبوول بکەت دا نەهێلیت تورکیا هێرشی باکورێ سووریێ بکەت، چونکو ئۆپەراسیۆنا تورکیا دێ ئاریشێن مەزن بۆ ستراتیژیا ئەمریکا ل سووریێ دروست کەت.
ل ئالیێ دی دەزگەهێن راگەهاندنا تورکیا ژی دیار دکەن هەکە چو تشتەکێ نەچاڤەرێ کری روو نەدەت دێ تورکیا هەتا دو رۆژێن دی هێرشی باکورێ سووریێ کەت.
ئه‌ڤرۆ نيوز، نيوار محه‌مه‌د سه‌ليم:
ئه‌ڤرۆ رۆژا ئێكشه‌مبى رێكه‌فتى 6ى چريا ئێكێ 2019 لژنا باژێرڤانى و خزمه‌تگۆزاريێن گشتى و گه‌شتوگۆزا جڤاتا پارێزگه‌ها دهۆكێ ل گه‌ل هه‌رسێ رێڤه‌به‌ريێن (خوپاراستنا ساخله‌ميێ، ئاڤا دهۆكێ و ژينگه‌هێ) كۆمبوو، ب مه‌ره‌ما دووڤچوونێن به‌رده‌وام ل سه‌ر ئاريشا ئاڤێ ل پارێزگه‌ها دهۆكێ.
د كۆمبوونێ دا، ئه‌ندازيار فارس حاجى ژ رێڤه‌به‌ريا ئاڤا دهۆكێ بۆ ئه‌ڤرۆ نيوز دياركر كو كارمه‌ندێن وان بۆ سه‌ر كارى د كێمن، گه‌له‌ك خانه‌نشين بووينه و كه‌سێ دى ل جهێ وان نه‌هاتيه دامه‌زراندن و گۆتژى: “ب گۆره‌يى رێنمايان پێدڤيه 20% ژ پارێ بۆ ئاڤێ ژ وه‌لاتيان دهێته وه‌رگرتن بۆ چاره‌كرنا كێشێن ئاڤێ يێن رێڤه‌به‌ريێ بيت، به‌لێ د راستى دا، ئه‌و پاره ناگه‌هيته مه و ئاريشێن مه ژى هه‌ر د هه‌لاويستى نه”.
كه‌ريم چه‌مانكى، سه‌رۆكێ لژنا باژێرڤانى و خزمه‌تگۆزاريێن گشتى و گه‌شتوگۆزار ل جڤاتا پارێزگه‌ها دهۆكێ راگه‌هاند كو ب ئاماده‌بوونا سكرتێرێ جڤاتێ و هه‌رسێ رێڤه‌به‌ريێن (خوپاراستنا ساخله‌ميێ، ئاڤا دهۆكێ و ژينگه‌هێ) كۆمبوونه‌كا به‌رفرهـ ل سه‌ر ره‌وشا ئاڤێ ل پارێزگه‌ها دهۆكێ هاته كرن.
سه‌رۆكێ لژنا باژێرڤانى و خزمه‌تگۆزاريێن گشتى و گه‌شتوگۆزار ل جڤاتا پارێزگه‌ها دهۆكێ زێده‌تر گۆت: “دياربوو كو هێشتا كێشه نه‌هاتيه چارسه‌ركرن و ژ دو روويان ڤه يا مايه هه‌لاويستى؛ ماددێن پاقژكرنا ئاڤێ وه‌كو پێدڤى ل به‌ر ده‌ست نينن و ستافێ كارى ژى وه‌كو پێدڤى نينه، ژ لايه‌كێ دى ڤه پشته‌ڤانيا ماددى يا ڤى پرۆژه‌يى ناهێته كرن”.
كه‌ريم چه‌مانكى ئاشكه‌را ژى كر كو بزاڤێن وان وه‌كو لژنا باژێرڤانى و خزمه‌تگۆزاريێن گشتى و گه‌شتوگۆزار ل جڤاتا پارێزگه‌ها دهۆكێ جڤاتا پارێزگه‌ها دهۆكێ دێ د به‌رده‌وام بن هه‌تا كێشا ئاڤێ ب ته‌مامى دهێته چاره‌كرن.
ئه‌ڤرۆ نیوز، نه‌وزاد هلۆری:
ل گوندێ بازێ یا سه‌ر ب ده‌ڤه‌را به‌رواری بالا دوكانه‌ك هه‌یه، به‌رهه‌مێ هه‌موو گوندێن به‌رواری بالا ل وێ دوكانێ دهێنه فروتن، موختارێ ئه‌وی گوندی ژی دیاركر كو ئه‌گه‌ر حوكمه‌ت گرنگیێ ب گوندان بده‌ت دێ دوكان و بازارێن زێده‌تر هێنه‌دانان.
حسێن سه‌عید بازی جوتیار و موختارێ گوندێ بازێ بۆ ئه‌ڤرۆ نیوز گۆت: (ل هه‌موو گوندێن ده‌ڤه‌را به‌رواری بالا چاندن و ده‌رامه‌ت و فێقی هه‌یه، به‌لێ ئاریشا سه‌ره‌كی یا هه‌موو گوندان ژی ئه‌وه كو دوكان و بازار نینن بۆ فرۆتنا به‌رهه‌مێ وان، پشكه‌ك ژ جوتیاران به‌رهه‌مێن خوه بو باژێرا دبه‌ن و پشكه‌كا دن ژی ل بازارێ گوندێ بازێ دفروشن كو ئه‌و ژی تنێ دوكانه‌كه، ئانكو ل هه‌موو ده‌ڤه‌را به‌رواری بالا ب تنێ دوكانه‌ك هه‌یه بۆ فرۆتنا ده‌رامه‌ت و فێقیێ جوتیاران، ئه‌و ژی دكه‌ڤیته گوندێ بازێ و خه‌لك ل هه‌موو گوندان به‌رهه‌مێن خوه دئینن وی بازاری و دفروشن).
زێده‌تر گۆت: (نوكه به‌رهه‌مێ گوندێن ده‌ڤه‌رێ گه‌هشتیه وه‌كو تری، هژیر، هنار، سێڤ، گیز، كولند و هه‌موو جورێن دن یێن فێقی و ده‌رامه‌تی، روژانێن ئه‌ینی بازارێ گوندێ بازێ گه‌رمه ژبه‌ركو خه‌لكه‌كێ زور ل باژێرا دهێنه سه‌ر گوندان ب مه‌ره‌ما گه‌ریان و گه‌شتوگۆزار و ل گه‌ل خوه به‌رهه‌مێ خومالی دكرن).
ناڤبری دیاركر ژی كو ئه‌گه‌ر جهێن شوله‌ژێ كار بكه‌ن بۆ باشتركرنا گوندان دێ خه‌لك زێده‌تر گرنگیێ ب چاندنێ ده‌ت و زێده‌تر گۆت: (پشكه‌ك ژ خه‌لكێ گوندان ژ ئه‌گه‌رێ به‌ردوامبوونا بوردومانێن توركیا، پشكه‌ك ژی ژ ئه‌گه‌رێ نه‌بوونا خزمه‌تگوزاریێن پێدڤی قه‌ستا باژێران كریه، ئه‌ڤێ یه‌كێ ژی جوتیار دلگرانكریه و به‌رهه‌مێ وان وه‌كو پێدڤی ناهێته فرۆتن).
ئه‌ڤرۆ نیوز،عه‌لی حاجی:
د داخویانیه‌كێ دا ئه‌ندامه‌كێ لژنا تایبه‌ت یا دیفچونا بازاری ل زاخۆ بۆ ئه‌ڤرۆ نیوز دیار كر د ماوه‌یێ هه‌یڤا نه‌ه دا نێزیكی 16 جهێن بازرگانی هاتینه سزا دان ژئه‌گه‌رێ نه‌پێگیاریا وان ب رێنمایێن ساخله‌میێ و پرانیا سزادانا وان جهان ژبه‌ر هه‌بونا كه‌ره‌سته‌یێن ئێكسپاپه‌ر بون .
دكتور لاوین هابیل ئه‌و چه‌نده ژی گوت : پشتی دیفچوونه‌كا به‌رده‌وام یا لژنا تایبه‌ت ل زاخۆ ژلایێ ساخله‌میا زاخۆ ڤه 16 جهێن بازرگانی ب كوژمه‌یه‌كێ پاره‌یی هاتنه سزادان و كو چار ژ وان ژی بۆ ماوه‌یێ حه‌فتیه‌كێ هاتنه دائێخستن و پرانیا جهان ژی ژبه‌ر هه‌بونا مادده‌یێن ئێكسپایه‌ر بون و هه ردیسان بتنێ جهه‌ك تێنه‌بیت كو جهه‌كێ فروتنا شریناهیان بون بێ هه‌بونا مێژوویێ ل سه‌ر سارده‌مه‌نیێت وان رادبون ب به‌لاڤ كرنا وان سارده‌مه‌نیا ل سه‌ر دوكانداران و ئه‌ڤه ژی به‌روڤاژی رێنمایێن ساخله‌میێ یه ژبه‌ر كو نابیت دوكانه‌كا شریناهیان ب ڤی كاری رابیت كو بتنێ كارگه‌ه دشێن ب ڤی كاری رابن له‌ورا ئه‌م نه‌چار بوین وی جهی بگرین و ب كوژمه‌یه‌كێ پاره‌یی ژی سزا بده‌ین .
گوت ژی: هه‌ر دماوه‌یێ وێ هه‌یڤێ دا مه شیا ده‌ست ب سه‌ر زێده‌تر 8 ته‌ن و 725 كێلوگرامێن كه‌ره‌سته‌یێن جورا و جور دا بگرین ژئه‌گه‌رێ ده‌م ب سه‌رڤه چوونا وان كه‌ره‌سته‌یان و ل دووڤ رێنمایێن ساخله‌میا زاخۆ ژی ئه‌و كه‌ره‌سته ب ئێكجاری هاتنه ژناڤ برن و زێده‌باری وێ چه‌ندێ ژی نێزیكی ته‌نه‌كا ده‌رمانێن ده‌م ب سه‌رڤه‌چووی ژی هاتنه ژناڤبرن كو ده‌مێ وان ب سه‌رڤه چوو ، لێگه‌ریانا مه به‌رده‌وامه دناڤ باژارێ زاخۆ دا و روژنه ئه‌م دیفچوونا كه‌ره‌سته‌یێن ده‌م ب سه‌رڤه چویویی دكه‌ین .
ئه‌ڤرۆ نیوز:
ئه‌و كه‌سێ تووشی نه‌خۆشیا ئاڤا سپی دبیت، وه‌كو عه‌وره‌كی ل سه‌ر چاڤێن وی یه و دیتنا وی شێلی دبیت و ئه‌و شێلی بوون به‌ره به‌ره زێده دبیت، ب شه‌ڤێ دیتنا وی كێم دبیت، دپتریا ده‌مان دا هه‌ردو چاڤ تووشی ئاڤا سپی دبن، له‌ورا پێدڤیه نشته‌رگه‌ری بۆ هه‌ردو چاڤان بهێته كرن، پشتی نشته‌رگه‌ریێ ژی نه‌خوشی چ ئاریشه نامینن و دێ شیان هه‌بن ب كار و چالاكیێن رۆژانه راببیت ب شێوه‌یه‌كێ سروشتی، به‌لێ ل گه‌ل ڤێ چه‌ندێ باشتره نه‌خوش كارێن گران نه‌كه‌ت.
ئاڤا سپی یا به‌ربه‌لاڤه و دبیته ئه‌گه‌رێ ره‌نگڤه‌دانا چاڤی و ل دووماهیێ چاڤ سپی دبیت و شێلی دبیت و ب دروستی ب كارێ خۆ رانابیت و دیتن كێم دبیت و رۆژ بۆ رۆژێ به‌ر ب خرابیێ دچیت، ژ گرنگترین ئه‌گه‌رێن په‌یدابوونا ئاڤا سپی ل سه‌ر چاڤی( دانعه‌مری كو ژ هه‌میان به‌ربه‌لاڤتره، گوهۆرینێن فسیولوژی وه‌كو نه‌خوشیا شه‌كرێ، سیسته‌مێ خوارنا نه‌ساخله‌م، نه‌خوشیێن فسیولوژی یێن ژ ئه‌گه‌رێ كێمیا ئه‌نزایمه‌كێ به‌رپرس ژ شروڤه‌كرنا كه‌رسته‌یان د له‌شیدا په‌یدادبن، روودانێن ئێكسه‌ر ل سه‌ر چاڤی، ئه‌گه‌رێن زكماكی، ده‌رمان وه‌كو قه‌تره و ده‌رمانێن ئێكسه‌ر ل سه‌ر چاڤی دهێنه ب كارئینان، به‌رئاتافبون ب تیشكا رۆژێ بێی كو مرۆڤ خۆ ب پارێزیت و …هتد.
ئه‌و كه‌سێ تووشی نه‌خۆشیا ئاڤا سپی دبیت، وه‌كو عه‌وره‌كی ل سه‌ر چاڤێن وی یه و دیتنا وی شێلی دبیت و ئه‌و شێلی بوون به‌ره به‌ره زێده دبیت، ب شه‌ڤێ دیتنا وی كێم دبیت، به‌رده‌وام پێدڤی ب گوهارتنا به‌رچاڤ كان دبیت و چاڤه‌كێ وی تشتا دو دویه دبینیت، پێدڤی ب روناهیه‌كا زور دبیت هه‌تا بشێت بخوینیت، ره‌نگ ل به‌ر چاڤێن وی دهێنه گوهارتن، ده‌مێ ژلایێ نوشدارێ چاڤان دهێته پشكنینكرن دێ دژواریا دیتنا وی هێته ده‌ستنیشانكرن، نیسكا چاڤێ وی تێكدچیت و ب زه‌حمه‌ته تورا چاڤێ وی بهێته پشكنینكرن.
ل قۆناغا ده‌ستپێكێ یا نه‌خوشیێ ده‌مێ هێشتا تاریبوون یا كێم بیت، دشیاندایه لینز( عه‌ده‌سا) چاڤێ وی بهێته گوهارتن، به‌لێ ل قۆناغێن پێشكه‌فتی پێدڤی ب ئه‌نجامدانا نشته‌رگه‌ریێ دبیت.
د پرانیا ده‌مان دا نشته‌رگه‌ری ب دانا به‌نجێ دهێته كرن و بریاردان بۆ نشته‌رگه‌ریێ ل وی ده‌می دهێت ده‌مێ ئاڤا سپی دبیته ئه‌گه‌رێ كێم دیتنێ كو تووشبۆی شیان نه‌بن ب كاروبارێن خۆ یێن رۆژانه راببیت بۆ پاراستنا شێوازێ ژیانا خۆ، كێم دیتن دبیته ئه‌گه‌ر مرۆڤ ب هلنگڤیت و بكه‌ڤیت و تووشی روودانان ببیت، ئه‌ڤجا چ ل ده‌مێ مرۆڤ ب پێیان یان ب ترۆمبێلێ بچیت.
دگه‌له‌ك ده مان دا ژی هه‌ردو چاڤ تووشی ئاڤا سپی دبن، له‌ورا پێدڤیه نشته‌رگه‌ری بۆ هه‌ردو چاڤان بهێته كرن، و هه‌ر چاڤه‌كی نشته‌رگه‌ریه‌كا جودا بۆ دڤێت و پتریا جاران ئه‌و چاڤێ تاریتر و شێلی تر، به‌ری یێ دی دهێته نشته‌رگه‌ری كرن، و هه‌كه ئه‌و چاره‌بوو هه‌لبه‌ت دێ چاڤێ دوێ ژی هێته نشته‌رگه‌ری كرن.
بو چاره‌سه‌ریێ نه‌خۆشی چ پێدڤی ب چاره‌سه‌ریێن خوپاراستنێ ب رێكا ده‌رمانێن ئه‌نتی بایوتیك به‌ری نشته‌رگه‌ریێ نینه و گۆت: چاره‌سه‌ریه‌كا ب ڤی ره‌نگی ب تنێ ل دووڤ شیره‌تێن نوشداری دهێته دان و تافیلكرنا چاڤی باشتره ژ وێ چه‌ندێ كو نه‌خوش ده‌رمانان وه‌ربگریت، بۆ نه‌خوش دێ هنده‌ك چپك هێنه دان بۆ به‌رفره‌هكرنا بیبیكا چاڤی ل رۆژا نشته‌رگه‌ریێ ئه‌وژی ب ده‌مژمێره‌كێ یان دو ده‌مژمێران به‌ری نشته‌رگه‌ریێ. پتریا نشته‌رگه‌ریێن نوكه دهێنه كرن لینز یان عه‌ده‌سه بۆ چاڤی دهێنه دانان و پاشی رێكا نشته‌رگه‌ریێ دهێته ده‌ستنیشانكرن.
روودانا هنده‌ك سه‌رباركان پشتی كێشانا ئاڤا سپی ب رێكا نشته‌رگه‌ریێ تشته‌كێ كێمه ژوان سه‌رباركان ژی هه‌كه هات و بهێنه روودان ( نه‌شیانا چاندنا عه‌ده‌سا ده‌ستكرده دناڤ چاڤی دا یان نه‌شیانا كێشانا ئاڤێ یه ب ته‌ڤاڤی و ل وان ده‌مێن گه‌له‌ك كێم ژی نه‌خوش پێدڤی ب نشته‌رگه‌ریه‌كا دیتر دبیت و پشتی نشته‌رگه‌ریێ ژی نه‌خوشی چ ئاریشه نامینن و دێ شیان هه‌بن ب كار و چالاكیێن رۆژانه راببیت ب شێوه‌یه‌كێ سروشتی، به‌لێ ل گه‌ل ڤێ چه‌ندێ باشتره نه‌خوش كارێن گران نه‌كه‌ت بۆ ده‌مێ دو حه‌فتیان هه‌تا چاڤێ وی ب دروستی ساخله‌میا خۆ وه‌ردگریت، هه‌روه‌سان باشتره ل حه‌فتیا ئێكێ چاڤ نه‌هێته ته‌ركرن و باشتره بهێته داپۆشین داكو ژ توزێ و پیساتیێ بهێته پاراستن، دیسان باشتره ده‌ستێن نه‌خوشی د پاقژبن ل ده‌مێ ده‌ستكرنا چاڤی یان ل ده‌مێ دلوپان به‌دده‌ته چاڤێ خۆ، و ل ده‌مێ ده‌ركه‌تنێ ژی دێ گه‌له‌ك یا باش بیت هه‌كه به‌رچاڤكێن دژی تاڤا رۆژێ ل به‌ر چاڤێن خۆ بكه‌ت.
ئه‌ڤرۆ نيوز:
هه‌ڤبه‌ندیا هه‌ڤژینی ل سه‌ر كۆمه‌كا كارا ئاڤا دبیت و هه‌ر كاره‌كی گرنگیا خوه یا هه‌ی بۆ پاراستنا وێ هه‌ڤبه‌ندیێ ئه‌و كو پێدڤیه ل سه‌ر بنیاتێ ئه‌ڤینیێ و رێزگرتنێ بهێته ئاڤاكرن، هه‌ڤبه‌ندیا سیكسی ژی د ناڤبه‌را ژن و مێران دا رۆله‌كێ گرنگ بۆ پاراستنا ئه‌ڤینیێ و زێده‌بوونا داخباریێ و رێزگرتنێ د ناڤبه‌را وان دگێریت.
كارتێكرنا خاڤبوونا سیكسی ل سه‌ر هه‌ڤبه‌ندیا هه‌ڤژینی:
ساربوونا زه‌لامی یان پشتگوه هاڤێتنا كریارا سیكسی ژ ئالیێی زه‌لامی ڤه، كارتێكرنه‌كا نه‌رێنی ل سه‌ر هه‌ڤبه‌ندیێ دكه‌ت و ژن هه‌ست ب كه‌تنێ و پشتگوه هاڤێتنێ دكه‌ت و ئه‌و چه‌نده كارڤه‌دانی َل سه‌ر ره‌فتار و سه‌ره‌ده‌ریێن وێ دكه‌ت. ژن هه‌ست پێ دكه‌ت كو حه‌ز ل سه‌ر وێ نینه و هه‌ڤژنیێ وێ پشتگوه دهاڤێژیت، دلگرانیا وێ ژی كارتێكرنێ ل هه‌موو ئه‌ندامێن خێزانێ دكه‌ت.
گه‌له‌ك ژن بتایبه‌ت ل جڤاكێ مه‌یێ رۆژهه‌لاتی، شه‌رم دكه‌ن پرسیارا هه‌ڤژینێ خوه بكه‌ن، كا بۆچی ئه‌و سست و خاڤه ژ لایێ سیكسی ڤه، له‌ورا د دودلیێ دا دژین و هه‌كه ئه‌و یه‌ك درێژ بوو دبیت بگه‌هیته دوماهیا هه‌ڤژینیێ.
ئه‌ڤه دیارترین ئه‌گه‌رێن خاڤبوونا سیكسی نه:
دبیت زه‌لام تووشی خاڤبوونا سیكسی بیت ژ به‌ر ئه‌گه‌رێن جڤاكی، یان ژی ژ ئه‌گه‌رێن ساخله‌می، ژ وان ئه‌گه‌ران ژی:
هه‌ستكرن ب وه‌ستیانێ: د گه‌ل زێده‌بوونا زه‌حمه‌تیا ژیانێ و فشارێن كاری، گه‌له‌م زه‌لام هه‌ست ب وه‌ستیانێ و كه‌رخینێ دكه‌ن و ئه‌و چه‌نده دبیته ئه‌گه‌رێ هندێ نه‌شێت هه‌ڤبه‌ندیا سیكسی بكه‌ت. د ڤی حاله‌تی دا پێدڤیه ژن د زه‌لامی بگه‌هیت و هاریكاریا وی بكه‌ت بێهنا خوه ڤه‌ده‌ت، دا بشێت شیانا خوه بۆ حه‌زا سیكسی ڤه‌گه‌رینیت.
ئه‌گه‌رێن ده‌روونی:
هنده‌ك ئاریشێن ده‌روونی و تووشبوونا زه‌لامی ب خه‌مۆكیێ ژ به‌ر هه‌ر ئه‌گه‌ره‌كی بیت، كارڤه‌دانه‌كا نه‌رێنی ل سه‌ر هه‌ڤبه‌ندیا هه‌ڤژینی دكه‌ت و زه‌لامی خاڤ دكه‌ت.
ئه‌گه‌رێن ساخله‌می:
ئه‌گه‌رێن خاڤبوونا سیكسی ل نك زه‌لامی، دبیت ژبه‌ر تووشبوونا وی بنه‌خۆشیه‌كێ بیت، یان ژی سستاهیه‌ك د هورمۆنێ تستوستیرۆن دا هه‌بیت. دیارترین نه‌خۆشی یێن زه‌لامی ژ لایێ سیكسی ڤه خاڤ دكه‌ن، سه‌نگێ زێده، نه‌خۆشیا شه‌كرێ و هه‌بوونا سستاهیه‌كێ د غودا ده‌ره‌قی دا.
د ڤان حاله‌تان دا پێدڤیه قه‌ستا نۆشداری بكه‌ن دا ئاریشێ بزانن و چاره بكه‌ن، دێ ئه‌و چه‌نده یا هاریكار بیت زه‌لام حه‌زا خوه یا سیكسی ڤه‌گه‌رینیت.
ئه‌ڤرۆ نیوز، سه‌باح زێبارى:
هیشام دودى جوتیاره‌كێ وێ ده‌ڤه‌رێ یه دبێژیت چه‌ندین روژه به‌رده‌وام فروكێن توركیا گوندێ هیزانكێ ل ده‌ڤه‌را نه‌هلێ توپباران دكه‌ن دوهى ئه‌ڤرۆ ژى شه‌ش جاران ئه‌و گوند كرینه ئارمانج،هه‌تا نوكه زیانێن گیانى و ماددى نه‌بوویه، لێ ئه‌ڤ گونده ژى هاولاتى و خودانێن په‌ز و به‌رهه‌مێ جوتیاران لێ یه له‌وا ئه‌ڤ چه‌نده یا مه‌ترسی یه بۆ خه‌لكێ وان گوندان و دێ زیانێن خوه هه‌بن.
ناڤهاتى زێده‌تر گۆت كو رێژه‌كا زور یا خه‌لكى ل وێ ده‌ڤه‌رێ به‌رهه‌مێ برنج و كونجیا كرینه و نوكه ژى ده‌مێ دورینا به‌رهه‌مى یه و ئه‌م قه‌ستا ناڤ به‌رهه‌مێ خوه دكه‌ین، لێ مه‌ترسیه‌كا زور یا ل سه‌ر مه و ئه‌م هیڤیا خوه نینه ده‌مێ چینه ناڤ به‌رهه‌مێ خودا ترسه‌ك بۆ هه‌مى خه‌لكێ وێرێ دروست بوویه، چونكى بوردومانا فروكان گه‌له‌ك یا نزیكى وان گوندایه، هیڤیدارین ئه‌ڤ چه‌نده نه‌مینیت داكو خه‌لك ب دروستى بشێت قه‌ستا ناڤ به‌رهه‌مێن خوه بكه‌ت.
ئه‌ڤرۆ نيوز:
ماسك بساناهیترین و بله‌زترین رێ یه بۆ چاڤدێریا پیستی، هه‌روه‌ها ماسكان گه‌له‌ك مه‌زاختی ژی لێ ناچن و ده‌مێن درێژ ژی پێنه‌ڤێن، له‌ورا دێ بۆ هه‌وه هنده‌ك ماسكێن سروشتی دیار كه‌ین بۆ چاڤدێریا پیستێ هشك و نه‌رمكرنا وی:
ماسكێ هنگڤینی و هه‌ڤیرتڕشی بۆ زه‌لالكرنا پیستێ هشك:
پێكهاته: كه‌چكه‌كێ هنگڤینی، كه‌چكه‌كێ شیری و كه‌چكه‌كێ بچووك یێ هه‌ڤیرتڕشی.
رێیا چێكرنێ: وان كه‌رستان باش تێكهه‌ل بكه، پاشی دانه سه‌ر دێمێ خوه بۆ ده‌مێ 15 ده‌قیقان، پاشی ب ئاڤا تێهنشیر بشۆ.
ماسكا زه‌یتا زه‌یتوونان بۆ پاقژكرنا پیستێ هشك:
پێكهاته: دو كه‌چكێن زه‌یتا زه‌یتوونان، دو كه‌چكێن شیرێ نوو، كه‌چكه‌كێ ئاری و زه‌ركا هێكێ.
رێیا چێكرنێ: ئاری و زه‌ركا هێكێ و شیری باش تێكهه‌ل بكه، پاشی زه‌یتا زه‌یتوونان بكه سه‌ر، پاشی دانه سه‌ر دێمێ خوه و 15 ده‌قیقان بهێله، پشتی هینگێ ب ئاڤا تێهنشیر بشۆ، ئه‌و ماسك دێ پیستێ ته پاق كه‌ت.
ماسكا گێزه‌ران بۆ سپیكرنا دێمی:
پێكهاته: دۆشاڤا سێ گێزه‌ران، دو كه‌چكێن بچووك یێن زه‌یتا زه‌یتوونان، دو كه‌چكێن كه‌فا شیری، سپیلكا هێكێ، پیچه‌كا ئاڤكا باجانسۆركان و دو كه‌چكێن ئاری.
رێیا چێكرنێ: سپیلكا هێكێ باش د گه‌ل وان كه‌رستان تێكهه‌ل بكه، هه‌كه ئه‌و پێكهاته روون بوو پیچه‌كا دی یا ئاری بكه سه‌ر، پاشی بۆ ده‌مێ 10 ده‌قیقان دانه سه‌ر دێمێ خوه و پاشی ب ئاڤا تێهنشیر بشۆ.
ئه‌ڤرۆ، له‌زگین، بارزان:
جه‌ژنا جه‌مایێ ئێكه ژ جه‌ژنێن هه‌ره مه‌زن و دیرێن د ناڤ ملله‌تی ئێزدی دا رێوره‌سمێن جه‌ژنا جه‌مایێ بۆ ده‌مێ حه‌فت رۆژان ل په‌رستگه‌ها لالش دهێنه گێران ئه‌ڤ ساله ل رۆژا 6/10/2019 دێ دیندار و مجیور و سه‌رده‌ری هه‌موو خاسا قه‌ستا په‌رستگه‌ها لالش كه‌ن بۆ گێڕانا جه‌ژنا جه‌مایێ.
خواجه خه‌تاری، ئولدارێ ئێزدیان دیار كر كو ئه‌ڤ ساله رێوره‌سمێن جه‌ژنا جه‌مایێ ل سپێده‌هیا رۆژا 6/10 دێ ده‌ست پێ كه‌ن و هه‌تا رۆژا 13/10/2019 دێ د به‌رده‌وام بن كو ئێزدی ژ دێ ژ هه‌موو جه و ده‌ڤه‌ران قه‌ستا په‌رستگه‌ها لالش كه‌ن و چه‌ندین رێورسمێن جودا یێن ئاینێ د ڤێ جه‌ژنێ دا دهێنه گێران وه‌كو هه‌ر ئێزدیه‌كێ بچیته په‌رستگه‌ها لالش پێدڤیه د سه‌رپرا سه‌لاتێرا ده‌ربازبیت و بچیته سه‌ر حه‌ودا كانیا سپی و ده‌ست و چاڤێن خوه ب ئاڤا وێ ته‌میز و پاقژ بكه‌ت هه‌روه‌سا ژی پێدڤیه كانیا سپی و ده‌رێ قاپیێ و زمزمێ و سندرووكا شێخادی و به‌رێ شباكێ و نیشانگه‌هێن شێخ فه‌خر و مه‌زارگه‌هێ شیشمس و شێخ و پێرێن خوه زیاره‌تی بكه‌ت كو ده‌ربازبوون ل سه‌ر پرا سه‌لاتێرا ڕا نیشانا پاقژكرنا نه‌فس و جانی یه ژ گوننه‌هان.
ناڤهاتی ئاماژه دا وێ چه‌ندێ كو ل هه‌موو ئێڤاریێن رێوره‌سمێن جه‌ژنا جه‌مایێ ژی چرایێن نیشانگه‌هێن خاسا هه‌لدكه‌ن ئه‌ڤه نیشانا پیرۆزیا روناهیێ و ئاگریه و سه‌ما ژی ئێكه ژ پیروزیێن د ناڤ ئێزدیان دا ب قه‌ول و به‌یت و قه‌سیده و قه‌وال ده‌ف و شبابا لێده‌ن بۆ كێشانا سه‌مایێ و گۆت: “كێشانا سه‌مایێ رێوره‌سمه‌كێ دێرینه د ناڤ پرانیا ملله‌تێن كه‌ڤن دا هه‌بوو”.
هه‌مان ئولدارێ ئێزدیان خویا كر كو ل هه‌موو رۆژان سپێده‌هیان پشتی به‌یتا سپێدی و ئێڤاریان ژی به‌ری به‌یتا ئێڤاری رێوره‌سمێن قنتارێ دهێته گێران كو قنتار رێوره‌سمێ هه‌ڤكاری و دلخوه‌شبوونێ یه د ناڤبه‌را شه‌مسانیا و ئادانیان دا و گۆت: “ل رۆژا چارێ ژ جه‌ژنا جه‌مایێ ژی په‌ری دهێته سواركرن ل رۆژا پێنجێ ژ جه‌ژنێ رێوره‌سمێن قه‌پاغێ دهێنه گێران كو قه‌پاغ رێوره‌سمه‌كێ كه‌ڤنه نیشانا پێشكێشكرنا قوربانیه بۆ خودایێ رۆژێ ب هیڤیا هاتنا ساله‌كا پر خێر و به‌ره‌كه‌ت و خوه‌شی یه، ل رۆژا شه‌شێ ژ جه‌ژنا جه‌مایێ ژی په‌ری ل شباكێ دهێته سواركرن هه‌ر كه‌سه‌كێ نه مۆركری بیت ب ئاڤا كانیا سپی ل جه‌ژنا جه‌مایێ دهێته مۆركرن كو مۆركرن ئێكه ژ فه‌رزێن ته‌ریقه‌تێ د ناڤ ئێزدیان دا نیشانا وێ ژی ئه‌وه بۆ پاقژكرن و حه‌لالكرنا كه‌سێ ئێزدی دهێته‌كرن هه‌روه‌سا ژی هه‌موو سه‌رده‌رێن خاسا ل په‌رستگه‌ها لالش سماتێ دروست دكه‌ن ل رۆژا دووماهیێ ژ جه‌ژنا جه‌مایێ تاووس دهێته جوانكرن.
نيشاندان