ئه‌ڤرۆ نيوز:
ئەڤرۆ ئێڤاری گەنجەکی ل قه‌زا زاخۆ بابێ خوە دا بەر گولەیان و کوشت.
گەنجەکی بابێ خوە کوشت
نووترين نووچه
- پشكداریا مەسرور بارزانی ل كۆڕبەندێ ئابووریێ جیهانی دێ رەنگڤەدانا ئابووری و دیپلۆماسی ل سەر هەرێمێ هەبیت
- دستووری رێك یا دایە هەرێما كوردستانێ پەترۆلا خوە بفرۆشیت
- نە هنارتنا پارەیان و ئاریشەیا مووچەی بۆ هەرێما كوردستانێ، ئێك ژ كارتێن بەغدایێ یە
- بێی مادەیێ 140 بەغدا نەشێت تاكلایەنە رەفتارێ ب پەترۆلا كەركووكێ بكەت
- بڕیارا دووماهیێ ل دۆر هەلوەشاندنا گرۆپێن بەرەیێ موقاوەمە ل ئیراقێ یا هاتیە دان
- مەبەستا وان ئەوە مووچە و قووتێ وەلاتییێن هەرێما كوردستانێ ببڕن
- چالاكییێن مەسرور بارزانی پرسێن كوردستانێ د ئێخیتە سەر نەخشەیێ گرنگیپێدانا نێڤدەولەتی
- پشكا رەوشەنبیری و راگەهاندنا پارتی دیدارا كاریگەرییا ئەدەبێ زارەكی ل سەر مۆزیكا كوردی سازكر
- خەلكێ شنگالێ ژ قانوونا لێبۆرینا گشتی د رازی نینن
- سەرۆك بارزانی: گەلێ كورد دێ هەر گەهیتە سەربخوەییێ
سه‌ره‌كى Facebook
فه‌هيم عه‌بدولا: رازى نابين به‌هرا دهۆكێ يا كاره‌بێ وه‌كو پارێزگه‌هێن دى نه‌بيت
ئه‌ڤرۆ نيوز، نيوار محه‌مه‌د سه‌ليم:
ئه‌ڤرۆ رۆژا ئێكشه‌مبى 8ى ئيلۆنا 2019ێ كه‌مال محه‌مه‌د وه‌زيرێ كاره‌بێ ل حوكمه‌تا هه‌رێما كوردستانێ سه‌ره‌دانا جڤاتا پارێزگه‌ها دهۆكێ كر و ژ لايێ ده‌سته‌يا سه‌رۆكاتيا و ئه‌ندامێن جڤاتێ ڤه هاته پێشوازيكرن.
ل ده‌ستپێكێ وه‌زيرێ كاره‌بێ روونكرنه‌ك دا سه‌ر ره‌وشا كاره‌بێ ل هه‌رێمێ ب گشتى و ل پارێزگه‌ها دهۆكێ ب تايبه‌ت و ئاشكه‌را كر كو نها بارگرانى ل سه‌ر كاره‌بێ هه‌تا راده‌كێ باش كێم بوويه و ره‌وشا دانا كاره‌بێ باشتر لێ هاتيه و دا زانين كارتێكرنا ڤان رۆژان ل سه‌ر كاره‌بێ هه‌ى ژ ئه‌گه‌رێ كێڤلێ تاخێ شندوخا و كارتێكرنا كێڤلێن سه‌ر جاددا سه‌ره‌كى يه ژ به‌ر ئۆڤه‌ر پاسێن دهێنه چێكرن.
ئاشكه‌را ژى كر كو پارێزگه‌ها دهۆكێ شيانێن وه‌رگرتنا كاره‌با ويستگه‌ها خه‌بات نينه و نها كار يێ ل سه‌ر دهێته كرن و ل ده‌ستپێكا سالا بهێت به‌هرا دهۆكێ ژ وى ويستگه‌هى ژى دێ گه‌هيت، هه‌كه ويستگه‌هێ سۆران ژى كه‌فته كارى كاره‌با ئاكرێ دێ كه‌ڤيته سه‌ر وى ويستگه‌هى ئه‌و ژى دێ بارگرانيێ ل سه‌ر دهۆكێ راكه‌ت. ئه‌ڤه دێ ره‌وشا كاره‌بێ باشتر لێ هێت، ژ به‌ر كو ويستگه‌هێ كواشێ بارگرانيه‌كا مه‌زنه ل سه‌ر ملێن حوكمه‌تێ و رۆژانه هه‌تا مليۆنه‌ك و 300 هزار ليترێن گازوايلێ بۆ دهێنه دابيكرن به‌رامبه‌ر دانا 130 مێگاواتێن كاره‌بێ.
نه‌ڤه‌شارت ژى كو هنده‌ك ويستگه‌هـ يێن هه‌ين هێشتا نه‌داينه كارى و هێل بۆ نه‌هاتينه راكێشان، ل ده‌ستپێكێ دێ گرنگيێ ده‌ينه راكێشانا وان ويستگه‌هان و ل به‌رى هه‌موويان ژى ويستگه‌هێ زاخۆ كو ل سالا 1983ێ هاتيه دانان و هێشتا هێل بۆ نه‌هاتينه كێشان، ژ به‌ر كو ئه‌و ژ هه‌موويان فه‌رتره.
سيسته‌مێ سمارت ل هه‌ردو پارێزگه‌هێن هه‌ولێر و سلێمانى ده‌ست ب دانانێ هاتيه كرن و بڕياره ل ڤێ هه‌يڤێ ل پارێزگه‌ها دهۆكێ ژى ده‌ست پێ بهێته كرن كو گه‌له‌ك باشيێن خوه هه‌نه و ژ وان ژى؛ وه‌لاتى به‌رامبه‌ر دانانێ پاران ناده‌ت. سيسته‌م يابانى يه و هه‌واى ناخوينيت. كاره‌ب به‌رزه نابيت. هه‌رده‌ما بارگرانى كه‌فته سه‌ر پێگوهۆڕى ئه‌و دێ كه‌سێن پشكدار ئاگه‌هدار كه‌ت دا بارێ وى سڤك كه‌ن. خه‌له‌تى نابن. يێ سێ هه‌يڤان ژى پاره‌ى نه‌ده‌ت دێ كاره‌با وان هێته كێمكرن، ب تنێ دێ بۆ رۆناهيێ هنده‌ك ئه‌مپێر بۆ هێنه دابينكرن هه‌تا كريا خوه ئه‌دا دكه‌ت. بۆ چ جهان بێى خواندن ناچيت.
گۆتژى: بلا كه‌سه‌ك ژى نه‌بێژيت ئه‌ڤه ژى به‌ر وێ چه‌ندێ يه دا پاره ب دروستى بهێته وه‌رگرتن و يا راست حوكمه‌ت 25% ژ خه‌رجيێن ل كاره‌بێ دهێته مه‌زاختن ژ وه‌لاتيان وه‌ردگريت و يێ دى هه‌موويێ ئه‌و دده‌ت، د سه‌ر ڤێ چه‌ندێ ژى نها بزاڤ دهێته كرن بۆ هنده‌ك جهێن پێشه‌سازى و بازرگانى كريا كاره‌بێ بهێته كێمكرن.
وه‌زيرێ كاره‌بێ به‌حس ل ده‌سپێكرنا پرۆژێ ڤه‌گوهاستنا كاره‌بێ ژى بۆ پارێزگه‌ها دهۆكێ كر و ئه‌گه‌رێن گيرۆبوونا وى پرۆژه‌ى ئاشكه‌را كرن كو ئه‌ڤ سێ هه‌يڤ بوو رێكه‌فتن هاتيه ئيمزا كرن و ده‌ست ب پرۆژه‌ى نه‌هاتيه كرن و گۆت: ره‌زامه‌ندى ل سه‌ر پرۆژه‌ى ل 22ى گۆلانێ ژ لايێ به‌رێز نێچيرڤان بارزانى سه‌رۆكێ وى ده‌مى يێ حوكمه‌تا هه‌رێما كوردستانێ هاتبوو كرن و ل 17ى خزيرانێ رێكه‌فتن ل گه‌ل كۆمپانيه‌كێ هاتبوو كرن بێى به‌لاڤكرن و راگه‌هاندنا ته‌نده‌رى و سه‌رككێمكرنێ ژ به‌ر هندێ ژى كار هاتبوو راگرتن و ئه‌و بوو ل 5ى ته‌باخێ دووباره ب رێيا ته‌نده‌رى پرۆژه بۆ كۆمپانيه‌كا دى كه‌فت ب ره‌نگه‌كى ل جهێ 9 مليۆن و 350 هزار دۆلاران بوونه حه‌فت مليۆن و 425 هزار دۆلار و ماوێ پرۆژه‌ى ژى ژ پێنج هه‌يڤان بوونه چار هه‌يڤ و قه‌ره‌بووكرنا جۆتياران ژى ل سه‌ر كيستێ حوكمه‌تێ بوو كه‌فته سه‌ر ملێن كۆمپانيا كار بۆ كه‌فتى. بڕياره ژى 100 تاوه‌ر بهێنه چێكرن و هه‌تا نها 25 هاتينه چێكرن.
به‌حس ل سيسته‌مێ ب غازكرنا ويستگه‌هێ كاره‌بێ ژى كر كو نها دشيان دايه 38 ويستگه‌هان ل هه‌رێما كوردستانێ ب سيسته‌مێ غازێ بده‌نه كارى، دێ ب تنێ ئه‌و دشێن 15 ژ وان ب سيسته‌مێ غازێ بده‌نه كارى ژ به‌ر نه‌بوونا غازا سرۆشتى. ئه‌ڤێن دى هه‌موو د راگرتى نه و ب تنێ يێ كواشێ نه‌بيت كو ل جهێ غازێ گازويلێ بۆ يه‌كه و نيڤان دابين دكه‌ن.
ده‌رباه‌رى كاره‌با مواليدان ژى گۆت: جارا ئێكێ يه ل پارێزگه‌ها دهۆكێ بهايێ ئه‌مپێرێ كاره‌بێ ژ پارێزگه‌هێن دى كێمتر دهێت.
پاشان فه‌هيم عه‌بدولا حه‌مۆ سه‌رۆكێ جڤاتا پارێزگه‌ها دهۆكێ ده‌ستخۆشى ل كارێ وان كر و هيڤى خواست كو ل سه‌ر ده‌ستێ وى وه‌كو وه‌زيرێ نوو ئه‌و جوداهى و نه‌عه‌دله‌تيا د به‌لاڤكرنا كاره‌بێ دا هه‌يى د ناڤبه‌را پارێزگه‌ها دا نه‌مينيت و گۆت: نه دخوازين مافێ پارێزگه‌ها دهۆكێ بهێته خوارن و نه‌ژى يێن چو پارێزگه‌هێن دى، دخوازين ب عه‌داله‌ت بهێته به‌لاڤكرن.
گه‌له‌ك يا گرنگه وه‌لاتيان پێزانين ل سه‌ر هورده‌كاريێن كاره‌بێ هه‌بن، ژ به‌ر كو هه‌كه زانى كاره‌ب چاوان دهێته به‌لاڤكرن و يا ب عه‌داله‌ت دهێته به‌لاڤكرن، هه‌كه خۆ يا كێم ژى بيت گازندێ ناكه‌ت چونكو حالێ وان ژى ب يێ هه‌موويان.
نه‌ڤه‌شارت ژى كو كاره‌ب گه‌له‌ك ب ره‌نگه‌كێ بێ قيمه‌ت دهێته ب كارئينان و بهايێ وێ ژى ب دروستى ناهێته دان ژ به‌ر هندێ ژى پشته‌ڤانيێ ل هه‌ر پێنگاڤه‌كێ دكه‌ين رێگر بيت ل هه‌مبه‌ر ب هه‌ده‌ردانا كاره‌بێ و سيسته‌مكرنا وێ.
سه‌رۆكێ جڤاتا پارێزگه‌ها دهۆكێ داخواز ژ وه‌زيرێ كاره‌بێ ژى كر كو دووڤچوونه‌كا باش بۆ وان زێده‌گاڤيان بهێته كرن يێن ل سه‌ر كاره‌بێ دهێنه كرن و ل ده‌ستپێكێ ژى ژ به‌رپرسان ده‌ست پێ بكه‌ن و پاشان ژى وه‌لاتيێن ئاسايى.
د پرسياره‌كێ دا، بێريڤان سه‌ليم شه‌مۆ جێگرا سه‌رۆكێ جڤاتا پارێزگه‌ها دهۆكێ به‌حس ل ره‌وشا كاره‌با شاريا كر و نها ره‌وشا وێ يا خرابه، د به‌رسڤا پرسيارا وێ ژى دا وه‌زيرێ كاره‌بێ گۆت: كێشا كاره‌با ئاواران ل شاريا ژى دێ هێته كرن و ب ڤێ چه‌ندێ ژى بارگرانى ل سه‌ر شاريا ژى دێ كێم بيت و هه‌تا راده‌كێ باش كاره‌با وان ژى دێ باش بيت. ل هنده‌ك جهان ژى ئاريشا ڤه‌گوهاستنا كاره‌بێ يا هه‌ى وه‌كو شاريا و چه‌مانكێ و قه‌سرۆكێ و هنده‌ك جهێن دى و كار ل سه‌ر هندێ دهێته كرن كو ئه‌و ئاريشه ژى بهێته چاره‌كرن.
ده‌رباره‌ى ديتنا پێگوهۆڕان ژى كو پرسياره‌ك بوو ژ لايێ عه‌بدولسه‌مه‌د تێلى سكرتێرێ جڤاتا پارێزگه‌هێ ژ وه‌زيرى هاتيه كرن گۆت: غاز دشێت گه‌له‌ك كێشێن كاره‌بێ دابين بكه‌ت، به‌لێ غاز ژى تێرا ڤان هه‌موو ويستگه‌هان نينه، ژ به‌ر هندێ ژى حوكمه‌تێ په‌نا بريه به‌ر هنده‌ك رێيێن پێگوهۆڕ و پێنج سالان كار ل سه‌ر دابينكرنا كاره‌بێ ب رێيا هه‌واى كر، لێ گه‌له‌ك يا سه‌ركه‌فتى نه‌بوو ژ به‌ر كو ل زڤستانێ ب تنێ هه‌تا راده‌كى يا باش بوو؛ نها كار ل سه‌ر دابينكرنا كاره‌بێ دكه‌ت ب رێيا ئاڤێ و رۆژێ و ب ئاڤێ ژى هه‌تا راده‌كێ باش يا سه‌ركه‌فتى بوويه ل دوكان و ده‌ربه‌نديخان و يا دێره‌لۆك ژى نها پرۆژه ب رێيا 70% ب دووماهى هاتيه و ل نێزيك ئه‌و ژى دێ كه‌ڤيته كارى. ب رێيا تيشكێن رۆژێ ژى نها پرۆژه‌ك ب هه‌فكارى ل گه‌ل (يوئێن)ێ ل كه‌مپا زانكۆيا دهۆكێ دهێته ئه‌نجام دان.
فلمه فيستڤالا دهۆك سوبه‌هى دێ ده‌ست ب كارێن خوه كه‌ت
ئه‌ڤرۆ نيوز، نيوار محه‌مه‌د سه‌ليم:
سوبه‌هى رۆژا دوشه‌مبى 9ى ئيلۆنا 2019ێ فلمه فيستڤالا دهۆك 7 يا نێڤده‌وله‌تى دێ ده‌ست ب كارێن خوه كه‌ت و تێدا 112 فلم ژ 74 وه‌لاتێن جيهانێ د پشكدارن.
فيستڤال دێ بۆ ماوێ هه‌شت رۆژان يا به‌رده‌وام بيت و رێوره‌سمێن ڤه‌كرنێ ژى دێ ژ ده‌مژمێر 05:00ى ئێڤارى ده‌ست پێ كه‌ن هه‌تا 07:00 دێ د به‌رده‌وام بن و فه‌رشێ سۆر بۆ هۆنه‌رمه‌ندان هێته دانان.
فلمێ “كاميۆن” كو ژ لايێ ده‌رهێنه‌رێ كوردێ رۆژهه‌لاتێ كوردستانێ، كامبۆزيا پارتۆڤ ڤه هاتيه به‌رهه‌م ئينان دێ ل ده‌مژمێر 07:30 ده‌قيقه هه‌تا 09:00ى شه‌ڤ وه‌كو فلمێ ڤه‌كرنا فيستڤالێ ل هۆلا كۆنفرانسان هێته نيشاندان.
زێده‌تر ژ 120 فلمان ژ هه‌رچار پارچێن كوردستانێ و ئورۆپا و وه‌لاتێن عه‌ره‌بى د پشكدارن و هاتينه مێڤانكرن. 74 وه‌لات ژى د پشكدارن و بڕياره 112 فلم بهێنه نيشاندان. ژ وان 50 فلم كوردى نه. 55 فلم ژى دێ هه‌ڤركيا وه‌رگرتنا خه‌لاتان كه‌ن.
د فيستڤالێ دا، دێ روونى كه‌ڤيته سه‌ر وان فلمێن عه‌ره‌ى يێن ژ سالا 1957ێ هه‌تا نها هاتينه به‌رهه‌مئينان. 20 فلمێن عه‌ره‌بى دێ هێنه نيشاندان.
برياره د رۆژانێن فلمه فيستڤالێ دا، چه‌ندين پانێل بۆ به‌حسكرن ل سه‌ر چه‌ند ته‌وه‌رێن سينه‌مايى بهێنه ئه‌نجام دان. فلم ژى دێ ل هۆلا كۆنفرانسان ل زانكۆيا دهۆك و دهۆك سينه‌ماكس هێنه نيشاندان.
مه‌سرور بارزانى ل گه‌ل فراكسيۆنێن كوردستانى يێن به‌غدا كۆمبوو
ئه‌ڤرۆ نيوز:
ئه‌ڤرۆ مه‌سرور بارزانى، سه‌رۆكێ حوكمه‌تا هه‌رێما كوردستانێ ل گه‌ل فراكسيۆنێن كوردستانى يێن ناڤا جڤاتا نوونه‌رێن عيراقێ كۆمبوو و كێشه‌يێن هه‌لاويستى يێن ناڤبه‌را هه‌ولێر و به‌غدا ته‌وه‌رێن سه‌ره‌كى يێن كۆمبوونێ نه.
ئه‌ڤرۆ رۆژا ئێكشه‌مبى 8ى ئيلۆنا 2019ێ مه‌سرور بارزانى سه‌رۆكێ حوكمه‌تا هه‌رێما كوردستانێ و قوباد ته‌له‌بانى، جيگرێ سه‌رۆكێ حوكمه‌تێ و شانده‌كێ حوكمه‌تا هه‌رێما كوردستانێ ل ئاڤاهيێ جڤاتا وه‌زيران ل هه‌ولێر، ل گه‌ل فراكسيۆنێن كوردستانى يێن ناڤا جڤاتا نوونه‌رێن عيراقێ كۆمبوون.
ب گۆره‌ى پێزانينان، د كۆمبوونێ دا دانوستاندن د ده‌رباره‌رى كێشێن هه‌لاويستى يێن ناڤبه‌را هه‌رێما كوردستانێ و عيراقێ يێن پێدڤى ب بودجه و مووچه و دارايى و په‌ترۆل و غازێ كر.
مه‌سرور بارزانى ئه‌ڤرۆ دێ ل گه‌ل فراكسيۆنێن كوردى يێن به‌غدا كۆم بيت
ئه‌ڤرۆ نيوز:
بڕياره ئه‌ڤرۆ رۆژا ئێكشه‌مبى رێكه‌فتى 8ى ئيلۆنا 2019ێ مه‌سرور بارزانى سه‌رۆكێ حوكمه‌تا هه‌رێما كوردستانێ و رێواز فايه‌ق سه‌رۆكا په‌رله‌مانێ كوردستانێ ل گه‌ل فراكسيۆنێن كوردى يێن ل به‌غدا كۆم ببن.
بڕياره د ڤێ كۆمبوونێ دا به‌حس ل كێشێن هه‌لاويستى يێن ناڤبه‌را هه‌رێما كوردستانێ و عيراقێ بهێنه كرن و سه‌رپشكا وان ژى كێشێن گرێداى په‌ترۆلێ و بودجێ و مووچه‌ى بيت.
بڕياره ئه‌ڤرۆ نوونه‌رێن كورد يێن جڤاتا نوونه‌ران پشكدارى سێ كۆمبوونێن جودا ببن يا ئێكێ ل گه‌ل سه‌رۆكێ جڤاتا وه‌زيران و پاشان ژى ل گه‌ل سه‌رۆكا په‌رله‌مانى و پاشان ژى ل گه‌ل جێگرێ سه‌رۆكێ په‌رله‌مانى و چه‌ند سه‌رۆك فراكسيۆنان.
زاویتە: د روودانەکا تەقەکرنێ دا وەلاتیەک ھاتە کوشتن
ئەڤرۆ نیوز، نەوزاد ھلۆری:
دەمەکێ کێم بەری نوکە د روودانەکا تەقەکرنێ دا ل نێزیک ناحیا زاویتە وەڵاتیەک ھاتە کوشتن، ھەتا نوکە ئەگەرا روودانێ نەدیارە.
عەبدولرەحمان ئەحمەد، وەک شاھدحالێ روودانێ بۆ ئەڤرۆ نیوز گۆت: (ئەڤرۆ و دەمەکێ کێم بەری نوکە ئەم ل دھۆک د چوینە دەڤەرا ئامێدیێ، ژ نێشکەکێڤە ل نێزیک مە دناڤبرا ناحیا زاویتە و بێسرێ روودانەکا تەقەکرنێ روودا).
زێدەتر گوت: (ھەتا نوکە ناھێتە زانین ئەگەرا تەقەکرنێ چی یە و کێ بوون، بەلێ د وێ روودانێ ما کەسەک ھاتە کوشتن، پولیس ھەر زوو گەھشتنە جھێ رودانێ و دەست ب ڤەکولینێ کر).
12 پرۆژە ل سنوورێ رێڤەبەریا گشتی د ئەنجامدانێ دانە
ئه‌ڤرۆ نيوز:
رێڤەبەرێ گشتیێ باژێرڤانیان ل پارێزگەھا دھۆکێ راگەھاند، 12 پرۆژە ل سنوورێ رێڤەبەریا گشتیا باژێرڤانیان د ئەنجامدانێ دانە و 19 پرۆژە ژ ئەگەرێ قەیرانا دارایی کار تێدا ھاتیە راگرتن.
ئەندازیار دیار بەحری رەسول دیار کر، ل سنوورێ ھەر 47 باژێرڤانیێن پارێزگەھا دھۆکێ 12 پرۆژە د ئەنجامدانێ دانە و 19 پرۆژە ژ ئەگەرێ قەیرانێ ھاتینە راگرتن و 9 پرۆژە ژی، بەلێندەران داخوازا ڤەکێشانا کاری کریە.
زێدەتر دبێژیت: د سالا بۆری یا 2018 دا 173 پرۆژەیێن بچووک ل سەر پێشینەیێن ھەیڤانە یێن باژێرڤانیان ھاتینە ئەنجامدان ب کۆژمێ چوار ملیار و 408 ملیۆن دیناران و ب رێژەیا 53% ژ وان پرۆژەیان ھاتینە ئەنجامدان و یێن دی د کاری دانە. ھەروەسا 19 پرۆژە ب کۆژمێ ملیارەک و 115 ملیۆن دیناران ل سەر بۆدجەیا داھاتێ 17% یێ باژێرڤانیان ل سنوورێ ھەر 47 باژێرڤانیان ھاتینە ئەنجامدان.
ئەندازیار دیار بەحری رەسول ئاماژە ب ھندێ ژی دا کو د سالا بۆری یا 2018 دا ل سنوورێ باژێرڤانیان 9 پرۆژە ب کۆژمێ 69 ملیۆن دیناران ژلایێ رێکخراوێن بیانی ڤە ھاتینە ئەندامدان.
پیشانگەهەكا گرافیكێ هاتە ڤەكرن
ئەڤرۆنیۆز، هەرهین محەمەد:
رێڤەبەریا هونەرێ شێوەكاری یا سه‌ر ب رێڤەبەریا گشتی یا رەوشەنبیری و هونەری ل دهۆكێ ئێڤاریا ئەڤرۆ 7\9\2019 پیشانگەهەكا گرافیكێ بۆ هونەرمەندا شێوەكار (ساكار سلێمان) بناڤێ (ئالوزكاو) ل هولا شێوەكاری ل گەلەریا دهۆكێ ڤەكر و ئەڤ پیشانگەهە بۆ دەمێ دو رۆژان دێ یا بەردەوام بیت.
شێوەكار ساكار سلێمان بۆ ئەڤرۆ نیۆز گۆت: ئەڤ پیشانگەهە ژ(36) كەڤالێن گرافیكی پێك هاتیە و دبیتە ئێكەم پیشانگەها من یا شێوەكاری ل باژێرێ دهۆكێ و بەری دو هەیڤان هاتمە دەڤ شێوەكار عەونی سامی وی ئەز فێری ڤێ تەكنیكێ كرم و كا دێ كیژ رەنگی ب كار ئینم، لەورا من پێخوەش بوو ڤێ پیشانگەهێ ل دهۆكێ ڤەكەم چونكو ل دهۆكێ فێربوویمە.
چیاڤانەکێ کورد ب بلنداهیا 60متران دكه‌ڤیت وگیانێ خوە ژ دەست د ده‌ت
ئەڤرۆ نیوز نەوزاد هلۆری:
ئەڤرۆ هژمارەکا چیاڤانێن کوردستانێ ل دەڤەرن جودایێن کوردستانێ، ب مەرەما گەشتەکا چیای ب سەرکەفتن ب کەنەفێ قەستا شکەفتا (هزار مێر) ل سنوورێ پارێزگەها سلێمانیێ کر، ئیک ژ وان چیاڤانان ل بلنداهیا 60 متران کەنەفا وی دبچیت و دکەڤیت و ئێکسەر گیانێ خوە ژ دەست د ده‌ت.
زۆزک چومانی، چیاڤان و هەڤالێ وی چیاڤانێ گیانێ خوە ژ دەست دای بۆ ئەڤرۆ نیوز گۆت: (ب مەرەما گەشتەکا چیاڤانی و سەرکەفتنا ل سەر چیای ب کەنەفێ، ئەڤرۆ هژمارەکا چیاڤانێن کورستانێ قەستا شکەفتا هزار مێر ل سنوورێ پارێزگەها سلێمانیێ کر، ئیک ژ وان چیاڤانان ل بلنداهیا 60 متران کەنەفا وی بچیا و دکەڤیت و ئێکسەر گیانێ خوە ژ دەست دا).
زێدەتر گوت: (ناڤێ وی هەوراز رەزایە و خەلکێ سلێمانیێ یە و ژیێ وی25 سالن، هەر چەندە چیاڤانەکێ زیرەکە).
ناڤبری دیارکر ژی کو بەری هەوراز ب سەرکەڤیت چەند چیاڤانەک بەرى وی ب سەرکەفتن، ئەو چیاڤانێن ئەڤرۆ قەستا شکەفتا هزار مێرکری ژ پتریا دەڤەرێن کوردستانێ پێکهاتبوون.
ل فلمە فیستەڤالا دهۆکێ د سینه‌ما ڤه‌كرى دا فلم دێ هێنە نیشاندان
ئەڤرۆ نیوز ، زنار تۆڤی:
بۆ ئێکەمین جار د سینەما ڤەکری دا ل حەفتەمین فلمە فیستەڤالا دهۆک یا نێڤدەولەتی دا، دێ فلمێن درێژ یێن کوردی هێنە نیشاندان.
هەلکەت ئدریس، بەرپرسێ راگەهاندنا فلمە فیستەڤالا دهۆکێ بۆ ئەڤرۆ نیوز دیار کر: د حەفتەمین فلمە فیستەڤالا دهۆک یا نێڤدەولەتی دا و بۆ ئێکەمین جار دێ سینەما ڤەکری هێته دانان، دێ فلمێن درێژ یێن پشکا کوردی هێنە نێشاندان، ئەڤ پێنگاڤە بۆ وێ چەندێ یە کو د سالێن بهێت دا سینەما ڤەکری بەرەف پێشڤە بچیت، هەروەسا سینەما ڤەکری دێ ل ناڤ باخچێن پانۆراما ئازادی دا هێنە دانان.
نيشاندان
WP Facebook Auto Publish Powered By : XYZScripts.com