ئه‌ڤرۆ نيوز:
سه‌رۆكێ حوكمه‌تا هه‌رێما كوردستانێ مه‌سرور بارزانى ووه‌زيرێ ده‌رڤه‌يێ توركيا مه‌ولود چاوشئوگلۆ په‌يوه‌نديه‌كا ته‌له‌فۆنى ئه‌نجامدا.
د وێ په‌يوه‌نديێ دا، هه‌ردولا ب توندى روودانا تێكده‌رانه‌يا ئه‌ڤرۆ يا هه‌ولێرێ شه‌رمزاركر وپرسه وهه‌ڤخه‌ميا خوه ژى بۆ كه‌سوكارێن قوربانيان ده‌ربرى.
هه‌ردولا دووپاتى ل سه‌ر پێدڤيا پاراستنا سه‌قامگيرى وئاسايشا ده‌ڤه‌رێ كر
ئەڤرۆ نیوز:
سەرۆکاتیا هەرێما کوردستانێ هێرشا ئەڤرۆ یا ل هەولێرێ کو بوو ئەگەرێ کوشتنا کارمەندەکێ کونسولخانا تورکیا شەرمزار دکەت و دیار دکەت کو ناهێلین چو کەسەک ئارامیا ل هەرێما کوردستانێ تێک بدەت.
ل ئالیێ دی حوکمەتا هەرێما کوردستانێ ژی د راگەهاندنەکا فەرمی دا هێرشا ئەڤرۆ ل هەولێرێ شەرمزار کر و راگەهاند کو ب هەموو رەنگەکێ دێ دووڤچوونا بابەتی کەین دا تاوانبار بهێنە گرتن و بگەهنە سزایێن خوە یێن یاسایی.
د پشکەکا دی یا راگەهاندنێ دا ئاماژە ب هندێ ژی هاتیە کرن د ئەنجاما هێرشا ئەڤرۆ ل ئێک ژ خوارنگەهێن هەولێرێ دا کارمەندەکێ کونسولخانا تورکیا و وەلاتیەکێ هەرێما کوردستانێ جانێ خوە ژ دەست داینە و ئەم دوپات دکەین کو ب چو رەنگەکێ رێ نادەین ئارامی و ئاسایشا ل هەرێما کوردستانێ بهێتە تێکدان.
ئەڤرۆ نیوز:
ل گۆر راپۆرتەکا BBC ئەمریکا کارێ دبلۆماتکارێن ئیرانێ ل نیویورکێ سنوردار دکەت و رێ نەدایە وەزیرێ دەرڤە یێ ئیرانێ ژی کو ژ بلی ئاڤاهیێ نەتەوێن ئێکگرتی سەرەدانا چ جهەکێ دی بکەت.
بەری نها وەزیرێ دەرڤە یێ ئەمریکا مایک پۆمپیۆ دیار کربوو کو ئێدی دبلۆماتکارێن ئیرانێ نەشێن وەکو بەرێ ل ئەمریکا سەرەدانا هەموو جهەکێ بکەن و دێ کارێ وان هێتە سنوردار کرن.
ئەڤرۆ نیوز:
بالیۆزخانا ئەمریکا ل بەغدایێ د داخۆیانیەکێ دا هێرشا ل سەر کارمەندێن کونسولخانا تورکیا ل هەولێرێ شەرمزار دکەت و پشتەڤانیا خوە بۆ پاراستنا هەموو دبلۆماتکارێن بیانی ل عیراقێ و هەرێما کوردستانێ دیار دکەت.
هەژی ئاماژەپێدانێ یە کو ئەڤرۆ ل ئێک ژ خوارنگەهێن هەولێرێ تەقە ل چەند کارمەندێن کونسولخانا تورکیا هاتە کرن و کارمەندەکێ جانێ خوە ژ دەست دا.
ئەڤرۆ نیوز:
ئه‌ڤرو سپێدێ 17/ 7/2019 ل هولا ئوتێلا دلشاد پلاس ب ئاماده‌بونا فه‌رهاد ئه‌مین ئه‌تروشى پارێزگه‌رێ دهوكێ واسماعیل محمد هاریكارێ پارێزگه‌رى بو كاروبارێن ئاواره وپه‌نابه‌ران وبه‌رپرسێن رێكخراوا UNHCR ل ئیراقێ وكوردستانێ وركشوپه‌ك بو كارمه‌ندێن فه‌رمانگه‌هێن ئاكنجیبونێ ل هه‌رسێ پارێزگه‌هێن هه‌رێمێ ورێڤه‌به‌رێن كه‌مپێن په‌نابه‌ران هاته ڤه‌كرن .
ل به‌راهیێ پارێزگه‌رێ دهوكێ خوشحالیا خو ب ڤه‌كرنا وركشوپێ دیاركر وگوت:بابه‌تێ ئاكنجیبونا په‌نابه‌ران ل هه‌رێما كوردستانێ ب گشتى ول پارێزگه‌ها دهوكێ ب تایبه‌تى زور یێ گرنگه چونكو ژماره‌كا زور یا په‌نابه‌ر وئاواره‌یان ل سنورێ پارێزگه‌هێ دژین وژبه‌ر چه‌ندین قه‌یرانان وه‌كو پێدڤى هاریكاریا وان نه‌هاتیه كرن وژرێكخراوێن مروڤایه‌تى وجڤاكێ ده‌وله‌تى خواست كو پتر هاریكاریا وان بهێته كرن.
هه‌روه‌سا گوت: ئێك ژكێشێن سه‌ره‌كى یێن په‌نابه‌ران ل ده‌ڤه‌رێ ئه‌وه نه‌بونا به‌لگه‌نامه‌یێن یاسایى یێن ئاكنجیبونێ یه وپه‌نابه‌ر نه‌شێن وه‌كو پێدڤى ژیاناخو یا ئاسایى ده‌ربازكه‌ن وخوشحالیا خو نیشان دا بو ده‌ستپێشخه‌ریا حكومه‌تا ئیراقا فیدرال وحكومه‌تا هه‌رێما كوردستانێ كو ب هه‌ڤكاریا رێكخراوا UNHCRولایه‌نێن په‌یوه‌ندیدار ئاكنجیبونا په‌نابه‌ران ب رێكێن یاسایى بهێته رێكخستن وئاریشێن وان بهێنه چاره‌سه‌ركرن وبره‌نگه‌كێ ئاسایى ژیانا خو ده‌ربازكه‌ن هه‌تا كاودانێن وه‌لاتێن وان به‌رقرار دبن وڤه‌گه‌رنه سه‌ر جه و وارێن خو .
ل دوماهیێ پارێزگه‌رێ دهوكێ ئاماژه دا ژمارا په‌نابه‌ر وئاواره‌یان ل سنورێ پارێزگه‌هێ وخواست كو هه‌موو لایه‌ن دهه‌ڤه‌كاربن بو چاره‌سه‌ركرنا هه‌موو ئاریشێن وان وسه‌ركه‌فتن بو پشكدارێن وركشوپێ خواست.
پاش به‌رپرسێن رێكخراوا UNHCR ل ئیراقێ وكوردستانێ په‌یڤێن خو پێشكێشكرن وگرنگیا وركشوپێ به‌رچاڤكرن.
پاش ده‌ست ب به‌رنامێن وركشوپێ هاته كرن وگه‌نگه‌شه ل سه‌ر شێوازێ رێكخستن ودانا به‌لگه‌نامه‌یێن یاسایى یێن ئاكنجیكرنا په‌نابه‌ران ل هه‌رێما كوردستانێ هاتنه كرن.
هه‌ژى گوتنێ یه وركشوپ بو (40) كارمه‌ندێن ئاست بلند یێن هه‌رسێ فه‌رمانگه‌هێن ئاكنجیبونێ ل دهوك وهه‌ولێر وسلێمانیێ و رێڤه‌به‌رێن كه‌مپێن په‌نابه‌ران هاتیه ڤه‌كرن وبو ماوێ دوو روژا دێ یا به‌رده‌وامبیت.
ل دوڤ ئامارێن رێكخراوا UNHCR نێزیكى (250) هزار په‌نابه‌رێن سورى و(40) هزار په‌نابه‌رێن تركى وئیرانى ل هه‌رێما كوردستانێ هه‌نه هنده‌كا به‌لگه‌نامه‌یێن یاسایى هه‌نه ویێن دن دڤێت دوباره ئاكنجیبونا وان بهێته رێكخستن بو وێ یه‌كێ بشێن بێ ئاریشه ژیانا خو ده‌ربازكه‌ن.
ئەڤرۆ نیوز:
یاریزانێ بەرنیاس یێ ئیتالی و کابتنێ یانا روما یێ بەری نوکە دی روسی نێزیکی ئیمزاکرنا ھەڤبەستا یانا بوکا جونیور یا ئەرژەنتینی بوویە پشتی ئێک ژ ھەڤالێن وی یێن نێزیک شیای وی رازی بکەت یاریێ بۆ وێ یانا ئەرژەنتینی بکەت بوو ماوێ ھەشت ھەیڤان.
مالپەرێ سکای سپورت یێ ئیتالی دیارکریە وەسا دھاتە چاڤەرێکرن دی روسی دێ ب فەرمی دەست ژ یاریا تەپا پێ بەردەت و بەر ب ژیانا راھێنەری چیت لێ ئێک ژ ھەڤالێن وی یێن نێزیک شیا ئەوی رازی بکەت ل ماوێ بھێت یاریێ ل یانا بوکا جونیور بکەت بۆ ماوێ ھەشت ھەیڤان بەرامبەر ٨٠٠ ھەزار یورۆیان .
دی روسی یێ ٣٥ سالی ئەوێ بوو ماوێ ١٨ سالان یاری ل یانا روما کری و ل ماوێ بوری ھەڤبەستا ئەوی ل گەل وێ یانێ ب دووماھی ھاتی چەندین داخوازی گەھشتبوونە بەر دەستێ ئەوی ژ یانێن نافخوی ژ ئەوانا یانا فیرونتینا ب فەرمی داخوازی ژێ کر بوو لێ وی یاریزانی رەتکر بوو ژبەرکو دخواست بەر ب کارێ راھێنەری بچیت .
ئەڤرۆ نیوز:
سەرۆک کۆمارێ تورکیا رەجەب تەیب ئەردۆگان راگەهاند کو مخابن ئەڤرۆ ل هەولێرێ تەقە ل کارمەندێن کونسولخانا مە هاتیە کرن و کارمەندەکێ مە جانێ خوە ژ دەست دایە.
سەرۆک کۆمارێ تورکیا راگەهاند کو بزاڤێن مە ل گەل حوکمەتا عیراقێ و هەرێما کوردستانێ بەردەوامن دا تاونبارێن وێ روودانێ بهێنە ئاشکرا کرن و بگەهنە سزایێن خوە.
ئەڤرۆ نیوز:
ئاسایشا هەولێرێ د راگەهاندنەکێ دا بەلاڤ دکەت کو ئەڤرۆکە ل ئێک ژ خوارنگەهێن هەولێرێ د ئەنجاما تەقەکرنێ دا کارمەندەکێ کونسولخانا تورکیا هاتیە کوشتن و وەلاتیەک ژی بریندار بوویە.
د بەردەوامیا راگەهاندنێ دا هاتیە دیار کرن کو ئەم ب توندی ڤێ روودانێ شەرمزار دکەین و هەموو ئالیەکێ ب تایبەتی ژی دبلۆماتکارێن بیانی پشتراست دکەین کو ناهێلین چو کەس و ئالی ئارامیا هەرێما کوردستانێ تێک بدەن و دێ تاوانبار ژی گەهنە سزایێن خوە.
ئەڤرۆ نیوز:
ئەڤرۆ پشکێشانا ڤاڤارتنێن موندیالا جیھانی یا ٢٠٢٢ ل قەتەر بۆ کێشوارێ ئاسیا ھاتە کێشان ب پشکداریا ٤٠ ھەلبژارتیان و ھاتنە بەلاڤەکرن ل سەر ھەشت کومان کو قارەمانێن ھەر کومەکێ ئێکسەر دەربازی قوناغا دووماھیێ یا ڤاڤارتنا بیت ل گەل چار باشترین ھەلبژارتیێن رێزا دوێ. ئەرکێ ھەلبژارتیێ عیراقێ دێ یێ ب زەحمەت بیت پشتی کەقتی یە د کوما سیێ دا پێکھاتی نە ژ ھەلبژارتیێن ئیران و بەحرێن و کومبودیا و ھونگ کونگ.
ھەر ھەشت کوم ب ڤی رەنگێ خوارێ نە کو قارەمانێن کوما وەکو
کوما ئێکێ: چین، سوریا،ڤلپین، مالدوڤیا و گوام.
کوما دوێ: ئوسترالیا، ئوردون، تایوان، کوێت و نیپال
کوما سیێ: ئیران، عیراق، بەحرێن، ھونگ کونگ و کومبودیا.
کوما چارێ: سعودیە، ئوزباکستان، ڤەلەستین، یەمەن و سەنگاڤورە
کوما پێنچێ: بنگلادیش، عومان، ھندستان، ئەڤغانستان و قەتەر.
کوما شەشێ: ژاپون، قیرغستان، تاچیگستان ، میانمار و منگولیا
کوما حەفتێ: ئیمارات، ڤێتنام، تایلەند، مالیزیا و ئەندونوسیا
نيشاندان