ئەڤرۆ نیوز،بارزان مزووری:
دلشاد محەمەد،راگەهاندنگار ژ پشكا هاتنوچوونا شێخان بۆ ئەڤرۆ نیوز گوت:ئه‌ڤ شه‌ڤه پشتى فتارێ ل سەر رێيا سەرەكیا شێخان بۆ دهوك ل نێزیك ناحیا باعەدرێ، روودانەك دناڤبەرا ترومبێلەك پیكاپ دێر و ترومبێلەك پیكاپ تویتا په‌يدابوو د ئەنجام دا 5 كەس بریندار دبن وبۆ نەخوه‌شخانا شێخان هاتنه ڤەگوهاستن ئێك ژوان بریندارا زارویەك بوو مەترسی ل سەر ژيانا وى يهه‌بوو ونوكه يێ دبن چاڤدێریا نوژدارایە.
ل گۆرەی پێزانینان، ئەیمەن سەردار قوتابیێ پولا چارێ بۆ ل قوتابخانا زێبار هەر ب هەمان ترومبێلا کوستەرێ هاتنوچوونا مال دکر.
ئه‌ڤرۆ نیوز، نه‌وزاد هلۆرى:
به‌رده‌وامبوونا بارانێ وه‌رزێ دورینا گیایى ئێخسته د هه‌یڤا ره‌مه‌زانێ دا، ئه‌ڤێ یه‌كێ ژى كارتێكرن ل وه‌لاتیان كریه، پشكه‌ك ژ وه‌لاتیان وه‌ختێ پاشیڤى َهه‌تا رۆژهه‌لاتێ و پشكه‌كا دى ژى پشتى نڤێژا ئێڤارى هه‌تا به‌رى مه‌غره‌ب، دیسان پشكه‌ك ژى ب شه‌ڤ گیایى ددورین داكو كارتێكرن ل روژيا وان نه‌كه‌ت، ب گوره‌ى ئاخفتنێن وه‌لاتیان هه‌ر كه‌سه‌كێ د هه‌یڤا ره‌مه‌زانێ دا گیایى نه‌دوریت ئه‌و نه‌شێت پشتى ره‌مه‌زانێ گیایى بدوریت و دێ مینیته مه‌حتل.
ئەڤرۆنیوز,رەزوان رۆژبەیانی:
پشتی پێنج رۆژان ژ دیارنەمانا گەنجەكێ 22 سالی كو پەنابەرێ رۆژئاوایێ كوردیستانێ یە و ل كەمپا گەویلان ل قەزا بەردەرەش ئاكنجیە ئەڤرۆ تەرمێ وی ب مری هاتە دیتن.
ژێدەرەكی فەرمی یێ ئیمناهیێ ل قەزا بەردەرەش كو نەڤیا ناڤێ وی بهێتە ئاشكرا كرن ,بۆ ئەڤرۆنیوز دیاركر” گەنجەكی 22 سالی بناڤێ دلشاد خلیل عمر حسن پەنابەرێ رۆژئاڤایێ كوردستانێ كو ئاكنجیێ كەمپا گەویلانە ل سنوورێ قەزا بەردەرەش , نەخوشیا دەروونی ب رێژەیا 100%هەبوویە چەندین جار بابێ وی بریە ده‌ڤ نوشداران بەلێ چێنەبوویە”.
گوت ژی” وەسا دیار بوویە كو گوتینە بابێ وی كورێ تە ئه‌جنه هه‌نه و پێدڤیە تو ببەیە دەف مەلایان”. ئەو ژێدەر ئاشكرا ژی كر ل رێكەفتێ 14/5/2019 ئەو گەنج ژ مال دەردكەڤیت و نازڤریت و ئەڤرۆ ئێكشه‌مبى 19/5/2019 تەرمێ وی ب مری ل نزیك كەمپێ ژلایێ مەڤە هاتە دیتن و هاتە رەوانە كرن بۆ نۆشداریا داد ل قەزا ئاكرێ دیار ژی كر كو چو نیشانێین لێدان یان هەر نیشانەكێ دی ب سەر لاشێ وی ڤە دیار نەبوویە تنێ وەسا خویا بوویە كو ل وی جهی لێ هاتیە دیتن ب تووشی سەرعێ (تەپێ) بویە و گیانێ خوە ژدەست دایە.
ئه‌ڤرۆ نيوز:
هه‌ردو فراكسيۆنێن پارتى ديموكراتى كوردستان وبزاڤا گۆران ل په‌رله‌ماني كوردستانێ پشته‌ڤانيێ ل پرۆژێ چاكسازيێ دكه‌ن ول ئاستێ جادا كوردستانى ژى دا ئه‌و پرۆژه‌يه ب گاڤه‌كا گرنگ دهێته هژمارتن.
به‌همه‌ن كاكه عه‌بدوللا، ئه‌ندامێ په‌رله‌مانێ كوردستانێ ژ فراكسيۆنا پارتى راگه‌هاند” پارتى ديموكراتى كوردستان پرۆژه بۆ چاكسازيێ د هه‌موو سێكته‌ران دا يێ هه‌ى وجوداهيێ د ناڤبه‌را پلێن بلند وخه‌لكێ دى كێم دكه‌ت، زێده‌بارى وێ چه‌ندێ پارتى پشته‌ڤانا تمام يا وى پرۆژه‌يه، د هه‌مان ده‌م دا وه‌كو ئه‌وله‌ويه‌تا به‌رنامێن خوه ديار دكه‌ت”.
ئاشنا عه‌بدوللا، ئه‌نداما په‌رله‌مانێ كوردستانێ ژ بزاڤا گۆران بۆ مالپه‌رێ فه‌رمى يێ پارتى دياركر” ئارمانجا مه چاكسازيێ د ڤێ كابينێ دا بكه‌ين وئه‌ڤ كابينا حوكمه‌تێ يا جودا بيت ژ يێن بۆرى، بۆ ڤێ مه‌ره‌مێ ژى ل ده‌مێن بۆرى مه باجا زۆر يا داى، نوكه ژى نێزيك بوونا مه ژ پارتى بۆ پێكئينانا حوكمه‌تێ، د وێ چه‌ندێ دايه ئه‌م دخوازين وى به‌رنامێ چاكسازيێ بجهبينين وده‌رگه‌هێ مه بۆ دانوستاندنێ يێ ڤه‌كريه بۆ وان لايه‌نێن پشته‌ڤانيێ ل ڤى پرۆژه‌ى دكه‌ن”.
گۆت ژى” ئێك تيمى د كارێ حوكمه‌تێ دا بۆ هه‌موو لايه‌كى يا گرنگه”.
ئه‌ڤرۆ نیوز:
ده‌سته‌یا خانه‌نشینیا نیشتمانى یا عیراقێ راگه‌هاند كو وه‌زیرێ دارایى یێ عیراقێ فوئاد حسێن رازیبوونا خوه ل سه‌ر به‌لاڤكرنا مووچێن خانه‌نشینێن مه‌ده‌نى وله‌شكرى یێن عیراقى ب شێوه‌كێ هه‌یڤانه ل شوینا هه‌ر دو هه‌یڤان جاره‌كێ.
ئه‌و بریاره دێ ل ده‌ستپێكا هه‌یڤا خزیرانا 2019 هێته بجهئینان، پشتى ده‌سته‌یا ناڤبرى هه‌موو پێرابوونێن پێدڤى یێن وێ بریارێ ئه‌نجام داین.
ئەڤرۆ نیوز، قائید میرۆ:
بەرپرسەکێ پارتی دیموکراتی کوردستان ل مووسل ئاشکرا کر، ھەتا نوکە زێدەتری حەفت سەد ھزار دەنگدەرێن پارێزگەھا نەینەوا پشکداری د پڕۆسا بایۆمەتریێ دا کریە و دبێژیت: پتریا پشکداران دکەڤنە سنوورێ دەڤەرێن کوردستانی.
مەناف حەسەن، بەرپرسێ نڤیسینگەھا ھەلبژارتنێن پارتی ل مووسل بۆ ئەڤرۆ نیوز گۆت: “پڕۆسا بایۆمەتریا دەنگدەران ل سنوورێ پارێزگەھا نەینەوا یا بەردەوامە و پەیوەندی ب چارەنڤیسێ دەنگدەرانڤە ھەیە بۆ ھەلبژارتنێن داھاتی، ئانکو ھەر کەسەکێ بخوازیت ل ھەلبژارتنێن داھاتی پشکداریێ بکەت، پێدڤیە پشکداریێ د بایۆمەتریێ دا بکەت و ببیتە خوەدیێ کارتا دەنگدانێ، ل سنوورێ پارێزگەھا نەینەوا ھەتا رۆژا ١٢ی ئایارا سالا بۆری ٣٢٠ ھزار کەسان پشکداری د بایۆمەتریێ دا کربوو، بەلێ د دووڤ دا قووناغەکا دی دەستپێکریە و نوکە یا بەردەوامە”.
مەناف حەسەن دیار کر، د قووناغا دویێ یا بایۆمەتریێ دا کو پشتی ھەلبژارتنێن سالا بۆریا پەرلەمانێ عیراقێ دەستپێکریە ٤٠٠ ھزار کەسێن دیژی پشکداری کریە و گۆت: “ھەتا نوکە زێدەتری ٧٠٠ ھزار دەنگدەران پشکداری کریە، ئەڤا بۆ مە گرنگ ئەڤەیە پتریا کەسێن پشکداری د بایۆمەتریێ دا کری دکەڤنە سنوورێن دەڤەرێن مادێ ١٤٠ یێ دستوورێ عیراقێ و کوردن، بەلێ مخابن ھندەک ژ وان دەڤەران ل بن کۆنتڕۆلا حوکمەتا عیراقێ نە و دبن دەستھەلاتا ھەرێما کوردستانێ دا نینن”.
ھەولێر، قائید میرۆ:
حوکمەتا ھەرێما کوردستانێ و پەرلەمان ل دۆر ئالۆزیێن دەڤەرێ و کاریگەریێن ھەڤڕکیا ئیران و ئەمریکا کۆمبوون و پەرلەمانتارەک ژی دبێژیت: پێدڤیە بەرھەڤی ھەبن بۆ ھەر شەڕەکی ژ لایێ ئابووری ڤە و نابیت ھەرێما کوردستانێ یا بێ پلان بیت.
محەمەد سەعدەدین، ئەندامێ لیژنا پەیوەندیان ل پەرلەمانێ کوردستانێ بۆ ئەڤرۆ نیوز دیار کر، ب ئەگەرێ ئالۆزیێن ناڤبەرا وەلاتێن ئێکگرتیێن ئەمریکا و کۆمارا ئیسلامیا ئیرانێ رەوشا دەڤەرێ ب گشتی تێکچوویە و نوکە دەڤەر یا د رەوشەکا تایبەت دا دەرباز دبیت، لەوڕا ئەڤرۆ رۆژا ئێک شەمبی ١٩/٥/٢٠١٩ لیژنا کاروبارێن دەرڤە یا پەرلەمانێ کوردستانێ مێھڤانداریا فەلاح مستەفا، بەرپرسێ فەرمانگەھا پەیوەندیێن دەرڤە یێن حوکمەتا ھەرێما کوردستانێ کربوو، ھەتا بزانین حوکمەتا ھەرێمێ چو بەرھەڤی بۆ ئەڤان ئالۆزیان کرینە.
محەمەد سەعدەدین ئاماژە ب وێ چەندێ ژی کر، ھەرچەندە ھەرێما کوردستانێ لایەنگر نینە بۆ چو وەلاتەکی، بەلێ پێدڤیە ھەرێما کوردستانێ خوە بەرھەڤ بکەت بۆ ھەر روودانەکێ و گۆت: “ب تایبەتی ئیران وەلاتەکێ گرنگ و جیرانێ مەیە و بزاڤێن بازرگانی د ناڤبەرامە دا ھەنە، ئەگەر بھێـت و شەڕەک رووبدەت دێ چو کاریگەری ل سەر ھەرێما کوردستانێ ھەبیت، ھەروەسا ئەمریکا ژی چەند بڕیارەک دەرکرینە، ژ وانا: راگرتنا ڤیزا بۆ وەلاتیێن خوە یێن بخوازن سەرەدانا عیراقێ بکەن، ئەڤێ چەندێ ژی ئەم دلگرانکرینە، ژ بەرکو رەوشا ئەمنیا ھەرێما کوردستانێ یا سەقامگیرە و دبیت بھێتە جوداکرن ل دەڤەرێن دی یێن عیراقێ”.
ئەڤرۆ نیوز، لەزگین جوقی:
ئەندامەکێ جڤاتا پارێزگەھا نەینەوا دیار کر کو نابیت چەک ل سەر خەلکێ گوندان ل پارێزگەھا نەینەوا بھێتە بەلاڤکرن و دبێژیت: ئەم وەکو جڤاتا پارێزگەھا نەینەوا رەت دکەین کو چەک ب مەرەما بەرەڤانیکرنێ ل سەر خەلکێ گوندان ژ بەر مەترسیا تیرۆرستێن داعش بھێتە بەلاڤکرن.
خەلیل شەمۆ، ئەندامێ جڤاتا پارێزگەھا نەینەوا ئاشکرا کر کو پێدڤیە چەک د دەستێ حوکمەتێ و دەزگەھێن ئەمنی ب تنێ دا بیت و نابیت چەک بکەڤیتە د دەستێ وەلاتیان دا ب مەرەما وێ چەندێ کو بەرەڤانیێ ژ خوە بکەن دەمێ تیرۆرستێن داعش قەستا گوندێن وان دکەن، ھەر وەکو بەری چەند رۆژان بەغدا گۆتی دێ چەکی دەینە ٥٠ گوندێن سەر ب مووسلێ ڤە ئەڤە ژی بۆ وێ چەندێ یە خەلک بەرەڤانیێ پێ ژ خوە بکەن، ژ بەر تیرۆرستان لێ تشتەکێ باش نینە چەک د دەستێ خەلکی دابیت.
خەلیلی خویا ژی کر کو ئەڤ پێنگاڤا چەککرنا خەلکێ گوندان یا د جھێ خوە دا نینە و گۆت: “ئەم وەکو جڤاتا پارێزگەھا نەینەوا رەت دکەین چەک بکەڤیتە د دەستێ خەلکی دا و پێدڤیە چەک د دەستێ وەلاتیان دا نەبیت، بەلکو ب تنێ د دەستێ حوکمەتێ دابیت.
ئەڤرۆ نیوز:
بەرپرسەکێ رژێما سووریێ بێی کو ناڤێ وی بهێتە ئاشکرا کرن بۆ ئاژانسا سپۆتینگ یا روسیا دیار کریە کو ژ دوهی وەرە مە ئاگربەست ل ئدلبێ راگەهاندیە و ئارمانجا مە ژی پاراستنا ژیانا وەلاتیێن سڤیلە، لێ مخابن پشتی راگەهاندنا ئاگربەستێ هەتا نها ١٣ جاران گرۆپێن چەکدار هێرشی لەشکرێ مە کرینە و سێ سەربازێن سووریێ ژی جانێ خوە ژ دەست داینە.
ئاژانسا سپۆتینگ یا روسیا دیار کریە کو گرۆپێن چەکدار یێن ل ئدلبێ ناخوازن شەر بهێتە راگرتن و ل دژی راگەهاندنا ئاگربەستێ نە.
نيشاندان