ئه‌ڤرۆ نيوز:
قائیمقامێ قەزا دهوکێ ئاشکراکر ژبەر نەپێگریان وان ب رێنماێن ساخلەمیێ ئەڤرو لیژنا دوفچوونێ بریاردا ب داخستنا سەمونخانەکێ ل دهوکێ.
(جەهوەر عەلی) قائیمقامێ قەزا دهوکێ راگەهاند سەمونخانا سولاف ل تاخێ گرێ باسێ ژبەر پیساتیا جهێ وان هاتە داخستن وگوت ئەڤ سەمونخانە ناهێتە ڤەکرن هەتا پێگریێ ب رێنماێن لیژنا دوفچوونا بازاری بکەت و کەرستێن خو یێن کاری سەخبێری بکەت.
ئەڤرۆ نیوز:
عەبدوللا ئۆجەلان سەرۆکێ زیندانکری یێ پەکەکێ ب رێیا پارێزەرێن خوە راگەهاند کو دڤێت ل تورکیا دوور بین ژ شەری و هەموو پرس ب رێکێن سیاسی و دیموکراتی بهێنە چارەکرن.
ئۆجەلان ل دۆر قەیرانا سووریا و پرسا کوردی ل وی وەلاتی ژی دیار دکەت کو دڤێت هێزێن سووریا دیموکرات کار بۆ پارچەکرنا ئاخا سووریێ نەکەن و دڤێت هەموو ئالی بزاڤێ بکەن ب رێیا دستووری قەیرانا سووریێ بهێتە چارەکرن.
ل دۆر هەڤالێن وان یێن کو نها ل زیندانێن تورکیا دەست ب مانگرتنێ ژی کرینە ئۆجەلانی دبێژیت: مە نەڤێت چو کەسەک ژ برسا بمریت و دڤێت هەڤالێن مە گرنگیێ بدەنە ساخلەمیا خوە.
سەرۆکێ پەکەکێ هەروەسا دبێژیت ئەم دشێین هەموو پرسێن دەڤەرێ و ب تایبەتی ژی پرسێن ل تورکیا دوور ژ شەری و ب ئاشتیێ و دیموکراسیێ چارە بکەین.
ئەڤرۆنیوز، ڕەزوان ڕۆژبەیانی:
بۆتان بۆتانی بەرپرسێ ڕاگەھاندنا قایمەقامیا قەزا بەردەڕەش بۆ ئەڤرنیوز خویاکر ئەڤرۆ رێککەفتێ ٦/٥/٢٠١٩ د سەرەدانەکا مەیدانی دا قایمەقامێ قەزا بەردەڕەش خەلیل مەحمود اوسی و دگەل داواکارێ گشتی و رێڤەبەرێین پۆلیس و کەرتێ تەندروستی ل قەزا بەردەڕەش بۆ ناڤ بازارێ بەردەڕەش ب تایبەت دەرمانخانان دەستپێکر و گوت: ( ل دووڤ رێنمایی و بریارێین حوکمەتا ھەرێمی چار دەرمانخانە ژ ئەگەرێ دەرمانێن ئێکسپایەر و نە ئامادەبوونا دکتۆرێین دەرمانساز ل ھەر چار دەرمانخانان ھاتنە دائێخستن و ل دووڤ یاسایان لێپرسین دگەل وان دھێنە کرن و چاڤدێری ل سەر وێ کارتێ و کەرتێن دی دێ بەردەوام بن).
ئەڤرۆ نیوز:
جۆن بۆلتۆن شیرەتکارێ ئاسایشا نەتەوی یا ئەمریکا راگەھاند کو گەمیەکا مەزن یا شەری و گەلەک فرۆکێن شەری مە رەوانەی رۆژھەلاتا ناڤین کریە، مە ب ڤێ چەندێ پەیامەکا ئاشکرا دایە ئیرانێ کو رەوشا دەڤەرێ ئالۆز نەکەت، چونکو ئەم ناھێلین ئیران ب رێیا گرۆپێن تیرۆرستی مەترسیەکا دی ل رۆژھەلاتا ناڤین بۆ مە و ھەڤپەیمانێن مە دروست بکەت و دێ یا پێدڤی ل دژی ئیرانێ کەین.
ناڤھاتی ئەو یەک ژی دیار کر کو ھەتا رژێما ئیرانێ ھەلویستێ خوە نەگوھۆریت و داخوازیێن مە قەبوول نەکەت دێ فشارێن مە ل سەر دەستھەلاتا ئیرانێ د بەردەوام بن.
ئەڤرۆ نیوز، عەلی حاجی :
رێڤەبەرێ ناحیا رزگاری بۆ ئەڤرۆ نیوز دیارکر ئەو کوژمێ پارەی ھاتیە تەرخان کرن بۆ دوبارە چێکرنا جاددا ئیبراھیم خەلیل بۆ زاخۆ یێ کێمە و داخوازا زێدەکرنا وی ھاتیە کرن.
زێدەتر سەروەر سەعید گۆت: رێیا سەرەکی یا ئیبراھیم خەلیل بۆ زاخۆ بریارا دوبارە چێکرنا وێ ھاتیە دان و ٢ ملیار دینار ژی ھاتینە مەزاختن و ئەو پروژە بوویە تەندەر لێ ئەو پارێ ھاتیە تەرخان کرن یێ کێمە پێدڤی یە پارەکێ باشتر بھێتە تەرخان کرن و ئەڤ چەندە بویە ئەگەر ھەتا نوکە کار دەست پێنەکری یە و د نوکە دا پەیوەندی ب وەزارەتا دارایی ھاتیە کرن دا کو ئەڤ کوژمێ پارەیی بھێتە زێدەکرن ژبەر کو جاددەیەکا سەرەکی یە دڤێت ب شێوەیەکێ باش بھێتە راکرن و دوبارە بھێتە چێکرن ڤە.
ئەڤرۆ نیوز:
رۆژناما ئەلعەرەبی د راپۆرتەکێ دا دیار کریە کو کوردێن سووریا نها کار بۆ هندێ دکەن هەرێمەکا وەکو هەرێما باشورێ کوردستانێ بۆ خوە ئاڤا بکەن و ئەمریکا ژی پشتەڤانیێ ل وان دکەت، چونکو سیستەمێ کوردان و داخوازیێن وان د بەرژەوەندیا ئەمریکا دانە.
رۆژناما ئەلعەرەبی ئەو یەک ژی دیار کریە کو کورد نها ل سووریێ رۆژ ب رۆژێ بهێزتر لێ دهێن و دەستهەلاتا بەشاری ژی باش دزانیت کو ئەمریکا ب هەموو هێزا خوە پشتەڤانیێ ل کوردان دکەت و ژ بەر هندێ ژی زەحمەتە شام بشێت شەرێ کوردان بکەت.
ئەڤرۆ نیوز:
ئاسایشا دھۆکێ ئەڤرۆ رۆژا دوشەمب ٦-٥-٢٠١٩ راگەھاند ئەوان پێنج کەس ل پارێزگەھا دھۆکێ دەستەسەر کرینە کو چار کیلویێن ماددەیێن ھوشبەر دگەل دابووینە و دانپێدان ژی کریە.
زێدەتر د راگەھاندنەکێ دا ئاسایشا دھۆکێ دیارکر ئەو شیاینە ل ٤-٥-٢٠١٩ پێنج کەسان ل دھۆکێ دەستەسەر بکەن کو خەلکێ پارێزگەھا دھۆکێ ب خوەنە و تەمەنێ وان ناڤبەرا ٢٠ ھەتا ٣٥ سالیێ دانە و چار کیلویێن ماددەیێن ھوشبەر دگەل دابووینە و دانپێدان ژی ب ڤێ چەندێ کریە و ھاتینە رەوانەکرن بۆ دادگەھێ داکو سزایێ خوە وەرگرن.
ئەڤرۆ نیوز:
ئەنجوومەنی نشتیمانی یێ کوردی ل سووریێ راگەهاند کو دڤێت هێزێن نێڤدەولەتی کار بۆ دەرخستنا هێزێن چەکدار یێن ژ عەفرینێ بکەن، چونکو هەتا عەفرین د بن کۆنترۆلا وان هێزان دا بیت خەلکێ وی باژێری نەشێن ڤەگەرنە ڤە مالێن خوە.
ئەنجوومەنێ نشتیمانی یێ کوردی ل سووریێ هەروەسا پێشوازی ل دەستپێشخەریا فرەنسا بۆ چارەکرنا پرسێن رۆژئاڤایێ کوردستانێ ژی دکەت.
ئەڤرۆ نیوز:
ئه‌ڤرۆ ل كوچكا مێهڤانداریا فه‌رهاد ئه‌مین ئه‌تروشى پارێزگه‌رێ دهوكێ پێشوازیا (رێنێ سولانو) به‌رپرسێ به‌رنامێن سندوقا چاڤدێریا جڤاكى یێن به‌نكا ده‌ولى ل ئیراقێ وشاندێ دگه‌لدا كر.
دهه‌ڤدیتنه‌كێدا ب ئاماده‌بونا به‌هزاد على ئاده‌م جێگرێ پارێزگه‌رێ دهوكێ به‌حسێ به‌رنامێن سندوقا چاڤدێریا جڤاكى یێن به‌نكا ده‌ولى ل ئیراقێ ب گشتى ول پارێزگه‌ها دهوكێ ب تایبه‌تى هاته كرن.
پارێزگه‌رێ دهوكێ خوشحالیا خو ب سه‌ره‌دانا شاندێ ناڤبرى دیاركر وده‌ست خوشى ل تیمێ به‌رنامێن سندوقا چاڤدێریا جڤاكى یێ به‌نكا ده‌ولى ل ئیراقێ كر كو هاتینه ژنێزیك پێدڤیێن وان گوندا بزانن یێن كو بریاره پروژێن خزمه‌تكارى بو بهێنه دورستكرن وپشته‌ڤانیا پارێزگه‌هێ نیشان دا بو هه‌ر هاریكاریه‌كێ دگه‌ل تیمێ ناڤبرى بوبجه ئینانا وان پروژان.
هه‌ژى گوتنێ یه حكومه‌تا ئیراقا فیدرال كوژمێ 300 ملیون دولار ژبه‌نكا نیف ده‌وله‌تى قه‌ر كرینه كو بریاره دماوێ پێنج سالان دا چه‌ندین پروژێن خزمه‌تكارى ل هه‌ژارترین سێ پارێزگه‌هێن ئێراقێ (موسه‌نا ل باشورێ وه‌لاتى وتكریت ل ناڤه‌راستا ئیراقێ ودهوك ل سه‌ر ئاستێ هه‌رێما كوردستانێ) بهێنه ئه‌نجامدان.
نيشاندان