ئەڤرۆ نیوز:
مەزنە کومپانیا بوارێ پەترولێ ئێکسۆن موبیل یا ئەمریکی کارمەندێن خوە دکەت خوە ژ زەڤیێن پەترولا ( قورنە ١) یا باژێرێ بەسرا ڤەکێشانە دوبەی.
ل دووڤ پەیامەکێ ئاژانسا رویتەرز، کومپانیا ئێکسۆن موبیل ھەموو کارمەندێن خوە یێن بیانی ژ زەڤیێن پەترولێ بۆ دوبەی ڤەکێشان.
د ڤی دەربارەی بەرپرسێن وەزارەتا پەترولا عیراقێ بۆ دەزگایێن راگەھاندنێ دیارکر ڤەکێشانا کومپانیا ئێکسۆن موبیل ژ عیراقێ چو کارتێکرنا خوە ل سەر بەرھەمئینانا پەترولێ نابیت و ئەو دێ بەردەوام بن ل سەر کارێ خوە ب ھەمان شێوێ بەری نوکە.
ئەڤرۆ نیوز:
وەزیرێ ناڤخوە یێ تورکیا سلێمان سویلو راگەهاند کو رێکخراوا تیرۆرستی یا داعشێ ل تورکیا خوە بۆ هندەک کریارێن تیرۆرستی بەرهەڤ دکەت و هەموو هێزێن مە ژی ل دژی هندێ د ئامادەباشیێ دانە.
وەزیرێ ناڤخوە یێ تورکیا ئەو یەک ژی دیار کر کو دەزگەهێ هەوالگیریێ پێزانینێن تەمام ل دۆر بزاڤێن داعشێ هەبوون و ژ بەر هندێ ژی مە هەموو هێزێن خوە کرینە د ئامادەباشیێ دا و ناهێلین تیرۆرستێن داعشێ چو چالاکیەکێ ل دژی وەلاتیێن مە بکەن.
ئەڤرۆ نیوز:
فراکسیۆنێن کوردستانێ ل پەرلەمانێ عیراقێ ئەڤرۆ راگەهاندن کو هندەک دەستێن نەدیار رەوشا خانەقینێ ئالۆز دکەن و سوتنا گەنمێ جۆتیارێن خانەقینێ و گەفێن کو رۆژانە ل وەلاتیان دهێتە کرن دێ بیتە ئەگەرێ هندێ کو رەوشا وی باژێری ئالۆزتر لێ بهێت و دڤێت بلەز دەستێوەردان بهێتە کرن.
فراکسیۆنێن کوردستانێ ل پەرلەمانێ عیراقێ هۆشداریا هندێ ژی ددەن کو هەکە رەوش وەسا بەردەوام بیت ئەو یەک دێ بیتە ئەگەرێ هندێ کو ب هزاران وەلاتی ژ خانەقینێ برەڤین و دێ ئەو یەک بیتە ئەگەرێ روودانا کارەساتەکا مەزن و دڤێت حوکمەتا عیراقێ ب ئەرکێ خوە رابیت و وەلاتیێن خانەقینێ بپارێزیت.
ئەڤرۆ نیوز:
حەفتیا بۆری جەبار یاوەر ئەمیندارێ گشتی یێ وەزارەتا پێشمەرگەی دیار کربوو کو ژ بەر رەوشا ئالۆز یا دەڤەرێ ئەمریکا و ئەلمانیا بریار داینە مەشقدانا ب پێشمەرگێ کوردستانێ رابگرن.
لێ ئەڤرۆکە وەزارەتا پێشمەرگەی راگەهاند کو مەشقدانا پێشمەرگێ کوردستانێ ژ ئالیێ هەڤپەیمانیا نێڤدەولەتی یا ل دژی داعشێ دێ جارەکا دی دەستپێکەتە ڤە و چو گوهۆرینەک د بەرنامێ کارێ وان یێ مەشقدانا ب هێزێن پێشمەرگێ کوردستانێ ژی نینە.
ئه‌ڤرۆ نیوز:
به‌رپرسه‌كێ عه‌شیره‌تێن عه‌ره‌ب یێن عیراقێ راگه‌هاند، ئه‌مریكا 50 هزار سه‌رباز ل عیراقێ یێن به‌لاڤكرین وئیرانێ ژى مووشه‌كێن بالیستى داینه حه‌شدا شه‌عبى ل عیراقێ.
مزاحم ئه‌حمه‌د حوێت، په‌یڤدارێ عه‌شیره‌تێن عه‌ره‌ب بۆ ئاژانسا (ئه‌نادۆل) یا ده‌نگوباسان گۆت” ئێرانێ چه‌كه‌كێ زۆر گه‌هاندیه حه‌شدا شه‌عبى ل عیراقێ ب مه‌ره‌ما ئارمانجگرتنا هێزێن ئه‌مریكى ل عیراقێ و د نوكه دا ئه‌مریكا زێده‌تر ژ 50 هزار سه‌رباز یێن ل سه‌ربازگه‌هێن عیراقێ جێگیركرین”.
حوێت گۆت ژى” مه پێزانینێن پشت راستكرى یێن هه‌ین كو ل چه‌ندرۆژێن داهاتى دا نێزیكى 100 هزار سه‌رباز وراوێژكارێن دى یێن ئه‌مریكى دێ هێنه هنارتن بۆ عیراقێ وئارمانج ژ كۆمكرن وجێگیركرنا سه‌ربازێن ئه‌مریكى هێرشكرنه ل سه‌ر ئیرانێ”.
گۆت ژى” ئه‌و هێزا ئه‌مریكى ب چه‌ك وكه‌ره‌سته‌كێ سه‌ربازى یێ زۆر ل عیراقێ هاتیه جێگیركرن، هه‌رچه‌نده عیراق وه‌سا خوه نیشان دده‌ت كو دێ یا بێلایه‌ن بیت د ململانێ وشه‌رێ د ناڤبه‌را ئیرانێ وئه‌مریكا دا، به‌لێ عیراق دێ پشكه‌كا مه‌زن بیت د هه‌ڤكێشێن له‌شكرى وسیاسى د ناڤبه‌را ئه‌مریكا وئیرانێ”.
دیاركر” ئیرانێ به‌رهه‌ڤیێن تمام یێن كرین بۆ ب ئارمانجگرتنا هێزێن ئه‌مریكى ل عیراقێ وبۆ ڤێ مه‌ره‌مێ ژى هژماره‌كا مه‌زن ژ مووشه‌كێن بالیستى یێن ئیرانى راده‌ستى حه‌شدا شه‌عبى ل عیراقێ كرینه تاكو بنكه وباره‌گایێن هێزێن ئه‌مریكى ل عیراقێ ببنه ئارمانجێن وان”.
ئاماژه‌كر” گه‌هاندن وبه‌لاڤكرنا مووشه‌كێن بالیستى وجۆرێن چه‌كى ژ ئیرانێ بۆ عیراقێ ب چاڤدێریا قاسم سلێمانى بوو كو نوكه ل عیراقێ یه ومژوولى ئێكخستنا ناڤمالا شیعى وحه‌شدا شه‌عبى یه دژى هه‌بوونا هێزێن ئه‌مریكى ل عیراقێ وبۆ ڤێ مه‌ره‌مێ ژى ئه‌و یێ د كۆمبوونێن به‌رده‌وام دا”.
خویاكر ژى” ئیران دخوازیت چه‌ند بنگه وباره‌گا وكاروانێن هێزێن ئه‌مریكى ل عیراقێ بكه‌ته ئارمانج، ب مه‌ره‌ما كێمكرنا فشار له‌شكرى یێن ئه‌مریكى ل سه‌ر ئیرانێ كو دبیت ببیته ده‌رگه‌هێ شه‌ره‌كێ مه‌زن وخویناوى د ناڤبه‌را وان هه‌ردو وه‌لاتان دا ئه‌ڤێ چه‌ندێ ژى دێ كاریگه‌ریا ئه‌رێنى ل سه‌ر عیراقێ هه‌بیت ودێ ده‌ڤه‌رێن سونه‌نشین زیاندار بن”.
ئه‌ڤرۆ نیوز:
ده‌ستهه‌لاتدارێن وه‌لاتێ هندستانێ بریاره‌كا فه‌رمى ل دۆر یاریا بۆپجى ده‌ركر كو هه‌ر كه‌سێ د ناڤ ئاخا وى وه‌لاتى دا یاریا بۆپجى بكه‌ت دێ هێته ده‌سته‌سه‌ركرن.
ل دووڤ مالپه‌رێ cnet، ژ ئه‌گه‌رێ كرنا یاریا بوپجى 26 كه‌س ل باژێرێن جودا جودا ل هندستانێ یێن هاتینه ده‌سته‌سه‌ركرن.
ئه‌و بریاره یا بوویه جهێ حێبه‌تیا وه‌لاتیێن هندستانێ وهه‌ڤده‌م ژى تیمه‌كا دامه‌زرێنه‌را وى یاریێ، ب مه‌ره‌ما زانینا سه‌رهلدانا قه‌یرانێ وچاره‌سه‌ریا وێ، سه‌ره‌دانا هندستانێ كریه.
ل دووڤ داخۆیانیێن ده‌ستهه‌لاتدارێن وه‌لاتێ هندستانێ، ئه‌و یاریه هاندانا توندوتیژیێ دكه‌ت، له‌وما یا هاتیه قه‌ده‌غه‌كرن.
ئه‌ڤرۆ نیوز:
په‌یڤدارێ حوكمه‌تا هه‌رێما كوردستانێ، سه‌فین دزه‌یى، راگه‌هاند سه‌رۆكێ هه‌رێما كوردستانێ د ده‌مێ خوه یێ دیاركرى دا دێ هێته هه‌لبژارتن وئاشكرا كر ژى كو دبیت پرۆسا ده‌ست بكاربوونا سه‌رۆكێ هه‌رێمێ گیروببیت.
سه‌فین دزه‌یى گۆت” ده‌مه‌كێ دیاركرى هه‌بوو كو 15 هه‌یڤێ دووماهى رۆژ بوو بۆ پێشكێشكرنا به‌ربژارێن سه‌رۆكاتیا هه‌رێما كوردستانێ وده‌مێ هه‌فتیه‌كێ پێداچوون ب ناڤان دێ هێته كرن، پاشى ل په‌رله‌مانى دێ ده‌نگ ل سه‌ر هێته دان وپاشى پرۆسا سویند خواندنا سه‌رۆكێ هه‌رێما كوردستانێ دێ ده‌ستپێكه‌ت ودبیت ده‌ست بكاربوونا سه‌رۆكێ هه‌رێمێ چه‌نده‌كێ گیرو ببیت”.
سه‌باره‌ت گاڤێن پێكئینانا كابینا نوو یا حوكمه‌تا هه‌رێما كوردستانێ ژى، سه‌فین دزه‌یى گۆت”پشتى ده‌ست بكاربوونا سه‌رۆكێ هه‌رێمێ، دێ سه‌رۆكێ هه‌رێمێ به‌ربژارێ ده‌ستنیشانكرى راسپێریت بۆ پێكئینانا كابینا نه‌هێ یا حوكمه‌تا هه‌رێما كوردستانێ وسه‌رۆكێ راسپاردى یێ حوكمه‌تێ 30 رۆژان یێ ل به‌رده‌ستێ وى بۆ پێكئینانا حوكمه‌تێ وب بۆچوونا مه ل ناڤه‌راستا هه‌یڤا شه‌ش دێ كابینا نوو یا حوكمه‌تێ هێته پێكئینان”.
ئه‌ڤرۆ نیوز:
د فه‌توایه‌كێ دا بۆ هه‌موو موسلمانێن هه‌رێما كوردستانێ، جڤاتا بلند یا فه‌توایێ ل هه‌رێما كوردستانێ، بازرگانیكرن هه‌ره‌مه‌كى دئێخیته لیستا بازرگانیا حه‌رام.
د وێ فه‌توایێ دا هاتیه” مامه‌لا بازرگانى یا هه‌ره‌مى ب گشتى ومامه‌له‌كرن ل گه‌ل هه‌ردو كۆمپانیێن فۆرئێڤه‌ر وكیۆنیت وهه‌ڤشێوێن وان ب تایبه‌تى ب هه‌موو شێوه‌كى حه‌رامه”.
ئەڤرۆ نیوز٬عەلی حاجی :
گەنجەکێ خه‌لكێ زاخۆ د ژیێ 33 سالیێ دا ئەڤرۆ ئەینیێ ۱۷/٥/۲۰۱۹خوە ژ سه‌ر پرا ده‌لال هاڤێت و هەتا نوکە لێگەریان ل لاشێ وی گەنجی یا بەردەوامە.
بێوار عبدولعەزیز، بەرپرسێ راگەهاندنا بەرەڤانیا باژێری ل پارێزگەها دهوکێ بۆ ئەڤرۆ نیوز دیار کر ئەڤرۆ تیمێن مە هاتنە ئاگەهدارکرن کو گەنجەک بناڤێ (کاروان جمغە حەیدەر) ل پرا دەلال دناڤ ئاڤا خابیری دا خەندقی یە؍ ب گورەی پێزانێن ل بەر دەستێن مە کو وی گەنجی ڤیایه دووماهیێ ب ژیانا خوه بینیت و خوە هاڤێتیه دناڤ ئاڤێ دا؍هەتا نوکە ژی تیمێن مە یێن نقومەڤانی بەردەوامن ل سەر لێگەریانێ ل لاشێ وی گەنجێ ژ دایكبوویێ 1986 و ب مخابنی ڤە هەتا نوکە ژی نەهاتیە دیتن .
زێدەتر گوت : ئەڤە دووەم روودانە ل باژێرێ زاخۆ رووددەت كو به‌رى ۲۰ رۆژان کچەکا ۱۹ سالی خوە ژ پرا خانی هاڤێت بوو و هەتا نوکە لاشێ وێ نەهاتیە دیتن و لێگەریان ژی ل سەر دیتنا لاشێ وان هەردو کەسان دێ یا بەردەوام بیت.
ئه‌ڤرۆ نیوز:
ل سه‌ر راسپاردا هه‌ڤپشك یا جڤاتا ئابوورى هه‌ولێر وبه‌غدا، شانده‌كێ وه‌زاره‌تا بازرگانى ل هه‌رێما كوردستانێ سه‌ره‌دانا به‌غدا كر ورێككه‌فتنه‌كا گرێداى چه‌ند پرسێن بازرگانى ئیمزاكر.
نەوزاد ئەدهەم، رێڤه‌به‌رێ گشتى یێ وه‌زاره‌تا بازرگانى ل هه‌رێمێ راگه‌هاند” رێككه‌فتنا شاندێ حوكمه‌تا هه‌رێمێ وبه‌غدا ته‌وه‌ره‌كێ گرنگ ب خوه‌ڤه گرت ژ وان ئێكخستنا مۆله‌تا هنارتن وهاورده‌كرنێ، چونكه پێشتر پێناسا گۆمركى ژى د ناڤبه‌را هه‌ردو لایه‌نان دا هاتبوو ئێكگرتن، بۆ وێ چه‌ندێ هه‌ر بازرگانه‌ك ل كوردستانێ مۆله‌تا بازرگانى ده‌ركربیت، ل هه‌موو ده‌رگه‌هێن سنوورى ل عیراقێ كار پێ بهێته كرن یان به‌رۆڤاژى”
دیاركر” ژ نوكه وپێڤه داخوازى بۆ ده‌ركرنا مۆله‌تا بازرگانى دێ بیته ئۆنلاین وهه‌ر بازرگانه‌كێ دخوازیت ل ئۆفیسا خوه داخوازا خوه پێشكێش بكه‌ت، ده‌مێ مۆله‌ت ژى دهێته ده‌ركرن ب هنێریته ده‌رگه‌هێن سنورى بۆ ب رێڤه‌چوونا كاروبارێن بازرگانى”.
ئاماژه كر”سندووقا هاریكاریێن نیشتمانى دێ لقه‌كا خوه ل هه‌ولێرێ ڤه‌كه‌ت، ئه‌و سندووقه یا تایبه‌ته ب هاریكاریێن وان كه‌سان كو به‌رهه‌مێن ناڤخوه‌یى دهنێرنه ده‌رڤه وهه‌رێما كوردستانێ ژى دێ بیته ئه‌ندام د وێ سندووقێ دا”.
نيشاندان