مەسرور بارزانی، سەرۆكێ حوكمەتا هەرێما كوردستانێ بۆ كۆمبوونێ ل گەل محەمەد شیاع سودانی، سەرۆك وەزیرێن ئیراقا فیدرال و بەرپرسێن دی یێن حوكمەتا ئیراقێ و سەركردە و بەرپرسێن ئالیێن سیاسی یێن ئیراقێ سەرەدانا بەغدا كر.
سەرۆكێ حوكمەتا هەرێمێ د پۆستەكێ تۆرا جڤاكییا ئێكس (تویتەرا بەرێ) ل دۆر سەرەدانا خوە بۆ بەغدا ئاماژەكر» ل بەغدامە بۆ دوپاتكرنێ ل سەر دابینكرنا مافێن خەلكێ كوردستانێ و چارەسەركرنا ناكۆكییان ب رێكا دانوستاندنێ و ل سەر بنەمایێ دستووری» .
سەرۆكێ حوكمەتا هەرێمێ د پشكەكا دی یا پۆستێ خوە دا دوپاتی ل ئەوێ چەندێ كر» دڤێت سەقامگیری و ئابۆرەكێ ب هێز كارێ مە یێ بەراهیێ بیت».
ل دەستپێكا سەرەدانا خوە سەرۆكێ حوكمەتا هەرێما كوردستانێ سەرەدانا قاسم ئەعرەجی، شیرەتكارێ ئاسایشا نیشتمانییا ئیراقێ كر و پاشی هەردویان د كۆنفرانسەكێ رۆژنامەڤانیدا بەرسڤا هەژمارەكا پرسیارێن رۆژنامەڤانان دا.
سەرۆكێ حوكمەتا هەرێما كوردستانێ د كۆنفرانسێ رۆژنامەڤانیدا راگەهاند» بۆ چارەسەركرنا ئەو كێشەیێن ماین، تشتەكێ گەلەك ئاسایییە بهێین ل بەغدا ل گەل هەموو بەرپرسان، دیدار و دانوستاندنان بكەین، ئێكەم كۆمبوونا مە ل گەل قاسم ئەعرەجی، شیرەتكارێ ئاسایشا نیشتمانییا ئیراقێ بوو كو برایەكێ مە یێ خوەشتڤی و ئەزیزە».
سەرۆكێ حوكمەتا هەرێما كوردستانێ ئاماژە ب ئەوێ چەندێ ژی كر» ئارمانجەكا دی یا ئەڤێ سەرەدانێ، ب مەبەستا ب هێزكرنا ئەوان پەیوەندیێن باشن كو نوكە نێزیكە بكەڤنە سەر رێرەوێ خوە».
د بەرسڤا پرسیارەكێ ل دۆر كێشەیا مووچەیێن وەزارەتا پێشمەرگەی و هێزێن ئەمنی، مەسرور بارزانی گوت» دێ چارەسەر بیت».
ژ ئالیێ خوەڤە قاسم ئەعرەجی، شیرەتكارێ ئاسایشا نیشتمانییا ئیراقێ ل دۆر سەرەدانا سەرۆكێ حوكمەتا هەرێما كوردستانێ بۆ بەغدا راگەهاند» تێكگەهشتنا د ناڤبەرا بەغدا و هەولێرێدا هێزەكا زێدەتر ددەتە ئیراقێ، خەالێن مە یێن هەڤپشك گەلەكن و كار دكەین بۆ بجهئینانا دستووری و دانا شایستەیێن دارایی یێن هەرێما كوردستانێ.
سەرۆكێ حوكمەتا هەرێما كوردستانێ د دو پۆستاندا ل تۆرا جڤاكییا ئێكس (تویتەرا بەرێ) ناڤەرۆكا كۆمبوونا خوە ل گەل قاسم ئەعرەجی ئاشكراكر.
سەرۆكێ حوكمەتا هەرێمێ ئاماژە ب ئەوێ چەندێ كر» ل گەل قاسم ئەعرەجی، شیرەتكارێ ئاسایشا نیشتمانییا ئیراقێ د هەڤڕابووین كو هەرێما كوردستانێ، هەرێمەكا دستوورییە و ی هێزبوونا هەرێما كوردستانێ ب هێزبوونا ئیراقێیە و بەرۆڤاژی ژی، لەوما دڤێت باشترین پەیوەندی د ناڤبەرا هەرێما كوردستانێ و حوكمەتا فیدرالیدا هەبیت».
مەسرور بارزانی دیاركر ژی» من دوپاتكر كو ژ روویێ ئەمنی ڤە هەماهەنگییەكا باش د ناڤبەرا هەرێما كوردستانێ و حوكمەتا فیدرالیدا یا هەی و هیڤیدارین ئەڤ هەماهەنگییا باش د هەموو بوارێن دی ژی دا رەنگڤەدەت».
هەر ل بەغدا، سەرۆكێ حوكمەتا هەرێما كوردستانێ ل بەغدا، ل گەل محەمەد شیاع سودانی، سەرۆك وەزیرێن ئیراقا فیدرال كۆمبوو.
ب گۆڕەی بەیاننامەیەكا حوكمەتا هەرێما كوردستانێ، د كۆمبوونەكێدا رەوشا ئیراقێ ب گشتی و گرنگییا چارەسەركرنا كێشەیێن د ناڤبەرا هەرێما كوردستانێ و حوكمەتا فیدرالیدا ل سەر بنەمایێ دستووری هاتە گەنگەشەكرن.
وەكو د بەیاننامەیا حوكمەتا هەرێمێدا هاتی» هەردو ئالی د هەڤڕابوون ل سەر پێدڤییا بەردەوامبوونا دانوستاندنێن ئاڤاكەر بۆ چارەسەركرنا كێشەیان كو د بەرژەوەندییا هەموو پێكهات و وەلاتیێن ئیراقێدا بیت».
مەسرور بارزانی، سەرۆكێ حوكمەتا هەرێما كوردستانێ د درێژییا سەرەدانا خوە دا بۆ بەغدا ل گەل فالح فەیاز، سەرۆكێ دەستەیا حەشدا شەعبی كۆمبوو.
سەبارەت ئەوێ كۆمبوونێ، مالپەرێ فەرمیێ حوكمەتا هەرێما كوردستانێ بەلاڤكر كو دانوستاندن ل دۆر گرنگییا چارەسەركرنا كێشەیێن هەلاویستی د ناڤبەرا هەرێما كوردستانێ و حوكمەتا فیدرالیدا هاتنە كرن ل گەل دوپاتكرنێ ل رێكخستنا هەماهەنگیێن د ناڤبەرا هەردو ئالییاندا بۆ بەهنگارییا گەفێن تیرۆرێ.
هەر د بەردەوامییا كۆمبوونێن خوە دا ل بەغدا، مەسرور بارزانی، سەرۆكێ حوكمەتا هەرێما كوردستانێ و ئەمیندارێ گشتیێ (عەسائیب ئەهلولحەق)، دوماهی گوهۆڕین و پێشهاتێن ئیراقێ و بزاڤێن چارەسەركرنا كێشەیێن د ناڤبەرا حوكمەتا فیدرالی و هەرێما كوردستانێدا و گرنگییا دابینكرنا ماف و شایستەیێن دارایی یێن خەلكێ كوردستانێ ل سەر بنەمایێ دستووری گەنگەشە كرن.
ب گۆڕەی بەیاننامەیەكا حوكمەتا هەرێما كوردستانێ، د كۆمبوونا د ناڤبەرا مەسرور بارزانی، سەرۆكێ حوكمەتا هەرێمێ و قەیس خەزعەلی، ئەمیندارێ گشتیێ عەسائیب ئەهلولحەق یا ئیراقی باس ل دوماهی پێشهاتێن ئیراقێ و بزاڤێن چارەسەركرنا كێشەیێن د ناڤبەرا حوكمەتا فیدرالی و هەرێما كوردستانێ و گرنگییا دابینكرنا ماف و شایستەیێن دارایی یێن خەلكێ كوردستانێ ل سەر بنەمایێ دستوورێ ئیراقێ هاتە كرن.
ژ ئالییەكێ دی ڤە مەسرور بارزانی، سەرۆكێ حوكمەتا هەرێما كوردستانێ ل بەغدا ل گەل نوری مالكی، سەرۆكێ هەڤپەیمانییا دەولەتا قانوونێ كۆمبوو.
ب گۆڕەی بەیاننامەیەكا حوكمەتا هەرێما كوردستانی، د دیدارەكێدا رەوشا گشتییا ئیراقێ و پێنگاڤێن چارەسەركرنا كێشەیێن د ناڤبەرا هەرێما كوردستانێ و حوكمەتا فیدرالیدا هاتە گەنگەشەكرن.
هەردو ئالییان دوپاتی ل پێدڤییا چارەسەركرنا كێشەیان ب رێكا دانوستاندنێ و رێزگرتنێ ل سیستەمی فیدرالیێ ئیراقێ و قەوارەیێ دستووریێ هەرێما كوردستانێ و پاراستنا مافێن خەلكێ كوردستانێ، ب تایبەتی پشكا بودجەی و شایستەیێن دارایی یێن هەرێما كوردستانێ د چارچۆڤەیێ بودجەیا گشتییا فیدرالیدا.
هەروەسا دوپاتی ل گرنگییا بەردەومابوونا هەماهەنگیێ و هاریكاریێ د ناڤبەرا هێز و ئالیێن سیاسی یێن ئیراقی ژ پێخەمەت دەربازكرنا كێشە و ئاستەنگان هاتە كرن ب گۆڕەی رێككەفتنا ئالیێن سیاسی یێن ئیدارەیا دەولەتێ و كارنامەیا كابینەیا وەزاری یا حوكمەتا فیدرالی.
نوری مالكی خوەشحالییا خوە بەرانبەر سەرەدانا سەرۆكێ حوكمەتا هەرێمێ دباركر و ئاماژكر، ئەم هەموو د رژدین بۆ چارەسەركرنا پرس و كێشەیێن د ناڤبەرا بەغدا و هەولێرێدا.
سەرۆكێ هەڤپەیمانییا دەولەتا قانوونێ دیاركر ژی» سەرۆكێ حوكمەتا هەرێمێ مەسرور بارزانی سیاسەتەكا ستراتیژییا درێژخاەین نەكو تەكتیكی بۆ چارەسەركرنا پرس و كێشەیان بكاردئینیت«.
نوری مالكی رۆهنكر ژی كو هەردو ئالییان باس ل كێشەیێن د ناڤبەرا بەغدا و هەولێرێدا كر و بۆچوونەك یا هەی بۆ چارەسەركرنا پرسا مووچەیێن فەرمانبەرێن هەرێما كوردستانێ و ئاماژەكر كو پێدڤییە ب گۆڕەی دستووری فەرمانبەر و خەلكێ هەرێما كوردستانێ بگەهنە ماف و شایستەیێن خوە .
مالكی باسێ ئەوێ چەندێ ژی، كار دكەین بۆ ئەوێ چەندێ كێشە ب شێوەیەكێ بنەڕەتی بهێنە چارەسەركرن تاكو دوبارە نەبن.
هەر ل بەغدا و د كۆمبوونا د ناڤبەرا مەسرور بارزانی، سەرۆكێ حوكمەتا هەرێمێ و هادی عامری، ئەمیندارێ گشتیێ رێكخراوا بەدر و سەرۆكێ هەڤپەیمانییا ( نە بنی)، هەردو ئالی د هەڤڕا بوون ل سەر مافێ موچەخۆرێن هەرێما كوردستانێ كو وەكو ئیراقێ بشێن بانكا دلخوازا خوە ب هەلبژێرن بۆ وەرگرتنا مووچەیێن خوە،
هەر ل بەغدا مەسرور بارزانی، سەرۆكێ حوكمەتا هەرێما كوردستانێ ل گەل خەمیس خەنجر، سەرۆكێ هەڤپەیمانییا سیادە كۆمبوو.
سەرۆكێ حوكمەتا هەرێمێ د پێگەهێ خوە یێ تایبەتدا ل تۆرا جڤاكییا ئێكس بەلاڤكر» ماف و ئەركێن مە د دستووریدا ب رۆهنی یێن هاتینە دیاركرن».
هەڤدەم دبێژیت» مە ئەركێن خوە یێن بجهئیناین و چاڤەڕێی نە بەغدا ژی پێگیری دابینكرنا مافێ مووچەخۆرێن هەرێما كوردستانێ بیت».
سەرۆكێ حوكمەتا هەرێمێ ئاماژە ب ئەوێ چەندێ ژی كر» من داخواز ژ خەمیس خەنجەر كر بەردەوام بیت ل سەر دانوستاندنێ ل سەر ئەڤی بابەتی».
هەر ل بەغدا مەسرور بارزانی، سەرۆكێ حوكمەتا هەرێما كوردستانێ ل گەل محسن مەندەلاوی، سەرۆكێ جڤاتا نوونەرێن ئیراقێ ب وەكالەت كۆمبوو، د دیدارەكێدا دوپاتی ل گرنگییا دابینكرنا مافێن دستووری و شایستەیێن دارایی یێن هەرێما كوردستانێ د بودجەیا گشتییا فیدرالیدا هاتە كرن.
ژ ئالیێەكێ دی ڤە، سەرۆكێ حوكمەتا هەرێما كوردستانێ ل بەغدا ل گەل فائق زێدان، سەرۆكێ جڤاتا بلند یا دادوەریێ ل ئیراقێ كۆمبوو، د دیدارەكێدا هەردو ئالی د هەڤڕابوون كو دستوور بۆ ئەوێ چەندێیە مافێن هەموو گەلێن ئیراقێ و ژ وان ژی دا هەرێما كوردستانێ دەستەبەر بكەت، هەروەسا دڤێت بنەمایەك بوو بۆ چارەسەركرنا ناكۆكیێن د ناڤبەرا بەغدا و هەولێرێدا.
د كۆمبوونا د ناڤبەرا سەرۆكێ حوكمەتا هەریچمێ و عەبدولسادە فرێجی، ئەمیندارێ گشتیێ هەڤپەیمانییا نەهج یا ئیراقی دوپاتی ل پێدڤییا پشتەڤانییا بزاڤێن چارەسكرنا كێشەیێن بەغدا و هەولێرێدا ب تایبەتی دابینكرنا شایستەیێن دارایی یێن هەرێما كوردستانێ هاتە كرن.
مالپەرێ فەرمیێ حوكمەتا هەرێما كوردستانێ پەلاڤكر، مەسرور بارزانی، سەرۆكێ حوكمەتا هەرێما كوردستانێ ل دوماهی ویستگەها سەرەدانا خوە بۆ بەغدا، ل گەل عەمار حەكیم، رێبەرێ باسكێ نیشتمانیێ حیكمە كۆمبوو و هەردو ئالییان باس ل رەوشا سیاسی وگشتییا ئیراقێ و بزاڤێن چارەسەركرنا كێشەیێن د ناڤبەرا حوكمەتا هەرێما كوردستانێ و حوكمەتا فیدرالیدا كر و د هەڤڕابوون ل سەر گرنگییا چارەسەركرنا كێشەیان ب شێوەیەكێ بنەڕەتی و ل سەر بنەمایێ دستووری و پاراستنا مافێن خەلكێ كوردستانێ و هەموو پێكهاتەیێن ئیراقێ.

وەزارەتا دەرڤە یا ئەمریکا راگەهاند کو رەوش ل رۆژئاڤایێ کوردستانێ و باکورێ سووریێ بۆ هەلبژارتنان یا گونجای نینە و چاڤدێرێن سیاسی ژی دیار دکەن، نها گەلەک ئاریشە ل رۆژئاڤایێ کوردستانێ هەنە و هەتا ئەو ئاریشە نەهێنە چارەسەرکرن برێڤەچوونا هەلبژارتنان چو مفایەکا خوە بۆ کوردان.

وەزارەتا دەرڤە یا ئەمریکا راگەهاند، بەرپرسێن رێڤەبەریا خوەسەر یا باکورێ سووریێ بەحسێ هەلبژارتنان دکەن، یا راست هەلبژارتن گەلەک گرنگن، لێ نها رەوش بۆ هەلبژارتنان ل رێڤەبەریا خوەسەر یا باکورێ سووریێ گونجای نینە و ژ بەر ڤێ یەکێ ژی ئەم وەسا دبینین هەکە نها هەلبژارتن بهێنە کرن ژی چو تشتەکێ چارەسەر ناکەت و رەنگە ببیتە ئەگەرێ ئالۆزیێن نوو.
ل ئالیێ دی سالح موسلیم هەڤسەرۆکێ پەیەدێ ژی راگەهاند، هەلبژارتن مافەکێ رەوا یێ کوردان و خەلکێن دی یە یێن کو نها ل رێڤەبەریا خوەسەر و رۆژئاڤایێ کوردستانێ دژین و ژ بەر ڤێ یەکێ ژی گەلەک گرنگە هەلبژارتن بهێنە کرن، هەلبژارتن دێ بیتە ئەگەرێ دەستپێکرنا قۆناغەکا نوو و دێ کاریگەریا خوە یا گەلەک باش بۆ پاشەرۆژا رۆژئاڤایێ کوردستانێ هەبیت، لێ مخابن تورکیا و هندەک وەلاتێن دی ل دژی هەلبژارتنانە و ب تایبەتی ژی تورکیا دڤێت جارەکا دی ب رێیا ئۆپۆراسیۆنێن سەربازی و ئێرشێن ئەسمانی ئالۆزیان دروست بکەت دا هەلبژارتن نەهێنە کرن، لێ وەکو رێڤەبەریا خوەسەر ئەو رژدن هەلبژارتن ل باکورێ سووریێ و رۆژئاڤایێ کوردستانێ بهێنە کرن.
ل ئالیێ دی بەری دو رۆژان رەجەب تەیب ئەردۆغانێ سەرۆک کۆمارێ تورکیا ژی راگەهاند، ئەو رێ نادەن هێزەکا تیرۆرستی ل ژێر ناڤێ هەلبژارتنان پێگەهێ خوە ل سەر سنۆرێ تورکیا بهێز بکەت و ئاریشان بۆ تورکیا دروست بکەت، وەکو تورکیا ئەو ژ نێزیکڤە دووڤچوونا رەوشێ دکەن و دێ یا پێدڤی ژی هێنە کرن، چونکی پاراستنا ئاسایشا تورکیا بۆ وان گەلەک یا گرنگە و هەر هێزەک ببیتە مەترسی تورکیا دێ ب توندی بەرسڤا وێ هێزێ دەت.
چاڤدێرێن سیاسی ژی دیار دکەن، رەوش بۆ هەلبژارتنان ل رۆژئاڤایێ کوردستانێ یا گونجای نینە، چونکی هێشتا هەر دو جڤاتێن کوردی یێن رۆژئاڤایێ کوردستانێ ئاریشێن هەی د ناڤبەرا خوە دا چارەسەر نەکرینە و ل ئالیێ دی مەترسیێن مەزن ژی ل سەر رۆژئاڤایێ کوردستانێ هەنە، نها دڤێت رێڤەبەریا خوەسەر کار بۆ چارەسەرکرنا ئاریشێن هەی بکەت، چونکی ب هەلبژارتنان چو پرسەک ناهێتە چارەسەر کرن و هەکە نها هەلبژارتن بهێنە کرن ژی دێ پرسێن هەی ئالۆزتر لێ هێن.
بەرپرسێن رێڤەبەریا خوەسەر دیار دکەن وان دڤێت ل رۆژا ١١ ڤێ مەهێ ل دەڤەرێن ل ژێر دەستهەلاتا خوە هەلبژارتنان بکەن و ئەو دبێژن پتر ژ سێ ملیۆن کەسان ژی مافێ دەنگدانێ هەیە.

سەرۆك مەسعود بارزانی پەیامەك ب هەلكەفتا سالڤەگەڕا 48 یا شۆڕەشا گۆلانێ بەلاڤكر و ئەڤە دەقێ وێ یە:
شۆرەشا گولانێ قۆناغەكا گرنگ یا دیرۆكا گەلێ مە و ئەزموونەكا پڕ بها یا خۆڕاگریێ و رابوونا گەلێ كوردستانێیە. د رەوشا پشتێ نسكۆیێ و ئاوارەیێ و ل بن فشارێن جۆرا و جۆر یێن نەیاراندا ب پلانەكا هوور و باوەرییەكا بلند شۆڕەشا گولانێ هاتە هەلكرن. شۆڕەشا گولانێ كو هەلگرا بها و ئارمانجێن شۆڕەشا ئەیلوولا مەزن بوو پەیامەكا رۆهن ب هەموو نەحەزان و نەیارێن گەلێ كوردستانێ گەهاند، كو سەرەرای ب هێزبوون و ستەمكارییا دوژمنان و هەبوونا پیلانەكا جۆرا و جۆر، گەلێ كوردستانێ خوە بدەستڤە نادەت و رۆلێن وی خەباتا خوە بۆ مەیدانا راستەقینەیا خەباتێ كو ئاخا پیرۆز یا كوردستانێیە دێ ڤەگوهێزن.
ل سالڤەگەڕا 48 یا شۆڕەشا گولانێ، سلاڤان بۆ گیانێ ئێكەمین شەهیدێ شۆڕەشا گولانێ شەهید سەید عەبدوللا حاجی ئۆمەرانی و هەموو شەهیدێن كورد و كوردستانێ د هنێرین و ئەوان خەباتكەر و قەهرەمان ژی چو جاران ناهێنە ژبیركرن كو د خەباتا پێشمەرگایەتی و حزبی و خەباتا نهێنێ دناڤ باژێران و د ئاوارەیێدا رۆل د شۆڕەشا گولانێدا هەبوو و قوربانی داینە و دیرۆك بۆ گەلێ خوە دروستكری. ئەو دەستكەفتێن بدەستڤەهاتین بەرهەمێ خوینا شەهیدان و رەنج و وەستیانا گەل و پێشمەرگە و خەباتكەرێن شۆڕەشا گولانێ و هەموو شۆڕەشێن گەلێ كوردستانێ نە.

سەرۆكێ هەرێما كوردستانێ ب هەلكەفتا سالڤەگەڕا 48 یا شۆڕەشا گولانێ پەیامەك بەلاڤكر و ئەڤە دەقێ وێ یە:
د دەمەكیدا بیرئینانا 48 سالییا هەلكرنا شۆڕەشا گولانێ دكەین، سلاڤان بۆ گیانێ پاقژێ شەهیدان دهنێرین و ب رێزڤە بیرئینانا وان دكەین.سلاڤ ل هەموو پێشمەرگە و كادر و هەموو ئەوان قەهرەمان و جامێرێن ب هەر شێوەیەكێ بیت، د رێزێن شۆڕەشێدا خەباتكری.
شۆڕەشا گولانێ رابوونا مللەتەكێ بوو كو ژ پێخەمەت ئازادیێ و سەرفەرازیێدا بەرهەڤی گیانبەخشێنێ و هەموو قوربانیدانەكێ بوو. د شۆڕەشا گولانێدا، گەلێ كوردستانێ سەلماند كو چو جاران داگیرانێ ناكەت و ئارمانجا شۆڕەشا ئەیلوولا مەزن ب رێبەرییا بارزانیێ نەمر هەتا سەركەفتنێ یا بەردەوامە.
كۆمبوونا هێز و ئالیێن كوردستانی ل سەر ئارمانجەكا بلند، بەرهەمێ شۆڕەشا گولانێ بوو كو ل دووماهیێ سەرهلدانا ئادارا 1991 سەرئێخست و ئازادی و فیدرالی و قەوارەیێ دستووریێ هەرێما كوردستانێ د دووڤدا هات. ب ڤێ هەلكەفتێ دوپاتیێ ل تێكگەهشتنا هەڤپشك دكەین كو نوكە و پاشەڕۆژەكا باشتر بۆ گەلێ كوردستانێ مسۆگەر دكەت.

مەسرور بارزانی، جێگرێ سەرۆكێ پارتی دیموكراتی كوردستان ل سالڤەگەڕا 48 یا هەلكرنا شۆڕەشا گولانێ، پەیامەك بەلاڤكر و ئەڤە دەقێ وێ یە:
ل سالڤەگەڕا 48 یا هەلكرنا شۆڕەشا گولانێ، گەرمترین پیرۆزباهییان ئاراستەی سەرۆك بارزانی و پێشمەرگێن قەهرەمان و هەموو پێشمەرگە و خەباتكەرێن پشكدارێن شۆڕەشێ دكەم.
شۆڕەشا گولانێ كو درێژەپێدەرا شۆڕەشا ئێلۆنا مەزن بوو ب رێبەرییا بارزانیێ نەمر، هیڤی و ئومێدەكا مەزن بۆ خەلكێ كوردستانێ زڤراند و پیلانگێرییا دوژمنێن گەلێ كوردستانێ شكاند كو دخواست دووماهیێ ب شۆڕەش و خەباتا رەوایا خەلكێ كوردستانێ ژ پێخەمەت مافێن وی یێن رەوا بینن، چونكە خۆڕاگرییا خەلكێ كوردستانێ و ئێكڕێزی و هەڤهەلویستییا هێز و ئالیێن كوردستانی، بۆ ئەگەرێ بدەستڤەئینانا چەندین دەستكەفتێن نیشتمانی یێن مەزن ئەوژی سەرهلدانا 1991 و هەلبژارتنێن پەرلەمانی و پێكئینانا حوكمەتا هەرێما كوردستانێ.
ل سالڤەگەڕا 48 یا هەلكرنا شۆڕەشاگولانێ، ب رێز و پێزانینڤە بیرئینانا هەموو خەباتكەرێن پشكدارێن ئەڤێ شۆڕەشێ دكەین ب تایبەتی سەركردەیێ هەردەم ساخ ئدریس بارزانی.

مەكتەبا سیاسییا پارتی دیموكراتی كوردستان
ب هەلكەفتا سالڤەگەڕا 48 یا هەلكرنا شۆڕەشا گولانێ، پەیامەك بەلاڤكر و تێدا هاتییە:
48 سال ب سەر دەستپێكرنا شۆڕەشا گولانا پێشكەفتنخواز دەرباز دبن، ئەو شۆڕەشا ب رێبەری و رێنمایێن بارزانیێ نەمر هاتییە هەلكرن. دەستپێكرنا شۆڕەشا گولانێ خەونا داگیركەر و دوژمنان ئێخستە چالێ و سەلماند كورد ژ پیلانێن نێڤدەولەتی ب هێزترە.
چار سال پشتی رێككەفتنا 11 ئادارێ و ئەو دەمێ رژێما بەعش خوە ژ پێگیریێن رێككەفتنێ و مافێن رەوایێن كوردان و كوردستانییەتا كەركووكێ ڤەددزی، سەركردایەتییا پارتی و شۆڕەشا كوردی د ناڤبەرا رازیبوون ب ئەوی واقعێ تەحل و دوبارە بەر ب چەك و چیایان، رێكا دویێ هەلبژارد ب پشتەڤانییا پێشمەرگەی و خەلكێ كوردستانێ درێژی ب شۆڕەشا ئەیلوولا مەزن و داكۆكی ژ مافێن رەوایێن گەلێ مە دا، دیسان خوە رێكخست و ل 26 گولانا سالا 1976 و ل چیایێن كوردستانێ دوبارە دەست ب شۆڕەشێ هاتە كرن و سەنگەرێن شەرەفمەندیێ یێن بەرگریێ هاتنە ئاڤاكرن.
دەستپێكرنا شۆڕەشا گولانێ بۆ دۆست و دوژمنان سەلماند، كو شۆڕەشا مللەتەكێ مافخاز و خودان كێشەیەكا رەوایە، لەوما نە ب ئاگری و ئاسنی، نە ب پیلانێن نێڤدەولەتی و نە ب بۆهژاندن و فشاران ناهێتە ژناڤبرن، پارتی و رێبازا بارزانی ژی ئەو پارت و پارت و رێبازە نینن، كو ب وێ فشار و گەف و دوژمنكاریێ مەیدانێ چۆل بكەن و رێكێ بدەن مافێن كوردان بهێنە ژناڤبرن، هەروەسا دەستپێكرنا شۆڕەشێ سەلماند تاكە رێكا چارەسەركرنا دۆزا كوردی دانپێدانە ب هەموو مافێن نەتەوەیێ یێن مللەتێ كورد.
شۆڕەشا گولانێ، وەكو درێژەپێدەرا شۆڕەشا ئەیلوولا مەزن و ئارمانجێن وێ، ژ بلی ئەوێ چەندێ ئەو نە ئومێدی ڤەرەڤاند، كو ل نسكۆیێ هاتێیە پێش، بو دەستپێكا قۆناغەكا دی یا خەباتا كوردایەتیێ ژی، كو سەرەرای ئاستەنگ و كێشەیان، شیا درێژیێ ب ئەوێ خەباتا رەوا بدەت تاكو پێكئینانا بەرەیێ كوردستانی و كۆمبوونا هەموو هێزێن سیاسی ل دەوروبەرێ ئێك ئارمانج و ئەوژی بوو هێڤێن و داینەمۆیا سەرهلدانا پیرۆزا سالا 1991، كو ئاسۆیەكێ نوو ل پێشبەری گەلێ كورد ڤەكر، پاشی گەلێ كورد ب سەربلندی و ل سەر ئاخا خوە دەستهەلاتا دیموكراسییانە یا مللی یا خوە د چارچۆڤەیێ هەرێما كوردستانێدا دامەزراند.
ئەڤرۆ دەمێ بیرئینانا ئەوێ شۆڕەشا مەزن دكەین، گەلێ مە قۆناغەكا گەلەك دوور و درێژ بڕییە و سەدان ئەڤرازی و نشیڤی یێن دی ژی دەربازكرینە و چەندین لوغم و مین و پیلانێن دی ژناڤبرینە و دوبارە ل پاشەڕۆژو ئاسۆیەكێ گەش دنێریت، پارتی كو ئەو هەموو پیلان دژی هاتینە كرن، وەكو پێشڕەوا كوردایەتیێ و ب پشتەڤانییا مللەتی، حزبا هەژمار ئێكە ل ئیراقێ و كوردستانێ، هەلویستێن وێ یێن سیاسی و خۆڕاگری و داكۆكییا مەردانە ژ ئاخ و مافێ گەلێ كوردستانێ، هندا دی پێگەه و باوەری ل سەر هەموو ئاستەنگان ب هێزكرییە و بەرنامەیێ نیشتمانسازی و ئاڤەدانخوازیێ وێ ژی جهێ ئومێدا جەماوەرییە، ب هێزكرنا رێزێن ناڤخوەیی ژی وەكرییە هەژی پێشڕەوایەتی و هیڤییێن گەلێ مە بیت.
د دەمەكیدا بیرئینانا شۆڕەشا گولانێ دكەین، ب باوەرییەكا مەزن ڤە بەر ب كوردستانەكا سەقامگیر پێنگاڤان د هاڤێژین، بۆ ب هێزكرنا پێگەهێ سیاسی و ئابۆری و دیپلۆماسیێ هەرێمێ و دوپاتییا پشتەڤانییا مە ل دەزگەهێن سەروەریێن سەرۆكایەتییا هەرێما و حوكمەتەكا ب هێز و سەرانسەری دكەین، كو ل ئاستێ ئەركێن قۆناغێدا بن و بشێن سەقامگیرییا كوردستانێ وەكو هەردەم بپارێزن و ژیانا خەلكی بەر ب باشتر و باشتر ژی ببەن، هەڤدەم كاراكرنا پەرلەمانێ كوردستانێ ب هەلبژارتنێن پەسەند كری ژ ئالیێ مللەتیڤە، هەلبەت ئەڤێ چەندێ ژی پێدڤی ب ئێكڕێزیێ و ئێكهەلویستییا نەتەوەیی و نیشتمانی یا هەی، ئەوێ ئێكڕێزییا، كو پارتییا مە زۆرترین نەرمی ژ پێخەمەتێ وی بەرچاڤكری بۆ چارەسەركرنا كێشەیێن هەلاویستی د ناڤ هەرێمێدا و ئەوێن گرێدای ب دانوستاندنێن د ناڤبەرا حوكمەتا هەرێما كوردستانێ و حوكمەتا فیدرالی ل دۆر هەلبژارتنان و بودجەی و شایستەیێن دارایی یێن هەرێما كوردستانێ، ژ ئالییەكێ و ل ئەوێ دەرفەتێ جارەكا دی دوپاتیێ ل سەر پرەنسیپێن هەڤپشكی و هەڤسەنگی و سازانێ بۆ چارەسەركرنا كێشەیان ل ئیراقا فیدرالدا دكەین.
د ئەڤێ هەلكەفتێدا، هەم دیسان سۆز و پەیمانان بۆ گەلێ كوردستانێ و سەرۆك مەسعود بارزانی دوپات دكەین، وەكو هەردەم ل سەر هەمان رێبازا رەسەن و راستەقینەیا كوردایەتی و نەتەوەیی و نیشتمانییا مە بەردەوام بین بۆ پاراستنا قەوارەیێ سیاسیێ شەرعیێ هەرێما كوردستانێ و دەستكەفتێن مە، هەروەسا ب هێزكرنا بنەمایێن ئاشتەوایێ و دیموكراسیێ و كەلتوورێ لێبۆرینێ و پێكڤەژیانێ.
ب ئەڤێ هەلكەفتێ سلاڤ بۆ دامەزرێنەر و رابەر و داڕێژەرێ رێبازا كوردایەتیێ (مستەفا بارزانیێ نەمر) و كاك ( ئدریسێ هەردەم ساخ) و هەموو شەهیدێن رێكا سەروەری و ئازادی و رزگارییا كوردستانێ.
ب هەلكفەتا شۆڕەشا گولانێ، سۆزێ بۆ گیانێ پاقژێ شەهیدان نوو دكەین درێژەپێدەرێن رێبازا وان بین، كو رێبازا كوردایەتیێ و نیشتمانپەروەریێیە بۆ پاراستنا ئەوان ئەزموون و دەستكەفتان، كو بەرهەمێ خوینا ب بها یا وانە.
سلاڤ ل گیانێ شەهیدان و سلاڤ و رێزێ بۆ مالبات و كوسوكارێن وان یێن سەربلند دهنێرین، سلاڤ بۆ بیرئینانا ئەوان خەباتكەرێن كو گەشەیا شۆڕەشێ بوون.
گەرمترین پیرۆزباهییان ل ئەندام و لایەنگر و دۆست و جەماوەرێ پارتییا خوە و هەموو خەلكێ كوردستانێ دكەین، ب تایبەتی ژی ئێك ب ئێك پێشمەرگێن مە یێن قەهرەمان كو ب جامێرییا وان كوردستان یا ئارام وسەربلند و پاراستییە.

سالار محەمەد دۆسكی:

كار و بزاڤێن رۆژانێن بەرخودان و خەباتێ‌ ل سەر دەمێ‌ شورەشا 26ی گولانێ‌ دناڤا چادرگەها 26ی گولانێ‌ بەردەوامی هەیە،  چەند پێشمەرگە و خەباتكەرێن ئەوان رۆژێن سەخت و دژوار بەحسێ‌ كار و ژیانا خوە یا وی سەردەمی دكەن.

تالب سەعید حەمو، تەكنیكارێ‌ ئێزگێ‌ دەنگێ‌ كوردستانا ئیراقێ‌، بۆ رۆژناما ئەڤرۆ دیاركر كو ل سالا 1985 هەتا پشتی سەرهلدانێ‌ ل ئێزگێ‌ دەنگێ‌ كوردستانا ئیراقێ‌ من كاركریە، گۆت: وی دەمی ئەم خوبەخش بووین و مە ل ئێزگەی كاركریە وەك پێشمەرگە، وی دەمی پارتی دیموكراتی كوردستان گەلەك ب گرنگی زانی بچمە وێرێ‌ كاربكەم وەك كادرەكێ‌ شارەزا دبیاڤێ‌ تەكنیكی دا وی دەمی ئێزگە ل گوندێ‌ (خرێنەی) بوو ل دەڤەرا (لولان) و شارەزایەك من هەبوو پێشتر و هەڤال ژی ل ئێزگەی هەبوون و مە پێكڤە كاركر.
هەمان تەكنیكار ل ئێزگەی گۆت: وی دەمی دو دەمژمێرێن پەخشی هەبوون ژ حەفتێ‌ هەتا هەشتێ‌ سپێدێ‌ و (45) خولەك ب كرمانجی یا ژووری و كرمانجی یا ژێری و 15 خولەك ب زمانێ‌ عەرەبی بوو و ل گەل پەخشكرنا سروود و سترانێن نەتەوەیی ل گەل بابەتێن رۆژانە، زێدەباری پرۆگرامێن جورە و جور وەك پەیڤا ئێزگەی و دەنگ و باس و پرۆگرامێ‌ شەهیدان، پرۆگرامێ‌ قوتابی و لاوان و پرۆگرامێن تایبەت ل سەر داستانێن پێشمەرگەی هەبوون وەك داستانێن (دێرەلوك، كانی ماسێ‌، بامەرنێ‌) پرۆگرامێن تایبەت ل سەر هەلكەفتێن شورەشێ‌ هەبوون، ل سالا 1988 و پێدا مە پرۆگرامێن تایبەت هەبوون بۆ كەمپێن(موشێ‌ و دیاربكەر و مێردین) و ئێزگە هەر یێ‌ بەردەوام بوو و چ جاران بێ‌ دەنگ نەبوویە و ئەو دەنگێ‌ چ جاران بێ‌ دەنگ نەبووی ئێزگێ‌ دەنگێ‌ كوردستانا ئیراقێ‌ یە.
محەمەد زڤنگی، ئێك ژ پێشمەرگێن شورەشا گولانێ‌ كو ئێك ژ بەرهەڤبوویێن چادرگەها 26ی گولانێ‌ یە بۆ ئەڤرۆ گۆت: دناڤا ئەڤێ‌ كەمپێ‌ دا مە بەحسێ‌ شورەشێ‌ بۆ گەنجان كر، بەلێ‌ كێماسیێن گەنجان گەلەكن و ژ هێزا مە پترن، چەرخێ‌ خەباتێ‌ و بەرخودانێ‌ و هەلگرتنا چەكی بوری و دەرباز بوو وی دەمی بەرەڤانیكرن ب تڤەنگێ‌ بوو و قۆناغا نوكە فیدرالیەت و ب ئانەهیا خودێ‌ بەرەف پێشڤە دچین و هەمی بزاڤ و كارێن شورەشا گولانێ‌ ئەو بووینە بەرێ‌ بنیاتێ‌ ئەڤرۆ بدانیت و سوپاس بۆ خودێ‌ گەهشتیە ئەوان هیڤی و ئومێدا ئەوێن ل سەر هاتینەئاڤاكرن، قۆناغێن دەستپێكێن شورەشێن ئیلون و گولانێ‌ ئەو قۆناغ مە دەربازكرن و ئەو قۆناغ سەرەتایی بوون و ئەو دەربازبوون و دڤێت ئەم بەحسێ‌ پێشیێ‌ بكەین.
هەمان پێشمەرگە گۆت: وی دەمی چەك گەلەكێ‌ موقدەس بوو و ئەگەر لژنەكێ‌ دو دوشك هەبان تشتەكێ‌ گەلەك گرنگ بوو و هاتن و چوونا دوشكێ‌ ژی دو پیشمەرگا دماوێ‌ دەمژمێرەك یان دو دومژمێرا دشیان راكەن و دانن، مەفرەزێن پێشمەرگەی ل دووماهی یا سالێن حەفتێیان جار جار ئەف دوشكە دگێران ل دەڤەرێ‌ و ل شورەشا ئیلونێ‌ هەمی چەكێ‌ گران مە هەبوو و ب تنێ‌ دەبابە نەبیت و هەتا نەمساوی مە هەبوون و هەر هەمی چەك من بكارئیناینە و من گەلەك حەزژێ دكر و دەمێ‌ چوویم و بوویمە پێشمەرگە ژیێ‌ من 16 سال بوو من ریهێن خوە نە تراشی بوون و ئەم هێزەكا گەروك بووین سەر ب بەتەلیونا سلێمان سەعید زێوا شەفیق .
عەبدوللا سەعید بەگ نێروەیی خەلكێ‌ گوندێ‌ بێروما، بۆ رۆژناما ئەڤرۆ دیاركر كو ل سالا 1986 پەیوەندی ب شورەرشا گولانێ‌ كریە و ل سەر دوشكا 14 و نیڤ بوو، بۆ رۆژناما ئەڤرۆ گۆت: هەر لدویف بریارا شورەشێ‌ دەمێ‌ فەرمانا ڤەكرنا قوتابخانا هاتیەدان مە پەیوەندی ب سەرپەرشتێن قوتابخانا كر وەك مامۆستا و رێڤەبەرێ‌ قوتابخانێ‌ مە دەست بكارێ‌ خوە كر و ڤەكرنا قوتابخانا گەلەك كاریگەری و مورالا خەلكێ‌ مە دناڤا دەڤەرێن ئازادكری بلندكر و ڤەكرنا قوتابخانا رۆحەكا نەتەوەیی مە دا خەلكێ‌ خوە، ل سەر وێ‌ چەندێ‌ مە زارۆكێن خوە فێركرن كا بۆچی كورد شورەشێ‌ دكەن؟ مەدڤیا زارۆكێن مە بزانن بۆچی ئەم چەكی دهەلگرین؟ ل سەر ئەڤان بنەمایێن نەتەوەیی مە زارۆكێن خوە فێركرن وی دەمی قوتابخانا مە دەركەفت یا ئێكێ‌ و مووچێ‌ مە 85 دینار بوون و ژ لقێ‌ ئێك دهاتن و دەمێ‌ قوتابخانا مە یا ئێكێ‌ دەركەفتی 160 دینار وەك دیاری بوومن هاتن و ئەم بەردەوام بووین و چەند مامۆستایێن دی ژی ل گەل مە بوون و نێزیكی 70 قوتابیان هەبوون.
جهێ‌ ئاماژەكرنێ‌ یە كو ل شەڤا دەربازبووی و پشتی خەلكێ‌ گوندێ‌ كەمەكا ئاگەهدار بووی كو خیڤەتگەها شورەشا 26ی گولانێ‌ دێ‌ ل ئاقارێ‌ گوندێ‌ وان هێتە ئەنجامدان، ئافرەتێن گوندێ‌ ناڤبری رابوون ب دروستكرنا نانێ‌ شیڤێ‌ و تێشتا سپێدێ‌ بۆ مێهڤانێن گوندی كو زێدەتر 400 گەنجان و 100 پێشمەرگێن دناڤا خیڤەتگەها 26ی گولانێ‌ دپشكدار بووینە .
هەڤدەم موختارێ‌ گوندێ‌ كەمەكا ل دور ڤێ‌ چالاكیێ‌ گۆت: وەك خەلكێ‌ گوندێ‌ كەمەكا مەڤیا ببینە بەشەك ژڤێ‌ چالاكیا نەتەوەیی ئەوا ل گوندێ‌ مە هاتیە ئەنجامدان و هەر چ بۆ پێشمەرگەی بكەین هەر كێمە و نانێ‌ سێلێ‌ و ماستێ پەزی و پتات بۆ تێشتێ‌ هاتینە بەرهەفكرن و هەمی پێدڤیێن پێشمەرگەی ئەوێ‌ ل چیا پێدڤی دبیت وەك دەفكێ‌ موسێ‌ و بەكەرە و هەر پێدڤیەكا دی بوو هاتینە بەرهەفكرن، دەست خوشیێ‌ ل ژنێن گوندی دكەم كو پتر ژ 20 ژنان هەتا درەنگی شەف نان پاتی یە.

سالار محەمەد دۆسكی:

قوتابخانێن شورەشێ‌ رۆلەكێ‌ كاریگەر هەبوو دپەروەردەكرن و فێركرنا زارۆكێن پێشمەرگەی دا وەك بەرسڤەك بۆ دوژمنی كو ژیان و فێركرن یا بەردەوامە، چەند مامۆستایێن شورەشێ‌ بڤی رەنگی بوومە ئاخڤن.
ئەحمەد قەرەنی، ئێك ژ سەرپەرشتێن قوتابخانێن شورەشێ‌، ل دور هزرا ڤەكرنا قوتابخانا گۆت: هەمی هزر و بیر و باوەرێن مە ل وی سەردەمی ئەو بووینە كو ڤەكرنا قوتابخانا گەلەك یا گرنگە و مە پێدڤی ب وێ‌ چەندێ‌ یە زارۆكێن پێشمەرگەی خواندەڤان بن و نەزان نەمینن و ئەوا قوتابخانا گەلەك مفا گەهاندە ئەڤرۆ و دەرچووێن ئەوان قوتابخانا گەلەك ئەڤرۆ نۆشدار و ئەندازیارن و گەهشتینە پلێن بلند، جهێ‌ فەخرو شانازیێ‌ یە ئەڤرۆ من قوتابیەكێ‌ خوە ل ڤێ‌ چادرگەهێ‌ دیت نۆشدارە و دەست خوشیێ‌ ل بەرهەفكەرێن ڤێ‌ چالاكیێ‌ دكەم.
مامۆستا كوردستان عەبدولرەحمان، مامۆستایەكا ئافرەتە ل سالا 1987 بۆ ماوێ‌ سالەكێ‌ وانە ل گوندێ‌ هورە گۆتینە قوتابیان ل سەر دەمێ‌ شورەشێ‌ و بۆ رۆژناما ئەڤرۆ گۆت: پشتی حوكمەتا بەعس بریاردای ل هەمی دەڤەرا قوتابخانە بهێنەڤەكێشان، ل سالا 1987 و سەركردایەتی یا شورەشا 26 گولانێ‌ و ل دویف بریارا جەنابێ‌ سەرۆك (مەسعود بارزانی) قوتابخانێن شورەشێ‌ ل دەڤەرێن ئازادكری هاتنەڤەكرن و چەند لژنە هاتنە دروستكرن و مامۆستا ئەحمەد قەرنی سەرپەرشتێ‌ ئەوێ‌ لژنێ‌ بوو و سەرەدانا هەمی گوندان كر ب وێ‌ مەبەستا ئامارا زارۆكێن ژیێ‌ وا شەش سال و زێدەتر تۆماركرن 4/9/ 1987ێ‌ ئەو گوندێن قوتابخانە تێدانە هاتنەڤەكرن.
مامۆستا كوردستان ئەو ژی گۆت: قوتابخانە ل گوندێ‌ مە (هورە) هاتەڤەكرن و رۆلێ‌ سەرپەرشت و مامۆستا من دگێرا وی دەمی بتنێ‌ مامۆستا بووم ل وێ‌ قوتابخانێ‌ و (40) قوتابی ژ هەردو رەگەزان مە هەبوون و دووڤ دا مامۆستا (زەینل حسێن) ژی هاتە قوتابخانا مە و هەفكار بوو ل گەل مە د پەروەردەكرن و فێركرنا زارۆكێن پێشمەرگەی دا و دیسا مامۆستایەكا دی بناڤێ‌(زلیخا محەمەد یوسف) هەمان سال هاتە قوتابخانێ‌ و مە دەست ب خواندنێ‌ كر وی دەمی شیانێن مە گەلەك د كێم و سنورداركری بوون.
مامۆستا ناهیلا عەبدولقهار محەمەد، ئێك ژ مامۆستایێن ئافرەتێن شورەشێ‌ بوو، ل دور ڤەكرنا قوتابخانێن شورەشێ‌ ل وی سەردەمی بۆ ئەڤرۆ گۆت: ل سالا 1987ێ‌ ل گەل خێزان و دایك و بابێن خوە مە قەستا ناڤ شورەشێ‌ كریە و مە قەستا دەڤەرا نێروە و رێكان كریە و گوندێ‌(دوس) سەر ب لژنا ناوچا گولان یا وی سەردەمی ڤە، هەر وێ‌ سالێ‌ من پەیوەندی ب ئێكەتیا قوتابی و لاوان كریە و هەمان سال ل دووف بریارا جەنابێ‌ سەرۆك مەسعود بارزانی قوتابخانە هاتنە ڤەكرن و هاتمە وەرگرتن هەم پێشمەرگە و هەم مامۆستا شورەشێ‌ و قوتابخانا مە ل گوند (هیش) و ناڤێ‌ قوتابخانا مە (ژین) بوو و سەر ب لژنا ناوچا گولان ڤە بوو.
هەمان مامۆستا گۆت: وی دەمی ئەم دو مامۆستا بووین و ئێك رێڤەبەر و مە نێزیكی (40) قوتابیان هەبوون ژ هەردو رەگەزان، دەمێ‌ دەسپێكێ‌ قوتابخانە هاتینەڤەكرن دەواما قوتابخانا یا دیاركری نەبوو بەلكو هەمی دەمێن خوە مە بوو قوتابیان تەرخانكربوون وهەر هەمی شیانێن خوە مە بوو زارۆكان تەرخانكر بوون چونكە هەست و روحەكا كوردینیێ‌ دناڤا جەرگێ‌ مە هەمیان دا هەبوو و مە هزر دكر ئەڤ زارۆكە ئێمانەتێ‌ مەنە و زارۆكێن پێشمەرگەی نە و بابێن وا ل چەپەرێن بەرگریێ‌ بوون و ئەم ژی وەك پێشمەرگەی و ب هەمان هێز و خەبات د بەرهەف بووین د فێركرنا زارۆكێن واندا و هەمی بزاڤ و شیانێن مە ئەو بوون ئەف زارۆكە نەمینن نەخواندەوار.
مامۆستا ناهیلایێ‌ گۆتژی: گەلەك جاران مەترسی كەفتیە سەر گیانێ‌ مە و قوتابیان و فرۆكێن دوژمنی هەردەم ل هنداڤی مەبوون و گەلەك جاران مە جهێ‌ قوتابخانێ‌ ڤە گوهاستیە و گەلەك جاران چووینە شكەفتان و دول و نەهالان سەخمەراتی پاراستنا گیانێ‌ مامۆستا و قوتابیان.
هەمان مامۆستا گۆتژی: وی دەمی پێدڤیێن خواندنێ‌ گەلەك ب زەحمەت بوون و بتنێ‌ ل سەر وێ‌ چەندێ‌ بوو ئەگەر پێشمەرگەی داستانەك ئەنجام دابا دا وەك دەستكەفتی بوو قوتابخانێن مە پێدڤیێن پەروەردە و فێركرنێ‌ ئینان و هەر سێ‌ چار قوتابیان پەرتووكەك هەبوو و مە پێنوس قەتكرن و بەلاڤەدكرن ل سەر قوتابیان، ڤەكرنا ئەوا قوتابخانا گەلەك مفا گەهاندە ئەڤرۆ و دەرچووێن ئەوا قوتابخانا ئەڤرۆ كادرێن هەرە پێشكەفتی نە ل دامودەزگەهێن حزبی و حكۆمی و رۆلێن هەرە باش دگێرن و گەلەك بووینە مامۆستا و دەرچووێن زانكۆیانە، ئەو خواندنا دماوێ‌ سالەكێ‌ دا بۆ ئەوان قوتابیان هاتیەگۆتن ل ئەوان كاودانێن بەرتەنگ و نەخوش و بەر ترس و سەرمایێ‌ گەلەك مفا گەهاندنێ‌ و ئەڤرۆ ئەو قوتابی بووینە سونبل و بنیاتێ‌ ئازادی و تەناهی یا ئەڤرۆ، داخازێ‌ ژ قوتابیێن ئەڤرۆ دكەم بلا گەلەك خوە ماندی بكەت و هەمی پێدڤیێن خواندنێ‌ ل بەر دەستێ‌ وی هەنە و هەر دەم مللەتێ‌ مە پێدڤی ب مامۆستا و كەسانێن شارەزا و خودان زانستە چونكە مللەتێ‌ مە ژ چ مللەتان كێمتر نینە و مللەت ب زانستی پێش دكەڤن.
مامۆستا ئەحمەد قەرەنی ئەو ژی گۆت: پشتی ئەنفالێن رەش و خەلكێ‌ مە دەربەدەری توركیا و ئیرانێ‌ بووین و تایبەت ئەو خەلكێ‌ ل كەمپێن(مێردینێ‌، موشێ‌) نیشتەجێبووین مە هزر ل ڤەكرنا قوتابخانا كر دناڤا كەمپان دا و مە گۆت ئەگەر سوباهی وەلاتێ‌ مە رزگاربیت یان كوردستان ببیتە دەولەت دێ‌ چاوا ژین ئەف قوتابیە ل گەل ئەوان قوتابیێن ماینە وەلاتی دا و چووینە قوتابخانێ ودێ‌ چاوا بەرسفێ‌ دەین و ئەف زارۆكە هەمی زارۆكێن پێشمەرگەی و خەباتكەرا بووینە.
ئەحمەد قەرنی ئەو ژی گۆت: مە گەلەك كومبوون ل سەر بابەتی ل گەل كەسایەتی و ماقیلێن كەمپێ‌ ئەنجامدان و مە بریاردا كو دێ‌ دەست ب ڤەكرنا قوتابخانا كەین دناڤا كەمپان دا و مە نەڤێت زارۆكێن مە نەزان بمینن و دەمێ‌ قوتابخانە هاتینەڤەكرن، دەسپێكێ‌ نە مە كاغەز بوون و نە تەباشیر بوو و هەر مە چ نەبوو و ئەم دناڤا سیمەكی دابووین و هەر قەدەغە بوو دەركەڤین، دەمێ‌ ئەرزاق بوومە دهات قودیكێن معجینێ‌ تەماتێ‌ مە كاغەزێن سەر قودیكا ژێڤەدكرن و سەر كاغەزێن ئەوا قودیكا نڤێسی، دیسا هندەك ئاخا سپی ژ چادرگەهێ‌ وێڤەتر هەبوو ئەم چووین مە دئینا و مە ل سەر سێلێن نانی نڤێسی، چونكە تەختە رەش وی دەمی نەبوون و ژیان گەلەك یا بزحمەت بوو هەر نانێ‌ ژیانێ‌ ب دەست كەسێ‌ نە دكەفت.
قەرەنی ئەو ژی گۆت: جارەكێ‌ ئەم ژ كەمپێ‌ دەركەفتین و چووینە بازاری و من دو پەرتووك كرین و پشتی هاتیمە مال من ب مەقەسێ‌ هەر هەمی پرت پرتكرن و كرنە كاغەزێن بچوویك و ب دەرزی و دەرزیكێ‌ من كرنە پەرتووكێن بچوویك و ل سەر قوتابیان بەلاڤەكرن و هەر قوتابیەكی چەند كاغەزەك كەفتنێ‌ و دووڤ دا كومبوونەك ژلایێ‌ سەركردایەتی یا پارتی دیموكراتی كوردستان ڤە هاتەكرن و قوتابخانە ب فەرمی هاتنەڤەكرن و بناڤێ‌ قوتابخانا بارزانی.

سەرۆك بارزانی پێشوازی ل شاندەكێ وەزارەتا دەرڤەیا قەتەر كر و هەردو ئالییان دوپاتی ل پێشڤەبرنا پەوەندیێن د ناڤبەرا هەولێرێ و دەوحە د بوارێن گەشتیاری، ئابۆری و ئاڤەدانكرنێدا كر.
دوهی شەمبیێ 25/5/2024، ل سەلاحەدین، سەرۆك مەسعود بارزانی پێشوازی ل شاندەكێ وەزارەتا دەرڤەیا قەتەر كر كو پێكهاتبوو ژ ئەحمەد بن حەسەن ئەلحەمادی، ئەمیندارێ گشتیێ وەزارەتا دەرڤەیا قەتەر و سۆلتان بن موبارەك ئەلكوبەیسی، بالیۆزێ قەتەر ل ئیراقێ و حسێن بن عەلی ئەلفەزالە، قونسلێ گشتیێ قەتەر ل هەولێرێ.
ب گۆڕەی بەیاننامەیەكا بارەگەهێ بارزانی، د دیدارەكێدا باس ل رەوشا سیاسی ل دەڤەرێ و گەف و ئاستەنگێن ل پێشبەری سەقامگیرییا دەڤەرێ هاتە كرن.
سەرۆك بارزانی، وەكو د بەیاننامەیا بارەگەهێ بارزانی دا هاتی، ئاماژەكر» باشترین رێك بۆ چارەسەركرنا گرفت و ئالۆزییان، پەیڕەوكرنا شێوازێ دانوستاندنێ و دووركەفتن ژ شەر و كاڤلكاریێ».
هەر د ئەوێ دیدارێدا دوپاتی ل پێشڤەبرنا پەیوەندییان دناڤبەرا هەرێما كوردستانێ و دەولەتا قەتەرێ دا د بوارێن گەشتیاری و ئابۆری و ئاڤەدانكرنێدا هاتە كرن.

شاندەكێ بلند یێ هەرێما كوردستانێ ل تەهرانێ پشكداری د بەهییا ئیبراهیم رەئیسی سەرۆك كۆمارێ ئیرانێ و وەزیرێ دەرڤەیێ وی وەلاتیدا كر و هەڤخەمییا خوە و هەرێما كوردستانێ گەهاندە سەركردایەتی و حوكمەت و گەلێ كۆمارا ئیسلامییا ئیرانێ و خێزان و كەسوكارێن وان.
شاندێ بلند یێ هەرێما كوردستانێ پێكهاتبوو ژ نێچیرڤان بارزانی، سەرۆكێ هەرێما كوردستانێ، مەسرور بارزانی، سەرۆكێ حوكمەتا هەرێما كوردستانێ، مستەفا سەید قادر، جێگرێ سەرۆكێ هەرێما كوردستانێ، قوباد تالەبانی، جێگرێ سەرۆكێ حوكمەتا هەرێما كوردستانێ و رێبەر ئەحمەد، وەزیرێ ناڤخوەیی ل حوكمەتا هەرێما كوردستانێ.