هەولێر، قائید میرۆ

بەرپرسەكێ پارتی دیموكراتی كوردستان ئاشكراكر، پارتی یا بەرهەڤە بۆ هەلبژارتنێن جڤاتا نوونەرێن ئیراقێ و بەردەوام پارتی دگەل ئەنجامدانا پرۆسەیا هەلبژارتنان بوویە، هەروەسا گوت ژی: ئارمانجا پارتی ئەڤە زێدەتری ئێك ملیۆن دەنگان ل هەلبژارتنێن جڤاتا نوونەرێن ئیراقێ بدەستڤە بینیت و دێ بیتە حزبا ملیۆنی ب پشتەڤانییا جەماوەرێ خوە.
ساناو فەرەیدۆن، ئەندامێ كۆمیتەیا ناڤەندییا پارتی دیموكراتی كوردستان بۆ رۆژنامەیا (ئەڤرۆ) گوت» پارتی هەردەم یا بەرهەڤە بۆ ئەنجامدانا هەلبژارتنان، چو جاران پارتی دگەل پاشئێخستنا پرۆسەیا هەلبژارتنان نەبوویە، چونكە ئەم حزبەكین بەردەوام خزمەتا خەلكی دكەین و هەردەمێ هەلبژارتن بهێنەكرن پارتی یا بەرهەڤبوویە، پارتی یا ب هێزە ب پشتەڤانییا جەماوەرێ خوە بۆ هەلبژارتنێن ئیراقێ، ل سنوورێ سلێمانیێ ئەو دەنگێن پارتی بەری نوكە ب هەر ئەگەرەكێ كێم كربن زێدە بكەین، پارتی پشتی كۆنگرەیێ 14ێ هندەك گوهۆڕین ئەنجامداینە و خەلك ژی ب ئەرێنی باسێ گوهۆڕینێن پارتی دكەت، ئانكو گوهۆڕینێن پارتی رەنگڤەدان هەبوویە د ناڤا خەلكێ كوردستانێدا، پارتی زێدەتر هاتیە د ناڤا جەماوەریدا و دێ یا بەردەوام ژی بیت، چونكە خەلكێ هەرێما كوردستانێ باوەری ب پارتی دایە و پارتی ژی خوە ب خزمەتكارا خەلكی دزانیت و دخوازیت خزمەتا هەموو دەڤەران بكەت بێی جوداهی، چاڤێ خەلكی ژی ل دەستێ پارتییە هەم بۆ خزمەتێن زێدەتر و هەم ژی بۆ هەموو هەلوەستێن نیشتیمانی و نەتەوەیی هەر پارتییە بەرگریێ ژ مافێن هەڤوەلاتییان دكەت».
ساناو فەرەیدۆن ئاماژەكر» هەكە ئەنجامێن هەلبژارتنێن بۆری بەرچاف وەر بگرین و بهێنە هەڤبەركرن دگەل هەلبژارتنێن بەرێ ئەڤە بێگومان دەنگێن پارتی ل هەلبژارتنێن ئەڤسالە دێ گەلەك زێدەتربن ژ هەلبژارتنێن سالا بۆری یێن پەرلەمانێ كوردستانێ، ژ بەر كو ل هەلبژارتنێن سالا بۆری پارتی زێدەتری 800 هزار دەنگان بۆ پەرلەمانێ كوردستانێ بدەستڤەئینابوون، هەلبژارتنێن ڤێجارێ یێن ئیراقێ دێ دەنگێن دەڤەرێن كوردستانی یێن دەرڤەی ئیدارەیا حوكمەتا هەرێما كوردستانێ ژی پشكداریێ كەن و زێدەبن، ئەڤە ئەم د پشتڕاستین دێ دەنگێن پارتی ژ ئێك ملیۆن دەنگان دەرباز بن و ئارمانجا پارتی ژی ئەوە زێدەتری ئێك ملیۆن دەنگان د هەلبژارتنێن جڤاتا نوونەرێن ئیراقێدا بدەستڤە بینیت و دێ بیتە حزبا ملیۆنی ب پشتەڤانییا جەماوەر و دەنگدەرێن خوە».

كۆمسیۆنا بلند یا سەربخوە یا هەلبژارتنان ل ئیراقێ راگەهاند: زێدەتر ژ 150 هەڤپەیمانی و ئالیێن سیاسی و لیستێن تاكەكەسی، لیستا ناڤێن بەربژارێن خوە بۆ هەلبژارتنێن جڤاتا نوونەرێن ئیراقێ پێشكێش كرینە، هەروەسا دیاركر: هووربینییا ناڤێن بەربژاران دێ مەهەكێ ڤەكێشیت.
جومانە غەلای، پەیڤدارا كۆمسیۆنا بلند یا سەربخوە یا هەلبژارتنان ل ئیراقێ گوت» 160 هەڤپەیمانی و ئالیێن سیاسی و لیستێن تاكەكەسی، لیستا ناڤێن بەربژارێن خوە بۆ هەلبژارتنێن جڤاتا نوونەرێن ئیراقێ پێشكێشی كۆمسیۆنێ كریە».
گوت ژی» كۆمسیۆن یا بەردەوامە د كارێ هووربینییا داتا و پێزانین و بەلگەنامەیێن بەربژاران و دەمێ مەهەكێ ژی پێدڤییە بۆ تمامكرنا وێ پرۆسەیێ».
پێشتر موهەنەد مستەفا، ئەندامێ تیما راگەهاندنا كۆمسیۆنا بلند یا سەربخوە یا هەلبژارتنان ل ئیراقێ گوت» پرۆسەیا وەرگرتنا لیستێن بەربژاران ب دووماهی هاتیە و ناهێتە درێژكرن و پێنگاڤا دوویێ پێك دهێت ژ وەرگرتنا پێزانینێن بەربژاران ژ نڤیسینگەها كۆمسیۆنێ ل پارێزگەهان و پاشی هنارتنا وان بۆ ناڤەندا نیشتمانی یا كۆمسیۆنێ و ژ وێرێ بۆ ئالیێن پەیوەندیدار».
گوت ژی» هەر ئێك ژ وەزارەتێن بەرگریێ و ناڤخوە، دەستەیا لێپرسینێ و دادپەروەریێ، دەستەیا دەستپاكیێ، هەڤدەم دەزگەهێن ئەمنی ل هەرێما كوردستانێ، وەزارەتا ناڤخوەیا حوكمەتا هەرێما كوردستانێ، رێڤەبەرییا بەلگەیێن تاوانان و وەزارەتێن پەروەردەیێ و خواندنا بلند، سەرپەرشتییا پرۆسەیا هووربینیێ دكەن و دەمێ 15 رۆژان دێ بەردەوام بیت».
ل 9/4/2025، نڤیسینگەها رۆژنامەڤانییا محەمەد شیاع سودانی، بەلاڤكربوو، جڤاتا وەزیران ب پترییا دەنگان، 11/11/2025 وەكو رۆژا ئەنجامدانا هەلبژارتنێن جڤاتا نوونەرێن ئیراقێ دیاركربوو.

سەرۆك مەسعود بارزانی، ب هەلكەفتا هاتنا سەرێ سالا نوو یا مشەختی، پیرۆزباهی ئاراستەی هەموو موسلمانێن كوردستانێ و ئیراقێ و جیهانێ كر.
د پەیانا سەرۆك بارزانی دا هاتیە» ب هەلكەفتا هاتنا ئێكێ مەحەرەمێ و سەرێ سالا مشەختی گەرمترین پیرۆزباهیێن خوە ئاراستەی هەموو موسلمانێن كوردستانێ وئیراقێ و جیهانێ دكەم».
سەرۆك بارزانی د پەیاما خوە دا گوت ژی» لاڤا ژ خودایێ مەزن دكەم هاتنا سالا نوو یا مشەختی ببیتە ئەگەرێ ئاسوودەییێ و خوەشیێ بۆ هەموو ئالییەكی و ئاشتی و ئارامی ل دەڤەرا مە پەیدا ببیت».

نێچیرڤان بارزانی، سەرۆكێ هەرێما كوردستانێ پیشوازی ل ئیرفان سدیق، بالیۆزێ بریتانیا ل ئیراقێ كر و د دیدارەكێدا باس ل هەڤبەندیێن بریتانیا ل گەل ئیراقێ و هەرێما كوردستانێ، دانوستاندنێن هەولێرێ – بەغدایێ بۆ چارەسەركرنا كێشەیێن د ناڤبەرا واندا، رەوشا ناڤخوەیا كودستانێ و بزاڤێن پێكئینانا كابینەیا نوو یا حوكمەتا هەرێمێ و دووماهی پیشهاتێن رەوشا رۆژهەلاتا ناڤین هاتە كرن.
هەردو ئالییان دوپاتی ل پێشڤەبرنا هەڤبەندییان و بەرفرەهكرنا هاریكارییا هەڤپشك یا بریتانیا ل گەل ئیراقێ و هەرێما كوردستانێ د وارێن جودا جودا دا كر. هەروەسا د هەڤڕا بوون ل سەر گرنگییا چارەسەركرنا كێشەیێن هەولێرێ – بەغدایێ ب دانوستاندنێ و تێكگەهشتنێ و لەزكرن د پێكئینانا كابینەیا نوو یا حوكمەتا هەرێمێ دا.

نێچیرڤان بارزانی، سەرۆكێ هەرێما كوردستانێ پێشوازی ل ئادریان ئاسلشتاین، قۆنسلێ گشتیێ هۆلەندا ل هەرێما كوردستانێ كر و د دیدارەكێدا باس ل هەڤبەندیێن د ناڤبەرا هۆلەندا و هەرێما كوردستانێدا و دووماهی پێشهاتێن رەوشا رۆژهەلاتا ناڤین كر.
هەردو ئالییان دوپاتی ل پێشڤەبرنا هەڤبەندییان و بەرفرەهكرنا وارێن هاریكارییا هەڤپشك كر.
هەروەسا هەردو ئالی ل دۆر رەوشا دەڤەرێ و گرنگییا پاراستنا ئارامیێ و پەنابرن بۆ دانوستاندنان و رێكێن دیپلۆماسی بۆ چارەسەركرنا ناكۆكییان، د هەڤڕابوون.
د تەوەرەكێ دی یێ دیدارێدا، باس ل چەند پرسێن جهێ گرنگییا هەڤپشك هاتە كرن.

مەسرور بارزانی، سەرۆكێ حوكمەتا هەرێما كوردستانێ د كۆنگرەیەكێ رۆژنامەڤانیدا راگەهاند: ب پشتەڤانییا خودای و ب پالپشتییا خەلكێ هەرێما كوردستانێ، پشتڕاستم ئەڤ قەیرانە بەر ب تمامبوونێ دچیت .
سەرۆكێ حوكمەتا هەرێمێ ئەوژی بەرچاڤكر: ب هیچ جۆرەكێ ئەم دەست ژ هیچ مافەكێ دستووریێ خەلكێ كوردستانێ بەرنادەین و دێ بەردەوام ژی بین.
دەقێ ئاخڤتنێن سەرۆكێ حوكمەتا هەرێما كوردستانێ:
بابەتێ دویێ بابەتێ هەڤبەندییا هەرێما كوردستانێ و حوكمەتا فیدرالییە، ب تایبەتی بابەتێ مووچەیێ فەرمانبەرێن هەرێما كوردستانێ كو خالەكا گرنگە و دخوازم ب ناڤێ خوە و ب ناڤێ حوكمەتا هەرێما كوردستانێ، سوپاسییا هەموو هەڤوەلاتیێن كوردستانێ، ب تایبەتی فەرمانبەران بكەم كو ب راستی گەلەك د بێهن فرەهبوون، خۆڕاگر بوون بەرامبەر وێ چەندێ كو د دەمێ دو مەهێن بۆریدا مووچەیێ وان ب شێوەیەكێ نە قانوونی نەهاتیە هنارتن و ئەڤە كارەكێ نە دستوورییە و ب دیتنا مە كو فەرمانبەرێن هەرێمێ هەر ژ دەستپێكێ پێدڤی تێكهەلی هیچ جۆرە كێشە و ئالۆزییەكێ نەبن و هەكە د حالەتەكی ژی دا د ناڤبەرا حوكمەتا فیدرالی و حوكمەتا هەرێمێ ل سەر بابەتەكی كێشەیەك هەیە، نابیت مووچەیێ فەرمانبەرێن هەرێمێ تێكهەلی ڤان تشتان ببیت.
ب پشتەڤانییا خودای و ب پالپشتییا خەلكێ هەرێما كوردستانێ، پشتڕاستم كو ئەڤ قەیرانە دێ بەر ب تمامبوونێ چیت و دخوازم بێژم كو هێزا مە د پشتەڤانییا خەلكێ كوردستانێدایە و هەر پشتەڤانییا ڤی خەلكی بوو، باوەرییا خەلكی بوو ب حوكمەتا هەرێما كوردستانێ كو وەكریە ئەم ژی بەردەوام بین د مسۆگەركرنا هەموو مافێن خەلكێ كوردستانێ.
ب هیچ جۆرەكی ئەم دەست ژ هیچ مافەكێ دستووریێ خەلكێ كوردستانێ نائینین و دێ بەردەوام ژی بین، د دەمێ بۆریدا رۆژە نەبوو كو مژوول نەبووین بۆ چارەسەركرنا ڤان قەیرانان، ل گەل دەستهەلاتداران ل بەغدایێ ژی بەردەوام د پەیوەندیێدا بووین، ەز ب خوە ژی ل گەل سەرۆكێ جڤاتا دادوەریێ ئاخڤتیمە و ل گەل سەرۆك وەزیران ژی ئاخڤتیمە كو ئەم بەر ب چارەسەرییا ڤێ قەیرانێ بچین. وان ژی ب خوەشحالیڤە راگەهاند كو د بەرهەڤن د دەمەكێ گەلەك نێزیكدا شاندەكێ بهنێرن بۆ وێ چەندێ ل گەل مە بكەڤنە دانوستاندنا راستەقینە ل سەر ڤی بابەتی و چارەسەركرنا گرفتا مووچەیێ فەرمانبەرێن هەرێمێ.
دخوازم خەلكێ خەلكێ پشتڕاست بكەم كو ژیان و مرنا مە پێكڤەیە، ئەوا د شیانێن حوكمەتا هەرێمێدا بیت، ئەوا د شیانێن من دا بیت، دێ هەموو بزاڤان كەین بۆ وێ چەندێ كو بشێین هەموو مافێن خەلكێ كوردستانێ مسۆگەر بكەین. هیڤیدارم د دەمەكێ گەلەك نێزیكدا و ل ڤان چەند رۆژان بگەهینە ئەنجامەكێ گەلەك ئەرێنی و ئەڤ كێشەیە بەر ب چارەسەریێ بچیت و مووچەیێ فەرمانبەرێن هەرێما كوردستانێ بهێتە دابینكرن، بەلێ د هەر حالەتەكێدا بین، حوكمەتا هەرێما كوردستانێ یا پێگیرە ژ وێ چەندێ هەر چ د شیانێن وێ دا بیت، دێ خزمەتا هەڤوەلاتیێن كوردستانێدا بیت.
پرسیار: پێدڤی بوو هەرێما كوردستانێ رۆژانە 400 هزار بەرمیلێن پەترۆلێ رادەستی سۆمۆ بكەت، بۆچی نەهاتە بجهئینان؟ ئەو پەترۆلا رۆژانە ل دەرگەهێن سنووری دهێتە فرۆتن، داهاتێ وێ چەندە؟
مەسرور بارزانی: ژ ئەنجامێ سكالایەكا حوكمەتا فیدرالی دژی توركیا ل دادگەهەكا پاریس، بۆ ئەگەرێ راگرتنا هنارتنا پەترۆلا هەرێمێ ل سالا 2023، ژ وی دەمی هەتا نوكە زێدەتر ژ 25 ملیار دۆلاران زیان ب هەرێما كوردستانێ كەفتییە كو د ئەنجامدا ئەڤ زیانە بۆ حوكمەتا ئیراقێ ژی دزڤریت، چونكە حوكمەتا ئیراقێ قەرەبوویا خەلكێ هەرێما كوردستانێ ژی نەمریە ل سەر وێ زیانێ. ژبەركو پەترۆل نەدهاتە هنارتن، گەلەك ژ وان كۆمپانیێن كو بەرهەمئێنەرێن پەترۆلێ بوون، نەشیان د ئاستێ پێدڤیدا د بەرهەمئینانا پەترۆلێدا بەردەوام بن، لەوما ئاستێ بەرهەمئینانا پەترۆلێ گەلەك كێمكر. پشتی وێ چەندێ ژی كو بڕیارا دادگەها فیدرالی هاتیە دان ل سەر وێ چەندێ كو دڤێت هەرێما كوردستانێ پێگیر بیت ب هنارتنا پەترۆلێ، هندەك كێشەیێن تەكنیكی هەبوون، ئەم بەردەوام د دانوستانداناندا بووین ل گەل دەستهەلاتدارێن حوكمەتا فیدرالی ل بەغدا، ل گەل وەزارەتا پەترۆلێ، كو ئەو دهاتن و بەردەوام ل گەل وەزارەتا سامانێن سرۆشتی ئاخڤتنێن پێدڤی ل سەر وێ چەندێ كریە كو هەرێما كوردستانێ شیانێن چەندێ هەنە.
ل ڤێرێ دخوازم ب راشكاوی باس بكەم، كێشە ل گەل هەرێما كوردستانێ نینە، بەلكو كۆمپانیێن بەرهەمئینانا پەترۆلێ نە كو وان ل ڤێرێ وەبەرئێنان كریە و ئەو پشكەكن ژ هەموو هەڤكێشەیێ، ئانكو دڤێت رێككەفتن ل گەل كۆمپانییان ژی بیت، هەم مافێن كۆمپانییان بهێتە مسۆگەركرن، هەم حوكمەتا فیدرالی و هەم حوكمەتا هەرێمێ هەموو تێدا پشكدارن.
ژ بەر وێ چەندێ كێم بەرهەمئینانا پەترۆلێ ئەگەرێ وێ ئەوبوو كو حوكمەتا فیدرالی رێك گرتییە و بوویە ئەگەرێ نزمبوونا بەهەمئینانا پەترۆلێ. ژبلی وێ چەندێ، ئەو بەرهەمێ كو ل ناڤخوە دهێتە بەرهەمئینان، ئەڤە زێدەتر پشكەك ژێ یا كۆمپانییایە كو تاكو بشێن بەردەوامیێ ب دەرئینانا پەترۆلێ بدەن، مافێ وانە ب گۆڕەی گرێبەستان كو پشكەكێ ژ پەترۆلێ بفرۆشن، ل بازارێن ناڤخوە ئەو پەترۆل دهێتە بكارئینان و پشكەكا مەزن ژی دهێتە دان ب وان پارزینگەهان كو پانزینێ و پێدڤیێن ناڤخوەیی یێن هەرێما كوردستانێ دابین دكەن، هەروەسا بۆ كارەبێ ژی. ئەڤجا پشكەكا مەزن ژ وێ پەترۆلێ ب ڤی جۆری د ناڤ هەرێما كوردستانێدا هاتییە بكارئینان.
پرسیار: د دەمێ بۆریدا هەوە سەرەدانا ئەمریكا كر و دوو رێككەفتێن گرنگ هەوە ئەنجامدان، ئێكسەر پشتی وێ چەندێ مووچە ژ ئالیێ ئیراقێڤە هاتە بڕین، ئایا ئەڤە كارڤەدانا گرێبەستان بوو؟
مەسرور بارزانی: ئەم وان رێككەفتنێن ل ئەمریكا مە ئیمزاكرین، ب مافەكێ قانوونی و دستووریێ هەرێما كوردستانێ دزانین، چونكە پێشتر ئەڤ دو رێككەفتنە ل گەل دو كۆمپانیێن دی هەبوون، بەلێ مخابن وان هەردو كۆمپانییان نەشیان گرێبەستان بجهبینن، ژ بەر وێ چەندێ مافێ هەرێما كوردستانێ بوو پشتی كو كێشەیەكا قانوونی ل گەل وان كۆمپانییان هەبوو، هەردو گرێبەستان زڤراندن و پاشی ب دو كۆمپانیێن دی هاتنە دان كو د ئەنجامدا هەوە دیت ل واشنتۆنێ مە گرێبەست ل گەل دو كۆمپانیێن ئەمریكی ئیمزاكرن. ئانكو گرێبەست پێشتر هەبوون بەلێ ل گەل دو كۆمپانیێن دی بوون.
ژ ئالییەكێ دیڤە، ئەڤ هەردو كۆمپانیێن كو گرێبەست ل گەل هاتینە ئیمزاكرن، هەردو زێدەترە ژ 15 سالان ل هەرێما كوردستانێ كار دكەن، ئانكو هیچ تشتەكێ نە قانوونی نەبوو كو حوكمەتا فیدرالی ڤێ چەندێ بكاربینیت بۆ بڕینا مووچەی.
دخوازم ئاماژێ ب خالەكا گرنگ بدەم، ب گۆڕەی ئاخڤتنێن دەستهەلاتدارێن بەغدایێ ب خوە، دادگەها فیدرالی د دەمەكی دەستێوەردان د بابەتێ مووچەیێ هەرێما كوردستانێدا كر كو هندەك ئالیێن ناڤخوەیی ل ڤێرێ سكالاكر و داخواز ژ حوكمەتا فیدرالی كر كو دەستێوەردانێ د بابەتێ مووچەیێ خەلكێ كوردستانێدا بكەن و راستەوخوە مووچە ژ بەغدایێ بۆ خەلكێ كوردستانێ بهێتە هنارتن، مافێ خەلكێ كوردستانێیە و مافێ قەوارەیێ هەرێما كوردستانێیە وەكو قەوارەیەكێ دستووری، دڤێت هەرێما كوردستانێ بودجە هەبیت، نەك دەستێوەردان د بابەتێ مووچەیدا بهێتە كرن. ئەڤە ژی مخابن ژ ئەنجامێ وێ سكالایێیە كو هندەك ئالییان كری، رێك خوەشكر بۆ وێ چەندێ دادگەها فیدرالی بهێتە و دەستێوەردانێ د ڤی بابەتیدا بكەت. ئەنجامێ ڤێ چەندێ ژی ئەوبوو كو دەم بۆ دەمی مووچە دهاتنە گیرۆكرن یان نەدهاتن هنارتن و ل سالا 2023 سێ مووچەیێن هەرێما كوردستانێ نەهاتنە هنارتن و ل سالا 2024 دو مووچە نەهاتنە هنارتن، هەرچەندە حوكمەتا هەرێما كوردستانێ ل دووڤ شیانێن خوە خواست پشكەك ژ ڤێ چەندێ قەرەبوو بكەت.
پرسیار:ئایا ئەڤە دووماهی بزاڤا حوكمەتا هەرێما كوردستانێیە یان ژی دەرگەهەكێ دی یێ دانوستاندنێ ل گەل بەرپرسێن ئیراقێ هەیە بۆ وێ چەندێ ماف بۆ خەلكێ هەرێما كوردستانێ بهێنە زڤراندن؟ ئایا ئەو شاندێ دهێت شاندەكێ جڤاتا وەزیرایە یان شاندەكێ تەكنیكییە؟ ئایا بژاردەیێن پێشبەرێ هەرێما كوردستانێ چنە ل دەمێ دانوستاندنان؟
مەسرور بارزانی: سەبارەت بابەتێ ئێكێ، بێگومان دێ د بەردەوام بین د دانوستاندنێدا و دەرگەهێ گەنگەشەیێ نا دائێخین و نابێژین ئەڤە دووماهی دەرفەتە و هەردەم دەرگەهێ دانوستاندنێ بۆمە یێ ڤەكرییە و د بەرهەڤین ب دانوستاندنێ هەموو كێشەیان ل گەل بەغدایێ چارەسەر بكەین. هاتنا شاندی بێگومان دێ د ئاستەكێ بلند دابیت و ل گەل سەرۆك وەزیرێن ئیراقێ ئاخڤتیمە و شاندەك دڤێت بهێت كو ل ڤێرێ بشێت بڕیارێ بدەت، تنێ شاندەكێ تەكنیكی نابیت، بەلكو سۆز یا دایە مە بۆ وێ چەندێ بهێن بڕیارێ بدەن بۆ گەهشتنێ ب بڕیارەكا ئەرێنی د بەرژەوەندییا هەڤوەلاتیێن خەلكێ كوردستانێدا.
خالەكا دی هەیە دخوازم ب رۆهنی باس بكەم، بەغدا مولكێ تاكە ئالییەكی نینە كو ئەم بچین خازخازۆك بین و ئەو خودان مال، دڤێت ئەم هەموو د ڤی وەلاتیدا وەكهەڤ بین و ئەم خوە ب خودانێن دەستهەلاتێ دزانین و دڤێت هەموو بزاڤان ژی بكەین بۆ وێ چەندێ بگەهینە رێككەفتنێ كو ئەم ل ڤێرێ هەڤوەلاتیێن وەكهەڤ بین و هەموو مافێن مە ژی ب شێوەیەكێ وەكهەڤ و دادپەروەرانە بهێنە مسۆگەركرن، هەكە ئەڤە نەبیت، ئانكو كێشەیەكا جدی د بجخئینانا دستووری ل ئیراقێ هەیە. لەوما ل سەر ڤێ خالێ دخوازم هەوەلاتییان پشتڕاست بكەم كو ئەم دێ ل سەر مسۆگەركرنا مافێن دستووری ل حوكمەتا فیدرالی بەردەوام بین، بەلێ هەكە نەگەهشتینە ئەنجامەكێ ژی، هەرچ د شیانێن مە دا بیت ل هەرێما كوردستانێ ب داهاتێ ناڤخوە و كێمكرنا مەزاختییان، ب هەر جۆرەكی بیت، هەكە نەشێن ژی ل دەمێ خوە یان وەك پێدڤی ل ڤی دەمی هەموو مافێن وان مسۆگەر بكەین، ئەوا ل دووڤ شیانێن مە بیت، بێگومان دێ وێ كەین، دخوازم خەلك 100% ژ ڤێ چەندێ پشتڕاست بیت.
پ: هەژمارەكا خانەنشینان پێنج بۆ شەش مەهایە مووچە وەرنەگرتییە، چارەسەری چیە بۆ ڤی بابەتی؟
مەسرور بارزانی: مافێ خانەنشینایە، دیسان ئەز دەستخوەشیێ لێ دكەم و سوپاسییا وان دكەم و سوپاسییا بێهنفرەهییا وان دكەم. مافێن وانە و پشتڕاست بن مافێن هەوە بەرزە نابیت، ئینشائەللا ل دەمێ نێزیك هەموو ئەو مووچەیێن كو پێ نەهاتییە دان دێ تەرخان كەین و هێنە دان.

سەرۆك بارزانی و قۆنسلێ گشتیێ ئوردنێ هەڤبەندی و دۆستایەتییا د ناڤبەرا هەرێما كوردستانێ و ئوردنێ دا گەنگەشەكر .
دوهی سێشەمبی 24/6/2025، ل سەلاحەدین سەرۆك بارزانی پێشوازی ل فوئاد خازر مەجالی قۆنسلێ گشتیێ ئوردنێ ل هەرێما كوردستانێ كر.
د دیدارەكێدا قۆنسلێ گشتیێ ئوردنێ ب هەلكەفتا ب دووماهی هاتنا ئەركێ وی و بۆ خاتر خواستنێ سەرەدانا سەرۆك بارزانی كربوو، پێزانین بۆ رۆلێ سەرۆك بارزانی د هێزكرنا هەڤبەندی و دۆستایەتییا د ناڤبەرا هەرێما كوردستانێ و وەلاتێ وی دا و هەروەسا ئارامییا ل هەرێما كوردستانێ و ئیراقێ هەی.
هەر د وێ دیدارێدا سەرۆك بارزانی سەرەرای دەستخوەشیێ بۆ ئەرك و وەستیانا قۆنسلێ ئوردنێ بۆ پیشڤەبرنا هەڤبەندییان د ناڤبەرا هەردو ئالییان هیڤییا سەركەفتنێ بۆ خواست.

سەرۆكێ هەرێما كوردستانێ پێشوازی ل راگەهاندنا ئاگربەستێ د ناڤبەرا ئیسرائیلێ و ئیرانێدا ژ ئالیێ سەرۆكێ ئەمریكی ڤە كر و دیپلۆماسی ب تاكە رێك بۆ گەهشتن ب ئارامیێ دا زانین.
دوهی سێشەمبی 24/6/2025، نێچیرڤان بارزانی، سەرۆكێ هەرێما كوردستانێ ل تۆرا جڤاكییا ئێكس بەلاڤكر» پێشوازیێ ل راگەهاندنا ئاگربەستێ د ناڤبەرا ئیرانێ و ئیسرائیلێدا ژ ئالیێ سەرۆك دۆنالد ترەمپی ڤە دكەم».
سەرۆكێ هەرێما كوردستانێ گوت ژی» من باوەرییەكا تمام ب وێ چەندێ هەیە كو تاكە رێك بۆ ئارامیێ، تەناهیێ و خوەشگوزەرانیێ ل رۆژهەلاتا ناڤین دانوستاندنێن گشتگیر و ئاڤاكەر و تێكگەهشتنەكا هەڤپشك یا هەموو ئالییانە».
نێچیرڤان بارزانی دوپاتكر ژی» سوپاس و پێزانینان ئاراستەی دۆنالد ترەمپ، سەرۆكێ ئەمریكا و سەركردەیێن دی دكەم بۆ پێگیریبوونا وان ب دیپلۆماسییەتێ و چارەسەرییا ئاشتییانەیا ناكۆكییان د ڤی دەمێ هەستیار و گرنگدا».

سەرۆكێ هەرێما كوردستانێ ب هەلكەفتا مالئاڤاهییا كورێ وی، سەرەخوەشی ئاراستەی عەبدوللا حەسەن زادە و خیران و كەسوكارێن وی كر.
سەرۆكایەتییا هەرێما كوردستانێ پەیاما بەهیداریێ یا نێچیرڤان بارزانی، سەرۆكێ هەرێما كوردستانێ بەلاڤكر.
سەرۆكێ هەرێمێ د پەیاما خوە یا بەهیداریێدا دبێژیت» هەڤخەمێ وانم، ژ خودایێ مەزن دخوازم گیانێ رەحمەت ب دلوڤانییا خوە شاد بكەت، ئارامیێ و هەدارێ ب مە هەموویان ببەخشیت».
عەبدوللا حەسەن زادە، زمانزان و نڤیسەرەكێ ناڤدارێ كوردە، ل رۆژهەلاتا كوردستانێ ژ دایكبوویە.

سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: دەستهەلاتدارێن بەغدا یاریا ب قویتێ خەلكێ كوردستانێ دكەن و هەڤدەم یاریا ب هەستێ وان ژی دكەن، ب رێكا ئینانا بەهانەیان بۆ نەهنارتنا مووچەی.
د. ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ گوت» وەزیرا داراییا ئیراقێ ل مەها ئێك یا ئەڤسالە ل گەل هەرێما كوردستانێ رێككەفتبوو مو هەتا مەها 12 یا سالا 2025 پارە ژ بەغدا بهێتە هنارتن و مووچەیێ هەر 12 مەهان هەڤشێوەیێ مەها ئێك بهێتە هنارتن و هەر وی دەمی رێككەفتین ل سەر (هەژمارا من) و داهاتێ ناڤخوە و هەموو تشتەكی، بەلێ پشتی مووچەیێ مەها چار، بەری ناڤەڕاستا سالێ، دبێژن: هەوە پارە نەمایە ل بودجەیا ئەڤسالەیا ئیراقێ. باشە چاوان ب چار مەهان پشكا سالەكێ یا هەرێمەكێ نامینیت؟ بۆچی بەری رێككەفتنێ ئەو چەندە نەگوتە مە؟ بۆچی پشتی چار مەهان دبێژن هەوە پارێ هەشت مەهان نەمایە؟ «.
سەرۆكا فراكسیۆنا پارتی ئەوژی رۆهنكر» ل دووماهی روونشتنا هەر چار سەرۆكایەتیێن ئیراقێ سەبارەت پرسا مووچەی، ڤێجارێ دبێژن دڤێت هەرێما كوردستانێ پێگیر بیت ب بڕیارا دادگەها فیدرالی ئەڤجا دێ پارە بۆ هێتە هنارتن ! باشە چاوا مە پارە ل بەغدا نەمایە بەلێ دهێن و دبێژن هەكە بڕیارا دادگەهێ بجهبینیت دێ پارەیان بۆ هەوە هنێرین؟ ئەڤ یاریكرنە ب هەستێ خەلكی چیە؟ هەروەسا ئەو چەند مەه بوون پارە د هنارتن، بۆچی نە دگوت بڕیارا دادگەهێ بجهبینن؟ باشە چاوان ئەو پارە هنارتینە؟ «.