ئه‌ڤرۆنيوز:
ژێده‌ره‌كى ژباژێرێ به‌سرا بۆ ئه‌ڤرۆنيوز ئاشكراكر كو نوكه خوه‌نيشانده‌رێن به‌سرا بزاڤا هێرشكرنێ ل سه‌ر مالا سه‌رۆكێ جڤاتا پارێزگه‌ها به‌سرا دكه‌ن.
عه‌لى سارى، رۆژنامه‌ڤان ژ به‌سره بۆ ئه‌ڤرۆنيوز گۆت” خوه‌نيشانده‌رێن به‌سرا يێن نێزيكى مالا وه‌ليد گێتان سه‌رۆكێ جڤاتا پاريزگه‌ها به‌سرا بووين، به‌لێ هێزێن پۆليسان يێن گه‌هشتينه مالا سه‌رۆكێ جڤاتێ ب مه‌ره‌ما بۆ رێگريێ ل خوه‌نيشانده‌ران”.
گۆت ژى” هێزێن پۆليسان ل به‌سرا يێ بزاڤا رێگريێ ل گه‌هشتنا خوه‌نيشانده‌ران بۆ مالا سه‌رۆكێ جڤاتا پاريزگه‌هێ دكه‌ن، خوه‌نيشانده‌ر ژى يێ به‌را ل هێزێن پۆليسان وه‌ردكه‌ن وئاگرى دبه‌رده‌نه تايران”.
دياركر ژى كو نوكه پارێزگه‌رێ به‌سرا ژى گه‌هشته مالا سه‌رۆكێ جڤاتا پاريزگه‌هێ.
ئه‌ڤرۆنيوز:
وه‌زاره‌تا دارايى وئابوورى ل هه‌رێما كوردستانێ رێنمايه‌كا نوو ل دۆر جهێ دانانا فه‌رمانبه‌رێ گرێبه‌ست ده‌ركر وئاماژێ ب وێ چه‌ندێ دكه‌ت پێدڤيه وان كه‌سان فه‌رمانگه ووه‌زاره‌تان ژى پێدڤى پێ هه‌بيت.
ل دووڤ رێنمايا نوو يا هژمار 21 كو ل ڤێ هه‌يڤێ ژلايێ وه‌زاره‌تا دارايى ڤه هاتيه ده‌ركرن، ل ده‌مێ دامه‌زراندنا فه‌رمانبه‌ره‌كێ گرێبه‌ست ل جهێ فه‌رمانبه‌ره‌كێ دى، پێدڤيه هه‌مان باوه‌رنامه وبسپۆرى هه‌بيت.
تێدا هاتيه ژى كو فه‌رمانبه‌رێن گرێبه‌ست ل ده‌مێ داخوازكرنا پێدڤيێن فه‌رمانگه‌هان دێ هێنه دامه‌زراندن وپێدڤيه هه‌ر دوێ سالێ دا بهێته دامه‌زراندن ياكو فه‌رمانبه‌رێ ئه‌و چوويه جهێ وى تێدا هاتبيه فه‌سلكرن.
دياركريه ژى، پێدڤيه وێنێ نڤيسارا وى فه‌رمانبه‌رێ ژكارلاداى هه‌ڤپێچى نڤيسارا وى كه‌سى بهێته كرن يێ دهێته امه‌زراندن ب گرێبه‌ست.
تێدا هاتيه ژى، پێدڤيه ئه‌و كه‌سێ دهێته دامه‌زراندن هه‌مان باوه‌رنامه وبسپۆريا فه‌رمانبه‌رێ هاتيه جهێ وى هه‌بيت ودنڤيسارا فه‌رمى دا ئاماژه ب باوه‌رنامه وبسپۆريا هه‌ردو لايه‌نان بهێته كرن.
ئەڤرۆ نیوز:
داواکارێ گشتی یێ بەرشەلونا یا ئسپانی سکالایەک دژی سترانبێژا ٤١ سالی یا کولومبی شاکیرا تومارکریە.
داواکارێ گشتی یێ ئسپانیا زێدەتر دیارکریە ژبەر نە ئەداکرنا باجێ ل ناڤبەرا سالا ٢٠١٢ ھەتا ٢٠١٤ شاکیرا ژ دانا باجێ رەڤیە و ئەدانەکریە کو پێدڤی بوو وێ کوژمێ ١٤ ملیۆن و نیڤان دابایە حوکمەتا ئسپانیا و بۆ ڤێ چەندێ ژی شاکیرا تومەتبار کریە کو د ڤی ماوەی دا جھێ نیشتەجێبوونا خوە گوھۆریە و بەر ب گزیرتەیا باھاما دەستنیشان کریە داکو خوە ژ دانا باجێ قورتال بکەت ژ حوکمەتا ئسپانیا.
پارێزەرێن شاکیرایێ ژی ئەڤ چەندا ھاتیە دیارکرن رەتکریە و ھەموو بەلگە بەرھەڤ کرینە پێخەمەت ب سەلمینن بۆ دادگەھا ئسپانی کو شاکیرا چو تاوان د دەربارەیێ رەڤین ژ باجێ نەکریە.
ئەڤرۆ نیوز:
ئێڤاریا ئەڤرۆ د دیدارەکێ دا سەروکێ جڤاتا نوونەرێن عیراقێ پشتەڤانیا خوە بۆ ھەڤکاریا مەسروور بارزانی دیارکر د ماوێ سەروکاتیا کابینەیا نوو یا حوکمەتا ھەرێما کوردستانێ دا.
د دیدارا ئەڤرۆ ئێڤاری رۆژا شەمبی ناڤبەرا مەسروور بارزانی راوێژکارێ جڤاتا ئاسایشا ھەرێما کوردستانێ و سەروکێ جڤاتا نوونەرێن عیراقێ محەمەد حەلبووسی و شاندێ دگەل دا ھاتە ئەنجامدان و تێدا بەحس ل ئاستەنگێن بەرامبەر پروسەیا سیاسیا عیراقێ و پەیوەندیێن ناڤبەرا ھەرێم و عیراقێ دا ھاتنە کرن.
ھەر د ڤێ دیدارێ دا بەحس ل ئەرکێ جڤاتا نوونەرێن عیراقێ ل دۆر پرسێن گشتی تایبەت پرسا بودجەیا ھەرێمێ و ب شێوەکێ دادپەروەرانە بەحس کرن زێدەباری دوپاتکرن ل سەر جێبەجێ کرنا مادێ ١٤٠ یێ دەستورێ عیراقێ ھاتە کرن.
ل دووماھیێ محەمەد حەلبووسی داخوازا سەرکەفتنێ بۆ مەسروور بارزانی خواست دەربارەی سەروکایەتیا کابینەیا داھاتی یا حوکمەتا ھەرێما کوردستانێ و ئامادەیا خوە دەربری بۆ ھەر ھەماھنگیەکێ یان ھاریکاریەکێ.
ئەڤرۆ نیوز:
ئەڤرۆ سەروک بارزانی پێشوازی ل سەروکێ جڤاتا نوونەرێن عیراقێ محەمەد حەلبووسی کر و دکومبوونەکێ دا دوپاتکر کو گیروبونا تمامکرنا کابینەیا حوکمەتا نوو یا عیراقێ دێ کێشەیان کورتر ل و عیراقێ بەر ب رێیەکا نەدیار بەت.
د ڤێ کومبوونا ناڤبەرا سەروک بارزانی و محەمەد حەلبووسی دا ل سەلاحەدین ھاتیە ئەنجامدان تەئکید ل سەر پرەنسیپێن ھەڤسەنگیا دامودەزگایێن حوکمرانیی و کەرتێ ئەمنی و سەربازی ھاتە کرن.
د ڤێ کومبوونێ دا بەحس ل سەر دووماھی پێنگاڤێن تمامکرنا کابینا وزاری یا حوکمەتا نوو یا عیراقێ و ئەو ئاستەنگێن ل بەر سنگێ وێ دھێنە پێش ھاتنە کرن دیسان بەحس ل سەر پروسەیا سیاسی و ئەو کێشەیێن دھێنە پێش ڤێ چەندێ ھاتنە گوتوبێژ کرن.
ھەر د ڤێ کومبوونێ دا سەروک بارزانی ئەو چەندە ژی دوپاتکر گیروبونا تمامکرنا کابینەیا وەزارەتێن حوکمەتا عیراقێ دێ کێشەیان کویرتر کەن و دێ عیراقێ بەر ب چارەنڤیسەکێ نەدیار بەن.
د لایەکێ دی یێ ڤێ کومبونێ دا ھەردو لا دوپات کرن ل سەر پرەنسیپێن ھەڤسەنگیا دامودەزگایێن حوکمەتا عیراقێ و کەرتی ئەمنی و سەربازی کر، سەروک بارزانی پشتەڤانیا خوە بۆ سەروکێ جڤاتا نوونەرێن عیراقێ دیارکر بۆ چارەسەرکرنا کێشەیان و بلەزکرنا پروسەیا سیاسی یا عیراقێ کو ژ سالا ٢٠٠٣ وەرە پروسەیا سیاسیا نوکە باشترین دەرفەتە بۆ چارەسەرکرنا کێشەیان و ئاڤاکرنا باوەریەکا نوو ناڤبەرا لایەنێن سیاسی دا.
ئەڤرۆ نیوز:
وەزارەتا دارایی د نڤیسارەکا فەرمی دا چەندین رێنمایێن نوو دەربارەی فەرمانبەرێن گرێبەست بۆ دامودەزگایێن میری یێن سەر ب حوکمەتا ھەرێما کوردستانێ ڤە دەرکرن.
د ڤێ نڤیسارێ دا ئەوا ل رۆژا چارشەمبی ل رێکەفتی ١٢/١٢/٢٠١٨ ب ئیمزایا وەزیرێ دارایی رێباز حەملان ھاتیە دەرکرن ھاتیە ئێدی دەمێ داخوازا دامەزراندنا فەرمانبەرێن گرێبەست دکەن پێدڤیە ڤان خالان بەرچاڤ وەرگرن ژوانا ئەو رێڤەبەریا پێدڤی ب فەرمانبەرێ گرێبەست بیت پێدڤیە ب نڤیسارەکا فەرمی داخواز بکەت ب ھەمان بسپور و باوەرنامە بیت د ماوێ ھەمان سال بھێتە داخوازکرن.
رێنمایێن نوو ھاتینەدەرکرن بۆ فەرمانبەرێن گرێبەست:
١. ئەو فەرمانبەرێ دھێتە داخوازکرن ب شێوێ گرێبەست پێدڤیە ب نڤیسارەکا فەرمی ژلایێ وی دەزگایی بیت و داخواز بکەت.
٢. دڤێت میلاکێ فەرمانبەرێ فەسل کری یا وێ سالێ بیت یا فەرمانبەرێ نوو تێدا ل جھێ وی بھێتە دامەزراندن.
٣. وێنەیەک ژ فەرمانا فەسل کرنا وی بھێتە ھاوپێچکرن
٤. ئەو کەسێ ل جھێ وی دھێتە دانانان پێدڤیە ب ھەمان باوەرنامە و بسپوری بیت و ئەڤ چەندە د فەرمانێ دا بھێتە دیارکرن.
٥. ئەڤ رێنمایە ل رۆژا دەرکرنا وێ کار دێ پێ ھێتەکرن.
زاخۆ، عەلی حاجی:
ناحیا باتیفا ئەوا دکەڤیتە سەر ب قەزا زاخو ڤە زێدەتری ٤٨ دەمژمێرایە یا بێ کارەبا گشتی یە و ئەڤێ چەندێ ژی کێشە بۆ وەلاتیێن وێ ناحیێ دروست کرینە .
رزگار ئیبراھیم ئێک ژ ھاولاتیێن وێ ناحیێ یە دبێژیت: ل ١٣/١٢/٢٠١٨ ل دەمژمێر ٩ی سپێدێ کارەبا گشتی ژ باتیڤا یا ھاتیە برین و دەڤەرا مە دەڤەرەکا سارە ل وەرزێ زڤستانێ نەبونا کارەبێ ئاریشە بۆ مە دروست کریە و ئاڤا باتیڤا ب کارەبا گشتی ڤە گرێدایە ئەڤە بۆ ماوێ دو روژایە ئەم بێ ئاڤین و ئاڤا ڤەخارنێ ب دەست مە ناکەڤیت.
ناڤھاتی زێدەتر دبێژیت : ئەڤ کێشە سالانە دووبارە دبیت و مخابنی ڤە ھەتا نوکە نەشیاینە ڤێ کێشێ بۆ مە چارەسەر بکەن و تیمەک ژ دھوکێ دھێت بۆ چارەسەرکرنێ لێ ھەتا دھێن گەلەک گیرو دبن.
ل دور ڤێ کێشەیێ بەرپرسێ پشکا کارەبا باتیفا سەلیم سەعیدی بو ئەڤرو نیوز گۆت : کێشە یێ ل ھێلا KV١٣٢ دا نەبتنێ ناحیا باتیفا یێ ل ڤێ ئاریشێ دا بەلکو تاخێ تالکەبەرێ کو دکەڤیتە قەزا زاخو ھەمان کێشە ھەیە چونکی کارەبا وی تاخی ب باتیفا ڤە گرێدایە و مە ئەڤ کێشەیە چارەسەر کر لێ دوھی جارەکا دی کێبلێ وێ ھێلێ پەقی.
سەلیمی زێدەتر گۆت : تیمەک ژدھوکێ ھاتیە پێخەمەت چارەسەرکرنا وێ کێشەیێ دگەل کارمەندێت مە بەردەوامە و ئەم یێ ھەولا دەین ھێلەکا کاتی ژئەکادیمیا لەشکەریا زاخو بۆ باتیڤا ڤەگوھێزین دا ھاولاتیێن ناحیا باتیڤا ژڤێ کێشەیێ قورتال بن و ھەتا کو ب درستی کێشەیا ھێلا ١٣٢ KV چارەسەر بکەین .
ئەڤرۆ نیوز:
به‌رده‌وامیدان بو په‌یداكرنا ده‌لیڤێن كارى بو گه‌نج ولاوان ئه‌ڤرو سپێدێ 15-12-2018ل هولا ناڤه‌ندا قوتابییان ل زانكویا دهوكێ ب چاڤدێریا فه‌رهاد ئه‌مین ئه‌تروشى پارێزگه‌رێ دهوكێ وب ئاماده‌بونا اسماعیل محمد احمد هاریكارێ پارێزگه‌رى بو كاروبارێن مروڤایه‌تى نونه‌رێ پارێزگه‌رێ دهوكێ وسالار ئوسمان بریكارێ وه‌زاره‌تا ره‌وشه‌نبیرى ولاوان ونونه‌رێ رێكخراوا GIZیا ئه‌لمانى وژماره‌كا زور یا گه‌نج ولاوان رێ ورسمێن ب دوماهى هاتنا ئاهه‌نگا ده‌رچونا پشكدارێن دوو پروژێن په‌یداكرنا ده‌لیڤێن كارى هاتنه گێران.
لبه‌راهیێ نێچیرڤان سادق رێڤه‌به‌رێ رێڤه‌به‌ریا لاوان په‌یڤه‌ك پێشكێشكروبخێر هاتنا هه‌موولایه‌نان كر هه‌روه‌سا سوپاسیا رێكخراوا GIZ یا ئه‌لمانى كر كو پشته‌ڤانیا هه‌ردوو پروژێن وان كریه ژبو په‌یداكرنا ده‌لیڤێن كارى بو 260گه‌نجان ژهه‌ردوو ره‌گه‌زا.
رێڤه‌به‌رێ رێڤه‌به‌ریا لاوان ته‌كه‌زكر كو گه‌نج هێزا كاریگه‌ره بو ئاڤاكرنا هه‌ر وه‌لاته‌كى وئاڤاكرنا ژێرخانا ئابورى وخواست كو رێكخراوا GIZ ورێكخراوێن یوئێن به‌رده‌وام پشته‌ڤانیا گه‌نجان بكه‌ن وده‌لیڤێن كارى بو په‌یداكه‌ن ودیاركر كو ل ده‌مه‌كێ نێزیك ب رێكا 12 ناڤه‌ندێن وه‌رزش ولاوان دێ خول وراهێنان بو (600) گه‌نج ولاوێن دى دێ هێنه ڤه‌كرن.
پاش نونه‌رێ پارێزگه‌رێ دهوكێ په‌یڤه‌ك پێشكێشكر بناڤێ كارگێریا پارێزگه‌هێ پیروزباهى ل پشكدارین دهه‌ردوو پروژان دا وسوپاسیا رێكخراوا GIZ یا ئه‌لمانى كر كو پشته‌ڤانیا هه‌ردوو پروژا كریه هه‌روه‌سا په‌سنا رێكخراوا ناڤبرى كر كو زور هاریكاریا ئاواره وپه‌نابه‌ران وخه‌لكێ خوجهێ پارێزگه‌هێ كریه وخواست هاریكاریێن وان دبه‌رده‌وامبن.
پاش په‌یڤا بریكارێ وه‌زاره‌تا ره‌وشه‌نبیرى هاته خاندن ورولێ گه‌نجان دئاڤاكرنا وه‌لاتى دا به‌رچاڤكر وسه‌ركه‌فتن بو پشكدارێن هه‌ردوو پروژا خواست.
پاش په‌یڤا رێككخراوا جى ئاى زێد یا ئه‌لمانى هاته خاندن
هه‌ژى گوتنێ یه رێڤه‌به‌ریا لاوان ب هاریكاریا رێكخراوا GIZ یا ئه‌لمانى خول وراهێنان بو 260 گه‌نجان بو ماوێ دوو مه‌هان ڤه‌كرینه وده‌لیڤێن كارى بو په‌یداكرینه كو بشێن داهاته‌كى بو خو په‌یداكه‌ن.
ئه‌ڤرۆ نيوز، نيوار محه‌مه‌د سه‌ليم:
وه‌زاره‌تا دارايى يا عيراقێ راگه‌هانديه كو ئه‌و كار ژ بۆ وێ چه‌ندێ دكه‌ن، 50% ژ داهاتێ گۆمركان بۆ پارێزگه‌هان بيت و نوونه‌ره‌ك ژى ئاشكه‌را دكه‌ت كو ئه‌ڤ پێنگاڤه يا سه‌ركه‌فتى نابيت.
د. ئه‌حمه‌د سه‌فار، ئه‌ندامێ جڤاتا نوونه‌رێن عيراقێ ل سه‌ر فراكسيۆنا پارتى ديموكراتى كوردستان د داخۆيانيه‌كێ دا بۆ ئه‌ڤرۆ نيوز گۆت: “هێشتا پرۆژێ بوودجێ نه‌هاتيه جڤاتا نوونه‌ران و چو تشتێ وه‌سان ژى تێدا نينه، هه‌كه ژنوو زێده بكه‌ن، به‌لێ باوه‌رناكه‌م سه‌ربگريت”.
ئه‌ندامێ جڤاتا نوونه‌رێن عيراقێ ل سه‌ر فراكسيۆنا پارتى ديموكراتى كوردستان زێده‌تر گۆت: “داهات يێ ناڤه‌ندى يه و دڤێت ڤه‌گه‌ريته گه‌نجينا ده‌وله‌تێ”.
د. ئه‌حمه‌د سه‌فار دا زانين ژى كو هه‌كه وان دڤێت خزمه‌ته‌كێ بكه‌ن، “بلا پارێ پترۆدۆلار ب دروستى بده‌نه پارێزگه‌هان باشتره. يا دى دێ پتر ده‌ليڤێ ده‌ته ده‌ستكاريێ و گه‌نده‌ليێ”.
ته‌كست ژى ل سه‌ر وێ چه‌ندێ كر كو ئه‌و ل گه‌ل وێ بۆچوونێ نينه، به‌لێ ئه‌و ب تنێ ژى كه‌سه‌كه ژ ناڤ 21 كه‌سان كو د ڤێ لژنێ دانه و گۆت: “ئه‌ز بۆچوونا هه‌ڤالێن خوه نزانم، به‌لێ ب ديتنا من ئه‌ڤه كاره‌كێ سه‌ركه‌فتى نابيت”.
ده‌رباره‌ى وێ چه‌ندێ كا هه‌كه ئه‌ڤ پرۆژه په‌سه‌ند بوو دێ هه‌رێما كوردستانێ ژى ڤه‌گريت، د. ئه‌حمه‌د سه‌فار گۆت: “سيسته‌مێ دارايى ل هه‌رێما كوردستانێ ب ته‌مامى يێ جودايه ژ عيراقێ و هه‌كه ل وێرێ په‌سه‌ند ژى بيت باوه‌ر ناكه‌م ل كوردستانێ په‌سه‌ند بيت”.
ئه‌ندامێ جڤاتا نوونه‌رێن عيراقێ ل سه‌ر فراكسيۆنا پارتى ديموكراتى كوردستان نه‌ڤه‌شارت ژى كو ئه‌و روونى ژى د داهاتێ گۆمركان دا ب ره‌نگه‌كێ گشتى نينه هه‌تا بزانن چه‌ند داهات دهێت و چه‌ند دێ بۆ پارێزگه‌هان بيت و چاوان دێ هێته ب كارئينان.
ل دۆر ئه‌گه‌رێن ده‌ركرنا ڤێ بڕيارێ د. سه‌فار گۆت: “دبيت ئه‌ڤه زێده‌تر ژ به‌ر وان خوه‌نيشاندانێن به‌سرا بيت ژ به‌ر كو ئه‌و د نه‌رازى نه و 85% ژ داهاتێ په‌ترۆلێ يێ عيراقێ يێ پارێزگه‌ها وانه و خزمه‌تگۆزارى وه‌كو پێدڤى نينن، به‌لێ ئه‌ڤه جارێ دبيت ب تنێ پێشنياز بيت و وه‌زيرێ دارايى ژى ئه‌و ده‌سته‌لات نينه كاره‌كێ ژ وى ره‌نگى بكه‌ت”.
د به‌ياننامه‌كێ دا كو نڤيسينگه‌ها راگه‌هاندنێ يا جێگرێ سه‌رۆك وه‌زيرێن عيراقێ بۆ كاروبارێن داراى و وه‌زيرێ دارايى ل حوكمه‌تا فيدرال، د. فوئاد حسێن، راگه‌هاند كو ل ده‌مێ ديدارا ناڤبرى ل گه‌ل شاندێ ئێكه‌تيا ئورۆپى ئه‌وان به‌حس ل هندێ كريه كو دێ به‌هرا پارێزگه‌هان زێده كه‌ن ب ره‌نگه‌كى كو هه‌ر پارێزگه‌هه‌كێ 50% ژ داهاتێ گۆمرك و ده‌رگه‌هێن سنورى بۆ وان بيت.
نيشاندان