ئەڤرۆ نیوز ، نەوزاد ھلۆری:
سپێدەیا ئەڤرۆ وەزارەتا باژێرڤانی و گەشت و گوزار یا حکومەتا ھەرێما کوردستانێ ئامارا ھاتنا گەشتیاران بو ھەرێما کوردستانێ ل رۆژێن جەژنێ راگەھاندن ، ل گورەی ئامارا وان ھژمارا گەشتیاران بو 243 ھزار گەشتیار بوو.
نەوروز مەولود وەزیرا باژێرڤانی و گەشت و گوزاریا حکومەتا ھەرێما کوردستانێ د کونگرەیەکێ رۆژنامەڤانی دا ل ھەولێر ئامارا ھاتنا گەتشیاران بو ھەرێما کوردستانێ ل رۆژانێن جەژنا رەمەزانا پیروز راگەھاند و گۆت: ( ل ھەرسێ رۆژێن جەژنا رەمەزانا پیروز 243 ھزار گەشتیار د رێیا دەریێن سنووری ھاتینە ھەرێما کوردستانێ ، و داھاتیێ ھەرێما کوردستانێ د کەرتێ گەشت و گوزاری دا بتنێ ل رۆژانێن جەژنێ 73 ملیون دولار بوون کو بو کەرتێ تایبەت چوویە ، 70% ژ وان گەشتیارێن کو ھاتینە ھەرێما کوردستانێ گەشتیارێن ژێری و ناڤەراستا عیراقێ بوون)
زێدەتر گۆت: ( ئەگەرا سەرەکی یا ھاتنا ئەڤێ ھژمارا گەشتیاران ژی بو پلانا حکومەتا ھەرێما کوردستانێ بو خزمەتکرنا کەرتێ گەشت و گوزاری و گەشتیاران و بزاڤێن بەردەوامێن سەروکێ حکومەتا ھەرێما کوردستانێ و درۆستکرن و نوژنکرنا چەندین جھێن گەشت و گوزاری دزڤریت ، زێدەباری وێ ئەمن و ئاسایشا کو ژلایێ دەزگەھێن ئەمن و ئاسایش و پولیس و پێشمەرگەی دزڤریت )
‎

ئەڤرۆ نيوز:
حکوومەتا عیراقێ بریارەکا نوو بۆ وەرگرتنا پارەی ژ وەلاتیان ل ھەمبەر دانا پشکا ئاھێن خوارنێ دەرێخست و رێڤەبەرا ئاشێن ھەرێمێ بۆ کاروبارێن ھونەری دیار کر چاڤەرێیا حکوومەتا ھەرێمێ دکەین بۆ بجھکرنا ئەوێ بریارێ.
نەسرین محەمەد رێڤەبەرا ئاشێن ھەرێمێ بۆ کاروبارێن ھونەری راگەھاند، ل ھەمبەر دانا پشکا ئاھێن خوارنێ و ئارێ ھەیڤانە بۆ ھەر وەلاتیەکی 250 دینار دھێنە وەرگرتن کو 200 دینار بۆ پشکێن ئاھێن خوارنێ و 50 دینار بۆ ئارێ ھەیڤانەیە.
ناڤبریێ ئەو چەندە ژی دیار کر پێشنیارا زێدەکرنا ئەوی پارەی ل سەر وەلاتیان ھاتیەکرن ب ئاوایەکی ل ھەمبەر دانا ئێک گینیکێ ئاری بۆ ھەر خێزانەکێ دو ھزار و 500 دینار ژێ دھێنە وەرگرتن، ھەر چەندە بریکار و ئاشان ئەو پێشنیار رەت کریە و داخواز کرینە بۆ ھەر فەردەکێ ئاری ژبلی ئاھێن خوارنێ سێ ھزار دینار بھێنە وەرگرتن.
رێڤەبەرا ئاشێن ھەرێما کوردستانێ بۆ کاروبارێن ھونەری گۆت ژی “عیراقێ بریارەکا نوو دایە ل سەر پشکێن ئاھێن خوارنێ بۆ ھەر وەلاتیەکی ھەمبەر دانا پێنج ھزار دیناران بھێتە وەرگرتن”.
نەسرین محەمەد دیار کر ئەو پارەیێ دھێتە وەرگرتن 400 دینار بۆ پشکێن ئاھێن خوارنێ نە و 100 دینار ژی بۆ پشکا ئارێ ھەیڤانەنە و دبیت کو دھێتە دان بۆ وەلاتیان و ئەو بریارا نوو یا حکوومەتا عیراقێ گەھشتیە دەستێ مە و دھێتە چاڤەرێکرن بێخینە د بیاڤێ بجھکرنێ دا.

ئەڤرۆ نیوز ، نەوزاد ھلۆری:
پارێزگەھا دھۆکێ ژ ئالیێ خزمەتگوزاری و کارگە و کومپانی و گەشەپێدان و چێکرنا پرۆژەیێن ھەمەجور ب تایبەتی ژی وەبەرھێنانێ پشتگوە ھاڤێتی ترین پاریزگەھا ھەرێما کوردستانێ یە ئەگەر ب ھژمار بھێتە بەراوردکرن ، بسپوورەکێ ئابووری ددەتن دیارکرن کو خزمەتا حکومەت و لایەنێن پەیوەندیدار بو دھۆک و پارێزگەھێن دن کرین ئەڤێ راستیێ ئاشکرا دکەت.
رێبین فەتاح بسپوورێ سیاسەتا ئابووری و رۆژنامەڤان د چالاکیێن ئابووری و وەبەرھێنان و کەرتێ پەترۆلێ ل ھەولێرێ دیارکر کو پارێزگەھا دھۆکێ کێمترین پرۆژەیێن وەبەرھێنانێ ھاتینە چێکرن و زورترین رێژەیا بێکاریێ تێدا ھەیە و بۆ ئەڤرۆ نیوز گۆت: ( پێشتر ژ بەر ململانێیا سیاسی یا دناڤبەرا پارتی و ئێکەتی ب تایبەتی ژی پووتەدان ب ھەردوو پارێزگەھێن ھەولێر و سلێمانی ژلایەکێ ڤە ، قوناغا دوو ئیدارەیا ھەرێما کوردستانێ دناڤبەرا ھەردوو حزبان دا ژلایەکێ دن ڤە بوویە سەدەم کو دھۆک د ناڤبەرا وان دا بھێتە ژبیرکرن ، بەلێ پشتی ئازادیا عیراقێ جورە تێگەھشتنەکا دن کەفتە سیاسەتا دابینکرنا خزمەتگوزاری و پێشڤەبرنا پارێزگەھان بەلێ دیسان ژی وەکو پێدڤی بەراورد ل گەل ھەردوو پارێزگەھێن دن کێمترین خزمەت بو دھۆکێ ھاتنەکرن ب تایبەتی د کەرتێ وەبەرھێنانێ دا)
زێدەتر گۆت: ( ئەگەرا سەرەکی یا پشتگوە ھاڤێتنا دھۆکێ دزڤریت بو دوو ئەگەرێن سەرەکی کو ئەو ژی نەبوونا پلانەکا رێک و پێک ژلایێ حکومەتێ د دابەشکرنا پرۆژێن وەبەرھێنانێ دا کو ھەتا نھا کارنامەیەکا وەبەرھێنانێ نەبوویە ، بەلکو زێدەتر لسەر دەستێ کەرتێ تایبەت روول ھەبوویە و دیارە ژی کەرتێ تایبەت ژی ل گورەی بەرژەوەندیێن خوە وەبەرھێنان کریە کو ئەو ژی راستەوخو ژلایێ بەرپرسان دھێنە ب رێڤەبرن و لسەر بنەمایێ جوگرافیا رونشتڤانان پرۆژەیێن وەبەرھێنانی درۆستکرینە ، ژلایەکێ دنڤە قەبارێ جوداھیا وەبەرھێنانا دھۆکێ بەرامبەر پارێزگەھێن دن یێن ھەرێمێ یە ، ھەلبەت مە بەحسا ھەولێرێ ب رەنگەکێ دینامیکی وەکو پایتەخێ ھەرێمێ نینە بەلکو مە بەحسا ب رەنگەک گشتی یە ، بەلکو مە زێدەتر بەحسا نەھەڤسەنگی یا دابەشکرنا پرۆژێن وەبەرھێنانێ یە ، ھەر بوو نموونە پشتبەستن ب قانونا وەرەھێنانێ ل ھەرێما کوردستانێ ، دناڤبەرا کانونا ئێکێ یا سالا 2006 ھەتاکو ھەیڤا ئاب یا سالا 2016 ل سەرانسەرێ ھەرێما کوردستانێ 767 پرۆژەیێن وەبەرھێنانێ ب کوژمێ 46 ملیار و 953 ملیون دولاران مولەت وەرگرتینە ، ب رەنگەک کو ھەولێر 339 پرۆژە و سلێمانی 214 پرۆژە و دھۆک ژی 214 پرۆژە ، ھەر چەندە ھژمارا پرۆژێن دھۆک و سلێمانی ئێکسانن بەلێ ھژمار پیڤەر نینە بەلکو ئەو پارە پیڤەرە یێ بو چێکرنا ئەوان پرۆژان دھێتە مەزاختن ھەر بوو نموونە ژ سەرجەمێ ئەو پارێ مە ئاماژە پێکری 26 ملیار دولار بو ھەولێر ، 14 ملیار و 676 ملیون دولار ژی بو سلێمانی ھاتینە تەرخانکرن ، بەلێ بو دھۆکێ بتنێ 6  ملیار دولار ھاتینە تەرخانکرن کو ئەڤ یەک ژی کێمترین پارەیە بەرامبەر ھەردوو پارێزگەھێن دن ئەگەر ھژمارا رونشڤانان ژی بەرچاڤ بھێتە وەرگرتن )
ل دوماھیێ گۆت: ( ئەڤ چالاکیێن ئابووری و وەبەرھێنانێ مەزنترین ئەگەرن کو وەلاتیێن ئەوان پارێزگەھان بکەڤن کاری و ژ قەیرانا بێکاریێ رزگاربن ، نوکە دھۆکێ کێمترین چالاکیێن ئابووری و وەبەرھێان و پێشەسازی ھەنە و زورترین رێژەیا بێکاریێ ژی دکەڤیتە دھۆک)