ئه‌ڤرۆنيوز:
ئه‌ندامه‌كێ په‌رله‌مانێ عيراقێ ژ فراكسيۆنا پارتى ديموكراتى كوردستان راگه‌هاند، وه‌زيرێ بازرگانيا عيراقێ سۆزا مه‌زاختنا پارێ گه‌نمێ جوتيارين هه‌رێما كوردستانێ دايه كو يێ سێ سالانه وهه‌تا نوكه نه‌هاتيه دان،
محه‌مه‌د ئه‌مین، ئه‌ندامێ لژنا چاندنێ وژێده‌رين ئاڤێ ل په‌رله‌مانێ عيراقێ گۆت” به‌غدا پارێ گه‌نمى يێ هه‌رسێ سالێن 2014 و2015 و2016 يێ جوتيارێن هه‌رێما كوردستانێ نه‌دايه، پشتى چه‌ندين بزاڤان بريار دابوو ب مه‌زاختنا نيڤا وى پاره‌ى، به‌لێ حوكمه‌تا هه‌رێمێ وه‌رگرتنا وى ره‌تكربوو”.
ناڤبرى دداخۆيانيه‌كا رۆژنامه‌ڤانى دا گۆت ژى”ل چه‌ند رۆژێن بۆرى مه وه‌كو لژنا چاندنێ وژێده‌رێن ئاڤێ ل گه‌ل وه‌زيرێ بازرگانيا عيراقێ ئاخڤت وب به‌لگه مه بابه‌ت بۆ رۆهكر، خوه‌شبه‌ختانه بريار دا كو پارێ هه‌رسێ سالان ب تمامى خه‌رج بكه‌ن”.
ئاماژه‌كر ژى كو ده‌مێ خه‌رجكرنا پاره‌ى نه‌هاتيه دياركرن، به‌لێ ئه‌م ب هوور چاڤدێريا بجهئينانا وێ بريارێ دكه‌ين.
ئەڤرۆ نیوز:
ئه‌ڤرو نیڤرو 14/12/2018 (فه‌رهاد ئه‌مین ئه‌تروشى) پارێزگه‌رێ دهوكێ ل په‌رستگه‌ها لالش یا كوردێن ئێزدى پێشوازیا ( محه‌مه‌د حه‌لبوسى ) سه‌روكێ په‌لرله‌مانێ ئێراقێ و شانده‌كێ په‌رله‌مانته‌ران كر,
سه‌روكێ په‌رله‌مانێ ئێراقێ پیروزباهیا كوردێن ئێزدى كر ب هه‌لكه‌فتا جه‌ژنا روژیان و هیڤیا به‌خته‌وه‌رى و خوشیێ بو خواست دیڤدا پێكڤه گه‌ریانه‌ك دناڤ په‌رستگه‌هێ دا كر , دداخویانیه‌كێ دا سه‌روكێ په‌رله‌مانێ ئێراقێ گوت : ئارمانجا سه‌ره‌دانا من بو لالش جه‌ژن پیروزكرنه ل ئێزدیان و پشكدارى كرنه دخوشیا واندا چونكێ وان گه‌له‌ك نه‌خوشى ل سه‌ر ده‌ستى تیرورستێن داعش یا دیتێ ئه‌وین دژى هه‌مى هه‌لویست و ره‌وشتێن مروڤایه‌تیێ كو ب هزارا كوردێن ئێزدى تیرور كرین و مال و حالێ وان تالان كرى , ڤان تیرورستان ج ئایێن نین و لسه‌ر ئاینا ناهێنه هژمارتان ,
دیسان گوت : ئه‌م وه‌كو په‌رله‌مانێ ئێراقێ دێ هه‌مى شیانا ئێخینه كارى كو حكومه‌تا ئێراقێ جاره‌كا دى ده‌ڤه‌رێن هاتینه وێرانكرن ئاڤا بكه‌ت و هه‌مى ئاواره ڤه‌گه‌رێنه سه‌ر جه و وارێن خو و ژیانه‌كا به‌خته‌وه‌ر بو بهێته به‌رهه‌ف كرن ,
پاشى سه‌روكێ په‌رله‌مانێ ئێراقێ و پارێزگه‌رێ دهوكێ ل مێهڤانخانا پارێزگه‌هێ كوم بون دكومبونێ دا كو شانده‌كێ په‌رله‌مانێ ئێراقێ به‌رهه‌ڤببو پارێزگه‌رێ دهوكێ كورتیه‌ك دا سه‌ر سه‌رو به‌رێ ئاواره و په‌نابه‌رێن ژبه‌ر تیرورستێن داعش قه‌ستا دهوكێ كرین و ئه‌و كار و خزمه‌تێن ئه‌ڤه زێده‌تره ژ چوار سالا حكومه‌تا هه‌رێمێ و پارێزگه‌ها دهوكێ بو پێشكێش دكه‌ت وكارتێكرنا هه‌بونا ڤێ رێژا مه‌زن یا ئاوارا لسه‌ر سه‌كته‌رێن ژیانا وه‌لاتیان ل پارێزگه‌ها دهوكێ و بارگرانیا پارێزگه‌هێ ,
سه‌روكێ په‌رله‌مانێ ئێراقێ ده‌ست خوشى ل پارێزگه‌ها دهوكێ و خه‌لكێ پارێزگه‌هێ كر بو حه‌واندنا نێزێكى ملیون ئاواره و په‌نابه‌را ل ده‌لیڤێن ته‌نگاڤیا و بكاره‌كێ مروڤایه‌تى و جامێرانه ل قه‌له‌م دا و دیار كو په‌رله‌مانێ ئێراقێ دێ هه‌مى بزاڤا كه‌ت ئه‌ف خه‌لكه ڤه‌گه‌رێته سه‌ر جه و وارێن خو و ب ژیانه‌كا خوش شاد ببن ,
پاشى پێكڤه پارێزگه‌رێ دهوكێ و سه‌روكێ په‌رله‌مانێ ئێراقا فیدرال محه‌مه‌د حه‌لبوسى گه‌ریانه‌كا كورت ل بازارێ دهوكێ كر و ل چایخانه‌كا مللى پێكڤه روینشتن .
ئه‌ڤرو شپێدێ 14/12/2018 فه‌رهاد ئه‌مین ئه‌تروشى پارێزگه‌رێ دهوكێ دگه‌لدا جێگرێ پارێزگه‌رى و هاریكارێ پارێزگه‌رى بو كاروبارێن ئاواره و په‌نابه‌ران و شانده‌كێ به‌رپرسێن ده‌زگایێن حكومه‌تا هه‌رێمێ ل پارێزگه‌هێ سه‌ره‌دانا مالا میر تحسین به‌گ میرێ ئێزدیان دا و جه‌ژنا روژیان ل بنه‌مالا میر تحسین به‌گ و برێكا وى ل هه‌مى ئێزدیان پیروز كر و هیڤى خواست كو چه‌ژنا خیرو و خوشیى بیت و دیماهیا هه‌مى نه‌خوشیا بیت كوردێن ئێزدى و جه‌ژنا بهیت ل وارى خو جه‌ژنا خو ب خوشى بگێرن ,
دیڤدا سه‌ره‌دانا په‌رستگه‌ها لالش یا كوردێن ئێزدى دا و جه‌ژنا روژیان ل هه‌مى ئێزدیان پیروز كر وهیڤى خواستن كو هه‌مى روژین كوردێن ئێزدى ببنه جه‌ژن و ئه‌و نه‌خوشیێن دسالێن بوریدا ل سه‌ر ده‌ستى تیرورستێن داعش دیتین دوباره نه‌بنه ڤه .
ئەڤرۆ نیوز، ئێقبال عومەر:
ئەڤرۆ فروکێن شەری یێن تورکیا سنوورێ ناحیا شێلادزێ بوردومان کرن ب تایبەتی سنورێ گوندێن دەڤەرا رێکان.
د ڤێ دەربارێ دا عەلی عومەر وەلاتیەکێ ئاکنجیێ شێلادزێ بۆ ئەڤرۆ نیوز گۆت: ( ھەر ژ شڤێدی تا کو ئەڤرۆ فرۆکێن شەری یێن تورکیا ئاسمانێ شێلادزێ بەزاند و ب گرانی گوندێن دەڤەرا رێکان بوردومان کر ، گوندێ سیدا و چەمجی و بێسەپێ و کوکەرێ و شاجا ھاتینە بوردومانکرن، ترسەکا زور ل دەف خەلکی پەیدا کریە ب تایبەتی نوکە کو وەرزێ سەرمایێ یە وەلاتی قەستا چیا دکەن ژبو پەیداکرنا داران ژ بۆ مالێن خوە بینن و خوە ژ سەرمایێ بپارێزن بەلێ وەلاتی ژ بەر ترسا فرۆکێن لەشکرێ تورکیا نەشێن بچنە چیایێن دەردورێن شێلادزێ).
زێدەتر گوت: (پێشتر ژی فرۆکێن تورکیا نێزیکێ جھێن ئاڤەدان بوردومانکرینە و ب دەھان وەلاتیێن سنورێ ناحیا شێلادزێ شەھید کرینە و ھەتا نوکە کەس نەھاتیە قەرەبوکرن، و ٨٥ گوندێن سنورێ ناحیا شێلادزێ ھاتینە چولکرن ژ بەر شەر و ئالوزیێن پەکەکێ و تورکیا ل سەر دەڤەرا مە، ژ بەر ڤێ ئەم دخوازین کو تورکیا بوردومانا خوە رابگریت و پەکەکە ژی بارەگایێن خوە ل جھێن ئاڤەدانی دوور بکەت، شەر و ئالوزیێن خوە ببەنە دناڤ ئاخا خوە دا).
ئه‌ڤرۆ نيوز:
وه‌زيرێ به‌ره‌ڤانيا توركيا راگه‌هاند كو دهێرشا شه‌ڤا بۆرى دا بۆ چه‌ند ده‌ڤه‌رێن شنگالێ، 20 فرۆكه هاتينه بكارئينان و 30 حه‌شارگه‌هـ هاتينه بۆردۆمانكرن.
ب گۆره‌يى نووچه‌يه‌كێ رويترز، وه‌زيرێ به‌ره‌ڤانيا توركيا راگه‌هاند د هێرشا شه‌ڤا بۆرى يا سۆپايێ توركيا دا بۆ سه‌ر ده‌ڤه‌رێن شنگال و قه‌ره‌چۆخ 20 فرۆكه و ژماره‌كا فرۆكێن بێ فرۆكه‌ڤان هاتينه بكارئينان.
وه‌زيرێ به‌ره‌ڤانيا توركيا راگه‌هاند ژى كو د وێ هێرشێ دا 30 باره‌گه‌هـ و حه‌شارگه‌هێن هێزێن پاراستنا مه‌خمۆر كرينه ئارمانج.
د وێ هێرشا شه‌ڤا بۆرى دا چار ئه‌ندامێن هێزێن پاراستنا مه‌خمۆر گيانێ خوه ژ ده‌ست دايه و ژماره‌كا وه‌لاتيێن مه‌ده‌نى ژى بريندار بووينه.
ئه‌ڤرۆ نيوز:
نێچيرڤان بارزانى سه‌رۆك وه‌زيرێن هه‌رێما كوردستانێ د په‌يامه‌كێ دا جه‌ژنا “رۆژيێن ئێزى” ل ئێزديان پيرۆز دكه‌ت و سه‌ره‌رايى پيرۆزباهيێ، ته‌كست كر كو هه‌تا ره‌ڤانديێن ئێزدى د ده‌ستێ داعش دا مابن، دێ د بزاڤێن خوه دا د به‌رده‌وام بن بۆ رزگاركرنا وان.
ئه‌ڤه ژى ده‌قێ په‌يامێ يه:
ب گه‌رمى جه‌ژنا “ڕۆژى یێت ئێزى” ل خوشك و برایێت هێژایێت ئێزدى ل كوردستانێ و هه‌ر ده‌ره‌كا دنیایێ هه‌بن، پیرۆز دكه‌م. هیڤیدارم جه‌ژنه‌كا خۆش و ئارام ده‌رباس بكه‌ن و جه‌ژن ببێته ئه‌گه‌رێ بجهبوونا زێده‌ترا ئاشتیێ و پێكڤه‌ژیانێ و ڤه‌گه‌ڕیانا خێر و خۆشیێ بۆ خوشك و برایێت مه یێت ئێزدى و هه‌مى خه‌لكێ كوردستانێ.
ئه‌ڤ جه‌ژنه ژى جاره‌كا دى د ده‌مه‌كێدا ڤه‌دگه‌ڕیت كو مخابن هێشتا هژماره‌كا مه‌زنا ئێزدییان د كامپێت ئاواره‌ییێدا دژین و نه‌شیاینه ڤه‌گه‌ڕنه سه‌ر جهـ و وارێت خۆ. هیڤیدارم جه‌ژنێت بهێن هه‌مى ب سه‌رفرازى ڤه‌گه‌ڕیابن سه‌ر جهـ و وارێت خۆ یێت ئارام و ئاڤه‌دانكرى و حكوومه‌تا هه‌رێما كوردستانێ دێ هه‌موو هه‌ولێ ژبۆ ڤێ یه‌كێ ده‌ت.
هه‌ر ب ڤێ هه‌لكه‌فتنێ هه‌مى خوشك و برایێت مه یێت ئێزدى پشتڕاست ده‌كه‌ین كو هه‌تا خوشكه‌ك یان برایه‌كێ مه یێ ئێزدى یێ ڕه‌ڤاندى ل ناڤ داعشێ یان ل هه‌ر جهه‌كێ مابیت، ئه‌م دێ به‌رده‌وام هه‌وڵ ده‌ین وان ڕزگار بكه‌ین و ڤه‌گه‌ڕینین ناڤ كه‌سوكارێت وان.
سلاڤ و دروود بۆ گیانێ هه‌مى قوربانیێت ده‌ستێ تیرۆرێ و ئه‌م ب ڕێز و حورمه‌ت وان ب بیر تینین.
جاره‌كا جه‌ژنا هه‌میان پیرۆز بیت.
نێچیرڤان بارزانى
سه‌رۆك وه‌زیرێ هه‌رێما كوردستانێ
14/12/2018
ئه‌ڤرۆنيوز:
به‌رى ده‌مه‌كێ كێم ده‌وروبه‌رين كه‌مپا مه‌خموور يا ئاوارێن كوردێن باكوورێ كوردستانێ ژلايێ دو فرۆكان ڤه هاته توپ بارانكرن.
رزگار محه‌مه‌د، قايمقامێ مه‌خموور دداخۆيانيه‌كا رۆژنامه‌ڤانى دا گۆت” جڤاتا كه‌مپا مه‌خموور ئه‌ز ئاگه‌هداركرم كو توپ بارانكرن ده‌وروبه‌رێن كه‌مپێ ڤه‌گرتيه”.
گۆت ژى” هه‌تا نوكه زيانێن وێ توپ بارانكرنێ نه‌هاتينه زانين”.
دياركر ژى كو وى پێزانين نينن كا ئه‌و دو فرۆكێن توپ بارانكرن ئه‌نجامداى يێن چ وه‌لاته‌كى نه.
ئه‌ڤرۆنيوز:
برياره سه‌رۆكێ په‌رله‌مانێ عيراقێ محه‌مه‌د حه‌لبووسى سه‌ره‌دانا هه‌رێما كوردستانێ بكه‌ت ول گه‌ل سه‌رۆك بارزانى وچه‌ند به‌رپرسێن دى يێن هه‌رێمێ كۆم ببيت.
ژێده‌ره‌كێ ئاگه‌هدار ژ به‌غدا بۆ ئه‌ڤرۆنيوز دياركر كو سه‌رۆكێ په‌رله‌مانێ عيراقێ دێ سه‌ره‌دانا دهۆكێ ژى كه‌ت ودبيت سه‌ره‌دانا وى بۆ هه‌رێمێ بۆ ده‌مێ 3 رۆژان يا به‌رده‌وام بيت.
نيشاندان