ئه‌ڤرۆنيوز:
وێنه‌كێ فرۆكه‌كا ئيماراتى بكارئێنه‌رێن تۆرێن جڤاكى حێبه‌تى كريه، ژبه‌ركو ئه‌و فرۆكه ديار دبيت كو ژ ئه‌لماسى هاتيه دروستكرن ول ده‌وروبه‌رين وێ ترومبێلێن ڤه‌گوهاستنا بارێ رێڤينگانه.
به‌لێ هه‌ر زوو تۆرا فرۆكه‌ڤانى يا ئيماراتى ل سه‌ر به‌رپه‌رێ خوه ل تۆرا جڤاكى يا تويته‌رى به‌لاڤكر ( فرۆكا بلينگ 777 به‌رچاڤ دكه‌ين كو ژ ديزاينا ساره شاكيل) يه.
ئه‌ڤرۆ نیوز:
یانا ریال مه‌درید هزر ل ئیمزاکرنا هێرشبه‌ره‌کی نوو کریه بوو ڤه‌گوهاستنێن زڤستانێ.
مالپه‌رێ دیڤینا سنته‌رال ئاشکرا کریه یانا مه‌له‌کی ده‌ست ب لڤینا کریه بوو ده‌ستڤه ئینانا هێرشبه‌ری پوله‌ندی و یانا جه‌نه‌وا کریستوڤ پياتيك پشتی د بزاڤێن ده‌ستڤه ئینانا هێرشبه‌رێ ئه‌رژه‌نتینی و یانا ئه‌نتر میلان یا ئیتالی ئیکاردی سه‌رنه‌که‌ڤتی کو ریال چه‌ندین بزاڤکرن لێ یانا ئه‌نتر داخوازیا ریال ره‌تکر وی مالپه‌ری دیارکریه ژی هه‌که ریال مه‌درید داخوازیت هه‌ڤبه‌ستێ ل گه‌ل ئیکاردی ئیمزا بکه‌ت پێدڤیه ل سه‌ر وێ ١٢٠ ملیون یورویا پێشکێشی یانا ئه‌نتر بکه‌ت، له‌وا یانا ریال هزر ل ئینا یاریزانه‌کێ دی کریه ل دیڤ گوتنا وی مالپه‌ری رێیا ده‌ستڤه ئینانا کریستوڤ پياتيك گه‌له‌ک ب سانه‌هی تره ژ ئیکاردی ژبه‌رکو هه‌لوه‌شاندنا هه‌ڤبه‌ستا یاریزانی پوله‌ندی ل گه‌ل جه‌نه‌وا بتنێ ٦٠ ملیون یورونه له‌ورا ریال هزر ئینا ڤی یاریزانی کریه.
کریستوڤ بیانی نوکه سه‌رێ لیسته‌یا گولکه‌رێن خۆلا ئیتالیا دهێت ب تومارکرنا ١٠ گولان.
هه‌ژی گوتنێ یه پياتيك ل وه‌رزێ ئه‌ڤ ساله هه‌ڤبه‌ستا جه‌نه‌وا ئیمزاکریه پشتی ژ یانا کراکوڤیا ڤه‌گوهاستی کو ل ١٤ یاریێن وه‌رزێ ئه‌ڤ ساله دا ١٠ گول تومارکرینه و نوکه پياتيك بوویه جهێ گرنگیا گه‌له‌ک یانێن مه‌زن ل ئورۆپا .
ئەڤرۆ نیوز ،بارزان مزووری:
د رێ ورەسمەكێ دا ئەڤرۆ چارشه‌مبى 5/12/2018 كەرنەڤالا بۆرینا سەد سالان ل سەر ناحیه بوونا ئەلقوش هاته ئەنجامدان ب چەندین چالاكیێن جۆرا وجۆر.
لارا زارا، رێڤەبەرا ناحیا ئەلقوش بۆ ئەڤرۆنیوز ئاشكرا كر كو ب پشته‌ڤانيا هێزێن پێشمەرگەی و خوراگریا وان ئەڤ كەرنەڤالە هاته ئەنجامدان ژبەركو هه‌كه ئەڤ پێشمەرگە نەبوویە د نها ئەڤ باژێرە ژی دهاتە كاڤلكرن وەكو وان باژێرێن دی یێن كەفتین دەستێ داعشێ دا چو جارا نەشێین قەرەبوویا وان قەهرەمانان بكەین هەردەم سوپاسدارێن واینە.
ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ مه‌سرور بارزانى ئه‌ڤرۆ چارشه‌مبى 5/12/2018 پێشوازى ل شێخ ئه‌حمه‌د جه‌ربا سه‌رۆكێ ره‌وتێ ئه‌لغه‌د يێ سوورى كر.
دديداره‌كێ دا ره‌وش وپێشهاتێن سياسى يێن ده‌ڤه‌رێ وشه‌ر وپێكدادانێن دناڤبه‌را گرۆپێن جودا جودا يێن سوورى ورژێما سووريێ ژلايه‌كى وتيرۆرستێن داعشێ وده‌ستێوه‌ردانێن ده‌ره‌كى ژلايه‌كێ دى ڤه هاتن به‌حسكرن.
شێخ ئه‌حمه‌د جه‌ربا پيرۆزباهى ل مه‌سرور بارزانى كر بۆ به‌ربژاركرنا وى وه‌كو سه‌رۆك وه‌زيرێن حوكمه‌تا هه‌رێما كوردستانێ وهيڤيا سه‌ركه‌فتنێ دوى ئه‌ركى دا بۆ خواست.
مه‌سرور بارزانى بير وبۆچوونێن خوه ل دۆر پێشهات وروودانێن ده‌ڤه‌رێ ب تايبه‌تى يێ سووريێ به‌رچاڤكرن وداخواز ژ هه‌موو لايه‌نێن په‌يوه‌نديدار كر شيانێن خوه بێخنه كار بۆ ديتنا چاره‌كا سياسى بۆ ره‌وشێ كو هه‌موو لايه‌ك هه‌ست ب هه‌بوون ورۆلێ خوه درێڤه‌برنا وه‌لاتى وبريارێن سياسى دا بكه‌ت.
ئەڤرۆ نیوز ،بارزان مزووری:
رێڤەبەرێ پولیسێن ئەلقوش عەقید عارف میرخان، بۆ ئەڤرۆ نیوز دیار كر ئەڤرۆ 5 كانونا ئێكێ 2018 ئه‌م هاتینه ئاگەهداركرن كو مامۆستایەكی 55 سالى ل گوندێ شێخكا سەر ب ناحیا ئەلقوش دناڤ مالا خوه‌دا ب چەكێ كلانشیكوفێ گولەیەك ل خوه‌دایە ودئه‌نجامدا گیانێ خوه ژ دەست دایە.
گۆت ژى” پۆلیسێن مە گەهشتن جهێ روودانێ وپشتی ڤەكۆلین ل دۆر خوه كوشتنا وی ئەنجامدای، لاشێ وی بوۆ نوشداریا داد ل دهۆكێ هاته هنارتن”.
ئاماژه‌كر” ل دووڤ پێزانينێن دەستپێكى دگەل خێزانا وی كو ئەڤە 10 سالە چارەسەریا دەرونی بو دهێتە كرن ويێ بێزاربووى وبزاڤێن خوه كوشتنێ كرينه ، ژبەر وێ چەندێ یێ مۆلەت دایە ژ دەواما خوه وه‌كو مامۆستا.
ئه‌ڤرۆنيوز:
حوكمه‌تا هه‌رێما كوردستانێ ئه‌ڤرۆ چارشه‌مبى 5/12/2018 راگه‌هاند كو بێهنڤه‌دانا رۆژا دوشه‌مبى هه‌رێما كوردستانێ ناگريت.
سه‌فين دزه‌يى، په‌يڤدارێ حوكمه‌تا هه‌رێما كوردستانێ گۆت” رۆژا دوشه‌مبى 10/12/2018 سالرۆژا سه‌ركه‌فتنێ ل سه‌ر داعشێ، ل هه‌رێما كوردستانێ نابيته بێهنڤه‌دان”.
حوكمه‌تا عيراقێ رۆژا دوشه‌مبيا داهاتى ب رۆژا سه‌ركه‌فتنێ ل سه‌ر داعشێ راگه‌هاند وئه‌و رۆژه كره بێهنڤه‌دانا فه‌رمى ل عيراقێ.
ئەڤرۆ نیوز:
سەرۆک مەسعود بارزانی ئەڤرۆ پێشوازی ل کەساتیێ سیاسیێ کوردێ سووریا و ئەندامێ سەرکرداتیا پارتی دیمۆکراتی کوردستان ـ سووریا عەبدولرەحمان ئاپۆ کر.
د دیدارەکێ دا سەرۆک بارزانی خوەشحالیا خوە ب ئازادبوونا عەبدولرەحمان ئاپۆ ژ زیندانێ نیشادا و راگەھاند، جھێ داخەکا مەزنە تێکۆشەرەکێ وەکو وی ب دەستێ لایەنەکی کوردی بھێتە زیندان کرن و ھیڤی خواست ئێش و ئازارێن گەلێ کورد ل سووریا ب دووماھی بھێن.
د پشکەکا دی یا دیدارێ دا بیرورا ل دۆر رەوشا سیاسی یا سووریا و رەوشا کوردان ل وی وەلاتی لھەڤ گوھارتن و سەرۆک بارزانی دوپاتی ل وێ چەندێ کر کو حەزا مە بۆ باشتربوونا کێشا کورد ل سووریا تشتەکێ دی بوو، لێ ژ بەر رەفتار و بڕیارێن ئێکلایانە و بنپێکرنا رێککفەتنناما د ناڤبەرا لایەنان دا نوکە رەوشەکا ئالۆز و مژەوی و پڕی گرفت بۆ گەلێ کورد ل سووریا یا پەیدا بووی کو ئەڤە جھێ داخەکا مەزنە بۆ مە ھەمووان.
ئەڤرۆ نیۆز، ئەمیر ئەترووشی:
سەرۆکێ دەستەیا بلندا بنگەھێ لالش راگەھاند، وان ھاریکاریێن دراڤی ل سەر ٣٤ خێزانێن ئاوارێن شنگالێ یێن دەستکورت و ھەژار ل کەمپا خانکێ بەلاڤکرن و ب مەھان شێوە ل سەر ٣٤ خێزانێن کەمپا کەبەرتۆ١ ژی.
شێخ شامۆ، سەرۆکێ دەستەیا بلندا بنگەھێ لالش ل پارێزگەھا دھۆکێ بۆ ئەڤرۆ نیۆز دیار کر، ب ھەلکەفتا جەژنا رۆژیێن ئێزی، ئەڤرۆ چارشەمبیێ ٥/١٢/٢٠١٨ێ، ھاریکاریێن دارایی ب سەر ٣٤ خێزانێن شنگالێ یێن دەست کورت و ھەژار ل کەمپا خانکێ ھاتنە بەلاڤکرن ب ھەماھەنگی دگەل کارگێریا کەمپێ و لقا پارتی ل شنگال.
زێدەتر گۆت: ھەر ل ھەمان رۆژ دا ھاریکاریێن دراڤی ب سەر ٣٤ خێزانێن شنگالێ یێن دەست کورت و ھەژار ل کەمپێن کەبەرتوو ١ و ٢ دا ھاتنە بەلاڤکرن.
ئەڤرۆ نیوز:
رۆژنامەیا دون بالون یا ئسپانی ئاشکرا کر ل ڤێ دووماھیێ سەروکێ یانا ریال مەدرید فلرونتینو پێرێز سێ یاریزانێن یانێ یێن سەرەکی بۆ فروتنێ ل ھاڤینا بھێت بەرھەڤ کرینە.
ھەمان ژێدەر دیارکریە سەروکێ یانا مەلەکی دڤێت شورەشەکا نوو د پێکھاتیێ تیما خوە دا بکەت و چەند یاریزانان ب گوھۆریت پشتی ھەردو یاریزانێن نوو یێن ئەرژەنتینی پالاسیوس و رودریگو دگەھن ل دەسپێکا کانوونا دویێ یا سالا بھێت.
دیان ڤێ رۆژنامێ دیارکریە کو ھەردو یاریزان ڤالڤێردی و فایێخو ل گەل یانێ نا مینن ل ڤەگوھاستنێن ڤێ زڤستانی َدا دیسان ھزر د فروتنا ھەرسێ یاریزانێن سەرەکی یێن مێرێنگێ ئیسکو، مودرێچ و گاریس بێل.
دوپاتکریە کو پێرێزی بھێنفرەھی دەربارەی کێشەیێن ئیسکوی نەمایە و دڤێت بفروشیت زێدەباری زێدەبوونا کێشەیێن وی و کوژمێ ٧٠ ملیۆن یورویا دیارکریە بۆ ھەر یانەکا بڤێت ھەڤبەستێ دگەل دا ئیمزا بکەت، دیسان یاریزانێ کرواتی مودرێچ ژی ل ڤی وەرزی ئاستێ وی بەر ب خرابیێ چوویە و تەمەنێ وی ژی مەزن بوویە.
ئەڤرۆنیۆز، سالار دۆسکی:
وەک ئامادەبوون بۆ لەھیان باژێرڤانیا زاخۆ ھەژمارەکا لژنان دروست کر، سەرۆکێ ئەندازیاران ل وێ باژێرڤانیێ ئاشکراکرکو پێدڤی یە خەلک ژی د ھاریکاربن ل گەل باژێرڤانیێ بۆ ھەر کارەکێ نە چاڤەرێکری.
ئەندازیار ئەدھار محەمەد رەشید سەرۆکێ ئەندازیاران ل باژێرڤانیا زاخۆ بۆ ئەڤرۆ نیوز گۆت: چار لژنە ل باژێرڤانیێ زاخۆ ھاتینە پێکئینان، کۆمپانیێ ژی پێنچ لژنە دروستکرینە، ھەفکاریەکا باش ھەیە و ھەموو تاخێن مەترسیا لەھیان ل سەر ھەیە ھاتینە کونترۆلکرن.
ناڤبری گۆتژی: دو تاخێن زاخۆ پەیوەندی ب باژێرڤانیێ کریە مەترسیا دروستبوونا لەھیان ھەیە، ل پرا دناڤبەرا پیشەسازی دا و تاخێ نەوروز دا، تاخێ پشت کۆچکا ھونەری ژی مەترسیا دروست بوونا لەھیان ھەیە، مەترسی ل سەر خانیێن نێزیکی دەڤەرا جەلالی ھەیە، تاخێ پشت پەیمانگەھا تەکنیکی ژی مەترسی یا دروست بوونا لەھیان ل سەر ھەیە، پتریا خانیێن مەترسی ل سەر ھەین ل دەمێ لەھیان ھەموو زێدەگاڤی نە، ئەڤان مالان ھایدار دکەین کو ھاش خوە ھەبن تایبەت ل دەمێ ھاتنا بارانێن زۆر.
ل دۆر دروستبوونا ھوکارێن چێبوونا لەھیان، ناڤبری ئاماژە کرە وێ چەندێ کو ئەو سولینێن ھاتینە دروستکرن ل تاخێن مەترسی ل سەر ھەین، ھێزا لەھیا نینە ئانکو ئاڤ رادبیت ئەڤجا لەھی دروست بیت و سولین نەشین کونترۆلا وێ بارانێ بکەن، دیسا داخازێ ژ خەلکێ خوە ژ دکەین ھاریکاربن ل گەل مە چنکو گەلەک جاران گلێشی دھاڤێژن رێکا ئاڤێ دا و راناکەن و ئەڤە دێ بیتە دەسپێکەک بۆ دروستبوونا لەھیان.
ئەندازیار ئەدھار نەڤەشارت ژی کو ل دەسپێکا ڤی وەرزی ھەتا نوکە چو لەھی ل قەزا زاخۆ دروست نەبووینە، ب پشتەڤانیا ھەموو سازیێن حوکمی و پەیوەندار و حزبی رەوشا کونترۆلکریە.
ناڤبری ئەو ژی ئاشکراکر کو رەوشا کەمپێن زاخۆ ژ لەھیان یا پاراستی یە و مەترسیا دروست بوونا لەھیان ل سەر نینە، پێشتر ھەموو بەرھەڤی ھاتبوونەکرن.
نيشاندان