ئه‌ڤرۆنيوز:
په‌رله‌مانتاره‌كا ليستا نه‌سر ئه‌ڤرۆ ئێكشه‌مبى 9/12/2018 ئاشكراكر كو سه‌رۆكێ ليستا نه‌سر وسه‌رۆك وه‌زيرێن عيراقێ يێ به‌رێ حه‌يده‌ر عه‌بادى قه‌بوول نه‌كر ببيته جێگرێ سه‌رۆك كۆمارى.
هودا سه‌جاد، په‌رله‌مانتارا عيراقى ژ ليستا نه‌سر د به‌ياننامه‌كێ دا گۆت” داخواز ژ حه‌يده‌ر عه‌بادى هاتيه كرن پۆستێ جێگرێ سه‌رۆك كۆمارى وه‌رگريت، به‌لێ عه‌بادى دبنه‌ره‌ت دا ئه‌و چه‌نده قه‌بوول نه‌كر”. بێ كو ئه‌گه‌رێن قه‌بوول نه‌كرنێ ديار بكه‌ت.
ئه‌ڤرۆ نيوز، رێوار مزیری:
ئه‌ڤرۆ رۆژا شەشێ بوو ژ پێشانگه‌ها دهۆك يا پرتووكان ئه‌وا ژلايێ رێڤه‌به‌ريا راگه‌هاندن وچاپ وبه‌لاڤكرنێ هاتيه ڤه‌كرن و ب گۆره‌ى خودانێن پرتووكخانان داشكاندنێن گه‌له‌ك باشه ل سه‌ر پرتووكان هه‌نه.
رۆژانه پێشانگه‌ها دهۆك يا پرتووكان ژ ده‌مژمێر 9:00ى سپێدێ هه‌تا 6:00ى مه‌غره‌ب ل هۆلا كونفرانسان ل زانكۆيا دهۆك يا ڤه‌كرى يه.
ئه‌ڤرۆ نيوز:
رێڤه‌به‌ريا تورا پاراستنا جڤاكى، ل دهۆكێ ئاگاداريه‌ك سه‌باره‌ت به‌لاڤكرنا مووچێ چاڤدێریا کێم ئەندامان به‌لاڤ كريه و تێدا دياركريه كو ڕۆژا پێنجشەمبی ۱۳/۱۲/۲٠۱۸ دێ مووچێن چاڤدێریا کێم ئەندامان هێنە دان.
ێڤه‌به‌ريا تورا پاراستنا جڤاكى، ل دهۆكێ دياركريه كو خودان پێدڤیێن تایبەت یێن دوبارە د پشکنینێ دا ڕێژا شایستە نەئینای و هەروەسا ئەوێن تا نها دوبارە پشکنین نەکرین كريه كو لدیف بڕیارا وەزارەتا کار مووچێن وان دێ ڕاگرتی بن تاکو ئەنجامێن تانەلێدان و نارەزاییێ ژ لێژنا پزیشکی یا دهۆک دەردکەڤن.
ئه‌ڤرۆنيوز:
وێنه‌كێ فرۆكه‌كا ئيماراتى بكارئێنه‌رێن تۆرێن جڤاكى حێبه‌تى كريه، ژبه‌ركو ئه‌و فرۆكه ديار دبيت كو ژ ئه‌لماسى هاتيه دروستكرن ول ده‌وروبه‌رين وێ ترومبێلێن ڤه‌گوهاستنا بارێ رێڤينگانه.
به‌لێ هه‌ر زوو تۆرا فرۆكه‌ڤانى يا ئيماراتى ل سه‌ر به‌رپه‌رێ خوه ل تۆرا جڤاكى يا تويته‌رى به‌لاڤكر ( فرۆكا بلينگ 777 به‌رچاڤ دكه‌ين كو ژ ديزاينا ساره شاكيل) يه.
ئه‌ڤرۆ نیوز:
یانا ریال مه‌درید هزر ل ئیمزاکرنا هێرشبه‌ره‌کی نوو کریه بوو ڤه‌گوهاستنێن زڤستانێ.
مالپه‌رێ دیڤینا سنته‌رال ئاشکرا کریه یانا مه‌له‌کی ده‌ست ب لڤینا کریه بوو ده‌ستڤه ئینانا هێرشبه‌ری پوله‌ندی و یانا جه‌نه‌وا کریستوڤ پياتيك پشتی د بزاڤێن ده‌ستڤه ئینانا هێرشبه‌رێ ئه‌رژه‌نتینی و یانا ئه‌نتر میلان یا ئیتالی ئیکاردی سه‌رنه‌که‌ڤتی کو ریال چه‌ندین بزاڤکرن لێ یانا ئه‌نتر داخوازیا ریال ره‌تکر وی مالپه‌ری دیارکریه ژی هه‌که ریال مه‌درید داخوازیت هه‌ڤبه‌ستێ ل گه‌ل ئیکاردی ئیمزا بکه‌ت پێدڤیه ل سه‌ر وێ ١٢٠ ملیون یورویا پێشکێشی یانا ئه‌نتر بکه‌ت، له‌وا یانا ریال هزر ل ئینا یاریزانه‌کێ دی کریه ل دیڤ گوتنا وی مالپه‌ری رێیا ده‌ستڤه ئینانا کریستوڤ پياتيك گه‌له‌ک ب سانه‌هی تره ژ ئیکاردی ژبه‌رکو هه‌لوه‌شاندنا هه‌ڤبه‌ستا یاریزانی پوله‌ندی ل گه‌ل جه‌نه‌وا بتنێ ٦٠ ملیون یورونه له‌ورا ریال هزر ئینا ڤی یاریزانی کریه.
کریستوڤ بیانی نوکه سه‌رێ لیسته‌یا گولکه‌رێن خۆلا ئیتالیا دهێت ب تومارکرنا ١٠ گولان.
هه‌ژی گوتنێ یه پياتيك ل وه‌رزێ ئه‌ڤ ساله هه‌ڤبه‌ستا جه‌نه‌وا ئیمزاکریه پشتی ژ یانا کراکوڤیا ڤه‌گوهاستی کو ل ١٤ یاریێن وه‌رزێ ئه‌ڤ ساله دا ١٠ گول تومارکرینه و نوکه پياتيك بوویه جهێ گرنگیا گه‌له‌ک یانێن مه‌زن ل ئورۆپا .
ئەڤرۆ نیوز ،بارزان مزووری:
د رێ ورەسمەكێ دا ئەڤرۆ چارشه‌مبى 5/12/2018 كەرنەڤالا بۆرینا سەد سالان ل سەر ناحیه بوونا ئەلقوش هاته ئەنجامدان ب چەندین چالاكیێن جۆرا وجۆر.
لارا زارا، رێڤەبەرا ناحیا ئەلقوش بۆ ئەڤرۆنیوز ئاشكرا كر كو ب پشته‌ڤانيا هێزێن پێشمەرگەی و خوراگریا وان ئەڤ كەرنەڤالە هاته ئەنجامدان ژبەركو هه‌كه ئەڤ پێشمەرگە نەبوویە د نها ئەڤ باژێرە ژی دهاتە كاڤلكرن وەكو وان باژێرێن دی یێن كەفتین دەستێ داعشێ دا چو جارا نەشێین قەرەبوویا وان قەهرەمانان بكەین هەردەم سوپاسدارێن واینە.
ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ مه‌سرور بارزانى ئه‌ڤرۆ چارشه‌مبى 5/12/2018 پێشوازى ل شێخ ئه‌حمه‌د جه‌ربا سه‌رۆكێ ره‌وتێ ئه‌لغه‌د يێ سوورى كر.
دديداره‌كێ دا ره‌وش وپێشهاتێن سياسى يێن ده‌ڤه‌رێ وشه‌ر وپێكدادانێن دناڤبه‌را گرۆپێن جودا جودا يێن سوورى ورژێما سووريێ ژلايه‌كى وتيرۆرستێن داعشێ وده‌ستێوه‌ردانێن ده‌ره‌كى ژلايه‌كێ دى ڤه هاتن به‌حسكرن.
شێخ ئه‌حمه‌د جه‌ربا پيرۆزباهى ل مه‌سرور بارزانى كر بۆ به‌ربژاركرنا وى وه‌كو سه‌رۆك وه‌زيرێن حوكمه‌تا هه‌رێما كوردستانێ وهيڤيا سه‌ركه‌فتنێ دوى ئه‌ركى دا بۆ خواست.
مه‌سرور بارزانى بير وبۆچوونێن خوه ل دۆر پێشهات وروودانێن ده‌ڤه‌رێ ب تايبه‌تى يێ سووريێ به‌رچاڤكرن وداخواز ژ هه‌موو لايه‌نێن په‌يوه‌نديدار كر شيانێن خوه بێخنه كار بۆ ديتنا چاره‌كا سياسى بۆ ره‌وشێ كو هه‌موو لايه‌ك هه‌ست ب هه‌بوون ورۆلێ خوه درێڤه‌برنا وه‌لاتى وبريارێن سياسى دا بكه‌ت.
ئەڤرۆ نیوز ،بارزان مزووری:
رێڤەبەرێ پولیسێن ئەلقوش عەقید عارف میرخان، بۆ ئەڤرۆ نیوز دیار كر ئەڤرۆ 5 كانونا ئێكێ 2018 ئه‌م هاتینه ئاگەهداركرن كو مامۆستایەكی 55 سالى ل گوندێ شێخكا سەر ب ناحیا ئەلقوش دناڤ مالا خوه‌دا ب چەكێ كلانشیكوفێ گولەیەك ل خوه‌دایە ودئه‌نجامدا گیانێ خوه ژ دەست دایە.
گۆت ژى” پۆلیسێن مە گەهشتن جهێ روودانێ وپشتی ڤەكۆلین ل دۆر خوه كوشتنا وی ئەنجامدای، لاشێ وی بوۆ نوشداریا داد ل دهۆكێ هاته هنارتن”.
ئاماژه‌كر” ل دووڤ پێزانينێن دەستپێكى دگەل خێزانا وی كو ئەڤە 10 سالە چارەسەریا دەرونی بو دهێتە كرن ويێ بێزاربووى وبزاڤێن خوه كوشتنێ كرينه ، ژبەر وێ چەندێ یێ مۆلەت دایە ژ دەواما خوه وه‌كو مامۆستا.
ئه‌ڤرۆنيوز:
حوكمه‌تا هه‌رێما كوردستانێ ئه‌ڤرۆ چارشه‌مبى 5/12/2018 راگه‌هاند كو بێهنڤه‌دانا رۆژا دوشه‌مبى هه‌رێما كوردستانێ ناگريت.
سه‌فين دزه‌يى، په‌يڤدارێ حوكمه‌تا هه‌رێما كوردستانێ گۆت” رۆژا دوشه‌مبى 10/12/2018 سالرۆژا سه‌ركه‌فتنێ ل سه‌ر داعشێ، ل هه‌رێما كوردستانێ نابيته بێهنڤه‌دان”.
حوكمه‌تا عيراقێ رۆژا دوشه‌مبيا داهاتى ب رۆژا سه‌ركه‌فتنێ ل سه‌ر داعشێ راگه‌هاند وئه‌و رۆژه كره بێهنڤه‌دانا فه‌رمى ل عيراقێ.
نيشاندان