ئەڤرۆ نیوز، ئەمیر ئەترووشی:‏

رێڤەبەرێ شوونوارێن دھۆکێ راگەھاند، پەیمانگەھەکا رۆژھەلاتا ناڤین یا فرەنسی ‏سەرەدانا مۆزەخانا دھۆکێ کریە و بەرھەڤیا خوە دیارکریە بۆ ھندێ ڤەکۆلینێ ل ‏سەر شوونوارێن دھۆکێ بکەت.‏

د. حەسەن قاسم، رێڤەبەرێ شوونوارێن دھۆکێ، بۆ ئەڤرۆ نیۆز دیار کر، (باربارا ‏کوتوغو) رێڤەبەرا پەیمانگەھا رۆژھەلاتا ناڤین یا فرەنسی سەرەدانا مۆزەخانا دھۆک ‏یا نیشتمانی کریە و بەرھەڤیا پەیمانگەھا خوە دەربریە بۆ کارکرن ب شێوەیەکێ ‏ھەڤبەش ل گەل شوونوارێن دھۆک د بوارێن راھێنانێ دا و ڤەکۆلینێن شوونواری و ‏سەخبێرکرنا شوونواران دا زێدەباری بوارێ دانان و پێشخستنا موزەخانان دا ‏دیدارەک پر مفابوو، ئومێدەوارم ب زووترین دەم کارێن ھەڤبەش ل سنورێن بەھدینان ‏بکەین.‏

ئەڤرۆ نیۆز، ئەمیر ئەترووشی

بەرپرسێ راگەھاندنا رێڤەبەریا چاکسازیا مەزنا ل دھۆکێ راگەھاند، نھا ل قوتابخانا ‏رێڤەبەریا چاکسازیا مەزنا ل دھۆکێ 58 دادگەھکریان دەست ب خواندنا خوە یا ئەڤ ‏سالە کریە کو پتریا وان ل قزناغا بنەرەتن.‏

عرفان محەمەد ئەمین، بەرپرسێ راگەھاندنا رێڤەبەریا چاکسازیا مەزنا ل دھۆکێ بۆ ‏ئەڤرۆ نیۆز دیار کر، قوتابخانا رێڤەبەریا چاکسازیا مەزنا ل دھۆکێ سەر ب رێڤەبەریا ‏پەروەردا رۆژئاڤایە ئەوا ل پارێزگەھا دھۆکێ. ھژمارەکا ماموستایان یێن پسپۆر د ‏بابەتێن جودا یێن خواندنێ دا وانان بۆ دادگەھکریێن قوتابی دبێژن و ھەر ژ ڤەکرنا ‏چاکسازیێ و ھەتا نوکە یا بەردەوامە ل سەر کارێ خوە و چەندین دادگەھکریێن ل ‏ڤێ قوتابخانێ خواندین ھەتا چووینە زانکۆ و پەیمانگەھان ژی بەردەوامی دایە ‏خواندنا خوە، ب سەرپەرشتیا کارمەندێن ھێزا جێبەجێکرنێ ل چاکسازیێ ‏دادگەھکری دخوینن و د بەردەوامن.‏

ئاشکرا ژی کر کو ل ئاستێ ئێکێ دوو پول ھەنە و ھژمارا وان دبنە (23) قوتابی و ل ‏ئاستێ دویێ (14) قوتابینە و ل ئاستێ سیێ (5) قوتابینە و ل ئاستێ چارێ (6) ‏قوتابینە و ل پولێن چارێ و پێنجێ ئامادەیی دەرەکی دخوینن و ل پولا دوازدێ ‏ئامادەیی (10) دادگەھکری ل دەرەکی دخوینن.‏

ئەڤرۆ نیوز، نەوزاد ھلۆری:

پشتی کو چەند رۆژێن بوری کوژمەکێ مەزن یێ پاره‌يێ سه‌ختە کەفتیە د ناڤ بازارێن قەزا سۆران دا، پۆلیسان دووڤچوون ل سەر وی پارەيی کر و ئەڤرۆ گرتنا ھژمارەکا تاوانبارێن پەیوەندی ب وێ کەیسێ ڤە ھەیی راگەھاندن.

ھەوار ئەرگۆشی، ئاخفتنکەرێ پۆلیسێن سۆران دیارکر کو ل سەر کەیستا ھاتنا پارێ سه‌ختە بۆ ناڤ بازارێ سۆران ھژمارەکا تاوانباران ژ لایێ پۆلیسان ھاتنە گرتن و گۆت: (رۆژا 28 چریا دویێ 2018 ئەم ھاتینە ئاگەھدارکرن کو کوژمەکێ مەزن یێ پارێ سه‌ختە ھاتیە د ناڤ بازارێن سۆران دا، پشتی دووڤچوونێن ھوور ل سەر بابەتی، سۆپاس بۆ خودێ پۆلیس شیان تاوانبارێ سەرەکی دەستنیشان بکەن و بگرن، ب رێیا وی تاوانباری چەند تاوانبارەکێن دى ژی ھاتنە دەستنیشانکرن و گرتن).

زێدەتر گۆت: (ئەوان تاوانباران دولارێ ئەمریکی و دینارێ عیراقی یێ سه‌ختە ئینابوو ناڤ بازارێن سۆران و کرین و فرۆتن پێ دکر، ژ بەر کو ھێشتا ڤەکۆلین ل سەر بەردەوامە و ژ بەر رەوشا ئەمن و ئاسایشێ نها نەشێين کوژمێ پارێ سه‌ختە و ھژمارا تاوانبارێن گرتی ئاشکرا بکەین، بەلێ ئەوان تاوانباران ھەمبەری دادوەرێ ڤەکۆلینێ دانپێدان کریە و ھاتینە رەوانەکرن بۆ دادگەھێ دا کو بگەھنە سزایێ خوه‌ يێ قانوونى).