ئەڤرۆ نيوز، زنار تۆڤی:
د. دیار تەییب ئەندامێ پەرلەمانێ عیراقێ ل سەر فراکسیۆنا پارتی دیموکراتی کوردستان بۆ ئەڤرۆ نیوز دیارکر: دوھی روونشتنا پەرلەمانێ عیراقێ بۆ پەسەندکرنا پرۆژە قانوونا بوودجێ عیراقێ یێ سالا 2019 دەستپێکر، لێ ئەو بابەتێن کۆتلێن کوردستانی دڤیان د وی پرۆژە قانوونێ دا نەھاتینە بجھئینان، ھەروەسا ئەو لیژنا ژ ھەرێما کوردستانێ ژی ھاتیە بەغدا، چەندین تێبینی ل سەر پرۆژە بوودجێ عیراقێ ھەبوون، ئێک ژ وان تێبینیان رێژا 12% یا کوردان بوو، کو ئەڤ رێژە دەربرینەکا دروست ژ رێژا کوردان ناکەت، دڤێت ئەڤ رێژە بھێتە زێدەکرن، دیسا دڤێت بوودجەک بۆ ھێزێن پێشمەرگەی بھێتە دەست نیشانکرن، ھەروەسا بابەتێ قەرەبۆکرنا شەھید و ئەنفالکریان و بوودجێ گەشەپێدانا ھەرێمان، کو مە ھژمارەکا خال و تیبینیان ل سەر وی پرۆژەی ھەبوون، لێ دەمێ دوھی پرۆژە بوودجە ھاتیە پەرلەمانی چو گوھۆرێنێن وەسا دەربارەی کوردان تێدا نەبوون، ژبەر ھندێ مە وەک کۆتلێن کوردستانی تێبینی ل سەر ھەبوون، لەوما ئەم دێ بزاڤێ کەین دڤان دو رۆژان دا، دناڤا لیژنا دارایی و کۆتلێن کوردستانی دا، کو ھندەک گوھۆرین و راستڤەکرن تێدا بھێنە کرن.
ناڤھاتی گۆت ژی: ئاریشە ئەوە دەمێ قانوون دگەھیتە پەرلەمانی، ئێدی پەرلەمانی گەلەک دەستھەلات ل سەر نابیت، کو مایتێکرنێ تێدا بکەت، ب تنێ دشێت دەرگەە بۆ دەرگەھی و کێمکرنێ مایتێکرنێ تێدا بکەت، لەوما دڤێت وەزیرێ دارایی ئەڤ چەندە ل بەرچاڤ وەرگرتبا و گوھۆرین تێدا کربان، ژبەر ھندێ ئەم دێ ھەموو بزاڤان کەین، ب ھەڤکاری ل گەل ھندەک کۆتلێن دیتر کو ھندەک گوھۆرین تێدا بھێنە کرن، لێ نە یا دیارە کادێ ھەتا چو رادە تێدا د سەرکەفتی بین، چونکی پێدڤی بوو، بەری بوودجە بھێتە پەرلەمانی، ئالیێن کوردستانی ل سەر ھاتبانە ھایدارکرن، ژ پێخەمەت ئەم بشێین دناڤا پەرلەمانی دا رەفتارێ ل گەل بکەین، لەوما دەمێ دوھی بوودجە ھاتی بۆ مە کوردان تشتەکێ ژ نشکەکێ ڤەبوو، چونکی دو دەمژمێران بەری کوۆمبوونا پەرلەمانی بوودجە گەھشتە ناڤ ھۆلا پەرلەمانی، لەوما مە ئەو بەرھەڤیا باش نەبوو، کو تێبینیێن خوە ل سەر پرۆژە بوودجێ سالا 2019 بدەین.
ناڤھاتی گۆت ژی: عەرەبێن سوننی پتر جەختکرنا وان ل سەر زێدەکرنا بوودجەی بۆ دەڤەرێن وانە، ژبەرکو زیانێن مەزن یێن گەھشتینە دەڤەرێن وان، ئەو ژی دێ بەرەڤانیێ ژ ڤێ چەندێ کەن، لێ دەمێ وان زانی کو دێ رێژا وان کێم بیت و دێ وێ رێژێ دەنە کوردان، ئەو ژی ڤێ چەندێ قەبوول ناکەن، لەوما ھەکە رێژا کوردا ل وەزارەتا دارایی کربا 14%، دا ئەم ژ گەلەک ئاریشان قورتال بین، لێ نوکە ئاریشا مە ل گەل وان گەلەکە، چونکی ئەوا مە پێشبینی دکر وەسا دەرنەکەفت، ژبەر ھندێ ل رۆژا ئێکشەمبیا بھێت مە روونشتنەکا تایبەت ھەیە، وەکو فراکسیۆنا پارتی ل پەرلەمانێ عیراقێ، ئەم دێ ل گەل تیمێ حوکمەتا ھەرێمێ و وەزیرێ دارایی یێ عیراقێ کۆم بین، ژ پێخەمەت بزانین، کو ئەو خالێن ھاتینە زێدەکرن، کو د بەژەوەندا خەلکێ کوردستانێ دانە، دیسا مەترسیا مە د ھندێ دایە، کو ل رۆاژ دوشەمبی خواندنێ دوماھیێ بۆ پرۆژە بودجێ عیراقێ بھێتە کرن و پرۆژە قانوونا بوودجێ عیراقێ بۆ سالا 2019 بھێتە پەسەندکرن، چونکی سیناریۆیەک بۆ ڤێ چەندێ یێ ھەی، لەوما دڤێت بەری ھنگێ د لیژنا دارایی دا دەستکاری تێدا بھێتە کرن.
دیاری ئەو ژی گۆت: ئەو سیاسەتا نوکە سەرۆکێ پەرلەمانی عیراقێ محمەد حەلبۆسی برێڤە دبەت و ئەو نەرماتیا سەرۆک وەزیرێ عیراقێ عادل عەبدولمەھدی نیشا ددەت، لێ ل دوماھیێ ھەردو وەکو خوە دکەن، لەوما دڤێت مرۆڤ پێشبینیا ھەموو تشتان ژ وان بکەت، باشترە ژ ھندێ ئەم بێژین، مە نە دزانی کو ئەو دێ ڤێ چەندێ کەن، ھەروەسا ل ڤێ دوشەمبیا بھێت کو دووماھی وەرزێ تەشریعی یێ پەرلەمانێ عیراقێ یە، ھەروەسا ئەو حەز ناکەن، کو وەرزێ تەشریعی بھێتە درێژ کرن، لەوما حەلبۆسی دڤێت بۆ خوە سەرکەفتنەکێ تۆمار بکەت، کو ئەو شیا وەرزێ خوە یێ تەشریعی ب دووماھی بینیت، ب پەسەندکرنا بۆدجێ عیراقێ، دەربارەی عادل عەبدولمەھدی ژی دێ بیتە ئێکەم سەرۆک وەزیر، کو بەری سالا نوو ب دووماھی بھێت، دێ میزانیا خوە ژ پەرلەمانی ئینیت و د سالا نوو دا دێ کار پێکەت، لەوا دڤێت ئەم ڤێ پێشبینیێ ل بەرچاڤ وەربگرین، ھەروەسا ھەکە ھات و ل دوشەمبیا بھێت پرۆژە بوودجە نەھاتە پەسەند کرن، دێ پەرلەمان ژیێ خوە یێ تەشریعی بۆ ھەیڤەکێ درێژ کەت، دڤێت د وێ ھەیڤێ دا بوودجە بھێتە پەسەند کرن، ھەروەسا ئاریشا مە ئەوە دڤێت بەری قانوون بھێنە پەرلەمانی بھێنە چارەکرن، چونگی گەلەک ژ وان دەمێ دھێنە پەرلەمانی و گوھۆرێن تێدا دھێنە کرن و لدووڤدا حوکمەت تانەیان لێ ددەت، دیسا دادگەھا فیدرالی ژی ئەو گوھۆرینا پەرلەمانی کری رادوەستینیت، ئەڤ تشتە چەندین جاران ل عیراقێ چێبوویە، لەوما باشترە بەری قانوون بگەھنە پەرلەمانی بھێنە چارەسەرکرن.
ئەڤرۆ نیوز، نەوزاد ھلۆری:
شەڤا بوری هه‌تا سپێدەھیا ئەڤرو رۆژا ئەینی 21 کانوونا ئێکێ 2018 شەپولەکا بارینا بەفرێ چەند گوندێن دەڤەرا بارزان ب خوه ڤە گرت، ب تایبەتی گوندێن سنوری یێن مزووریان.
ھوشیار سێلکی، وەلاتیەکێ ناحیا شێروانی مەزن یا سەر ب دەڤەرا بارزانە بو ئەڤرۆ نیوز گوت: (شەپولەکا بەفرێ ھژمارکا گوندێن مزووری یا سەر ب دەڤەرا بارزان دا گرت، دەڤەر سپیکریە، ب تایبەتی گوندێن سنوورێ د ناڤبەرا باکوور و باشوورێ کوردستانێ مینا گوندێ سێلکێ و دەوروبەرێن موسەکا و ھەموو چیایێن دەڤەرێ و رێیێن گشتی یێن دەڤەرێن چیایی).
زێدەتر گۆت: (بەفرا ئەڤرۆ ھەتا پتری 10 سم باری یە، سوپاس بۆ خودێ تیمێن بەرەڤانیا باژێری رێ ژ بەفرێ پاقژکرینە و ھاتنوچوون ئاسایی یە، چەند رۆژێن بوری ژی ل ھەمان جھی بەفر 15 سه‌نتيمه‌تر باریبوون).
ناڤبری دیارکر ژی کو نها ژی بەفر یا دباریت، ھوسا بەردەوام بیت رەنگە رێیێن سەرەکی بھێنە گرتن.
ئه‌ڤرۆ نيوز:
جه‌يمس ماتيس، وه‌زيرێ به‌ره‌ڤانيا ئه‌مريكا ده‌ست ژ كار كێشا و راگه‌هاند كو پێدڤيه ئه‌مريكا هه‌موو كه‌ره‌ستێن خوه بۆ پاراستنا به‌رژه‌وه‌نديا هه‌ڤپه‌يمانێن خوه ب كاربينيت.
رۆژه‌كێ پشتى بڕيارا ڤه‌كێشانا هێزێن ئه‌مريكا ژ سوريا، وه‌زيرێ به‌ره‌ڤانيا ئه‌مريكا ناما ده‌ست ژ كاركێشانا خوه راده‌ستى سه‌رۆكێ وى وه‌لاتى كر و راگه‌هاند پشتى چار ده‌هان ژ خزمه‌تركرنێ د ناڤ سۆپايى دا وه‌سان فێر بوويه كو پێدڤيه ئه‌مريكا سه‌ره‌راى رێزگرتن ل هه‌ڤپه‌يمانان، هه‌موو كه‌ره‌ستێن پێدڤيێن خوه بۆ به‌ره‌ڤانيكرن ژ به‌رژه‌وه‌ندى و هه‌ڤپه‌يمانێن خوه ب كار بينيت.
جه‌يمس ماتيس هه‌ر وه‌سان دبێژيت: “پێدڤيه ئه‌مريكا ل به‌رامبه‌ر وان وه‌لاتێن به‌رژه‌وه‌نديێن ستراتيژى بووينه ئه‌گه‌رێ دروستبوونا ئالۆزيان ل گه‌ل وه‌لاتێ وى، سياسه‌ته‌كا روون هه‌بيت، ب تايبه‌ت ل به‌رامبه‌ر كۆمه‌كا وه‌لاتێن وه‌كو چين و رۆسيا كو دڤێت ئه‌زموونا خوه ب سه‌ر جيهانێ دا ب سه‌پينن، دڤێت ئه‌مريكا هه‌موو بزاڤا بكه‌ت بۆ به‌رسينگگرتنا وان”.
وه‌زيرێ به‌ره‌ڤانيا ئه‌مريكا دبێژيت ژى: “سه‌رۆكى مافێ وێ چه‌ندێ هه‌يه كو وه‌زيره‌كێ هه‌ڤسۆزێ خوه هه‌بيت ده‌ست ژ پۆستێ خوه به‌رده‌ت”.
هه‌ڤده‌م دۆنالد تره‌مپ د تويته‌كى دا راگه‌هاند كو وه‌زيرێ به‌ره‌ڤانيا ئه‌مريكا هه‌تا دو هه‌يڤێن دى دێ هێته خانه‌نشينكرن و كه‌سه‌كى دى ب زووترين ده‌م ل جهێ وى هێته دانان.
ئەڤرو نیوز، بارزان مزووری:
ترۆمبێله‌كا بارهه‌لگر يا وه‌لاتيه‌كێ ئيرانى ل نێزيك پرا حسێنيێ وه‌رگه‌ريا و كه‌فته د ناڤ رووبارى دا و شوفێرێ وێ بريندار بوو.
دلشاد محەمەد، راگەھاندنکار ژ پشکا ھاتنوچوونێ ل قەزا شێخان بۆ ئەڤرۆ نیوز ئاشکرا کر کو ئەڤرۆ دەمژمێر ٨:٣٠ ده‌قيقه‌ى سپێدێ، ٢١ کانونا ئێکێ ٢٠١٨ ل سەر رێيا سەرەکیا شێخان بۆ کومەلگەھا چرە ترۆمبێلەکا بارھەلگر ژ جورێ ئیسکانی ژبن کۆنترۆلا شوفێری دەرکەفت.
ئاشكه‌را ژى كر كو ل دووڤ لەزاتیا ترۆمبێلێ نەشیایە کۆنیرۆل بکەت کەڤتيە بن پرا حسێنیێ د ناڤ رووباری دا، د ئەنجام دا شوفێر بریندار بوو.
دلشاد محه‌مه‌د ئاماژه ب وێ چه‌ندێ ژى كر كو شوفێر ب ره‌گه‌ز ئيرانى يه و زيانێن مه‌زن ژى ب ترۆمبێلێ كه‌فتينه.
ئەڤرۆ ، زنار تۆڤی:
د. نەوزاد ھێتۆتی شارەزا د سیاسەتا دەرڤە یا ئەمریکا ل رۆژھەلاتا ناڤین و پرسا کوردان د دیدارەکێ دا بۆ ئەڤرۆ نیوز دیارکر: دەمێ ھێزێن ئەمریکا ل سالا 2015 چووینە دناڤا ئاخا سووریێ دان وان سێ مەرەمێن سەرەکی ھەبوون، ئەو ژی بەرسنگ گرتنا ئیرانێ و شکاندنا داعشێ ب تەمامی و پەیداکرنا سەقامگیریێ و ئاڤەدانکرنێ ل سووریێ، داکو پرۆسا سیاسی ل وی وەلاتی سەر بگریت و شەرێ نافخۆیی ب دووماھی بھێت، کو ڤان خالان گەلەک گرنگیا ھەبوویە د ستراتیجیەتا ترامپی دا، ژ پێخەمەت ھندێ کو ئەمریکا رۆل ھەبیت د چارەسەرکرنا کێشێن سووریێ دا، کو وان کێشان چارەسەر بکەت و دووماھیێ ب شەرێ نافخۆیێ سووریێ بینیت، لێ پرسیار ئەوە کیژ ژ ڤان ئارمانجا بجە ھاتیەن ئەرێ شەرێ داعش ب دووماھی ھاتیە، ئەرێ ئەمریکا بەرسنگێ ئیرانێ گرتیە، ئەرێ شەرێ نافخۆ ل سووریێ ب دووماھی ھاتیە، ئەرێ ڤەکێشانا ھێزێن وێ دێ سەقامگیریەکێ ل سووریێ پەیدا کەت، ھەر چەندە ئەمریکا ئێک ئارمانج ژی ل سووریێ ب دەستڤە نەئینایە، ھەروەسا دەمێ ئەمریکا چوویە سووریێ ب چو رەنگان نەگۆتیە، ئەم دێ کیانەکێ کوردی و ھەرێمەکا فیدرالی چێکەین، نە چوو بۆ وێرێ کو پالپشتیێ ل دۆزا کوردی بکەت، ب تنێ کوردان بۆ خوە وە دگۆت، کو دێ ئەمریکا ھەرێمەکا فیدرالی بۆ کوردان دروست کەت ل رۆژئاڤا، لەوما ب تنێ ئەمریکا ل رۆژئاڤا ھندەک بەرژەوەندی ھەبوون، لێ نوکە پشتا خوە دا کوردان و ژ رۆژئاڤا دەرکەفت، ناڤھاتی گۆت ژی: ڤێ چەندێ گەلەک ھوکار ھەنە، چونکی ترامپ کەسەکێ ” میزاجیە” و نە سیاسیەکێ خودان شیانە، دیسا د کێشێن رۆژھەلاتا ناڤین ناگەھیت، دیسا دیارکریە کو وی پتری 8 ترلیۆن دۆلاران مەزاختینە، لێ کەسێ بەرمبەر ڤێ چەندێ چو نەدایە مە، لەوما ئەو نە یێ مەجبورە ئێدی پارەی بۆ شەری ب مەزێخیت، ل ڤێ دەڤەرێ، نە یێ بەرھەڤە خەلکێ ئەمریکا بدەتە کوشتن، ھەروەسا ئەمریکا چو گرنگیێ ب دیموکراسیێ و مافێ مرۆڤی نادەت، ھەر چەندە بەرپرسێن ئەمریکی ل دژی ڤەکێشانا ھێزێن ئەمریکا نە ژ رۆژئاڤایێ کوردستانێ، دیسا بەرپرسێن ئەمریکا دیارکرینە، کو ڤەکێشانا ژ نشکەکێڤە بێی ئارمانجێن ە بجە بھێن، دێ کارەساتێن مەزن لدووڤ خوە دا ئینیت، لێ ترامپی ئەڤ بریارە ل دەرڤەی ئیدارە و شیرەتکارێن خوە دایە، ب تنێ ئەو ژ ڤێ بریارێ یێ بەرپرسیارە، ھەروەسا ل سەر ئاستێ نافخۆ ژی ئەو گەنگەشا ل سەر ئیدارا ترامپی و چێکرنا دیواری و ئەو کێشێن ل گەل دیموکراتیا ھەین، وی دڤێت پیچەک بوچوونا گشتی ب گوھۆریت بۆ سیاسەتا ژ دەرڤە، دیسا ئەو سۆزێن وی د کەمپینا ھەلبژارتنان داین، ھەموویان جێبەجێ بکەت، ئێک ژی ئەو بوو، کو ھێزێن خوە ژ رۆژھەلاتا ناڤین ڤەکێشیت و خوە تۆشی ژو شەران نەکەت، ھەروەسا ئەو پەیوەندیا دناڤبەرا ترامپی و سەرۆکێ تورکیا دا ل حەفیتا بوری ھاتیە ئەنجامدان، کارتێکرن ل سەر ڤێ بریارێ ھەبوویە، ژ پێخەمەت ئەمریکا بشێت تورکیا ژ بەرەیێ و ئیرانێ و سووریێ دووربێخیت، بەرامبەری ھندێ ژی ئێدی ئەمریکا پالپشتیا پەیەدێ نەکەت، لێ ئەڤ بریارە بەرژەوەندیێن ئەمریکا ناپارێزیت.
ھێشتا دبێژیت: ئەمریکا ئەزموونەکا خراب ل گەل ڤەکێشانا ھێزێن سەربازی ھەیە، چونکی دەمێ ل سالا 2011 ئۆبامای ھێزێن ئەمریکا ژ عیراقێ ڤەکێشاین، عیراق تۆشی شەرێ نافخۆیی بوو، ھەروەسا داعش ل عیراقێ دروست بوو، لەوما ئەمریکا نەچاربوو، جارەکادی ڤەگەریتە عیراقێ، چونکی ڤەکێشانا بێ بەرنامە، دێ ئالۆزیان و نەسەقامگیریێ پەیدا کەت، لەوما ئەڤ ڤەکێشانا ھێزێن ئەمریکا ژ رۆژئاڤایێ کوردستانێ ژ یا ئۆبامای خرابترە، چونکی دێ بیتە ئەگەر کو بەشار ئەسەد و ھەڤالبەندێن وی سووریێ کونترۆل بکەن، ئەو دەڤەرێن دبن کونترۆلا کوردان ژی، ژ کوردان وەربگرن، دێ پێگەھێ رووسیا و بەشار ئەسەدی بھێزتر کەڤیت، دێ ھەژموونا ئیرانێ بەرفرەھتر بیت ل ڤێ دەڤەرێ، ھەروەسا ھەر دەمێ ھێزێن ئەمریکا دەرکەفتن، دێ سۆپایێ تورکی ھێرشێ کەتە مونبج و کۆبانێ و گرێ سپی، کو ئەڤ ھەرسێ دەڤەرە ئارمانجا تورکیا نە، دێ دۆخێ کوردان ل ڤان دەڤەران کەڤیتە د مەترسیێ دا.
ئەو ژی دیارکر: باشترە کورد خوە ژ ھەموو دەڤەرێن عەرەبان ڤەکێشن ل سووریێ و بتنێ ب میننە ل دەڤەرێن کوردان و بلا داعش بھێنە وان دەڤەرێن عەرەبان، دیسا دڤێت کورد د نافخۆدا د ئێکگرتی بن و کێشێن خوە چارەسەر بکەن، دیسا دڤێت د ئاستێ دبلۆماسی و نافخۆ و دەرڤە ژی دا ب تایبەتی ل ئورۆپا و ئەمریکا کورد خوەنیشاندانان بکەن، ژ پێخەمەت کورد بھێنە پاراستن، ھەروەسا دڤێت ھەر نوکە کورد لۆبیەکێ مەزن دروست بکەن، کو ئەمریکا و فرەنسا کوردان بپارێزن، ژ رژێما ئەسەدی، ھەر چەندە نوکە حالەتێ خراب و خرابتر ژی ھەیە، چونکی ھەکە سیناریۆیا عەفرینێ دووبارە بیت، پێدڤیە کورد ل گەل رووسیا و ئەسەدی ژی دانیشن و دشێن بگەھنە رێککەفتنەکێ، داکو بشێن دەڤەرێن کوردان ژ ھێرش و وێرانکاریا بپارێزن، لەوما نوکە کوردان چو پێگوھۆرێن باش ل رۆژئاڤا نینن، چونکی چوونا ئەمریکا ژ سووریێ وێ چەندێ دگەھینیت، کو ئەمریکا پشتا خوە دا کوردان، ھەروەسا ئەڤ چەندە دێ مەترسیێ ل سەر عیراقێ ژی دروست کەت، کو جارەکادی داعش ڤەگەریتە عیراقێ.
د. نەوزادی گۆت ژی: پشتی چوونا ئەمریکا ژ سووریێ دێ بیتە ھەڤرکی دناڤبەرا سۆپایێ تورکی و بەشار ئەسەدی، کو بھێن وان دەڤەرێن کوردان کونترۆل بکەنەڤە، ئەڤ چەندە دێ مینیتە ل سەر ھندێ کانێ دێ کیژ ئالی بەری یێ دی ھێرشێ دەست پێکەت، ھەر چەندە تورکیا نەشێت شەرێ سووریێ رووسی بکەت، خوە توشی وی شەری ژی ناکەت، ھەروەسا ھەکە ھەر ھێزەکا کوردی ل رۆژئاڤا ھەبا ئەمریکا دا ڤێ بریارێ دەت، لەوما ھەکە کورد د ئالیێ ژ دەرڤە و دبلۆماسی دا چو نەکەن، ئێدی چو دەڤەر ب ناڤێ رۆژئاڤایێ کوردستانێ نامینیت.
سەرۆک بارزانی ل دۆر رەوشا ڤێ دووماهیێ ل سووریێ پەیامەکێ بەلاڤ دکەت.
ب ناڤێ خودێ مەزن و دلۆڤان
روودانێن ڤێ دووماهیێ ل سووریێ و ب تایبەتی ژی رەوشا گەلێ کورد جهێ نیگەرانیێ یە، بەری نها ژی ژ بەر رەوشا ل سووریێ و پێشهاتێن ل رۆژئاڤا مە تێبینی و دلگرانیا خوە دیار کربوو، پێدڤی بوو رەوش وەسا لێ نەهاتبا. ژ بەر شەرێ داعشێ و هێرشێن تیرۆرستان گەلەک خەلکێ کورد یێ رۆژئاڤایێ کوردستانێ ئاوارە بووینە و د رەوشەکا خراب دا دژین، خەلکێ سووریێ گەلەک ئازار دیتنە و هەتا نها شەرێ داعشێ ژی ب دووماهی نەهاتیە.
هێڤیدارم کو گوهۆرینێن ڤێ دووماهیێ نەبیتە ئەگەرێ توندوتیژی و زێدەبوونا شەری، دا گەلێ کورد ل سووریێ تووشی ئازار و نەخوەشیێن زێدەتر نەبن.
مەسعود بارزانی ٢٠١٨-١٢-٢٠
ئه‌ڤرۆ نیوز:
په‌یڤدارێ فه‌رمی یێ حوكمه‌تا هه‌رێما كوردستانێ د په‌یامه‌كێ دا راگه‌هاند، ب هه‌لكه‌فتا جه‌ژنا ژ دایكبوونا پێغه‌مبه‌رێ مه‌سیح حه‌زره‌تا عیسایێ كوریێ مه‌ریه‌مێ سلاڤێن خودێ لێ بن، پیرۆزباهیێن گه‌رم ئاراسته‌ی برایێن مه‌سیحی ل كوردستان و عیراق و جیهانێ دكه‌ین و هیڤیدارین ئه‌ڤ جه‌ژنه ببیته جهێ وپاتكرنا خورتتربوونا گیانێ برایانه و ئێكبوونا نیشتیمانی.
د پشكه‌كا دی یا په‌یاما سه‌فین دزه‌یی دا هاتیه” ب ڤێ هه‌لكه‌فتێ بۆ وه‌لاتیێن خۆشتڤی یێن كوردستانێ رادگه‌هینین كو رۆژا سێشه‌مبی 25/12/2018 ل هه‌موو دام و ده‌زگه‌هێن حوكمه‌تا هه‌رێما كوردستانێ دێ بیته بهێنڤه‌دانا فه‌رمی.
ئه‌ڤرۆ نيوز:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو شڤێدى بيڤه‌له‌رزه‌كێ ئاكرێ هه‌ژاند.
ب گۆره‌ى تۆڕا داتايان ل سه‌نته‌رێ بيڤه‌له‌رزان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ شڤێدى ده‌مژمێر 12:17 ى شه‌ڤ بيڤه‌له‌رزه‌كێ ل ئاكرێ دا ب پله‌يا 3.5 ل دووڤ پيڤه‌رێ ريخته‌ر.
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ ئاشكه‌را ژى كريه كو ئه‌ڤ بيڤه‌له‌رزه 24 كيلۆمه‌تران يا ژ ئاكرێ دوور بوو و كوراتيا وێ 5كم بوون و وه‌لاتيان هه‌ستپێكريه، “چو زيانێن گيانى ژى نه‌بوون”.
نيشاندان