ئه‌ڤرۆ نيوز:

بڕياره‌ به‌رى نيڤرۆيا ئه‌ڤرۆ مه‌سعود بارزانى سه‌رۆكێ پارتى ديموكراتى كوردستان بگه‌هيته‌ به‌غدا و دێ هێته‌ پێشوازيكرن ژ لايێ محه‌مه‌د حه‌لبۆسى سه‌رۆكێ جڤاتا نوونه‌رێن عيراقێ و هادى عامرى و ژماره‌كا سه‌كردێن دى يێن عيراقى ڤه‌ بهێته‌ پێشوازيكرن.

كيفاح شنگالى شيره‌تكارێ راگه‌هاندنێ يێ مه‌سعود بارزانى، سه‌رۆكێ پارتى ديموكراتى كوردستان بۆ ئه‌ڤرۆ نيوز گۆتبوو: “سه‌رۆك بارزانى دێ ل گه‌ل عادل عه‌بدولمه‌هدى سه‌رۆك وه‌زيرێن عيراقێ ومحه‌مه‌د حه‌لبووسى سه‌رۆكێ په‌رله‌مانى كۆم بيت، زێده‌بارى هژماره‌كا سه‌رۆك ليستێن په‌رله‌مانى وه‌كو عه‌مار حه‌كيم ونورى مالكى و سه‌ركردێن سونان وه‌كو سالح موتله‌گ، سوبه‌هى ژى دێ ل گه‌ل موقته‌دا سه‌در كۆم بيت”.

دياركر ژى كو گرنگترين پرسێن سه‌رۆك بارزانى دێ ل به‌غدا به‌حس كه‌ت مادێ 140 وده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ وپێدڤيا له‌زكرنى دنه‌هێلانا ره‌وشێن نه‌سروشتى ل وان ده‌ڤه‌ران ب تايبه‌ت ل كه‌ركووكێ وشنگالێ وخانه‌قينێ وزڤراندنا ره‌وشا وان وه‌كو به‌رێ، زێده‌بارى به‌حسكرنا به‌هرا هه‌رێما كوردستانێ ژ بودجه‌ى، ديسا پرسێن په‌ترۆلێ وغازێ وپێشمه‌رگه‌ى وبه‌هرا وان ژ رێككه‌فتن وهاريكاريان د پرچه‌ككرنێ ومه‌شقكرنێ دا”.

ئه‌ڤرۆ، قائید میرۆ:
پەرلەمانتارێن کورد ل پەرلەمانێ عیراقێ ئیمزا ژ بۆی چێکرنا لیژنەکا ‏پەرلەمانی بۆ چاڤدێریکرن و بجھئینانا مادێ 140 یێ دستوورێ ‏عیراقێ کۆمکرینە و پەرلەمانتارەکێ پارتی ژی دیارکر، پێدڤیە مادێ ‏‏140 یێ دستووری قۆناغ ب قۆناغ وەکە خوە بھێتە بجھئینان. ‏

چارەنڤیسێ دەڤەرێن کوردستانی یێن دەرڤەی ئیدارەیا حوکمەتا ھەرێما ‏کوردستانێ گرێدای بجە ئینانا مادێ 140 یێ دستوورێ عیراقێ نە و ‏کورد ددەمێ نوکەدا زێدەتر رژدن لسەر بجھئینانا دستووری دیار تەیب، ‏پەرلەمانتارێ پارتی لپەرلەمانێ عیراقێ بۆ رۆژناما ئەڤرۆ گۆت: دڤێ ‏خۆلا پەرلەمانێ عیراقێ دا، بڕیارە لیژنەیەکا کاتی بۆ مادێ 140 بھێتە ‏پێک ئینان، ھەتا وی دەمێ مادێ 140 بتەمامی دھێتە بجە ئینان ‏دڤێت پەرلەمانێ عیراقێ چاڤدێریێ بکەت، مە ھژمارەک پەرلەمانتارێن ‏کورد ئیمزا کۆمکرینە و ھەموو پەرلەمانتار ژی تێدا پشکداربووینە و ‏ھاتینە بلندکرن بۆ سەرۆکاتیا پەرلەمانی ھەتا دڤێ خۆلێ دا لیژنەکا ‏تایبەت بۆ چاڤدێریکرنا مادێ 140 بھێتە پێک ئینان، ھەروەکی د ‏خۆلێن بۆری داژی لیژنەیا تایبەت بۆ وێ مەرەمێ ھەبوویە، ھەر نوکە ‏ئەم یێ بزاڤان بۆ بجھئینانا ئەوی مادێ دستووری دکەین، چونکی ‏گرێدایی پاشەڕۆژا دەڤەرێن کوردستانی یێن دەرڤەی ئیدارەیا حوکمەتا ‏ھەرێما کوردستانێ ڤە ھەیە، بەلێ ھێشتا لیژنەیێن ھەمیشەیی ‏بتەمامی نەھاتینە ئێکلاکرن ھەتا ئەف لیژنەژی بھێتە چێکرن. ‏
‏ گورەی مادێ 140 یێ دستوورێ عیراقێ ھاتیە، پێدڤیە عەرەبێن ‏دچوارچوڤێ پڕۆسا تەعریبێ ھاتینە دەڤەرێن کوردستانی بھێنە ‏ڤەگەڕاندن بۆ دەڤەرێن خوە و ئەردێ کوردانژی ڤەگەڕیت بۆ خوەدیێن ‏وانا یێن رەسەن و دوڤدا دێ راپرسی ھێتەکرن دناڤا ئاکنجیێن وان ‏دەڤەران بۆ بڕیاردان لدۆر چارەنڤیسێ خوە، دیار تەیب گۆت: ھندەک ‏قۆناغێن ئەڤی مادێ دستووری لیسالێن بۆری ھاتینە بجە ئینان و ‏پێنگاڤ ھەبووینە ب ئاراستەیا بجە ئینانا دستووری و ئێکلاکرنا ‏ئاریشەیا دەڤەرێن ناکۆکی لسەر، بەلێ دڤێ قۆناغێ دا دێ ئەم وەک ‏کورد چاڤدێریێ دانین سەر لیژنەیا بلندا مادێ 140 ئەڤا ژلایێ ‏حوکمەتا عیراقێ ھەی بۆ بجە ئینانا ئەڤی مادەی، ھەردەمێ کێماسی و ‏خەمساری ھەبن ئەڤە بێگومان بێدەنگ نابین و دێ مە ھەلویستێ خوە ‏ھەبیت، ژبەرکو پارە دناڤا بودجەی دا بۆ بجە ئینانا مادێ 140 ھاتیە ‏مەزاختن و پێدڤیە لیژنەیا حوکمەتا عیراقێ کارێ خوە بکەت بێ چو ‏ئاستەنگ و خەمساری.‏

ئه‌ڤرۆنيوز:

فه‌رمانگه‌ها راگه‌هاندنێ ل په‌رله‌مانێ عيراقێ ئه‌ڤرۆ چارشه‌مبى 21/11/2018 راگه‌هاند، گه‌هشتن بۆ هه‌موو راستيان ل دۆر ئيمتيازاتێن په‌رله‌مانتاران گه‌له‌ك يا ب ساناهى وبه‌ر ده‌سته‌ ب تايبه‌تى بۆ شاره‌زايان وبه‌رپرس ورۆژنامه‌ڤانێن پيشه‌كار.

فه‌رمانگه‌ها راگه‌هاندنێ ل په‌رله‌مانێ عيراقێ د رۆهنكرنه‌كێ دا به‌لاڤكر” وه‌كو پێگيريه‌ك ژ په‌رله‌مانى وفه‌رمانگه‌ها راگه‌هاندنا وێ ب زه‌لاليێ ومافێ ب ده‌ستڤه‌ئينانا پێزانينان ژ ژێده‌رێن وان يێ دروست، ديار دكه‌ين كو ئه‌و چه‌ندا دهێته‌ به‌لاڤكرن ل دۆر ئيمتيازاتێن ئاشووپى يێن په‌رله‌مانتاران دووره‌ ژ راستيێ وگۆژمێ 3 مليۆن ديناران ئه‌وێ دهێته‌ دان وه‌كو كرێ بۆ ئاكنجيبوونا هه‌ر په‌رله‌مانتاره‌كى ل به‌غدا ب شێوه‌يێ به‌ره‌لايى ناهێته‌ خه‌رجكرن، به‌لكو ل دووڤ پێرابوونێن كارگێرى وقانوونى وميكانيزمێن نه‌ ب ساناهى وپتريا كرێيان ناگه‌هنه‌ ڤى گۆژمى”.

دياركر ژى” خه‌رجكرنا كۆژمه‌كێ پاره‌ى بۆ كرێيان ل دووڤ رێنمايێن بودجا گشتى يا سالا 2010 يه‌ كو ژ وه‌زاره‌تا دارايى هاتبوونه‌ ده‌ركرن، ئانكو بابه‌ت گرێداى په‌رله‌مانى بتنێ نينه‌ وهه‌لوه‌شاندنا پارێن كرێيان پێدڤيه‌ ل سه‌ر ئاستێ هه‌موو ده‌زگه‌هێن ده‌وله‌تێ بيت وژ وى لايه‌نێ ئه‌و رێنما ده‌ركرين بهێته‌ دان”.

ئاشكراكر ژى”بودجا په‌رله‌مانێ عيراقێ بۆ سالا 2018 گه‌هشته‌ 477 مليار ديناران وده‌رگه‌هێ مووچان دوێ بودجێ دا 208 مليار و651 مليۆن دينار بوون ورێژا ده‌رگه‌هێ ووچان دبودجا په‌رله‌مانى دا 89% يه‌ دده‌مه‌كى دا بودجا گشتى يا عيراقێ بۆ سالا 2018 گه‌هشته‌ 104 ترليۆن و158مليار ديناران.

دياركر ژى” مووچێ ئه‌ندامێن په‌رله‌مانى 7 مليۆن دينارن نه‌وه‌كو هنده‌ك كه‌س دده‌زگه‌هێن راگه‌هاندنێ دا دبێژن 25 مليۆن دينارن وهنده‌ك ژى دبێژن 35 مليۆن دينارن”.

فه‌رمانگه‌ها راگه‌هاندنێ ل په‌رله‌مانێ عيراقێ گۆت خوياكر ژى” ده‌رگه‌هێن مه‌ دڤه‌كرينه‌ بۆ پێشكێشكرنا هه‌موو پێزانين وداتايان”.

ئه‌ڤرۆنيوز:

مالپه‌رێ (المربد) يێ عيراقى به‌لاڤكر، سه‌رۆك وه‌زيرێن عيراقێ عادل عه‌بدولمه‌هدى راگه‌هاند، ب گه‌له‌ك ئه‌رێنى سه‌حدكه‌ينه‌ سه‌ره‌دانا مه‌سعود بارزانى بۆ به‌غدا وسوباهى دێ مه‌ كۆمبوون دگه‌لدا هه‌بيت.