ئەڤرۆ نیوز، سالار دۆسکی:
سەرۆکێ باژێرڤانیا زاخۆ ئاشکراکر کو دەست ب فرۆتنا پارچێن عەردی ل زاخۆ ھاتیەکرن وەک باژێرڤانی ب ئاشکرایی د فرۆشیت وی پارەی بۆ پرۆژێن خزمەت گوزاری ب کارتینن.
زێدەتر بژار مونیب، سەرۆکێ باژێرڤانیا زاخۆ بۆ ئەڤرۆ نیوز ئاشکراکر دوھی رێکەفتی ١١/١٢/٢٠١٨ ل سەرۆکاتیا باژێرڤانیا زاخۆ ب بەرھەڤبوونا داواکارێ گشتی و رێڤەبەرێ گەنجینەیا و نوونەرێ قائیمقامێ زاخۆ، ب رێکا سەرئێک زێدەکرن ئاشکرا (٢٠) پارچێن عەردی ل دەڤەرا (خراب بابکێ) ھاتنە فرۆتن و ھەموو پارچێن عەردی وەک رووبەر دناڤبەر ٢٠٠ ھەتا ٢٥٠ مەتران بووینە، ھەر پارچەکا عەردی ل دووڤ رێژەکا دیار ھاتە فرۆتن کو د ناڤبەرا ٣٠ ھەتا ٤٠ ھزار دولاران ھاتینە فرۆتن.
ناڤبری ئاشکرار کو ئارمانج ژ فرۆتنا ڤان پارچێن عەردی ئەوە وەک داھات بۆ ئەنجامدانا پرۆژێن خزمەت گوزاری ل سەرۆکاتیا باژێرڤانیا زاخۆ بھێتە بکارئینان و ئەڤە نە بۆ جارا ئێکێ یە باژێرڤانیا زاخۆ ڤی کاری دکەت بەلکو چەندین جارێن دی ژی ب ئاشکرا پارچێن عەردی فرۆتنینە.
ئەڤرۆ نیوز، مەحمود نھیلی :
ب به‌رهه‌ڤبوونا به‌رپرسێن میرى و حزبى یێن ده‌ڤه‌رێ رێوره‌سمێن گوهرینا سه‌روك باژێرڤانیێن ناحیێن ( سه‌رسنكێ و شێلادزێ و سه‌نته‌رێ قه‌زا ئامێدیێ و قدشێ) هاتنه گوهورین.
ئه‌ڤرو د چه‌ند رێوره‌سمێن جودا دا ب به‌رهه‌ڤبوونا ئسماعيل مسته‌فا قایمقامێ قه‌زا ئامێدیێ و رێزدار دیار به‌حرى رێڤه‌به‌رێ گشتى یێ باژێرڤانیان ل پارێزگه‌ها دهوكێ و هه‌روه‌سا ب به‌رهه‌ڤبوونا به‌رپرسێن لژنێن ناوچێن سه‌رسنك و ئامێدیێ و شێلادزێ و سیریێ ) سه‌روكێن باژێرڤانیێن (سه‌رسنك و قدشێ و ئامێدیێ و شێلادزێ) هاتنه گوهورین .
ل ده‌مێ گوهورینا وان ژى هه‌ر ژ قایمقامێ قه‌زا ئامێدیێ و رێڤه‌به‌رێ گشتیێ باژێرڤانیان ل پارێزگه‌ها دهوكێ و رێڤه‌به‌رێن ناحیێن سه‌رسنك و شێلادزێ سوپاسى و ده‌ست خوشیا سه‌روك باژێرڤانیێن به‌رێ كرن و داخازا سه‌ركه‌فتنێ ژى بو سه‌روك باژێرڤانیێن نوو خواست، هیڤى ژى خواستن كو سه‌روك باژێرڤانیێن نووى بشێن خزمه‌ته‌كا باشا ده‌ڤه‌رێن خو بكه‌ن و خوه ل گله و گازندێن هاوولاتیان بكه‌نه خودان پشته‌ڤانیا خوژى بو هه‌ر هاریكارى و هه‌ڤكاریه‌كێ نیشاندا ژ پێخه‌مه‌ت خزمه‌تكرنا قه‌زا ئامێدیێ و هاوولاتیێن ده‌ڤه‌رێ .
د ڤان گوھۆرینان دا سه‌رجوون وه‌ك سه‌روكێ نوى یێ باژێرڤانیا سه‌رسنك ل جهێ رێزدار بنیامێن هاته دانان و رێڤینگ وه‌ك سه‌روكێ نوى یێ باژێرڤانیا قدشێ ل جهێ مه‌سعود هاته دانان و ئه‌ڤراز ئامێدى وه‌ك سه‌روكێ نوى یێ باژێرڤانیا ئامێدیێ ل جهێ رەمەزان حەجی هاته دانان و سەربەست وه‌ك سه‌روكێ نوى یێ باژێرڤانیا شێلادزێ ل جهێ هژار هاته دانان .
ئەڤرۆ نیۆز:
بەری دەمەکێ ل هەولێرێ سەرۆک بارزانی ل گەل ریگ پێری وەزیرێ وزێ یێ ئەمریکا د پرێس کۆنفرانسەکێ دا بەحسێ قۆناغەکا نوو د پەیوەندیێن ئەمریکا و کوردستانێ دا کرن.
سەرۆک بارزانی راگەهاند کو قۆناغەکا نوو ل عیراقێ هاتیە پێش و کەیفخوەشیا خوە ل هەمبەر سەرەدانا وەزیرێ وزێ یێ ئەمریکا بۆ هەرێما کوردستانێ دیار کر و راگەهاند مە گەل وەزیرێ وزێ یێ ئەمریکا بەحسێ گەلەک بابەتێن گرنگ کر.
وەزیرێ وزێ یێ ئەمریکا ژی راگەهاند کو سوپاسیا پێشوازیا گەرم یا سەرۆک بارزانی دکەم، و سوپاسیا گەلێ کوردستانێ ژی دکەم، تێگەهشتنەکا دیرۆکی د ناڤبەرا مە و هەرێما کوردستانێ دا هەیە. کۆمبوونا من ل گەل جەنابێ سەرۆکی یا گرنگ بوو. مە دڤێت ئاریشێن هەولێرێ و بەغدایێ ب تەمامی بهێنە چارەکرن.
وەزیرێ وزێ یێ ئەمریکا هەروەسا راگەهاند کو کوردان د شەرێ ل دژی داعشێ دا گەلەک قوربانی داینە و دڤێت رێز ل کوردان بهێتە گرتن و گۆت: ( ئازادیا ئەڤرۆکە ل کوردستانێ ژی بەرهەمێ ڤێ خەبات و قوربانیدانێ یە. ئازادی و ئارامیا ل هەرێما کوردستانێ جهێ دلخوەشیا مە یە).
ئەڤرۆ نیوز:
گۆمرکا ئیبراھیم خەلیل راپۆرتا خوە یا ھەیڤا چریا دویێ ٢٠١٨ بەلاڤکر کو ئاماژێ ب وێ چەندێ دکەت د ھەیڤا بۆری دا ١٨٠ تەن و ٤٦٨ کیلۆ ژ کەرستێن جوراوجور ھاتینە ژناڤبرن.
راگەھاندنا کۆمەلگەھا دەرگەھێ نێڤدەولەتی یێ ئیبراھیم خەلیل د بەلاڤوکەکێ دا، کو دانەک ب دەست ئەڤرۆ نیوز کەفتیە، راگەھاند کو ل دووڤ راپۆرتا لژنا ژناڤبرنێ ل کۆمەلگەھا دەرگەھێ نێڤدەولەتی یێ ئیبراھیم خەلیل ١٨٠ تەن و ٤٦٨ کیلۆ ژ کەرستێن جوراوجور ھاتینە ژناڤبرن ب بەھانەیا وێ چەندێ کو نە ل دووڤ مەرجێن ساخلەمیێ بوون.
ب گۆرەی ڤێ بەلاڤوکێ کەرستێن ھاتینە ژناڤبرن پێکھاتی بوون ژ فێقی، گوشتێ مریشکێ، کەرستێن پاقژکرنێ، پێدڤیێن نوشداری و گەلەک کەرستێن دی.
ھەروەسا ل دووڤ راپۆرتا لژنا ژناڤبرنێ ل کۆمەلگەھا دەرگەھێ نێڤدەولەتی یێ ئیبراھیم خەلیل دایە زانین ژی کو ل ھەیڤا بۆری پێنج ھزار و ٢٣٣ تەن و ٤٢٦ کیلۆ ژ کەرستێن جوراوجۆر ھاتینە ڤەگەراندن ژ بەر کو نە ل دووڤ رێنمای و مەرجێن پێدڤی بوون.
زێدەتری ١٣٩ ھزار کەسان ھەیڤا بۆری ھاتنوچوون ل ئیبراھیم خەلیل کریە
ئەڤرۆ نیوز:
رێڤەبەریا کۆمەلگەھا نێڤدەولەتی یا ئیبراھیم خەلیل راگەھاند کو ل ھەیڤا چریا دویێ ٢٠١٨ پتر ژ ١٣٩ ھزار رێڤینکا ل کومەلگەھا دەرگەھێ نێڤدەولەتیێ ئیبراھیم خەلیل ھاتنوچوون کریە.
ل دووڤ راپۆرتا نڤێسنگەھا ئاکنجیبوون و پاسپۆرتان ل ئیبراھیم خەلیل ١٣٩ ھزار و ٤٨٦ رێڤینگا ل دەرگەھێ ئیبراھیم خەلیل ھاتنوچوون کریە.
ئاشکەرا ژی کریە کو ل دووڤ راپۆرتا نڤیسنگەھا ناڤبری کو دیاربوو ٧٣ ھزار و ٢٣٨ رێڤینگ ھاتینە د ناڤ ھەرێما کوردستانێ دا کو ژ وان ٣٤ ھزار و ٦٢ ھەلگرێن پاسپۆرتێن عیراقینە و ٣٧ ھزار و ٤٧١ ھەلگرێن پاسپۆرتێن تورکی نە، ھەروەسا ھزار و ٧٠٥ ھەلگرێن پاسپۆرتێن بیانی نە.
ل دووڤ راپۆرتا نڤیسنگەھا ناڤبری دیاربوویە، ٦٦ ھزار و ٢٤٨ رێڤینگان ب رێیا دەرگەھێ ئیبراھیم خەلیل چووینە وەلاتێ تورکیا، ژ وان ٢٦ ھزار و ٣٥٩ ھەلگرێن پاسپۆرتێن عیراقینە و ٣٨ ھزار و ١٠٨ ھەلگرێن پاسپۆرتێن تورکی نە و ھزار و ٧٨١ ھەلگرێن پاسپۆرتێن بیانی نە.
ئەڤرۆ نیوز:
بەری دەمەکێ کێم ئەڤرۆ رۆژا سێشەمبی وەزیرێ وزەیا ئەمریکا رێک پێری گەھشتە ھەولێرێ و ژلایێ سەروک بارزانی ڤە ھاتە پێشوازی کرن.
د ڤێ سەرەدانێ دا بریارە وەزیرێ وزەیا ئەمریکا چەند کومبوونێن تایبەت دگەل سەورک بارزانی و نێچیرڤان بارزانی سەروک وەزیرێن ھەرێما کوردستانێ ئەنجام بدەت دەربارەی بابەتێن پەترول و غازا ھەرێما کوردستانێ دیسان دەربارەی چارەنڤیسێ پەترولا کەرکووک ژی دێ گوتوبێژ ھێنە کرن لەورا دھێتە پێشبینی کرن ئەڤ سەرەدانە گرنگیەکا باش بۆ وزەیا ھەرێما کوردستانێ ھەبیت.
دھێتە چاڤەرێ کرن پشتی دەمەکێ دی کونگرەکێ رۆژنامەڤانی ژی بۆ سەروک بارزانی و رێک پێری وەزیرێ وزەیا ئەمریکا بھێتە رێکخستن.
ئەڤرۆ نیوز:
شەڤا بوری چەند کەسێن نە نیاس ب گولەیان تەقە ل بارەگایێ لژنا ناوچا چەمچەمال یا پارتی کریە.
د بەیاننامەکێ دا لژنا ناوچا چەمچەمال یا پارتی راگەھاندیە شەڤا بوری ل دەمژمێر یازدە و نیڤ شەڤ چەند کەسێن نە نیاس ب گولەیان ھێرش کریە سەر بارەگایێ وان و خوش بەختانە چو زیانێن گیانی نەبووینە تنێ یێن مادی ھەبوون لەورا داخواز ژ دەزگایێن ئەمنی یێن دەڤەرێ دکەین ب زووترین دەم تاوانباران دەستەسەر بکەن و رادەستی دادگەھێ بھێنە کرن.
ل ماوێ بوری چەندین جارە ل پارێزگەھا سلێمانیێ و دەڤەرا گەرمیان و راپەرین و ھەلەبچە تەقە ل بارەگایێ پارتی ھاتیە کرن و دەزگایێن ئەمنی ب ئەرکێ خوە یێ پاراستنا بارەگایێن حزبی نەرابوویە و تاوانبار ژی دەستەسەر نەکرینە.
ئه‌ڤرۆ نیوز:
حه‌سه‌ن عه‌تابی یێ نه‌ه سالی، پشتی ژ لایێ مامۆستایێ خوه ڤه دهێته قوتان گیانێ خوه ژ ده‌ست دا.
بابێ حه‌سه‌نی دبێژیت:(پشتی كۆرێ من ژ قوتابخانێ هاتیه مال، بێ هۆش بوو و مه ب له‌ز گه‌هانده نه‌خۆشخانێ، ل نه‌خۆشخانێ گۆته من تشته‌كێ ب هێز یێ ب سه‌رێ وی كه‌فتی).
د ڤێ ده‌ربارێ دا هه‌ڤاله‌كێ حه‌سه‌نی گۆت:(مامۆستایێ مه ب داری ل حه‌سه‌نێ هه‌ڤالێ مه دا و ئێكسه‌ر چاڤێن وی سۆر بوون، دترسیا مامۆستا جاره‌كی دی ژی لێ بده‌ت، له‌ورا هه‌تا ژ پۆلێ ده‌ركه‌فتین یێ بێ ده‌نگ بوو).
كه‌سوكارێن حه‌سه‌نی دبێژن:(ئه‌م دێ سكالایێ ل سه‌ر وی مامۆستای تۆمار كه‌ین و داخوازا مافێ خوه یێ قانوونی كه‌ین).
ئه‌ڤ روودانه ل به‌غدا په‌یدا بوویه و سالانه حاله‌تێن ب ڤی ره‌نگی په‌یدا دبن.
ئه‌ڤرۆ نيوز، نيوار محه‌مه‌د سه‌ليم:
به‌رپرسێ په‌يوه‌نديا ب جه‌ماوه‌رى و راگه‌هاندنێ ل ئوفيسا دهۆك يا كۆمسيۆنا بلندا سه‌ربه‌خۆيا هه‌لبژارتنان ل عيراقێ راگه‌هاند كو نها چه‌كێ پارێ كارمه‌ندێن سه‌ر سندوقێن ده‌نگدانێ گه‌هشتيه هه‌ولێر و ل نێزيك دێ ل سه‌ر وان كارمه‌ندان هێته به‌لاڤكرن.
سه‌گڤان حه‌سه‌ن، به‌رپرسێ په‌يوه‌نديا ب جه‌ماوه‌رى و راگه‌هاندنێ ل ئوفيسا دهۆك يا كۆمسيۆنا بلندا سه‌ربه‌خۆيا هه‌لبژارتنان ل عيراقێ، د داخۆيانيه‌كێ دا بۆ ئه‌ڤرۆ نيوز گۆت: “د ده‌مه‌كێ نێزێك دا دێ پارێ كامه‌ندێن سه‌ر سندوقێن هه‌لبژارتنان هێته به‌لاڤكرن”.
زێده‌تر گۆت: “چه‌كێ به‌نكى گه‌هشتيه هه‌ولێرێ، ناڤێن كارمه‌ندان د ئاماده‌نه و هه‌ماهه‌نگى ژى ل گه‌ل به‌نكان هاتيه كرن. ب تنێ يا ماى رێكارێن قانوونى يێن ناڤبه‌را به‌نكان بهێنه كرن و پاره ژ هه‌ولێر بگه‌هيته دهۆكێ”.
ئاشكه‌را ژى كر كو كۆژمه‌كێ مه‌زنێ پاره‌يه هه‌تا هه‌ماهه‌نگى ب دروستى دهێته كرن و گۆت: “نه‌شێين ژڤانى ب دروستى ئاشكه‌را بكه‌ن، به‌لێ دێ د ده‌مه‌كێ نێزيك دا گه‌هيته پارێزگه‌ها دهۆكێ”.
سه‌گڤان حه‌سه‌ن نه‌ڤه‌شارت كو هه‌ر ده‌ما پاره گه‌هشته دهۆكێ دێ ب رێيا ئه‌ڤرۆ نيوز و ده‌زگه‌هێن راگه‌هادنێ ناڤێن وان و به‌نكێن دێ پاره لێ هێته وه‌رگرتن به‌لاڤ كه‌ن.
ئه‌ڤرۆ نيوز:
وه‌زاره‌تا دارايى و ئابوورى ل حوكمه‌تا هه‌رێما كوردستانێ راگه‌هاند كو مووچێ ئه‌و سێ هه‌يڤێن مايێن يێن ئه‌ڤ ساله نابيته پاشكه‌فت.
د كۆنگره‌كێ رۆژنامه‌ڤانى دا، رێباز حه‌ملان وه‌زيرێ دارايى ل حوكمه‌تا هه‌رێما كوردستانێ سۆپاسيا هه‌موو مووچه‌خوران كر ل سه‌ر بهێن فره‌هيا وان ل هه‌مبه‌ر پاشكه‌فتێ مووچه‌ى و گۆت: “مووچێ سێ هه‌يڤێن ماين يێن فه‌رمانبه‌رێن هه‌رێما كوردستانێ نابيته پاشكه‌فت”.
زێده‌تر ژى گۆت: “نها نزانين كا چه‌ند پارێ فه‌رمانبه‌ران ل سه‌ر حوكمه‌تێ يه ژ به‌ر كو هه‌يڤانه ئه‌ڤ پاره زێده دبيت، به‌لێ حوكمه‌تا هه‌رێما كوردستانێ يا پابه‌نده ل هه‌مبه‌ر دانا وى كۆژمێ پاره‌ى”.
ئاشكه‌را ژى كر كو حوكمه‌تا هه‌رێما كوردستانێ دێ يا به‌رده‌وام بيت ل سه‌ر دانا پارێ به‌لێنده‌ران.
نيشاندان