ئه‌ڤرۆنيوز:
دادگه‌ها كارگێرى ل عيراقێ ئه‌ڤرۆ دوشه‌مبى 17/12/2018 برياره‌ك ل دۆر هه‌لوه‌شاندنا برياره‌كا سه‌رۆك وه‌زيرێن به‌رێ يێ عيراقێ حه‌يده‌ر عه‌بادى ده‌ركر ول دووڤ وێ بريارێ فالح فه‌ياز بۆ پۆستێن خوه يێن به‌رێ هاته زڤراندن.
دادگه‌ها كارگێرى يا عيراقى برياره‌كا حه‌يده‌ر عه‌بادى سه‌رۆك وه‌زيرێن به‌رێ يێ عيراقێ ره‌تكر كو ل دژى فالح فه‌ياز سه‌رۆكێ ده‌سته‌يا حه‌شدا شه‌عبى ده‌ركربوو.
دادگه‌ها ناڤبرى دبرياره‌كا دادوه‌رى دا راگه‌هاند كو بريارا عه‌بادى يا ل دۆر لادانا فالح فه‌ياز ژپۆستێ سه‌رۆكاتيا ده‌سته‌يا حه‌شدا شه‌عبى برياره‌كا هه‌لوه‌شيايه.
نڤيسينگه‌ها فالح فه‌ياز كوپيه‌كا بريارا دادگه‌هێ به‌لاڤكر وتێدا دياردبيت كو فالح فه‌ياز هه‌رسێ پۆستێن خوه يێن به‌رێ وه‌رگرتن ئه‌وژى سه‌رۆكاتيا ده‌سته‌يا حه‌شدا شه‌عبى وشيره‌تكارێ ئاسايشا نيشتمانى يا عيراقێ وسه‌رۆكێ ده‌زگه‌هێ ئاسايشا نيشتمانى.
ئەڤرۆ نیۆز، ئەمیر ئەترووشی
بەنکا رافیدەین یا عیراقێ بریار دایە ل سالا نوو یا ٢٠١٩ دەست ب دانا پێشینا خانوبەران ب کۆژمێ ٧٥ ملیۆن بکەن و ھەر پارێزگەھەکا لقێ بەنکا رافیدەین لێ ھەبیت، وەلاتیێن وێ پارێزگەھێ مافێ وەرگرتنا پێشینا ٧٥ ملیۆنی ھەیە. مەلایەک ژی دیار دکەت کو ئەگەر زێدەھی وەکو فایدە بچیتە سەر وی پارەی، دێ بیتە ریبا و حەرام و ب پارەکێ حەلال ناھێتە دیتن.
د. ئەحمەد سەفار، ئەندامێ جڤاتا نوونەرێن عیراقێ بۆ ئەڤرۆ نیۆز دیار کر، بەنکا رافیدەین یا عیراقێ بریار دایە ل ھەموو لقێن خوە یێن بانکا رافیدەین ل پارێزگەھێن عیراقێ دەست ب دانا پێشینەیەکا خانوبەران ب کوژمێ ٧٥ ملیۆن دیناران بۆ ھەر سەرۆک خێزانەکی بھێتە دان و ھەر ھەیڤەکێ دێ نێزیکی ١٠٠ ھزار دیناران ژ ھەر مفادارەکی ھێتە وەرگرتن و گۆت: د ماوێ ڤان ١٥ سالان دا دێ زێدەھی ژی چیتە سەر وی ٧٥ ملیۆن دیناری، بەلێ ھێشتا بەنکا رافیدەین دیار نەکریە کا ئەو زێدەھی بۆ ھەر سالەکێ چەندە و من زانیاری ژی ل سەر نینن کا حەلالی و حەرامی تێدا ھەیە یان نە.
مەلا جیھاد بێسکفی، ئەندامێ پەرلەمانێ کوردستانێ بۆ ئەڤرۆ نیۆز دیار کر، ئەڤ سوحبەتا پێشینا خانوبەران دکەڤیتە بەر مەسەلا قەری ڤە، ئەڤ بانکە نە یا حکوومی یە و بانکەکا ئەھلی یە و ئەو پێشینا ئەو ددەنە خەلکی یان فەرمانبەران پێدڤیە زێدەھی نەھێتە وەرگرتن و ئەگەر بھێتە وەرگرتن ژی و نە مەسەلا رسۆماتان بیت، ئەو پارە ب حەلالی ناھێتە ھژمارتن و دێ ب حەرام ھێتە ل قەلەم دان.
بێسفکی تەکەست ژی کر کو ھەر پارەکێ ل جھەکی ببیتە دەین، پێدڤیە ھەمان پارە و ب ھەمان کۆژمە بھێتە ڤەگەراندن، دا کو نەبیتە ریبا و حەرامی و ھەر دینارەکا زێدەھی بچیتە سەر حەلالی نامینیت و گۆت: ئەگەر ئەڤ بانکە روونکرنەکێ بدەتە لیژنا فەتوایێ و رێنمایێن خوە دیاربکەت کا دێ ب چو شێواز وان پارا دەت یان ژی چو پارە ناھێتە زێدەکرن و ب تنێ دێ رسۆماتێن بانکی ھێنە وەرگرتن، ل وی دەمی نابیتە حەرامی، بەلێ ئەگەر ببیتە مەسەلا بازرگانی و زێدەھیا ھەیڤانە یان سالانە بچیتە سەر، حەلالی تێدا نامینیت.
ئەڤرۆ نیوز:
ئەڤرۆکە سەرۆک بارزانی ل گەل نوونەرێ تایبەت یێ سەرۆکێ ئەمریکا بۆ شەرێ ل دژی داعشێ بریت ماکگورک کۆمبوو و د کۆمبوونێ دا بەحسێ رەوشا سووریێ و گوهۆرینێن ل دەڤەرێ هاتە کرن و هەروەسا رەوشا عیراقێ و پەیوەندیێن د ناڤبەرا هەولێرێ و بەغدایێ ژی تەوەرەکا دی یا کۆمبوونا سەرۆک بارزانی ل گەل بریت ماکگورکی بوو.
سەرۆک بارزانی د کۆمبوونێ دا دلگرانیا خوە ل دۆر رەوشا نها یا سووریێ و رۆژئاڤایێ کوردستانێ گەهاندە نوونەرێ ئەمریکا و داخوازا چارەسەریا ئالۆزیان کر.
د کۆمبوونێ دا بالیۆزێ ئەمریکا ل بەغدا دۆگلاس سلێمان و شاندەکێ دی ژی ل گەل بریت ماکگورک د کۆمبوونێ دا بەرهەڤ بوون.
ئەڤرۆ نیوز، نەوزاد ھلۆری:
ب مەرەما بلند راکرنا رۆژا ئالایێ کوردستانێ، دەزگەھێ پاراستنا ئالایێ کوردستانێ ب ھەڤکاری ل گەل لقێ ١٨ێ پارتی و دام و دەزگەھێن حوکمی، رابوو ب ساخکرنا رۆژا ئالایێ کوردستانێ ل ھەموو دەڤەرا ئامێدیێ، ب تایبەتی ل سەنتەرێ ناحیا شێلادزێ.
چالاکیێن رۆژا ئالایێ کوردستانێ ل شێلادزێ ب بلندکرنا ئالایێ کوردستانێ ل دەستپێکا جوتسایدێ شێلادزێ دەست پێ کر، ب ئەنجام دانا چەند ستران و دیلانان دوماھی ھات.
ئەڤرۆ نیوز:
بەری دەمەکێ کێم ل باژێرێ نینون یێ سویسری پشککێشانا قوناغا شازدێ یا قارەمانیا ئوروپا قارەمانێن خولان ھاتنە راکێشان بۆ وان یانێن دەربازی ڤێ قوناغێ بوین ئەوێن دێ ل ١٣ ھەیڤا شوباتا سالا بھێت دێ ھێنە کرن و ئەنجامێن ڤێ پشککێشانێ ژی ب ڤی رەنگی بوون.
بورسیا دورتموند VS توتنھام یا ئنگلیزی
مانچستەر ستی VS شالکە یا ئەلمانی
مانچستەر یونایتد VS پاریس سان جێرمان
ئەتلەتیکو مەدرید ئسپانی VS یوڤانتوس یا ئیتالی
ئولومپیک لیون فرەنسی VS بەرشەلونا یا ئسپانی
روما یا ئیتالی VS پورتو یا پرتوگالی
ئەیاکس ئەمستردام ھولەندیVS ریال مەدرید یا ئسپانی
لیڤەرپول یا ئنگلیزی VS بایرن میونخ
ئه‌ڤرۆ نيوز، په‌يامنێران:
ئه‌ڤرۆ رۆژا ئالايێ كوردستانێ 17ى كانوونا ئێكێ ل سه‌رانسه‌رى هه‌رێما كوردستانێ و پارێزگه‌ها دهۆكێ ژى ب چالاكيێن جودا هاته ساخكرن.
ل سه‌نته‌رێ پارێزگه‌ها دهۆكێ چالاكى ب ل قوتابخانه بژاره ب ره‌نگه‌كێ فه‌رمى ب رێڤه چوو و رێڤه‌به‌رێ گشتى يێ په‌روه‌ردا پارێزگه‌ها دهۆكێ راگه‌هاند كو ل هه‌موو قوتابخانێن سنورێ پارێزگه‌ها دهۆكێ ئه‌ڤ رۆژه دهێته ساخكرن.
ژ لايه‌كێ دى ڤه ل پاركا بارزانى ژى ئه‌ڤ رۆژه ژ لايێ ده‌زگه‌هێ گشتى يێ پاراستنا ئالايێ كوردستانێ هاته ساخكرن ب بلندكرنا ئالايێ كوردستانێ ل ناڤ پاركێ.
ل ئامێديێ ژى په‌يامنێرێ ئه‌ڤرۆ نيوز، مه‌حمود نهێلى ئاشكه‌را كر كو ل سەنتەرێ قەزا ئامیدیێ و تەڤایا ناحیە و کومەلگەھێن سەر ب قەزا ناڤھاتی ڤە رێ و رەسمێن بلندکرنا ئالایێ کوردستانێ ھاتنە سازکرن.
ژ لايه‌كێ دى ڤه ل شێخان ژى په‌يامنێرێ ئه‌ڤرۆ نيوز بارزان مزوورى ئاشكه‌را كر كو ئه‌ڤ چالاكيه ل وێرێ ژى ب ئاماده‌بوونا ژماره‌كا وه‌لاتيان و به‌رپرسێن حزبى و حكومى هاته ساخكرن.
هه‌ر وه‌سان ل ده‌ڤه‌را كانى ماسێ ژى په‌يامنێرێ ئه‌ڤرۆ نيوز زنار تۆڤى ئاشكه‌را كر كو ل وێرێ ژى ب ئاماده‌بوونا ژماره‌كا زۆر يا وه‌لاتيان ئه‌ڤ چالاكيه هاته ساخكرن.
ل ئاكرێ هه‌ر وه‌كو په‌يامنێرێ ئه‌ڤرۆ نيوز سه‌باح زوهێر دايه زانين ئه‌ڤ چالاكيه ل قوتابخانه‌كا وێ قه‌زايێ ب رێڤه چوو.
په‌يامنێرێ دى يێ ئه‌ڤرۆ نيوز ل ئاكرێ ره‌مه‌زان هه‌رنى ژى ژماره‌كا وێنێن چالاكيه‌كێ ل قوتابخانا ئازادى يا كچان كو ب هه‌لكه‌فتا رۆژا ئالايى هاتبوو رێكخستن به‌رچاڤ دكه‌ت.
ئەڤرۆ نیوز، نەوزاد ھلۆری:
ئەڤرۆ ب ھەلکەفتا رۆژا ئالایێ کوردستانێ ھژمارەکا چیاڤانێن دەڤەرا بارزان قەستا چیایێ شیرین کر و ل بندترین گوپیتکا وی چیایی ئالایێ کوردستانێ بلند کر.
عەلی زوبێر، ئێکە ژ ئەندامێن ئەوی گرۆپی بۆ ئەڤرۆ نیوز گۆت: (ب ھەلکەفتا روژا ئالایێ کوردستانێ مە چەند گەنجەکێن دەڤەرا بارزان ب فەر دیت کو گەشتەکا چیایی بکەین و ل بلندترین گوپیتکا چیایێ شیرینێ ئالایێ کوردستانێ بلند بکەین).
زێدەتر گۆت: (مەرەما مە یا سەرەکی ئەو بوویە کو ئالایێ کوردستانێ ژ ھەر تشتی بلندترە و پێدڤی یە زێدە رێز لێ بھێتە گرتن، چونکو ب ھزاران خەلکێ کوردستان و پێشمەرگەی خوینا خوە ل بو رێتيه).
ئه‌ڤرۆ نيوز:
كۆمبوونا مه‌كته‌با سياسى يا ئێكه‌تى نشتيمانى كوردستان ب سه‌رۆكاتيا كوسره‌ت ره‌سۆل جێگرێ سكرتێرێ گشتى يێ ئێكه‌تيێ ده‌ستپێكر.
ب گۆره‌ى ئه‌و پێزانينێن ل به‌ر ده‌ست، د كۆمبوونا ئه‌ڤرۆ يا مه‌كته‌با سياسى يا ئێكه‌تيێ دا پرسێن پێكئينانا كابينا نوو يا حوكمه‌تا هه‌رێما كوردستانێ و ته‌مامكرنا كابينا نوو يا حوكمه‌تا عيراقێ گه‌نگه‌شه كه‌ن.
11ى ڤێ هه‌يڤێ شاندێ بلندێ مه‌كته‌با سياسى يا ئێكه‌تى نشتيمانى كوردستان و پارتى ديموكراتى كوردستان كۆمبوون و پشتى كۆمبوونێ د راگه‌هاندنه‌كێ دا، ل سه‌ر چار خالان گه‌هشتبوو رێكه‌فتنه‌كێ.
ئه‌ڤرۆ نيوز، نيوار محه‌مه‌د سه‌ليم:
ئه‌ندامه‌كێ جڤاتا نوونه‌رێن عيراقێ راگه‌هاند كو نه‌بوونا ئێك رێزيا ناڤ مالا كوردى بوويه ئه‌گه‌رێ وێ چه‌ندێ كو چه‌ندين پۆستێن گرنگ ل به‌غدا ژ ده‌ست بده‌ين و ب تايبه‌ت ژى ب ده‌ست ڤه ئينانا وه‌زاره‌ته‌كێ و لژنه‌كا هه‌رده‌مى يا جڤاتا نوونه‌ران.
د. ديار ته‌يب، ئه‌ندامێ جڤاتا نوونه‌رێن عيراقێ ل سه‌ر فراكسيۆنا پارتى ديموكراتى كوردستان راگه‌هاند كو ژ ئه‌گه‌رێ نه‌بوونا ئێك رێزيا ناڤ مالا كوردى، كودان چه‌ندين پۆستێن گرنگ ژ ده‌ست داينه.
زێده‌تر گۆت: “هه‌كه هه‌موو ليستێن كوردى ل به‌غدا دبن ئێك فراكسيۆن دابانه دا ب هێزه‌كا گه‌له‌ك باشتر ل جڤاتا نوونه‌ران بن و دا شێن وه‌زاره‌ته‌كا دى و لژنه‌كا هه‌رده‌مى يا جڤاتا نوونه‌ران ل گه‌ل چه‌ندين پۆستێن دى ب ده‌ست خوه ڤه بينن”.
ئاشكه‌را ژى كر كو نها وه‌كو دو به‌ره‌يێن سه‌ره‌كى دهێنه ته‌ماشه‌كرن، پارتى ديموكراتى كوردستان ل لايه‌كى و ئێكه‌تى نشتيمانى كوردستان ل لايه‌كێ دى و گۆت: “لايه‌نێن شيعى ژى دڤێت به‌لانسه‌كى چێكه‌ن و هه‌موو پۆست ب ئێك لايه‌ن نه‌هێنه دان، دا كو هه‌ڤركى د ناڤبه‌را وان هه‌بيت و نه‌شێن گڤاشتنێ ل سه‌ر وان چێكه‌ن”.
نيشاندان