ئه‌ڤرۆ نيوز:
ل ماله‌كێ ل چه‌مچه‌مال ئاگر به‌ربوو ماله‌كێ و د ئه‌نجام دا، حه‌فت كه‌سان گيانێ خوه ژ ده‌ست دا.
رێڤه‌به‌رێ پۆليسێن چه‌مچه‌مال راگه‌هاند كو ل ماله‌كێ ل چه‌مچه‌مال ئاگر به‌ربوو ماله‌كێ و د ئه‌نجام دا، حه‌فت كه‌سان گيانێ خوه ژ ده‌ست دا.
ئاماژه ب وێ چه‌ندێ ژى كر كو ئه‌ڤ خێزانه عه‌ره‌بن و هه‌موو د ژووره‌كێ ڤه نڤست بوون و هه‌موو ژى هاتينه سۆتن و پێكڤه گيانێ خوه ژ ده‌ست دايه.
ئەڤرۆ نیۆز، سالار دۆسکی:
ئەندامەکا جڤاتا نوونه‌رێن عيراقێ ل فراکسیۆنا پارتی دیموکراتی کوردستان ل قەزا زاخۆ سوازا خوە یا بانگەشا ھەلبژارتنان ب جهـ ئیا و نیڤا مووچێ خوە ل سەر خێزانێن کێم دەرمەت بەلاڤەکر.
وه‌سفیا شێخو، ئەنداما جڤاتا نوونه‌رێن عیراقێ ل سه‌ر فراکسیۆنا پارتی دیموکراتی کوردستان بۆ ئەڤرۆ نیۆز گۆت: “ل بانگەشا ھەلبژارتنان مە سوز دابوو خەلکێ خوە کو ھەیڤانە نیڤا مووچێ خوە ل سەر کەسانێن ھەژار و دەست کورت و پێدڤی بەلاڤە بکەین و ئەڤە مە دو مووچە وەرگرتن و ھەر ھەیڤێ ئەز دێ دو ملیۆن و نیڤان ل سەر ھەژار و دەست کورتان و کەسێن پێدڤی و ھەر جار تەخەکێ بەلاڤ کەم و دێ بەردەوام بم ل ھەر چار سالان”.
وەسفیایێ گۆتژی : “ئەڤە نە منەتەکە ل گەل خەلکێ خوە دکەم، بەلکو نوونەرا خەلکی مە دێ بەردەوام بم ژ بەرەڤانیکرنێ ژ خەلکێ خوە و وەرگرتنا مافێن خەلکێ کوردستانێ ل جڤاتا نوونه‌ران”.
ئه‌ڤرۆ نيوز:
چه‌كدارێن داعش ل خانه‌قين هێرش كره سه‌ر پۆليسێن فيدرال و چار پۆليس و ئه‌فسه‌ره‌كێ پۆليسێن فيدرال كوشتن.
ژێده‌ره‌كێ ئه‌منى ل خانه‌قين راگه‌هاند: ئه‌ڤا بۆرى چه‌كدارێن داعش هێرش كره سه‌ر خاله‌كا پشكنينا پۆليسێن فيدرال يێن عيراقێ ل باشوورێ خانه‌قين، پاشان هێزه‌كا پۆليسێن فيدرال د هه‌وارا وێ هێزێ چوون.
ئه‌وى ژێده‌رى راگه‌هاند ژى ل ده‌مێ هێرشێ دا، بۆمبه‌ك ب هه‌ره‌مه‌كى ب پۆليسان ڤه په‌قى و د ئه‌نجام دا موقه‌دم فه‌يسه‌ل كه‌ره‌وى و چار پۆليس هاتنه كوشتن
ژێده‌رى گۆت: “چه‌كدارێن داعش ژ چار لايان ڤه هێرش كره سه‌ر پۆليسان، پاشان هێزه‌كا زۆر يا پۆليس و سۆپايى گه‌هشتنه ده‌ڤه‌رێ”.
ئه‌ڤرۆنيوز:
په‌رله‌مانتاره‌كێ پارتى ديموكراتى كوردستان ل په‌رله‌مانێ عيراقێ مووچێ خوه يێ هه‌ر چار سالێن په‌رله‌مانتاريێ دبه‌خشيته رێكخراوه‌كێ.
نه‌هرۆ مه‌حموود قادر، ئه‌ندامێ په‌رله‌مانێ عيراقێ ژ فراكسيۆنا پارتى ديموكراتى كوردستان، د راگه‌هاندنه‌كێ دا ئاماژێ ب بجهئينانا سۆزه‌كا خوه دده‌ت ل ده‌مێ بانگه‌شاهه‌لبژارتنان داى ودبێژيت” ل ده‌مێ بانگه‌شا هه‌لبژارتنێن په‌رله‌مانێ عيراقێ ، ل دادنڤيسا هه‌ولێرێ من سۆزنامه‌ك پركربوو هه‌كه باوه‌ريا ده‌نگده‌ران ب ده‌ستڤه‌بينم، دێ هه‌موو مووچێ خوه به‌خشم، له‌وما من ئه‌ڤ كاره كر”.
دياركر ژى” من سه‌ره‌دانا ده‌زگه‌هێ بارزانى يێ خێرخوازى كر ول گه‌ل موسا ئه‌حمه‌د سه‌رۆكێ ده‌زگه‌هى روونشتم وپشتى دانوستاندنێ ل سه‌ر چاوانيا به‌خشينا مووچێ خوه وب به‌رهه‌ڤبوونا سه‌رۆكێ كۆمه‌لا تالاسيميا هه‌ولێرێ، من ئيمزا ل سه‌ر به‌خشينا مووچێ خوه يێ هه‌ر چار سالێن په‌رله‌مانتاريێ بۆ وان كر”.
ئەڤرۆنیۆز، سالار دۆسكی:
كچەكا 17 سالی ل باخچێ گیانەوەرێن دهۆكێ ل گەل كارمەندەكێ باخچەی دچیتە د ژۆرا شێری ڤە، بەلێ شێر هێرشێ دكەتە سەر و 30 برینان ل سەر لەشێ وێ دكەت، بەلێ مەترسیا مرنێ ل سەر نینە.
عەبدولرەزاق ئێمینكی، بەرپرسێ پشكا ساخلەمیا ئاژەلی ل رێڤەبەریا ڤێتێرنەریا دهۆكێ، بۆ ئەڤرۆنیۆز گۆت” كچەكا 17 سالی سەره‌دانا باخچێگیانەوەران ل دهۆكێ كربوو، ژ راهێنەرێ باخچه‌ى خواست بوو ل گەل بچیتە دژۆرا شێری ڤە و پشتی ل گەل چوی، شێری هێرش كریێ وبرینداربوویە”.
گۆت ژى” ئەڤرۆ رۆژا دووشەمبی 19/11/2018، سێ كچێن سنێلە سەره‌دانا باخچێ گیانەوەران كر، ئێك ژوان كچا كو ژيێ وێ 17 سال بوون داخواز ژ راهێنه‌رێ باخچێ گیانەوەران كربوو كو ل گەل بچیتە ژۆرا شێری ڤە وێنه‌كی ل گەل شێری بگریت، ل گەل چوونا وێ بۆ ژۆرا شێری هێرش كرێ و بریندار دبیت و دهێتە رەوانەكرن بۆ نەخوه‌شخانا تەنگاڤیان”.
ئەو ژی ئاشكراكر كو ئەڤ راهێنەرە سەره‌دانا ژۆرێن هەموو گیانەوەران دكەت و بوویە هەڤالێ وان ،به‌لێ ئەڤ كچە بۆ شێری يا نياس نه‌بوو، ل گەل روودانێ هەموو كرێكارێن باخچه‌ى قەستا ژۆرا شێری كرینە و كچ ژ دەستا ئینایە دەر”.
ژێدەرەكی ل نەخوه‌شخانا تەنگاڤیان بۆ ئەڤرۆ نیۆز ئاشكراكر كو 30 برین ل لەشێ كچێ هەنە و برین ل سەر و چاڤ و حەفك و سنگێ وێ بووینە، بەلێ پشتی هەموو پشكنین و تیشك بۆ هاتینە كرن، دیار بوو كو چو مەترسی ل سەر ژیانا وێ نینن و چو هەستی نە شكەست بوون و چو خوین بەربوون ژى بۆ پەیدا نەبوویە و نوكە رەوشا ساخلەمیا وێ یا باشە .
ئه‌ڤرۆنيوز:
وه‌زيرێ دارايى ل عيراقێ راگه‌هاند، ددانوستاندنێن ل دۆر پرۆژه بودجا عيراقێ بۆ سالا 2019 دناڤبه‌را شاندێ هه‌رێما كوردستانێ وپه‌رله‌مان وه‌زيرێن عيراقێ پێشكه‌فتنه‌كا باش ب ده‌ستڤه هاتيه.
فوئاد حسێن، جێگرێ سه‌رۆك وه‌زيرێن عيراقێ بۆ كاروبارێن ئابوورى ووه‌زيرێ دارايى ل سه‌ر به‌رپه‌رێ خوه ل تۆرا جڤاكى يا تويته‌رى به‌لاڤكر” ل ڤێ دووماهيێ به‌رهه‌ڤى چه‌ندين كۆمبوونان ل گه‌ل چه‌ندين كه‌سايه‌تيان بووم ژوان سه‌رۆك وه‌زيران عادل عه‌بدولمه‌هدى، په‌رله‌مانتار ووه‌زير وشاندێ هه‌رێما كوردستانێ ولايه‌نێ دى بۆ دانوستاندنێ ل دۆر پرۆژێ قانوونا بودجێ 2019″.
گۆت ژى” ددانوستاندنان دا پێشكه‌فتنه‌كا باش ب ده‌ستڤه هاتيه، خوه‌شحالم بێژم ئه‌م گه‌له‌ك يێن نێزيك بووين كو پرۆژه قانوونا بودجێ پێشكێشى په‌رله‌مانى بكه‌ين”.
ئه‌ڤرۆ نیوز:
ب هه‌لكه‌فتا ژ دایكبوونا پێغه‌مبه‌رێ ئیسلامى، سه‌رۆك بارزانی په‌یامه‌كا پیرۆزباهییێ به‌لاڤ كر و راگه‌هاند؛ ژ دایكبوونا پێغه‌مبه‌رى ئه‌گه‌را مۆكمكرنا پێكڤه‌ژیان و برایه‌تی و لێبۆرینێ یه.
د په‌یامه‌كێ دا سه‌رۆك مه‌سعود بارزانی دیار كریه: ب هه‌لكه‌فتا ژ دایكوونا پێغه‌مبه‌رێ ئیسلامێ، پیرۆزباهی ل هه‌موو مۆسلمانێن جیهانێ ب گشتی و یێن كوردستانێ ب تایبه‌ت دكه‌م، هیڤیخوازم، ئه‌ڤ هه‌لكه‌فته ببیته ئه‌گه‌ره‌كا دی یا مۆكمكرنا په‌یاما ئاشتی و برایه‌تیێ و پێكڤه‌ژیانێ.
سه‌رۆك بارزانی هیڤى ژى خواستییه، كو ئه‌ڤ هه‌لكه‌فته ده‌رگه‌هێ خێر و خوشی و به‌ره‌كه‌تێ بۆ گه‌لێ كوردستانێ و ده‌ڤه‌رێ ب گشتی ڤه‌كه‌ت و ببیته ئه‌گه‌را ب داویهاتنا سته‌م و تۆندوتیژییێ.
ئه‌ڤرۆ نیوز:
چالاكڤانه‌كێ جڤاكى سڤیل ل به‌غدا بۆ ئه‌ڤرۆنیوز دیاركر كو ئه‌ڤرۆ دوشه‌مبى 19/11/2018 رۆژا جیهانى یا زه‌لامایه ودبیت پتریا زه‌لامان نزانن كو وان ژى رۆژه‌كا جیهانى یا تایبه‌ت یا هه‌ى.
محه‌مه‌د هیلال، چالاكڤانێ جڤاكێ سڤیل ل به‌غدا بۆ ئه‌ڤرۆنیوز دیاركر” سالانه ئه‌م هژماره‌كا هه‌ڤالان ب هه‌لكه‌فتا رۆژا جیهانى یا زه‌لامان ئاهه‌نگه‌كێ رێك دئێخن وئه‌م دخوازین ده‌زگه‌هێن راگه‌هاندنێ پتر گرنگیێ بده‌نه ڤێ رۆژى”.
هیلال گۆت ژى” سه‌ره‌راى كو چه‌ندین ساله رۆژا جیهانى یا زه‌لامان یا هه‌ى، به‌لێ گه‌له‌ك كه‌س ب تایبه‌تى زه‌لام یێن هه‌ین كو نزانن ئه‌ڤ رۆژا جیهانى یا هه‌ى، هنده‌ك ژى دبینن كو هه‌بوونا رۆژا جیهانى یا زه‌لامان تنێ ژبه‌ر وێ چه‌ندێ یه كو رۆژا جیهانى یا ژنان یا هه‌ى ئه‌وژى سالانه ل 8 ئادارێ یه”.
نيشاندان