ئه‌ڤرۆ نيوز، نيوار محه‌مه‌د سه‌ليم:

ئاخفتنكه‌رێ ب ناڤێ كۆمه‌لا ئيسلامى راگه‌هاند كو ئه‌و دێ د ڤان چار سالێن بهێت دا ب ره‌نگه‌كێ به‌رچاڤ كار كه‌ن چو وه‌كو ئۆپۆزسيۆن يان ژى وه‌كو حوكمه‌ت، به‌لێ هێشتا چو بڕيار نه‌هاتينه‌ دان.

رێبوار حه‌مه‌، ئاخفتنكه‌رێ ب ناڤێ كۆمه‌لا ئيسلامى، د داخۆيانيه‌كێ دا بۆ ئه‌ڤرۆ نيوز گۆت: “پشكداريكرن و نه‌كرن د حوكمه‌تا نوو يا هه‌رێما كوردستانێ دا، گرێدايى بڕيار و به‌رنامه‌ و كارێ حوكمه‌تێ نه‌ و كا چاوان دێ ل گه‌ل بۆچوونێن كۆمه‌لا ئيسلامى گۆنجن”.

زێده‌تر گۆت: “ژ به‌ر هندێ ژى هێشتا مه‌ وه‌كو كۆمه‌لا ئيسلامى بڕيار ل سه‌ر پشكداريكرن يان ژى پێشكدارينه‌كرن د حوكمه‌تێ دا نه‌دايه‌”.

ئاخفتنكه‌رێ ب ناڤێ كۆمه‌لا ئيسلامى ته‌كست ل سه‌ر وێ چه‌ندێ ژى كر كو بڕيار نه‌دانا هه‌تا نوكه‌ چو په‌يوه‌ندى ب پشكداريكرن يان نه‌كرنا گۆڕان ڤه‌ نينه‌ و گۆت: “كۆمه‌لا ئيسلامى ب ته‌مامى يا سه‌ربه‌خۆيه‌ د بڕيار دانێ دا، دبيت هنده‌ك بۆچوونێن نێزيك گۆڕان هه‌بن، به‌لێ ئه‌ڤه‌ هندێ ناگه‌هينيت كو بڕيارێن مه‌ گرێدايى بڕيارێن وانن”.

نه‌ڤه‌شارت ژى كو هێشتا چو ژ ئێكه‌تى و گۆڕان ئه‌و ئاگه‌هدار نه‌كرينه‌ كا دێ كه‌نگى سه‌ره‌دانا وان كه‌ن و وان ب خوه‌ ژى چو پێزانين ل سه‌ر ڤى بابه‌تى نينن.

ده‌رباره‌يى وێ چه‌ندێ كو هه‌كه‌ گۆڕان پشكداريێ د حوكمه‌تێ دا نه‌كه‌ت، ئۆپۆزسيۆنه‌كا ب هێز و كارا نابيت ب حوكمێ وێ چه‌ندێ كو دێ كورسيێن وان د كێم بن، رێبوار حه‌مه‌ گۆت: “هه‌ر پارتيه‌كا سياسى هێز و قه‌بارێ خوه‌ يێ هه‌يى”.

ده‌رباره‌يى وه‌رگرتنا پۆستێن سه‌روه‌ريێ هه‌كه‌ هات و پشكدارى حوكمه‌تێ بوون، ئاخفتنكه‌رێ ب ناڤێ كۆمه‌لا ئيسلامى گۆت: “هه‌كه‌ بووينه‌ ئۆپۆزسيۆن، دێ ئۆپۆزسيۆنه‌كا كارا بين و هه‌كه‌ پشكدار ژى نه‌بووين دێ د حوكمه‌تێ دا د كارا بين و هه‌ڤپشكێن حوكمه‌تێ بين و ده‌ستكه‌فتێن خوه‌ ژى وه‌رگرين”.

ئه‌ڤرۆ نيوز، نيوار محه‌مه‌د سه‌ليم:

به‌رپرسێ به‌ره‌يێ توركمانى ل هه‌رێما كوردستانێ راگه‌هاند كو ئه‌و داخوازا ئێك ژ پۆستێن سه‌روه‌ريێ ل هه‌رێما كوردستانێ دكه‌ن ل گه‌ل ئێك ژ وه‌زاره‌تێن سه‌روه‌ريێ يان ژى يا خزمه‌تگۆزارى.

ئايدن مه‌عروف، به‌رپرسێ به‌ره‌يێ توركمانى ل هه‌رێما كوردستانێ، بۆ ئه‌ڤرۆ نيوز گۆت: “ده‌نگۆيه‌ك هه‌يه‌ كو دێ سه‌رۆكێ وه‌زيران و سه‌رۆكێ په‌رله‌مانى دو جێگر هه‌بن، هه‌كه‌ هات و ئه‌ڤ بڕياره‌ كه‌فته‌ كارى ل وى ده‌مى پێدڤيه‌ جێگره‌كێ سه‌رۆك وه‌زيران بۆ توركمانان بيت”.

زێده‌تر گۆت: “هه‌كه‌ ئه‌ڤ بڕياره‌ بجهـ نه‌هات و هه‌ر وه‌كو به‌رى نوكه‌ مان، پێدڤيه‌ پۆستێ جێگرێ سه‌رۆكێ په‌رله‌مانێ كوردستانێ بۆ پێكهاتێ توركمانان بيت”.

دا زانين ژى كو د كابينا حوكمه‌تێ ژى دا پێدڤيه‌ توركمان د كابينێ دا هه‌بن و وه‌زاره‌ته‌كا سه‌روه‌ريێ يان ژى ئێكا خزمه‌تگۆزاريێ ب پێكهاتێ توركمانان بهێته‌ دان.

دھۆک، لەزگین جوقی

سەرۆکێ جڤاتا پارێزگەھا دھۆکێ د پرێس کونفرانسەکێ رۆژنامەڤانی دا دیارکر کو ئەڤرۆ ‏کۆمبوونەکا نە ئاسایی ل جڤاتێ ھاتە ئەنجامدان ل سەر ب سەرڤەچوونا ماوه‌یێ قانوونى یێ ‏جڤاتێ، ئەم دێ بەردەوام بين بۆ دووڤچوونا کاروبارێن وەلاتیێن خوە دێ شولێ خوە ئەنجام دەين ‏بێی ئەم بڕیارا دەربێخين، چاڤەرێینە پەرلەمانێ کوردستانێ ھەر چ زوويه‌ ڤێ رەوشا ئالوز یا ‏جڤاتێن پارێزگەھان چارەسەر بکەت. کارەکێ ب زەحمەت نینە جڤاتا وەزیران چارەسەر بکەت ‏ھەتا ھەلبژارتنێن بھێت ژی وەخت بھێت رەنگە وەختەکێ درێژ بیت لەورا ئەم دخوازین ئەڤ ‏رەوشا نوکە یا جڤاتێن پارێزگەھان بھێتە درێژکرن.‏

فەھیم عه‌بدولا حه‌مۆ سەرۆکێ جڤاتا پارێزگەھا دھۆکێ د پرێس کونفرانسەکێ رۆژنامەڤانی ‏دا ئاشکەرا کر کو ئەو ل گەل ھەڤال وھەڤکارێن خوە ل جڤاتا پارێزگەھێ رێکەفتى نه‌ کو ب ‏بەردەوامیێ بده‌ینە کارێ خوە و دووڤچوونا ئاریشە و گازندێن خەلکێ خوە بکەين ھەتا ‏چارەسەریەک بۆ ڤێ رەوشێ دھێتە دیتن، ئەم دێ بەردەوام بين ل سەر ئەنجامدانا کارێ خوە ل ‏جڤاتێ.‏

زێدەتر گۆت: بڕیار نەھاتنە دان چونکو ماوەیێ قانوونى نەمایە ئەنجام ئەو بوویە بەردەوامى ب ‏کارێ لیژنێن جڤاتێ بھێتە دان چونکو خەلک سەرا مە ددەن و پێدڤی دووڤچوونا کاروبارێن وان ‏ھەیە لەورا ئەم ناھێلين جڤات بھێتە چوولکرن دێ کار یێ بەردەوام بیت.‏

ئاماژە دا وێ چەندێ ژی کو دیتنا من یان دڤێت ژ لایێ قانوونى ڤە بابەتێ جڤاتان بھێتە ‏چارەسەرکرن و جڤات د دەستھەلات دار بن یان ژی نەبوونا وان باشتره‌ ژ جڤاتێن بێ ‏دەستھەلات، “دێ ھەموو لیژنێن جڤاتی وەکو خوە مینن دێ بەردەوامیێ ب کارێ خوە دەن”.‏

ئه‌ڤرۆ نيوز، عه‌زيز هه‌ورامى:

پشتى حوكمه‌تا عيراقێ ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ داگيركرى، يا به‌رده‌وامه‌ ل سه‌ر ده‌ركرنا ئيدارێن خزمه‌تكارى و ئه‌منى و رێكخراوێن كوردى، وه‌لاتيێن كورد ژى د به‌رده‌وامن ل سه‌ر چولكرنا باژێرى.

ئه‌كبه‌ر حه‌يده‌ر، جێگرێ به‌رپرسێ لقا 15 يێ خانه‌قين بۆ ئه‌ڤرۆ نيوز گۆت: “حوكمه‌تا عيراقێ د رێيا ئيدارا سه‌پاندى ل خانه‌قين بڕيارا ده‌ركرنا پۆليسێن ناڤخۆى ل خانه‌قين دايه‌ كو سه‌ر ب هه‌رێما كوردستانێ بوون، ئه‌و بڕيارا حوكمه‌تا عيراقێ نه‌رازيبوونا وه‌لاتيان ل دووڤ خوه‌ هێلايه‌”.

گۆتژى: “مه‌ وه‌كو لقا 15 يا پارتى ل خانه‌قين داخواز ژ وه‌زاره‌تا ناڤخۆ كريه‌ كو بزاڤێ بكه‌ت ل گه‌ل به‌غدا وێ بڕيارێ رابگريت، چونكو دێ نه‌رێنيێن زۆر ل دووڤ خوه‌ هێليت، پۆليسێن خانه‌قين ژ باژێرى بێنه‌ ده‌ركرن، وه‌لاتيان كوردێن وى باژێرى ب دروستى باوه‌رى پێ نامينيت و دێ مشه‌ختبوون ده‌ست پێ كه‌ت، ئه‌و بوو بزاڤێن مه‌ سه‌رگرت، مه‌ نه‌هێلا پۆليسێن خانه‌قين يێن سه‌ر ب حوكمه‌تا كوردستانێ ژ وى باژێرى بهێنه‌ ده‌ركرن”.

ده‌رباره‌يى وێ چه‌ندێ كو پاش داگيركرنا خانه‌قين چه‌ندين مالان ئه‌و باژێر چوولكريه‌، جێگرێ به‌رپرسێ لقا 15 يا پارتى ئاماژه‌ ب وێ چه‌ندێ كر كو ب گۆره‌يى وان كه‌سێن ناڤێن خوه‌ تۆمار كرين ب فه‌رمى مالێن خوه‌ باركرينه‌، زێده‌ترى 600 مالانن، ژبلى وان كه‌سان ژى كو مالێن خوه‌ باركرينه‌ و ئيدارا باژێرى لێ ئاگه‌هدار نه‌كريه‌، ب تايبه‌ت ل ده‌مێ روودانێن 16ى ئوكتۆبه‌رێ، هه‌موو ئه‌وێن مالێن خوه‌ ژى ب جهـ دهێلن كوردن، به‌رده‌وام ژى وه‌لاتى باژێرى بجهـ دهێلن”.

ده‌رباره‌يى ئه‌گه‌رێن ڤێ چه‌ندێ ژى گۆت: “ب باوه‌ريا پارتى ئه‌گه‌رێ بجهـ هێلانا خانه‌قين ژ لايێن خێزانێن كورد ڤه‌، بۆ وێ چه‌ندێ دڤه‌گه‌ريێت بۆ وێ چه‌ندێ كو نه‌شێن ل باژێره‌كێ داگيركرى بژين و نه‌شێن ژيانا خوه‌ ب ئازادى ب سه‌ر ببه‌ن، هنده‌كان ژى په‌يوه‌ندى ب وێ نه‌ئاراميێ ڤه‌ هه‌يه‌ كو نوكه‌ ل ناڤ باژێرى هه‌يه‌ و ده‌زگه‌هێن ئه‌منى نه‌شێن ب دروستى باژێرى ب پارێزن”.