ئه‌ڤرۆنيوز:
راهێنه‌رێ ئه‌رجه‌نتينى تاتا مارتينۆ گه‌هشته رێككه‌فتنه‌كێ ل گه‌ل ئێكه‌تيا ته‌پا پێ يا مه‌كسيكى بۆ وه‌رگرتنا ئه‌ركێ راهێنه‌راتيا هه‌لبژارتيێ مه‌كسيك.
رۆژناما (ميلينيۆ) يا مه‌كسيكى به‌لاڤكر كو مارتينۆ دێ بيته راهێنه‌رێ هه‌لبژارتيێ مه‌كسيك ب گرێبسته‌كێ هه‌تا سالا 2022 وب مووچه‌كێ سالانه كو دگه‌هيته 2 مليۆن و200 هزار دۆلاران.
تاتا مارتينۆ ل وه‌رزێ (2013- 2014) راهێنه‌رێ يانا به‌رشه‌لونا يا ئيسپانى بوو وژسالا 2016 هه‌تا نوكه راهێنه‌رێ يانا ئه‌تالانتا يونايتد يا ئه‌مريكى بوو.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ شه‌مبيێ 17/11/2018 پێشوازى ل ئه‌ندرێ پييك جێگرێ وه‌زيرێ ده‌رڤه‌يێ ئه‌مريكى بۆ كاروبارێن رۆژهه‌لاتا ناڤه‌راست وشانده‌كێ دگه‌لدا كر كو پێكهاتبوو ژ چه‌ند ديبلوماتكارێن وه‌زاره‌تا ده‌رڤه وباليۆزخانا ئه‌مريكى ل به‌غدا.
دديداره‌كێ دا ره‌وشا سياسى وئه‌منى يا ده‌ڤه‌رێ وعيراقێ وهه‌روه‌سا په‌يوه‌نديێن دناڤبه‌را هه‌ولێرێ وبه‌غدا هاته به‌سحكرن وپێشوازى ژى ل بريارا حوكمه‌تا عيراقێ هاته كرن بۆ دوباره هنارتنا په‌ترۆلا كه‌ركووكێ ب رێيا هه‌رێما كوردستانێ وب برياره‌كا دروست هاته هژمارتن وشاندێ مێهڤان سوپاسيا هه‌لويستێ سه‌رۆك بارزانى وحوكمه‌تا هه‌رێمێ كر دهنارتنا په‌ترۆلا كه‌ركووكێ ب رێيا بۆريێن هه‌رێما كوردستانێ
هه‌ردو لايه‌نان ل سه‌ر وێ چه‌ندێ دهه‌ڤرا بوون كو ره‌وشا سياسى پشتى هه‌لبژارتنێن عيراقێ وحوكمه‌تا نوو يا عيراقێ ده‌ليڤه‌كا نوويه بۆ هه‌رێمێ وبه‌غدا بۆ چاره‌كرنا كێشان وهه‌ماهه‌نگى وهه‌ڤكاريا زێده‌تر ل گه‌ل هه‌ڤدوو وهيڤى خواستن كو گرفت بۆ ڤێ ده‌ليڤا نوو نه‌هێنه دروستكرن.
ره‌وشا پاريزگه‌ها نه‌ينه‌وا وده‌ڤه‌رێن كورستانى يێ ده‌رڤه‌ى ئيدارا هه‌رێما كوردستانێ ته‌وه‌ره‌كێ دى يێ وێ ديدارێ بوو وبيرورا ل دۆر رێيێن ئاساييبوونا ره‌وشا وان ده‌ڤه‌ران ول به‌رچاڤ وه‌رگرتنا ماف وداخوازيێن پێكهاتێن ئايينى ونه‌ته‌وى وڤه‌گه‌راندنا ئاواران وچاوانيا ب رێڤه‌برنا وان ده‌ڤه‌ران هاتنه ئالۆگوركرن.
هه‌ر دوێ ديدارێ دا، شاندێ ئه‌مريكى پێزانين هه‌بوون بۆ رۆلێ پێشمه‌رگه‌ى دشه‌رێ دژى داعشێ دا ودابينكرنا سه‌قامگيريێ وئاراميێ ودووپاتى ل وێ چه‌ندێ كر كو ئه‌مريكا به‌رده‌وام رێزه‌كا تايبه‌ت بۆ ئازايه‌تى وقوربانيدانا هێزا پێشمه‌رگێ كوردستانێ يا هه‌ى.
ئه‌ڤرۆ نیوز، نه‌وزاد هلۆرى:
هه‌ر چه‌نده فێقيێ كاكى چه‌ند سالێن بۆرى هاتیه كوردستانێ، به‌لێ ب ره‌نگه‌كێ ب له‌ز به‌ر به‌لاڤ دبیت، ده‌ڤه‌را بارزان ئێكه ژ وان ده‌ڤه‌رێن كوردستانێ كو زوورترین به‌رهه‌مێ كاكى لێ هه‌یه كو خه‌لكێ وێ ده‌ڤه‌رێ ناڤێ (خورمالو) لێ دكه‌ن.
عه‌بدولجه‌بار بالندى ، جوتیاره‌كێ گوندێ بالندا ل ده‌ڤه‌را بارزان رابوویه ب چاندنا هژماره‌كا دارێن كاكى وه‌كو تێست، ب گۆره‌ى ئاخڤتنێن وى چاندنا خورمالوى (كاكى) ل گوندێ بالندا سه‌ركه‌فتن ئینایه و هه‌كه حوكمه‌ت و لایه‌نێن شوله‌ژێ هاریكاریا وى بكه‌ن ئه‌و دێ كه‌ته پرۆژه و به‌رفره‌هتر كه‌ت.
وى جوتیارى دیاركر ژى كو نوكه كیلۆیا ڤى فێقى هه‌تا دو هزار دیناران دهێته فرۆتن، ودبێژیت : (ئه‌ڤ فێقى يه ل ده‌ستپێكا وه‌رزێ زڤستانێ پێدگه‌هیت و ئێكه ژ وان فێقیێن هه‌ره خوه‌ش، به‌لێ خه‌لك هێشتا نانیاسیت چونكى ل كوردستانێ گه‌له‌ك كێم يێ هه‌ى، مه ئه‌ڤ جورێ فێقى يێ ژ رۆژهه‌لاتێ كوردستانێ ئینای).
"کچ ژ بەر گیروبوونا خولا ھەیڤانە تووشی نەخۆشیا پەنچەشێرا مەمکی دبن"
ئه‌ڤرۆ نیوز:
تایبەتمەندەکێ نەخۆشیێن پەنچەشیرێ ل نەخۆشخانا ئازادی دیارکر کو زەلام ژی ھەر وەکو ژنێ تووشی نەخۆشیا پەنچەشێرا مەمکی دبن چونکو زەلامی ژی وەکو ژنان خدمێن مەمکی ھەنە لێ گەلەک کێم ل زەلامان پەيدا دبیت رەنگە ھەر سەد ھزار زەلامان ئێک تووشی نەخۆشیا پەنچەشێرا مەمکی ببیت.
د. چەکدار ئەحمەد داود تایبەتمەندێ نەخۆشیێن پەنچەشێرێ ل نەخۆشخانا ئازادی دیارکر کو ژنێ پتر ژ زەلامان تووشی نەخۆشیا پەنچەشێرا مەمکی دبن، پەنچەشێرا مەمکی ل کچان ژی دەرکەڤيت ئەو ژی ھندەک ئەگەر ھەنە نوکە ئێک ژ ئەگەران ژی ھەکە کچ زوو شوو نەکەت یان ژی ھەکە زوو خولا ھەیڤانە بھێت یان ژی ھەکە خولا ھەیڤانە گیرۆ بيت و زوو نەھێت ئەو ژی تووشی پەنچەشێرا مەمکی دبن.
ئاشکەرا کر ژى کو خانێن لاشێ مرۆڤی ب تایبەتی ژی یێن سینگی گۆھورینا چینی تێدا دروست دبیت ئەڤ گۆھورینا چینی دبیتە ئەگەرێ وێ چەندێ خانێن لاشی ئەوێن د سینگێ مرۆڤی دا زێدە دبن ب شێوەیەکی نە سرۆشتی و بەردەوام زێدە دبن وەکو وەرمەکی دروست دکەت ھەکە مرۆڤ زوو پێ نەحه‌سیا ئەو وەرم دھێتە ڤەگوھاستن دچیتە ھەستی و مێلاکێ دا و گەلەک جھێن دی لێ نوکە ل پارێزگەھا دھۆکێ چار جۆرێن چارەسەریێ بۆ پەنچەشێرا مەمکی ھەنە.
د. چەکدار ئەحمەد ئەو ژی گۆت: ئەو زەلامێن تووشی پەنچەشیرا مەمکی دبن رەنگە گۆھورینا چینی بھێتە کرن یان گەلەک حەبێن(سیرودی) خۆاربن ئەڤە ئێک ژ ئەگەران زەلامان تووشی پەنچەشێرا مەمکی دبن یان تووشی تيشکێ بیت ھەروەسا ژی قەلەوی و جگارەکێشان ژی ئەگەرن زەلام تووش ڤێ نەخۆشیێ بن.
ئاماژە دا وێ چەندێ ژی کو د سالا بورى دا هزار و ١٠٣ نەخۆشێن پەنچەشێرێ ھاتبوونە تۆمارکرن ژ وانا ژی ١٨٨ پەنچەشێرا مه‌مكى بوون، ل دەستپێکا ٢٠١٨ ھەتا ھەیڤا نه‌هـ ل دھۆکێ ٧٨٢ نەخۆشیێن پەنچەشێرێ ھاتینە تۆمارکرن ژ وانا ژی ١٤٠ پەنچەشێرا مەمکی بووینە ئەو ژی چار زەلام بوون و ١٣٦ يێن دی ژن بوون.
ئه‌ڤرۆ نيوز:
پشتى ب دووماهى هاتنا كۆمبوونا پارتى ديموكراتى كوردستان و ئێكه‌تى نشتيمانى كوردستان ل سلێمانيێ كۆنگره‌كێ رۆژمامه‌ڤانى گرێدا.
د وى كۆنگرێ رۆژنامه‌ڤانى مه‌حمود محه‌مه‌د، به‌رپرسێ مه‌كته‌با راگه‌هاندنا پارتى ديموكراتى كوردستان راگه‌هاند كو يا بۆ وان و ئێكه‌تيێ گرنگ ئه‌وه كو بۆچوونه‌كا هه‌ڤپشك دروست بكه‌ن و چار سالێن بهێت يێن كوردستانێ به‌رقراربوونه‌كا ئه‌منى هه‌بيت و ره‌وشا ئابوورى و ژيانێ باشتر لێ بكه‌ن.
ئاشكه‌را ژى كر كو د چارچۆڤێ وان سۆزێن داين و ئه‌و مێژوويا پارتى هه‌يى دا و خوينا شه‌هيدان د سالێن بۆرى دا، يا گرنگه هه‌ماهه‌نگى هه‌بيت و ب ره‌نگه‌كى بيت خزمه‌تكرنا سه‌رتاسه‌رى بهێته كرن.
دا زانين ژى كو بۆچوونێن وان گه‌له‌ك د نێزيكى ئێك بوون و دبيت د دوسێ كۆمبوونێن بهێت دا، ئه‌ڤ بابه‌ته بهێته ئێكلاكرن.
نه‌ڤه‌شارت ژى كو دێ سه‌ره‌دانا وان هه‌موو لايه‌نێن دى كه‌ن و هه‌ر ئه‌ڤرۆ دێ سه‌ره‌دانا گۆڕان ژى كه‌ن و گۆت: “هه‌كه لايه‌نه‌كى نه‌ڤێت پشكداريێ د حوكمه‌تێ دا بكه‌ت، ئه‌و گرێدايى وانه”.
سه‌عدى ئه‌حمه‌د پيره ئاخفتنكه‌رێ ب ناڤێ ئێكه‌تى نشتيمانى كوردستان گۆت: “ب مه‌ره‌ما دانوستاندن ل سه‌ر حوكمه‌تێ پارتى ديموكراتى كوردستان سه‌ره‌دانا مه‌كته‌با سياسى يا ئێكه‌تى نشتيمانى كوردستان كر و نوكه دانوستاندنان ل سه‌ر پێكئينانا حوكمه‌تێ دكه‌ين”.
دا زانين ژى كو خه‌لكێ كوردستانێ ده‌نگێ ب خزمه‌تگۆزارى و ئه‌منيه‌ت و باشتركرنا ره‌وشا ئابوورى يا دايى و دڤێت ل دووڤ وێ چه‌ندێ كار بكه‌ين و گۆت: “د ڤێ كۆمبوونێ دا به‌حس ل وێ چه‌ندێ ژى هاته كرن كو دڤێت خه‌له‌تيێن د كابينێن بۆرى دا هاتينه كرن، نه‌هێنه كرن”.
نه‌ڤه‌شارت ژى كو ئه‌وان وه‌كو ئێكه‌تى ڤيتۆ ل سه‌ر چو لايه‌نه‌كى نينه و هه‌ر لايه‌نه‌كێ بڤێت پشكداريێ د حوكمه‌تێ دا بكه‌ن بخێر بێن و گۆت: “بۆ ئه‌و لايه‌نێن بڤێت ببنه ئۆپۆزسيۆن ژى هيڤيدارين كارێ خوه دروست بكه‌ن وه‌كو ئۆپۆزسيۆن نه‌كو دوژمن”.
خۆيا ژى كر كو حوكمه‌تا نوو دێ ل سه‌ر پێكڤه‌گۆنجاندنا به‌رنامێ كارێ هه‌ڤپشك هێته پێكئينان و دێ بزاڤ هێته كرن كاره‌كێ سياسى يێ وه‌سان بهێته كرن هه‌موو كار بۆ پاراستنا ئه‌زموونا كوردستانێ بيت و رێ نه‌ده‌ن خه‌لكێ كوردستانێ بهێته ئازاردان.
پيره گۆتژى: “بڕيار هاتيه دان ب شه‌راكه‌ت كار بكه‌ن و هێشتا چو دانوستاندن ل سه‌ر پۆستان نه‌هاتيه كرن و يا گرنگ ئه‌وه نوكه ل سه‌ر به‌رنامه‌يى رێك كه‌ڤين، پاشان دێ به‌حسا پۆستان كه‌ين”.
مه‌حمود محه‌مه‌د د به‌رسڤا پرسيارێن رۆژنامه‌ڤانان دا گۆت: “پێدڤيه د ڤێ قووناغێ ژى دا، پارتى و ئێكه‌تى ب هه‌ڤپشكى كار بكه‌ن و پێكڤه كابينه‌كێ پێك بينن كو ده‌ربڕينێ ژ هه‌موو حه‌ز و خواستێن گه‌لێ خوه بيت و هيڤى و خواستێن گه‌لى تێدا بجهـ بهێن”.
ئه‌ڤرۆ نيوز، نيوار محه‌مه‌د سه‌ليم:
سه‌رۆكێ ئيدارا هه‌لبژارتنان، ئه‌حمه‌د ره‌حيم به‌شاره، ئه‌ڤرۆ رۆژا شه‌مبى راگه‌هاند كو كۆمسيۆن دێ ده‌ست ب به‌لاڤكرنا كارتا هه‌لبژارتنان يا ئه‌لكترۆنى يا بايۆمه‌ترى يا هه‌لبژارتنان (ده‌نگدانا گشتى) كه‌ت، ئه‌وێن هه‌تا نها وه‌رنه‌گرتين.
د به‌ياننامه‌كێ دا كو دانه‌ك ب ده‌ست ئه‌ڤرۆ نيوز كه‌فتيه ئاماژه ب وێ چه‌ندێ ژى كريه كو كريارا به‌لاڤكرنێ سوبه‌هى رۆژا ئێكشه‌مبى 18ى چريا دويێ 2018 دێ ل هه‌موو پارێزگه‌هان ده‌ست پێ كه‌ت يێن هه‌رێما كوردستانێ نه‌بن. ئه‌ڤ پلێته دێ ل هه‌موو بنگه‌هێن تۆماركرنێ ل پارێزگه‌هان هێنه به‌لاڤكرن.
ئاشكه‌را ژى كريه كو تۆماركرنا بايومه‌ترى ژى دێ ده‌ست پێ كه‌ت بۆ وان كه‌سێن هه‌تا نوكه پێزانينێن خوه د تۆمارا بايۆمه‌ترى دا تۆمار نه‌كرين، ئه‌ڤ بنگه‌هێن تۆماكرنێ دێ وان كارمه‌ندێن هه‌تا نها خوه تۆمار نه‌كرين، تۆمار كه‌ت.
سه‌رۆكێ ئيدارا هه‌لبژارتنان داخواز ژ هه‌موو وان ده‌نگده‌رێن هه‌تا نها خوه تۆمار نه‌كرين دكه‌ت كو سه‌ره‌دانا بنگه‌هێن ده‌نگدانێ ل پارێزگه‌هان دكه‌ت بۆ خوه تۆماركرنێ.
دێ ڤێ ده‌ربارێ دا و ل دۆر ده‌ست پێ نه‌كرنا ڤێ پرۆسێ ل هه‌رێما كوردستانێ، سه‌كڤان حه‌سه‌ن ره‌شيد، به‌رپرسێ په‌يوه‌ندى و راگه‌هاندنێ ل ئۆفيسا دهۆك يا كۆمسيۆنا بلندا سه‌ربه‌خۆيا هه‌لبژارتنان بۆ ئه‌ڤرۆ نيوز گۆت: “ژ به‌ر كو هه‌رێما كوردستانێ نوكه چو هه‌لبژارتن ل پێش نينن، ژ به‌ر هندێ ئه‌ڤ پرۆسه نها ل هه‌رێمێ ده‌ست پێ نه‌كريه”.
زێده‌تر گۆت: “بڕياره هه‌لبژارتنێن جڤاتێن پارێزگه‌هان بهێنه كرن و هه‌كه خوه ل هه‌رێما كوردستانێ بهێنه كرن ژى، ژ لايێ مه ڤه ناهێنه ب رێڤه برن، ژ به‌ر هندێ ژى جارێ ئه‌و پرۆسه ل ڤێره هێشتا ده‌ست پێ نه‌كريه”.
ئاماژه بو ێ چه‌ندێ ژى كر كو هه‌كه هه‌لبژارتنێن جڤاتێن پارێزگه‌هان بهێنه كرن، ب تنێ ئه‌و دێ يێن ئاواران ب رێڤه به‌ن و گۆت: “ئه‌و پێدڤى ب ميكانزمه‌كا تايبه‌تن بۆ ب رێڤه‌برنا وێ پرۆسێ”.
ئەڤرۆنیۆز سالار دۆسکی:
ئایدن مەعرۆف ئەندامێ مەکتەبا سیاسی یا بەری تورکمانی بۆ ئەڤرۆ نیۆز گۆت” ل گەل وێ چەندێ ینە ب شێوەکێ ئاشتیانە کێشا کەرکووک دناڤبەرا ھەموو پێکھاتێن کەرکووکێ دا بھێتە چارەسەکرن، لێ حوکمەتا عیراقێ بالدەستە وی باژێری و چارەسەکرنا کێشا کەرکووکێ دکەڤیتە ستویێ وێ.
ئایدن مەعرۆف ئەو ژی گۆت: ھەر ئالیەک بۆ مادێ 140 تشتەکی بێژیت و ھندەک بێژن نەمایە و ھندەک بێژن بدووماھی ھاتیە و ھندەک بێژن ب سەر ڤەچوویە.
ھەمان ئەندامێ مەکەتب سیاسی یا بەری تورکمانی ئەو ژی ئاشکراکر کو پشتی شەرێ داعش گەلەک تورکمانا قەستا دەرڤە کریە نوکە د ملیۆن تورکمان ل عیراقێ بگشتی ھەنە.
ئه‌ڤرۆ نيوز:
رووشتنا ئاسايى يا جڤاتا نوونه‌رێن عيراقێ بڕياره سوبه‌هى رۆژا ئێكشه‌مبى ل جهێ سێشه‌مبيێ بهێته ئه‌نجام دان.
بڕيار بوو رۆژا سێشه‌مبى 20ى چريا دويێ 2018 جڤاتا نوونه‌رێن عيراقێ روونشتنا ئاسايى يا خوه بگێريت، به‌لێ ژ ئه‌گه‌رێ بهێنڤه‌دانێ، روونشتن هاته پێشخستن بۆ رۆژا ئێكشه‌مبى 18ى چريا دويێ 2018.
پێشخستنا ڤێ روونشتنا جڤاتا نوونه‌ران ژ به‌ر وێ چه‌ندێ يه كو ل رۆژا سێشه‌مبى ل هه‌رێما كوردستانێ و ل عيراقێ ژى ب هه‌لكه‌فتنا “12ى ربيع الاول” كو دبيته رۆژا ژ دايكبوونا محه‌مه‌دێ كوڕێ عه‌بدولايێ پێغه‌مبه‌رێ ئيسلامێ (س.خ) ل سه‌ر بن.
ب گۆره‌يى پێزانينان د روونشتنێ دا پرسا ده‌نگدان ب وه‌زيرێن نوو ناهێته گێران ژ به‌ر كو هه‌تا نوكه رێكه‌فتن ل سه‌ر وه‌زيرێن نوو يێ حوكمه‌تا عه‌بدولمه‌هدى نه‌هاتيه دان.
ئه‌ڤرۆ نيوز:
كۆمبوونا پارتى ديموكراتى كوردستان ژبۆ پێكئينانا حوكمه‌تا نوو يا هه‌رێما كوردستانێ ده‌سپێكر.
به‌رى ده‌مه‌كێ كێم ل مه‌كته‌با سياسى يا ئێكه‌تى نشتيمانى كوردستان، پێشوازى ل شاندێ پارتى ديموكراتى كوردستان هاته كرن و پاشان ژى كۆمبوونا هه‌ردو لايان ژبۆ پێكئينانا حوكمه‌تا نوو ده‌سپێكر.
ئێكه‌تى نشتيمانى كوردستان دخوازيت سه‌رۆك وه‌زيران هه‌ر ئێك جێگر هه‌بيت و ئه‌و ژى يێ وێ حزبێ بيت ل گه‌ل پۆستێ سه‌رۆكێ په‌رله‌مانى و دخوازيت ژى ل گه‌ل پارتى پێكڤه سه‌ره‌دانا لايه‌نێن سياسى بكه‌ت.
ژ لايێ خوه ڤه هێشتا پارتى ديموكراتى كوردستان چو مه‌رج بۆ پێكئينانا حوكمه‌تێ نه‌داناينه ب تنێ دخوازيت ئه‌و لايه‌نێن پشكداريێ د حوكمه‌تێ دا دكه‌ن وه‌كو جارێن دى ل نيڤا رێ نه‌هێلن.
نيشاندان