ئەڤرۆ نیوز:
تیما باسکت بۆلا زاخۆ ئەڤرۆ ل بەغدا تووشی خوسارەتیا چارێ بوو د خولا عیراقێ یا باسکت بۆلێ دا بۆ یانێن نایاب ڤێ جارێ ژی ل سەر دەستێ یانا تەزامن ب ئەنجامێ ٨٤-٧٢ خالان.
د ڤێ یاریێ دا سەرەرای ھەڤرکیەکا بھێز د ھاتە کرن ناڤبەرا ھەردو تیمان بۆ دەستڤە ئینانا سەرکەفتنێ لێ د چارێکا چارێ و دووماھیێ دا یاریزانێن تەزامن شیان ئەنجامێ یاریێ د بەرژەوەندیا خوە دا ئێکلا بکەن و یاریێ ب سەرکەفتنا خوە ب ئەنجامێ ٨٤-٧٢ خالان ب دووماھی بینن و دبیتە خوسارەتیا چارێ د خولا عیراقێ دا یانا زاخۆ تووش دبیت.
ئەڤرۆ نیوز، سەباح زێباری:
ئەڤرۆ ئیڤاری ل سەنتەرێ قەزا ئاکرێ روودانەکا ھاتن و چوونێ ل نزیک ترافیکا سوسنا دروست بوو دناڤبەرا پێنج ترومبێلادا د ئەنجامدا سێ کەس بوونە قوربانی.
رێکەفت زوھێر ل راگەھاندنا ھاتن و چوونا ئاکرێ بۆ ئەڤرۆنیوز دیارکر کو ئەو رودان پشتی نیڤرۆ دروست بوویە ل نزیک ترافیکا سوسنا دناڤبەرا پێنج ترومبێلادا کو ژ جورێ لێکدان بوویە.
گۆت ژ ئەنجامێ ڤێ بویەرێ دا سێ کەس بوونە قوربانی دو ب گرانی برینداربووینە، لێ خوشبەختانە ھەتا نھا کەسێ گیانێ خوە ژ دەست نەدایە، بریندار ژی زوترین دەم ھاتنە رەوانەکرن بۆ نەخۆشخانا تەنگاڤیا ل ئاکرێ.
ئەڤرۆ نیۆز:
سەرۆک بارزانی راگەهاند کو ئارمانجا سەرەدانا من یا بۆ بەغدا بۆ چارەکرنا ئاریشێن د ناڤبەرا هەرێما کوردستانێ و بەغدا بوویە و داخواز ژ من هاتیە کرن کو بۆ ئاشتیا نیشتمانی دەسپێشخەریێ بکەم و گۆت: (ئەم ژی دێ دووڤچوونا بابەتی کەین و هەکە ئەز بزانم دێ ئەنجامێ خوە یێ باش هەبن یا پێدڤی دێ کەین لێ هەکە زەمینە بۆ هندێ گونجای نەبیت جارێ چو پێنگاڤ ناهێنە هاڤێتن).
سەرۆک بارزانی هەروەسا دیار کر کو د سەرەدانا خوە دا ئەز ل گەل هەموو ئالیان بێی جودا کۆمبووم و ئەم ل دۆر هەموو ئاریشان ئاخڤتین و ئەز ب باوەرم دێ گوهۆرینێن باش دروست ببن و گۆت: (ئەز باوەر ناکەم کو عادل عەبدولمەهدی وەکو سەرکردێن بەرێ یێن عیراقێ بخوازیت گەلێ کوردستانێ سزا بدەت، هەکە تشتەک وەسا هەبا من سەرەدانا بەغدا نەدکر و نها مە دڤێت ب کریاری پێنگاڤ بهێنە هاڤێتن).
سەرۆک بارزانی هەروەسا ئەو یەک ژی دیار کر کو ب چو رەنگەکێ هەلویستێ مە ل سەر حسابێ ئارمانجێن ستراتیژی یێن گەلێ کوردستانێ نەبوویە و نابیت و ل دۆر کەرکووکێ ژی دیار کر کو کەرکووک باژێرێ پێکڤەژیانێ یە لێ دێ ناسناما وێ هەر یا کوردستانی بیت.
ئەڤرۆ نیۆز، ئەمیر ئەترووشی:
ل باژێرێ واشنتن یێ وەلاتێ ئەمریکا کونفرانسەک ل دۆر رەڤەندا کوردی و رەوشا خواندنێ ل کوردستانێ ھاتە رێکخستن و نوونەرێن ھەرێما کوردستانێ ژی د ڤی کونفرانسی دا بەشدار بوون.
د. داوود ئەترووشی، رێڤەبەرێ گشتیێ دیوانا وەزارەتا خواندنا بلند بۆ ئەڤرۆ نیۆز دیار کر، ئەڤ کونفرانسە ل سەر چاوانیا مفا وەرگرتن ژ رەڤەندا کوردی بۆ ئاڤاکرنا کوردستانێ ھاتبوو رێکخستن و ب سەدان کوردێن خودان شیان و باوەرنامێن بلند، کوردێن رۆژھەلات و رۆژئاڤا و باکۆر و باشور، بەشداری ڤی کونفرانسی بوون و د ئامادەنە خزمەتا ھەرێما کورستانێ بکەن، بەلێ پێدڤیە رێکخستنا وان بھێتە کرن.
گۆتیشی: د ناڤا کونفرانسی دا من و د. عسمەت خالد وەزیرێ بەرێ یێ پەروەردێ ل ھەرێما کوردستانێ بەشداری د د پانێلەکی ل سەر رەوشا خاندنێ ل کوردستانێ ل ژێر ناڤێ (“The role of Kurdish diaspora in higher education in the Kurdistan Region”.) دا کر.
ئاشکرا ژی کر کو رەڤەندا کوردی ل دەرڤەی وەلاتی سامانەکێ نشتیمانینە و پێتڤیە وەکی گەلەک وڵاتێن دی ببنە بەشەک ژ سیاسەتا حکومەتا ھەرێما کوردستانێ و پێتڤی ب پیتەپێدانەکا تایبەتن.
ئەڤرۆ نیوز،بارزان مزووری:
ل شەڤا بوری دەمژمێر ١١ شەڤ ٢٧/١١ ژنەک بناڤێ”ب،س،خ” د ژیێ ٢٠ سالی دا ل گوندێ بوزا سەر ب ناحیا ئەلقوش ڤە ژ ئەگەرێ خارنا گەلەک جورێن حەبا گیانێ خوە ژ دەست دا.
نوژدارەک ل نەخوشخانا شێخان کو نەڤیا ناڤێ وی دیار بیت بو ئەڤرۆ نیوز دیار کر کو درەنگی شەڤێ ژنەک بناڤێ”ب،س” ژلایێ کەسوکارێن وێ ڤە گەھاندیە نەخوشخانا تەنگاڤیا ل شێخان لدووڤ راپورتا پزیشکی ھژمارەکا زور یا حەبێن جوراو جور خاربون بوو ئەگەر مەعیدێ وێ تێکبچیت و گیانێ خوە ژ دەست بدەت دووڤ دا بۆ نوشداریا داد ل پارێزگەھا دھوک ھاتە رەوانەکرن.
ل دۆر ڤێ بویەرێ رێوان ھەڤژینێ وێ ژنێ بۆ ئەڤرۆ نیوز دیار کر کو مەغرەب دگەل خێزانا خو بووم و چو کێشە نەبون و مە بەرھەڤی بۆ شەھیانەکێ دکر دیسان پشتی ژ مال دەرکەفتیم ل دەمژمێر ١١ شەڤ ھاتمە ئاگەھدارکرن ل دۆر ڤێ روودانێ کو رەوشا وێ یا خرابە بو نەخوشخانا شێخان ڤەگوھاستیە ھەتا گەھشتیم ھەڤژینا من گیانێ خوە ژ دەست دابوو.
ناڤھاتی خویاکر کو وان چ ئاریشە دگەل ئێک نەبوون من ب حەژێکرن ئینایە ماوێ دوو سال ئەڤیندارێن ئێک بوین بەری ب خازم ژبەرکو کچ ماما من بو پەیوەندیێن ئەڤینیا مە باش بوینە دەیکا دوو زاروکایە زارویەکێ من ژیێ وی ٥ سالە.
ل دۆر ڤێ روودانێ عەقید عارف میرخان رێڤەبەرێ پولیسێن ناحیا ئەلقوش بۆ ئەڤرۆ نیوز ئاشکرا کر کو ڤەکولین نوکە د ڤێ روودانێ دا یا بەردەوامە و ھێشتا چو کەس ژی نە ھاتینە دەستەسەر کرن.
ئەڤرۆ نیوز:
وەزارەتا کارەبا عیراقێ ئاشکرا کر ئەوان ٢٥٠٠ مێگاواتێن کارەبێ ژ دەستدان ژ ئەگەرێ بیڤەلەرزا ل رۆژھەلاتا کوردستانێ روودای کو بویە راوستیانا ھنارتنا غازێ ژ ئیرانێ بۆ عیراقێ.
د بەیاننامەکێ دا بۆ دەزگایێن راگەھاندنی دیارکریە کو ژ ئەگەرێ ئەوێ بیڤەلەرزا ل رۆژا ئێکەشمبیا بوری پەیدابووی بویە ئەگەر وەزارەتا وان سەرجەمێ ٢٥٠٠ مێگاوەتێن کارەبێ ژدەست ب دەست پشتی بوریێن ھنارتنا غازێ ژ ئیرانێ بۆ عیراقێ ژ کارکەفتین کو بویە ئەگەر وێستگەھێن بەرھەم ئینانا کارەبێ ژ کار بکەڤن و دەمژمێرێن کارەبا نشتیمانی ل چەند پارێزگەھان کێم ببیت تایبەت ل کەرکووک و دیالا و بەغدا.
نوکە ئەڤ ئاریشەیە بەر ب چارەسەکرنێ دچیت و ئیرانێ ژ لایێ خوە ڤە چارەسەرکرینە ئەڤ بوریە و تنێ لایێ عیراقێ مایە کو دێ ل ٤٨ دەمژمێرێن بھێت دێ ب دووماھی ھێت.
ئه‌ڤرۆ نيوز:
وه‌زاره‌تا په‌روه‌ردێ ل حوكمه‌تا هه‌رێما كوردستانێ سزايێ “قوپيايێ” د تاقيكرنێن پۆلا 12 ئاماده‌يى دا ئاشكه‌را كر.
پشتيوان سادق، وه‌زيرێ په‌روه‌ردێ ل حوكمه‌تا هه‌رێما كوردستانێ نڤيساره‌كا فه‌رمى ئاراسته‌ى رێڤه‌به‌ريێن په‌روه‌ردێ ل “هه‌ولێر، دهۆك، سلێمانى و هه‌له‌بچه” كرن و تێدا سزايێ قوپيايێ بۆ قوتابيێن پۆلا 12ێ ئاماده‌يى ل ده‌مێ ئه‌زموونان دا دياركر.
وه‌زاره‌تا په‌روه‌ردێ بڕيار دايه كو هه‌كه هات و قوتابى سالا ئێكێ بوو و قوپيا كر، ئه‌وى يان ئه‌وێ سالا بهێت مافێ پشكداريێ د ئه‌زموونێن گشتى دا نابيت و سالا ب دووڤ دا ژى دێ چيته خواندنا ئێڤاران. هه‌كه قوتابى سالا دويێ ژى بوو، سالا داهاتى پشكداريێ ناكه‌ت و سالا ب دووڤ دا دێ ئه‌زموونێن ده‌ره‌كى ئه‌نجام ده‌ت.
د پشكه‌كا دى يا ڤێ نڤيسارێ دا هاتيه كو هه‌كه قوتابى يێ سيسته‌مێ ئێڤاران بيت و قوپيايێ بكه‌ت، بۆ سالا بهێت مافێ پشكداريێ نامينيت و سالا ب دووڤ دا دێ د رێيا ئه‌زموونێن به‌رايێ دا پشكدارى ئه‌زموونێن گشتى بيت. هه‌كه ژى قوتابى يێ ده‌ره‌كى ب ئێك يان دو بابه‌تان بيت و قوپيايێ بكه‌ت بۆ سالا داهاتى مافێ پشكداريێ د ئه‌زموونێن گشتى دا نامينيت و پاشان ژى دشێت ئه‌زموونێن ده‌سپێكى ئه‌نجام بده‌ت، به‌لێ يێن هه‌موو بابه‌تان.
ئەڤرۆ نیوز، نەوزاد ھلۆری:
ھەر ئێک ژ وەزارەتا پێشمەرگەی و ناڤخوە د کونگرەیەکێ ھەڤپشک دا گرتنا زێدەتری دو ھزار تاوانباران ل ھەرێما کوردستانێ د دەما بوری دا راگەھاندن.
جەبار یاوە، ئەمیندارێ گشتیێ وەزارەتا پێشمەرگەی دیارکر کو ژورەکا ھەڤپشک د ناڤبەرا وەزارەتێن پێشمەرگە و ناڤخوە ھاتیە پێکئینان بۆ دووڤچوون ل سەر ھەر کەیسەکا گرێدای تاوانباران و گۆت: (د دەما بوری دا زێدەتر ژ دو ھزار تاوانباران ھاتینە گرتن، ھژمارەکا دى ژی داخواز کرینە و دووڤچون دھێتەکرن بۆ گرتنا وان ژی، لژنێن ھەڤپشکێن مە د بەردەوامن بۆ گرتنا ئەو کەسانێن داخوازکری).
ب گورەی ئاخفتنێن ئەمیندارێ گشتیێ يێ وەزارەتا پێشمەرگەی، تاوانبار ھەموو پلەیان ب خوه ڤە دگرن.
ئه‌ڤرۆ نيوز:
سه‌رۆك فره‌نسا دێ سه‌ره‌دانا عيراقێ كه‌ت و چاڤه‌رێ دهێته كرن سه‌ره‌دانا هه‌رێما كوردستانێ ژى بكه‌ت.
وه‌زاره‌تا ژ ده‌رڤه يا عيراقێ د به‌ياننامه‌كێ دا راگه‌هانديه كو محه‌مه‌د عه‌لى حه‌كيم وه‌زيرێ ژ ده‌رڤه په‌يوه‌نديه‌كا تله‌فۆنى ل گه‌ل جا ئێن لودريان وه‌زيرێ ژ ده‌رڤه يێ فره‌نسا ئه‌نجام دايه.
د په‌يوه‌نديا تله‌فۆنى دا، محه‌مه‌د عه‌لى حه‌كيم، و جان ئێف لودريان دانوستاندنا په‌يوه‌نديێن به‌غدا و پاريس كرينه و لودريان پشته‌ڤانيا وه‌لاتێ خوه بۆ عيراقێ ل شه‌رێ دژى رێكخراوا تيرۆرستى داعش دووپات كريه.
هه‌ر وه‌كو د به‌ياننامێ دا هاتى، وه‌زيرێ ژ ده‌رڤه يێ فره‌نسا نيه‌تا خوه نيشان دايه بۆ سه‌ره‌دانكرنا عيراقێ ل ده‌سپێكا سالا بهێت ژى دێ ئيمانوئێل ماكرۆن سه‌رۆكێ وه‌لاتێ فره‌نسا سه‌ره‌دانا عيراقێ كه‌ت.
هه‌ر چه‌نده چو داخۆيانيێن فه‌رمى ده‌رباره‌يى وێ چه‌ندێ نينن كو ماكرۆن دێ سه‌ره‌دانا هه‌رێما كوردستانێ كه‌ت، به‌لێ دهێته چاڤه‌رێكرن سه‌ره‌دانا هه‌رێما كوردستانێ ژى بده‌ت.
ئەڤرۆ نیوز:
رێڤەبەریا گشتی یا سەقاناسی و بیڤەلەرزێ ل ھەرێما کوردستانێ راگەھاند کو ھەرێما کوردستانێ دێ کەڤیتە بەر شەپۆلەکا دی یا باران بارینێ و بەفر ژی دێ ل گەلەک جھان باریت بتایبەت دەڤەرێن چیایی.
پشکا پێشبینیان ل رێڤەبەریا گشتی یا سەقاناسی و بیڤەلەرزێ ل ھەرێما کوردستانێ د نڤیسارەکێ دا کو دانەک ب دەست ئەڤرۆ نیوز کەفتیە تێدا ئاشکەرا کریە کو ھەرێما کوردستانێ دێ کەڤیتە بن کارتێکرنا درێژبوونا فشارێن نزمێن دەریا ناڤەراست.
ئاشکەرا ژی کریە کو ئەڤ پێلە سوبەھی رۆژا پێنجشەمبی رێکەفتی 28ی چریا دویێ 2018 ل دەمێن شەڤێ ئەسمان دێ ژ ئەورەکێ ناڤەندی بیتە ئەورێ تەمام ل گەل دەسپێکرنا بارانێ.
ھەر ب گۆرەیی ڤێ نڤیسارێ ل دەسپێکێ دێ ل لایێن رۆژئاڤایێ ھەرێمێ دێ دەست پێ کەت و رۆژا ئەینی کارتێکرنا پێلێن باران بارینێ دێ کەڤنە سەر ھەموو دەڤەرێ و ئاستێ باران بارینێ دێ یێ ناڤەندی بیت، ژبلی دەڤەرێن چیایی یێن پارێزگەھا دھۆکێ ب پلە ئێک پاشان ژی دەڤەرێن چیایی یێن پارێزگەھا ھەولێر زۆرترین رێژێن باران بارینێ دێ ھێنە تۆمارکرن، دبیت ئاستێ باران بارینێ ب رەنگەکێ دژوار بیت.
ھەر ب گۆرەیی پشکا پێشبینیان ل دەمێ ھاتنا ڤان پێلان دێ پارستە ھەوایەکێ ھەتا رادەکێ سار ژی روو ل دەڤەرێ کەت و پلێن گەرمێ ژی دێ ھێنە خوار و ھندەک جاران بریسی ژی دێ ل گەل بن.
ئ
اماژە دایە وێ چەندێ ژی کو رێژا باران بارینا پێشبینیکری ل سەنتەرێ پارێزگەھێن سلێمانی و دھۆک و ھەولێر و ھەلەبچە دێ د سەر 25ملم دا بیت و دھێتە پێشبینیکرن بەفر ژی ل دەڤەرێن چیایی و بلند و سنوری ب باریت.
پشکا پێشبینیان ل رێڤەبەریا گشتی یا سەقاناسی و بیڤەلەرزێ ل ھەرێما کوردستانێ ل دووماھیی ژی ئاشکەرا کریە کو کارتێکرنا ڤان فشاران ژی ھەتا رۆژا ئێکشەمبی دێ یا بەردەوام بیت.
نيشاندان