ئه‌ڤرۆنيوز:
كۆمه‌لگه‌ها حاجى ئۆمران يا نێڤده‌وله‌تى راگه‌هاند، ژبه‌ر كواليتيا خراب ونه بكێرهاتنێ بۆ بكارئينانێ، هه‌شت تانكه‌رێن پانزينێ هاتن زڤراندن بۆ ئيرانێ كو دپشكنينێ دا ده‌رنه‌چو بوو ل تاقيگه‌ها بنگه‌هێ پشكنينا سوته‌مه‌نيێ ل كۆمه‌لگه‌ها نێڤده‌وله‌تى يا حاجى ئۆمران.
كۆمه‌لگه‌ها ناڤبرى د رۆهنكرنه‌كێ دا به‌لاڤكر” ژبۆ نه‌هاتنا سوته‌مه‌نيا نه‌گونجاى بۆ بكارئينانێ، به‌رده‌وام رێگرى ل كه‌لوپه‌ل وكه‌ره‌ستێن خراب دهێته كرن كو دزياندارن بۆ ساخله‌ميا وه‌لاتيان وترۆمبێلێن وان”.
ئه‌ڤرۆنيوز:
رۆژنامه‌كا بريتانى ئاشكراكر كو هه‌ردو حوكمه‌تێن هه‌رێما كوردستانێ وعيراقێ يێن ژئه‌نجامدانا رێككه‌فتنه‌كێ بۆ هنارتنا په‌ترۆلا كه‌ركووكێ يێن نێزيك بووين.
رۆژناما(فاینانشیال تایمز) يا بريتانى دراپۆرته‌كا خوه دا به‌لاڤكر”چاڤه‌رێ دهێته كرن هه‌ولێر وبه‌غدا هه‌تا دووماهيا ڤێ هه‌يڤێ بگه‌هنه رێككه‌فتنه‌كا هه‌ڤپشك دبوارێ په‌ترۆلێ دا”.
رۆژناما ناڤبرى پشت به‌ستن ب چه‌ند ژێده‌رێن فه‌رمى، ئاماژه ب وێ چه‌ندێ كر كو نوكه ئاستێ هنارتنا په‌ترۆلا كه‌ركووكێ ب رێيا بۆريا په‌ترۆلا هه‌رێما كوردستانێ رۆژانه ژ 200 هزار بۆ 400 هزار به‌رميلانه وپشتى رێككه‌فتنێ ژى ئه‌و رێژه دێ بلند بيت.
ئه‌و رێككه‌فتن بۆ هنارتنا په‌ترۆلا عيراقێ يه ب رێيا بۆريا پترۆلا كوردستانێ (هه‌رێما كوردستانێ – به‌نده‌رێ جه‌يهان يێ توركى). چونكى ژبه‌ر سزايێن ئه‌مريكا ل سه‌ر كه‌رتێ ئابووريێ ئيرانێ، ئێدى عيراق نه‌شێت په‌ترۆلا كه‌ركووكێ بهنێريته ئيرانێ.
پشتى داگيركرنا باژێرێ كه‌ركووكێ ژئه‌نجامێ خيانه‌تا 16 ئوكتۆبه‌رێ، په‌ترۆلا كه‌ركووكێ ب تانكه‌ران دهاته هنارتن بۆ ئيرانێ ونوكه ژى پشتى سزايێن ئه‌مريكى ل سه‌ر ئيرانێ، بۆريا په‌ترۆلا كوردستانێ تاكه ده‌رگه‌هێ هنارتنا په‌ترۆلا كه‌ركووكێ وپارێزگه‌هێن باكوورێ به‌غدايه.
ل هه‌فتيا بۆرى وه‌زاره‌تا سامانێن سروشتى ل هه‌رێما كوردستانێ راگه‌هاندبوو كو بۆريا ڤه‌گوهاستنا په‌ترۆلا كوردستانێ بۆ به‌نده‌رێ جه‌يهان يێ توركى نوكه رۆژانه شيانێن ڤه‌گوهاستنا ئێك مليۆن به‌رميلێن په‌ترۆلێ يێن هه‌ى.
ئەڤرۆ نیوز، نەوزاد هلۆری:
پشتی کو روژناما ئەڤرۆ ده‌نگوباسێ سزادانا وەلاتیەکێ ئێک ژ گوندێن سنوورێ ناحيا مانگیشکێ بەلاڤکری، کو ژلایێ هێزێن پاراستنا ژینگەهێ ڤه ب گۆژمێ 60 ملیۆن دیناران هاتبوویە سزادان ، دادگەها دهۆک دووماهی بریار وەکو سزا ل سەر وی وەلاتی دەرکر.
پارێزەر بهادین دەشتانی ژ دادگەها دهۆک بۆ ئەڤرۆ نیوز گۆت: (پشتی کو بابەتێ برینا سێ هزار داران ژلایێ وەلاتیەکێ ئێک ژ گوندێن سنوورێ ناحیا مانگیشکێ یا سەر ب قه‌زا دهۆکێ ڤه گەهشتیە دادگەهێ، دادگەها دهۆک کەیسا وی وەلاتی ب رێڤەبەر و دووماهی بریار ل سەر ده‌ركر).
زێدەتر گوت: (ب گۆرەی بریارا دادگەهێ، ئەو وەلاتی ب سێ ملیۆن دیناران هاتە سزادان، هه‌كه وی سێ ملیۆن دینار نەبن، دێ ب سێ هەیڤان هێتە زيندانكرن).
دهێتە زانین کو ده‌سته‌سه‌ركرنا وی وەلاتی ددەمەکێ دایە کو برینا دارێن تەر قەدەغەیە، هەر کەسێ ب مەرەما سەخبێرکرنا رەز و بیستانێن خوە داران ببریت پێدڤیە مولەتێ ژ جهێن شولەژێ وەربگریت.
ئه‌ڤرۆ نيوز:
ژ ئه‌گه‌رێ باران بارينێن دژوار و له‌هيێن ب هێز، ب كێمى 11 كه‌سان ل ئوردن گيانێ خوه ژ ده‌ست دا، بارێ نه‌ئاسايى ژى هاتيه راگه‌هاندن و تيمه‌ك دووڤچوونا به‌رزه‌بوويان دكه‌ت.
رۆژا ئه‌ينى، باران بايرنه‌كا دژوار ل ئوردن بارى و زيانێن مه‌زن ڤێ كه‌فتن، هه‌تا نوكه بارێ نه‌ئاسايى يێ به‌رده‌وامه و تيمه‌كا هه‌وارهاتنێ ل گه‌ريان ب دووڤ به‌رزه‌بوويان دا يا به‌رده‌وامه كو ژ ئه‌گه‌رێ له‌هيان به‌رزه بووينه.
به‌ره‌ڤانيا باژێرى ل ئوردن ئه‌ڤرۆ راگه‌هاند كو ژمارا وان كه‌سێن گيانێ خوه ژ ده‌ست داين بۆ 11 كه‌سان بلند بوويه، هه‌ڤده‌م ئاخفتنكه‌ره‌كى ب ناڤێ حوكمه‌تا ئوردن راگه‌هانديه، تيمێن هه‌وارهاتنێ هه‌تا نوكه ل گه‌ريان ل دووڤ بێ سه‌روشوونبوويان يا به‌رده‌وامه.
هه‌روه‌سا ئاماژه ب وێ چه‌ندێ ژى كريه كو حوكمه‌تێ گه‌شتيێن 3700 گه‌شتيارى ژ باژێرێ بوتراو پاشخستينه هه‌تا مه‌ترسى نه‌مينيت و هه‌روه‌سان هه‌موو گه‌شتێن گه‌شتيارى ژى راگرتينه هه‌تا ره‌وش ئاسايى دبيت ژ ئه‌گه‌رێ سه‌قايى.
تيما به‌ره‌ڤانيا باژێرى نوكه ل دووڤ پێنج كه‌سان دگه‌ريێت كو له‌هيان ترۆمبێلێن وان برينه و ئه‌و ب خوه ژى د بێ سه‌روشوونن ل باشوورێ رۆژئاڤايێ عومانا پايته‌خت.
ئه‌ڤرۆ نيوز:
ئه‌ڤرۆ رۆژا شه‌مبى جڤاتا نوونه‌رێن عيراقێ دێ كۆم بيت و دانوستاندنێ ل سه‌ر پرسا لژنێن هه‌رده‌مى يێن په‌رله‌مان و پرسا هه‌لبژارتنێن جڤاتا پارێزگه‌هان بيت.
ب گۆره‌يى به‌رنامێ كۆمبوونا ئه‌ڤرۆ يێ په‌رله‌مانێ عيراقێ، كو مالپه‌رێ سه‌رۆكاتيا جڤاتا نوونه‌رێن عيراقێ به‌لاڤكريه، د كۆمبوونا ئه‌ڤرۆ رۆژا شه‌مبى دا جڤاتا نوونه‌رێن عيراقێ دێ دانوستاندنێ ل سه‌ر دو پرسان كه‌ت.
ب گۆره‌يى به‌رنامێ كاركرنێ، د ته‌وه‌رێ ئێكێ دا، دێ دانوستاندن ل سه‌ر پرسا لژنێن هه‌رده‌مى يێن په‌رله‌مانى هێته كرن، هه‌روه‌سا ته‌وه‌رێ دويێ يێ كۆمبوونێ دێ يێ تايبه‌ت بيت ب دانوستاندنێ ل سه‌ر پرسا هه‌لبژارتنا جڤاتێن پارێزگه‌هێن عيراقێ.
كۆمبوونا ئه‌ڤرۆ يا جڤاتا نوونه‌رێن عيراقێ بڕياره ل ده‌مژمێر 13:00 ب رێڤه بچيت.
ئه‌ڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا ئێكشه‌مبى رێکەفتی 12ی چريا دويێ 2018ێ ئه‌سمان دێ ساهى بيت ل گه‌ل هنده‌ك ئه‌ورێن كێم ل ده‌ڤه‌رێن جودا.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو دھێتە پێشبینیکرن ئه‌سمان ساهى بيت ل گه‌ل هنده‌ك ئه‌ورێن كێم ل ده‌ڤه‌رێن جودا.
پشکا پێشبینیان دایە زایە زانین کو دێ ئله‌زاتيا بايى د ناڤبەرا 5 ھەتا 10کم دا و ماوێ دیتنێ ژی دێ 10 دا بیت، پلێن گەرمێ ژی دێ د ناڤبەرا 12 بۆ 23 پلان دا بن.
ئه‌ڤرۆنيوز:
ب ده‌هان وه‌لاتيێن به‌سرا ئه‌ڤرۆ ئه‌ينيێ 9/11/2018 خوه‌نيشادانه‌ك كر وتێدا داخوازا هه‌رێمبوونا پارێزگه‌ها به‌سرا كر.
عه‌لى سارى، رۆژنامه‌ڤان ژ باژێرێ به‌سرا بۆ ئه‌ڤرۆنيوز گۆت” ئه‌ڤرۆ ب ده‌هان وه‌لاتيێن به‌سرا ل نێزيك (پرا دادگه‌هان) ل ناڤه‌راستا باژێرى خوه‌نيشادانه‌كا ئه‌نجامدا وتێدا داخوازا هه‌رێمبوونا پارێزگه‌ها به‌سرا كر”.
گۆت ژى” ب ديتنا وان خوه‌نيشانده‌ران، هه‌تا نوكه حوكمه‌تا عيراقێ وجڤاتا پارێزگه‌ها به‌سرا درژد نينن بۆ چاره‌كرنا ئاريشێن پارێزگه‌ها به‌سرا وبجهئينانا سۆزێن هاتينه دان پشتى خوه‌نيشادانێن به‌رفرهه يێن بۆرى”.
دياركر” له‌وما وان خوه‌نيشانده‌ران دياركريه كو تنێ هه‌رێمبوونا پاريزگه‌ها به‌سرا دێ مافێن خه‌لكێ وێ پارێزگه‌هێ بده‌ستڤه‌ئينيت”.
نيشاندان