ئه‌ڤرۆ نيوز:

ھێشتا تەرمێن 11 وەلاتیێن پارێزگەھا دھۆکێ یێن د ناڤ دەریا ئیجەدا خەندقین نەھاتینە دیتن و ‏بەرپرسەکێ فیدڕاسیۆنا پەنابەران ژی دیار کر کو چارەنڤیسێ وان تەرمان یێ دیارنینە و گۆت: ” ‏نێزیکی 250 وەلاتیێن ھەرێما کوردستانێ د ناڤ زیندانێن تورکیادانە و پێدڤی ب پاسپۆرتێن دەمکی ‏ھەیە بۆ ئازادکرنا وان”.‏

ئاری جەلال، رێکخەرێ فیدڕاسیۆنا پەنابەران ل ھەرێما کوردستانێ بۆ رۆژناما ئەڤرۆ دیار کر کو ‏ھەتا دوھی رۆژا شەمبی نوونەرێ فیدڕاسیۆنا پەنابەرێن ھەرێما کوردستانێ ل باژێڕێ ئیزمیر یێ ‏باکوورێ کوردستانێ بوویە بۆ زانینا چارەنڤیسێ تەرمێن وەلاتیێن زاخۆ ئەڤێن بەری دەمەکی د ‏بەلەمەکێ دا د ناڤ دەریا ئیجە دا خەندقین و گۆت: “بزاڤێن مە د بێ مفا بووین، مخان ھەتا نوکە ‏تەرمێن 11 ژوان پەنابەرێن دھۆکێ د دیار نینن، بەلێ دێ ھەر د بەردەوامبین ھەتا رۆژەکێ بھێنە ‏دیتن و ڤەگەڕاندن بۆ ھەرێما کوردستانێ”.‏

ناڤھاتی ئاماژە دا وێ چەندێ کو مخابن چوونا وەلاتیان ب رێ یێن نەقانوونی بۆ ئورۆپا یا ‏بەردەوامە، بەلێ بەھراپتریا ئەڤان پەنابەرێن ھەرێما کوردستانێ ژ لایێ پۆلیسێن تورکیا ڤە دھێنە ‏دەستەسەرکرن و د دەمێ نوکە دا نێزیکی 250 وەلاتیێن ھەرێما کوردستانێ د ناڤ زیندانێن وەلاتێ ‏تورکیادانە و گۆت: “ئەم نوکە کار دکەین ئەڤ وەلاتیە بۆ ھەرێما کوردستانێ بھێنە ڤەگەڕاندن، بەلێ ‏تورکیا مەرج دڤێت حوکمەتا بەغدا پاسپۆرتێن دەمکی بۆ دەرکە بکەت داکو بھێنە ڤەگەڕاندن، لەوڕا ‏دخوازین حوکمەتا ھەرێما کوردستانێ یا ھاریکاربیت ل دۆر ڤەگەڕاندنا پەنابەرێن خوە”.‏

ئه‌ڤرۆ نيوز:

ئەندامەکێ سەرکردایەتیا پارتی دیموکراتی کوردستان/ سووریا دیار دکەت کو سیاسەتا شاش یا ‏پەیەدێ کو ل سەر سنۆرێ تورکیا وێنێن سەرۆکێ پەکەکێ بلند دکەت و کادرێن پەکەکێ ل رۆژئاڤا ‏کار دکەن بوویە ئەگەرێ ھندێ تورکیا ھێرشی رۆژئاڤا بکەت و ھەکە ل کۆمبوونێن ھەولێر و ‏دھۆکێ ھەر دو جڤاتێن کوردی ئێکەتیا خوە دروست کربان ئەڤرۆکە تورکیا ژی گەف ل رۆژئاڤایێ ‏کوردستانێ نەدکرن.‏

حاجی کالو ئەندامێ سەرکردایەتیا پارتی دیموکراتی کوردستان/ سووریا بۆ رۆژناما ئەڤرۆ دیار کر ‏کو ئەڤرۆکە رەوشا رۆژئاڤایێ کوردستانێ باش نینە، راستە تورکیا سیاسەتەکا داگیرکەری ل ھەمبەر ‏رۆژئاڤایێ کوردستانێ برێڤە دبەت لێ پەیەدە وەکو سیاسەتا پەکەکێ یا ل قەندیلی بەھانە دانە ‏دەستێ تورکیا و گۆت: (دەمێ پەیەدە وێنێن ئوجەلانی ل سەر سنۆرێ تورکیا بلند بکەت و کادرێن ‏پەکەکێ ل رۆژئاڤا کار بکەن بێگومان تورکیا دێ ڤێ یەکێ رەت کەت و دێ ببیتە بەھانە دا گەفان ‏ل رۆژئاڤایێ کوردستانێ بکەت).‏

ل دۆر ھەلویستێ ئەمریکا ژی ناڤھاتی راگەھاند کو نھا ئەمریکا بۆ شەرێ ل دژی داعشێ و گرۆپێن ‏دی ل سووریێ پێدڤی ب پەیەدێ یە، لێ د دووماھیێ دا ئەمریکا ژی سیاسەتا پەیەدێ قەبوول ‏ناکەت و دێ رێ نەدەت ئەو وەکو خوە ل رۆژئاڤا سیاسەتێ بکەن، دەمێ ل ھەولێر و دھۆکێ ‏کۆمبوون د ناڤبەرا ھەر دو جڤاتێن کوردی ھاتنە گێران ئەم د رژد بووین کو ھەر دو جڤات ببنە ‏ئێک، ھەکە وی دەمی مە ئێکەتیا خوە دروست کربان نھا تورکیا ژی گەف نەدکرن، لێ پەیەدە ژ بەر ‏سیاسەتا خوە ئاستەنگی ل ھەمبەر ئێکەتیا ناڤمالیا کوردی دروست کرن و ژ بەر ھندێ ژی نھا ‏رەوشا رۆژئاڤایێ کوردستانێ گەلەکێ خرابە و گۆت: (لێ نھا ل پرانیا دەڤەرێن رۆژئاڤایێ کوردستانێ ‏ھێزێن ئەمریکا ھەنە، ئەمریکا ژی ژ بەر بەرژەوەندیێن خوە ب تایبەتی ژی ژ بەر ئیرانێ ‏ناخوازیت ژ سووریێ دەرکەڤیت و رەنگە نھا ئەمریکا رێ نەدەت کو تورکیا ھێرش بکەت، لێ ئەڤ ‏رەوشە ژی ھەتا دووماھیێ وەسا بەردەوام نابیت و دڤێت پەیەدێ پێداچوونێ د ھەلویستێ خوە دا ‏بکەت).‏

حاجی کالو د بەردەوامیا ئاخڤتنا خوە دا ئەو یەک ژی دیار کر کو بێگومان تورکیا دخوازیت رۆژئاڤا ‏داگیر بکەت و ناخوازیت چو دەستکەفتیێن کوردان ل سووریێ ھەبن، لێ ھەکە پەیەدێ بەھانە ‏نەدابانە دەستێ تورکیا ئەڤرۆکە تورکیا ژی گەف ل رۆژئاڤایێ کوردستانێ نەدکرن، مخابن ژ بەر ‏سیاسەتا وان یا شاش ئەڤرۆکە رەوشا رۆژئاڤا ب گشتی خرابە و ھەکە شەرەک ژی روو بدەت دێ ‏کارەساتێن مەزن روو دەن و گۆت: (ژ بەر ھەمان سیاسەتێ و شاشیێن کو کرن بوو ئەگەرێ ھندێ ‏عەفرین ژی کەفتە دەستێ تورکیا و گرۆپێن سەر ب وێ ڤە و ئەڤرۆکە رۆژانە کارەساتێن دلتەزین ل ‏عەفرینێ روو ددەن).‏

ناڤھاتی د دووماھیا ئاخڤتنا خوە دا ئەو یەک ژی دیار کر کو سەرۆک بارزانی چەند سال بەری نھا ‏دزانی کو دێ رەوش وەسا خراب لێ ھێت و ژ بەر ھندێ ژی گەلەک بزاڤ کرن کو ھەر دو جڤاتێن ‏کوردی ل سووریێ ئانکۆ ئەنجوومەنێ نیشتمانی یێ کوردی ل سووریێ ل گەل تەڤگەرا جڤاکێ ‏دیموکرات ببنە ئێک و دو کۆمبوون ل ھەولێر و کۆمبوونەک ژی ل دھۆکێ ھاتنە کرن لێ مخابن ‏پەیەدێ و پەکەکێ نەھێلان ئێکەتیا کوردان ل رۆژئاڤایێ کوردستانێ دروست ببیت.‏

ئەڤرۆ نيوز:‏

پەیڤدارێ جڤاتا سەرکرداتیا پارتی دیموکراتی کوردستان ل سلێمانیێ و ‏ھەلەبچە راگەھاند،ھەلبژارتنێن 30 ئیلونا ئەڤسالە نەخشەک ‏دروستکریە بۆ ھەموو ھێزو لایەنێن سیاسی ل سلێمانی تێدا د رێڤەبرنا ‏باژێری دا پشکداربن،پێدڤی و فەرەوە ھەر لایەنەکێ پشکدار بیت ل ‏حوکمەتێ ل گوری ئەنجامێن ھەلبژارتنان بیت و ئەو دەنگێن ب دەست ‏ڤەئینای رێزگرتنە ل ئیرادەیا خەلکی و پروسا دیموکراسیا ھەلبژارتنان ‏، پارتی پوست و پلە گرنگ نینن بۆ پارتی گرنگە کومبوون ل سەر پروژێن ‏نیشتیمانی و ئێک دەنگ بین .‏

عەتا شێخ حەسەن پەیڤدارێ جڤاتا سەرکرداتیا پارتی دیموکراتی ‏کوردستان ل سلێمانیێ و ھەلەبچە بۆ روژناما ئەڤرۆ گوت: قوناغا ‏ھەلبژارتنا دەربازبۆیە بەلێ سروشت و ژینگەھا پارتی پرسێن نیشتیمانی ‏و ئەو پرسێن پەیوەندی ب نەتەوی و نیشتیمانی ڤە ھەنە ناکەتە ‏قوربانی سەر کێشیا ھندەک لایەنێن سیاسی ، بەرامبەر وان ئاریشەیێن ‏بەری نوکە بۆ پارتی دیموکراتی کوردستان ھاتیە دروستکرن پارتی خوە ‏ب بەرپرس دزانیت لسەر پرسیێن نیشتیمانی ئاڤا کرنا کوردستانێ ‏،سیاسەتا پارتی دیموکراتی کوردستان لسەر رێکخستنا جڤاکیە ل بارا ‏چەوانیا پەیوەندیێن ناڤبەرا تاکێن جڤاکی و دەسھەلاتێ و جڤاکی و ‏لایەنێن سیاسی ،ب گشتی پارتی دیموکراتی کوردستان کار لسەر ‏رێکخستنا جڤاکی دکەت ل کوردستانێ لەورا پارتی دیموکراتی کوردستان ‏دخوازیت پەیوەندیێن وی ل گەل ھەمو لایەنێن سیاسی یێن کوردستانێ ل ‏ئاستەکێ باش و بلند دابن.‏

عەتا گوتژی : ئەڤ قوناغا نوکە کوردستان تێدا دەرباز دبیت قوناغەکا ‏ھەستیار و گرنگ و مێژوو یە لەورا پێدڤیە جوداھیێن خوە کێم بکەین ‏،پارتی دیموکراتی کوردستان بەرژەوەندیا گشتی ل ئەرکیدا دبینیت نەک ‏پوست و پلەیا ، ل بانگەشەیا ھەلبژارتنێن 30 ێ ئیلونێ پارتی دروشمێ ‏ئاڤاکرنا کوردستانەکا ب ھێز بلندکر بەلێ پێدڤیە ھەمو لایەک ب ‏شەراکەت پشکداربن.‏