ئه‌ڤرۆ نيوز:

د هه‌لبژارتنێن كۆنگرێسێ ئه‌مريكا دا، ديموكرات شيان سه‌ركه‌فتنێ ب ده‌ست ڤه‌ بينن و پتريا كورسيێن جڤاتا نوونه‌رێن ئه‌مريكا بۆ خوه‌ مسوگه‌ر بكه‌ن.

ميديايێن ئه‌مريكا ئه‌نجامێن هه‌لبژارتنان به‌لاڤكرن و ب گۆره‌يى ئه‌نجامێن ده‌سپێكى ديموكرات شيان ژ سه‌رجه‌مێ 435 كورسيێن جڤاتا نوونه‌ران 206 كورسيان ببه‌ن، د به‌رامبه‌ر دا كۆماريان 188 كورسى ب ده‌ست ڤه‌ ئينان. هه‌ڤده‌م كۆمارى شيان د جڤاتا پيران دا ژ سه‌رجه‌مێ 100 كورسيان 51 كورسيان ب ده‌ست ڤه‌ بينن.

ژ لايێ خوه‌ ڤه‌ دۆنالد تره‌مپ سه‌رۆك وه‌لاتێن ئێكگرتى يێن ئه‌مريكا پيرۆزباهى ل نانسى پيلۆسى سه‌رۆكا جڤاتا نوونه‌ران كر كو ژ ئه‌گه‌رێ سه‌ركه‌فتنا ديموكراتيان.

ئه‌ڤا جهێ سه‌رنجێ بوو، سه‌ركه‌فتنا رێژه‌كا زۆر يا ژنان بوو بۆ كۆنگرێسى كو ريكورده‌كێ مێژوويى ل وى وه‌لاتى تۆماركر پشتى 89 ژن شياين بگه‌هنه‌ كۆنگرێسى.

هه‌رديسا بۆ جارا ئێكێ يه‌ د مێژوويا ئه‌مريكا دا ژنه‌كا موسلمان ل ويلايه‌تا فلوريدا سه‌ركه‌فتنێ ب ده‌ست ڤه‌ بينيت و خوه‌ بگه‌هينيته‌ كۆنگرێسێ ئه‌مريكا.

ئه‌ڤه‌ دده‌مه‌كى دايه‌ كو بۆ ڤان دو سالان دۆنالد تره‌مپ د ره‌وشه‌كا باش دا نابيت ب تايبه‌ت كو ديموكراتيا ده‌سته‌لات گرته‌ ده‌ست و ب گۆره‌يى چاڤدێران ديموكراتى دێ گه‌له‌ك دژاتيا كۆماريان و پرۆژێن تره‌مپ كه‌ن د ڤى ماوه‌يى دا.

ئەڤرۆ نيوز:‏

رۆژناما واشنتۆن پۆست دوھی د راپۆرتەکێ دا دیار کر کو بەرپرسێن ئیرانێ باش دزانن کو سزایێن ‏ڤێجارێ گەلەکێ گرانن و دێ کارتێکرنەکا مەزن ل سیستەمێ ئیرانێ کەت، ژ بەر ھندێ ژی نھا ل ‏گەلەک رێیێن نوو دگەرن کو بشێن کارتێکرنا سزایان کێم بکەن و ئێک ژ وان رێیان ژی عیراقە کو ‏ئیران دخوازیت ب رێیا عیراقێ پەیوەندیێن خوە ل گەل جیھانا دەرڤە بەردەوام بکەت.‏

ل ئالیێ دی چاڤدێرێن سیاسی ژی دیار دکەن کو ئیران دخوازیت دەڤەرا سلێمانیێ بۆ شکاندنا ‏سزایێن ئابووری بکار بینیت و ژ بەر ھندێ ژی ئەمریکا ھۆشداری دایە بەرپرسێن عیراقێ کو ھەکە ‏سەرپێچیان بکەن دێ ب توندی ھێنە سزادان، لێ ھەتا نھا ژی لێگەرینێن ئیرانێ بەردەوامن کو ب ‏رێیا عیراقێ بشێت رەوشا خوە یا ئابووری باش بکەت.‏

ئه‌ڤرۆ، ھۆشەنگ تاجر:‏

سیاسەتمەدارەکێ رۆژئاڤایێ کوردستانێ دیار دکەت کو نھا ناکۆکیێن ئەمریکا و روسیا ل دۆر سووریێ ‏و رۆژئاڤایێ کوردستانێ زێدە بووینە و روسیا ژی تورکیا ل دژی ئەمریکا ل سووریێ بکار دئینیت و ‏مخابن کورد ژی د ناڤا خوە دا ئێکگرتی نینن و ژ بەر ھندێ ژی رەوشا رۆژئاڤایێ کوردستانێ یا باش ‏نینە.‏

د. رەزوان بادینی مامۆستایێ زانکۆیێ و سیاسەتمەدارێ رۆژئاڤایێ کوردستانێ د دیدارەکێ دا ل گەل ‏رۆژناما ئەڤرۆ دیار کر کو بەری نھا ئەز ل روسیا بووم و چەندین جاران ئەز ل گەل وەزیرێ دەرڤە ‏یێ روسیا سیرگیێ لاڤرۆڤ کۆمبووم، لاڤرۆڤی چەندین جاران بۆ من گۆت کو ئەمریکا دخوازیت ‏دەولەتەکا کوردی ل باکورێ سووریێ دروست بکەت و ئەم ڤێ یەکێ قەبوول ناکەین، من ژی بۆ وی ‏گۆت کو چو تشتێن وەسا نینن و ھێزێن کوردی ل سووریێ ژی نھا چو داخوازەکا وەسا ناکەن و ‏دخوازن د سووریەکا نوو دا بژین و گۆت: ( تشتێ نھا دیارە ناکۆکیێن ئەمریکا و روسیا ل دۆر ‏سووریێ و رۆژئاڤایێ کوردستانێ بەرفرەھتر بووینە، بەری نھا گەلەک کۆمبوون د ناڤبەرا ھەر دو ‏دەولەتێن زلھێز دا ھەبوون، دیارە نەشیاینە بگەھنە چو رێککەفتنان و ناکۆکی ژی زێدەتر بووینە).‏

ناڤھاتی ئەو یەک ژی دیار کر کو مخابن ناکۆکیێن د ناڤبەرا ئەمریکا و روسیا دا دێ کارتێکرنەکا ‏خوە یا خراب ل سووریێ و رۆژئاڤایێ کوردستانێ کەت، نھا تورکیا پتر ژ ھەر دەمەکێ گەفان ل ‏رۆژئاڤایێ کوردستانێ دکەت، ئاشکرایە کو پشتا تورکیا ب روسیا گەرمە و روسیا تورکیا بۆ ‏بەژەوەندیێن خوە ل سووریێ بکار دئینیت و چەندین جارن سەرۆک کۆمارێ تورکیا ب رەنگەکێ ‏ئاشکرا دبێژیت ئەم ناھێلین چو کیانەکێ کوردی ل سووریێ ئاڤا بیت و دێ ھێرشی رۆژھەلاتێ ‏فراتێ کەین، بێگومان ئەو یەک ژی نیشا ددەت کو پاشەرۆژا رۆژئاڤایێ کوردستانێ باش نینە و ‏مەترسیێن مەزن ل سەر رۆژئاڤا یێت ھەین و گۆت: (مخابن بەری نھا ژی تورکیا رۆلەک خراب ل ‏دۆر رۆژئاڤایێ کوردستانێ دگێرا، تورکیا بۆ ھێزێن کوردی یێن د ناڤا ئۆپۆزسیۆنا سووریا دا دگۆت ‏ھوون ئێکەتیا خوە دروست بکەن ھەوە چ بڤێت ئەم دێ پشتەڤانیێ ل داخوازیێن ھەوە کەین، لێ ‏ئالیێ دی بۆ ھێزێن ئۆپۆزسیۆنا سووریێ ژی دگۆت کو نابیت ب چو رەنگەکێ ھوون داخوازیێن ‏کوردان قەبوول بکەن دڤێت کورد ل سووریێ نەبنە دەستھەلات و ئەو یەک ژی ئاشکرا دبیت کو ‏تورکیا رۆلەکێ خراب ل دۆر رۆژئاڤایێ کوردستانێ دگێریت و نھا ب پشتەڤانیا روسیا پتر ل ھەمبەر ‏کوردێن رۆژئاڤا دژوار بوویە).‏

سیاسەتمەدارێ رۆژئاڤایێ کوردستانێ ل دۆر ھەلویستێ ئەمریکا ژی دیار کر کو ئەمریکا ب چو ‏رەنگەکێ ناخوازیت دەستان ژ رۆژئاڤایێ کوردستانێ بەردەت، چونکو ئەمریکا دبینیت رۆژئاڤایێ ‏کوردستانێ جھەکێ ستراتیژیە و دەڤەرەکا خوەدان پەترۆلە و ل ئالیێ دی ژ بەر رۆلێ ئیرانێ ل ‏سووریێ ژی ئەمریکا ناخوازیت ژ رۆژئاڤایێ کوردستانێ دەرکەڤیت، لێ وەکو من گۆتی ژ بەر ‏ناکۆکیێن وان ل گەل روسیا و تورکیا ئەمریکا ژی ھەتا نھا نەشیایە چو بەرنامەکێ ل دۆر مافێن ‏کوردان پێشکێش بکەت و ھاریکاریێن ئەمریکا یێن بۆ ھێزێن سووریا دیموکرات ژی ژ بەر شەرێ ل ‏دژی داعشێ نە و گۆت: (لێ ئاریشا سەرەکی کورد بخوە نە، ھەتا نھا ژی ھێزێن کوردی ل سووریێ ‏نەشیاینە ئێکەتیا خوە دروست بکەن، ھەتا کورد د ناڤا خوە دا پارچە بن بێگومان ھێزێن جیھانی ‏ژی چو حسابەکێ بۆ وان ناکەن).‏